Kaseer Ahaadees Se Bhi Taqleed Ka Saboot Hai, Chunaanche Daarmi Baabul Iqtida Bil Ulama Me'n Hai,
Tarjuma - Khabar Di Hamko Ya'la Ne, Unho'n Ne Kaha Ke Mujhse Kaha Abdul Malik Ne, Unho'n Ne Ataa Se Riwaayat Ki Ke Itaa'at Karo Allaah Ki Aur Itaa'at Karo Rasool Ki Aur Apne Me'n Se Amr Waalo'n Ki, Farmaaya Ulil Amr Ilm Aur Fiqh Waale Hazraat Hai'n. (Sunan Daarmi, Baabul Iqtida Bil Ulama, Jild No.1, Safha No.83, Hadees No.219)
Saheeh Muslim Shareef Me'n Hai,
Tarjuma - Hazrat Tameem Daari Radiallaahu Anhu Se Riwaayat Hai, Farmaate Hai'n Ke Rasoolullaah ﷺ Ne Farmaaya, Deen Khair Khwaahi Hai, Hamne Arz Kiya, Kiske Liye (Khair Khwaahi) ? Aap ﷺ Ne Farmaaya Allaah Keliye, Uski Kitaab Keliye, Uske Rasool Keliye, Musalmaano'n Ke Haakimo'n Keliye Aur Aa'm Musalmaano'n Keliye (Khair Khwaahi). (Muslim Shareef, Kitaabul Imaan, Jild No.1, Safha No.74, Hadees No.104)
Iss Hadees Ki Sharah Nawwi Me'n Hai,
Tarjuma - Yeh Hadees Un Imaamo'n Ko Bhi Shaamil Hai Jo Ulama e Deen Me'n Aur Ulama Ki Khair Khwaahi Se Hai, Unki Riwaayat Ki Huwi Ahaadees Ka Qabool Karna Aur Unke Ahkaam Me'n Taqleed Karna Aur Unke Saath Nek Gumaan Karna. (Sharah Nawwi Ala Saheeh Muslim, Jild No.2, Safha No.39)
Imaam Abu Isa Tirmizi (Wisaal 279 Hijri) Riwaayat Karte Hai'n,
Tarjuma - Hazrat Huzaifa Radiallaahu Anhu Bayaan Karte Hai'n Ke Huzoor ﷺ Ne Farmaaya, Tum Mere Ba'ad Hazrat Abu Bakar Siddeeq Radiallaahu Anhu Aur Hazrat Umar Radiallaahu Anhu Ki Pairwi Aur Iqtida Karna. (Tirmizi Shareef, Jild No.5, Safha No.609, Hadees No.3662)
Iss Hadees e Mubaarak Me'n Taqleed e Shakhsi Ka Waazeh Saboot Hai, Isliye Pehle Hazrat Abu Bakar Siddeeq Radiallaahu Anhu Ki Baat Chalti Rahi, Unki Itteba Ki Jaati Rahi, Unke Inteqaal Ke Ba'ad Hazrat Umar Radiallaahu Anhu Ki Khilaafat Me'n Unki Pairwi Ki Gayi.
Tirmizi Shareef Ki Hadees e Paak Me'n Hai,
Tarjuma - Huzoor ﷺ Ne Farmaaya, Jo Shakhs Deen Ke Mu'aamle Me'n Apne Se Buland Martaba Shakhs Ko Dekhe To Uski Iqteda Kare. (Jaame Tirmizi, Jild No.4, Safha No.665, Hadees No.2512)
Sahaaba e Kiraam A'laihimur Ridwaan Bhi Apne Se Aa'la Ki Taqleed Kiya Karte The, Imaam Bukhaari Ke Ustaad e Mohtaram Ibne Abi Shayba Alaihir Rehma Riwaayat Karte Hai'n,
Tarjuma - Hazrat Ubaidullaah Bin Abi Yazeed Farmaate Hai'n Hazrat Ibne Abbaas Radiallaahu Anhuma Se Jab Kisi Masle Ke Baare Me'n Poochha Jaata Hai Woh Uska Jawaab Qur'aan Se Bataate, Agar Qur'aan Me'n Na Milta To Hadees Se Bataate, Agar Hadees Se Na Milta To Jo Abu Bakar Siddeeq Wa Umar Faarooq Radiallaahu Anhuma Ne Farmaaya Hota Wohi Bataate Aur Agar Unse Bhi Kuchh Manqool Na Hota To Apni Raaye Se Kehte. (Musannaf Ibne Abi Shayba, Jild No.7, Safha No.242, Hadees No.24494)
Sahaaba e Kiraam Alaihimur Ridwaan Me'n Bhi Taqleed e Shakhsi Ka Tasawwur Maujood Tha, Har Koi Apne Shaher Ke Fiqhi Sahaabi Ki Taqleed Karte The,
Bukhaari Shareef Ki Hadees e Paak Me'n Hai,
Tarjuma - Hazrat Ikrima Radiallaahu Anhu Se Riwaayat Hai Ba'az Ahle Madeena Ne Hazrat Ibne Abbaas Radiallaahu Anhuma Se Uss Aurat Ke Baare Me'n Sawaal Kiya Jo Tawaaf e Farz Ke Ba'ad Haa'iza Hogayi Ho (Ke Woh Tawaaf e Wada Keliye Paak Hone Tak Intezaar Kare Ya Tawaaf e Wada Usse Saaqit Ho Jaayega Aur Bagair Tawaaf Ke Waapas Aana Jaa'iz Hoga) Ibne Abbaas Radiallaahu Anhuma Ne Farmaaya Ke Woh (Tawaaf e Wada Ke Bagair) Ja Sakti Hai, Ahle Madeena Ne Kaha Ke Ham Aapke Qaul Par Hazrat Zaid Bin Saabit Radiallaahu Anhu Ke Qaul Ko Nahee'n Chhode'nge. (Saheeh Bukhaari, Kitaabul Hajj, Jild No.2, Safha No.625, Hadees No.1671)
Shaah Waliullaah Jinko Wahaabi Bhi Apna Peshwa Maante Hai'n Woh Likhte Hai'n,
Tarjuma - Agar Koi Jaahil Shakhs Hindustaan Ya Maawara Un Nahar (Hindustaan Ke Baahar) Ke Ilaaqe Me'n Ho Aur Wahaa'n Koi Shaafayi, Maaliki Ya Hambali Aa'lim Maujood Na Ho Aur Na In Mazaahib Ki Koi Kitaab Dastiyaab Ho To Uspar Sirf Imaam Abu Haneefa Alaihir Rehma Ki Taqleed Waajib Hogi Aur Unke Maz'hab Ko Chhodna Uske Liye Haraam Hoga, Kyu'nke Iss Soorat Me'n Woh Shakhs Sharee'at Ki Paabandiyaa'n Apne Gale Se Utaar Kar Bilkul Aazaad Aur Mohmal Ho Jaayega. (Al Insaaf Fi Bayaani Asbaabil Ikhtilaaf, Safha,78)
Taqleed Ke Saboot Par Aur Bhi Kaseer Dalaa'il Hai'n Aur Bade Bade A'imma e Kiraam Jinko Wahaabi Bhi Apna Peshwa Maante Hai'n Woh Muqallid The Aur Un Hastiyo'n Se Taqleed Ke Laazim Hone Ki Saraahat Maujood Hai, Wahaabiyo'n Ko Challenge Hai Ke Chaaro'n A'imma Me'n Se Kisi Ek Ki Taqleed Ke Na Jaa'iz Hone Par Kisi Qur'aan Wa Hadees To Kya Kisi Mustanad Aa'lim Ka Qaul Pesh Karde'n.
By Alahazrat Foundation Research Team - 7710809266/9892708816
