Iss Mazmoon Me'n Sahaaba e Kiraam Radiallaahu A'nhum Ajma'een Ke Baare Me'n Kya Aqeedah Rakhna Chaahiye, Unki Fazeelato'n Par Qur'aan Wa Hadees Se Dalaa'il Pesh Kiye Jaaye'nge, Neez Aqwaal e Fuqaha Pesh Kiye Jaaye'nge.
Sahaabi Ki Ta'reef Karte Huwe Hazrat Allaama Haafiz Ibne Hajar Asqalaani Rehmatullaah A'laih Farmaate Hai'n, Jin Khush Naseebo'n Ne Imaan Ki Haalat Me'n Huzoor ﷺ Ki Sohbat Ka Sharf Paaya Aur Imaan Hi Par Khaatma Huwa Unhe'n Sahaabi Kehte Hai'n. (Nuzhatun Nazar, Safha No.111)
Ahle Sunnat Wa Jamaa'at Ka Aqeedah Hai Ke Tamaam Sahaaba e Kiraam Radiallaahu A'nhum Ki Ta'zeem Wa Takreem Aur Unse Muhabbat Zaroori Hai Aur Kisi Bhi Sahaabi e Rasool Ki Tauheen Gumraahi Hai, Matlab Tamaam Sahaaba e Kiraam Ka Adab Karna Zarooriyaat e Ahle Sunnat Wa Jamaa'at Se Hai, Ya'ni Agar Koi Shakhs Kisi Bhi Sahaabi e Rasool Ki Tauheen Karta Hai To Woh Ahle Sunnat Wa Jamaa'at Se Khaarij Hai.
Ab Sahaaba e Kiraam Radiallaahu A'nhum Ki Fazeelato'n Par Daleele'n Mulaaheza Farmaaye'n.
1- Sureh Bayyinah Aayat No.8
Tarjuma - Unka Sila Unke Rab Ke Paas Basne Ke Baag Hai'n Jinke Neeche Nehre'n Bahe'n Unme'n Hamesha Hamesha Rahe'n Allaah Unse Raazi Aur Woh Usse Raazi Yeh Uske Liye Hai Jo Apne Rab Se Dare.
Sahaabiyat Ka Azeem Ae'jaaz Kisi Bhi Ibaadat Wa Riyaazat Se Haasil Nahee'n Ho Sakta Lehaaza Agar Hame'n Kisi Makhsoos Sahaabi Radiallaahu A'nhu Ki Fazeelat Ke Baare Me'n Koi Riwaayat Na Bhi Mile Tab Bhi Bila Shak Wa Shubah Woh Sahaabi Mohtaram Wa Mukarram Aur Azmat Wa Fazeelat Ke Buland Martabe Par Faa'iz Hai'n Kyu'nke Kaa'inaat Me'n Martaba Nabuwwat Ke Ba'ad Sabse Afzal Wa Aa'la Maqaam Wa Martaba Sahaabi Hona Hai Aur Sahaaba e Kiraam Ki Fazeelat Keliye Yeh Ek Aayat Hi Kaafi Hai.
2- Sureh Tauba, Aayat No.100
Tarjuma - Aur Sab Me'n Agle Pehle Muhaajir Aur Ansaar Aur Jo Bhalaayi Ke Saath Unke Pairo (Pairwi Karne Waale) Huwe Allaah Unse Raazi Aur Woh Allaah Se Raazi Aur Unke Liye Tayyaar Kar Rakhe Hai'n Baag Jinke Neeche Nehre'n Bahe'n Hamesha Hamesha Unme'n Rahe'n Yehi Badi Kaamiyaabi Hai.
3- Tafseer Behrul Muheet, 5/96).
Tarjuma - Allaama Abu Hayaan Muhammad Bin Hayaan Undulusi Rehmatullaah A'laih Farmaate Hai'n Ke "Bi Ihsaan" Se Muraad Tamaam Sahaaba e Kiraam A'laihimur Ridwaan Hai'n.
4- Mishqaatul Masaabeeh, Jild No.3, Safha No.1695, Hadees No.6012.
Tarjuma - Hazrat Umar Radiallaahu A'nhu Se Marwi Hai, Farmaate Hai'n, Rasoolullaah ﷺ Ne Farmaaya, Mere Sahaaba Ki Izzat Karo Ke Woh Tum Me'n Se Behtareen Log Hai'n.
5- Mishqaatul Masaabeeh, Jild No.3, Safha No.1694, Hadees No.6007.
Tarjuma - Hazrat Abu Sa'eed Khudri Radiallaahu A'nhu Se Riwaayat Hai Ke Rasoole Akram ﷺ Ne Irshaad Farmaaya, Mere Sahaaba Ko Bura Mat Kaho, Kyu'nke Agar Tum Me'n Se Koi Shakhs Ohad Pahaad Ke Baraabar Sona Kharch Kar Daale To Woh Un (Sahaaba e Kiraam) Me'n Se Kisi Ek Ke Mud (Taqreeban Sawa Chhe Saw Giraam) Kharch Karne Ko Paho'nch Sakta Hai Na Uske Nisf Mud Ko.
6- Al-Mo'jamul Kabeer Lit Tabraani, Jild No.2, Safha No.96, Hadees No.1427.
Tarjuma - Hazrat Sobaan Radiallaahu A'nhu Se Marwi Hai, Farmaate Hai'n, Rasoolullaah ﷺ Ne Farmaaya, Jab Mere Sahaaba Ka Zikr Aaye To Baaz Raho (Ya'ni Bura Kehne Se Baaz Raho).
7- Mirqaatul Mafaateeh Sharah Mishqaatul Masaabeeh, Jild No.8, Safha No.3397, Kitaabul Fitan, Tehte Hadees 5401.
Tarjuma - Hazrat Allaama Ali Qaari Rehmatullaah A'laih Farmaate Hai'n, Ya'ni Sahaaba e Kiraam Ko Bura Bhala Kehne Se Baaz Raho Ya'ni Qur'aan e Kareem Me'n Unke Liye Raza e Ilaahi Ka Muzda (Ya'ni Khushkhabri) Bayaan Ho Chuka Hai, Ya'ni Zaroor Unka Anjaam Parhezgaari Aur Raza e Ilaahi Ke Saath Jannat Me'n Hoga, Yeh Woh Huqooq Hai'n Jo Ummat Ke Zimme Baaqi Hai'n, Lehaaza Jab Unka Zikr Karo To Sirf Sirf Bhalaayi Aur Nek Du'aao'n Ke Saath Hi Karo.
8- As-Sunnatul Khilaal, Jild No.2, Safha No.474, Raqam 758.
Tarjuma - Imaam Ahmad Bin Hambal Rehmatullaah A'laih Farmaate Hai'n, Jo Shakhs Rasoolullaah ﷺ Ke Sahaaba Me'n Se Kisi Ek Ki Tanqees Karta Hai Usne Apne Andar Museebat Ko Chhupaaya Huwa Hai Jiske Dil Me'n Buraayi Hai Isi Wajah Se Woh Rasoolullaah ﷺ Ke Sahaaba Par Hamla Karta Hai, Haalaa'nke Woh (Ambiya Ke Ba'ad) Logo'n Me'n Sabse Behtareen Insaan The.
9- As-Sunnatul Khilaal, Jild No.2, Safha No.448, Raqam 692)
Tarjuma - Imaam Ahmad Rehmatullaah A'laih Se Uss Shakhs Ke Baare Me'n Poochha Gaya Jo Hazrat Mu'aaviya Radiallaahu A'nhu Ko Gaali Deta Hai Usko Koi Hukmeraan Ke Paas Le Jaaye, Imaam Ahmad Ne Farmaaya, Laayeq Tareen Yehi Hai Ke Use Saza Di Jaaye.
10- As-Sunnatul Khilaal, Jild No.2, Safha No.448, Raqam 693.
Tarjuma - Isi Tarah Imaam Ahmad Rehmatullaah A'laih Se Ek Shakhs Ne Poochha, Mere Maamu Ke Baare Me'n Zikr Kiya Jaata Hai Ke Woh Hazrat Mu'aaviya Radiallaahu A'nhu Ki Tanqees Karta Hai, Mai'n Kabhi Kabhaar Uske Saath Khaata Hoo'n, To Abu Abdullaah (Imaam Ahmad) Rehmatullaah A'laih Ne Fauran Farmaaya, Uske Saath Mat Khaana.
11 - Taareekh e Dimashq Li Ibne Asaakir, Jild No.59, Safha No.211.
Tarjuma - Ibraaheem Bin Maisarah Rehmatullaah A'laih Ne Farmaaya, Mai'n Ne Umar Bin Abdul Azeez Rehmatullaah A'laih Ko Kisi Ko Itna Maarte Huwe Nahee'n Dekha Jitna Uss Shakhs Ko Maarte The Jo Hazrat Mu'aaviya Radiallaahu A'nhu Ko Bura Kehta Tha, Umar Rahimahullaah Usko Kode Maarte The.
12- At-Taqreeb Wat-Taisar, Safha No.92.
Tarjuma - Imaam Nawwi Likhte Hai'n Ke Sahaaba e Kiraam Radiallaahu A'nhum Ajma'een Tamaam Aa'dil Hai'n Khwaah Jinka Fitno'n Se Paala Pada Ya Jo Un Fitno'n Se Mehfooz Rahe, Aur Ispar Ummat Ke Mo'tabar Logo'n Ka Ijma Hai.
13- Al-Isaaba Fee Tameezis Sahaaba, Jild No.1, Safha No.164)
Tarjuma - Haafiz Ibne Hajar Naqal Karte Hai'n Ke Tamaam Sahaaba e Kiraam Radiallaahu A'nhum Ajma'een Ko Aa'dil Kehne Ki Hi Jumhoor Ulama e Ummat Ne Tasreeh Ki Hai Aur Yehi Mo'tabar Maslak Hai.
14- Fataawa Razviya, Jild No.29, Safha No.58.
Tarjuma - Imaam e Ahle Sunnat Mujaddid e Deen Wa Millat Imaam Ahmad Raza Khaan Barelvi Rehmatullaah A'laih Farmaate Hai'n Ke (Iss Paak Firqa Ahle Sunnat Wa Jamaa'at Ne Apna Aqeedah) Itna Yaqeen Karliya Ke Sab (Sahaaba e Kiraam) Achche Aur Adal Wa Siqah, Taqi, Naqi Abraar (Khaasaan e Parwardigaar) Hai'n, Aur Un (Mushaajeraat Wa Naza'aat Ki) Tafaaseel Par Nazar Gumraah Karne Waali Hai, Nazeer Iski Asmat e Ambiya A'laihimas Salaatu Wassana Hai Ke Ahle Haq (Ahle Islaam, Ahle Sunnat) Shaahraah e Aqeedat Par Chal Kar (Manzil) Maqsood Ko Paho'nche, Aur Arbaab (Gawaayat Waahil) Baatil Tafseelo'n Me'n Khauz (Wa Naahaq Gaur) Karke Mugaak (Zalaalat Aur) Bad Deeni (Gumraahiyo'n) Me'n Ja Pade.
In Sab Aayaat Wa Riwaayaat Par Nazar Karte Huwe Yeh Jazm Wa Yaqeen Haasil Hota Hai Ke Un Hazraat Ki Shaan Bahot Aa'la Wa Arfa Hai, Un Muqaddas Hastiyo'n Par Allaah Paak Ka Behad Fazl Wa Karam Hai, Lehaaza Hame'n Chaahiye Ke Un Paakeezah Nufoos Ki Muhabbat Dil Me'n Basaate Huwe Unke Haalaat Wa Waaqe'aat Ka Gehraayi Ke Saath Mutaale'ah Kare'n Aur Dono'n Jahaa'n Me'n Kaamiyaabi Keliye Unke Naqshe Qadam Par Chalte Huwe Zindagi Basar Karne Ki Koshish Kare'n, Aur Jo Koi Bhi Sahaabi e Rasool Ki Shaan Me'n Adna Si Bhi Gustaakhi Karta Hai Unse Door Ho Jaaye'n.
By Alahazrat Foundation Research Team - 7710809266/9892708816
