(1) Jo Kahe Ke Aye Allaah A'zzowajal ! Mujhe Rizq De Aur Mujh Par Ta'ngdasti Daal Kar Zulm Na Kar, Aisa Kehna Kufr Hai, Kyu'nke Allaah A'zzowajal Zulm Se Paak Hai, Agar Koi Kahe Ke Allaah A'zzowajal Zulm Karta Hai To Woh Bandah Kaafir Ho Jaata Hai.
(2) Ba'az Log Jo Izaala e Qarz (Qarz Se Chhutkaara) Aur Ta'ngdasti Ya Daulat Ki Zyaadati Keliye Kuffaar Ke Yahaa'n Naukri Ki Khaatir Ya Visa Form Par Ya Kisi Tarah Ki Raqam Wagairah Ke Budget Keliye Darkhawaast Par Khud Ko Isaayi Christian, Yahoodi, Qaadiyaani Ya Kisi Bhi Kaafir Ya Murtad Giroh Ka Fard Likhte Ya Likhwaate Hai'n Unpar Bhi Hukm e Kufr Hai, Ya'ni Agar Aapne Apne Aapko Gair Muslim Zaahir Kiya Chaahe Woh Kisi Bhi Wajah Se Aap Zaahir Karrahe Ho'n To Aap Kaafir Ho Jaate Ho, Ek Hi Soorat Hai Isme'n Jo Ulama e Kiraam Bayaan Farmaate Hai'n Ke Aapko Aapki Jaan Ka Khatrah Ho Uss Waqt Agar Koi Majboor Kare Aisa Bolne Par Tab Aap Yeh Keh Sakte Ho Lekin Iske Alaawah Doosri Kisi Bhi Soorat Me'n Nahee'n Keh Sakte.
(3) Kisi Se Maali Madad Ki Darkhawaast Karte Huwe Kehna Ya Likhna Ke Agar Aapne Kaam Na Kiya To Mai'n Qaadiyaani Ya Isaayi Ya Christian Ban Jaau'nga, Aisa Kehne Waala Fauran Kaafir Ho Jaata Hai.
(4) Agar Koi Kahe Ke Mai'n 100 Saal Ke Ba'ad Kaafir Ho Jaau'nga To Woh Abhi Se Kaafir Ho Jaata Hai.
(5) Kisi Ne Mashwarah Diya Ke Kaafir Ho Jaao To Woh Kaafir Bane Ya Na Bane Mashwarah Dene Waale Par Hukm e Kufr Hai.
(6) Kisi Ne Kufriya Jumla Baka Agar Koi Uss Kufriya Jumle Par Raazi Huwa To Uspar Bhi Hukm e Kufr Hai, Kyu'nke Kufr Ko Pasand Karna Ya Kufr Par Raazi Hona Bhi Kufr Hai.
(7) Agar Koi Kahe Ke Waaqayi Allaah A'zzowajal Hota To Gareebo'n Ka Saath Deta, Maqroozo'n Ka Sahaara Hota, To Aisa Kehne Waala Kaafir Ho Jaata Hai, Kyu'nke Ma'aaz Allaah Yahaa'n Par To Allaah A'zzowajal Hi Ka Inkaar Ho Raha Hai.
Astagfirullaah, La Elaaha Ellallaah Muhammadur Rasoolullaah ﷺ
Guzaarish :- Agar Aapko Hamaare Mu'aashre Me'n Log Iss Tareeqe Ke Jumle Kehte Huwe Nazar Aaye'n To Aapko Unki Islaah Karna Hai, Aur Unko Bataana Hai Ke Aise Jumle Kehne Ki Wajah Se Aap Islaam Se Khaarij Hogaye Hai'n, Ab Aapko Tauba Karke Phirse Kalma Padhna Padega Aur Agar Aap Shaadi Shudah Hai'n To Aapko Phirse Nikaah Karna Padega Naye Maher Ke Saath Aur Agar Aap Kisi Peer Se Mureed Hai'n To Phirse Bay'at Karna Padega.
By Alahazrat Foundation Research Team - 7710809266/9892708816
