Ham Ahle Sunnat Wa Jamaa'at Ka Aqeedah Aur Nazariya Hai Ke Nabi e Akram ﷺ Ke Jism e Mubaarak Ka Saaya Nahee'n Tha.
Chunaanche Hakeemul Ummat Allaama Ahmad Yaar Khaan Na'eemi Ashrafi A'laihir Rehma Likhte Hai'n Ke Allaah Paak Ne Apne Mehboob ﷺ Ko Jahaa'n Beshumaar Mo'jeze Bakhshe Wahaa'n Yeh Mo'jezah Bhi Ata Farmaaya Ke Huzoor ﷺ Ke Jism Shareef Ko Be Saaya Banaaya, Dhoop, Chaa'ndni, Chiraag Wagairah Ki Roshni Me'n Aap A'laihissalaam Ke Jism e At'har Ka Bilkul Saaya Na Padta Tha, Balke Jo Libaas Huzoor ﷺ Pehne Hote The Woh Libaas Bhi Be Saaya Ho Jaata Tha. (Rasaa'il e Na'eemiya, Safha No.97)
Yahaa'n Yeh Baat Bhi Arz Kardu'n Ke Nabi e Kareem ﷺ Ke Jism e Mubaarak Ka Saaya Na Tha Yeh Aqeedah Ahle Sunnat Wa Jamaa'at Ke Nazdeek Na Zarooriyaat e Deen Se Hai Na Zarooriyaat e Ahle Sunnat Se Hai Balke Yeh Aqeedah Zanniyaat Aur Baab e Fazaa'il Ke Qabeel Se Hai.
Qur'aan Wa Hadees Se Adme Saaya Ka Saboot :- Qur'aan e Kareem Ki Kayi Aayaat Aur Kaseer Ahaadees Se Yeh Baat Saabit Hai Ke Rehmat e Aa'lam Noore Mujassam ﷺ Ko Allaah Paak Ne Be Misaal Bashariyat Ke Saath Saath Nooraaniyat Se Bhi Nawaaza Hai Aur Yeh Baat Bhi Zaahir Hai Ke Noor Ka Saaya Nahee'n Hota, In Dono'n Baato'n Ko Milaane Se Nateeja Yeh Nikla Ke Noor Waale Aaqa ﷺ Saaye Se Paak Hai'n Aur Aapki Nooraaniyat Par Dalaalat Karne Waali Tamaam Qur'aani Aayaat Aur Ahaadees e Mubaaraka Iski Daleel Hai'n, Husoole Barkat Keliye Sirf Ek Qur'aani Aayat Aur Uski Tafseer Mulaaheza Farmaaye'n.
1- Sureh Maa'idah, Aayat No.15.
Tarjuma - Beshak Tumhaare Paas Allaah Ki Taraf Se Ek Noor Aaya Aur Roshan Kitaab.
Iss Aayat e Kareema Me'n Noor Ke Muraadi Ma'ni Bayaan Karte Huwe Imaam Jalaaluddeen Suyuti Shaafayi A'laihir Rehma Farmaate Hai'n Ke Noor Se Muraad Nabi e Kareem ﷺ Hai'n. (Tafseer Jalaalain, Jild No.2, Safha No.33)
Qaari'een e Kiraam : Yeh Baat Zahen Nasheen Rahe Ke Noor Ka Saaya Na Hona Ek Ma'roof Baat Hai Aur Kaseer Buzurgaan e Deen Ne Ise Bayaan Farmaaya Hai, Yahaa'n Sirf 4 Buzurgo'n Ke Faraameen Pesh Kiye Jaate Hai'n.
1- Hazrat Allaama Ahmad Bin Muhammad Khafaaji Misri Hanfi A'laihir Rehma Farmaate Hai'n Ke Anwaar Shaffaaf Aur Lateef Hote Hai'n, Apne Gair Tak Roshni Ke Paho'nchne Me'n Rukaawat Nahee'n Bante Isliye Unka Saaya Nahee'n Hota. (Naseemur Riyaaz, 4/335)
2- Allaama Muhammad Bin Abdul Baaqi Zurqaani Maaliki A'laihir Rehma Likhte Hai'n Ke Beshak Noor Ka Saaya Nahee'n Hota. (Zurqaani Alal Mawaahib, 5/525
3- Shaykh Abdul Haq Muhaddis e Dehlavi A'laihir Rehma Likhte Hai'n Ke Noor Ka Saaya Nahee'n Hota. (Madaarijun Nabuwwah, 1/21)
4- Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Likhte Hai'n Ke Noor Keliye Saaya Nahee'n, Mazeed Likhte Hai'n Ke Saaya Uss Jism Ka Padega Jo Kaseef Ho Aur Anwaar Ko Apne Maawara Se Haajib (Ya'ni Apne Aage Maujood Cheez Tak Roshni Ke Paho'nchne Me'n Rukaawat Na Bane) Noor Ka Saaya Pade To Tanweer (Ya'ni Roshni) Kaun Kare ? Isliye Dekho Aaftaab (Ya'ni Sooraj) Keliye Saaya Nahee'n. (Fataawa Razviya, 30/706)
Buzurgaan e Deen Aur Unke Bayaan Kardah Dalaa'il Itne Zyaadah Hai'n Ke Unhe'n Ek Mazmoon Me'n Zikr Karna Mushkil Hai, Husoole Barkat Keliye Kuchh Dalaa'il Mulaaheza Farmaaye'n.
1- Ek Mauqe Par Hazrat Sayyaduna Zun Noorain Usmaan e Gani Radiallaahu A'nhu Ne Baargaah e Risaalat Me'n Arz Kiya Ke Beshak Allaah Paak Ne Aapke Saaye Ko Zameen Par Na Padne Diya Taake Koi Insaan Uss Saaye Par Paao'n Na Rakhe. (Tafseer Nasafi, Safha No.772)
Ek Riwaayat Ke Mutaabiq Aap Radiallaahu A'nhu Yoo'n Arz Guzar Huwe Ke Aapka Saaya Zameen Par Nahee'n Padta Taake Kahee'n Aisa Na Ho Ke Na Paak Zameen Par Pad Jaaye. (Madaarijun Nabuwwah, 2/161)
2- Imaam Bukhaari Wa Imaam Muslim Ke Ustaazul Ustaaz Haafizul Hadees Imaam Abdur Razzaaq, Tabe Taabayi Buzurg Hazrat Sayyaduna Abdullaah Bin Mubaarak Aur Imaam Ibne Jauzi Rahima Humullaah Se Manqool Hai Ke Sahaabi e Rasool Hazrat Sayyaduna Abdullaah Bin Abbaas Radiallaahu A'nhuma Ne Irshaad Farmaaya Ke Rasoolullaah ﷺ Ka Saaya Nahee'n Tha, Mazeed Farmaate Hai'n Ke Rasoole Khuda ﷺ Jab Sooraj Ke Saamne Khade Hote To Aapka Mubaarak Noor Sooraj Ki Roshni Par Gaalib Aajaata Aur Chiraag Ke Saamne Khade Hote To Chiraag Ki Roshni Par Gaalib Aajaata. (Al-Wafa Bi Ahwaalil Mustafa, 2/19, Al-Juzul Mafkood Minal Musannaf Li Abdur Razzaaq, Safha No.56)
Noore Mustafa ﷺ Ke Sooraj Aur Chiraag Ke Noor Par Gaalib Aane Ke 2 Ma'ni Ho Sakte Hai'n. (1) Noor e Mustafa ﷺ Ke Saamne Sooraj Aur Chiraag Ki Roshniyaa'n Pheeki Pad Jaatee'n Jaise Sooraj Ki Roshni Ke Saamne Chiraag Ki Roshni. (2) Uss Mubaarak Noor Ke Saamne In Dono'n Ki Roshni Bilkul Khatam Ho Jaati Jaise Sooraj Ke Saamne Sitaaro'n Ki Roshni. (Fataawa Razviya, 30/708)
3- Aa'rif Billaah Imaam Haafiz Abu Abdullaah Muhammad Bin Ali Hakeem Tirmizi Shaafayi A'laihir Rehma Taabayi Buzurg Hazrat Sayyaduna Zakwaan A'laihir Rehma Se Riwaayat Karte Hai'n Ke Sooraj Aur Chaa'nd Ko Roshni Me'n Rasoolullaah ﷺ Ka Saaya Nazar Nahee'n Aata Tha. (Khasaa'is e Kubra, 1/116)
4- Shaikhul Islaam Imaam Ahmad Bin Muhammad Ibne Hajar Makki Haytami Shaafayi A'laihir Rehma Likhte Hai'n, Sarkaar e Do Aa'lam ﷺ Ke Saraapa Noor Hone Ki Taa'eed Iss Baat Se Bhi Hoti Hai Ke Jab Aap Din Ya Raat Me'n Sooraj Ya Chaa'nd Ki Roshni Me'n Chalte To Aapka Saaya Na Paida Hota, Iski Wajah Yeh Hai Ke Saaya Sirf Kaseef Jism Ka Zaahir Hota Hai Aur Allaah Paak Ne Apne Mehboob ﷺ Ko Tamaam Jismaani Kasaafato'n Aur Galaazato'n Se Paakeezah Farma Kar Aapko Saraapa Noor Bana Diya Tha, Isliye Aapka Saaya Bilkul Bhi Na Tha. (Alminhul Makkiya Fi Sharhil Hamziyyati,Safa.86)
Mohtaram Qaari'een : Aapne Mulaaheza Farmaaya Ke Saaye Se Paak Hona Rehmat e Aa'lam ﷺ Ki Ek Aisi Azeem Fazeelat Wa Khusoosiyat Hai Jo Aapko Allaah Paak Ki Ata Se Haasil Huwi.
Khabardaar ! Shaitaan Ke Behkaawe Me'n Aakar Allaah Ke Habeeb ﷺ Ke Kisi Mo'jeze Aur Khusoosiyat Se Muta'alliq Shukook Wa Shub'haat Ka Shikaar Hargiz Na Ho'n, Hazrat Sayyaduna Abdul Wahaab Sha'raani A'laihir Rehma Farmaate Hai'n, Iss Baat Ko Jaan Lo Ke Har Woh Baat Jisse Rasoolullaah ﷺ Ki Azmat Wa Shaan Zaahir Hoti Ho, Kisi Keliye Usme'n Bahes Wa Mubaahesa Karna Munaasib Nahee'n Hai. (Kashful Gumma, 2/53)
Buzurgaan e Deen Ki Karaamaat Aur Sarkaar e Madeena ﷺ Ke Mo'jezaat Wa Khusoosiyaat Ke Mu'aamle Me'n Aqal Ke Ghode Daudaana Aur Un Baato'n Ko Aqal Ke Taraazu Me'n Tolna Duniya Wa Aakherat Me'n Nuqsaan Ka Baa'is Ban Sakta Hai, Yaad Rakhe'n ! Allaah Kareem Ne Apne Pyaare Habeeb ﷺ Ko Be Nazeer, Laasaani Aur Be Misaal Banaaya Hai, Isliye Aapko Deegar Insaano'n Par Qayaas Karna Hargiz Durust Nahee'n.
Inkaar Karne Waale Ka Hukm - Gazaali e Zamaa'n Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n, Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Uss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Aur Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai Jispar Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
