Qaari'een Hazraat : Allaah Paak Ne Apne Habeeb Nabi e Akram ﷺ Ko Aisi Gair Ma'mooli Quwwat e Samaa'at Ya'ni Sunne Ki Taaqat Ata Farmaayi Hai Ke Nabi e Akram ﷺ Un Aawaazo'n Ko Bhi Sun Lete Hai'n Jinhe'n Koi Aur Nahee'n Sunta.
Alahazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Farmaate Hai'n Ke Allaah Paak Ki Ata Se Huzoor ﷺ Ki Quwwat e Saame'ah (Ya'ni Sunne Ki Taaqat) Tamaam Sharq Wa Garb Ko Muheet (Ya'ni Ghere Huwe Hai'n) Sabki Arze'n Aur Aawaaze'n Khud Sunte Hai'n, Agarche Aadaab e Darbaar e Shaahi Keliye Malaa'ika Arze Darood Wa Arze Aa'maal Keliye Muqarrar Hai'n, Bila Shubha Arsh Wa Farsh Ka Har Zarrah Unke Peshe Nazar Hai Aur Arz Wa Sama Ya'ni (Zameen Wa Aasmaan) Ki Har Aawaaz Unke Go'sh (Kaan Mubaarak Me'n Hai). (Fataawa Razviya, 29/546)
Lekin Qaari'een : Bataata Chaloo'n Ke Yeh Aqeedah Bhi Ham Ahle Sunnat Wa Jamaa'at Ke Nazdeek Na To Zarooriyaat e Deen Se Hai Na Zarooriyaat e Ahle Sunnat Wa Jamaa'at Se Hai Balke Yeh Aqeedah Zanniyaat Me'n Se Hai, Nabi e Kareem ﷺ Ki Iss Azeem Khusoosiyat Wa Fazeelat Se Muta'alliq Kuchh Tafseelaat Dalaa'il Ke Saath Mulaaheza Farmaaye'n.
Hadees e Paak Me'n Nabi e Akram ﷺ Ka Yeh Farmaan Maujood Hai Ke Mai'n Har Uss Cheez Ko Dekhta Hoo'n Jise Tum Nahee'n Dekhte Aur Har Uss Aawaaz Ko Sunta Hoo'n Jise Tum Nahee'n Sunte. (Ibne Maaja Shareef, 2/1402, Hadees No.4190)
Shaareh Bukhaari Sadrul Ulama Hazrat Allaama Maulaana Sayyad Gulaam Jeelaani Meerthi A'laihir Rehma Iss Riwaayat Ke Tahet Farmaate Hai'n Ke Har Woh Aawaaz Isme'n Daakhil Hai Jisko Mukhaatabeen (Ya'ni Jinse Khitaab Farmaaya) Nahee'n Sunte Khwaah Woh Aa'lam Ke Kisi Goshe Se Uthe, Kurra e Zameen Ki Ho Ya Kurra e Aab Ki, Kurra e Hawa Ki Ho Ya Kurra e Naar Ki, Kurra e Samaawaat Ki Ho Ya Arsh Wa Kursi Ki, Khwaah Insaan Ki Aawaaz Ho Ya Haiwaanaat Ki, Nabaataat (Pawdo'n Wagairah) Ki Ho Ya Jamaadaat (Pat'thar Wagairah Be Jaan Cheezo'n) Ki, Jinnaat Ki Ho Ya Farishto'n Ki Ya Aisi Makhlooq Ki Aawaaz Ho Jisko Ham Nahee'n Jaante, Garz Ke Tamaam Aa'lam (Saari Kaa'inaat) Ki Jumla Aawaazo'n Par Yeh Kalma Mushtamil Hai. (Basheerul Qaari, Safha No.14)
Abu Daawood Shareef Ki Ek Taweel Hadees Hai Jiska Maf'hoom Hai Ke Ek Gair Muslim Aurat Ne Bhuni Huwi Bakri Me'n Zaher Mila Kar Rasoole Khuda ﷺ Ki Khidmat Me'n Pesh Kiya, Allaah Ke Habeeb ﷺ Ne Uss Aurat Se Farmaaya, Kya Tu Ne Iss Bakri Me'n Zaher Milaaya Hai ? Usne Poochha, Aapko Kisne Khabar Di ? Irshaad Farmaaya, Mujhe Bakri Ke Iss Baazu Ne Khabar Di Jo Mere Haath Me'n Hai. (Abu Daawood Shareef, 4/183, Hadees No.4510)
Mufti Ahmad Yaar Khaan Na'eemi A'laihir Rehma Iss Hadees Ke Tahet Farmaate Hai'n, Ma'loom Hota Hai Ke Khud Gosht Ne Huzoor ﷺ Ko Khabar Di Ke Mujh Me'n Zaher Mila Hai. (Miraatul Manaajeeh, 8/248)
Hadees e Paak Me'n Rasoolullaah ﷺ Ka Yeh Farmaan Maujood Hai Ke Beshak Mai'n Aasmaan Ke Charcharaane Ki Aawaaz Sunta Hoo'n. (Mo'jamul Kabeer, 3/201, Hadees No.3122)
Hadees e Paak Me'n Rasoolullaah ﷺ Ka Yeh Farmaan Bhi Maujood Hai Ke Beshak Allaah Paak Ne Mere Saath 2 Farishte Muqarrar Farmaaye Hai'n, Jab Kisi Musalmaan Ke Paas Mera Zikr Ho Aur Woh Mujh Par Darood Bheje To Woh Farishte Kehte Hai'n, Allaah Teri Magferat Farmaaye. (Al-Mo'jamul Kabeer Lit Tabraani, 3/89, Hadees No.2753)
Iss Hadees Se Ma'loom Huwa Ke Yeh Dono'n Farishte Har Ummati Ka Darood Sunte Hai'n.
Hadees e Paak Me'n Hai Ke Nabi e Akram ﷺ Ne Farmaaya, Jab Duniya Me'n Koi Aurat Apne Shauhar Ko Takleef Paho'nchaati Hai To Hooro'n Me'n Se Uss Shakhs Ki Beewi Kehti Hai, Allaah Tujhe Halaak Kare, Ise Takleef Mat Paho'ncha ! Yeh Tere Paas Mehmaan Hai Aur Anqareeb Tujhe Chhod Kar Hamaare Paas Aayega. (Tirmizi Shareef, 3/468, Hadees No.1174)
Maulaana Sayyad Gulaam Jeelaani Meerthi A'laihir Rehma Mazkoorah Dono'n Riwaayaat Ko Naqal Karke Farmaate Hai'n, Jannat Saatwe'n Aasmaan Se Upar Hai Aur Hasbe Irshaad e Nabavi Zameen Se Pehle Aasmaan Tak 500 Saal Ki Masaafat Hai Aur Itna Hi Pehle Aasmaan Ka Dal (Ya'ni Motaayi) Hai, Isi Tarah Har 2 Aasmaan Ke Darmiyaan 500 Saal Ki Masaafat Hai Aur Isi Qadar Har Aasmaan Ka Dal (Ya'ni Motaayi), To Zameen Se Saatwe'n Aasmaan Tak 7000 Saal Ki Masaafat Huwi Aur Zameen Se Jannat Tak Ki Masaafat Aur Zyaadah Kyu'nke Woh Saatwe'n Aasmaan Ke Upar Hai, Maqaam e Gaur Hai Ke Jab Har 2 Farishto'n Ki Quwwat e Sama Itni Qawi Hai Ke Har Muslim Ummati Ka Darood Sun Leti Hai'n, Aur Hooraan e Bahisht (Ya'ni Jannati Hooro'n) Ki Samaa'at Ka Yeh Aa'lam Hai Ke 7000 Saal Se Zyaadah Masaafat Par Reh Kar Kurra e Zameen Ki Aawaaze'n Sun Lete Hai'n To Mehboob e Khuda ﷺ Har Ummati Ka Darood Kis Tarah Nahee'n Sune'nge, Haalaa'nke Aap Farishto'n Aur Hooraan e Bahisht Balke Saare Aa'lam Se Afzal Hai'n, Aur Tamaam Aa'lam Ki Takhleeq Aapke Tufail Me'n Huwi Hai Aur Aapke Aur Ummatiyo'n Ke Darmiyaan Itni Masaafat Bhi Nahee'n Jitni Masaafat Hooraan e Bahisht Aur Zameen Ke Darmiyaan Hai, Imaani Aqal Kisi Tarah Gawaara Nahee'n Kar Sakti Ke Tufaili Yeh Kamaal Paaye'n Aur Asal Mehroom Rahe, Balke Imaani Aqal Yeh Hukm Karti Hai Ke Har Makhlooq Se Har Kamaal Me'n Aap Fuzoo'n Tar (Ya'ni Badh Kar) Hai'n, Aur Har Ne'mat Aapko Bardarja e Atam Di Gayi Hai Aur Tamaam Kamaalaat Ke Jumla Maraatib Aap Par Khatam Hai'n. (Basheerul Qaari, Safha No.16)
Hadees Shareef Me'n Hai Ke Hazrat Abu Hurairah Radiallaahu A'nhu Se Marwi Hai Ke Rasoolullaah ﷺ Ne Farmaaya, Jo Shakhs Bhi Mujh Par Salaam Arz Karta Hai Allaah Paak Meri Rooh Ko Mujh Par Lauta Deta Hai Taake Mai'n Uske Salaam Ka Jawaab Doo'n. (Abu Daawood Shareef, 2/218, Hadees No.2041)
Chunaanche Muhaqqiqeen e Ummat Ki Tasreehaat Ke Mutaabiq "Meri Rooh Ko Mujh Par Lauta Deta Hai" Ke Mataalib Wa Ma'ni Me'n Se Ek Ma'ni Wa Matlab Yeh Hai Ke Allaah Rabbul Izzat Ne Huzoor e Aqdas ﷺ Ko Gair Ma'mooli Quwwat e Samaa'at Ata Farmaayi Hai Aur Huzoor ﷺ Apne Ummati Ka Salaam Samaa'at Farma Kar Use Jawaab Dete Hai'n.
Chunaanche Imaam Jalaaluddeen Suyuti Shaafayi A'laihir Rehma Farmaate Hai'n Ke "Meri Rooh Ko Lauta Deta Hai" Se Muraad Yeh Hai Ke Jab Koi Nabi e Akram ﷺ Ko Salaam Karta Hai To Allaah Paak Aapko Gair Ma'mooli Samaa'at Ata Farmaata Hai Aur Koi Shakhs Kahee'n Se Bhi Salaam Kare Aap Uske Salaam Ka Jawaab Dete Hai'n. (Amba-ul-Azkiya Fee Hayaatil Ambiya, Bahawaala, Rasaa'il Lil Imaam Al-Haafiz Jalaaluddeen As-Suyuti, Safha No.132)
Isi Hadees Shareef Me'n Hai Ke Nabi e Akram ﷺ Ne Farmaaya, Tum Jahaa'n Kahee'n Bhi Ho Mujh Par Darood Padho, Beshak Tumhaara Darood Mujh Tak Paho'nch Jaata Hai. (Musnad e Ahmad Bin Hambal, 14/403, Hadees No.8804)
Isi Tarah Ek Doosri Hadees Me'n Hai Ke Hazrat Aus Bin Aus Radiallaahu A'nhu Kehte Hai'n Ke Rasoolullaah ﷺ Ne Farmaaya, Tumhaare Sabse Behtar Dino'n Me'n Se Juma'h Ka Din Hai, Isi Din Aadam Paida Kiye Gaye, Isi Din Unki Rooh Qabz Ki Gayi, Isi Din Soor Phoo'nka Jaayega, Isi Din Behoshi Hogi, Isliye Tum Log Iss Din Mujh Par Kasrat Se Darood Bheja Karo, Kyu'nke Tumhaara Darood Mujh Par Pesh Kiya Jaata Hai, Aus Bin Aus Kehte Hai'n, Sahaaba e Kiraam Ne Arz Ki, Allaah Ke Rasool ! Hamaara Darood Aap Par Kaise Pesh Kiya Jaayega Jabke Aapka Jism Boseedah Ho Chuka Hoga, Aap ﷺ Ne Farmaaya, Allaah Paak Ne Zameen Par Paigambaro'n Ke Badan Ko Haraam Kardiya Hai. (Abu Daawood Shareef, 1/275, Hadees No.1047)
Ya'ni Allaah Ke Nabi Zindah Hote Hai'n Zameen Unke Jismo'n Ko Nahee'n Kha Sakti.
Mazkoorah Hadeeso'n Se Yeh Baat To Yaqeeni Taur Par Saabit Hogayi Ke Ambiya e Kiraam A'laihimus Salaam Ki Jamaa'at Wafaat Ke Ba'ad Bhi Zindah Hai Aur Jab Zindah Hai To Wisaal e Mubaarak Ke Ba'ad Bhi Aap A'laihissalaam Ka Ummati Aur Gulaam Jahaa'n Se Bhi Darood Padhta Hai Woh Aap A'laihissalaam Tak Paho'nchta Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n, Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke (Door Wa Nazdeek Se Sunne Ke Muta'alliq Aqeedah Bhi) Baab e Fazaa'il Wa Manaaqib Se Hai Jispar Kufr Wa Imaan Ka Madaar Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
