Sawaal - Zaid Kehta Hai Jo Huwa Aur Hoga Sab Khuda Ke Hukm Se Hi Huwa Aur Hoga, Phir Bande Se Kyu'n Girift Hai Aur Usko Kyu'n Saza Ka Murtakib Thehraaya Gaya ? Usne Kaunsa Kaam Aisa Kiya Jo Mustahiq Azaab Ka Huwa ? Jo Kuchh Uss (Ya'ni Allaah Paak) Ne Taqdeer Me'n Likh Diya Hai Wohi Hota Hai Kyu'nke Qur'aan e Paak Se Saabit Ho Raha Hai Ke Bila Hukm Uske Ek Zarrah Nahee'n Hilta, Phir Bande Ne Kaunsa Apne Ikhtiyaar Se Woh Kaam Kiya Jo Dozakhi Huwa Ya Kaafir Ya Faasiq, Jo Bure Kaam Taqdeer Me'n Likhe Ho'nge To Bure Kaam Karega Aur Bhale Likhe Ho'nge To Bhale, Baher Haal Taqdeer Ka Taabe Hai Phir Kyu'n Usko Mujrim Banaaya Jaata Hai ? Chori Karna, Zina Karna, Qatal Karna Wagairah Wagairah Jo Bande Ki Taqdeer Me'n Likh Diye Hai'n Wohi Karna Hai, Aise Hi Nek Kaam Karna Hai.
Jawaab - Zaid Gumraah Be Deen Hai Use Koi Joota Maare To Kyu'n Naaraaz Hota Hai ? Yeh Bhi To Taqdeer Me'n Likha Tha, Uska Koi Maal Dabaaye To Kyu'n Bigadta Hai ? Yeh Bhi Taqdeer Me'n Likha Tha, Yeh Shaitaani Fe'lo'n Ka Dhoka Hai Ke Jaisa Likh Diya Aisa Hame'n Karna Padta Hai (Haalaa'nke Hargiz Aisa Nahee'n) Balke Jaisa Ham Karne Waale The Uss (Ya'ni Allaah Paak) Ne Apne Ilm Se Jaan Kar Wohi Likha Hai. (Fataawa Razviya, Jild 29, Safha 284-285)
Sadrush Sharee'ah Badrut Tareeqa Hazrat Allaama Maulaana Mufti Muhammad Amjad Ali Aa'zami A'laihir Rehma Farmaate Hai'n, Bura Kaam Karke Taqdeer Ki Taraf Nisbat Karna Aur Mashiyyat e Ilaahi Ke Hawaale Karna Bahot Buri Baat Hai, Balke Hukm Yeh Hai Ke Jo Achcha Kaam Kare Use Minjaanibillaah (Ya'ni Allaah Paak Ki Jaanib Se) Kahe Aur Jo Buraayi Sarzad Ho Usko Shaamat e Nafs Tasawwur Kare. (Bahaare Sharee'at, Jild Awwal, Safha 19)
Sawaal - Taqdeer Ke Baare Me'n Bahes Karna Kaisa ?
Jawaab - Taqdeer Ke Baare Me'n Bahes Karna Mana Hai, Bahaare Sharee'at Jild Awwal, Safha 18 Par Hai, Qaza Wa Qadar (Taqdeer) Ke Masaa'il Aa'm Aqlo'n Me'n Nahee'n Aa Sakte, Unme'n Zyaadah Gaur Wa Fikr Karna Sabab e Halaakat Hai, Hazrat Siddeeq Wa Faarooq Radiallaahu A'nhuma Iss Masle Me'n Bahes Karne Se Mana Farmaaye Gaye, To Ham Aur Aap Kis Ginti Me'n Hai'n, Itna Samajh Lo Ke Allaah Paak Ne Aadmi Ko Misle Pat'thar Aur Deegar Jamaadaat (Ya'ni Be Jaan Cheezo'n) Ke Be Hiss Wa Harkat Paida Nahee'n Kiya, Balke Usko Ek Nau e Ikhtiyaar (Ek Tarah Ka Ikhtiyaar) Diya Hai Ke Ek Kaam Chaahe Kare, Chaahe Na Kare, Aur Iske Saath Aqal Bhi Di Hai Ke Bhale Bure Aur Nafa Wa Nuqsaan Ko Pehchaan Sake, Aur Har Qism Ke Saamaan Aur Asbaab Muhayya Kardiye Hai'n Ke Jab Koi Kaam Karna Chaahta Hai Usi Qism Ke Samaan Muhayya Ho Jaate Hai'n, Aur Isi Bina Par Uspar Mu'aakhazah (Poochh Ghachh) Hai, Apne Aapko Bilkul Majboor Ya Bilkul Mukhtaar (Ba Ikhtiyaar) Samajhna, Dono'n Gumraahi Hai.
Astagfirullaah, La Elaaha Ellallaah Muhammadur Rasoolullaah ﷺ
By Alahazrat Foundation Research Team - 7710809266/9892708816
