Ahle Sunnat Wa Jamaa'at Ka Aqeedah Hai Ke Hazrat Isa A'laihissalaam Qayaamat Se Pehle Iss Duniya Me'n Dobaarah Tashreef Laaye'nge, Aur Yeh Aqeedah Zarooriyaat e Ahle Sunnat Wa Jamaa'at Me'n Se Hai, Ya'ni Nuzool e Hazrat Isa A'laihissalaam Ka Munkir Badmazhab Gumraah Hai Ya'ni Ahle Sunnat Wa Jamaa'at Se Khaarij Hai.
Alahazrat Imaam Ahmad Raza Khaan Qaadri Barelvi A'laihir Rehma Likhte Hai'n Ke Jab Saadiq Wa Masdooq ﷺ Ne Unke (Ya'ni Hazrat Isa A'laihissalaam Ke) Nuzool Ki Khabar Di Aur Woh Apni Haqeeqat Par Mumkin Wa Daakhil Zere Qudrat Wa Jaa'iz, To Inkaar Na Karega Magar Gumraah. (Fataawa Razviya Mutarjim, Jild No.15, Safha No.614)
Nuzool e Hazrat Isa A'laihissalaam Ke Aqeede Ko Wazaahat Ke Saath Samajhne Keliye Hujjatul Islaam Allaama Haamid Raza Khaan Qaadri Barelvi A'laihir Rehma Ki Ibaarat Mulaaheza Farmaaye'n, Jiska Khulaasa Yeh Hai, Farmaate Hai'n (Ya'ni) Hazrat Isa A'laihissalaam Ka Qurb e Qayaamat Aasmaan Se Utarna Duniya Me'n Dobaarah Tashreef Farma Hokar Uss Ahed Ke Mutaabiq Jo Allaah Paak Ne Ambiya e Kiraam A'laihimus Salaatu Wassalaam Se Liya Deen e Muhammad Rasoolullaah ﷺ Ki Madad Karna Yeh Masla Zarooriyaat e Mazhab e Ahle Sunnat Wa Jamaa'at Se Hai, Jiska Munkir Gumraah, Khaasir, Badmazhab Aur Faajir Hai, Iski Daleel Ahaadees e Mutawaatera Wa Ijma Ahle Haq Hai.
Imaam Jalaaluddeen Suyuti Rehmatullaah A'laih Farmaate Hai'n (Ya'ni) Hazrat Isa A'laihissalaam Jab Zameen Par Tashreef Laaye'nge To Rehmat e Aa'lam ﷺ Ke Naayeb Ke Taur Par Aapki Sharee'at Ke Mutaabiq Hukm Farmaaye'nge, Neez Aapki Itteba Karne Waalo'n Aur Aap ﷺ Ki Ummat Me'n Se Ho'nge. (Al-Khasaa'isul Kubra, Jild No.2, Safha No.329)
Nabi e Akram ﷺ Ne Kaseer Ahaadees Me'n Hazrat Sayyaduna Isa A'laihissalaam Ki Duniya Me'n Dobaarah Tashreef Aawari Ko Bayaan Farmaaya Hai Unme'n Se Chand Faraameen Mulaaheza Farmaaye'n.
1- Bukhaari Shareef, Jild No.4, Safha No.168, Hadees No.3448
Tarjuma - Ibne Shihaab Ne, Unse Sa'eed Bin Musayyib Ne Aur Unho'n Ne Abu Hurairah Radiallaahu A'nhu Se Suna, Unho'n Ne Kaha Ke Rasoolullaah ﷺ Ne Farmaaya, Uss Zaat Ki Qasam Jiske Daste Qudrat Me'n Meri Jaan Hai, Woh Zamaana Qareeb Hai Ke Isa Ibne Mariyam A'laihimas Salaam Tumhaare Darmiyaan Ek Aa'dil Haakim Ki Haysiyat Se Naazil Ho'nge, Woh Saleb Ko Tod De'nge, Suwwar Ko Maar Daale'nge Aur Jizya Maukoof Karde'nge, Uss Waqt Maal Ki Itni Kasrat Ho Jaayegi Ke Koi Use Lene Waala Nahee'n Milega, Uss Waqt Ka Ek Sajdah "Duniya Wa Maafeeha" Se Badh Kar Hoga, Phir Abu Hurairah Radiallaahu A'nhu Ne Kaha Ke Agar Tumhaara Jee Chaahe To Yeh Aayat Padh Lo.
Tarjuma - Koi Kitaabi Aisa Nahee'n Jo Uski Maut Se Pehle Uspar Imaan Na Laaye Aur Qayaamat Ke Din Woh Unpar Gawaah Hoga. (Sureh Nisa, Aayat No.159).
2- Tirmizi Shareef, Jild No.4, Safha No.84, Hadees No.2244
Tarjuma :- Hazrat Mujam'me Bin Jaariya Ansaari Radiallaahu A'nhu Kehte Hai'n Ke Mai'n Ne Rasoolullaah ﷺ Ko Farmaate Huwe Suna Ke Ibne Mariyam (A'laihissalaam) Dajjaal Ko Baab Lud Ke Paas Qatal Kare'nge.
3- Muslim Shareef, Jild No.4, Safha No.2221, Hadees No.7154
Tarjuma - Hazrat Abu Hurairah Radiallaahu A'nhu Se Riwaayat Hai Ke Rasoolullaah ﷺ Ne Farmaaya, Qayaamat Uss Waqt Tak Qaayem Na Hogi Yahaa'n Tak Ke Roomi Aa'maaq Ya Daabiq Me'n Utre'n, Unki Taraf Unse Ladne Keliye Ek Lashkar Madeena Rawaana Hoga Aur Woh Un Dino'n Zameen Waalo'n Me'n Se Nek Log Ho'nge, Jab Woh Saf Bandi Kare'nge To Roomi Kahe'nge Ke Tum Hamaare Aur Unke Darmiyaan Dakhal Andaazi Na Karo Jinho'n Ne Ham Me'n Se Kuchh Logo'n Ko Qaidi Bana Liya Hai Ham Unse Lade'nge, Musalmaan Kahe'nge Nahee'n Allaah Ki Qasam Ham Apne Bhaa'iyo'n Ko Tanha Na Chhode'nge Ke Tum Unse Ladte Raho, Bil Aakhir Woh Unse Ladaayi Kare'nge Aur Ek Tihaayi Musalmaan Bhaag Jaaye'nge Jinki Allaah Kabhi Bhi Tauba Qabool Na Karega Aur Ek Tihaayi Qatal Kiye Jaaye'nge Jo Allaah Ke Nazdeek Afzalush Shohada Ho'nge Aur Tihaayi Fateh Haasil Karle'nge Unhe'n Kabhi Aazmaa'ish Me'n Na Daala Jaayega Pas Woh Qustuntuniya Ko Fateh Kare'nge, Jis Waqt Woh Aapas Me'n Maal e Ganeemat Me'n Se Taqseem Karrahe Ho'nge Aur Unki Talwaare'n Zaitoon Ke Darakhto'n Ke Saath Latki Huwi Ho'ngi To Achaanak Shaitaan Cheekh Kar Kahega Tehqeeq Maseeh Dajjaal Tumhaare Baal Bachcho'n Tak Paho'nch Chuka Hai, Woh Wahaa'n Se Nikal Khade Ho'nge Lekin Yeh Khabar Baatil Hogi, Jab Woh Shaam Paho'nche'nge To Usi Waqt Dajjaal Niklega Usi Dauraan Ke Woh Jihaad Keliye Tayyaari Karrahe Ho'nge Aur Safo'n Ko Seedha Karrahe Ho'nge Ke Namaaz Keliye Iqaamat Kahi Jaayegi Aur Isa Bin Mariyam A'laihissalaam Naazil Ho'nge Aur Musalmaano'n Ki Namaaz Ki Imaamat Kare'nge, Pas Jab Allaah Ka Dushman Unhe'n Dekhega To Woh Iss Tarah Pighal Jaayega Jis Tarah Paani Me'n Namak Pighal Jaata Hai Agarche Isa A'laihissalaam Use Chhod De'nge Tab Bhi Woh Pighal Jaayega Yahaa'n Tak Ke Halaak Ho Jaayega Lekin Allaah Paak Use Isa Ke Haatho'n Se Qatal Karaayega, Phir Woh Logo'n Ko Uska Khoon Apne Neze Par Dikhaaye'nge.
4- Masnad e Ahmad Bin Hambal, Jild No.23, Safha No.63, Hadees No.14720
Tarjuma - Hazrat Jaabir Radiallaahu A'nhu Se Marwi Hai Ke Unho'n Ne Nabi ﷺ Ko Yeh Farmaate Huwe Suna Hai Ke Meri Ummat Ka Ek Giroh Qayaamat Tak Hamesha Qitaal Karta Rahega Aur Gaalib Rahega Yahaa'n Tak Ke Sayyaduna Isa Naazil Ho Jaaye'nge To Unka Ameer Arz Karega Ke Aap Aage Badh Kar Namaaz Padhaa'iye Lekin Woh Jawaab De'nge Nahee'n Tum Me'n Se Ba'az Ba'az Par Ameer Hai'n Taake Allaah Iss Ummat Ka Ae'zaaz Farma Sake.
By Alahazrat Foundation Research Team - 7710809266/9892708816
