Yaad Rahe Kisi Kaamil Peer Ke Haath Par Mureed Hona Sunnat e Mehbooba Ya'ni Pasandeedah Sunnat Hai Aur Yeh Aqeedah Na Zarooriyaat e Deen Ka Malsa Hai Aur Na Hi Zarooriyaat e Ahle Sunnat Ka Malsa Hai Balke Yeh Ek Zanni Malsa Hai.
Sawaal - Bay'at Lena Aur Bay'at Karna Kaisa Hai, Peeri Mureedi Ki Sharayi Haysiyat Aur Ek Peer Ke Liye Kya Kya Conditions (Sharaa'it) Hai'n?
Jawaab :- Bay'at Ka Lugwi Ma'na Bik Jaana Aur Istelaah e Shara Wa Tasawwuf Me'n Iski Muta'addid Soorate'n Hai'n Jinme'n Ek Yeh Hai Ke Kisi Peer e Kaamil Ke Haatho'n Me'n Haath Dekar Guzishta Gunaaho'n Se Tauba Karne, Aa'indah Gunaaho'n Se Bachte Huwe Nek Aa'maal Ka Iraadah Karne Aur Use Allaah Paak Ki Ma'refat Ka Zariya Banaane Ka Naam Bay'at Hai, Yeh Sunnat Hai, Aajkal Ke Urfe Aa'm Me'n Ise "Peeri Mureedi" Kaha Jaata Hai,
Peer Ki Sharaa'it :- Aa'la Hazrat Alaihir Rehma Bay'at Aur Peero'n Ki Sharaa'it Bayaan Karte Huwe Farmaate Hai'n,
(1) Shaykh Ka Silsila Bittisaal e Saheeh Huzoor e Aqdas ﷺ Tak Paho'ncha Ho, Beech Me'n Munqate Na Ho Ke Munqate Ke Zariye Se Ittesaal Na Mumkin.
(2) Shaykh Sunniul Aqeedah Ho Badmazhab Gumraah Ka Silsila Shaitaan Tak Paho'nchega Na Ke Rasoolullaah ﷺ Tak.
(3) Shaykh Aa'lim Ho Aqoolu (Mai'n Kehta Hoo'n) Ilm Fiqah Uski Zaroorat Ke Qaabil Kaafi Aur Laazim Ke Aqaa'id e Ahle Sunnat Se Poora Waaqif Kufr Wa Islaam Wa Zalaalat Wa Hidaayat Ke Farq Ka Khoob Aa'rif Ho Warna Aaj Badmazhab Nahee'n Kal Ho Jaayega.
(4) Faasiqe Mo'lin Na Ho Aqoolu (Mai'n Kehta Hoo'n) Iss Shart Par Husoole Ittesaal Ka Tawaqquf Nahee'n Ke Mujarrad Fisq Baa'ise Fisq Nahee'n Magar Peer Ki Ta'zeem Laazim Hai Aur Faasiq Ki Tauheen Waajib Hai, Dono'n Ka Ijtema Baatil. (Fataawa Razviya, Jild No.21, Safha No.505/506/507, Raza Foundation Laahor)
Aa'la Hazrat Alaihir Rehma Ke Bataaye Gaye Sharaa'it Ka Mafhoom Aur Matlab Yeh Hai Ke Jinse Aap Mureed Hone Ka Iraadah Karrahe Hai'n To Uss Peer Ke Andar Yeh 4 Baate'n Hona Bahot Zyaadah Zaroori Hai, Pehli Baat Yeh Hai Ke Uss Peer Ka Jo Silsila Ho Woh Huzoor Nabi e Kareem ﷺ Tak Paho'nchta Ho Doosri Baat Yeh Hai Ke Woh Peer Sunni Saheehul Aqeedah Ho Badmazhab, Gumraah, Bad Deen Na Ho, Teesri Baat Yeh Hai Ke Woh Aa'lim Ho Ya'ni Jaankaar Ho Masaa'il e Shar'iyya Ko Jaanta Ho Ahkaam e Shar'iyya Ka Jaankaar Ho, Haraam Wa Halaal Ka Ilm Rakhta Ho Khusoosan Zarooriyaat e Deen Ke Masaa'il, Zarooriyaat e Ahle Sunnat Wa Jamaa'at Ke Masaa'il Ko Woh Jaanta Ho, Chautha Yeh Ke Woh Faasiqe Mo'lin Na Ho Ya'ni Ae'laaniya Gunaah Na Karta Ho, Agar Kisi Peer Me'n In 4 Sharaa'it Me Se Ek Shart Bhi Nahee'n Paayi Gayi To Phir Aise Peer Se Mureed Hona Jaa'iz Nahee'n.
Ek Aur Maqaam Par Likha Hai Ke Peer Me'n In Sharto'n Me'n Se Ek Shart Bhi Na Paayi Jaaye To Uski Bay'at Jaa'iz Nahee'n Balke Agar Daanista Karli To Uspar Uski Bay'at Ka Todna Waajib Hai. (Fataawa Razviya Shareef, Jild No.21, Safha No.568, Raza Foundation Laahor)
Bay'at Ka Saboot Qur'aan e Kareem Me'n Maujood Hai Chunaanche Paarah 15, Sureh Bani Israa'eel Ki Aayat No.71 Me'n Allaah Paak Ka Farmaan e Aa'leeshaan Hai.
Tarjuma:- Jis Din Ham Har Jamaa'at Ko Uske Imaam Ke Saath Bulaaye'nge.
Iss Aayat e Mubaaraka Ke Tahet Mufassir e Shaheer, Hakeemul Ummat Hazrat Mufti Ahmad Yaar Khaan Alaihir Rehma Farmaate Hai'n, Isse Ma'loom Huwa Ke Duniya Me'n Kisi Saaleh (Nek) Ko Apna Imaam Bana Lena Chaahiye Sharee'at Me'n "Taqleed" Karke Aur Tareeqat Me'n "Bay'at" Karke Taake Hashar Achchho'n Ke Saath Ho, Agar Saaleh (Nek) Imaam Na Hoga To Uska Imaam Shaitaan Hoga, Iss Aayat Me'n Taqleed, Bay'at Aur Mureedi Sabka Saboot Hai. (Tafseer Noorul Irfaan, Surah Bani Israa'eel, Aayat No.71 Ke Tahet)
Aa'la Hazrat, Imaam e Ahle Sunnat, Mujaddid e Deen Wa Millat Maulaana Shaah Imaam Ahmad Raza Khaan Alaihir Rehma Farmaate Hai'n, Bay'at Beshak Sunnat e Mehbooba (Pasandeedah Sunnat) Hai, Imaam e Ajal, Shaikhul Shuyookh Shihaabul Haq Waddeen Umar Radiallaahu Anhu Ki Awaarif Shareef Se Shaah Waliullaah Dehlavi Ki "Qaulul Jameel" Tak Iski Tasreeh Aur A'imma Wa Akaabir Ka Ispar Amal Hai Aur Allaah Paak Farmaata Hai,
Tarjuma:- Woh Jo Tumhaari Bay'at Karte Hai'n Woh To Allaah Hi Se Bay'at Karte Hai'n, Unke Haatho'n Par Allaah Ka Haath Hai. (Paarah No.26, Surah Fateh, Aayat No.10)
Aur Farmaata Hai,
Tarjuma:- Beshak Allaah Raazi Huwa Imaan Waalo'n Se Jab Woh Uss Ped Ke Neeche Tumhaari Bay'at Karte The. (Paarah No.26, Surah Fateh, Aayat No.18)
Aur Bay'at Ko Khaas Ba Jihaad Samajhna Jahaalat Hai, Allaah Paak Farmaata Hai,
Tarjuma :- Aye Nabi Jab Tumhaare Huzoor Musalmaan Aurate'n Haazir Ho'n Ispar Bay'at Karne Ko Ke Allaah Ka Shareek Kuchh Na Thehraaye'ngi Aur Na Chori Kare'ngi Aur Na Badkaari Aur Na Apni Aulaad Ko Qatal Kare'ngi Aur Na Woh Bohtaan Laaye'ngi Jise Apne Haatho'n Aur Paa'on Ke Darmiyaan Ya'ni Mauzaye Wilaadat Me'n Uthaaye'n Aur Kisi Nek Baat Me'n Tumhaari Na Farmaani Na Kare'ngi To Unse Bay'at Lo Aur Allaah Se Unki Magferat Chaaho Beshak Allaah Bakhshne Waala Maherbaan Hai. (Fataawa Razaviya, 26/586)
Ahaadees e Mubaaraka Me'n Bay'at Ka Zikr :-
Sawaal:- Kya Ahaadees e Mubaaraka Me'n Bhi Bay'at Ka Zikr Aaya Hai ?
Jawaab :- Ji Haa'n ! Ahaadees e Mubaaraka Me'n Bhi Bay'at Ka Zikr Aaya Hai Aur Yeh Bay'at Mukhtalif Cheezo'n Maslan Kabhi Taqwa Wa Itaa'at Par, Kabhi Logo'n Ki Khair Khwaahi Aur Kabhi Gair e Ma'siyyat (Ya'ni Gunaah Ke Alaawah) Waale Kaamo'n Me'n Ameer Ki Itaa'at Wagairah Par Huwa Karti Thi, Iske Alaawah Deegar Kaamo'n Par Bhi Sahaaba e Kiraam Alaihimur Ridwaan Ka Huzoor Sayyad e Aa'lam ﷺ Se Bay'at Hona Saabit Hai Chunaanche Hazrat e Sayyaduna Ubaadah Bin Saamit Radiallaahu Anhu Farmaate Hai'n, Hamne Rasoolullaah ﷺ Se Mushkil Aur Aasaani Me'n, Khushi Aur Na Khushi Me'n Khud Par Tarjeeh Diye Jaane Ki Soorat Me'n, Sunne Aur Itaa'at Karne Par Bay'at Ki Aur Ispar Bay'at Ki Ke Ham Kisi Se Uske Iqtedaar Ke Khilaaf Ja'ng Nahee'n Kare'nge Aur Ham Jahaa'n Bhi Ho'n Haq Ke Siwa Kuchh Na Kahe'nge Aur Allaah Paak Ke Baare Me'n Malaamat Karne Waale Ki Malaamat Se Nahee'n Dare'nge. (Muslim Shareef, Hadees No.1709)
Hazrat Sayyaduna Ubaadah Bin Saamit Radiallaahu Anhu Bayaan Karte Hai'n Ke Ham Rasoolullaah ﷺ Ke Saath Ek Majlis Me'n The, Aap ﷺ Ne Farmaaya, Tum Log Mujhse Ispar Bay'at Karo Ke Tum Allaah Paak Ke Saath Kisi Ko Shareek Nahee'n Karoge Aur Zina Nahee'n Karoge Aur Chori Nahee'n Karoge Aur Jis Shakhs Ko Allaah Paak Ne Qatal Karna Haraam Kar Diya Hai Use Be Gunaah Qatal Nahee'n Karoge, Tum Me'n Se Jis Shakhs Ne Iss Ahed Ko Poora Kiya Uska Ajar Allaah Paak Par Hai Aur Jisne In Mohrimaat (Haraam Ki Huwi Cheez) Me'n Se Kisi Ka Irtekaab Kiya Aur Usko Saza Di Gayi Woh Uska Kuffaarah Hai Aur Jisne Inme'n Se Kisi Haraam Ko Kiya Aur Allaah Paak Ne Uska Pardah Rakha To Uska Mu'aamla Allaah Paak Ke Supurd Hai Agar Woh Chaahe To Use Mu'aaf Karde Aur Agar Chaahe To Use Azaab De. (Muslim Shareef, Hadees No.4461)
Hazrat Sayyaduna Imaam Fakhruddeen Raazi Alaihir Rehma Tafseer e Kabeer Me'n Naqal Farmaate Hai'n, Jab Makka e Mukarrama Me'n Lailatul Uqba Ko 70 Sahaaba e Kiraam Alaihimur Ridwaan Ne Rasoolullaah ﷺ Se Bay'at Ki To Hazrat e Sayyaduna Abdullaah Bin Rawaaha Radiallaahu Anhu Ne Arz Ki, Ya Rasoolallaah ﷺ ! Aap Apne Rab Azzowajal Keliye Aur Apni Zaat Keliye Jo Shart Chaahe'n Manwaale'n, Rasoolullaah ﷺ Ne Farmaaya, Tere Rab Paak Keliye Yeh Shart Hai Ke Tum Uski Ibaadat Karo Aur Uske Saath Kisi Ko Shareek Na Thehraao Aur Mere Liye Yeh Shart Hai Ke Tum Apni Jaano'n Aur Maalo'n Ko Jin Cheezo'n Se Baaz Rakhte Ho Unse Mujhko Bhi Baaz Rakhna (Ya'ni Jis Tarah Apni Jaano'n Aur Maalo'n Ki Hifaazat Karte Ho Isi Tarah Meri Hifaazat Karna) To Sahaaba e Kiraam Alaihimur Ridwaan Ne Arz Ki, Ya Rasoolallaah ﷺ ! Jab Ham Aisa Kar Le'nge To Hame'n Kya Sila Milega ? To Rasoolullaah ﷺ Ne Farmaaya "Jannat" Sahaaba e Kiraam Alaihimur Ridwaan Ne Arz Ki, Yeh To Nafa'mand Bay'at Hai, Ham Iss Bay'at Ko Na Tode'nge Aur Na Hi Todne Ka Mutaalba Kare'nge, Iss Mauqe Par Yeh Aayat e Kareema Naazil Huwi, Allaah Paak Irshaad Farmaata Hai,
Tarjuma - Beshak Allaah Ne Musalmaano'n Se Unke Maal Aur Jaan Khareed Liye Hai'n Iss Badle Par Ke Unke Liye Jannat Hai. (Tafseer e Kabeer. Paarah No.11, Sureh Tauba, Aayat No.111 Ke Tahet)
Bay'at Hone Ke Fawaa'id Wa Barkaat :-
Sawaal :- Bay'at Hone Se Kya Kya Fawaa'id Wa Barkaat Haasil Hote Hai'n ?
Jawaab :- Kisi Peer e Kaamil Ke Haath Me'n Haath Dekar Bay'at Hone Se Peer e Kaamil Se Nisbat Haasil Ho Jaati Hai Jiski Badaulat Baatin Ki Islaah Ke Saath Saath Nekiyo'n Se Mohabbat Aur Gunaaho'n Se Nafrat Ka Jazba Bedaar Hota Hai, Peer e Kaamil Ki Sohbat Aur Bay'at Ke Fawaa'id Bayaan Karte Huwe Hazrat Sayyaduna Faqeeh Abdul Waahid Bin Aa'shir Alaihir Rehma Farmaate Hai'n, Aa'rif e Kaamil Ki Sohbat Ikhtiyaar Karo, Woh Tumhe'n Halaakat Ke Raaste Se Bachaayega, Uska Dekhna Tumhe'n Allaah Paak Ki Yaad Dilaayega Aur Woh Bade Nafees Tareeqe Se Nafs Ka Muhaaseba Karaate Huwe Aur "Khatraat e Qalb" (Ya'ni Dil Me'n Paida Hone Waale Shaitaani Waswaso'n) Se Mehfooz Farmaate Huwe Tumhe'n Allaah Paak Se Mila Dega, Uski Sohbat Ke Sabab Tumhaare Faraa'iz Wa Nawaafil Mehfooz Ho Jaaye'nge, "Tasfiya e Qalb" (Ya'ni Dil Ki Safaayi) Ke Saath "Zikr e Kaseer" Ki Daulat Muyassar Aayegi Aur Woh Allaah Paak Se Muta'alliq Saare Umoor Me'n Tumhaari Madad Farmaayega. (Aadab e Murshide Kaamil, Safha 82)
By Alahazrat Foundation Research Team - 7710809266/9892708816
