Hadees - Hazrat Maalik Bin Huweris Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, Aur Jis Tarah Tumne Mujhe Namaaz Padhte Dekha Usi Tarah Namaaz Padhna. (Saheeh Ibne Hibbaan, Hadees No.1658)
Achchhi Tarah Paak Ho Kar Aur Achchhi Tarah Wazu Karke Aur Paak Jagah Par Qibla Ki Taraf Muh Karke Khade Ho Jaaye'n,
Hadees - Hazrat Abu Hurairah Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, Jab Tum Namaaz Keliye Khade Huwa Karo To Poori Tarah Wazu Kiya Karo, Phir Qibla Ki Taraf Rukh Karke Takbeer Kaha Karo. (Bukhaari Shareef, Kitaabul Istezaan, Hadees No.6251)
Shirt Ya Kurte Ki Aasteen Ko Na Mode'n Aur Pant Ya Paijaame Ko Neeche Se Na Mode'n Aur Shirt Ko Ing Na Kare'n,
Hadees - Hazrat Ibne Abbaas Radiallaahu Anhu Se Riwaayat Hai Ke Rasoolullaah ﷺ Ne Hame'n Hukm Diya Hai Ke Ham 7 Haddiyo'n Par Sajdah Kare'n Aur (Namaaz Me'n) Kapde Ko Na Mode'n Aur Baalo'n Ko Na Baa'ndhe'n. (Bukhaari Shareef, Kitaabul Azaan, Hadees No.770)
Khule Sar Namaaz Na Padhe'n Balke Topi Ya Amaama Shareef Pahen Kar Namaaz Padhe'n Ke Yeh Sunnat Hai,
Hadees - Hazrat Waa'il Bin Hujr Radiallaahu Anhu Se Riwaayat Hai, Unho'n Ne Farmaaya Ke Mai'n Ne Rasoolullaah ﷺ Ko Dekha, Aapne Namaaz Shuru Ki To Shaano Ke Muqaabil Uthaaya, Phir Mai'n Aa'indah Saal (Next Year) Aaya To Dekha Sahaaba Haatho'n Ko Uthaate The Aur Woh Topi Pehne Huwe Hote The. (As-Sunanul Kubra Lil Baihaqi, Jild No.1, Safha No.373)
Pairo'n Ko Zyaadah Phaila Kar Na Khade Ho'n Balke Dono'n Pairo'n Ke Darmiyaan 4 U'ngal Ka Faasla Hona Chaahiye, Aur Pairo'n Ki Ungliyo'n Ko Qibla Ki Taraf Rakhe'n,
Hadees - Hazrat Anas Bin Maalik Radiallaahu Anhu Se Riwaayat Hai Ke "Rasoolullaah ﷺ Jab Namaaz Keliye Khade Hote The To Logo'n Ki Taraf Mutawajjeh Ho Kar Yeh Farmaate The, Ae'tedaal Ikhtiyaar Karo, Safo'n Ko Seedhi Rakho. (Saheeh Ibne Hibbaan, Jild No.5, Safha No.542)
Phir Niyat Kare'n, Niyat Dil Ke Iraade Ka Naam Hai Magar Zabaan Se Dohraana Behtar Hai, Niyat Iss Tarah Keejiye Ke "Niyat Ki Mai'n Ne 2 Rak'at Farz, Namaaz e Fajr Ki, Waaste Allaah Paak Ke, Rukh Mera Ka'ba Shareef Ki Taraf (Agar Jamaa'at Ke Saath Namaaz Padh Rahe Ho'n To Kahe'n) Peechhe Iss Imaam Ke. (Jo Namaaz Aap Padh Rahe Hai'n Woh Namaaz Ka Naam Le'n).
Dono'n Haatho'n Ki Hatheliyo'n Ko Kaano'n Ki Law Tak Uthaaye'n Aur "Allaahu Akbar" Kahe'n, Hatheliyo'n Ka Rukh Qibla Ki Taraf Hona Chaahiye,
Hadees - Hazrat Maalik Bin Huweris Radiallaahu Anhu Se Riwaayat Hai Ke "Rasoolullaah ﷺ Jab Jab "Allaahu Akbar" Kehte To Dono'n Haatho'n Ko Kaano'n Ke Muqaabil Uthaate The. (Muslim Shareef, Hadees No.769)
Dono'n Haatho'n Ki Hatheliyo'n Ko Kaano'n Ki Law Tak Utha Kar "Allaahu Akbar" Kahe'n Aur Dono'n Haatho'n Ko Naaf Ke Neeche Baa'ndhe'n, Ulte Haath Ko Neeche Rakhe'n Aur Seedhe Haath Se Ulte Haath Ki Hatheli Ko Pakde'n, Aur Nazar Sajde Ki Jagah Par Rakhe'n,
Hadees - Hazrat Maula Ali Radiallaahu Anhu Ne Farmaaya Ke Namaaz Me'n Hatheli Ko Hatheli Par Rakh Kar Naaf Ke Neeche Rakhna Sunnat Hai. (Sunane Abu Daawood, Hadees No.756)
Phir Sana Padhe'n Ke Yeh Sunnat Hai, Phir "A'oozubillaah" Aur "Bismillaah" Padhe'n, Uske Ba'ad Surah Faateha Padhe'n Aur Qur'aan Ki Koi Bhi Chhoti Surah Ya 3 Aayate'n Padhe'n, Agar Jamaa'at Ke Saath Namaaz Padh Rahe Ho'n To Sirf Sana Padh Kar Khaamosh Ho Jaaye'n Surah Faateha Aur Doosri Surah Na Padhe'n,
Hadees - Hazrat Jaabir Radiallaahu Anhu Se Riwaayat Hai Ke Rasoolullaah ﷺ Ne Farmaaya, Jiska Imaam Ho To Imaam Ki Qir'at Muqtadi Keliye Kaafi Hai. (Mo'atta Imaam Muhammad, Hadees No.125 & Sunane Ibne Maaja, 1/277)
Fiqh e Hanafi Ke Mutaabiq Jab Imaam Saahab "Waladdaalleen" Kahe'n To Muqtadi Ko Dheere Se Aameen Kehna Chaahiye,
Hadees - Hazrat Waa'il Radiallaahu Anhu Ne Rasoolullaah ﷺ Ke Saath Namaaz Padhi, Jab Rasoolullaah ﷺ Ne "Gairil Magdoobi Alaihim Waladdaalleen" Kaha To Past Aawaaz (Halki Aawaaz) Me'n Aameen Kaha. (Mustadrak Alassaheehain, Hadees No.348)
Imaam Haakim Ne Iss Hadees Ke Muta'alliq Farmaaya Ke Yeh Hadees Shart e Bukhaari Wa Muslim Par Saheeh Hai Aur Bukhaari Wa Muslim Ne Iski Takhreej Nahee'n Ki Aur Allaama Zehbi Ne Apni Taaliqaat Me'n Farmaaya Ke Yeh Hadees Bukhaari Wa Muslim Ki Shart Par Hai.
Surah Faateha Aur Doosri Surah Padhne Ke Ba'ad "Allaahu Akbar" Kehte Huwe Bina Haatho'n Ko Uthaaye Ruku Me'n Jaaye'n,
Hadees - Hazrat Abdullaah Ibne Mas'ood Radiallaahu Anhu Ne Farmaaya, Kya Mai'n Tumko Rasoolullaah ﷺ Ki Namaaz Padh Ke Na Dikhaau'n, Phir Unho'n Ne Namaaz Padhi Aur Takbeer e Tehreema Ke Alaawa Kahee'n Par Bhi Rafa Yadain Nahee'n Kiya. (Ya'ni Haatho'n Ko Nahee'n Uthaaya). (Musannaf Ibne Abi Shayba, Jild No.1, Safha No.213, Hadees No.2441 & Sunane Abu Daawood, Jild No.1, Safha No.199, Hadees No.748 & Sunane Nisaayi, Jild No.2, Safha No.142, Hadees No.1026/1058).
Ruku Me'n Dono'n Haatho'n Se Raan Ko Na Pakde'n Balke Dono'n Haatho'n Ko Ghutno'n Par Rakhe'n, Peeth Aur Sar Ko Bilkul Seedha Rakhe'n, Phir 3 Ya 5 Ya 7 Martaba Yeh Tasbeeh Padhe'n "Sub'haana Rabbiyal Azeem" Phir "Allaahu Akbar" Kehte Huwe Ruku Se Sar Uthaaye'n Aur Seedhe Khade Ho Jaaye'n Aur Dono'n Haatho'n Ko Na Uthaaye'n Aur Padhe'n "Samiallaahu Liman Hamidah, Rabbana Wa Lakal Hamd",
Hadees - Imaam Abu Haneefa Radiallaahu Anhu Farmaate Hai'n Ke Imaam Sha'bi Radiallaahu Anhu Farmaate The Ke Mai'n Ne Hazrat Bara Bin Aa'zib Radiallaahu Anhu Ko Yeh Farmaate Huwe Suna Ke Rasoolullaah ﷺ Jab Namaaz Shuru Karte The To Apne Dono'n Haatho'n Ko Utha Kar Apne Dono'n Kaa'ndho Ke Muqaabil Le Jaate The Aur Salaam Pherne Tak Dobaarah Apne Haatho'n Ko Nahee'n Uthaate The. (Musnad e Imaam e Aa'zam, Hadees No.94)
Phir "Allaahu Akbar" Kehte Huwe Sajde Me'n Jaaye'n, Sajde Me'n Jaate Waqt Zameen Par Pehle Ghutna Rakhe'n, Phir Haath Rakhe'n, Phir Naak Rakhe'n Phir Peshaani Rakhe'n,
Hadees - Hazrat Shuraik Ne Aa'sim Ibne Kulaib Ke Waalid Se Riwaayat Kiya Ke Hazrat Waa'il Ibne Hujr Radiallaahu Anhu Ne Farmaaya Ke "Mai'n Ne Rasoolullaah ﷺ Ko Dekha Jab Sajdah Karte To Apne Ghutno'n Ko Haatho'n Se Pehle Rakhte Aur Jab Uthte To Haatho'n Ko Ghutno'n Se Pehle Utha Lete. (Sunane Abu Daawood, Hadees No.838).
Pairo'n Ke A'ngoothe Aur 2 U'ngliyo'n Ka Pet (Neeche Ka Naram Hissa) Zameen Par Lagna Zaroori Hai, Sajde Me'n Dono'n Haatho'n Ki Kohniyo'n Ko Zameen Par Bichha Kar Na Rakhe'n Phir 3 Ya 5 Ya 7 Martaba Yeh Tasbeeh Padhe'n "Sub'haana Rabbiyal Aa'la" Phir "Allaahu Akbar" Kehte Huwe Sajde Se Sar Uthaaye'n Aur Dono'n Haatho'n Ko Raano'n Par Rakhe'n Aur Kam Se Kam Ek Tasbeeh Padhne Jitne Waqt Tak Baithe Rahe'n, Seedhe Pair Ko Utha Kar Rakhe'n Aur Ulte Pair Ko Bichha Kar Rakhe'n, A'ngootha Aur 2 U'ngliyo'n Ka Pet Zameen Se Laga Huwa Hona Chaahiye, Phir "Allaahu Akbar" Kehte Huwe Sajde Me'n Jaaye'n Aur 3 Ya 5 Ya 7 Martaba Yeh Tasbeeh Padhe'n "Sub'haana Rabbiyal Aa'la, Phir "Allaahu Akbar" Kehte Huwe Sajde Se Sar Uthaaye'n, Pehle Peshaani, Phir Naak, Phir Haath Aur Phir Ghutna Utha Kar Khade Ho Jaaye'n Aur Bina Haath Uthaaye Dono'n Haatho'n Ko Naaf Ke Neeche Baa'ndhe'n,
Hadees - Hazrat Maula Ali Radiallaahu Anhu Se Riwaayat Hai Ke Aapne Farmaaya Farz Namaaz Me'n Sunnat Yeh Hai Ke Doosri Rak'at Keliye Uthte Waqt Zameen Par Haath Na Teke Magar Yeh Ke Ma'zoor Shakhs Ho. (Musannaf Ibne Abi Shayba, Jild No.1, Safha No.147)
Doosri Rak'at Me'n Sana Na Padhe'n, Surah Faateha Aur Doosri Surah Padhe'n, Agar Imaam Saahab Ke Peechhe Ho'n To Khaamosh Khade Rahe'n Kuchh Na Padhe'n, Phir Doosri Rak'at Mukammal Kare'n Jaise Pehli Ki Thi, Phir Dono'n Sajdo'n Ke Ba'ad Baith Jaaye'n Aur Dono'n Haatho'n Ko Apni Raano'n Par Rakhe'n Aur Nazar Sajde Ki Jaanib Rakhe'n, Phir "Attahiyyaat" Padhe'n Aur Jab "Ash'hadu Allaa'ilaaha" Par Paho'nche'n To Seedhe Haath Ki Mutthi Banaaye'n Aur Kalme Waali U'ngli Ko Uthaaye'n Aur Jab "Illallaah" Par Paho'nche'n To Kalme Ki U'ngli Ko Gira De'n Aur Mutthi Ko Khol De'n Aur Jaise Haatho'n Ki Pehli Haalat Thi Waise Hi Rakhe'n Aur "Wa Ash'hadu Anna Muhammadan Abduhu Wa Rasoolu" Padhe'n, Kalme Ki U'ngli Ko Baar Baar Na Hilaaye'n Aur Na Upar Utha Kar Rakhe'n,
Hadees - Hazrat Aa'mir Bin Abdullaah Radiallaahu Anhu Se Marwi Hai, Unho'n Ne Hazrat Abdullaah Bin Zubair Radiallaahu Anhu Se Riwaayat Ki, Unho'n Ne Bayaan Kiya Ke Rasoolullaah ﷺ Jab Du'aa Farmaate (Tashah'hud Padhte) To U'ngli Se Ishaarah Farmaate Aur U'ngli Ko Nahee'n Hilaate The. (Sunane Abu Daawood, Jild No.1, Safha No.160, Hadees No.989)
Phir Darood e Ibraaheemi Padhe'n, Phir Du'aa e Maasoora Padhe'n, Phir Seedhe Taraf Chehre Ko Pher Kar Kahe'n "Assalaamu Alaikum Wa Rehmatullaah" Phir Ulte Taraf Chehre Ko Pher Kar Kahe'n "Assalaamu Alaikum Wa Rehmatullaah" Aur Namaaz Ko Mukammal Kare'n, Agar 4 Rak'at Namaaz Ki Niyat Ki Ho To "Attahiyyaat" Padh Kar Teesri Rak'at Keliye Khade Ho Jaaye'n, Phir Ruku Aur Sajdah Karke Chauthi Rak'at Keliye Khade Ho Jaaye'n, Agar Farz Namaaz Padh Rahe Ho'n To Sirf Surah Faateha Padh Ke Ruku Me'n Chale Jaaye'n Aur Agar Sunnat Ya Nafil Ya Witr e Waajib Padh Rahe Ho'n To Surah Faateha Ke Ba'ad Doosri Surah Padhe'n Aur Agar Imaam Saahab Ke Peechhe Namaaz Padh Rahe Ho'n To Kuchh Na Padhe'n, Witr e Waajib Me'n Teesri Rak'at Ke Ba'ad Dono'n Haatho'n Ko Utha Kar Kaano'n Ki Law Tak Le Jaaye'n Aur Haatho'n Ko Naaf Ke Neeche Baa'ndhe'n, Phir "Du'aa e Qunoot" Padhe'n, Phir Ruku Aur Sajdah Kare'n Aur Baith Jaaye'n, Phir Attahiyyaat, Darood e Ibraaheemi Aur Du'aa e Maasoora Padh Kar Salaam Pher De'n.
Yeh Raha Namaaz Ka Sunnat Tareeqa, Isi Tareeqe Par Rasoolullaah ﷺ, Sahaaba, Taaba'een, Tabe Taaba'een, Mujtahideen, Fuqaha Wa Mohaddiseen Wa Mufassireen Namaaz Padhte The.
Agar Aapko Koi Baat Samajh Me'n Na Aayi Ho To Aap Hamse Raabta Kar Sakte Hai'n.
Alahazrat Foundation Research Team
7710809266 / 9892708816
