(1) Jo Yeh Maane Ke Nabi e Kareem ﷺ Ke Ba'ad Kisi Ko Nabuwwat Mili Ya Ise Jaa'iz Jaane Woh Kaafir Hai. (Bahaare Sharee'at, Hissa 1, Safha 20, Maktabatul Madeena)
(2) Aayate Khaatamun Nabiyyeen Ke Mash'hoor Ma'ni Me'n Kisi Qism Ki Taaweel Ya Takhsees Karna Kufr Hai. (Fataawa Razviya, Jild 14, Safha 333)
(3) Jo Nabuwwat Ka Jhoota Da'wa Karne Waale Se Mo'jezah Talab Kare Woh Kaafir Hai Albatta Agar Uske Ijz (Ya'ni Bebasi) Ke Iz'haar Keliye Ho To Kufr Nahee'n. (Al-Behrur Raa'iq, Jild 5, Safha 203, Aa'lamgeeri, Jild 2, Safha 263) Ya'ni Usko Yaqeeni Taur Par Jhoota Nabi Maante Huwe Mahez Uski Ruswaayi Ki Khaatir Mo'jezah Talab Karna Kufr Nahee'n Ke Nabuwwat Ka Jhoota Da'wa Karne Waala Kabhi Mo'jezah Zaahir Nahee'n Kar Sakta.
(4) Shaheed Ko Rasoolullaah ﷺ Par Fazeelat Dena Kufr Hai. (Fataawa Razviya, Jild 14, Safha 640)
(5) Jo Nabi e Kareem ﷺ Ki Taraf Ek Lamhe Keliye Bhi Paagalpan Mansoob Kare Woh Kaafir Hai, Haa'n Gashi Ya Behoshi Mansoob Karne Se Kaafir Nahee'n Hoga. (Fataawa Taataarkhaaniya, Jild 5, Safha 480)
(6) Jo Kahe Ke "Nabi e Kareem ﷺ Ki Taraf Se Ham Par Koi Ne'mat Nahee'n Hai" Woh Kaafir Hai. (Al-Behrur Raa'iq, Jild 5, Safha 204)
(7) Nabi e Kareem ﷺ Ki Bashariyyat Ka Mutlaqan Inkaar Kufr Hai. (Fataawa Razviya, Jild 12, Safha 358)
(8) Nabi e Kareem ﷺ Ki Bashariyyat Me'n Shak Karna Bhi Kufr Hai Kyu'nke Nabi e Kareem ﷺ Ki Bashariyyat Qur'aan e Kareem Ki Nasse Qatayi Se Saabit Hai, Haa'n Apne Jaisa Bashar Na Kahe, Khairul Bashar Sayyadul Bashar Kahe. Bashar Ke Masle Par Tafseeli Ma'loomaat Keliye Hakeemul Ummat Hazrat Mufti Ahmad Yaar Khaan A'laihir Rehma Ki Ishqe Rasool Me'n Doobi Huwi Kitaab Shaan e Habeebur Rehmaan Safha 130 Se 137 Ka Mutaale'ah Keejiye.
(9) Rasoolullaah ﷺ Ko Aylchi (Qaasid, Daakiya) Kehna Kufr Hai.
(10) Khaali Rasool Rasool Kehna Agar Ba Qasad Tark e Ta'zeem Hai (Gustaakhi Ke Taur Par) To Kufr Hai.
(11) Jo Rasoolullaah ﷺ Ke Waaste Ke Bagair Khuda Tak Paho'nchne Ka Da'wa Kare Woh Kaafir Hai. (Fataawa Razviya, Jild 12, Safha 578)
(12) Jo Kahe "Allaah A'zzowajal Tak Mai'n Rasoolullaah ﷺ Ke Waaste Ke Bagair Paho'ncha Deta Hoo'n" Woh Kaafir Hai.
(13) Nabi e Kareem ﷺ Ko Behroopiya Kehna Shadeed Kufr Hai. (Fataawa Razviya, Jild 15, Safha 308)
(14) Jo Nabi e Kareem ﷺ Ko Makhlooq Na Maane Woh Kaafir Hai. (Fataawa Amjadiya, Jild 4, Safha 434)
(15) Jo Rasoole Akram ﷺ Ko Khuda Kahe Woh Kaafir Hai.
(16) Jo Allaah A'zzowajal Aur Rasoole Akram ﷺ Ko Yakzaat (Ek Hi) Maane Woh Kaafir Hai. (Fataawa Amjadiya, Jild 4, Safha 465)
Yaad Rakhiye ! Nabi e Kareem ﷺ Se Nisbat Rakhne Waali Kisi Bhi Cheez Ki Gustaakhi Karna Kufr Hai, Sadrush Sharee'ah Badrut Tareeqa Allaama Maulaana Mufti Muhammad Amjad Ali Aa'zami A'laihir Rehma Farmaate Hai'n, Jo Shakhs Nabi e Kareem ﷺ Ko Tamaam Ambiya Me'n Aakhri Nabi Na Jaane Ya Huzoor A'laihissalaam Ki Kisi Cheez Ki Tauheen Kare Ya Ayb Lagaaye, Aap A'laihissalaam Ke Mooye (Baal) Mubaarak Ko Tehqeer (Ya'ni Hiqaarat) Se Yaad Kare, Aap A'laihissalaam Ke Libaas e Mubaarak Ko Ganda Aur Mayla Bataaye, Huzoor A'laihissalaam Ke Naakhun Bade Bade Kahe Yeh Sab Kufr Hai, Balke Agar Yoo'n Hi Kisi Ne Yeh Kaha, Huzoor A'laihissalaam Khaana Tanaawul Farmaane Ke Ba'ad 3 Baar A'ngusht'haaye Mubaarak (U'ngliyaa'n) Chaat Liya Karte The, Ispar Kisi Ne Kaha, Yeh Adab Ke Khilaaf Hai Ya Kisi Sunnat Ki Tehqeer (Ya'ni Tauheen) Kare, Maslan Daadhi Badhaana, Moo'nchhe'n Kam Karna, Amaama Baa'ndhna Ya Shimla Latkaana, Inki Ehaanat (Ya'ni Gustaakhi) Kufr Hai Jabke Sunnat Ki Tauheen Maqsood Ho. (Bahaare Sharee'at, Hissa 9, Safha 181)
Astagfirullaah, La Elaaha Ellallaah Muhammadur Rasoolullaah ﷺ
Khuda Ki Qasam ! Nabi e Kareem ﷺ Har Ayb Se Paak Hai'n, Aap A'laihissalaam Se Nisbat Rakhne Waali Har Cheez Ba Azmat Hai, Ushshaaq Ko Apne Aaqa ﷺ Ki Har Shay Me'n Sa'aadate'n Aur Barkate'n Hi Nazar Aati Hai'n, Chunaanche Aashiqo'n Ke Imaam Mere Aaqa Aa'la Hazrat Imaam e Ahle Sunnat Maulaana Shaah Imaam Ahmad Raza Khaan A'laihir Rehma Hadaa'iq e Bakhshish Shareef Me'n Farmaate Hai'n,
Woh Kamaale Husne Huzoor Hai Ke Gumaane Naqs Jahaa'n Nahee'n
Yehi Phool Khaar Se Door Hai Yehi Sham'a Hai Ke Dhuwaa'n Nahee'n
By Alahazrat Foundation Research Team - 7710809266/9892708816
