Namaaz e Janaazah Ke Ba'ad Mayyat Keliye Jo Du'aa e Khair Kiya Jaata Hai Uske Ta'alluq Se Ham Ahle Sunnat Wa Jamaa'at Ka Nazariya Wa Aqeedah Yeh Hai Ke Yeh Na To Zarooriyaat e Deen Me'n Se Hai Na Zarooriyaat e Ahle Sunnat Wa Jamaa'at Me'n Se Hai Balke Yeh Ek Mustahab Aur Jaa'iz Amal Hai Jo Ke Furu Me'n Se Hai.
Yaad Rahe Musalmaano'n Ke Inteqaal Ke Ba'ad Mukhtalif Haalate'n Hoti Hai'n, Namaaz e Janaazah Se Pehle Ki Haalat, Namaaz e Janaazah Ke Ba'ad Ki Haalat, Dafan Se Pehle, Dafan Ke Ba'ad Ki Haalat, In Teeno'n Haalato'n Me'n Mayyat Keliye Du'aa Karna, Isaale Sawaab Karna Jaa'iz Balke Behtar Hai, Haa'n Mayyat Ke Gusl Se Pehle Agar Uske Paas Baith Kar Qur'aan Padhna Ho To Usko Dhak De (Ya'ni Mayyat Ko Dhak De) Kyu'nke Abhi Woh Na Paak Hai Jab Gusl Dediya Phir Har Tarah Qur'aan Wagairah Padhe.
Mukhaalifeen Namaaz Se Pehle Aur Dafan Ke Ba'ad To Du'aa Wagairah Karna Jaa'iz Maante Hai'n, Magar Ba'ad Namaaz, Dafan Se Pehle Du'aa Ko Na Jaa'iz, Haraam, Bid'at, Shirk, Na Ma'loom Kya Kya Kehte Hai'n, Iske Saboot Par Daleel Mulaaheza Farmaaye'n.
Allaah Paak Qur'aan Majeed Me'n Irshaad Farmaata Hai,
Tarjuma - Aur Jab Tum Namaaz Se Faarig Ho To Du'aa Me'n Mehnat Karo. (Sureh Alam Nashrah, Aayat No.7)
Iski Tafseer Me'n Sultaanul Mufassireen Hazrat Abdullaah Bin Abbaas Radiallaahu Anhuma Farmaate Hai'n Ke Jab Aap Namaaz Se Faarig Ho Jaaye'n To Du'aa Me'n Koshish Kare'n Aur Allaah Paak Se Maa'nge'n Aur Uski Taraf Mutawajjeh Ho'n. (Jaame'ul Bayaan Lit Tabri, Jild No.42, Safha No.694)
Ek Aur Maqaam Par Allaah Paak Irshaad Farmaata Hai,
Tarjuma - Aur Tumhaara Rab Farmaata Hai Ke Mujhse Du'aa Karo Mai'n Tumhaari Du'aa Qabool Karoo'nga. (Sureh Momin, Aayat No.60)
Iss Aayate Kareema Me Mutlaqan Umooman Farmaaya Ke Du'aa Karo Qabool Karoo'nga Yeh Nahee'n Farmaaya Ke Fulaa'n Waqt To Mustahab Wa Mashroo Hai Fulaa'n Waqt Nahee'n Aur Fulaa'n Waqt Na Jaa'iz Wa Mamnu Balke Bagair Waqt Ki Qaid Lagaaye Mutlaqan Hukm Irshaad Farmaaya Ke Du'aa Maa'ngo.
Imaam Abu Daawood Sulemaan Bin Ash'as Sajistaani (Wisaal 275 Hijri) Riwaayat Karte Hai'n Ke Hazrat Abu Hurairah Radiallaahu Anhu Irshaad Farmaate Hai'n Ke Mai'n Ne Nabi e Kareem ﷺ Ko Farmaate Huwe Suna Ke Jab Tum Mayyat Par Namaaz (Janaazah) Padh Lo To Uske Liye Ikhlaas Ke Saath Du'aa Karo. (Abu Daawood Shareef, Hadees No.3199)
Iss Hadees e Mubaaraka Se Namaaz e Janaazah Ke Ba'ad Du'aa Maa'ngna Saabit Huwa, Jo Log Iss Du'aa Se Namaaz e Janaazah Me'n Aa'm Taur Par Padi Jaane Waali Du'aa Muraad Lete Hai'n Unko Iss Hadees Ke Iss Jumle (Ya'ni Jab Tum Mayyat Par Namaaz e Janaazah Padh Lo To Uske Liye Khaalis Du'aa Karo) Me'n Gaur Karna Chaahiye, Kyu'nke Woh Du'aa Jo Namaaz e Janaazah Ke Andar Padhi Jaati Hai Woh Khaalisatan Mayyat Keliye Kahaa'n Hoti Hai, Woh To Tamaam Zindo'n, Murdo'n, Gaa'ib, Haazir, Mardo'n, Aurato'n Sabke Liye Hoti Hai, Jabke Hadees Ke Alfaaz Hai'n Ke Jab Tum Namaaz e Janaazah Padh Lo To Mayyat Keliye Khuloos Se Du'aa Maa'ngo, So Ma'loom Huwa Ke Iss Du'aa Se Muraad Namaaz e Janaazah Padhne Ke Ba'ad Ki Du'aa Hai Ke Jab Tum Namaaz e Janaazah Padh Lo To Ikhlaas Ke Saath Mayyat Keliye Du'aa Maa'ngo.
Imaam Abu Abdullaah Muhammad Bin Abdullaah Haakim Neshaapuri (Wisaal 405 Hijri) Likhte Hai'n, Hazrat Abdullaah Bin Abi Aaofa Radiallaahu Anhuma Jo As'haab e Shajrah Me'n Se Hai Woh Bayaan Karte Hai'n Ke Unki Beti Faut Hogayi, Woh Uske Janaaze Me'n Khachchar Par Sawaar Ho Kar Jaarahe The Ke Aurato'n Ne Rona Shuru Kardiya, Hazrat Abdullaah Radiallaahu Anhu Ne Kaha, Tum Marsiya Mat Padho, Kyu'nke Rasoolullaah ﷺ Ne Marsiya Padhne Se Mana Farmaaya Hai, Tum Me'n Se Koi Aurat Apni Aa'nkh Se Jis Qadar Chaahe Aa'nsu Bahaaye, Phir Unho'n Ne Janaaze Par 4 Takbeere'n Padhee'n, Phir Itna Waqfa Kiya Jitna 2 Takbeero'n Ke Darmiyaan Waqfa Hota Hai Aur Uss Waqfe Me'n Du'aa Karte Rahe Phir Kaha, Rasoolullaah ﷺ Namaaz e Janaazah Me'n Isi Tarah Karte The. (Mustadrak, 1/512, Hadees No.1330)
Imaam Muhammad Bin Sa'ad (Wisaal 230 Hijri) Riwaayat Karte Hai'n, Hazrat Saalim Farmaate Hai'n Ke Hame'n Hamaare Ba'az As'haab Ne Ittela Di Ke Hazrat Abdullaah Bin Salaam Radiallaahu Anhu Uss Waqt Aaye Jab Hazrat Umar Faarooq Radiallaahu Anhu Ki Namaaz e Janaazah Padhi Ja Chuki Thi, To Farmaaya Allaah Ki Qasam ! Agar Tumne Unpar Namaaz Me'n Mujhse Pahel Karli Hai To Sana (Ta'reef) Karne Me'n Mujhse Pahel Na Karo, Phir Unki Chaar Paayi Ke Qareeb Khade Huwe Aur Kehne Lage Aye Umar ! Aap Islaam Ke Sachche Aur Behtareen Jaa'n Nisaar The, Haq Keliye Sakhi Aur Baatil Keliye Bakheel, Aap Riza e Khuda Par Raazi Hote Aur Gazab Par Naaraaz, Paak Daaman, Saaf Dil, Na Khush Aamad Karne Waale Aur Na Ayb Jo, Phir Baith Gaye. (Tabqaatul Kubra, 3/369)
Allaama Abu Bakar Bin Mas'ood Kaasaani (Wisaal 587) Hijri Farmaate Hai'n, Aur Riwaayat Me'n Hai Hazrat Abdullaah Bin Salaam Radiallaahu Anhu Se Ke Beshak Unse Hazrat Umar Ki Namaaz e Janaazah Faut Hogayi, Pas Jab Aap Haazir Huwe To Farmaaya, Ke Agar Tum Unpar Namaaz Me'n Mujhse Sabqat Le Gaye Ho To Unke Liye Du'aa Karne Me'n Mujhse Sabqat Nahee'n Le Sakte. (Badayiossanayi. 1/353)
Hazrat Abdullaah Bin Salaam Radiallaahu Anhu Se Riwaayat Hai Ke Jab Unse Hazrat Umar Radiallaahu Anhu Ki Namaaz e Janaazah Faut Hogayi To Farmaaya Ke Agar Tum Mujhse Namaaz e Janaazah Padhne Me'n Sabqat Legaye Ho To Unke Liye Du'aa Karne Me'n Mujhse Sabqat Nahee'n Le Sakte. (Fathullah Ul Moin.1/353)
Hazrat Abdullaah Bin Salaam Radiallaahu Anhu Se Marwi Riwaayat Se Ma'loom Huwa Ke Du'aa Ba'ad Namaaz e Janaazah Hazrat Abdullaah Bin Salaam Radiallaahu Anhu Jo Ek Jaleelul Qadr Sahaabi e Rasool Hai'n Ki Sunnat e Mubaaraka Hai.
Mohtaram Qaari'een ! Jaisa Ke Aapne Yeh Tamaam Dalaa'il Mulaaheza Kee'n, In Tamaam Dalaa'il Ko Saamne Rakhte Huwe Ab Aap Khud Faisla Kare'n Ke Namaaz e Janaazah Ke Ba'ad Jo Mayyat Keliye Du'aa e Khair Kiya Jaata Hai Yeh Jaa'iz Hai Ya Na Jaa'iz, To Aap Zaroor Iss Nateeje Par Paho'nche'nge Ke Waaqe'atan Aisa Karna Jaa'iz Hai, Sunnat e Rasool ﷺ Aur Sunnat e Sahaaba Radiallaahu Anhum Hai'n.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Namaaz e Janaazah Ke Ba'ad Du'aa Ka Masla Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
