Allaah Paak Ke Nazdeek Nek Bando'n Ke Mazaaraat Sha'aa'irullaah Hai'n, Unka Ahteraam Wa Adab Har Musalmaan Par Laazim Hai, Khaasaan e Khuda Har Daur Me'n Mazaaraat e Auliya Par Haazir Ho Kar Faiz Haasil Karte Rahe Hai'n, Sahaaba e Kiraam Alaihimur Ridwaan Nabi e Kareem ﷺ Ki Mazaar e Paak Par Haazir Ho Kar Wahaa'n Se Faiz Haasil Kiya Karte The, Phir Taaba'een e Kiraam Sahaaba e Kiraam Alaihimur Ridwaan Ke Mazaar Par Haazir Ho Kar Faiz Haasil Kiya Karte The, Phir Taba Taaba'een, Taaba'een e Kiraam Ke Mazaaraat Par Haazir Ho Kar Faiz Haasil Kiya Karte The, Taba Taaba'een Aur Auliya e Kiraam Ke Mazaaraat Par Aaj Tak Awaam Wa Khawaas Haazir Ho Kar Faiz Haasil Karte Hai'n Aur Insha Allaah Yeh Silsila Qayaamat Tak Jaari Rahega, Magar Kuchh Log Apni Kam Ilmi Aur Kam Aqli Ki Wajah Se Na Jaa'iz Wa Shirk Ke Fatwe Dete Hai'n Aur Kehte Hai'n Ke Mazaaraat Par Jaana Jaa'iz Nahee'n Hai Yeh Shirk Hai, To Aa'iye Dekhte Hai'n Dalaa'il Ki Roshni Me'n Mazaaraat Par Haazri Dena Kaisa Hai ?
Mazaaraat e Auliya e Kiraam Ki Ziyaarat Se Muta'alliq Ahle Sunnat Wa Jamaa'at Ka Nazariya Wa Aqeedah Yeh Hai Ke Sharee'at e Mutahhara Me'n Mazaaraat e Auliya Allaah Par Jaana Jaa'iz Wa Mustahab Amal Hai Jo Ke Sunnat Se Bhi Saabit Hai, Lekin Yaad Rahe Ke Ham Ahle Sunnat Wa Jamaa'at Ke Nazdeek Mazaaraat Par Jaane Ka Aqeedah Wa Nazariya Na Zarooriyaat e Deen Se Hai Na Zarooriyaat e Ahle Sunnat Se Balke Yeh Jaa'iz Wa Mustahab Amal Hai Jo Ke Furu Me'n Se Hai.
Yaad Rahe Mazaaraat Par Haazri Ka Jo Islaami Tareeqa Hai Usi Tareeqe Par Haazri De'n, Agar Uske Khilaaf Koi Gair Sharayi Kaam Karta Hai To Ahle Sunnat Wa Jamaa'at Ka Isse Koi Lena Dena Nahee'n Woh Khud Zimmedaar Hoga.
Mazaar Par Haazri Ka Tareeqa Kya Hai To Iske Baare Me'n Alahazrat Imaam e Ahle Sunnat Mujaddid e Deen Wa Millat Maulaana Shaah Ahmad Raza Khaan Qaadri Barelvi Alaihir Rehma Yoo'n Irshaad Farmaate Hai'n, Mazaaraat e Shareefa Par Haazir Hone Me'n Paaye'nti (Paao'n) Ki Taraf Se Jaaye Aur Kam Az Kam 4 Haath Ke Faasle Par Muwaajah Me'n Khada Ho Aur Mutawassit Aawaaz Ba Adab Salaam Arz Kare "Assalaamu Alaika Ya Sayyadi Wa Rehmatullaahi Wa Barakaatuhu" Phir Darood e Gausiya 3 Baar, Alhamd Shareef 1 Baar, Aayatul Kursi 1 Baar, Sureh Ikhlaas 7 Baar, Phir Darood e Gausiya 7 Baar Aur Waqt Fursat De To Sureh Yaaseen Aur Sureh Mulk Bhi Padh Kar Allaah Paak Se Du'aa Kare Ke Ilaahi A'zzowajal ! Iss Qiraa'at Par Mujhe Itna Sawaab De Jo Tere Karam Ke Qaabil Hai Na Utna Jo Mere Amal Ke Qaabil Hai Aur Use Meri Taraf Se Iss Banda e Khuda Maqbool Ko Nazr Paho'ncha, Phir Apna Jo Matlab Jaa'iz e Sharayi Ho Uske Liye Du'aa Kare Aur Saahib e Mazaar Ki Rooh Ko Allaah Paak Ki Baargaah Me'n Apna Waseela Qaraar De, Phir Usi Tarah Salaam Karke Waapas Aaye, Mazaar Ko Na Haath Lagaaye Na Bosa De Aur Tawaaf Bil Ittefaaq Na Jaa'iz Hai Aur Sajdah Haraam. (Fataawa Razviya Mutarjim, 9/524)
Ziyaarat e Quboor Par Haazri Ke Jawaaz Par Ab Dalaa'il Mulaaheza Farmaaye'n,
Sayyaduna Buraidah Radiallaahu Anhu Se Riwaayat Hai Ke Sarkaar e Madeena ﷺ Ne Irshaad Farmaaya, Mai'n Ne Tumhe'n Qabro'n Ki Ziyaarat Se Mana Kiya Tha Ab Ziyaarat Kiya Karo. (Muslim Shareef, 2/672, Hadees No.106, (977))
Nabi e Kareem ﷺ Khud Shohada e Ohad Ke Mazaar Par Tashreef Le Jaate The Jaisa Ke Hadees e Paak Me'n Hai Ke Nabi e Kareem ﷺ Har Saal Shohada e Ohad Ki Mazaar Par Tashreef Le Jaate. (Musannaf Abdur Razzaaq, 3/573, Hadees No.6816)
Imaam Fakhruddeen Raazi Alaihir Rehma (Wisaal 606 Hijri) Apni Tafseer Me'n Farmaate Hai'n, Huzoor Alaihissalaam Har Saal Shohada e Ohad Ke Mazaar Par Tashreef Le Jaate Aur Aap ﷺ Ke Wisaal Mubaarak Ke Ba'ad Chaaro'n Khulafa e Kiraam Alaihimur Ridwaan Bhi Aisa Hi Karte The. (Tafseer e Kabeer, Sureh Ra'd, Tehtul Aayah 20)
Tirmizi Shareef Ki Riwaayat Me'n Hai Ke Rasoole Akram ﷺ Ne Irshaad Farmaaya, Mai'n Ne Tumko Qabro'n Ki Ziyaarat Se Mana Kiya Tha To Ab Muhammad ﷺ Ko Ijaazat De Di Gayi Hai Apni Waalidah Ki Qabr Ki Ziyaarat Ki, Lehaaza Tum Bhi Qabro'n Ki Ziyaarat Karo Beshak Woh Aakherat Ki Yaad Dilaati Hai. (Tirmizi Shareef, 3/361, Hadees No.1054)
In Hadeeso'n Se Saabit Huwa Ke Mazaaraat e Auliya e Kiraam Par Jaana Jaa'iz Wa Mustahab Amal Hai.
Kuchh Log Kehte Hai'n Ke Mazaaraat Par Jaane Se Kya Faa'idah Hota Hai To Unko Bataana Chaahta Hoo'n Ke Mazaaraat Wa Quboor Ki Ziyaarat Karne Se Duniya Se Be Ragbati Paida Hoti Hai Aur Aakherat Ki Yaad Aati Hai, Jaisa Ke Upar Hadees Me'n Bayaan Ho Chuka Hai.
Sahaaba e Kiraam Alaihimur Ridwaan Huzoor ﷺ Ke Mazaar e Aqdas Par Haazri Diya Karte The Jaisa Ke Hazrat Maalik Daar Radiallaahu Anhu Riwaayat Karte Hai'n Ke Hazrat Umar Bin Khattaab Radiallaahu Anhu Ke Zamaane Me'n Log Qahet Saali Me'n Mubtala Hogaye To Ek Sahaabi Huzoor Nabi e Akram ﷺ Ki Qabr e At'har Par Haazir Huwa Aur Arz Kiya, Ya Rasoolallaah ﷺ ! (Aap Allaah Paak Se) Apni Ummat Keliye Sairaabi Maa'nge'n Kyu'nke Ke Woh (Qahet Saali Ke Baa'is) Halaak Hogayi Hai To Khwaab Me'n Huzoor Nabi e Akram ﷺ Uss Sahaabi Ke Paas Tashreef Laaye Aur Farmaaya, Umar Ke Paas Jaao Aur Use Mera Salaam Kaho Aur Use Bataao Ke Tum Sairaab Kiye Jaaoge Aur Umar Se (Yeh Bhi) Keh Do (Deen Ke Dushman Tumhaari Jaan Lene Ke Darpe Hai'n Unse) Hoshiyaar Raho, Hoshiyaar Raho, Phir Woh Sahaabi Hazrat Umar Radiallaahu Anhu Ke Paas Aaye Aur Unhe'n Khabar Di To Hazrat Umar Radiallaahu Anhu Ro Pade Aur Farmaaya, Aye Allaah ! Mai'n Kotaahi Nahee'n Karta Magar Yeh Ke Kisi Kaam Me'n Aa'jiz Ho Jaaoo'n. (Musannaf Ibne Abi Shayba, Hadees No. 32002)
Hazrat Abu Jauza Aaus Bin Abdullaah Radiallaahu Anhu Se Marwi Hai Ke Ek Martaba Madeena e Munawwara Ke Log Sakht Qahet Me'n Mubtala Hogaye To Unho'n Ne Hazrat Aa'yesha Radiallaahu Anha Se Shikaayat Ki, Ummul Momineen Hazrat Aa'yesha Radiallaahu Anha Ne Farmaaya, Huzoor Nabi e Akram ﷺ Ki Qabr e Anwar (Ya'ni Rauza e Aqdas) Ke Paas Jaao Aur Wahaa'n Se Ek Khidki Aasmaan Ki Taraf Iss Tarah Kholo Ke Qabr e Anwar Aur Aasmaan Ke Darmiyaan Koi Pardah Haa'il Na Rahe, Raawi Kehte Hai'n Ke Logo'n Ne Aisa Hi Kiya To Bahot Zyaadah Baarish Huwi, Yahaa'n Tak Ke Khoob Sabzah Ug Aaya Aur Oo'nt Itne Mote Hogaye Ke (Mehsoos Hota Tha) Jaise Woh Charbi Se Phat Pade'nge, Lehaaza Uss Saal Ka Naam Hi Aa'mul Fatq (Pet) Phatne Ka Saal Rakh Diya Gaya. (Sunan Daarmi, Hadees No.92)
In Dono'n Hadeeso'n Ko Padhne Ke Ba'ad Isse Jo Masla Ma'loom Huwa Woh Yeh Hai Ke Gairullaah Se Madad Maa'ngna Bhi Jaa'iz Hai Aur Mazaaraat Par Haazri Dena Yeh Bhi Jaa'iz Hai.
Khateeb Bagdaadi (Wisaal 463 Hijri) Aur Bahot Se A'imma Ki Tehqeeq Ke Mutaabiq Imaam Shaafayi Jab Bagdaad Me'n Hote To Husool e Barkat Ki Garz Se Imaam e Aa'zam Abu Haneefa Radiallaahu Anhu Ki Qabr e Mubaarak Ki Ziyaarat Karte, Khateeb Bagdaadi Naqal Karte Hai'n Ke Imaam Shaafayi, Imaam Abu Haneefa (Wisaal 150 Hijri) Ke Mazaar Ki Barkaat Ke Baare Me'n Khud Apna Tajruba Bayaan Karte Huwe Farmaate Hai'n, Mai'n Imaam Abu Haneefa Ki Zaat Se Barkat Haasil Karta Hoo'n Aur Rozaana Unki Qabr Par Ziyaarat Keliye Aata Hoo'n, Jab Mujhe Koi Zaroorat Wa Mushkil Pesh Aati Hai To 2 Rak'at Namaaz Padh Kar Unki Qabr Par Aata Hoo'n Aur Uske Paas (Khade Ho Kar) Haajat Bar Aawri Keliye Allaah Paak Se Du'aa Karta Hoo'n, Pas Mai'n Wahaa'n Se Nahee'n Hat'ta Yahaa'n Tak Ke (Qabr Ki Barkat Ke Sabab) Meri Haajat Poori Ho Chuki Hoti Hai. (Khateeb Bagdaadi, Fee Taareekh e Bagdaad, 1/123)
Hazrat Daawood Bin Saaleh Se Marwi Hai Ke Woh Bayaan Karte Hai'n Ke Ek Roz Marwaan Aaya Aur Usne Dekha Ke Ek Aadmi Nabi e Kareem ﷺ Ke Mazaar e Anwar Par Apna Muh Rakhe Huwe Hai, To Uss (Marwaan) Ne Kaha, Kya Tu Jaanta Hai Ke Tu Kya Karraha Hai ? Jab Marwaan Uski Taraf Badha To Dekha Woh Sahaabi e Rasool ﷺ Hazrat Abu Ayyoob Ansaari Radiallaahu Anhu The, Aur Unho'n Ne Jawaab Diya, Haa'n Mai'n Jaanta Hoo'n, Mai'n Rasoolullaah ﷺ Ke Paas Aaya Hoo'n, Mai'n Kisi Pat'thar Ke Paas Nahee'n Aaya. (Musnad e Imaam Ahmad Bin Hambal, Hadees No.23646)
Mash'hoor Mohaddis Imaam Ibne Hibbaan Hazrat Imaam Ali Bin Moosa Raza Radiallaahu Anhu Ke Baare Me'n Apna Mushaaheda Bayaan Karte Huwe Farmaate Hai'n, Mai'n Ne Unki Mazaar Ki Kayi Martaba Ziyaarat Ki, Mere Shaher Toos Me'n Qayaam Ke Dauraan Jab Bhi Mujhe Koi Mushkil Pesh Aati Aur Hazrat Imaam Moosa Raza Radiallaahu Anhu Ke Mazaar e Mubaarak Par Haazri Dekar Allaah Paak Se Woh Mushkil Door Karne Ki Du'aa Ki To Woh Du'aa Zaroor Qabool Huwi Aur Mushkil Door Hogayi, Yeh Aisi Haqeeqat Hai Jise Mai'n Ne Baarha Aazmaaya To Isi Tarah Paaya, Allaah Paak Hame'n Huzoor Nabi e Akram ﷺ Aur Aap ﷺ Ke Ahle Bait Ki Mohabbat Par Maut Naseeb Farmaaye. (Ibne Hibbaan, Fee Kitaabus Siqaat, 8/457, Raqam 14411)
Allaama Muhammad Bin Abu Ya'la Hambali (Wisaal 521 Hijri) "Tabqaatul Hanaabala, Jild No.2, Safha No.63" Me'n Soofi Zaahid Ali Bin Muhammad Bin Bashshaar Ke Tarjume Me'n Likhte Hai'n, Jab Unka Wisaal Hogaya To Unhe'n Najmi Ke Qareeb Ghaati Me'n Dafan Kiya Gaya, Ab Unki Qabar Mash'hoor Wa Ma'roof Hai, Log Uski Ziyaarat Se Barkat Haasil Karte Hai'n.
Ek Ae'teraaz Yeh Kiya Jaata Hai Ke Hadees Shareef Me'n Hai Ke 3 Masjido'n (Masjid e Haraam, Masjid e Aqsa Aur Masjid e Nabavi Shareef) Ke Siwa Kisi Jagah Ka Safar Na Kiya Jaaye, Phir Log Mazaaraat e Auliya Par Haazri Ki Niyat Se Safar Kyu'n Karte Hai'n ?
Jawaab - Iss Hadees Ka Matlab Yeh Hai Ke In Teeno'n Masjido'n Me'n Namaaz Ka Sawaab Zyaadah Milta Hai, Lehaaza In Masaajid Me'n Yeh Niyat Karke Door Se Aana Choo'nke Faa'idemand Hai, Jaa'iz Hai, Lekin Kisi Aur Masjid Ki Taraf Safar Karna Yeh Samajh Kar Ke Wahaa'n Sawaab Zyaadah Milta Hai Yeh Na Jaa'iz Hai Kyu'nke Har Jagah Ki Masjid Me'n Sawaab Yaksaa'n Hai Aur Hadees Me'n Isi Niyat Se Safar Ko Mana Farmaaya Hai, Aaj Log Tijaarat Keliye Safar Karte Hai'n, Ilm e Deen Keliye Safar Karte Hai'n, Tableegh Keliye Safar Karte Hai'n Aur Beshumaar Duniyaawi Kaamo'n Keliye Mukhtalif Qism Ke Safar Kiye Jaate Hai'n, Kya Yeh Sab Safar Haraam Ho'nge ? Hargiz Nahee'n, Balke Yeh Saare Safar Jaa'iz Hai'n Aur Inka Inkaar Koi Bhi Nahee'n Kar Sakta, To Phir Mazaaraat e Auliya Keliye Safar Karna Na Jaa'iz Kyu'n Hoga.
Imaam Shaafayi Alaihir Rehma Apne Watan Philasteen Se Iraaq Ka Safar Karke Imaam Saahab Radiallaahu Anhu Ki Mazaar Par Tashreef Laate The Aur Mazaar Se Barkate'n Bhi Haasil Karte The, Kya Unka Yeh Safar Karna Bhi Na Jaa'iz Tha ?
Agar Mazaaraat e Auliya Allaah Par Jaana Shirk Hota To Kya Huzoor ﷺ Apni Waalidah Maajidah Aur Shohada e Ohad Ke Mazaaro'n Par Tashreef Le Jaate ?
Kya Sahaaba e Kiraam Radiallaahu Anhum Huzoor ﷺ Ke Mazaar e Pur Anwaar Par Haazri Dete ? Kya Taaba'een, Mohaddiseen, Mufassireen, Mujtahideen Mazaaraat e Auliya Par Haazri Keliye Safar Karte ?
Pata Chala Ke Mazaaraat Par Haazri Huzoor ﷺ, Aapke As'haab Radiallaahu Anhum Aur Ummat Ke Mujtahideen, Mohaddiseen Aur Mufassireen Ki Sunnat Hai Aur Yehi Ahle Islaam Ka Tareeqa Raha Hai, Aur Iss Mubaarak Amal Par Shirk Ke Fatwe Dene Waale Siraate Mustaqeem Se Bhatke Huwe Hai'n.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Mazaaraat e Auliya Par Haazri Ka Masla Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
