Qaari'een : Awwalan To Yeh Jaan Leejiye Ke Ham Ahle Sunnat Wa Jamaa'at Ke Nazdeek Nooraaniyat e Mustafa ﷺ Ka Aqeedah Na Zarooriyaat e Deen Se Hai Aur Na Hi Zarooriyaat e Ahle Sunnat Me'n Se Hai Balke Yeh Baab e Fazaa'il Me'n Se Hai Ya'ni Aqaa'id e Zanniyaat Ke Qabeel Se Hai, Iska Munkir Kaafir Nahee'n Hai Aur Na Hi Ahle Sunnat Se Khaarij Hai Balke Khata Par Hai.
Ahle Sunnat Wa Jamaa'at Ka Aqeedah Bayaan Karte Huwe Hakeemul Ummat Allaama Mufti Ahmad Yaar Khaan Na'eemi Ashrafi A'laihir Rehma Farmaate Hai'n Ke Huzoor ﷺ Bashar Bhi Hai'n Aur Noor Bhi Hai'n Ya'ni Noori Bashar Hai'n, Haqeeqat Huzoor ﷺ Ki Noor Hai Aur Libaas (Zaahiri Jism Shareef) Bashari Hai. (Rasaa'il e Na'eemiya, Safha No.78)
Ek Shubeh Ka Izaala :- Badmazhab Log Iss Aqeede Par Yeh Shubah Paida Karne Ki Na Paak Koshish Karte Hai'n Ke Ham Ahle Sunnat Wa Jamaa'at Nabi e Kareem ﷺ Ko Allaah Paak Ka Juz Maante Hai'n. M'aaz Allaah
Yaad Rakhe'n : Ham Ahle Sunnat Wa Jamaa'at Ka Qat'an Yeh Aqeedah Nahee'n Ke Rasoolullaah ﷺ Ka Noor Allaah Paak Ke Noor Ka Juz Hai,
Hazrat Allaama Mufti Ahmad Yaar Khaan Na'eemi Ashrafi A'laihir Rehma Likhte Hai'n Ke Huzoor ﷺ Ke Rab Ka Noor Hone Ke Na To Yeh Ma'na Hai Ke Huzoor ﷺ Khuda Ke Noor Ka Tukda Hai, Na Yeh Ke Rab Ka Noor Huzoor Ke Noor Ka Maaddah Hai, Na Yeh Ke Huzoor ﷺ Khuda Ki Tarah Azali, Abadi, Zaati Noor Hai, Na Yeh Ke Allaah Paak Huzoor ﷺ Me'n Saraayat Kar Gaya Hai, Taake Shirk Wa Kufr Laazim Aaye, Balke Sirf Yeh Ma'ni Hai Ke Huzoor ﷺ Bila Waasta Rab Se Faiz Haasil Karne Waale Hai'n Aur Tamaam Makhlooq Huzoor ﷺ Ke Waaste Se Rab Ka Faiz Lene Waali, Jaise Ek Chiraag Se Doosra Chiraag Jala Kar Phir Doosre Chiraag Se Hazaaro'n Chiraag Laga Lo Ya Ek Sheesha Sooraj Ke Saamne Rakho Ke Woh Chamak Jaawe Phir Use Un Sheesho'n Ki Taraf Kardo Jo Taareek Kothri Me'n Hai'n To Uske Aqs Se Tamaam Sheeshe Jagmaga Jaawe'nge, Zaahir Hai Ke Pehle Sheeshe Me'n Na To Sooraj Utar Kar Aagaya Na Uska Tukda Kat Kar Sheeshe Me'n Sama Gaya, Balke Sirf Yeh Huwa Ke Pehle Sheeshe Ne Bila Waasta Sooraj Se Roshni Haasil Ki Aur Baaqi Tamaam Ne Uss Sheeshe Se Ke Agar Yeh Pehla Sheesha Darmiyaan Me'n Na Ho To Saari Kothri Waale Sheeshe Taareek Aur Andhere Reh Jaaye'n. (Rasaa'il e Na'eemiya, Safha No.54, Rasaa'il Noor, Safha No.4)
Ab Chalte Hai'n Dalaa'il Ki Taraf Jinse Nabi e Akram ﷺ Ka Noori Bashar Hona Saabit Hota Hai Mulaaheza Farmaaye'n.
1- Sureh Maa'idah, Aayat No.15.
Tarjuma - Beshak Tumhaare Paas Allaah Ki Taraf Se Noor Aaya Aur Roshan Kitaab.
2- Tafseer Jalaalain, Sureh Maa'idah, Aayat No.15, Safha No.139.
Tarjuma - Aayat Me'n Noor Se Muraad Noor e Muhammad ﷺ Hai.
3- Tafseer Khaazin, Sureh Maa'idah, Aayat No.15, Jild No.2, Safha No.24.
Tarjuma - Iss Aayat Me'n Noor Se Muraad Noor e Muhammad ﷺ Hai'n, Rabbul Aa'lameen Ne Unhe'n Noor Isliye Farmaaya Ke Huzoor ﷺ Se Hidaayat Haasil Ki Jaati Hai Jaisa Ke Andhere Me'n Noor Se Hidaayat Li Jaati Hai.
4 - Tafseer Nasafi, Jild No.1, Safha No.436.
Isi Aayat Ke Tahet "Tafseer Nasafi" Me'n Mazkoor Hai Ke Ya Phir Aayat Me'n Noor Se Muraad Muhammad ﷺ Hai'n.
5 - Tafseer e Samarqandi, 1/424.
Tarjuma - Faqeeh Abul Lais Samarqandi Rehmatullaah A'laih Farmaate Hai'n Ke Noor Se Muraad Mohammad e Mustafa ﷺ Aur Qur'aan Hai.
6 - Tafseer e Bagavi, 2/17.
Tarjuma - Imaam Abu Muhammad Husain Bin Mas'ood Bagavi Rehmatullaah A'laih Farmaate Hai'n Ke Noor Se Muraad Muhammad Mustafa ﷺ Hai Aur Ek Qaul Yeh Hai Ke Isse Muraad Islam Hai.
7 - Tafseer e Jalaalain, Safha No.97.
Tarjuma - Allaama Jalaaluddeen Suyuti Rehmatullaah A'laih Lafze "Noor" Ki Tafseer Karte Huwe Farmaate Hai'n Ke Noor Se Muraad Nabi e Kareem ﷺ Hai'n.
8 - Tafseer e Saawi, 2/486)
Tarjuma - Allaama Saawi Farmaate Hai'n Ke Huzoor e Akram ﷺ Ka Naam Iss Ayat Me'n Noor Rakha Gaya Isliye Ke Huzoor e Akram ﷺ Baseerato'n Ko Roshan Karte Hai'n Aur Unhe'n Rushd Wa Hidaayat Farmaate Hai'n Aur Isliye Ke Huzoor e Akram ﷺ Har Noor e Hissi (Jise Dekha Ja Sake) Aur Ma'anavi (Jaise Ilm Wa Hidaayat) Ki Asal Hain.
9 - Tafseer e Kabeer, 4/327.
Tarjuma - Imaam Fakhruddeen Raazi Rehmatullaah A'laih Farmaate Hai'n Ke Yeh Qaul Ke Noor Aur Kitaab Dono'n Se Muraad Qur'aan Hai Yeh Za'eef Hai.
10 - Tafseer e Roohul Ma'ani, 5/367.
Tarjuma - Allaama Sayyad Mehmood Aaloosi Bagdaadi Rehmatullaah A'laih Farmaate Hai'n Ke Iss Noor Se Muraad Tamaam Nooro'n Ke Noor, Rasoolullaah ﷺ Ki Zaat Hai.
11 - Sharah Shifa, Jild No. 1/51
Tarjuma - Allaama Mulla Ali Qaari Rehmatullaah A'laih Farmaate Hai'n Ke Aur Kaunsi Rukaawat Hai Iss Baat Se Ke Dono'n Na'ate'n Ya'ni Noor Aur Kitaabe Mubeen Rasoolullaah ﷺ Keliye Ho Beshak Rasoolullaah ﷺ Noor e Azeem Hai'n Anwaar Me'n Unke Kamaal Zahoor Ki Wajah Se Aur Rasoolullaah ﷺ Kitaab e Mubeen Hai Iss Haysiyat Se Ke Aap Jamee Asraar Ke Jaame Hai'n Aur Ahkaam Wa Ahwaal Wa Akhbaar Ke Muzhir Hai'n.
12 - Al Juz'ul Mafkood Minal Musannaf Abdur Razzaaq, Safha No.62, Hadees No.18.
Tarjuma - Abdur Razzak Mo'mar Se Aur Woh Ibnul Munkadir Se Aur Woh Hazrat Jaabir Radiallaahu A'nhu Se Riwaayat Karte Hai'n Ke Woh Farmaate Hai'n, Mai'n Ne Rasoolullaah ﷺ Se Poochha Ke Allaah Paak Ne Sabse Pehle Kis Cheez Ko Paida Farmaaya ? Rasoolullaah ﷺ Ne Irshaad Farmaaya, Aye Jaabir ! Allaah Paak Ne Sabse Pehle Tere Nabi Ke Noor Ko Paida Farmaaya. (Saheeh Hadees)
13 - Tirmizi Shareef, Hadees No. 3609.
Tarjuma - Hazrat Abu Huraira Radiallaahu A'nhu Se Riwaayat Hai Ke Logo'n Ne Poochaa, Ya Rasoolallaah ﷺ Nubuwwat Aapke Liye Kab Waajib Huwi ? To Rasoolullaah ﷺ Ne Irshaad Farmaaya, Jab Aadam A'laihissalaam Rooh Aur Jism Ke Darmiyaan The. (Saheeh Hadees)
Note - Hazrat Aadam A'laihissalaam Se Pehle Bhi Hamaare Nabi ﷺ Maujood The, Ab Sawaal Yeh Paida Hota Hai Ke Jismaani Taur Par Ya Nooraani Taur Par, To Jawaab Yeh Hai Ke Nooraani Taur Par Maujood The.
14 - Mawaahibul Ladunniya, Jild No.1, Safha No.48.
Tarjuma - Hazrat Sayyaduna Jaabir Radiallaahu A'nhu Ne Jab Nabi e Kareem ﷺ Se Sawaal Kiya Ke Allaah Paak Ne Tamaam Cheezo'n Se Pehle Kis Cheez Ko Paida Kiya ? To Huzoor Purnoor ﷺ Ne Khud Apni Nooraaniyat Ko Yoo'n Bayaan Farmaaya, Aye Jaabir ! Allaah Paak Ne Tamaam Makhlooq Se Pehle Tere Nabi Ke Noor Ko Apne Noor Se Paida Farmaaya.
Mazkoorah Hadees Ko Imaam Bayhaqi A'laihir Rehma Ne Bhi "Dalaa'ilun Nabuwwah" Me'n Isi Tarah Riwaayat Ki Aur Ajilla A'imma e Deen Maslan Allaama Zurqaani A'laihir Rehma Ne Sharah "Mawaahib" Me'n Aur Shaykh Abdul Haq Muhaddis e Dehlavi A'laihir Rehma Ne "Madaarijun Nabuwwah" Me'n Iss Hadees Ko Naqal Karke Isse Istenaad Aur Ae'temaad Farmaaya Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, (Nabi e Kareem ﷺ Ke Noor Hone Ka Aqeedah Bhi Zanniyaat Me'n Se Hai Ya'ni Baab e Fazaa'il Me'n Se Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
