Murtad Ki Ta'reef :- Murtad Woh Shakhs Hai Ke Islaam Ke Ba'ad Kisi Aise Amr (Baat) Ka Inkaar Kare Jo Zarooriyaat e Deen Se Ho, Ya'ni Zabaan Se Kalma e Kufr Bake Jisme'n Taaweel e Saheeh Ki Gunjaa'ish Na Ho, Yoo'n Hi Ba'az Af'aal (Kaam) Bhi Aise Hai'n Jinse Kaafir Ho Jaata Hai Maslan But Ko Sajdah Karna, Qur'aan e Paak Ko Najaasat Ki Jagah Phe'nk Dena, (Bahaar e Sharee'at, Hissa No.9, Safha No.173)
Munaafiq Ki Ta'reef :- Zabaan Se Islaam Ka Da'wa Karna Aur Dil Me'n Islaam Se Inkaar Karna Nifaaq Hai, Yeh Bhi Khaalis Kufr Hai, Balke Aise Logo'n Keliye Jahannam Ka Sabse Nichla Tabqa Hai, Sarwar e Kaa'inaat, Shahenshaah e Maujoodaat ﷺ Ki Zaahiri Hayaat Ke Zamaane Me'n Iss Sifat Ke Kuchh Afraad Bataur e Munaafiq Mash'hoor Huwe, Inke Baatini Kufr Ko Qur'aan e Majeed Me'n Bayaan Kiya Gaya Hai, Neez Sultaan e Madeena ﷺ Ne Ba Ataaye Ilaahi A'zzowajal Apne Wasee Ilm Se Ek Ek Ko Pehchaana Aur Naam Banaam Farma Diya Ke Yeh Yeh Munaafiq Hai'n, Ab Iss Zamaane Me'n Kisi Makhsoos Shakhs Ki Nisbat Yaqeen Se Kehna Ke Woh Munaafiq Hai Mumkin Nahee'n Ke Hamaare Saamne Jo Islaam Ka Da'wa Kare Ham Use Musalmaan Hi Samjhe'nge Jab Tak Ke Imaan Ke Munaafi (Ya'ni Imaan Ke Ulat) Koi Qaul (Baat) Ya Fe'l (Kaam) Usse Sarzad Na Ho, Albatta Nifaaq Ya'ni Munaafiqat Ki Ek Shaakh Iss Zamaane Me'n Bhi Paayi Jaati Hai Ke Bahot Se Badmazhab Apne Aapko Musalmaan Kehte Hai'n Aur Dekha Jaaye To Islaam Ke Da'we Ke Saath Saath Bahot Se Zarooriyaat e Deen Ka Inkaar Bhi Karte Hai'n, (Bahaar e Sharee'at, Hissa Awwal, Safha No.96)
By Alahazrat Foundation Research Team - 7710809266/9892708816
