Taqleed Waajib Hona Qur'aani Aayaat Aur Ahaadees e Saheeha Aur Amal e Ummat Aur Aqwaal e Mufassireen Se Saabit Hai, Taqleed Mutlaqan Bhi Taqleed e Mujtahideen Bhi Har Ek Taqleed Ka Saboot Hai.
1- Sureh Faateha, Aayat No.5
Tarjuma - Hamko Seedha Raasta Chala Unka Raasta Jin Par Tu Ne Ahsaan Kiya.
Iss Aayat Se Ma'loom Huwa Ke Siraat e Mustaqeem Wohi Hai Jis Par Allaah Ke Nek Bande Chale Ho'n Aur Tamaam Mufassireen, Mohaddiseen, Fuqaha, Auliya Allaah, Gaus, Qutub Wa Abdaal Allaah Ke Nek Bande Hai'n Woh Sab Hi Muqallid Guzre Hai'n Lehaaza Taqleed Hi Seedha Raasta Huwa, Koi Mohaddis Wa Mufassir Wa Wali Gair Muqallid Na Guzra, Gair Muqallid Woh Hai Jo Mujtahid Na Ho, Phir Taqleed Na Kare, Jo Mujtahid Ho Kar Taqleed Na Kare Woh Gair Muqallid Nahee'n Kyu'nke Mujtahid Ko Taqleed Karna Mana Hai.
2- Sureh Baqarah, Aayat No.286
Tarjuma - Allaah Kisi Jaan Par Bojh Nahee'n Daalta Magar Uski Taaqat Bhar.
Iss Aayat Se Ma'loom Huwa Ke Taaqat Se Zyaadah Kaam Ki Allaah Paak Kisi Ko Takleef Nahee'n Deta, To Jo Shakhs Ijtehaad Na Kar Sake Aur Qur'aan Se Masaa'il Na Nikaal Sake Usse Taqleed Na Karaana Aur Usse Istembaat Karaana Taaqat Se Zyaadah Bojh Daalna Hai, Jab Gareeb Aadmi Par Zakaat Aur Hajj Farz Nahee'n To Be Ilm Par Masaa'il Ka Istembaat Karaana Kyu'nkar Zaroori Hoga.
3- Sureh Nisa, Aayat No.59
Tarjuma - Aye Imaan Waalo ! Itaa'at Karo Allaah Ki Aur Itaa'at Karo Rasool Ki Aur Hukm Waalo'n Ki Jo Tum Me'n Se Ho'n.
Ulil Amr Kaun Hai'n :- Hazrat Ibne Abbaas Radiallaahu Anhuma, Hazrat Jaabir Bin Abdullaah Radiallaahu Anhu, Hazrat Imaam Mujaahid Alaihir Rehma, Imaam Ataa Ibne Abi Rawaah Alaihir Rehma, Imaam Hasan Basri Alaihir Rehma, Imaam Ataa Ibne Saa'ib Alaihir Rehma, Imaam Abul Aa'liya Al-Basri Alaihir Rehma, Imaam Qataadah Bin Da'aama Alaihir Rehma, Imaam Dahaaq Bin Mazaahim Alaihir Rehma, Imaam Ahmad Bin Hambal Alaihir Rehma, Imaam Ibne Abi Laila Alaihir Rehma Aur Inke Alaawah Bahot Se Mufassireen Se Manqool Hai Ke "Ulil Amr" Se Muraad Fuqaha Wa Ulama Hai'n.
Imaam Muhammad Bin Abdullaah Abu Abdullaah Haakim Neshaapoori (Wisaal 405 Hijri) Riwaayat Karte Hai'n, Hazrat Jaabir Bin Abdullaah Radiallaahu Anhu Bayaan Karte Hai'n Ke Allaah Paak Ka Farmaan, "Aye Imaan Waalo ! Itaa'at Karo Allaah Ki Aur Itaa'at Karo Rasool Ki Aur Hukm Waalo'n Ki Jo Tum Me'n Se Ho'n" Se Muraad "Fuqaha" Hai'n. (Al-Mustadrak, Hadees No.422)
Isi Tarah Ibne Abbaas Radiallaahu Anhuma Farmaate Hai'n, "Ulil Amr" Se Muraad Fuqaha Hai'n Allaah Ne Unki Itaa'at Waajib Ki Hai. (Al-Mustadrak, Hadees No.423)
4 - Sureh Nahal, Aayat No.43
Tarjuma - To Aye Logo Ilm Waalo'n Se Poochho Agar Tumko Ilm Nahee'n.
Iss Aayat Se Ma'loom Huwa Ke Jo Shakhs Jis Masle Ko Na Jaanta Ho Woh Ahle Ilm Se Dariyaaft Kare, Woh Ijtehaadi Masaa'il Jinke Nikaalne Ki Ham Me'n Taaqat Na Ho Mujtahideen Se Dariyaaft Kare, Ba'az Log Kehte Hai'n Ke Isse Muraad Taareekhi Waaqe'aat Hai'n Jaisa Ke Upar Ki Aayat Se Saabit Hai Lekin Yeh Saheeh Nahee'n Isliye Ke Iss Aayat Ke Kalimaat Mutlaq Bagair Qaid Ke Hai'n Aur Poochhne Ki Wajah Hai Na Jaanna To Jis Cheez Ko Ham Na Jaante Ho'n Uska Poochhna Laazim Hai.
Allaama Abu Abdullaah Muhammad Bin Maaliki Qurtubi (Wisaal 668 Hijri) Iss Aayat Ke Tahet Likhte Hai'n.
Tarjuma - Yeh Aayat Iss Par Dalaalat Karti Hai Ke Ulama Se Poochhna Waajib Hai Aur Unke Fatwe Par Amal Karna Laazim Hai. (Al-Jaame'ul Ahkaamul Qur'aan, Jild No.5, Safha No.260)
Imaam Ibne Abdul Barr Maaliki (Wisaal 463 Hijri) Iss Aayat Ke Tahet Farmaate Hai'n.
Tarjuma - Ulama Ka Ittefaaq Ho Chuka Hai Ke Awaam Par Ulama Ki Taqleed Waajib Hai Aur Yeh Ke Iss Aayat e Kareema Se Ulama Hi Muraad Hai'n. (Jaame Bayaanul Ilm Wa Fazlihi, Jild No.2, Safha No.140,)
5- Sureh Asra, Aayat No.71
Tarjuma - Jis Din Har Jamaa'at Ko Ham Uske Imaam Ke Saath Bulaaye'nge.
Iss Aayat Ki Tafseer Me'n Tafseer Roohul Bayaan Me'n Iss Tarah Hai.
Tarjuma - Ya Imaam Deeni Peshwa Hai, Pas Qayaamat Me'n Kaha Jaawega Ke Aye Hanafi Aye Shaafayi. (Tafseer Roohul Bayaan, Jild No.5, Safha No.221)
Isse Ma'loom Huwa Ke Qayaamat Ke Din Har Insaan Ko Uske Imaam Ke Saath Bulaaya Jaayega, Yoo'n Kaha Jaayega, Aye Hanfiyo'n ! Aye Shaafa'iyo'n ! Aye Maalikiyo'n ! Aye Hambaliyo'n ! Chalo ! To Jisne Imaam Hi Na Pakda Usko Kiske Saath Bulaaya Jaayega Iske Baare Me'n Soofiya e Kiraam Farmaate Hai'n Ke Jiska Koi Imaam Nahee'n Uska Imaam Shaitaan Hai.
6- Sureh Baqarah, Aayat No.13
Tarjuma - Ya'ni Jab Unse Kaha Jaata Hai Ke Aisa Imaan Laao Jaisa Ke Mukhlis Momin Imaan Laaye To Kehte Hai'n Ke Kya Ham Aisa Imaan Laaye'n Jaise Yeh Bewakoof Imaan Laaye'n.
Iss Aayat Se Ma'loom Huwa Ke Imaan Bhi Wohi Mo'tabar Hai Jo Saaliheen Ka Sa Ho To Mazhab Bhi Wohi Theek Hai Jo Nek Bando'n Ki Tarah Ho Aur Woh Taqleed Hai.
By Alahazrat Foundation Research Team - 7710809266/9892708816
