Sahaaba e Kiraam Radiallaahu A'nhum Ajma'een Ke Darmiyaan Jo Baahami Nazaa'aat Aur Mushaajeraat Huwe Hai'n Un Par Lab Kushaayi Ham Ahle Sunnat Wa Jamaa'at Munaasib Nahee'n Samajhte, Ham Ahle Sunnat Ka Aqeedah Hai Ke Tamaam Sahaaba e Kiraam Islaam Keliye Mukhlis, Aur Haq Goyi Wa Haq Talbi Keliye Koshaa'n The, Mushaajeraat e Sahaaba Radiallaahu A'nhum Ajma'een Me'n Bahes Wa Takraar Se Bachna Zaroori Hai, Kyu'nke Mushaajeraat e Sahaaba Me'n Bahes Wa Takraar Karna Siwaaye Khud Ko Shaitaan Ke Hawaale Karne Ke Aur Kuchh Nahee'n Hai, Ulama e Ahle Sunnat Wa Jamaa'at Ne Baar Baar Isse Khabardaar Kiya Hai, Ham Ahle Sunnat Wa Jamaa'at Sohbat e Rasool ﷺ Se Musharraf Aur Qaabile Sad Ahteraam Hastiyo'n Ko Haq Aur Naahaq Ke Paldo'n (Taraazu) Me'n Rakhne Ki Jur'at Nahee'n Kar Sakte, Rasoolullaah ﷺ Ka Irshaad e Giraami Hai Ke Mere Tamaam Sahaaba Aa'dil Hai'n, Adaalat e Sahaaba Ka Hargiz Yeh Matlab Nahee'n Ke Unse Bashari Galtiyaa'n Bilkul Sarzad Nahee'n Huwee'n Ya Unse Khataao'n Ka Qat'an Wuqu Nahee'n Huwa, Yeh Khaassa Wa Mansab To Ambiya e Kiraam A'laihimus Salaatu Wassalaam Ka Hai Sahaaba e Kiraam Ka Nahee'n, Balke Haqeeqat e Waaqe'ah Yeh Hai Ke Unse Bashari Galtiyo'n Ka Sudoor Huwa Hai, Magar Jab Unko Mutanabbeh Kiya Gaya To Fauran Woh Usse Taa'ib Huwe Aur Allaah Paak Ne Unki Mu'aafi Ki Zamaanat Li Hai, Jahaa'n Tak Ijtehaadi Khataao'n Ke Sudoor Ka Sawaal Hai To Uske Wuqu Se Bhi Kisi Ko Inkaar Naheen.
Imaam Muhiyuddeen Abu Zakariya Yahya Bin Sharf Nawwi (Wafaat 676 Hijri) Sharah Saheeh Muslim Me'n Likhte Hai'n,
Tarjuma - Ahle Sunnat Ahle Haq Ka Mazhab Yeh Hai Ke Sab Sahaaba e Kiraam Radiallaahu A'nhum Ke Baare Me'n Husne Zan Rakha Jaaye, Unke Aapas Ke Ikhtelaafaat Me'n Khaamoshi Aur Unki Ladaa'iyo'n Ki Taaweel Ki Jaaye, Woh Bila Shubah Sab Mujtahid Aur Saahib e Raaye The, Ma'siyat Aur Na Farmaani Unka Maqsad Na Tha Aur Na Hi Mahez Duniya Talabi Peshe Nazar Thi, Balke Har Fareeq Yeh Ae'teqaad Rakhta Tha Ke Wohi Haq Par Hai Aur Doosra Baagi Hai, Aur Baagi Ke Saath Ladaayi Zaroori Hai Taake Woh Amre Ilaahi Ki Taraf Laut Aaye, Iss Ijtehaad Me'n Ba'az Raahe Sawaab Par The Aur Ba'az Khata Par The, Magar Khata Ke Baawajood Woh Ma'zoor The Kyu'nke Uska Sabab Ijtehaad Tha Aur Mujtahid Khata Par Bhi Gunehgaar Nahee'n Hota, Sayyaduna Ali Radiallaahu A'nhu Un Ja'ngo'n Me'n Haq Par The Ahle Sunnat Ka Yehi Mauqif Hai, Yeh Mu'aamlaat Bade Mushtabeh The Yahaa'n Tak Ke Sahaaba Radiallaahu A'nhum Me'n Bahot Saare Hazraat Uspar Hairaan Wa Pareshaan The Jiski Bina Par Woh Fareeqain Se Alaahedah Rahe Aur Qitaal Me'n Unho'n Ne Hissa Nahee'n Liya, Agar Unhe'n Saheeh Baat Ka Yaqeen Ho Jaata To Woh Hazrat Ali Radiallaahu A'nhu Ki Mu'aawenat Se Peechhe Na Rehte. (Sharahun Nawwi Ala Muslim, Jild No.18, Safa No.11, Kitaabul Fitan Wa Ishraatus Sa'ti)
Hazrat Mujaddid e Alfsaani Shaikh Ahmad Sarhindi Faarooqi Naqshbandi A'laihir Rehma Farmaate Hai'n, Aur Un Ladaayi Jhagdo'n Ko Jo Unke Darmiyaan Waaqe Huwe Hai'n Nek Mehmal Par Mehmool Karna Chaahiye Aur Hawa Wa Ta'assub Se Door Samajhna Chaahiye, Kyu'nke Woh Mukhaalifate'n Taaweel Wa Ijtehaad Par Mabni Thee'n Na Ke Hawa Wa Hawas Par, Yehi Ahle Sunnat Ka Mazhab Hai. (Maktoobaat e Imaam Rabbaani, Maktoob 251, Daftare Awwal)
Mazeed Farmaate Hai'n Ke Yeh Akaabir Rasoolullaah ﷺ Ki Sohbat Ki Taaseer Se Hawa Wa Hawas, Keena Wa Hirs Se Paak Saaf Hogaye The, Un Hazraat Ke Ikhtelaafaat Ko Doosro'n Ki Masaalehat Se Behtar Samajhna Chaahiye. (Maktoob 67, Daftare Duwwam)
Alahazrat Imaam Ahmad Raza Khaan Barelvi Qaadri A'laihir Rehma Farmaate Hai'n Ke Hazrat Ali Murtaza Radiallaahu A'nhu Se Jinho'n Ne Mushaajeraat Wa Munaaze'aat Kiye Ham Ahle Sunnat Unme'n Haq, Maula Ali Radiallaahu A'nhu Ki Jaanib Maante Hai'n Aur Un Sabko (Mooride Lagzish) Bar Galat Wa Khata, Aur Hazrat Ali Asadullaah Radiallaahu A'nhu Ko Un Sabse Akmal Wa Aa'la Jaante Hai'n, Choo'nke Un Hazraat Ke Manaaqib Wa Fazaa'il Me'n Ahaadees Marwi Hai'n Isliye Unke Haq Me'n Zabaan e Ta'an Wa Tashnee Nahee'n Kholte, Aur Unhe'n Unke Maraatib Par Rakhte Hai'n Jo Unke Liye Shara Me'n Saabit Hai'n, Unme'n Kisi Ko Kisi Par Hawa e Nafs Se Fazeelat Nahee'n Dete Aur Unke Mushaajeraat Me'n Dakhal Andaazi Ko Haraam Jaante Hai'n, Aur Unke Ikhtelaaf Ko Imaam Abu Haneefa Wa Imaam Shaafayi Radiallaahu A'nhuma Jaisa Ikhtelaaf Samajhte Hai'n, Ham Ahle Sunnat Ke Nazdeek Unme'n Se Kisi Sahaabi Par Bhi Ta'an Jaa'iz Nahee'n Che Jaayeke Ummul Momineen Sayyadah Aa'yesha Siddeeqa Radiallaahu A'nha Ki Baargaah e Rafee Me'n Ta'an Kare'n, Khuda Ki Qasam ! Yeh Allaah Wa Rasool ﷺ Ki Janaab Me'n Gustaakhi Hai. (Fataawa Razviya Mutarjim, Jild No.29, Risaala Ae'teqaadul Ahbaab, Safha No.374/375)
Isi Tarah Alahazrat Imaam Ahmad Raza Mohaddis e Barelvi Qaadri A'laihir Rehma Ek Jagah Likhte Hai'n Ke Jo Fe'l Kisi (Sahaabi) Ka Agar Aisa Manqool Bhi Huwa Jo Nazre Qaasir Me'n Unki Shaan Se Qadre Gira Huwa Thehre (Aur Kisi Kotah Nazar Ko Usme'n Hurf Zani Ki Gunjaa'ish Mile To Ahle Sunnat) Use Mehmale Husn Par Utaarte Hai'n (Aur Use Unke Khuloos e Qalb Wa Husn e Niyat Par Mehmool Karte Hai'n) Aur Allaah Ka Sachcha Qaul Radiallaahu A'nhum Sunkar Aa'eena e Dil Me'n Za'nge Tafteesh Ko Jagah Nahee'n Dete (Aur Tehqeeq e Ahwaal Waaqayi Ke Naam Ka Mail Kuchail Dil Ke Aabgeena Par Chadhne Nahee'n Dete) Rasoolullaah ﷺ Hukm Farma Chuke Jab Mere Ashaab Ka Zikr Aaye To Baaz Raho (Sooye Aqeedat Aur Bad Gumaani Ko Qareeb Na Phatakne Do, Tehqeeq e Haal Wa Tafteesh e Maal Me'n Na Pado), Apne Aaqa Ka Farmaan e Aa'lishaan Aur Yeh Sakht Wa'eede'n, Haulnaak Tehdeede'n (Daraawe Aur Dhamkiyaa'n) Sunkar Zabaan Band Karli Aur Dil Ko Sabki Taraf Se Saaf Karliya, Aur Jaan Liya Ke Unke Rutbe Hamaari Aqal Se Wara Hai'n Phir Ham Unke Mu'aamlaat Me'n Kya Dakhal De'n, Unme'n Jo Mushaajeraat (Sooratan Nazaa'aat Wa Ikhtelaafaat) Waaqe Huwe, Ham Unka Faisla Karne Waale Kaun ? Ke Ek Ki Tarafdaari Me'n Doosre Ko Bura Kehne Lage'n, Ya Un Nazaao'n Me'n Ek Fareeq Ko Duniya Talab Thehraaye'n Balke Bilyaqee'n Jaante Hai'n Ke Woh Sab Musaaleh Deen Ke Khwaastgaar The, (Islaam Wa Muslimeen Ki Sar Bulandi Unka Nasbul Ayn Thi Phir Woh Mujtahid Bhi The To) Jiske Ijtehaad Me'n Jo Baat Deen e Ilaahi Wa Shara Risaalat Panaahi Jalla Jalaaluhu Keliye Aslah Wa Ansab (Zyaadah Maslehat Aamez Aur Ahwaal Muslimeen Se Munaasib Tar) Ma'loom Huwi, Ikhtiyaar Ki, Go Ijtehaad Me'n Khata Huwi Aur Theek Baat Zahen Me'n Na Aayi Lekin Woh Sab Haq Par Hai'n (Aur Sab Waajibul Ahteraam), Unka Haal Bi'aynihi Aisa Hai Jaisa Furu e Mazhab Me'n (Khud Ulama e Ahle Sunnat Balke Unke Mujtahideen Maslan Imaam e Aa'zam) Abu Haneefa Wa (Imaam) Shaafayi (A'laihimur Rehma) Ke Ikhtelaafaat, Na Hargiz Un Munaaze'aat Ke Sabab Ek Doosre Ko Gumraah Faasiq Jaanna Na Unka Dushman Ho Jaana. (Jiski Taa'eed Hazrat Sayyaduna Maula Ali Radiallaahu A'nhu Ke Iss Qaul Se Hoti Hai Ke Yeh Sab Hamaare Musalmaan Bhaayi Hai'n Jo Hamaare Khilaaf Uth Khade Huwe, Musalmaano'n Ko To Yeh Dekhna Chaahiye Ke Woh Sab Hazraat Aaqa e Do Aa'lam ﷺ Ke Jaa'n Nisaar Aur Sachche Gulaam Hai'n, Khuda Wa Rasool Ki Baargaah Me'n Mo'azzam Wa Mo'azzaz Aur Aasmaan e Hidaayat Ke Roshan Sitaare Hai'n, Allaah Paak Aur Rasool ﷺ Ke Irshaadaat Se (Ahle Sunnat Wa Jamaa'at Ne Apna Aqeedah Aur) Itna Yaqeen Karliya Ke Sab (Sahaaba e Kiraam Radiallaahu A'nhum) Achche Aur Aa'dil Wa Siqah, Taqi, Naqi Abraar (Khaasaan e Parwardigaar) Hai'n, Aur Un (Mushaajeraat Wa Naza'aat Ki) Tafaaseel Par Nazar Gumraah Karne Waali Hai. (Fataawa Razviya Mutarjim, Jild No 29, Risaala Ae'teqaadul Ahbaab, Safha No.357/358)
Sadrush Sharee'ah Hazrat Allaama Maulaana Mufti Amjad Ali Aa'zami A'laihir Rehma Likhte Hai'n Ke Sahaaba e Kiraam Radiallaahu A'nhum Ambiya A'laihimus Salaam Na The, Farishte Na The Ke Ma'soom Ho'n, Unme'n Ba'az Keliye Lagzishe'n Huwee'n Magar Unki Kisi Baat Par Giraft Allaah Paak Aur Rasool ﷺ Ke Khilaaf Hai, Allaah Paak Ne Sureh Hadeed Me'n Jahaa'n Sahaaba Ki 2 Qisme'n Farmaayee'n, Momineen Qabl e Fateh Makka Aur Ba'ad e Fateh Makka, Aur Inko Unpar Fazeelat Di Aur Farma Diya "Sabse Allaah Ne Bhalaayi Ka Wa'dah Farma Liya" Saath Hi Irshaad Farma Diya "Allaah Khoob Jaanta Hai Jo Kuchh Tum Karoge" (Sureh Hadeed, Aayat No.10)
To Jab Usne Unke Tamaam Aa'maal Jaan Kar Hukm Farma Diya Ke Un Sab Se Ham Jannat Be Azaab Wa Karaamat Wa Sawaab Ka Wa'dah Farma Chuke To Kisi Doosre Ko Kya Haq Raha Ke Woh Unki Kisi Baat Par Ta'an Kare, Kya Ta'an Karne Waala Allaah Paak Se Juda Apni Mustaqil Hukoomat Qaayem Karna Chaahta Hai ? (Bahaare Sharee'at, Hissa Awwal, Aqeedah No.10, Safha No.256)
Lehaaza In Ibaaraat Se Waazeh Hai Ke Ham Ahle Sunnat Wa Jamaa'at Sahaaba e Kiraam Ke Aapasi Jo Bhi Mu'aamlaat Huwe Unpar Nahee'n Padte Hai'n Balke Saare Ke Saare Sahaaba e Kiraam Radiallaahu A'nhum Ajma'een Se Muhabbat Karte Hai'n Aur Un Sabse Aqeedat Wa Muhabbat Ka Izhaar Karte Hai'n Jab Bhi Kisi Sahaabi Ka Naam Lete Hai'n To Adab Wa Ahteraam Se Lete Hai'n.
By Alahazrat Foundation Research Team - 7710809266/9892708816
