Yaad Rahe Ke Ham Ahle Sunnat Wa Jamaa'at Ke Nazdeek Nabi e Akram ﷺ Se Muta'alliq Mukhtaar e Kul Ka Aqeedah Na Zarooriyaat e Deen Se Hai Na Zarooriyaat e Ahle Sunnat Se Hai Balke Yeh Aqeedah Zanniyaat Aur Baab e Fazaa'il Me'n Se Hai.
Chunaanche Munaazir e Islaam Allaama Maulaana Mufti Mutee'ur Rehmaan Razvi Likhte Hai'n Ke Mukhtaar e Kul Se Muta'alliq Ahle Sunnat Wa Jamaa'at Ka Aqeedah Yeh Hai Ke Allaah Paak Ne Huzoor ﷺ Ko Ikhtiyaar Dediya Hai Ke Aap Kaa'inaat Me'n Jis Tarah Aur Jaise Chaahe Tasarruf Farmaaye'n, Yeh Aqeedah Bhi Buniyaadi Nahee'n Hai Ke Tasleem Na Karne Par Takfeer Ki Jaati Ho. (Tehqeeq Wa Ta'aaqqub, Safha No.219)
Ab Yahaa'n Ek Baat Aur Zahen Nasheen Karle'n Ke Ikhtiyaaraat Ki 2 Qisme'n Hai'n (1) Tashree'iya (2) Takweeniya
(1) Tashree'iya :- Ya'ni Kisi Fel (Kaam) Ko Farz Ya Haraam Ya Waajib Ya Makrooh Ya Mustahab Ya Mubaah Kardena.
(2) Takweeniya :- Jaisa Ke Zindah Karna, Maarna, Kisi Ki Haajat Poori Kar Dena, Kisi Se Museebat Door Kar Dena Wagairah Wagairah.
Allaah Paak Ne Dono'n Qism Ke Ikhtiyaaraat Nabi e Kareem ﷺ Ko Ata Farmaaye Hai'n.
A'imma e Muhaqqiqeen Tashreeh Farmaate Hai'n Ke Ahkaam e Sharee'at Huzoor Sayyad e Aa'lam ﷺ Ko Supurd Hai'n, Jo Baat Chaahe'n Waajib Kare'n Jo Chaahe'n Na Jaa'iz Farma De'n Jis Cheez Ya Jis Shakhs Ko Jis Hukm Se Chaahe'n Mustasna Farma De'n. (Fataawa Razviya, Jild No.30, Safha No.518, Raza Foundation Laahor)
Tashreeyi Ikhtiyaaraat Ki 2 Soorate'n Hai'n, Pehli Hukm e Aa'm Me'n Kisi Ki Takhsees Kar Dena, Iske Saboot Par Chand Dalaa'il Mulaaheza Farmaaye'n.
Roze Ka Kaffaarah :- Sihaah Sittah Aur Deegar Kutub e Ahaadees Me'n Hazrat Abu Hurairah Radiallaahu A'nhu Se Marwi Hai Ke Ek Shakhs Ne Baargaah e Aqdas Me'n Haazir Hokar Arz Ki Ya Rasoolallaah ﷺ ! Mai'n Halaak Hogaya, Farmaaya Kya Huwa ? Arz Ki Ke Mai'n Ne Ramzaan Me'n Apni Aurat Se Nazdeeki (Hambistary) Ki, Farmaaya Gulaam Aazaad Kar Sakta Hai ? Arz Ki Nahee'n, Farmaaya Lagaataar 2 Maheene Ke Roze Rakh Sakta Hai ? Arz Ki Nahee'n, Farmaaya 60 Miskeeno'n Ko Khaana Khila Sakta Hai ? Arz Ki Nahee'n, Itne Me'n Khajoore'n Khidmat e Aqdas Me'n Laayi Gayi, Huzoor ﷺ Ne Farmaaya Inhe'n Khairaat Kardo, Arz Ki Kis Par, Farmaaya Apne Se Zyaadah Kisi Mohtaaj Par, Arz Ki Madeene Bhar Me'n Hamaare Baraabar Koi Mohtaaj Nahee'n, Nabi e Akram ﷺ Yeh Sunkar Ha'nse Yahaa'n Tak Ke Dandaan e Mubaarak Zaahir Huwe Aur Farmaaya Ja Apne Ghar Waale Ko Khila De Aur Tera Kaffaarah Ada Ho Jaayega. (Muslim Shareef, 2/781, Hadees No.81(1111))
Hukm e Aa'm Yeh Hai Ke Jo Shakhs Qasdan Rozah Tode Uspar Laazim Hai Ke Ya To Woh Gulaam Aazaad Kare Ya Phir 2 Maheene Ka Rozah Rakhe Ya Phir 60 Miskeeno'n Ko Khaana Khilaaye, Lekin Huzoor ﷺ Ne Unko Iss Hukm Se Mustasna Farma Diya.
Sirf 2 Namaaze'n :- Musnad e Imaam Ahmad Me'n Hai Ke Ek Saahab Huzoor ﷺ Ki Khidmat e Aqdas Me'n Haazir Hokar Iss Shart Par Imaan Laaye Ke Sirf 2 Hi Namaaze'n Padha Karu'nga, Nabi e Kareem ﷺ Ne Qabool Farma Liya. (Musnad e Ahmad Bin Hambal, 33/407, Hadees No.20287)
Poori Ummat Keliye Hukm Yeh Hai Ke Rozaana 5 Waqt Ki Namaaze'n Farz Hai Magar Nabi e Mukhtaar ﷺ Ne Uss Shakhs Ko Iss Hukm e Aa'm Se Mustasna Kardiya.
6 Maah Ki Qurbaani Jaa'iz Farma Di :- Hazrat Bara Bin Aa'zib Radiallaahu A'nhu Se Riwaayat Hai Ke Unke Maamu'n Abu Burdah Bin Niyaaz Radiallaahu A'nhu Ne Namaaz e Eid Se Pehle Qurbaani Karli Thi, Jab Ma'loom Huwa Ke Yeh Kaafi Nahee'n, Arz Ki Ya Rasoolallaah ﷺ ! Woh To Mai'n Kar Chuka Ab Mere Paas 6 Maheene Ka Bakri Ka Bachcha Hai Magar Saal Bhar Waale Se Achcha Hai, Rasoolullaah ﷺ Ne Farmaaya, Uski Jagah Ise Kardo Aur Hargiz Itni Umar Ki Bakri Tumhaare Ba'ad Kisi Doosre Ki Qurbaani Me'n Kaafi Na Hogi. (Bukhaari Shareef, 2/19, Hadees No.968)
Kisi Cheez Ke Haraam Wa Halaal Hone Ki Nisbat Apni Taraf Karne Par Dalaa'il Mulaaheza Farmaaye'n.
Allaah Paak Ne Qur'aan Shareef Me'n Irshaad Farmaaya,
Tarjuma - Lado Unse Jo Imaan Nahee'n Laate Allaah Aur Pichhle Din Par Aur Haraam Nahee'n Maante Uss Cheez Ko Jise Haraam Kardiya Hai Allaah Aur Uske Rasool Ne.
(Surah Taubah,Aayat No:29)
Sharaab Wagairah Ki Hurmat Saheehain Me'n Hai :
Hazrat Jaabir Bin Abdullaah Radiallaahu A'nhuma Se Marwi Hai, Unho'n Ne Saal e Fateh Me'n Rasoolullaah ﷺ Ko Farmaate Suna, Beshak Allaah Aur Uske Rasool ﷺ Ne Haraam Kardiya Sharaab Aur Murdaar Aur Suwwar Aur Buto'n Ka Bechna. (Bukhaari Shareef, 3/84, Hadees No.2236)
Madeena Munawwarah Ko Haram Banaaya :
Saheehain Me'n Hai Ke Hazrat Abu Hurairah Radiallaahu A'nhu Ne Farmaaya Tamaam Madeena Tayyaba Ko Rasoolullaah ﷺ Ne Haram Kardiya Aur Uske Aas Paas Baarah Baarah Meel Sabzah Darakht Ko Logo'n Ke Tasarruf Se Apni Himaayat Me'n Leliya. (Muslim Shareef, 2/1000, Hadees No.472(1372))
Farz Farma Dete Agar Chaahte :
Hazrat Abu Hurairah Radiallaahu A'nhu Se Riwaayat Hai Ke Rasoolullaah ﷺ Ne Farmaaya Ke Agar Ummat Ki Mashaqqat Ka Khayaal Na Hota To Mai'n Unpar Farz Farma Deta Ke Har Wazu Ke Waqt Miswaak Kare'n. (Bukhaari Shareef, 3/31, Hadees No.887)
Takweeni Ikhtiyaaraat Ke Saboot Par Dalaa'il Mulaaheza Farmaaye'n.
Apne Fazl Se Gani Kardiya :
Allaah Paak Irshaad Farmaata Hai,
Tarjuma - Munaafiqo'n Ko Yehi Bura Laga Ke Allaah Aur Uske Rasool Ne Unhe'n Apne Fazl Se Gani Kardiya. (Sureh Tauba, Aayat No.74)
Chaa'nd Ko 2 Tukde Farma Diya :
Hazrat Anas Radiallaahu A'nhu Se Riwaayat Hai, Unho'n Ne Farmaaya, Makka Waalo'n Ne Rasoolullaah ﷺ Se Kaha, Aap Koi Mo'jeza Dikhaaye'n, To Sarkaar e Do Aa'lam ﷺ Ne Chaa'nd Ke 2 Tukde Farma Kar Unhe'n Dikha Diya, Yahaa'n Tak Ke Makka Waalo'n Ne Hira Pahaad Ko Chaa'nd Ke 2 Tukdo'n Ke Darmiyaan Dekha. (Bukhaari Shareef, Jild No.5, Safha No.49, Hadees No.3868)
Muslim Shareef Me'n Hai, Hazrat Rabee'ah Bin Ka'ab Aslami Radiallahu Anhu Se Riwaayat Hai Ke Mai'n Raat Ko Rasoolullaah ﷺ Ke Paas Se Guzarta Tha Aur Nabi e Kareem ﷺ Ke Istenja Aur Wazu Keliye Paani Laaya Karta Tha, Nabi e Kareem ﷺ Ne Ek Din Farmaaya, Aye Rabee'ah ! Maa'ng, To Mai'n Ne Arz Kiya, Mai'n Jannat Me'n Aap A'laihissalaam Ki Rafaaqat Ka Sawaal Karta Hoo'n, Nabi e Akram ﷺ Ne Farmaaya, Iske Alaawah Aur Kuchh, Mai'n Ne Arz Kiya, Bas Yehi, To Nabi e Akram ﷺ Ne Farmaaya, Tu Apne Mu'aamle Me'n Sujood Ki Kasrat Ke Saath Meri Madad Kar. (Muslim Shareef, 1/353, Hadees No.226 (489))
Isi Hadees Ke Tahet Hazrat Allaama Mulla Ali Qaari Likhte Hai'n Ke Huzoor e Aqdas ﷺ Ne Jo Maa'ngne Ka Hukm Diya Usse Ma'loom Hota Hai Ke Allaah Paak Ne Huzoor Nabi e Kareem ﷺ Ko Qudrat Bakhshi Hai Ke Allaah Paak Ke Khazaano'n Me'n Se Jo Kuchh Chaahe'n Ata Farmaaye'n. (Mirqaatul Mafaateeh Sharah Mishqaatul Masaabeeh, 2/723, Hadees No.896 Ke Tahet)
In Tamaam Dalaa'il Wa Baraahin Se Yeh Baat Roz e Roshan Ki Tarah Ayaa'n Ho Jaati Hai Ke Allaah Paak Ne Apne Mehboob e Paak Taajdaar e Madeena ﷺ Ko Mukhtaar Bana Kar Bheja Hai, Woh Jo Chaahe'n Faisla Kare'n Aur Jisko Jo Chaahe'n Hukm Kare'n, Allaah Paak Ne Yeh Martaba Unhe'n Ata Farmaaya Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Ikhtiyaaraat e Mustafa ﷺ Ka Bhi Masla Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
