Ham Ahle Sunnat Wa Jamaa'at Ka Aqeedah Wa Nazariya Hai Ke Allaah Paak Ne Huzoor Nabi e Kareem ﷺ Ko Duniya Me'n Tamaam Ambiya Wa Mursaleen Ke Ba'ad Sabse Aakhir Me'n Bheja Aur Rasoole Kareem ﷺ Par Risaalat Wa Nabuwwat Ka Silsila Khatam Farma Diya, Nabi e Akram ﷺ Ke Zamaane Ya Nabi e Akram ﷺ Ke Ba'ad Qayaamat Tak Kisi Ko Nabuwwat Milna Na Mumkin Hai, Yeh Deen e Islaam Ka Aisa Buniyaadi Aqeedah Hai Ke Jiska Inkaar Karne Waala Ya Isme'n Zarrah Baraabar Bhi Shak Wa Shubah Karne Waala Kaafir Wa Murtad Ho Kar Daayera e Islaam Se Nikal Jaata Hai, Ya'ni Yeh Aqeedah Zarooriyaat e Deen Se Hai, Kyu'nke Yeh Aqeedah Qatayi Hai Aur Iski Qat'iyyat Qur'aan Wa Hadees Aur Ijma e Ummat Se Saabit Hai, Qur'aan e Majeed Ki Sareeh Aayat Bhi Iss Ta'alluq Se Maujood Hai Aur Ahaadees Tawaatur Ki Had Tak Paho'nchi Huwi Hai'n Aur Ummat Ka Ijma e Qatayi Bhi Hai, Iss Sabab Jo Koi Huzoor e Akram ﷺ Ki Nabuwwat Ke Ba'ad Kisi Aur Keliye Nabuwwat Milna Mumkin Jaane Woh Khatme Nabuwwat Ka Munkir Kaafir Aur Islaam Se Khaarij Hai.
Jaisa Ke Aa'la Hazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Farmaate Hai'n, Jiska Khulaasa Yeh Hai, "Allaah A'zzowajal Sachcha, Aur Uska Kalaam Sachcha, Musalmaan Par Jis Tarah La Elaaha Ellallaah Maanna, Allaah Paak Ko Ahad, Samad, La Shareeka Lahu (Ya'ni Ek, Be Niyaaz Aur Uska Koi Shareek Na Hona) Jaanna Farz e Awwal Wa Manaat e Imaan (Imaan Ki Buniyad) Hai, Yoo'n Hi Muhammad Rasoolullaah ﷺ Ko Khaatimun Nabiyyeen Maanna Unke Zamaane Me'n Khwaah Unke Ba'ad Kisi Naye Nabi Ki Be'sat (Bheje Jaane) Ko Yaqeenan Muhaal Wa Baatil Jaanna Farz e Ajal Wa Juz Iqaan (Maanne Ka Hissa) Hai.
Aur Aage Farmaate Hai'n, Aur Iska Inkaar Karne Waala Qat'an Ijmaa'an Kaafir Mal'oon Mukhallad Fin Neeraan Ya'ni (Hamesha Keliye Jahannami Hai). (Fataawa Razviya Mutarjum, Jild 15, Safha 330)
Ab Qur'aan Shareef Se Daleel Mulaaheza Farmaaye'n.
1- Sureh Ahzaab, Aayat No.40)
Tarjuma - Muhammad Tumhaare Mardo'n Me'n Se Kisi Ke Baap Nahee'n Haa'n Allaah Ke Rasool Hai'n Aur Sab Nabiyo'n Ke Pichhle Aur Allaah Sab Kuchh Jaanta Hai.
Allaama Ahmad Yaar Khaan Na'eemi Ashrafi Rehmatullaah A'laih "Tafseer Noorul Irfaan" Me'n Mazkoorah Aayat Ki Tafseer Me'n Likhte Hai'n Ke "Allaah Paak Ka Huzoor ﷺ Ko Aakhri Nabi Banaana Ilm Wa Hikmat Par Mabni Hai, Iss Aayat Se Ma'loom Huwa Ke Huzoor ﷺ Ke Ba'ad Koi Nabi Nahee'n Ban Sakta, Jo Kisi Nabi Ka Aana Ya Uska Imkaan Maane To Woh Murtad Hai, Jaise La Elaaha Ellallaah Se Ma'loom Huwa Ke Khuda Ke Siwa Koi Ma'bood Nahee'n Ho Sakta Aise Hi La Nabiyya Ba'di Se Ma'loom Huwa Ke Huzoor ﷺ Ke Ba'ad Koi Nabi Nahee'n Ban Sakta, Yeh Dono'n Ek Darja Me'n Muhaal Hai'n, Isi Tarah Huzoor ﷺ Ke Zamaane Me'n Koi Nabi Na Tha Na Ho Sakta Tha, Kyu'nke Khaatimun Nabiyyeen Woh Jo Sab Nabiyo'n Se Peechhe Ho. (Tafseer Noorul Irfaan, Sureh Ahzaab, Aayat No.40)
Ab Hadees Shareef Se Daleel Mulaaheza Keejiye.
1- Hazrat Abu Hurairah Radiallaahu A'nhu Se Riwaayat Hai, Rasoolullaah ﷺ Ne Irshaad Farmaaya, Meri Misaal Aur Mujhse Pehle Ambiya A'laihimus Salaatu Wassalaam Ki Misaal Uss Shakhs Ki Tarah Hai Jisne Bahot Haseen Wa Jameel Ghar Banaaya, Magar Uske Ek Kone Me'n Ek Ee'nt Ki Jagah Chhod Di, Log Uske Gird Ghoomne Lage Aur Ta'ajjub Se Yeh Kehne Lage Ke Usne Yeh Ee'nt Kyu'n Na Rakhi ? Phir Aap ﷺ Ne Irshaad Farmaaya, Mai'n (Qasre Nabuwwat Ki) Woh Ee'nt Hoo'n Aur Mai'n Khaatimun Nabiyyeen Hoo'n. (Muslim Shareef, Jild No.4, Safha No.1791, Hadees No.22 (2286).
2- Hazrat Abu Hurairah Radiallaahu A'nhu Se Riwaayat Hai, Huzoor e Aqdas ﷺ Ne Irshaad Farmaaya, Mujhe 6 Wajooh (Wajho'n) Se Ambiya e Kiraam A'laihimus Salaatu Wassalaam Par Fazeelat Di Gayi Hai, (1) Mujhe Jaame Kalimaat Ata Kiye Gaye Hai'n (2) Ro'b Se Meri Madad Ki Gayi Hai (3) Mere Liye Ganeemato'n Ko Halaal Kardiya Gaya Hai (4) Tamaam Rooye Zameen Ko Mere Liye Tahaarat (Paak) Aur Namaaz Ki Jagah Bana Diya Gaya Hai (5) Mujhe Tamaam Makhlooq Ki Taraf (Nabi Bana Kar) Bheja Gaya Hai (6) Aur Mujh Par Nabiyo'n (Ke Silsile) Ko Khatam Kiya Gaya Hai. (Muslim Shareef, Jild No.1, Safha No.371, Hadees No.523)
3- Hazrat Jubair Bin Mut'im Radiallaahu A'nhu Se Riwaayat Hai, Rasoole Akram ﷺ Ne Irshaad Farmaaya, Beshak Mere Muta'addid Naam Hai'n, Mai'n Muhammad Hoo'n, Mai'n Ahmad Hoo'n, Mai'n Maahi Hoo'n Ke Allaah Paak Mere Sabab Se Kufr Mitaata Hai, Mai'n Haashir Hoo'n Mere Qadmo'n Par Logo'n Ka Hashar Hoga, Mai'n Aa'qib Hoo'n Aur Aa'qib Woh Jiske Ba'ad Koi Nabi Nahee'n. (Tirmizi Shareef, Jild No.5, Safha No.135, Hadees No.2840)
Isi Tarah Kasrat Ke Saath Ahaadees Maujood Hai Jisse Waazeh Hai Ke Nabi e Kareem ﷺ Allaah Paak Ke Aakhri Nabi Hai'n, Mazeed Huzoor e Aqdas ﷺ Ki Khatme Nabuwwat Ke Dalaa'il Aur Munkiro'n Ke Radd Ke Baare Me'n Ma'loomaat Haasil Karne Keliye "Fataawa Razviya" Me'n Shaamil Risaala "Al-Mubeen Khatmun Nabiyyeen" (Huzoor e Aqdas ﷺ Ke Aakhri Nabi Hone Ke Dalaa'il) Ka Mutaale'ah Farmaaye'n.
By Alahazrat Foundation Research Team - 7710809266/9892708816
