Shirk Kehte Hai'n Kisi Ko Allaah A'zzowajal Ki Uloohiyat Me'n Shareek Maanna Ya'ni Jis Tarah Allaah A'zzowajal Ki Zaat Hai Uski Misl Kisi Doosre Ki Zaat Ko Maanna Ya Kisi Doosre Ko Ibaadat Ke Laayeq Samajhna, Mazeed Isko Iss Tarah Samjhe'n Ke Shirk Tauheed Ki Zidd (Opposite) Hai Aur Kisi Shay Ki Haqeeqat Uski Zidd Se Pehchaani Jaati Hai Lehaaza Shirk Ki Haqeeqat Jaanne Keliye Tauheed Ka Maf'hoom Samajhna Zaroori Hai.
Tauheed Ka Ma'ni Hai Allaah A'zzowajal Ki Zaat e Paak Ko Uski Zaat Wa Sifaat Me'n Shareek Se Paak Maanna Ya'ni Jaisa Allaah A'zzowajal Hai Waisa Ham Kisi Ko Na Maane'n, Agar Koi Allaah A'zzowajal Ke Siwa Kisi Doosre Ko "Allaah" Tasawwur Karta Hai To Woh Zaat Me'n Shirk Karta Hai, Isi Tarah Allaah Jaisi Sifaat Kisi Doosre Me'n Maanna Yeh Sifaat Me'n Shirk Hai.
Saahib e Lisaanul Arab Likhte Hai'n, Shirkatun Aur Shareekatun Ka Ma'ni 2 Shareeko'n Ka Ek Cheez Me'n Milna Hai, Jaise Kaha Jaata Hai Ke Ham Shareek Huwe Ya'ni Aapas Me'n Hamaari Sharaakat Huwi Aur 2 Shakhs Baaham Shareek Huwe Ya'ni Dono'n Me'n Sharaakat Hogayi Aur Ek Doosre Ke Saath Shareek Bangaya.(Ibne Manzoor, Lisaanul Arab, 10/448)
Shirk Ka Sharayi Aur Istelaahi Maf'hoom :- Allaama Sa'aduddeen Taftaazaani Rehmatullaah A'laih Likhte Hai'n, Majoos Ki Tarah Kisi Ko Waajibul Wajood Samajh Kar Uloohiyat Me'n Shareek Karna Ya Buto'n Ki Pooja Karne Waalo'n Ki Tarah Kisi Ko Mustahiq e Ibaadat Samajhna, Ishraak Kehlaata Hai. (Taftaazaani, Sharah Aqaa'id e Nasfi, Safha No.61)
*Shirk Ki 3 Qisme'n Hai'n*
1- Shirk Fizzaat :- Isko Sureh Zumar Ki Aayat No.3 Ke Zariye Samajhiye ,
Tarjuma :- Haa'n Khaalis Allaah Hi Ki Bandagi Hai Aur Woh Jinho'n Ne Uske Siwa Aur Waali Bana Liye Kehte Hai'n Ham To Unhe'n Sirf Itni Baat Keliye Poojte Hai'n Ke Yeh Hame'n Allaah Ke Paas Nazdeek Karde'n Allaah Unme'n Faisla Kar Dega Uss Baat Ka Jisme'n Ikhtelaaf Karrahe Hai'n Beshak Allaah Raah Nahee'n Deta Use Jo Jhoota Bada Na Shukra Ho.
Khulaasa :- Shirk Fizzaat Use Kehte Hai'n Ke Koi 1 Se Zyaadah Khuda Maane Ya Kisi Ko Khuda Ke Jaisa Maane Jaise Majoosi 2 Khuda Maante Hai'n Ek Khaaliq e Sharr (Buraayi Paida Karne Wala) Aur Doosra Khaaliq e Khair (Achchhaayi Paida Karne Wala) Aur Mushrikeen To Karodo Khuda Maante Hai'n. Ma'aaz Allaah
2- Shirk Fissifaat :- Isko Sureh An'aam Ki Aayat No.100 Ke Zariye Samajhiye,
Tarjuma :- Aur Allaah Ka Shareek Thehraaya Jinno'n Ko Haalaa'nke Usi Ne Unko Banaaya Aur Uske Liye Bete Aur Betiyaa'n Gadhlee'n Jahaalat Se Paaki Aur Bartari Hai Usko Unki Baato'n Se.
Khulaasa :- Shirk Fissifaat Use Kehte Hai'n Ke Koi Khuda Keliye Beta, Beti Aur Beewi Maane, Jaise Isaa'iyo'n (Christians) Ne Hazrate Isa A'laihissalaam Ko Allaah A'zzowajal Ka Beta Maana Aur Hazrate Mariyam Radiallaahu A'nha Ko Allaah A'zzowajal Ki Beewi Maana. Ma'aaz Allaah
3- Shirk Fil Af'aal :- Isko Sureh Shu'ara Ki Aayat No.92 to 98 Ke Zariye Samajhiye,
Tarjuma :- Aur Unse Kaha Jaayega Kahaa'n Hai'n Woh Jinko Tum Poojte The. Allaah Ke Siwa Kya Woh Tumhaari Madad Kare'nge Ya Badla Le'nge. To Au'ndha Diye Gaye Jahannam Me'n Woh Aur Sab Gumraah. Aur Iblees Ke Lashkar Saare. Kahe'nge Aur Woh Usme'n Baaham Jhagadte Ho'nge. Khuda Ki Qasam Beshak Ham Khuli Gumraahi Me'n The. Jabke Tumhe'n Rabbul Aa'lameen Ke Baraabar Thehraate The.
Khulaasa :- Shirk Fil Af'aal Use Kehte Hai'n Ke Koi Khuda Keliye Madadgaar Maane, Jaise Mushrikeen Ka Aqeedah Tha Ke Baarish Barsaana Aasmaan Ke Khuda Ka Kaam Hai Lekin Zameen Se Darakht, Phal, Phool Ugaana Zameen Ke Khuda Ka Kaam Hai, Jab Tak Sharaakatdaari (Partnership) Baraabar Nahee'n Chalti Tab Tak Na Barish Ho Sakti Hai Na Zameen Se Kuchh Ugaaya Ja Sakta Hai. Ma'aaz Allaah
Shirk Ke Zahir Aur Chhupe Hone Ke Ae'tebaar Se 2 Qisme'n Hai'n, Shirk e Jali Aur Shirk e Khafi :- Shirk e Jali Khwaah Ek Lamhe Keliye Hi Kyu'n Na Ho Bandah Fauran Daayera e Islaam Se Nikal Jaata Hai, Raha Shirk e Khafi To Yeh Gunaah Zaroor Hai Magar Iska Murtakib Musalmaan Hi Rehta Hai Shirk e Khafi Ke Sabab Kaafir Nahee'n Hota, Shirk e Jali Aur Shirk e Khafi Me'n Zameen Wa Aasmaan Ka Faraq Hai, Dono'n Ki Ta'reef Aur Ahkaam Juda Juda Hai'n, Shirk e Khafi Ko Jali Samajhna Saraasar Jahaalat Wa Zulm Aur Fitna Wa Fasaad Ko Janam Dena Hai.
Hazrat Shaykh Abdul Haq Muhaddis e Dehlvi Rehmatullaah A'laih Ek Hadees e Paak Ke Tahet Farmaate Hai'n, Khulaasa Yeh (Hai) Ke Shirk Ki 2 Qisme'n Hai'n Jali Aur Khafi, But Parasti Karna Khullam Khulla Shirk Hai, Riyaakaar Jo Gairullaah Keliye Amal Karta Hai Woh Bhi Poosheedah Taur Par But Parasti Karta Hai Jaisa Ke Kaha Jaata Hai, Har Woh Cheez Jo Tujhe Allaah Paak Se Roke Woh Tera But Hai. (Ash'atul Lam'aat, 4/272)
Shirk e Jali Aur Shirk e Khafi Ko Bittarteeb Shirk e Akbar Aur Shirk e Asgar Bhi Kehte Hai'n, Hamaare Pyaare Nabi ﷺ Ne Farmaaya, Jis Cheez Ka Mujhe Tum Par Zyaadah Khauf Hai Woh Shirk e Asgar Hai, Sahaaba e Kiraam A'laihimur Ridwaan Ne Arz Ki, Ya Rasoolallaah ﷺ ! Shirk e Asgar Kya Hai ? Irshaad Farmaaya, Dikhaawa Karna. (Musnad e Ahmad, 9/160, Hadees No.23692
Ahle Sunnat Ka Koi Bhi Aqeedah Shirkiya Nahee'n Hai :-
Sunni Musalmaan Ambiya Aur Auliya Ko Na To Khuda Maante Hai'n Aur Na Khuda Ke Jaisa Maante Hai'n Aur Na Inko Khuda Ki Aulaad Maante Hai'n Aur Na Hi Khuda Ka Madadgaar Maante Hai'n, Hamaara Aqeedah Yeh Hai Ke Khuda 1 Hai Uske Siwa Koi Ibaadat Ke Laayeq Nahee'n Na Koi Uske Jaisa Hai Na Koi Uska Madadgaar Hai, Balke Ambiya Aur Auliya Ko Jo Bhi Taaqat Aur Ilm Mila Huwa Hai Woh Allaah A'zzowajal Ki Ata Se Hai, Allaah A'zzowajal Ki Taaqat Aur Ilm Zaati Hai Usko Kisi Ne Nahee'n Diya, Magar Ambiya Wa Auliya Wa Makhlooq Ki Taaqat Aur Ilm Ataayi Hai Allaah A'zzowajal Ne Diya Hai, Agar Koi Makhlooq Ki Taaqat Aur Ilm Ko Zaati Maane To Woh Kaafir Wa Mushrik Kehlaayega.
By Alahazrat Foundation Research Team - 7710809266/9892708816
