(1) Jo Shakhs Kisi Hukm e Elaahi A'zzowajal Ke Baare Me'n Kahe Ke Iss Par Kaun Qaadir Hai Jo Ise Baja Laaye, Aise Shakhs Par Hukm e Kufr Hai.
(2) Allaah A'zzowajal Ke Hukm, Nabi e Kareem ﷺ Ki Sharee'at Ka Mazaaq Udaana Ya Tauheen Karna Kufr Hai. (Bahaare Sharee'at, Hissa 9, Safha 183)
(3) Kisi Ke Saamne Sharee'at Ki Baat Ki, Usne Kaha, Sharee'at Gayi Bhaad Me'n ! Kya Har Waqt Sharee'at Sharee'at Karte Rehte Ho, Aisa Kehne Waala Kaafir Hai.
(4) Kisi Se Kaha Gaya, Tu Kaunse Mazhab Par Hai Shaafayi Ya Hanfi ? Usne Jawaab Diya, Mai'n Dono'n Mazhabo'n Par La'nat Bhejta Hoo'n, Yeh Kalma e Kufr Hai. (Haashiya Tahaavi, Durre Mukhtaar, Jild 2, Safha 689)
(5) Jo Kahe Saari Sharee'at Heelo'n Aur Dhokebaazi Ka Naam Hai Woh Kaafir Hai. (Al-Behrur Raa'iq, Jild 5, Safha 207)
(6) Jis Shakhs Ke Saamne Sharee'at Ka Zikr Kiya Gaya, Usne Na Pasandeedgi Ki Aawaaz Nikaali Ya Iz'haar Kiya Ya Kaha, Yeh To Sharr Hai, Usne Kufr Kiya. (Minhur Rauz, Safha 675)
(7) Agar Kisi Ko Hadees Sunaayi Jaaye To Woh Kahe, Mai'n Ne Kahaaniyaa'n Bahot Suni Hai'n Bas Karo, Aisa Kehne Waale Par Hukm e Kufr Hai.
(8) Jiske Saamne Hadees Padhi Gayi To Usne Kaha, (Aisi Hadeese'n To) Bahot Suni Hai'n, Agar Bataur e Tehqeer Kaha To Kufr Hai. (Fataawa Bazzaariya, Jild 4, Safha 328)
(9) Agar Kisi Ne Hadees e Paak Ya Tafseer Ki Kitaabo'n Ko Tauheen Aur Hiqaarat Ki Niyat Se Phe'nka Ya Phaad Diya To Kaafir Hai.
(10) Sharee'at Ka Masla Sun Kar Kehna, Yeh Fuzool Ghadant Aur Zabardasti Ka Lath Chalaana Hai, Yeh Kalma e Kufr Hai.
(11) Agar Koi Gumaan Kare Ke Musalmaan Islaam Hi Ki Wajah Se Kaafiro'n Se Peechhe Reh Gaye Hai'n, To Aisa Shakhs Kaafir Hai.
(12) Agar Koi Khaalis Deeni Ta'leemaat Ke Baare Me'n Kahe, Musalmaan Taraqqi Usi Waqt Kar Sakte Hai'n Jabke Apni Deeni Boseedah Ta'leemaat Ko Chhod De'n, Aisa Kehne Waala Kaafir Hai.
(13) Hamko Sharee'at Manzoor Nahee'n, Riwaaj Manzoor Hai, Yeh Kalma e Kufr Hai. (Fataawa Razviya, Jild 14, Safha 691)
(14) Sharee'at Ko Farzi Aur Khud Saakhta Kehna Kufr Hai.
(15) Sharee'at Ko Molviyo'n Ki Ghadi Huwi Baate'n Hai'n, Aisa Kehna Kufr Hai.
(16) Iddat Ka Inkaar Karna Kufr Hai, Maslan Yeh Kehna Ke Iddat Ki Kuchh Zaroorat Nahee'n, Aisa Kehna Kufr Hai. (Fataawa Razviya, Jild 12, Safha 653)
(17) Jo Tayammum Karne Waale Par Ha'nse Uspar Hukm e Kufr Hai. (Minhur Rauz, Safha 473)
(18) Mutlaqan Tayammum Ka Inkaar Karna Kufr Hai.
(19) Tayammum Ko Jaahilo'n Ka Fe'l Samajhna Kufr Hai.
(20) Kisi Ne Kaha Ke Mai'n Shara Wara Ko Nahee'n Jaanta Woh Kaafir Hai. (Majma'ul Anhar, Jild 2, Safha 510)
(21) Kisi Ne Kaha Ke Mai'n Sharee'at Ka Kya Karu'n Woh Kaafir Hai. (Majma'ul Anhar, Jild 2, Safha 510)
(22) Agar Koi Yeh Da'wa Kare Ke Mai'n Darjaat Tay Karte Karte Aise Darje Tak Paho'nch Gaya Hoo'n Ke Ab Mai'n Ahkaamaat e Elaahiya Ka Mukallaf (Ya'ni Paaband) Nahee'n Raha, Mere Liye Haraam Wa Halaal, Itaa'at Wa Ma'siyyat Sab Baraabar Hai'n, Aisa Kehne Waala Kaafir Hai.
(23) Sharee'at Sirf Molviyo'n Keliye Hai, Aisa Kehna Kufr Hai.
(24) Agar Koi Buland Jagah Par Baithe Aur Uske Ird Gird Log Ho'n Jo Usse Masaa'il Poochhe'n Aur Ha'nse'n Aur Use Takiye Se Maare'n Ya'ni Sharee'at Ka Mazaaq Udaaye'n To Sab Par Hukm e Kufr Hai. (Minhur Rauz, Safha 471)
(25) Kisi Shakhs Ko Sharee'at Ka Hukm Bataaya Ke Iss Mu'aamle Me'n Yeh Hukm Hai, Usne Kaha, Sharee'at Par Amal Nahee'n Kare'nge, Ham To Rasm Wa Riwaaj Ki Paabandi Kare'nge, Aisa Kehna Ba'az Mashaa'ikh Ke Nazdeek Kufr Hai. (Fataawa Aa'lamgeeri, Jild 2, Safha 270)
Astagfirullaah, La Elaaha Ellallaah Muhammadur Rasoolullaah ﷺ
By Alahazrat Foundation Research Team - 7710809266/9892708816
