Qaari'een Hazraat : Pehle Yeh Baat Yaad Rakhe Ke Ham Ahle Sunnat Wa Jamaa'at Ka Jo Yeh Aqeedah Aur Nazariya Hai Ke Nabi e Kareem ﷺ Na Hote To Kuchh Bhi Na Hota, Yeh Aqeedah Baabe Fazaa'il Me'n Se Hai, Ya'ni Aqaa'id e Zanniyaat Ke Qabeel Se Hai Aur Iss Aqeede Ki Wazaahat Yeh Hai Ke Nabi e Kareem ﷺ Na Hote To Kuchh Bhi Na Hota, Ya'ni Agar Allaah Paak Nabi e Kareem ﷺ Ko Paida Na Karta To Kuchh Bhi Paida Na Karta, Isliye Ham Ahle Sunnat Wa Jamaa'at Yeh Bhi Aqeedah Aur Nazariya Rakhte Hai'n Ke Nabi e Kareem ﷺ Awwalul Khalq Hai'n, Ya'ni Sabse Pehle Allaah Paak Ne Noor e Muhammadi ﷺ Ko Paida Kiya Aur Yeh Aqeedah Aur Nazariya Bhi Baabe Fazaa'il Me'n Se Hai, Ya'ni Aqaa'id e Zanniyaat Ke Qabeel Se Hai.
Ab Dalaa'il Mulaaheza Farmaaye'n.
1- Mustadrak, Jild No.3, Safha No.516, Hadees No.4285.
Tarjuma - Aye Isa ! Muhammad e Arabi ﷺ Par Imaan Laao Aur Apni Ummat Me'n Se Unka Zamaana Paane Waalo'n Ko Bhi Un Par Imaan Laane Ka Hukm Do, Agar Muhammad e Mustafa ﷺ Na Hote To Mai'n Na Aadam Ko Paida Karta Aur Na Hi Jannat Wa Dozakh Ko Banaata.
Imaam Muhammad Bin Abdul Baaqi Zurqaani Maaliki A'laihir Rehma Iss Riwaayat Ke Tahet Farmaate Hai'n Ke Iss Tarah Ki Baat Apni Raaye Se Nahee'n Kahi Ja Sakti, Lehaaza Iss Riwaayat Ka Hukm Marfu Riwaayat Ka Hai, (Ya'ni Hazrat Abdullaah Bin Abbaas Radiallaahu A'nhuma Ne Yeh Baat Nabi e Kareem ﷺ Se Sunkar Bayaan Ki Hai). (Zurqaani Alal Mawaahib, Jild No.7, Safha No.186)
Imaam Muhammad Bin Yoosuf Saalihi Shaami A'laihir Rehma Ne Seerate Mustafa ﷺ Se Muta'alliq Apni Maaya e Naaz Kitaab "Subulul Huda War Rashaad Fee Seerati Khairil Ibaad" Me'n Ek Poore Baab (Chapter) Ka Naam Yeh Rakha Hai "Khalqu Aadama Wa Jamee'il Makhlooqaati Li Ajlihi ﷺ" Ya'ni "Hazrat Aadam A'laihissalaam Aur Saari Makhlooq Ka Sarkaar e Do Aa'lam ﷺ Keliye Takhleeq Kiya Jaana" Aur Iss Baab Me'n Mazkoorah Baala Riwaayat Naqal Karne Ke Ba'ad Likhte Hai'n Ke Imaam Jamaaluddeen Mehmood Bin Jumla A'laihir Rehma Ne Irshaad Farmaaya, Huzoor e Akram ﷺ Ke Siwa Kisi Aur Nabi Ya Kisi Farishte Ko Yeh Fazeelat Haasil Nahee'n Huwi. (Subulul Huda War Rashaad, Jild No.1, Safha No.74)
2- Khasaa'isul Kubra, Jild No.2, Safha No.330.
Tarjuma - Hazrat Sayyaduna Jibra'eel Ameen A'laihissalaam Baargaah e Risaalat Me'n Haazir Hokar Arz Guzaar Huwe, Aapka Rab Irshaad Farmaata Hai, Beshak Mai'n Ne Duniya Aur Duniya Waalo'n Ko Isliye Paida Farmaaya Hai Taake Aye Mehboob ! Mere Nazdeek Aapki Jo Qadar Wa Manzilat Hai Woh Unhe'n Bataau'n Aur Agar Aap Na Hote To Mai'n Duniya Ko Takhleeq Na Farmaata.
3- Mawaahibul Ladunniya, Jild No.1, Safha No.35 / Zurqaani Alal Mawaahib, Jild No.1, Safha No.85.
Tarjuma - Jab Allaah Paak Ne Hazrat Sayyaduna Aadam A'laihissalaam Ko Paida Farmaaya To Aapne Arsh Par Noor e Muhammadi ﷺ Mulaaheza Farma Kar Baargaah e Khudaawandi Me'n Arz Ki, Aye Mere Rab ! Yeh Noor Kaisa Hai ? Allaah Paak Ne Irshaad Farmaaya Ke Yeh Aapki Aulaad Me'n Se Ek Nabi Ka Noor Hai Jinka Aasmaan (Ke Farishto'n) Me'n (Mash'hoor Naam) Ahmad Jabke Zameen (Waalo'n) Me'n (Mash'hoor Naam) Muhammad Hai, Agar Woh Na Hote To Mai'n Na Aapko Paida Karta Aur Na Hi Aasmaan Wa Zameen Ko Banaata.
4- Jawaaherul Bahhaar, Jild No.3, Safha No.42.
Tarjuma - Ek Hadees e Qudsi Me'n Farmaaya Gaya Ke Aye Mehboob ! Agar Aap Na Hote To Mai'n Aasmaan Wa Zameen Aur Jinnaat Wa Farishto'n Ko Paida Na Farmaata.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, (Nabi e Kareem ﷺ Na Hote To Kuchh Bhi Na Hota Yeh Aqeedah Bhi Zanniyaat Se Hai Ya'ni Baab e Fazaa'il Me'n Se Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
