Nabi e Kareem ﷺ Haazir Wa Naazir Hai'n Ahle Sunnat Wa Jamaa'at Ka Yeh Aqeedah Wa Nazariya Baab e Fazaa'il Aur Zanniyaat Me'n Se Hai Na Ke Zarooriyaat e Deen Se Hai Aur Na Hi Zarooriyaat e Ahle Sunnat Se Hai.
Iss Aqeede Aur Nazariye Ki Wazaahat Yeh Hai Ke Jis Tarah Allaah Paak Ne Apne Pyaare Habeeb e Kareem Ra'oofur Raheem ﷺ Ko Beshumaar Kamaalaat Ata Farmaaye Hai'n Unhee'n Me'n Se Ek Haazir Wa Naazir Hona Bhi Hai, Aur Iss Ta'alluq Se Ahle Sunnat Wa Jamaa'at Ka Aqeedah Hai Ke Huzoor ﷺ Apne Jism e Aqdas Ke Saath Rauza e Anwar Me'n Tashreef Farma Hai'n Aur Tamaam Kaa'inaat Aapke Saamne Haazir Hai'n Jise Aap Mulaaheza Farma Rahe Hai'n, Aap Jab Chaahe'n Jahaa'n Chaahe'n Tashreef Le Ja Sakte Hai'n, Magar Ek Waqt Me'n Muta'addid Jagho'n Par Tashreef Le Jaana Chaahe'n To Yeh Bhi Mumkin Hai, Yehi Haazir Wa Naazir Ka Saheeh Maf'hoom Hai, Na Yeh Ke Aap Apne Makhsoos Jism Ke Saath Har Jagah Bil Fe'l Maujood Hote Hai'n, Jaisa Ke Wahaabiyo'n Ne Ahle Sunnat Wa Jamaa'at Par Iftara Baa'ndha Hai Aur Phir Use Buniyaad Bana Kar Lagw Aur La Ya'ni Ae'teraazaat Ka Silsila Shuru Kardiya Jiski Koi Haqeeqat Nahee'n. (Haashiya : Sa'eedul Haq Fee Takhreej Ja Al Haq, Masla Haazir Wa Naazir Ka Bayaan, Safha No.349)
Haazir Wa Naazir Hone Ka Ma'na Yeh Hai Ke Allaah Paak Ki Di Huwi Quwwat Se Ek Hi Jagah Reh Kar Tamaam Aa'lam (Ya'ni Saare Jahaa'n, Zameen Wa Aasmaan, Arsh Wa Kursi, Loh Wa Qalam, Mulk Wa Malakoot) Ko Apne Haath Ki Hatheli Ki Tarah Dekhe Aur Door Wa Qareeb Ki Aawaaze'n Sune Ya Ek Aan (Lamha Bhar) Me'n Tamaam Aa'lam Ki Sair Kare Aur Se'nkdo'n Meel Door Haajatmando'n Ki Haajat Rawaayi Kare, Yeh Raftaar Khwaah Roohaani Ho Ya Jism e Misaali Ke Saath Ho Ya Usi Mubaarak Jism Se Ho Jo Qabar Me'n Madfoon Ya Kisi Jagah Maujood Ho. (Haashiya : Sa'eedul Haq, Fee Takhreej Ja Al Haq, Masla Haazir Wa Naazir Ka Bayaan, Safha No.349)
Haazir Wa Naazir Ke Maf'hoom Ko Ek Misaal Se Bhi Samjha Ja Sakta Hai Ke Jis Tarah Aasmaan Ka Sooraj Apne Jism Ke Saath Aasmaan Par Hai Lekin Apni Roshni Aur Nooraaniyat Ke Saath Rooye Zameen Par Maujood Hai, Isi Tarah (Bila Tashbeeh) Aaftaab e Nabuwwat, Maahtaab e Risaalat ﷺ Apne Jism e Aqdas Ke Saath Madeena Shareef Me'n Apne Mazaar e Pur Anwaar Me'n Maujood Hai'n Lekin Saari Kaa'inaat Ko Yoo'n Dekhte Hai'n Jaise Haath Ki Hatheli Ko, Neez Ummatiyo'n Ke Aa'maal Ko Dekhte Hai'n Aur Allaah Ke Hukm Se Tasarruf Bhi Farmaate Hai'n.
Ab Dalaa'il Mulaaheza Farmaaye'n.
Allaah Paak Qur'aan e Majeed Me'n Irshaad Farmaata Hai,
Tarjuma - Beshak Hamne Tumhe'n Bheja Haazir Wa Naazir Aur Khushi Aur Darr Sunaata. (Sureh Fateh, Aayat No.8)
Iss Aayat Ki Tafseer Karte Huwe Hazrat Allaama Alaauddeen Ali Bin Muhammad Khaazin A'laihir Rehma Farmaate Hai'n, Aye Pyaare Habeeb ! Beshak Hamne Aapko Apni Ummat Ke Aa'maal Aur Ahwaal Ka Mushaaheda Farmaane Waala Bana Kar Bheja Taake Aap Qayaamat Ke Din Unki Gawaahi De'n Aur Duniya Me'n Imaan Waalo'n Aur Itaa'at Guzaaro'n Ko Jannat Ki Khushkhabri Dene Waala Aur Kaafiro'n, Na Farmaano'n Ko Jahannam Ke Azaab Ka Darr Sunaane Waala Bana Kar Bheja Hai. (Tafseer e Khaazin, Sureh Fateh, Tehtul Aayah 8, Jild No.4, Safha No.146)
Aa'la Hazrat Imaam Ahmad Raza Khaan Qaadri Barelvi A'laihir Rehma Iss Aayat Ki Tafseer Me'n Farmaate Hai'n Ke, Beshak Hamne Tumhe'n Bheja Gawaah Aur Khushi Aur Darr Sunaata Ke Jo Tumhaari Ta'zeem Kare Use Fazle Azeem Ki Bashaarat Do Aur Jo M'aaz Allaah Be Ta'zeemi Se Pesh Aaye Use Azaab e Aleem Ka Darr Sunaao, Aur Jab Woh Shaahid Wa Gawaah Huwe Aur Shaahid Ko Mushaaheda Darkaar, To Bahot Munaasib Huwa Ke Ummat Ke Tamaam Af'aal Wa Aqwaal Wa Aa'maal Wa Ahwaal Unke Saamne Ho'n, (Aur Allaah Paak Ne Aapko Yeh Martaba Ata Farmaaya Hai Jaisa Ke) Tabraani Ki Hadees Me'n Hazrat Abdullaah Bin Umar Radiallaahu A'nhuma Se Riwaayat Hai, Rasoolullaah ﷺ Farmaate Hai'n, Beshak Allaah Kareem Ne Mere Saamne Duniya Uthaali To Mai'n Dekh Raha Hoo'n Use Aur Jo Usme'n Qayaamat Tak Hone Waala Hai Jaise Apni Iss Hatheli Ko Dekh Raha Hoo'n. (Kanzul Ummaal, Juz 11, Jild 6, Safha 189,Hadees No.31968, Ba Hawaala Fataawa Razviya, Jild 15, Safha 168)
Allaah Kareem Irshaad Farmaata Hai,
Tarjuma - Aur Yeh Rasool Tumhaare Nigehbaan Wa Gawaah. (Sureh Baqarah, Aayat No.143)
Iss Aayat Ki Tafseer Me'n Hazrat Sayyaduna Imaam Ibne Jareer Tabri A'laihir Rehma Naqal Karte Hai'n Ke Hazrat Sayyaduna Abu Sa'eed Khudri Radiallaahu A'nhu Farmaate Hai'n, Tum Jo Jo Aa'maal Wa Af'aal Karte Ho Rasoolullaah ﷺ Un Sab Par Gawaah Ho'nge. (Tafseer e Tabri, Sureh Baqarah, Tehtul Aayah 143, Jild No.2, Safha No.631)
Nabi e Kareem ﷺ Ke Kaseer Faraameen Me'n Haazir Wa Naazir Ka Maf'hoom Maujood Hai,
Ab Hadees Se Dalaa'il Mulaaheza Farmaaye'n,
Hazrat Sayyaduna Sobaan Radiallaahu A'nhu Se Riwaayat Hai Ke Rasoolullaah ﷺ Ne Irshaad Farmaaya, Beshak Allaah Paak Ne Mere Liye Zameen Ko Samet Diya To Mai'n Ne Uske Mashriko'n Aur Magribo'n (Ya'ni Tamaam Jawaanib Wa Atraaf) Ko Dekh Liya. (Muslim Shareef, Jild No.4, Safha No.2215, Hadees No.2889)
Hazrat Sayyaduna Umar Faarooq e Aa'zam Radiallaahu A'nhu Se Riwaayat Hai Ke Huzoor Nabi e Kareem Ra'oofur Raheem ﷺ Ne Irshaad Farmaaya, Allaah Paak Ne Mere Saamne Duniya Pesh Farma Di, Mai'n Duniya Aur Usme'n Pesh Aane Waale Qayaamat Tak Ke Waaqe'aat Ko Apni Iss Hatheli Ki Tarah Dekh Raha Hoo'n. (Majmauz Zawaa'id, Jild No.8, Safha No.278, Hadees No.14067)
Muhaqqiqeen Wa Buzurgaan e Deen Ke Irshaadaat :-
Hazrat Imaam Jalaaluddeen Suyuti Shaafayi A'laihir Rehma Hazrat Abu Mansoor Abdul Qaahir Bagdaadi A'laihir Rehma Ka Qaul Naqal Farmaate Hai'n Ke Hamaare As'haab Me'n Se Muhaqqiq Mutakallimeen Farmaate Hai'n, Beshak Hamaare Nabi ﷺ Apni Wafaat Ke Ba'ad Bhi Zindah Hai'n Aur Apni Ummat Ki Nekiyaa'n Dekh Kar Khush Hote Hai'n Aur Unki Na Farmaaniyaa'n Dekh Kar Gamzadah Hote Hai'n. (Al-Haawi Lil-Fataawa, Jild No.2, Safha No.180)
Shaareh Bukhaari Hazrat Imaam Ahmad Bin Muhammad Qastalaani A'laihir Rehma Farmaate Hai'n Ke Apni Ummat Ka Mushaaheda Farmaane, Unke Haalaat, Dil Ke Iraado'n, Niyato'n Aur Unke Raaz Jaanne Me'n Nabi e Paak ﷺ Ki Wafaat Aur Hayaat Me'n Koi Faraq Nahee'n, Yeh Tamaam Cheeze'n Rasoolullaah ﷺ Ke Haa'n Zaahir Hai'n, Inme'n Se Kuchh Posheedah Nahee'n. (Mawaahib e Ladunniya, Jild No.3, Safha No.595)
Shaykh e Muhaqqiq Allaama Abdul Haq Muhaddis e Dehlavi A'laihir Rehma Farmaate Hai'n Ke Ulama e Ummat Me'n Iss Masle Me'n 1 Shakhs Ka Bhi Ikhtelaaf Nahee'n Ke Nabi e Paak ﷺ Haqeeqi Zindagi Ke Saath Daayem Wa Baaqi Hai'n, Iss Baat Me'n Kisi Qism Ka Shubah Ya Koi Taaweel Nahee'n Aur Aap ﷺ Ummat Ke Haalaat Par Haazir Wa Naazir Hai'n. (Sulooku Aqrabissubul Ma Akhbaarul Akhiyaar, Safha No.155)
Ek Maqaam Par Farmaate Hai'n Shaahid Ka Ma'ni Hai Ummat Ke Haal, Unki Nijaat Wa Halaakat Aur Tasdeeq Wa Takzeeb Par Haazir Aur Aa'lim. (Madaarijun Nabuwwah, Jild No.1, Safha No.260)
Hazrat Shaah Abdul Azeez Muhaddis Dehlavi A'laihir Rehma Farmaate Hai'n Ke Aye Logo Tum Par Tumhaare Rasoolullaah ﷺ Qayaamat Ke Din Isliye Gawaahi De'nge Ke Woh Noor e Nabuwwat Se Har Parhezgaar Ke Martaba Wa Maqaam Ko Jaante Hai'n Aur Yeh Bhi Jaante Hai'n Ke Fulaa'n Mera Ummati Kis Darje Par Paho'ncha Huwa Hai, Aur Yeh Ke Uske Imaan Ki Haqeeqat Kya Hai, Aur Yeh Bhi Jaante Hai'n Ke Mere Fulaa'n Ummati Ki Taraqqi Me'n Fulaa'n Cheez Rukaawat Bani Huwi Hai, Pas Nabi e Kareem ﷺ Tumhaare Gunaaho'n, Imaan Ke Darjaat, Achche Bure Aa'maal Aur Tumhaare Khuloos Wa Munaafeqat Ko Pehchaante Hai'n. (Tafseer e Azeezi, Sureh Baqarah, Tehtul Aayah 143, Jild No.1, Safha No.636)
In Tamaam Dalaa'il Se Ma'loom Huwa Ke Nabi e Paak ﷺ Haazir Wa Naazir Hai'n.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Nabi e Kareem ﷺ Ke Haazir Wa Naazir Hone Ka Masla Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
