Bahot Saare Bad Aqeedah Bad Maz'hab Log Qur’aane Kareem Ki Galat Taaweele'n Aur Galat Tafseere'n Apni Man Marzi Ke Mutaabiq Karke Yeh Aqeedah Gadh Liye Hai'n Ke Qabar Waale Nahee'n Sunte, To Aa'iye Jis Aayate Kareema Ke Tahet Woh Log Waawela Machaate Hai'n Galat Taaweele'n Karke Uss Aayate Kareema Ke Baare Me'n Mufassireen Ke Hawaale Se Jaante Hai'n Ke Uss Aayate Kareema Ka Asal Maf'hoom Aur Matlab Aur Tafseer Kya Hai.
Sureh Namal, Aayat No.80
Tarjuma - Beshak Tumhaare Sunaaye Nahee'n Sunte Murde Aur Na Tumhaare Sunaaye Behre Pukaar Sune'n Jab Phire'n Peeth Dekar.
Tafseer :- Allaama Ali Bin Muhammad Khaazin Rahmatullaah Alaih (Wafaat 741 Hijri) Iss Aayat Ki Tafseer Me'n Farmaate Hai'n, Ya'ni Jin Logo'n Ke Dil Murdah Hai'n Aap Unhe'n Nahee'n Suna Sakte Aur Woh Log Kuffaar Hai'n. (Tafseere Khaazin, Sureh Namal, Tehtul Aayah 80, 3/419) Aur Abu Al-Barakaat Abdullaah Bin Ahmad Nasafi Rahmatullaah Alaih (Wafaat 710 Hijri) Farmaate Hai'n, “Iss Aayat Me'n Kuffaar Ko Zindah Hone Aur Hawaas Durust Hone Ke Baawajood Murdo'n Ke Saath Tashbeeh Di Gayi Hai. (Tafseere Madaarik, Sureh Namal, Tehtul Aayah 80, Safha No.856)
Iss Aayat Se Murdo'n Ke Na Sunne Par Istedlaal Karne Waalo'n Ka Radd :- Ba'az Hazraat Iss Aayat Se Murdo'n Ke Na Sunne Par Istedlaal Karte Hai'n, Unka Istedlaal Galat Hai, Iski Wajah Yeh Hai Ke Yahaa'n Kuffaar Ko Murdah Farmaaya Gaya Aur Unse Bhi Mutlaqan Har Kalaam Sunne Ki Nafi Muraad Nahee'n Hai Balke Wa'az Wa Naseehat Aur Kalaame Hidaayat Qabool Karne Keliye Sunne Ki Nafi Hai Aur Muraad Yeh Hai Ke Kaafir Murdah Dil Hai'n Ke Naseehat Se Koi Faa'idah Nahee'n Uthaate.
Hazrat Mulla Ali Qaari Rahmatullaah Alaih Farmaate Hain, “Murdo'n Se Muraad Kuffaar Hai'n Aur (Yahaa'n) Mutlaq Sunne Ki Nafi Nahee'n Balke Ma'ni Yeh Hai Ke Unka Sunna Nafa Bakhsh Nahee'n Hota. (Mirqaatul Mafaateeh, Kitaabul Jihaad, Baab Hukmil Asra, Al-Faslul Awwal, 7/519, Tehtul Hadees 3967)
Murdo'n Ke Sunne Ka Saboot :-
Kaseer Ahaadees Se Murdo'n Ka Sunna Bhi Saabit Hai, Chunaanche Muslim Shareef Ki Hadees Mulaaheza Farmaaye'n,
Hazrat Anas Bin Maalik Radiallaahu Anhu Se Riwaayat Hai Ke Rasoolullaah ﷺ Ne Badar Ke Maqtooleen Ko Teen Din Tak Usi Tarah Chhode Rakha, Phir Aap ﷺ Unke Paas Aaye Aur Unhe'n Aawaz Di Aur Farmaaya, Aye Abu Jahel Bin Hishaam ! Aye Umayyah Bin Khalaf ! Aye Uqbah Bin Rabee'ah ! Aye Shayba Bin Rabee'ah ! Kya Tumne Woh Kuchh Nahee'n Pa Liya Ke Jiska Tumse Tumhaare Rab Ne Sachcha Wa'dah Kiya Tha, Mai'n Ne To Woh Kuchh Pa Liya Hai Ke Jiska Mere Rab Ne Mujhse Sachcha Wa'dah Kiya Tha, Hazrat Umar Radiallaahu Anhu Ne Nabi e Akram ﷺ Ka Yeh Farmaan Suna To Arz Kiya, Aye Allaah Ke Rasool ! (Yeh To Mar Chuke Hai'n) Yeh Kaise Sun Sakte Hai'n Aur Kaise Jawaab De Sakte Hai'n, Aap ﷺ Ne Farmaaya, Qasam Hai Uss Zaat Ki Jiske Qabza Wa Qudrat Me'n Meri Jaan Hai Tum Meri Baat Ko Inse Zyaadah Sunne Waale Nahee'n Ho Lekin Yeh Jawaab Dene Ki Qudrat Nahee'n Rakhte, Phir Aap ﷺ Ne Hukm Farmaaya Ke Unhe'n Ghaseet Kar Badar Ke Kuwe'n Me'n Daal Do To Unhe'n Daal Diya Gaya. (Muslim Shareef, Kitaabul Jannati Wa Sifati Na'eemiha Wa Ahliha, Baab Arzi Maq'adil Mayyiti Minal Jannati Awin Naari Alaihi, Wa Isbaati Azaabil Qabri Wat Ta'awwudhi Minhu, Jild No.4, Safha No.2203, Hadees No.7099)
Ek Aur Riwaayat Me'n Hai, Jab Bande Ko Uski Qabar Me'n Rakh Diya Jaata Hai Aur Uske Saathi Use Dafan Karke Palat'te Hai'n To Yaqeenan Woh Unke Jooto'n Ki Aawaz Sunta Hai. (Bukhaari Shareef, Hadees No.1338)
Isi Tarah Ek Riwaayat Me'n Hai, Jab Janaazah Rakha Jaata Hai Aur Mard Use Apni Gardano'n Par Uthaate Hai'n, Agar Nek Hota Hai To Kehta Hai, Mujhe Aage Badhaao! Aur Agar Bura Hota Hai To Kehta Hai, Haaye Kharaabi ! Kahaa'n Liye Jaate Ho? Insaan Ke Alaawah Har Cheez Uski Aawaaz Sunti Hai, Agar Insaan Sunle To Behosh Ho Jaaye. (Bukhaari Shareef, Hadees No.1314)
Yaad Rakhiye ! Murde Sunte Hai'n Balke Unme'n Sunne Ki Salaahiyat Chaahe Woh Momin Ho Ya Kaafir Marne Ke Ba'ad Badh Jaati Hai Kyu'nke Duniya Ka Ma'mool To Yeh Hota Hai Ke Bandah Kaam Kaaj Aur Duniyaawi Socho'n Me'n Mashgool Hota Hai, Isliye Kisi Ki Baat Ba'az Auqaat Tawajjoh Se Sun Nahee'n Paata, Jo Insaan Mar Jaata Hai Uska Amal Khatam Ho Jaata Hai, Isliye Murdah Qabar Me'n Aane Waale Tamaam Insaano'n Ki Aawaazo'n Ko Sunta Aur Pehchaanta Hai, Jab Aa'm Momin Aur Kaafir Ka Yeh Haal Hai Ke Uska Idraak Badh Jaata Hai To Ambiya e Kiraam Aur Auliya e Kiraam Ke Jo Apni Qabro'n Me'n Zindah Hai'n Woh To Badarja e Aula Pukaarne Waale Ki Pukaar Sunne Waale Hai'n Aur Majboor Wa Bebas Ki Fariyaad Ko Paho'nchne Waale Hai'n.
Jo Log Yeh Kehte Hai'n Ke Qur'aane Paak Me'n Hai Ke Murde Nahee'n Sunte, Unko Apne Aqaa'id Ki Islaah Karni Chaahiye Yeh Log Aayaate Qur'aaniya Ki Galat Taaweele'n Bayaan Karte Hai'n, Fiqh Ke Usoolo'n Me'n Pehla Usool Qur'aane Paak Hai, Agar Qur'aane Paak Se Kisi Masle Ki Wazaahat Na Mile To Hadeese Mubaarak Ki Taraf Ruju Karne Ka Hukm Hai Aur Kayi Ahaadees Me'n Murdo'n Ke Sunne Ka Waazeh Zikr Maujood Hai, Ab Qur'aan Me'n Jahaa'n Par Murdo'n Ke Na Sunne Ka Zikr Hai, Usse Muraad Yeh Hai Ke Kuffaar Zindah Hone Ke Baawajood Murdah Hai'n Aur Naseehat Qabool Karne Ke Lehaaz Se Bejaan Hai'n Warna Sunte To Hai'n Magar Hidaayat Par Amal Nahee'n Karte.
Allaah Paak Se Du'aa Hai Ke Allaah Paak Hame'n Aqaa'id Ki Mazbooti Wa Durusti Ki Ne'mat Se Sarfaraaz Farmaaye. Aameen
By Alahazrat Foundation Research Team - 7710809266/9892708816
