Sha'baanul Mo'azzam Ki 15vee'n Raat Jise "Shabe Baraat" Kaha Jaata Hai Yeh Ek Fazeelat Waali Raat Hai Aur Iss Raat Me'n Ibaadaat Karna, Allaah Rabbul Izzat Ki Baargaah Me'n Kasrat Se Du'aaye'n Karna, Zikr Wa Azkaar Karna, Astagfaar Karna Aur Allaah Rabbul Izzat Ki Baargaah Me'n Apne Gunaaho'n Ki Mu'aafi Talab Karna Yeh Ummat Ka Ma'mool Hai Aur Aslaaf e Ummat Se Yeh Baat Saabit Hai, Bahot Se Kam Aqal Log Iss Silsile Me'n Yahaa'n Tak Fatwa Lagaate Hai'n Ke Iss Raat Me'n Ibaadaat Karna Aur Du'aaye'n Karna, Astagfaar Karna Bid'at Hai, Iska Koi Saboot Nahee'n Hai Yeh Apni Taraf Se Logo'n Ne Gadh Li Hai'n, To Aa'iye Dekhte Hai'n Ke Kya Waaqayi Aisa Hi Hai Ya Iske Khilaaf Hai Ya Yeh Log Musalmaano'n Se Nafrat, Bugz Wa Hasad Aur Islaam Dushmani Ki Wajah Se Aisa Keh Rahe Hai'n, To Iss Silsile Me'n Jitni Ahaadees Marwi Hai'n Usme'n Se Chand Ahaadees Bayaan Karu'nga, Isse Pehle 2 Ibaaraat Aapke Saamne Rakhu'nga Jo Iss Baat Ka Bayyin Aur Waazeh Saboot Hai Ke Yeh Amal Ummat Ka Koi 50 Ya 100 Saal Se Ya 200 Saal Se Shuru Nahee'n Huwa Balke Sadiyo'n Se Ummat Ke Aslaaf Ka Amal Jaari Wa Saari Hai Ke Woh Iss Raat Ko Ibaadat Me'n Guzaarte Hai'n.
"Imaam Muhammad Bin Idrees Shaafayi Rehmatullaah Alaih" (Wafaat 204 Hijri) Ki Kitaab "Kitaabul Umm" Ke Jild No.1 Safha No.231 Pe Imaam Shaafayi Rehmatullaah Alaih Farmaate Hai'n,
"5 Raate'n Aisi Hai'n Jin Raato'n Me'n Allaah Rabbul Izzat Ki Baargaah Me'n Du'aa Ki Jaaye To Du'aa Qabool Hoti Hai, Rajabul Murajjab Ki Pehli Raat Aur Jum'ah Ki Raat Aur Eidain Ki 2 Raate'n (Eidul Fitr Aur Eidul Azha) Aur Paa'nchvee'n Raat Sha'baanul Mo'azzam Ki 15vee'n Raat, In 5 Raato'n Me'n Allaah Rabbul Izzat Ki Baargaah Me'n Du'aa Ki Jaaye To Du'aa Maqbool Hoti Hai.
Imaam Shaafayi Rehmatullaah Alaih Farmaate Hai'n Jo Mai'n Ne Hikaayat Kiya Hai In 5 Raato'n Ki Fazeelat Ke Hawaale Se Ke Du'aaye'n Qabool Hoti Hai'n Mai'n Isko Mustahab Jaanta Hoo'n Jo Mai'n Ne Peechhe Hikaayat Kar Diya In Raato'n Ke Baare Me'n Haa'n Isko Farz Na Jaana Jaaye, Farz Na Samjha Jaaye Balke Sirf Mustahab Jaan Ke Iss Raat Me'n Du'aaye'n Ki Jaaye'n Aur Jo Mai'n Ne Hikaayat Ki Ispar Amal Kiya Jaaye To Mai'n Isko Mustahab Jaanta Hoo'n".
"Iqtida As-Siraat Al-Mustaqeem, Jild No.2, Safha No.626/627" Me'n Ibne Taimiya (Wahaabio Ke Sabse Bade Molvi) Ne Likha Hai Ke Sha'baanul Mo'azzam Ki 15vee'n Raat Ki Fazeelat Me'n Ahaadees Marfoo'an Bhi Aur Sahaaba Ke Aasaar Bhi Riwaayat Kiye Gaye Hai'n Jo Iss Baat Ka Taqaaza Karti Hai'n Ke Yeh Raat Fazeelat Waali Raat Hai Aur Salaf Me'n Se Bahot Saare Aise The Jinho'n Ne Iss Raat Ko Ibaadat Keliye Khaas Kar Liya Tha Jo Iss Raat Me'n Ibaadat Karte The.
Ibne Taimiya (Wahabio Ka Sabse Bada Molvi) Apni Doosri Kitaab "Al-Majmoo'ah Al-Fataawa, Jild No.23, Safha No.131" Pe Ek Sawaal Ka Jawaab Dete Huwe Likhta Hai, Sawaal Yeh Kiya Gaya Ke Sha'baanul Mo'azzam Ki 15vee'n Raat Me'n Ibaadat Karna, Nafil Ada Karna Kaisa Hai? To Ibne Taimiya Ne Yeh Jawaab Diya Ke Iss Sha'baanul Mo'azzam Ki 15vee'n Raat Me'n Koi Bandah Akele Namaaz Padhe Ya Makhsoos Logo'n Ki Jamaa'at Me'n Namaaz Padhe Jis Tarah Salaf Wa Saaleheen Ke Bahot Se Giroh Iss Tarah Karte The To Yeh Ahsan Hai (Ya'ni Bahot Achchha Hai).
Mohtaram Qaari'een ! Jaisa Ke Aapne Padha Aapko Ma'loom Ho Gaya Hoga Ke Aslaaf e Ummat Ka Yeh Amal Raha Hai Ke Woh Iss Raat Me'n Ibaadat Karte, Iss Raat Ko Du'aa'on Me'n Guzaarte Aur Allaah Rabbul Izzat Ki Baargaah Me'n Kasrat Ke Saath Zikr Wa Azkaar Aur Du'aaye'n Aur Ibaadaat Karte The, Ummat Ka Yeh Amal Aslaaf Se Chala Aa Raha Hai Aur Aaj Bhi Alhamdulillaah Ummat Ka Yeh Amal Jaari Wa Saari Hai.
Iss Silsile Me'n Jab Ham Ahaadees Ko Dekhte Hai'n To Ek Kaseer Te'daad Hai Ahaadees e Mubaaraka Ki Jo Iss Raat Ki Fazeelat Ko Bayaan Karti Hai'n, Nabi e Paak ﷺ Ke 13 Sahaaba e Kiraam Ridwaanullaah Alaihim Ajma'een Ne Marfoo'an Riwaayat Kiya Ke Rasoolullaah ﷺ Ne Iss Raat Ki Fazeelat Ko Bayaan Kiya, Unme'n Se Sayyaduna Hazrat Abu Bakar Siddeeq Radiallaahu Anhu, Hazrat Maula Ali Radiallaahu Anhu, Hazrat Abdullaah Bin Amro Radiallaahu Anhu, Hazrat M'aaz Ibne Jabal Radiallaahu Anhu, Hazrat Abu Hurairah Radiallaahu Anhu, Hazrat Abu Moosa Ash'ari Radiallaahu Anhu, Hazrat Abu Sa'alba Khushni Radiallaahu Anhu, Hazrat Ubay Ibne Ka'ab Radiallaahu Anhu, Hazrat Auf Bin Maalik Radiallaahu Anhu, Hazrat Abu Umaama Baahili Radiallaahu Anhu, Hazrat Usmaan Bin Abi Al Aas Radiallaahu Anhu, Hazrat Yazeed Bin Jaariya Radiallaahu Anhu Aur Sayyadah Aa'yesha Siddeeqa Radiallaahu Anha, Yeh 13 As'haab Hai'n Jo Rasoolullaah ﷺ Se Marfoo'an Ahaadees Bayaan Karte Hai'n Ke Nabi e Kareem Alaihis Salaatu Was Salaam Ne Iss Raat Ki Yeh Fazeelat Bayaan Farmaayi, Iske Alaawah Bahot Saare Taaba'een Se Bhi Iss Raat Ki Fazeelat Me'n Bahot Saari Ahaadees Marwi Hai'n Jisse Yeh Saabit Hota Hai Ke Sha'baanul Mo'azzam Ki 15 vee'n Raat Ki Fazeelat Saabit Hai Aur Aslaaf e Ummat Ka Yeh Amal Bilkul Ahaadees Ke Mutaabiq Hai.
Ab Dalaa'il Mulaaheza Farmaaye'n :-
Musnade Imaam Ahmad Ibne Hambal Me'n Jild No.7 Safha No.340, Hadees No.25487, Jaame Tirmizi Me'n Hadees No.739, Musannaf Ibne Abi Shaiba Me'n Hadees No.29858, Ibne Maaja, Hadees No.1389, Hadees Ki Darjan Ke Qareeb Kitaabo'n Me'n 10 Turq Ke Saath Hazrat Ummul Momineen Aa'yesha Siddeeqa Radiallaahu Anha Se Yeh Hadees Marwi Hai Ke Woh Farmaati Hai'n, Rasoolullaah ﷺ Ek Raat Apne Kashaana e Aqdas Se Nikle Aur Baqee Shateef (Qabrastaan) Tashreef Farma Huwe, Mai'n Nabi e Paak Alaihis Salaatu Was Salaam Ki Baargaah e Aqdas Me'n Paho'nchi To Nabi e Kareem ﷺ Ne Irshaad Farmaaya,
Aye Aa'yesha! Kya Tumhe'n Iss Baat Ka Khauf Tha Ke Allaah Aur Uske Rasool Tum Par Zyaadati Kare'nge? To Mai'n Ne Arz Ki ! Ya Rasoolallaah ﷺ ! Mai'n Yeh Samjhi Thi Ke Aap Kisi Aur Zauja e Mohtarma Ke Ghar Me'n Tashreef Le Gaye, To Rasoolullaah ﷺ Ne Farmaaya Tumhe'n Pata Hai Ke Aaj Ki Raat Kaunsi Raat Hai, Aaj Ki Raat Sha'baanul Mo'azzam Ki 15vee'n Raat Hai, Iss Raat Allaah Rabbul Izzat Aasmaan e Duniya Pe Khaas Tajalli Farmaata Hai Aur Qabeela e Banu Kalb Ki Bakriyo'n Ke Baalo'n Se Zyaadah Apni Makhlooq Ki Bakhshish Wa Magferat Farma Deta Hai.
Imaam Jalaaluddeen Suyooti Alaihir Rehma Ne "Al-Jaame'ul Sageer" Ke Andar 1942 Number Par Yeh Riwaayat Zikr Ki Aur Farmaaya Yeh Hadees "Hasan" Hai.
Gair Muqallideen Ke "Baaba Naasiruddeen Albaani" Ne Apni Kitaab "As-Silsilatul Ahaadeesis Saheehah" Me'n Jild No.3 Safha No.138 Par Poori Hadees Bayaan Karke Iske Jamee Turq Ke Upar Guftagu Karte Huwe Likha Ke "Yeh Hadees Apne Majmooyi Turq Ke Saath Bila Shak Wa Shuba "Saheeh" Hai.
Mohtaram Qaari'een ! Jaisa Ke Aapne Padha Jisse Aapko Ma'loom Ho Gaya Hoga Ke Hadees e Sayyadah Aa'yesha Siddeeqa Radiallaahu Anha "Saheeh" Hai Jisse Sha'baanul Mo'azzam Ki 15vee'n Raat Ki Fazeelat Ya'ni Shab e Baraat Ki Fazeelat Saabit Hoti Hai.
Ek Aur Hadees Me'n Hai
Sayyiduna Abu Bakar Siddeeq Radiallaahu Anhu Se Ek Hadees "Musnad e Bazzaar" Me'n Hadees No.80, Imaam Ibne Abi Al Aa'sim Ki Kitaab "Kitaabus Sunna" Iske Safha No.222 Aur 223 Par, "Sho'bul Imaan" Jild No.3 Safha No.381 Par, Sharahus Sunna Imaam Bagvi Ki 993 Number Riwaayat, Aur Imaam Ibne Khuzaima Ki "Kitaabut Tauheed" Hadees No.2000, Aur Yeh Hadees Muta'addid Kutub e Ahaadees Me'n Marwi Hai Ke "Sayyaduna Abu Bakar Siddeeq Radiallaahu Anhu Farmaate Hai'n, Ke Rasoolullaah ﷺ Ne Farmaaya, Sha'baanul Mo'azzam Ki 15vee'n Raat Allaah Rabbul Izzat Aasmaan e Duniya Pe Khaas Tajalli Farmaata Hai Aur Siwaaye Mushrik Aur Keena Parwar Ke Allaah Rabbul Izzat Bando'n Ki Bakhshish Wa Magferat Farma Deta Hai".
Imaam Ibne Khuzaima Ne Apni Kitaab "Kitaabut Tauheed" Me'n Iss Hadees Ko Saheeh Qaraar Diya Hai.
Naasiruddeen Albaani Ne "Kitaabus Sunna" Iski Tehkeem Me'n Iss Hadees Ko Saheeh Qaraar Diya Hai.
Imaam Haysami Ne Maj'mauz Zawaa'id Ki Jild No.8 Safha No.65 Par Yeh Likha, Imaam Bazzar Ne Apni Musnad Me'n Zikr Kiya Hai Aur Abdul Malik Bin Abdul Malik Isme'n Ek Raawi Hai Ibne Abi Haatim Ne Jarah Wa Ta'deel Me'n Iska Zikr Kiya Lekin Isko Za'eef Qaraar Nahee'n Diya, Aur Baaqi Iske Tamaam Raawi Siqa Hai'n Aur Imaam Munziri Ne Apni Kitaab "At Targeeb Wat Tarheeb" Jild No.3 Safha No.307 Pe Isi Hadees Ko Bayaan Karte Huwe Likha Ke "Imaam Bazzar" Ne Apni Musnad Me'n Aur "Imaam Bayhaqi" Ne Isko Riwaayat Kiya Hai, Aur Farmaaya, Isme'n Koi Harj Nahee'n Hai (Ya'ni Yeh Hadees Saheeh Hai).
Shab e Baraat (Ya'ni Sha'baan Ki 15 vee'n Raat) Me'n Buzurgaan e Deen Ke Ma'moolaat :-
Nabi e Kareem ﷺ, Sahaaba e Kiraam Alaihimur Ridwaan Aur Auliya e Izaam Rehmatullaah Alaihim Sha'baanul Mo'azzam Bilkhusoos Iski 15vee'n Raat Me'n Ibaadaat Ka Ahtemaam Farmaaya Karte The.
Sarkaar e Madeena ﷺ Ke Ma'moolaat Ummul Momineen Hazrat Sayyadatuna Aa'yesha Siddeeqa Radiallaahu Anha Farmaati Hai'n, Mai'n Ne Huzoor e Aqdas ﷺ Ko Sha'baanul Mo'azzam Se Zyaadah Kisi Maheene Me'n Rozah Rakhte Na Dekha. (Tirmizi Shareef, Jild No.2, Safha No.182, Hadees No.736) Aap Radiallaahu Anha Mazeed Farmaati Hai'n, Ek Raat Mai'n Ne Huzoor Nabi e Paak ﷺ Ko Na Paaya, Mai'n Aap ﷺ Ki Talaash Me'n Nikli To Aap Mujhe Jannatul Baqee Me'n Mil Gaye, Nabi e Akram ﷺ Ne Farmaaya, Beshak Allaah Paak Sha'baan Ki 15vee'n Raat Aasmaan e Duniya Par Tajalli Farmaata Hai, Pas Qabeela e Bani Kalb Ki Bakriyo'n Ke Baalo'n Se Bhi Zyaadah Logo'n Ko Bakhsh Deta Hai. (Tirmizi Shareef, Jild No.2, Safha No.183, Hadees No.739)
Hakeemul Ummat Mufti Ahmad Yaar Khaan Na'eemi Ashrafi Alaihir Rehma Iss Hadees Ki Sharah Karte Huwe Farmaate Hai'n Ke Ma'loom Huwa Ke Shabe Baraat Me'n Ibaadaat Karna, Qabrastaan Jaana Sunnat Hai. (Mir'aatul Manaajeeh, Jild No.2, Safha No.290)
Buzurgaan e Deen Ke Ma'moolaat :- Buzurgaan e Deen Rahimahullaah Bhi Yeh Raat Ibaadat e Ilaahi Me'n Basar Kiya Karte The Hazrat Sayyaduna Khaalid Bin Ma'daan, Hazrat Sayyaduna Luqmaan Bin Aa'mir Aur Deegar Buzurgaan e Deen Rahimahullaah Sha'baanul Mo'azzam Ki 15vee'n Raat Achchha Libaas Pahente, Khushbu, Surma Lagaate Aur Raat Masjid Me'n (Jama Hokar) Ibaadat Kiya Karte The. (Maaza Fee Sha'baan, Safha No.75)
Ameerul Momineen Hazrat Sayyaduna Umar Bin Abdul Azeez Rehmatullaah Alaih Bhi Shabe Baraat Me'n Ibaadat Me'n Masroof Raha Karte The. (Tafseer Roohul Bayaan, Paarah No.25, Surah Dukhkhaan, Tehtul Aayah 3, Jild No.402, 8)
Ahle Makka Ke Ma'moolaat :-
Teesri Sadi Hijri Ke Buzurg Abu Abdullaah Muhammad Bin Is'haaq Faakihi Alaihir Rehma Farmaate Hai'n, Jab Shabe Baraat Aati To Ahle Makka Ka Aaj Tak Yeh Tareeqa e Kaar Chala Aa Raha Hai Ke Masjid e Haraam Shareef Me'n Aajaate Aur Namaaz Ada Karte Hai'n, Tawaaf Karte Aur Saari Raat Ibaadat Aur Tilaawat e Qur'aan Me'n Mashgool Rehte Hai'n, Inme'n Ba'az Log 100 Rak'at (Nafil Namaaz) Iss Tarah Ada Karte Ke Har Rak'at Me'n Sureh Faateha Ke Ba'ad 10 Martaba Sureh Ikhlaas Padhte, Zam Zam Shareef Peete, Usse Gusl Karte Aur Use Apne Mareezo'n Ke Liye Mehfooz Kar Lete Aur Uss Raat Me'n In Aa'maal Ke Zariye Khoob Barkate'n Samet'te Hai'n. (Akhbaar e Makkah, Juz 3, Jild No.2, 84)
Mohtaram Qaari'een ! In Tamaam Baato'n Ko Padhne Ke Ba'ad Aapko Ma'loom Ho Gaya Hoga Ke Sha'baanul Mo'azzam Ki 15vee'n Raat Ko Ibaadate'n Karna, Du'aa Aur Astagfaar Karna, Zikr Wa Azkaar Karna Bilkul Ayn Qur'aan Wa Sunnat Aur Ma'moolaat e Buzurgaan e Deen Se Saabit Hai.
Agar Koi Bid'ati Wa Gumraah Firqe Waala In Hadeeso'n Ko Za'eef Kahe Tab Bhi Mohaddiseen Ke Usool Ke Mutaabiq Za'eef Hadees Fazaa'il e Aa'maal Me'n Qaabile Qabool Hai Ke Tahet Shabe Baraat Ki Fazeelat Apni Jagah Musallam Hai Aur Iss Raat Me'n Ibaadat Karna Sawaab Ka Kaam Hai.
Bid'ati Wa Gumraah Firqe Waalo'n Ko Hamaara Challenge Hai Ke Tum Koi Mohaddis, Mufassir Aur Imaam Ka Qaul Bataao Jisme'n Unho'n Ne Shabe Baraat Me'n Ibaadat Karne Ko Bid'at Kaha Ho, Agar Nahee'n Bata Paaye To Tum Khud Bid'ati Wa Gumraah Ho.
By Alahazrat Foundation Research Team - 7710809266/9892708816
