Musalmaan Ki Ta'reef :- Musalmaan Ka Matlab Hai Deen e Islaam Ka Pairokaar Hona (Ya'ni Maanne Waala Hona), Huzoor Nabi e Akram ﷺ Ke Nazdeek Sirf Wohi Shakhs Musalmaan Hai Jiska Wajood Doosro'n Keliye Mamba e Aman Wa Aa'fiyat Aur Sar Chashma e Aman Wa Sukoon Ho,
Hadees e Nabavi ﷺ :- Musalmaan Woh Hai Jiske Haath Aur Jiski Zabaan Se Doosre Musalmaan Ke Jaan Wa Maal Aur Izzate'n Mehfooz Rahe'n, (Bukhaari Shareef, 1 : 13, Kitaabul Imaan, Raqam : 10)
Musalmaan Hone Ki Buniyaadi Shart Iqraar Bil Lisaan Hai Ya'ni Zabaan Se Kalma e Tayyaba Padh Kar Apne Musalmaan Hone Ka Iqraar Wa Ae'laan Karna Taake Doosre Log Use Musalmaan Samjhe'n, Uske Saath Ahle Islaam Ka Sa Sulook Kare'n Aur Woh Bahaysiyat e Muslim Islaam Ki Taraf Se Ata Hone Waale Huqooq Se Faa'idah Utha Sake.
Imaan Ki Ta'reef :- Allaah A'zzowajal Aur Uske Rasool ﷺ Aur Uske Rasool ﷺ Ke Zariye Allaah A'zzowajal Ke Paas Se Aaye Huwe Ahkaam Ka Zabaan Se Iqraar Aur Dil Se Tasdeeq Karne Ka Naam Imaan Hai,
Imaan Arabi Zabaan Ka Lafz Hai, Iska Maaddah Aman Se Mushtaq Hai, Lugat Ki Ru Se Kisi Khauf Se Mehfooz Ho Jaane, Dil Ke Mutma'in Ho Jaane Aur Insaan Ke Khair Wa Aa'fiyat Se Hamkinaar Hone Ko Aman Kehte Hai'n, (Ibne Manzoor, Lisaanul Arab, 23)(Zubaidi, Taajul Uroos Min Jawaahirul Qaamoos, 18:23,24)
Kisi Par Imaan Laane Se Muraad Uski Tasdeeq Karna Aur Uspar Yaqeen Rakhna Hai, Goya Lafz e Imaan Apne Asal Ma'na Aur Maf'hoom Ke Ae'tebaar Se Aman, Amaanat Aur Bharose Par Dalaalat Karta Hai, Imaan Qalb Wa Baatin Ki Yaqeeni Haalat Ka Naam Hai Jisme'n Qalb Wa Baatin Duniya Ki Muhabbat Se Khaali Aur Allaah A'zzowajal Ki Muhabbat Se Ma'moor Ho'n, Iski Wazaahat Darj Zail Hadees Se Hoti Hai, "Hazrat Haaris Bin Maalik Ansaari Radiallaahu A'nhu Riwaayat Karte Hai'n Ke Woh Huzoor Nabi e Akram ﷺ Ke Paas Se Guzre To Aap ﷺ Ne Unse Poochha, Aye Haaris ! (Sunaao) Tumne Subah Kaise Ki ? Unho'n Ne Arz Kiya, Ya Rasoolallaah ﷺ ! Mai'n Ne Imaan Ki Haqeeqat Paate Huwe Subah Ki, Aap ﷺ Ne Farmaaya, Aye Haaris ! Gaur Karke Bataao Tum Kya Keh Rahe Ho ? Beshak Har Shay Ki Ek Haqeeqat Hoti Hai, Tumhaare Imaan Ki Kya Haqeeqat Hai ? Arz Kiya, Ya Rasoolallaah ﷺ ! Mai'n Ne Apne Nafs Ko Duniya Ki Muhabbat Se Juda Karliya Hai Aur Raato'n Ko Jaag Kar Ibaadat Karta Hoo'n Aur Din Ko (Roze Ke Sabab) Pyaasa Rehta Hoo'n, Goya Mai'n Apne Rab Ke Arsh Ko Apni Aa'nkho'n Se Dekhta Hoo'n Aur Mujhe Aisa Lagta Hai Jaise Jannati Ek Doosre Ki Ziyaarat Karte Jaarahe Hai'n Aur Dozakhiyo'n Ko (Iss Haalat Me'n) Dekhta Hoo'n Ke Woh Ek Doosre Par Gir Rahe Hai'n, Huzoor Nabi e Akram ﷺ Ne Farmaaya, Aye Haaris Tum Aa'rif Hogaye, Pas Iss (Kaifiyat Wa Haal) Ko Thaame Rakho Aur Yeh (Jumla) Aap ﷺ Ne 3 Martaba Farmaaya". (Musannaf Ibne Abi Shayba, Al-Musannaf, 6 : 170, Raqam : 30325)
By Alahazrat Foundation Research Team - 7710809266/9892708816
