Nabi e Kareem ﷺ Ke Waalidain e Kareemain Ke Imaan Se Muta'alliq Ham Ahle Sunnat Wa Jamaa'at Ka Aqeedah Yeh Hai Ke Woh Mowahhid Ya'ni Tauheed Par Qaayem, Musalmaan The Aur Jannati Hai'n, Aur Hamaara Yeh Aqeedah Qur'aan Wa Hadees Aur Aslaaf Ke Aqwaal Ki Roshni Me'n Saabit Hai, Yahaa'n Chand Dalaa'il Naqal Kiye Jaarahe Hai'n Mulaaheza Farmaaye'n, Lekin Dalaa'il Se Pehle Yeh Jaan Leejiye Ke Ham Ahle Sunnat Wa Jamaa'at Ke Nazdeek Imaan e Waalidain e Mustafa ﷺ Ka Aqeedah Na Zarooriyaat e Deen Se Hai Na Zarooriyaat e Ahle Sunnat Se Hai Balke Zanniyaat Me'n Se Hai, Furu Aqaa'id Me'n Se Hai.
Allaah Paak Qur'aan Shareef Me'n Irshaad Farmaata Hai,
Tarjuma - Aur Beshak Musalmaan Gulaam Mushrik Se Achcha Hai. (Sureh Baqarah, Aayat No.221)
Yeh Masla Bilkul Qatayi Yaqeeni Hai Ke Musalmaan Chaahe Hasab Wa Nasab Me'n Kitna Hi Kamzor Kyu'n Na Ho Lekin Woh Kamzor Musalmaan Bhi Aa'la Qaum Waale Mushrik Se Hazaaro'n Darjaat Afzal Hai, Aur Huzoor Nabi e Kareem ﷺ Ne Irshaad Farmaaya,
Tarjuma - Mujhe Har Qarn (Zamaana) Wa Tabqa Me'n Tamaam Quroon e Bani Aadam Ke Behtar Se Bheja Gaya Yahaa'n Tak Ke Uss Qarn Me'n Huwa Jisme'n Paida Huwa. (Bukhaari Shareef, 4/189, Hadees No.3567)
Ab Iss Hadees e Paak Ko Aur Jo Aayat e Paak Upar Guzri Dono'n Ko Milaaya Jaaye To Waalidain e Mustafa ﷺ Ke Imaan Ka Aqeedah Wa Da'wa Bilkul Waazeh Aur Saaf Ho Jaayega.
Zara Gaur Kare'n Aayat e Paak Me'n Farmaaya Gaya Hai Ke Mushrik Se Momin Gulaam Behtar Wa Afzal Hai Aur Huzoor ﷺ Ke Irshaad e Paak Se Pata Chala Ke Nabi e Kareem ﷺ Khair e Quroon Se Hai'n, Nateeja Zaahir Hai Ke Nabi e Kareem ﷺ Imaan Waalo'n Ki Pusht Se Hai'n.
Isi Tarah Nabi e Kareem ﷺ Ne Irshaad Farmaaya,
Tarjuma - Rooye Zameen Par Har Zamaane Me'n Kam Se Kam 7 Musalmaan Rahe Hai'n, Agar Aisa Na Hota To Zameen Waale Sab Halaak Ho Jaate. (Musannaf Abdur Razzaaq, 5/95, Hadees No.9099)
Ab Dono'n Hadeeso'n Ko Milaaya Jaaye To Nateeja Niklega Ke Huzoor ﷺ Ke Aaba Wa Ummahaat Ka Imaan Saabit Hai,
Zara Gaur Kare'n ! Pehli Hadees Me'n Saaf Taur Par Farmaaya Gaya Ke "Mai'n Khair e Quroon Se Hoo'n" Aur Doosri Hadees Me'n Farmaaya Ke "Rooye Zameen Par Hamesha Kam Az Kam 7 Musalmaan Rahe'n" Aur Qur'aan Me'n Kaha Gaya Ke "Momin Gulaam Bhi Mushrik Se Afzal Wa Aa'la Hai" To Ab Nateeja Nikla Ke Huzoor ﷺ Ka Noor Hamesha Khair Se Khair Ki Taraf Muntaqil Hota Raha Aur Khair Momin Hota Hai Mushrik Wa Kaafir Khair Nahee'n Hota, Lehaaza Saabit Huwa Ke Huzoor ﷺ Ka Silsila e Nasab Momineen Se Hai Mushrikeen Se Nahee'n.
Allaah Paak Qur'aan Shareef Me'n Irshaad Farmaata Hai,
Tarjuma - Mushrikeen To Saraapa Na Paak Hai'n. (Sureh Tauba, Aayat No.28)
Aur Nabi e Kareem ﷺ Ka Irshaad Hai,
Tarjuma - Mai'n Hamesha Paak Mardo'n Ki Pushto'n Se Paak Beewiyo'n Ke Peto'n Me'n Muntaqil Hota Raha. (Mawaahib e Ladunniya, 1/174)
Aayat Aur Hadees Ko Aapas Me'n Milaaya Jaaye To Matlab Bilkul Waazeh Ho Jaayega Ke Qur'aan e Azeem Ne Bila Shubah Mushrikeen Ke Na Paak Hone Ka Faisla Farmaaya Aur Hadees e Paak Me'n Huzoor ﷺ Ne Apne Aaba Wa Ummahaat Ko Paak Zaahir Farmaaya, To Mushrikeen Na Paak Hai'n Paak Nahee'n Ho Sakte Aur Huzoor ﷺ Ke Aaba Wa Ajdaad Wa Ummahaat Wa Jaddaat Paak Hai'n Na Paak Nahee'n Ho Sakte, Pas Nateeja Yeh Nikla Ke Huzoor ﷺ Ke Aaba Wa Ajdaad Aur Ummahaat Wa Jaddaat Momin Mowahhid The Kabhi Mushrik Wa Kaafir Nahee'n Ho Sakte.
Aur Hazrat Anas Radiallaahu A'nhu Se Riwaayat Hai Ke Huzoor ﷺ Ne Farmaaya, Mai'n Hoo'n Muhammad Bin Abdullaah Bin Abdul Muttalib Bin Haashim (Yoo'n 21 Pusht Tak Nasab Naama e Mubaarak Bayaan Farmaaya) Kabhi Log 2 Giroh Na Huwe Magar Yeh Ke Mujhe Allaah Paak Ne Behtar Giroh Me'n Paida Kiya, To Mai'n Apne Maa'n Baap Se Iss Tarah Paida Huwa Ke Zamaana e Jaahiliyat Ki Koi Baat Mujh Tak Na Paho'nchi Aur Mai'n Khaalis Nikaah e Saheeh Se Paida Huwa, Aadam A'laihissalaam Se Lekar Apne Abwain Tak To Mera Nafs Kareem Sabse Afzal Aur Mere Baap Tum Sabke Aaba Se Behtar. (Dalaa'ilun Nabuwwah, 1/184)
Iski Taa'eed Me'n Yeh Hadees Bhi Mulaaheza Kare'n Ke Rasoolullaah ﷺ Ne Farmaaya, Mai'n Muhammad Bin Abdullaah Bin Abdul Muttalib Hoo'n, Allaah Ne Makhlooq Ko Paida Kiya To Mujhe Unke Sabse Behtar Makhlooq Me'n Kiya, Phir Unke 2 Giroh Kiye, Mujhe Unke Behtar Giroho'n Me'n Kiya, Phir Unhe'n Qabeelo'n Me'n Baa'nta To Mujhe Unke Sabse Behtar Qabeele Me'n Kiya, Phir Unke Kayi Ghar Kiye To Mujhe Unke Sabse Behtar Ghar Me'n Kiya, Aur Shakhsi Taur Par Bhi Mujhe Unme'n Sabse Behtar Banaaya. (Tirmizi Shareef, 5/884, Hadees No.3608)
Pas Ab Baat Roz e Roshan Se Bhi Zyaadah Ayaa'n Hogayi Ke Nasab e Nabi e Kareem ﷺ Me'n Koi Kaafir, Mushrik Daakhil Nahee'n, Warna Huzoor ﷺ Ka Aaba Wa Ajdaad Ke Ae'tebaar Se Khair (Behtar Hona) Kis Tarah Saabit Ho Sakta Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Waalidain e Mustafa ﷺ Ke Imaan Ka Aqeedah Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
