Hurmat Waale Maheeno'n Me'n Se Ek Maheena Allaah Rabbul Izzat Ke Nazdeek Moharram Bhi Hai, Jiska Pehla Ashrah Bahot Hi Barkato'n Aur Azmato'n Waala Hai, 10 Moharramul Haraam (Jisko Yaum e Aa'shoora Kehte Hai'n) Ko Ek Khaas Maqaam Haasil Hai, Isko Azmat, Fazeelat Wa Barkat Haasil Hai Aur Rozah Rakhne Ke Silsile Me'n Muta'addid Ahaadees e Mubaaraka Maujood Hai'n.
Chunaanche Hazrat Abu Hurairah Radiallaahu Anhu Bayaan Farmaate Hai'n Ke Rasoolullaah ﷺ Ne Irshaad Farmaaya "Maahe Ramzaan Ke Rozo'n Ke Ba'ad Sabse Zyaadah Fazeelat Waale Roze Moharram Ke Hai'n" (Sunane Abu Daawood, Kitaabus Siyaam, Baab Fi Saumul Moharram, Safha No.230)
Aur Hazrat Maula Ali Radiallaahu Anhu Se Riwaayat Hai Ke Ek Shakhs Ne Rasoolullaah ﷺ Se Dariyaaft Kiya Aur Mai'n Wahaa'n Par Baitha Huwa Tha, Ya Rasoolallaah ﷺ ! Ramzaan Ke Ba'ad Kis Maheene Ke Roze Ka Mujhko Hukm Dete Hai'n ? Aap ﷺ Ne Irshaad Farmaaya "Agar Ramzaan Ke Ba'ad Kisi Maheene Me'n Rozah Rakhna Chaahta Hai To Moharram Ka Rakh, Isliye Ke Yeh Allaah Ka Maheena Hai, Iss Maheene Me'n Ek Din Aisa Hai Jisme'n Allaah Paak Ne Ek Qaum Ki Taubah Qabool Farmaayi Aur Iss Din Aa'indah Doosro'n Ki Taubah Qabool Farmaayega. (Sunane Tirmizi, Kitaabus Saum, Baab Maaja Fi Saumul Moharram, Safha No.157)
Hazrat Aa'yesha Siddeeqa Radiallaahu Anha Bayaan Farmaati Hai'n "Rasoolullaah ﷺ Aa'shoora (10 Moharramul Haraam) Ka Rozah Rakhte Aur Iske Rakhne Ka Hukm Dete The". (Sunane Ibne Maaja, Kitaabus Saum, Baab Siyaam Yaum e Aa'shoora, Safha No.144)
Hazrat Abdullaah Bin Abbaas Radiallaahu Anhuma Se Riwaayat Hai Ke Rasool e Akram ﷺ Madeena e Munawwarah Tashreef Laaye To Dekha Ke Yahood Aa'shoora Ka Rozah Rakhte Hai'n, Rasoolullaah ﷺ Ne Unse Farmaaya, Yeh Kaisa Din Hai Jiska Tum Rozah Rakhte Ho? Yahood Ne Kaha, Yeh Bada Din Hai Jisme'n Allaah Paak Ne Moosa Alaihissalaam Aur Unki Qaum Ko Nijaat Di Thi, Aur Fir'aon Aur Uski Qaum Ko Garq Kiya Tha, Iske Shukriya Me'n Moosa Alaihissalaam Ne Rozah Rakha, Ham Bhi Isiliye Rozah Rakhte Hai'n, Aap ﷺ Ne Farmaaya "Ham Moosa Alaihissalaam Ke Tareeqe Ki Pairwi Aur Itteba Ke Zyaadah Haqdaar Hai'n Aur Unse Qareeb Hai'n, Chunaanche Rasool e Akram ﷺ Ne Khud Bhi Rozah Rakha Aur Musalmaano'n Ko Bhi Aa'shoora Ke Roze Ka Hukm Diya. (Saheeh Muslim, Kitaabus Saum, Baab Saum Yaum e Aa'shoora, Jild No.1, Safha No.359)
Nabi e Akram ﷺ Ke Irshaadaat e Aa'liya Ki Roshni Me'n Moharramul Haraam Aur Yaum e Aa'shoora Ki Fazeelat Wa Ahmiyat Aur Barkat e Azhar Min Shams Hai, Yaum e Aa'shoora Ke Fazaa'il Ko Padh Kar Chaahiye To Yeh Tha Ke Ham Iss Din Rozah Rakhte, Nafil Namaaz Padhte, Aur Zikr Wa Azkaar Me'n Masroof Rehte, Magar Afsos ! Ham Iss Din Khuraafaat Wa Waahiyaat Me'n Lage Rehte Hai'n, Murawwajah Ta'ziya Ko Badi Ahmiyat Dete Hai'n, Ta'ziya Ko Lekar Jagah Jagah Dhol, Taashe Aur Qism Qism Ke Baaje Ke Saath Juloos Nikaalte Hai'n, Bahot Se Naujawaan Sharaab Ke Nashe Me'n Rehte Hai'n Jiski Wajah Se Kahee'n Na Kahee'n Fasaad Zaroor Paida Hota Hai, Aur Basa Auqaat Jaan Maal Ka Bhi Nuqsaan Ho Jaata Hai, Had To Yeh Hai Ke Muslim Aurate'n Bhi (Jinko Parde Me'n Rehne Ka Hukm Diya Gaya Hai) Tamaasha Dekhne Keliye Ghar Se Nikal Jaati Hai'n, Aur Husn Ka Izhaar Karke Da'wat e Nazaarah Deti Hai'n, Khud Bhi Gunaahgaar Hoti Hai'n Aur Doosro'n Ko Bhi Gunaahgaar Karti Hai'n, Hazrat Qaasim Radiallaahu Anhu Ki Me'nhdi Nikaalte Hai'n, Ta'ziya Daari Ke Silsile Me'n Koi Paik Banta Hai Jiske Kamar Se Ghu'ngru Bandhe Rehte Hai'n, Kisi Bachche Ko Faqeer Banaaya Jaata Hai Aur Uske Gale Me'n Jhola Daal Kar Use Ghar Ghar Bheek Ma'ngwaaya Jaata Hai, Ba'az Maqaamaat Par Log Noha, Maatam Aur Seena Koobi (Seena Peetna) Karte Hai'n, Ta'ziyo'n Ke Paas Marsiya Padha Jaata Hai (Jabke Iss Marsiye Me'n Aksar Galat Waaqe'aat Padhe Kiye Jaate Hai'n) Unhe'n Hosh Bhi Nahee'n Rehta Ke Ham Kya Padh Rahe Hai'n, Yeh Sab Na Jaa'iz Wa Gunaah Ke Kaam Hai'n.
Aa'la Hazrat Imaam Ahmad Raza Khaan Faazile Barelvi Alaihir Rehma Tehreer Farmaate Hai'n, "Dhol Taashe, Mujre, Marsiye, Maatam, Masnooyi Karbala Ko Jaana, Aurato'n Ka Ta'ziye Dekhne Ko Nikalna, Yeh Sab Baate'n Haraam Wa Gunaah Wa Na Jaa'iz Wa Mana Hai'n. (Fataawa Razviya, Jadeed, Jild No.24, Safha No.499/501, Raza Foundation, Laahor)
Neez Ek Sawaal (Ta'ziya Daari Me'n Lahab Wa La'ab (Ya'ni Khel Kood Aur Tamaasha) Samajh Kar Jaaye To Kaisa Hai?) Ke Jawaab Me'n Irshaad Farmaate Hai'n, "Nahee'n Jaana Chaahiye, Na Jaa'iz Kaam Me'n Jis Tarah Jaan Maal Se Madad Karega Yoo'n Hi Sawaad (Ya'ni Giroh) Bada Karke Bhi Madadgaar Hoga, Na Jaa'iz Baat Ka Tamaasha Dekhna Bhi Na Jaa'iz Hai, (Malfoozaat e Aa'la Hazrat, Hissa Duwwam, Safha No.486)
Aur Sadrush Sharee'ah Mufti Amjad Ali Aa'zami Alaihir Rehma Ek Sawaal Ke Jawaab Me'n Farmaate Hai'n, Alam Wa Ta'ziyat (Murawwaja Ta'ziya Banaana) Bid'at Hai, Balke Se'nkdo'n Bid'ato'n Ke Majmooye Ka Naam (Murawwaja) Ta'ziya Daari Hai". (Fataawa Amjadiya, Jild No.4, Safha No.63)
Isi Tarah Faqeehe Millat Mufti Jalaaluddeen Amjadi Alaihir Rehma Ek Sawaal Ke Jawaab Me'n Farmaate Hai'n, "Ta'ziya Daari Karna Jaisa Ke Aajkal Hindustaan Me'n Raa'ij Hai Aur Baaja Bajaana Haraam Wa Na Jaa'iz Wa Bid'ate Sayya'ah Hai Aur (Murawwaja) Ta'ziya Daar Bid'at Hai". (Fataawa Barkaatiya, Safha No.450)
Bahot Se Log Ta'ziye Ki Mannat Maa'ngte Hai'n (Ispar Laakho'n Rupiya Kharch Karte Hai'n) Aur Isko Poori Karna Zaroori Samajhte Hai'n, Jabke Aisi Mannat Ka Sharee'at e Mutahharah Se Koi Ta'alluq Nahee'n Hai, Aa'la Hazrat Imaam Ahmad Raza Khaan Faazile Barelvi Alaihir Rehma Tehreer Farmaate Hai'n "Alam, (Murawwaja) Ta'ziye, Me'nhdi Aur Unki Mannat...Yeh Sab Baate'n Haraam Wa Gunaah Wa Na Jaa'iz Wa Mana Hai" Aur Fataawa Razviya Hi Me'n Hai "Ta'ziya Ko Haajat Rawa Ya'ni Zariya e Haajat Rawa Samajhna Jahaalat Par Jahaalat Hai Aur Ise Mannat Jaanna Aur Himaaqat, Aur Na Karne Ko Baa'ise Nuqsaan Khayaal Karna Bhi Himaaqat Hai Musalmaano'n Ko Aisi Harkaat Wa Khayaal Se Ba'az Aana Chaahiye". (Fataawa Razviya, Jild No.24, Safha No.500)
Aur Sadrush Sharee'ah Hazrat Allaama Mufti Amjad Ali Aa'zami Alaihir Rehma Tehreer Farmaate Hai'n "Inki (Ta'ziya Ki) Mannat Sakht Jahaalat Hai Aisi Mannat Maanni Na Chaahiye Aur Maani Ho To Poori Na Kare" (Fataawa Amjadiya, Hissa Nahum, Jild No.4, Safha No.318)
Mannat :- Nazar Ek Qism Ki Ibaadat Hai Isliye Hame'n Sirf Un Cheezo'n Ki Mannat Maa'ngni Chaahiye Jinke Zariye Allaah Rabbul Izzat Ki Ibaadat Hoti Ho, Maslan Mera Fulaa'n Kaam Ho Gaya To Mai'n 2 Rak'at Namaaz Padhoo'nga, Roze Rakhoo'nga Ya Sadqa Karoo'nga Wagairah, Bukhaari Shareef Me'n Hai,
"Hazrat Abdullaah Bin Abbaas Radiallaahu Anhuma Bayaan Farmaate Hai'n "Nabi e Kareem ﷺ Khutba Farma Rahe The Ke Ek Shakhs Ko Khada Huwa Dekha, Uske Muta'alliq Dariyaaft Farmaaya To Logo'n Ne Arz Ki ! Yeh Abu Israa'il Hai Isne Mannat Maani Hai Ke Khada Rahega Baithega Nahee'n Aur Apne Upar Saaya Nahee'n Karega Aur Kalaam Na Karega Aur Rozah Rakhega, Aap ﷺ Ne Irshaad Farmaaya Ke Use Hukm Do Ke Kalaam Kare Aur Saaya Me'n Jaaye Aur Baithe Aur Apne Roze Ko Poora Kare. (Saheeh Bukhaari, Kitaabul Imaan Wal Nazar, Baab Nazar Feema La Yamlik Wa Fi Ma'siyah, Jild No.4, Safha No.991)
Ba'az Maqaamaat Par Log Ta'ziya Ke Saamne Faateha Padhna Zaroori Samajhte Hai'n Jabke Yeh Saraasar Jahaalat Hai, Lehaaza Faateha Ghar Par Padhe Ya Masjid Me'n, Fataawa Razviya Me'n Hai "Faateha Jaa'iz Hai, Roti, Sheerni, Sharbat Jis Cheez Par Ho, Magar Ta'ziya Par Rakh Kar Ya Uske Saamne Hona Jahaalat Hai, Aur Uss Par Chadhaane Ke Sabab Tabarruk Samajhna Himaaqat Hai Haa'n Ta'ziya Se Juda Jo Khaalis Sachchi Niyat Se Hazraat Shohda e Kiraam Radiallaahu Anhum Ki Niyaaz Ho Woh Zaroor Tabarruk Hai". (Fataawa Razviya, Jild No.24, Safha No.499)
Aur Fataawa Amjadiya Me'n Hai Ke "Ta'ziya Ya Alam Ke Saamne Faateha Nahee'n Dena Chaahiye, Balke Makaan Par Ya Masjid Me'n Faateha Dilwaaye, Jis Tarah (Murawwaja) Ta'ziya Daari Na Jaa'iz Hai Usme'n E'aanat (Madad Karna) Bhi Na Jaa'iz Hai, (Fataawa Amjadiya, Jild No.4, Safha No.185)
Ham Tha'nde Dimaag Se Zara Gaur To Kare'n ! Ke Sayyaduna Imaam Husain Radiallaahu Anhu Aur Deegar Shohda e Karbala Radiallaahu Anhum Ke Naam Par Yaum e Aa'shoora Me'n Jin Af'aal Ko Anjaam De Rahe Hai'n, Kya Yeh Unki Qurbaaniyo'n Ke Saath Insaaf Hai ? Sayyaduna Imaam Husain Radiallaahu Anhu Aur Deegar Shohda e Karbala Radiallaahu Anhum Hamse Khush Ho'nge ? Yaqeenan Aapka Jawaab "Na" Me'n Hoga, To Phir Ham Kyu'n Na Woh Kaam Kare'n Jisse Allaah Rabbul Izzat Aur Uske Rasool ﷺ Aur Imaam Husain Radiallaahu Anhu Khush Ho'n, Maslan, Uss Din Rozah Rakhe'n, Nafil Namaaz Ada Kare'n, Imaam Husain Wa Ahle Bait Wa Sahaaba Ke Fazaa'il Bayaan Kare'n, Mehfil e Meelaad Ka Ine'qaad Kare'n, Du'aaye Aa'shoora Padhne Ka Ahtemaam Kare'n, Sayyaduna Imaam Husain Radiallaahu Anhu Aur Deegar Shaheedaan e Karbala Radiallaahu Anhum Ke Isaale Sawaab Keliye Guraba Wa Masaakeen Me'n Sadqa Wa Khairaat Taqseem Kare'n, Ghar Waalo'n, Rishtedaaro'n Aur Azeez Wa Aqaarib Ko Bulaakar Ghar Par Qur'aan Khwaani Ka Ahtemaam Kare'n, Sharbat, Mithaayi, Maleedah, Khichda Wagairah Hasb e Istetaa'at Jo Mayassar Ho Uspar Faateha Padhe'n Aur Haazireen Me'n Taqseem Kare'n, Yeh Sab Jaa'iz Aur Kaar e Sawaab Hai'n.
Sadrush Sharee'ah Hazrat Allaama Mufti Amjad Ali Aa'zmi Alaihir Rehma Tehreer Farmaate Hai'n "Ashra e Moharram Me'n Majlis Muna'qid Karna Aur Waaqe'aat e Karbala Bayaan Karna Jaa'iz Hai Jabke Riwaayat e Saheeh Bayaan Ki Jaaye'n, Un Waaqe'aat Me'n Sabr Wa Tahammul Raza Wa Tasleem Ka Mukammal Dars Hai Aur Paabandi e Ahkaam e Sharee'at Wa Itteba e Sunnat Ka Zabardast Amali Saboot Hai Ke Deen e Haq Ki Hifaazat Me'n Tamaam Aa'zah Wa Aqraba Wa Rufaqa Aur Khud Apne Ko Raah e Khuda Me'n Qurbaan Kiya Aur Jaza Faza Ka Naam Bhi Aane Na Diya, Magar Iss Majlis Me'n Sahaaba e Kiraam Radiallaahu Anhum Ka Bhi Zikr Khair Hona Chaahiye Taake Ahle Sunnat Wa Jamaa'at Aur Shiyo'n Ki Majlis Me'n Farq Wa Imtiyaaz Rahe. (Bahaar e Sharee'at, Jild No.3, Hissa 16, Safha No.646)
Ab Sawaal Yeh Paida Hota Hai Ke Kya Mutlaqan (Har Tarah Ka Ta'ziya Banaana) Na Jaa'iz Hai ? To Jawaab Yeh Hai Ke Nahee'n, Bilkul Nahee'n, Mutlaqan Ta'ziya Daari Na Jaa'iz Wa Bid'at Nahee'n, Balke Jo Ta'ziya Khuraafaat, Lagviyaat, Lahab Wa La'ab, Tamaasha Aur Chadhaawa Se Khaali Ho Aur Karbala Aur Roza e Imaame Husain Radiallaahu Anhu Ki Shakl Ho Aise Ta'ziya Ki Ziyaarat Keliye Jaana To Hamaare Buzurgaan e Deen Ka Tareeqa Raha Hai, Jaise Sarkaar Mufti e Aa'zam Hind Allaama Mustafa Raza Khaan Barelvi, Sher Basheh Ahle Sunnat Allaama Hashmat Ali Khaan Barelvi Aur Silsila e Ashrafiya Ke Ma'roof Wa Mash'hoor Buzurg Hazrat Sayyad Mukhtaar Ashraf Al-Ma'roof Sakaar e Kalaa'n Rehmatullaah Alaihum.
Dhol, Baaje, Gaane, Tamaashe, Yeh Musalmaano'n Ka Shewah Nahee'n, Khudaara In Khuraafaat Ko Ta'ziya Se Paak Rakhe'n Aur Sirf Aur Sirf Roza e Imaame Husain Radiallaahu Anhu Aur Karbala Ki Shakl Ka Hi Ta'ziya Banaaye'n.
(To Mohtaram Qaari'een Hame'n Chaahiye Ke Hamaare Ulama Ne Jin Baato'n Ki Taraf Tawajjeh Dilaayi Hai Ham Woh Kare'n Aur Jin Baato'n Se Hame'n Mana Kiya Usse Bache'n Tab Jaakar Hamaari Sachchi Aqeedat Wa Mohabbat Shohda e Karbala Radiallaahu Anhum Ke Ta'alluq Se Mukammal Hogi.
By Alahazrat Foundation Research Team - 7710809266/9892708816
