Mayyat Ko Dafan Karne Ke Ba'ad Qabr Par Azaan Dene Ke Ta'alluq Se Ham Ahle Sunnat Wa Jamaa'at Ka Nazariya Wa Aqeedah Yeh Hai Ke Yeh Na To Zarooriyaat e Deen Me'n Se Hai Na Zarooriyaat e Ahle Sunnat Wa Jamaa'at Me'n Se Hai Balke Yeh Ek Mustahab Aur Jaa'iz Amal Hai Jo Ke Furu Me'n Se Hai.
Hazrat Abdullaah Bin Ja'far Radiallaahu Anhu Bayaan Karte Hai'n Ke Rasoolullaah ﷺ Ne Farmaaya, Apne Murdo'n Ko In Kalimaat Ki Talqeen Karo, Allaah Haleem Wa Kareem Ke Siwa Koi Ma'bood e Bar Haq Nahee'n, Allaah Arshe Azeem Ka Rab Paak Hai, Har Qism Ki Ta'reef Allaah Keliye Hai Jo Tamaam Jahaano'n Ka Parwardigaar Hai, Sahaaba Ne Arz Kiya, Allaah Ke Rasool ! (Yeh Kalimaat) Zindo'n Ke Muta'alliq Kaise Hai'n ? Aapne Farmaaya, Bahot Khoob ! Bahot Khoob. (Mishqaatul Masaabeeh, Kitaabul Janaa'iz, Hadees No.1626)
Duniyaawi Zindagi Khatam Hone Par Insaan Keliye 2 Bade Khatarnaak Waqt Hai'n, Ek To Jaa'n Kani Ka, Doosra Sawaalaat e Qabr Ba'ad e Dafan Ka, Agar Jaa'n Kani Ke Waqt Khaatma Bil Khair Naseeb Na Huwa To Umar Bhar Ka Kiya Dhara Sab Barbaad Gaya Aur Agar Qabr Ke Imtehaan Me'n Na Kaami Huwi To Aa'indah Ki Zindagi Barbaad Huwi, Duniya Me'n To Agar Ek Saal Imtehaan Me'n Fail Hogaye To Aane Waale Saal Me'n Paas Ho Sakta Hai Magar Wahaa'n Yeh Bhi Nahee'n, Isliye Zindo'n Ko Chaahiye Ke In Dono'n Waqto'n Me'n Marne Waalo'n Ki Imdaad Kare'n Ke Marte Waqt Kalma Padh Padh Kar Sunaaye'n Aur Ba'ad e Dafan Uss Tak Kalme Ki Aawaaz Paho'nchaaye'n Taake Woh Uss Imtehaan Me'n Kaamiyaab Ho, Lehaaza Iss Hadees Ke 2 Ma'ni Ho Sakte Hai'n, Ek To Yeh Ke Jo Mar Raha Ho Usko Kalma Sikhaao, Doosra Yeh Ke Jo Mar Chuka Ho Usko Kalma Sikhaao, Pehla Ma'ni Majaazi Hai Aur Doosra Haqeeqi Aur Bila Zaroorat Ma'ni Majaazi Lena Theek Nahee'n, Lehaaza Hadees Ka Yehi Tarjuma Huwa Ke Apne Murdo'n Ko Kalma Sikhaao.
Jaisa Ke Fataawa Shaami Me'n Hai, Ahle Sunnat Ke Nazdeek Yeh Hadees (Jo Upar Mazkoor Hai) Apne Haqeeqi Ma'ni Par Mehmool Hai Aur Huzoor ﷺ Se Riwaayat Hai Ke Aapne Dafan Ke Ba'ad Talqeen Karne Ka Hukm Diya, Pas Qabr Par Kahe Ke Aye Fulaa'n Ke Bete Fulaa'n Tu Uss Deen Ko Yaad Kar Jis Par Tha. (Fataawa Shaami, 1/628)
Neez Ahaadees Se Saabit Hai Ke Jab Murde Ko Qabr Me'n Utaarne Ke Ba'ad Munkar Nakeer Uske Paas Aakar Sawaalaat Karte Hai'n To Shaitaan Jo Ke Insaan Ka Azali Dushman Hai Musalmaano'n Ko Behkaane Keliye Wahaa'n Bhi Aa Paho'nchta Hai Aur Yeh Baat Bhi Ahaadees Se Saabit Hai Ke Shaitaan Qabr Me'n Aata Hai Aur Musalmaan Ko Sawalaat Ke Jawaab Dene Me'n Pareshaani Me'n Mubtala Karta Hai Taake Yeh Sawaalaat Ke Jawaabaat Na Dekar Khaa'ib Wa Khaasir Ho Aur Jab Azaan Di Jaati Hai To Shaitaan Bhaag Khada Hota Hai.
Chunaanche Muslim Shareef Me'n Hai Ke Hazrat Jaabir Radiallaahu Anhu Se Marwi Hai, Farmaate Hai'n Mai'n Ne Nabi e Kareem ﷺ Ko Farmaate Huwe Suna, Bila Shubah Shaitaan Jab Namaaz Ki Pukaar (Azaan) Sunta Hai To (Bhaag Kar) Chala Jaata Hai, Yahaa'n Tak Ke Rooha (Ek Jagah Ka Naam) Ke Maqaam Par Paho'nch Jaata Hai. (Muslim Shareef, Hadees No.854)
Ek Aur Hadees Me'n Hai Ke Jab Murde Se Sawaal Hota Hai Ke Tera Rab Kaun Hai ? Shaitaan Uspar Zaahir Hota Hai Aur Apni Taraf Ishaarah Karta Hai, Ya'ni Mai'n Tera Rab Hoo'n, Isliye Hukm Aaya Ke Mayyat Keliye Jawaab Me'n Saabit Qadam Rehne Ki Du'aa Kare'n. (Nawaadirul Usool Fi Ahaadeesir Rasool, 3/22)
Jaisa Ke Imaam Hakeem Tirmizi Alaihir Rehma Farmaate Hai'n Ke Jab Ham Ne Tehqeeq Ki To Nabi e Kareem ﷺ Ki Hadeeso'n Me'n Hamne Paaya Ke Huzoor ﷺ Mayyat Ko Dafan Karte Waqt Du'aa Farmaate Ilaahi Ise Shaitaan Se Bacha. (Nawaadirul Usool Fi Ahadeesir Rasool. 4/162)
Kuchh Log Yeh Kehte Hai'n Ke Azaan Namaaz Ke Saath Khaas Hai, Gair Namaaz Me'n Azaan Kehna Durust Nahee'n Hai, Woh Chaahe Qabr Par Ho Ya Dafa e Bala Keliye Ho,
Jawaab - Nahee'n, Aisa Nahee'n Ke Azaan Namaaz Ke Saath Khaas Hai, Ba'az Logo'n Ko Azaan e Qabr Ke Na Jaa'iz Hone Ka Shaitaani Waswasa Shaayad Iss Bina Par Aata Hai Ke Log Azaan Ko Namaaz Ke Saath Khaas Samajhte Hai'n Haalaa'nke Aisa Nahee'n Hai Balke Sharee'at e Mutahhara Ne Namaaz Ke Alaawah Kaseer Maqaamaat Par Azaan Ko Mustahsan Jaana Hai.
Chunaanche Fuqaha e Kiraam Farmaate Hai'n Ke 5 Namaazo'n Ke Alaawah Jin Umoor Keliye Azaan Sunnat Ya Mustahab Hai Darje Zail Hai'n,
Namaaz Ke Alaawah Bhi Azaan Masnoon Hai Jaisa Ke Nau Maulood Bachche Ke Kaam Me'n, Yoo'n Hi Magmoom Aur Daurah Padne Waale Par, Gusse Waale Par, Bad Akhlaaq Par, Insaan Ho Ya Jaanwar, Jab Dushman Ke Lashkar Ka Aamna Saamna Ho Jaaye Aur Jalne Waale Ke Paas Aur Kaha Gaya Hai Mayyat Ko Qabr Me'n Utaarte Waqt Qayaas Karte Huwe Uske Duniya Me'n Aane Par Yoo'n Hi Chudelo'n (Jinnaat Bhoot) Ki Sarkashi Ke Waqt, Iske Baare Me'n Hadees e Saheeh Maujood Hai, Yoo'n Hi Jo Koi Weeraan Jagah Me'n Raah Bhool Jaaye, Mulla Ali Qaari Alaihir Rehma Ne Mirqaat (Sharah Mishqaat) Me'n Farmaaya Ke Magmoom Wa Pareshaan Keliye Sunnat Yeh Ke Kisi Doosre Ko Apne Kaan Me'n Azaan Ka Hukm De'n Isse Gam Door Hoga, Yoo'n Hi Hazrat Maula Ali Radiallaahu Anhu Se Manqool Hai. (Ibne Aa'bideen, Raddul Muhtaar, 1/385)
Lehaaza Mayyat Ko Qabr Me'n Utaarte Waqt Qabr Par Azaan Dena Mustahab Hai Jaa'iz Hai Aur Koi Sharayi Mumaane'at Nahee'n Hai, Jo Na Jaa'iz Kahe Woh Daleel Pesh Kare.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Qabr Par Azaan Dene Ka Masla Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
