Pareshaani Aur Mushkilaat Ke Waqt Ba'az Log Sadme Ya Ishte'aal Ya'ni Jazbaat Ke Sabab Basa Auqaat Na'oozbillaah Kufriya Kalimaat Bak (Bol) Dete Hai'n, Allaah A'zzowajal Par Ae'teraaz Karna, Usko Zaalim Ya Zarooratmand Ya Mohtaaj Ya Aa'jiz Samajhna Khule Kufr Hai'n, Yaad Rakhiye Bila Ikraahe Sharayi Hosh Wa Hawaas Me'n Sareeh Ya'ni Khula Kufr Bakne Waala Aur Ma'ni Samajhne Ke Baawajood Haa'n Me'n Haa'n Milaane Waala Balke Taa'eed Me'n Sar Hilaane Waala Bhi Kaafir Ho Jaata Hai Uska Nikaah Toot Jaata Hai Bay'at Khatam Ho Jaati Hai Aur Zindagi Bhar Ke Nek Aa'maal Barbaad Ho Jaate Hai'n Agar Haj Karliya Tha To Woh Bhi Gaya Ab Tajdeed e Imaan Ke Ba'ad Naye Sire Se Musalmaan Hone Ke Ba'ad Saahib e Istetaa'at Hone Par (Ya'ni Sharaa'it Paaye Jaane Par) Naye Sire Se Haj Farz Hoga,
Mohtaram Hazraat, Kis Tareeqe Se Log Aur Kin Haalaat Me'n Kufriya Kalimaat Bak Dete Hai'n Neeche Di Huwi Misaalo'n Se Samajhte Hai'n,
Mushkil Jab Hamaare Upar Padti Hai Aur Jab Ham Mushkilo'n Se Do Chaar Hote Hai'n To Uss Waqt Kuchh Kufriya Kalimaat Bak Dete Hai'n,
(1) Bataur e Ae'teraaz Kehna Ke Woh Shakhs Logo'n Ke Saath Kuchh Bhi Kare Allaah A'zzowajal Ki Taraf Se Usko Full Aazaadi Hai, Aisa Kehne Waala Bhi Kaafir Ho Jaata Hai.
(2) Bataur Ae'teraaz Yoo'n Kehna Kabhi Ham Fulaa'n Ke Saath Thoda Kuchh Karle'n Allaah A'zzowajal Hame'n Fauran Pakad Leta Hai, Aisa Kehna Bhi Kufr Hai.
(3) Allaah A'zzowajal Ne Hamesha Mere Dushmano'n Ka Saath Diya Hai, Aisa Kehna Bhi Kufr Hai.
(4) Hamesha Sab Kuchh Allaah A'zzowajal Par Chhod Kar Bhi Dekh Liya Kuchh Nahee'n Hota, Aisa Kehna Bhi Kufr Hai.
(5) Allaah A'zzowajal Ne Meri Qismat Abhi Tak To Zara Achchi Nahee'n Banaayi, Aisa Kehna Bhi Kufr Hai.
(6) Shaayad Allaah A'zzowajal Ke Khazaane Me'n Mere Liye Kuchh Bhi Nahee'n, Meri Duniyaawi Khwaahishaat Kabhi Poori Nahee'n Huwee'n, Zindagi Bhar Meri Koi Du'aa Qabool Nahee'n Huwi, Jisko Chaaha Woh Door Chala Gaya, Har Khwaab Mera Toota, Tamaam Armaan Kuchle Gaye, Ab Aap Hi Bataaye'n Mai'n Allaah A'zzowajal Par Kaise Imaan Laau'n, Aisa Kehna Bhi Kufr Hai.
(6) Ek Shakhs Ne Hamaari Naak Me'n Dam Kar Rakha Hai, Maze Ki Baat Yeh Hai Ke Allaah A'zzowajal Bhi Aiso'n Ke Saath Hota Hai, Aisa Kehna Bhi Kufr Hai.
(7) Jis Shakhs Ne Museebat Paho'nchne Par Kaha, Aye Allaah A'zzowajal Tu Ne Maal Leliya, Fulaa'n Cheez Leli, Ab Kya Karega Ya Ab Kya Chaahta Hai Ya Ab Kya Baaqi Reh Gaya, Aisa Kehna Bhi Kufr Hai.
(8) Jo Kahe Allaah A'zzowajal Ne Meri Beemaari Aur Bete Ki Mushaqqat Ke Baawajood Agar Mujhe Azaab Diya To Usne Mujh Par Zulm Kiya, Aisa Kehna Bhi Kufr Hai.
(9) Allaah A'zzowajal Ne Hamesha Bure Logo'n Ka Saath Diya, Aisa Kehna Bhi Kufr Hai.
(10) Allaah A'zzowajal Ne Majbooro'n Ko Aur Pareshaan Kiya, Aisa Kehna Bhi Kufr Hai.
Astagfirullaah, La Elaaha Ellallaah Muhammadur Rasoolullaah ﷺ
Aapne Jitni Misaale'n Upar Padhee'n Woh Saari Kufriya Kalimaat Ki Misaale'n Hai'n Jo Mushkil Waqt Me'n Insaan Bol Deta Hai, Yaad Rakhiye Iss Tareeqe Ke Kufriya Kalimaat Kehne Se Insaan Islaam Se Khaarij Ho Jaata Hai Kaafir Ho Jaata Hai, Agar Woh Shaadi Shudah Tha To Uska Nikaah Toot Jaata Hai, Agar Woh Kisi Peer Se Mureed Tha To Uski Bay'at Bhi Toot Jaati Hai Aur Uske Kiye Huwe Jo Nek Aa'maal Hai'n Woh Barbaad Ho Jaate Hai'n, Ab Usko Naye Sire Se Musalmaan Hona Padega, Phirse Usko Naya Nikaah Karna Padega Aur Naye Sire Se Bay'at Karni Hogi.
By Alahazrat Foundation Research Team - 7710809266/9892708816
