Gair Muqallidiyat Ek Aisa Fitna Hai Jisne Beshtar Maqaamaat Par Logo'n Ko Aazmaa'ish Aur Pareshaani Me'n Mubtala Kar Rakha Hai, Iss Jamaa'at Ke Log Jahaa'n Kahee'n Jaate Hai'n Wahaa'n Ki Achchhi Khaasi Pursukoon Fiza Me'n Ha'ngaama Aur Shorish Barpa Kar Dete Hai'n, Ikhtelaafi Masaa'il Ko Hawa Dekar Maahol Ko Garam Karna Iss Jamaa'at Ke Bahot Se Afraad Ka Khaas Mashgala Hai, Hindustaan Me'n (1245 Hijri) Me'n Yeh Naya Firqa Zaahir Huwa Jiske Baani "Abdul Haq Banaarasi" The, Yeh Log Taqleed Ko Shirk Kehte Aur Mazaahib e Arba'ah Ko Mushrik Firqa Kehte Aur Apne Aapko Naaji Giroh Kehte, Shuru Daur Me'n Agarche Bahot Se Mujtahideen e Ummat Guzre Hai'n Lekin Un Sabki Alag Alag Ba Qaa'idah Iss Andaaz Me'n Fiqhi Tadween Nahee'n Ho Saki Ke Unki Taqleed Karne Waala Doosro'n Se Be Niyaaz Ho Jaaye, Yeh Fakhr Wa Imtiyaaz Allaah Paak Ne Hazraat e A'imma e Arba'ah, Imaam e Aa'zam Abu Haneefa A'laihir Rehma, Imaam Maalik A'laihir Rehma, Imaam Shaafayi A'laihir Rehma Aur Imaam Ahmad Bin Hambal A'laihir Rehma Ko Ata Farmaaya Hai, Ke Inme'n Se Har Ek Ke Maz'hab Ki Juz'iyyaat Aur Usool Iss Andaaz Me'n Mudawwan Huwe Ke Jo Shakhs Deen Ke Jis Masle Me'n Rehnumaayi Chaahe Usko Har Maz'hab Me'n Rehnumaayi Mil Sakti Hai, Lekin Yeh Zaalim Gair Muqallideen Un Imaamo'n Ko Taagoot Kehte Hai'n Aur Muqallideen Ko Mushrik Kehte Hai'n, Yeh Log Khud Bhi Gumraah Hai'n Aur Doosro'n Ko Bhi Gumraah Karne Ki Koshish Karrahe Hai'n, Isliye Taqreeban Tamaam Mohaddiseen Wa Fuqaha e Kiraam Muqallideen Hai'n Aur In Gumraaho'n Ke Fatwe Se Yeh Tamaam Kaafir Huwe.
Shaah Waliullaah Mohaddis e Dehlavi (Wisaal 1176 Hijri) Likhte Hai'n Ke Yeh Chaaro'n Mazaahib Jo Mudawwan Wa Murattab Hai'n Inki Taqleed Par Aaj Tak Ummat Ke Mo'tabar Afraad Ka Ittefaaq Chala Aaraha Hai Aur Isme'n Jo Maslehat Hai Woh Makhfi Nahee'n, Khaas Kar Iss Zamaane Me'n Jabke Logo'n Ki Himmate'n Kotaah Hogayi Hai'n Aur Khwaahish e Nafs Logo'n Ke Quloob Me'n Ja Guzee'n Ho Chuki Hai Aur Apni Raaye Ko Hi Achchha Samajhne Ka Daur Daurah Hai. (Hujjatullaahil Baaligah, Jild No.1, Safha No.154)
Kya Taqleed Waajib Hai :- Taqleed Waajib Hai Jab Khud Aqal Na Ho, Qur'aan Wa Hadees Ko Samajhne Ki Salaahiyat Na Ho, Saath Hi Itni Baseerat Na Ho Ke Kisi Gair Mansoos Masla (Jo Qur'aan Wa Hadees Me'n Na Mil Sake) Ke Matlab Ko Saheeh Taur Par Samjha Ja Sake, Yeh Kaam Fuqaha Ka Hai Ke Unho'n Ne Ahaadees e Tayyaba Se Woh Masaa'il Nikaale Jo Hamaari Soch Me'n Kabhi Nahee'n Sama Sakte The, Isliye Har Insaan Jo Gair Mujtahid Ho Uspar Taqleed Waajib Hai, Iski Aa'm Si Misaal Di Jaati Hai Ke Jo Khud Doctor Na Ho Woh Kisi Achchhe Aur Jaane Maane Doctor Se Hi Dawa Lega Kisi La Ilm Se Hargiz Nahee'n, Aur Isi Tarah Na Hi Uss Doctor Ke Diye Gaye Nuskhe Ko Jaakar Ilm e Tib Ki Kutub Me'n Tasdeek Karega Aur Phir Khaayega, Balke Woh Isi Bharose Par Dawa Ko Iste'maal Karega Ke Uss Doctor (Jo Sab Mareezo'n Aur Tajruba Kaaro'n Ke Mutaabiq Achchha Aur Mustanad Maana Huwa Hai) Ne Use Saheeh Dawa Tajweez Ki Hai, Aur Insha Allaah Shifa Yaab Bhi Ho Jaayega, Yehi Wajah Hai Ke Use Taqleed Karna Uss Doctor Ki Waajib Hai, Ham Bhi Beemaar Hai'n Aur Jaante Hai'n Ke Jab Tak Koi Bada Tabeeb Ilaaj Keliye Mayassar Na Aaye Hamaare Marz Ka Ilaaj Mumkin Nahee'n, Isliye Faqeeh Imaam Ki Taqleed Zaroori Hoti Hai.
Muqallid Apne Aapko Muqallid Kehta Hai Isliye Nahee'n Ke Woh Qur'aan Wa Hadees Ke Khilaaf Hai Balke Woh Aise Shakhs Ka Muqallid Hai Jo Qur'aan Wa Hadees Ko Hazaaro'n Laakho'n Nahee'n Balke Carodo'n Logo'n Se Zyaadah Samajhta Hai Aur Jo Woh Samjhaata Hai Muqallid Uski Baat Ko Maan Leta Hai, Lekin Yeh Kahaa'n Hai Ke Muqallid Hadees Ko Nahee'n Balke Imaam Ko Maanta Hai ? Yeh Aisi Hi Baat Hai Ke Mai'n Science Ke Teacher Ki Baat Sunu To Mujh Par Ta'an Ho Ke Tum Science Ki Text Book Ko Chhod Kar Teacher Ki Baat Ko Maante Ho, Aur Yeh Galat Hai, Magar Mai'n Kya Karoo'n Ke Mujhe Iss Text Book Ki Samajh Nahee'n Aati Magar Teacher Usi Text Book Me'n Se Woh Kuchh Samjha Deta Hai Jo Mere Wahem Wa Gumaan Tak Me'n Na Tha, To Teacher Ki Taqleed Waajib Hai Mujh Par.
Taqleed Ke Ma'ni Aur Uske Aqsaam :-
Taqleed Ke 2 Ma'ni Hai'n, Ek Lugvi Aur Doosra Sharayi, Lugvi Ma'ni Hai'n "Qalaadah Dar Gardan Bastan" Gale Me'n Haar Ya Patta Daalna, Taqleed Ke Sharayi Ma'ni Yeh Hai'n Ke Kisi Ke Qaul Wa Fe'l Ko Apne Upar Laazim e Sharayi Jaanna Yeh Samajh Kar Ke Uska Kalaam Aur Uska Kaam Hamaare Liye Hujjat Hai, Kyu'nke Yeh Sharayi Mohaqqiq Hai, Jaisa Ke Ham (Hanafi) Masaa'il e Shar'iyya Me'n Imaam e Aa'zam Abu Haneefa A'laihir Rehma Ka Qaul Wa Fe'l Apne Liye Daleel Samajhte Hai'n Aur Dalaa'il e Shar'iyya Me'n Nazar Nahee'n Karte.
Haashiya Hussaami Safha No.86 Par Sharah Mukhtasar ul Manaar Se Naqal Kiya Aur Yeh Ibaarat Noorul Anwaar Bahes e Taqleed Me'n Bhi Hai,
Tarjuma - Taqleed Ke Ma'ni Hai Kisi Shakhs Ka Apne Gair Ki Itaa'at Karna, Isme'n Jo Usko Kehte Huwe Ya Karte Huwe Sunle'n Yeh Samajh Kar Ke Woh Ahle Tehqeeq Me'n Se Hai Bagair Daleel Me'n Nazar Kiye Huwe. (Hussaami Sharah Naami, Safha No 190)
Taqleed 2 Tarah Ki Hai, Taqleed e Sharayi Aur Taqleed e Gair Sharayi, Taqleed e Sharayi To Sharee'at Ke Ahkaam Me'n Kisi Ki Pairwi Karne Ko Kehte Hai'n, Jaise Roze, Namaaz, Hajj, Zakaat Wagairah Ke Masaa'il Me'n A'imma e Deen Ki Itaa'at Ki Jaati Hai, Aur Taqleed e Gair Sharayi Duniyaawi Baato'n Me'n Kisi Ki Pairwi Karna Hai, Jaise Tabeeb Log Ilm e Tib Me'n Boo Ali Seena Ki Aur Shaa'er Log Daag Ameer Ya Mirza Gaalib Ki Ya Nahwi Wa Sarfi Log Seeboya Aur Khaleel Ki Pairwi Karte Hai'n, Isi Tarah Har Pesha Me'n Uss Fann Ke Maahireen Ki Pairwi Karte Hai'n, Yeh Taqleed Duniyaawi Hai.
Soofiya e Kiraam Jo Wazaa'if Wa Aa'maal Me'n Apne Mashaa'ikh Ke Qaul Wa Fe'l Ki Pairwi Karte Hai'n Woh Taqleed Deeni To Hai Magar Taqleed e Sharayi Nahee'n Balke Taqleed Fit Tareeqat Hai Isliye Ke Yeh Sharayi Masaa'il Haraam Wa Halaal Me'n Taqleed Nahee'n Haa'n Jis Cheez Me'n Taqleed Hai Woh Deeni Kaam Hai, Taqleed e Gair Sharayi Agar Sharee'at Ke Khilaaf Hai To Haraam Hai Agar Khilaaf e Islaam Na Ho To Jaa'iz Hai.
Kin Masaa'il Me'n Taqleed Ki Jaati Hai Aur Kin Me'n Nahee'n :- Taqleed e Sharayi Me'n Kuchh Tafseel Hai, Sharayi Masaa'il 3 Tarah Ke Hai'n, (1) Aqaa'id (2) Woh Ahkaam Jo Saraahatan Qur'aan e Paak Ya Hadees Shareef Se Saabit Ho Ijtehaad Ko Unme'n Dakhal Na Ho (3) Woh Ahkaam Jo Qur'aan Wa Hadees Se Istembaat Wa Ijtehaad Karke Nikaale Jaaye'n.
Aqaa'id Me'n Kisi Ki Taqleed Jaa'iz Nahee'n :-
Tafseer Roohul Bayaan, Sureh Hood Ki Aayat No.109 Ke Tahet Saahib e Tafseerul Bayaan Farmaate Hai'n Ke Agar Koi Hamse Poochhe Ke Tauheed Wa Risaalat Wagairah Tumne Kaise Maani To Yeh Na Kaha Jaayega Ke Hazrat Imaam Abu Haneefa A'laihir Rehma Ke Farmaane Se Ya Ke Fiqh e Akbar Se Balke Dalaa'il e Tauheed Wa Risaalat Se Kyu'nke Aqaa'id Me'n Taqleed Nahee'n Hoti. (Tafseer Roohul Bayaan, 4/250)
Muqadma Shaami Bahes e Taqleed Me'n Hai Ke Jinka Ham Ae'teqaad Rakhte Hai'n Furuyi Masaa'il Ke Alaawah Inka Ae'teqaad Rakhna Har Mukallaf Par Bagair Kisi Ki Taqleed Ke Waajib Hai, Woh Aqaa'id Wohi Hai Jinpar Ahle Sunnat Wa Jamaa'at Hai Aur Ahle Sunnat Ashaa'irah Aur Maatureediya Hai'n. (Raddul Muhtaar Ala Durrul Muhtaar, 1/36)
Sareeh Ahkaam Me'n Bhi Kisi Ki Taqleed Jaa'iz Nahee'n Jaise 5 Namaaze'n, Namaaz Ki Rak'ate'n, 30 Roze Me'n Khaana Peena Haraam Hona, Yeh Woh Masaa'il Hai'n Jinka Saboot Nas (Qur'aan Wa Hadees) Se Saraahatan Hai Isliye Yeh Na Kaha Jaayega Ke Namaaz 5 Isliye Hai'n Ya Roze 1 Maah Ke Isliye Hai'n Ke Fiqhe Akbar Me'n Likha Hai Ya Imaam e Aa'zam Abu Haneefa A'laihir Rehma Ne Farmaaya Balke Iske Liye Qur'aan Wa Hadees Se Dalaa'il Diye Jaaye'nge.
Jo Masaa'il Qur'aan Wa Hadees Ya Ijma e Ummat Se Ijtehaad Wa Istembaat Karke Nikaale Jaaye'nge Unme'n Gair Mujtahid Par Taqleed Karna Waajib Hoga.
Taqleed Karna Kis Par Waajib Hai Aur Kis Par Nahee'n :-
Mukallaf Musalmaan 2 Tarah Ke Hai'n, Ek Mujtahid Doosre Gair Mujtahid, Mujtahid Woh Hai Jisme'n Iss Qadar Ilmi Liyaaqat Wa Qaabliyat Ho Ke Qur'aani Ishaaraat Wa Rumooz Samajh Sake Aur Kalaam Ke Maqsood Ko Pehchaan Sake Usse Masaa'il Nikaal Sake, Naasikh Wa Mansookh Ka Poora Ilm Rakhta Ho, Ilm e Sarf Wa Nahw Wa Balaagat Wagairah Me'n Usko Poori Mahaarat Haasil Ho, Ahkaam Ki Tamaam Aayato'n Aur Ahaadees Par Uski Nazar Ho, Iske Alaawah Zaki Aur Khush Fahem Ho, Jo Iss Darje Par Na Paho'ncha Ho Woh Gair Mujtahid Ya Muqallid Hai, Gair Mujtahid Par Taqleed Zaroori Hai Mujtahid Keliye Taqleed Mana Hai, Mujtahid Ke 6 Tabqe Hai'n.
(1) Mujtahid Fish Sharah
(2) Mujtahid Fil Maz'hab
(3) Mujtahid Fil Masaa'il
(4) As'haabul Takhreej
(5) As'haabul Tarjeeh
(6) As'haabul Tameez
Jin Me'n In 6 Wasfo'n Me'n Se Kuchh Bhi Na Ho Woh Muqallid Mahez Hai, Jaise Ham Aur Hamaare Zamaane Ke Aa'm Ulama Ke Unka Sirf Yehi Kaam Hai Ke Kitaab Se Masaa'il Dekh Kar Logo'n Ko Bata De, Ba'az Gair Muqallid Kehte Hai'n Ke Ham Me'n Ijtehaad Karne Ki Quwwat Hai Lehaaza Ham Kisi Ki Taqleed Nahee'n Karte, Iske Liye Bahot Taweel Guftagu Ki Zaroorat Nahee'n Sirf Yeh Dikhaana Chaahta Hoo'n Ke Ijtehaad Keliye Kis Qadar Ilm Ki Zaroorat Hai Aur Un Hazraat Ko Woh Quwwat e Ilmi Haasil Hai Ya Nahee'n, Hazrat Imaam Raazi, Imaam Gazaali Wagairah Imaam Tirmizi Wa Imaam Abu Daawood Wagairah Huzoor Gause Paak, Huzoor Ba Yazeed Bustaami, Shaah Bahaa'ul Haq Naqshbandi, Islaam Me'n Aise Paaye Ke Ulama Wa Mashaa'ikh Guzre Hai'n Ke Inpar Ahle Islaam Jis Qadar Bhi Fakhar Kare'n Kam Hai, Magar In Hazraat Me'n Se Koi Saaheb Bhi Mujtahid Na Huwe Balke Sab Muqallid Hi Huwe Khwaah Imaam Abu Haneefa Ke Ya Imaam Shaafayi Ke Ya Imaam Maalik Ke Ya Imaam Ahmad Bin Hambal Radiallaahu Anhum Ajma'een Ke, Zamaana e Maujoodah Me'n Kaun Inki Qaabiliyat Ka Hai ? Jab Inka Ilm Mujtahid Banne Keliye Kaafi Na Huwa To Jin Bechaaro'n Ko Abhi Hadees Ki Kitaabo'n Ke Naam Lena Bhi Na Aate Ho'n Woh Kis Shumaar Me'n Hai'n.
By Alahazrat Foundation Research Team - 7710809266/9892708816
