Ma'moolaat e Shar'iyya Se Qate Nazar Karte Huwe Jab Ham Roz Marrah Ke Haalaat Aur Apne Tarz e Zindagi Par Nazar Karte Hai'n To Saaf Nazar Aata Hai Ke Ham Apni Zindagi Ke Har Lamha Taqleed Ke Bandhano'n Me'n Jakde Huwe Hai'n, Isme'n Awaam Wa Khawaas, Shehri, Dehaati Har Tabqe Ke Log Masaawi Hissedaar Hai'n, Aap Gaur Kare'n Ke Bachcha Hosh Sambhaalte Hi Apne Maa'n Baap Apne Murabbi Ki Taqleed Ke Sahaare Parwaan Chadhta Hai, Ek Beemaar Apne Mu'aalij (Ilaaj Karne Waale) Ki Taqleed Karke Hi Shifa Yaab Hota Hai, Ek Qaanooni Ladaayi Ladne Waala Kisi Qaanoon Daa'n Wakeel Ki Taqleed Karke Hi Apna Haq Paata Hai, Raasta Na Jaanne Waala Kisi Raasta Bataane Waale Ki Taqleed Karke Manzile Maqsood Tak Paho'nchta Hai, Ek Taalib e Ilm Apne Mu'allim Ki Taqleed Hi Se Saahib e Ilm Wa Fazl Banta Hai, San'at Wa Hirfat Se Aa'ri Kisi Maahir e Fann Ustaad Ki Taqleed Karke Hi San'at Kaar Hota Hai, Yeh Woh Roz Marrah Ki Baate'n Hai'n Ke Inse Na To Inkaar Ki Koi Gunzaa'ish Hai Aur Na Bahes Ki Aur Yehi Taqleed Hai. (Maqaalaat e Shaareh Bukhaari, 1/253)
Gair Muqallid Jo Muqallid Se Sabse Zyaadah Sawaal Karte Hai'n Woh Yeh Hai Ke Chaaro'n A'imma Me'n Se Kisi Ek Ki Taqleed Kyu'n Waajib Hai Jab Chaaro'n Haq Par Hai'n To Chaaro'n Ki Taqleed Ki Ijaazat Honi Chaahiye Jab Chaahe'n Jis Imaam Ki Taqleed Kare'n ?
Jawaab - Bila Shubah Chaaro'n Imaam (Imaam Abu Haneefa, Imaam Maalik, Imaam Shaafayi, Aur Imaam Ahmad Bin Hambal Radiallaahu Anhum Ajma'een) Haq Par Hai'n Lekin Inme'n Se Kisi Ek Imaam Ki Pairwi Isliye Zaroori Hai Ke Agar Aisa Na Ho To Har Shakhs Apne Nafs Ki Pairwi Karega Aur Jab Dil Chaahega Jis Imaam Ka Masla Aasaan Aur Nafs Ki Khwaahish Ke Mutaabiq Use Mehsoos Hoga Uspar Amal Karlega Aur Yeh Sharee'at e Mutahhara Ka Mazaaq Udaana Hai Kyu'nke Bahot Se Masaa'il Aise Hai'n Ke Ba'az A'imma Ke Nazdeek Halaal Aur Wohi Masaa'il Ba'az A'imma Ke Nazdeek Haraam Hai'n Aur Yeh Nafs Ka Pairokaar Subah Ko Ek Imaam Ki Pairwi Karte Huwe Ek Masle Ko Haraam Samajh Kar Isliye Amal Na Karega Ke Isme'n Uske Nafs Ka Mafaad Nahee'n Aur jab Shaam Ko Balke Usi Lamhe Usme'n Apna Mafaad Nazar Aayega To Doosre Imaam Ka Maz'hab Ikhtiyaar Karte Huwe Usi Masle Ko Apne Liye Halaal Karlega Aur Iss Tarah Faqat Khwaahish e Nafs Ki Buniyaad Par Ahkaam e Sharee'ah Ko Khel Bana Kar Paamaal Karta Phirega Isliye Insaan Ko Khwaahish e Nafs Par Amal Karne Ke Bajaaye Deen Wa Sharee'at Par Amal Karne Keliye Kisi Ek Mujtahid Imaam Ka Muqallid Hona Zaroori Hai Warna Woh Falaah Wa Hidaayat Kabhi Na Pa Sakega.
Isko Ek Duniyaawi Misaal Se Yoo'n Samjhe'n Ke Agar Kisi Manzil Par Paho'nchne Ke Mukhtalif Raaste Ho'n To Manzil Par Wohi Shakhs Paho'nchega Jo Unme'n Se Kisi Ek Ko Ikhtiyaar Kare Aur Jo Kabhi Ek Raaste Par Chale, Kabhi Doosre Raaste Par, Phir Teesre Par Phir Chauthe Par To Aisa Shakhs Raasta Hi Naapte Reh Jaayega Kabhi Manzil Tak Nahee'n Paho'nch Sakega, Yehi Haal Uss Shakhs Ka Hoga Jo Kisi Ek Imaam Ki Taqleed Ka Daaman Na Thaam Le Balke Kisi Masle Me'n Kabhi Kisi Imaam Ki Pairwi Kare Aur Kabhi Doosre Ki, Phir Teesre Ki, Phir Chauthe Ki To Woh Manzil e Aakherat Jo Ke Jannat Hai Uss Tak Nahee'n Paho'nch Sakega Balke Khwaahish e Nafs Ki Khaatir Raasta Naapta Hi Reh Jaayega Aur Raah e Manzil Se Gum Ho Kar Gumraahi Wa Andhere Me'n Ja Padega.
Doosra Sawaal Jo Gair Muqallid Baar Baar Karte Hai'n Woh Yeh Ke Agar Taqleed Zaroori Hai To Sahaaba e Kiraam Radiallaahu Anhum Ke Zamaane Me'n Taqleed Kyu'n Nahee'n Huwi ?
Jawaab - Sahaaba e Kiraam Radiallaahu Anhum Huzoor ﷺ Ki Zaahiri Zindagi Me'n Darpesh Masaa'il Se Muta'alliq Nabi e Kareem ﷺ Se Uska Hukm Poochh Liya Karte The Aur Basa Auqaat Jab Aap ﷺ Se Sawaal Karna Mumkin Na Hota To Sahaaba e Kiraam Radiallaahu Anhum Ijtehaad Karke Hukm e Shara Par Amal Farmaate The.
Mufti Ahmad Yaar Khaan Na'eemi Ashrafi Alaihir Rehma Irshaad Farmaate Hai'n, Sahaaba e Kiraam Ko Kisi Ki Taqleed Ki Zaroorat Na Thi Woh To Huzoor ﷺ Ki Sohbat Ki Barkat Se Tamaam Musalmaano'n Ke Imaam Aur Peshwa Hai'n Ke A'imma e Deen Imaam e Aa'zam Abu Haneefa Wa Shaafayi Wagairah Radiallaahu Anhum Unki Pairwi Karte The.
Mishqaat Baabe Fazaa'il Me'n Hai Ke Sahaabi Sitaaro'n Ki Maanind Hai'n Tum Jinki Pairwi Karoge Hidaayat Pa Loge. (Mishqaat Shareef, Kitaabul Manaaqib, 2/414, Hadees No.4018)
Mishqaat Shareef Me'n Hai Ke Tum Laazim Pakdo Meri Aur Mere Khulafa e Raashideen Ki Sunnat. (Mishqaat Shareef, Kitaabul Imaan, 1/53, Hadees No.145)
Yeh Sawaal To Aisa Hai Jaise Koi Kahe Ham Kisi Ke Ummati Nahee'n Kyu'nke Hamaare Nabi ﷺ Kisi Ke Ummati Na The To Ummati Na Hona Sunnat e Rasool Hai, Usse Yehi Kaha Jaayega Ke Huzoor ﷺ To Khud Nabi Hai'n Sab Aapki Ummat Hai'n Woh Kiske Ummati Hote Hamko Ummati Hona Zaroori Hai, Aise Hi Sahaaba e Kiraam Radiallaahu Anhum Tamaam Ke Imaam Hai'n Unka Kaun Musalmaan Imaam Hota, Naher Se Paani Uss Khet Ko Diya Jaawega Jo Dariya Se Door Ho, Mukabbireen Ki Aawaaz Par Wohi Namaaz Padega Jo Imaam Se Door Ho, Labe Dariya Ke Kheto'n Ko Naher Ki Zaroorat Nahee'n, Safe Awwal Ke Muqtadiyo'n Ko Mukabbireen Ki Zaroorat Nahee'n, Sahaaba e Kiraam Radiallaahu Anhum Saf e Awwal Ke Muqtadi Hai'n Woh Bila Waasta Seena e Paak e Mustafa ﷺ Se Faiz Lene Waale Hai'n, Ham Choo'nke Uss Naher Se Door Hai'n Lehaaza Kisi Naher Ke Haajatmand Hai'n, Phir Samandar Se Hazaarha Dariya Jaari Hote Hai'n Jin Sab Me'n Paani To Samandar Hi Ka Hai Magar Un Sabke Naam Aur Raaste Juda Hai'n Koi Ganga Kehlaata Hai Koi Jamuna, Aise Hi Huzoor ﷺ Aabe Rehmat Ke Samandar Hai'n Uss Seene Se Jo Naher Imaam Abu Haneefa Radiallaahu Anhu Ke Seene Se Hoti Huwi Aayi Use Hanfi Kaha Gaya, Jo Imaam Maalik Radiallaahu Anhu Ke Seene Se Aayi Woh Maz'hab e Maaliki Kehlaaya, Paani Sabka Ek Hai Magar Naam Judaagaana Aur Un Nehro'n Ki Hame'n Zaroorat Padi Na Ke Sahaaba e Kiraam Radiallaahu Anhum Ko, Jaise Hadees Ki Isnaad Hamaare Liye Hai Sahaaba e Kiraam Radiallaahu Anhum Keliye Nahee'n. (Ja Al-Haq, Hissa Awwal, Safha No.31)
Chaaro'n A'imma Ke Alaawah Kisi Aur Imaam Ki Taqleed Ab Kyu'n Nahee'n Ho Sakti ?
Jawaab - Chaaro'n A'imma Me'n Se Kisi Ek Imaam Ka Muqallid Hona Zaroori Hai Kyu'nke Ab Haq Unhee'n Me'n Munhasir Hai Kyu'nke In A'imma e Arba'ah Ke Aqwaal Hi Saheeh Isnaad Ke Saath Marwi Hai'n Aur Sirf Unke Mazaahib Hi Saheeh Wa Durust Hai'n Jabke Salaf Me'n A'imma e Arba'ah Ke Alaawah Deegar Mujtahideen Ke Aqwaal Na To Isnaad e Saheeh Ke Saath Marwi Hai Na Kutub e Mash'hoorah Me'n Jam'iyyat Ke Saath Mudawwan Hai'n Ke Unpar Ae'temaad Saheeh Ho Aur Na Hi Unke Mazaahib Saheeh Wa Durust Hai'n Isi Wajah Se Sirf A'imma e Arba'ah Hi Ke Mazaahib Laa'iq e Ae'temaad Wa Qaabil e Amal Hai.
Jaisa Ke Allaama Sayyad Ahmad Misri Tahtaawi Alaihir Rehma Likhte Hai'n,
Tarjuma - Ahle Sunnat Ka Giroh e Naaji Ab Chaar Mazhab Me'n Mujtame (Jama) Hai Woh Hanfi, Maaliki, Shaafayi Aur Hambali Hai'n, In Sab Par Allaah Paak Ki Rehmat Ho, Aajke Daur Me'n Jo In Chaar Mazaahib Se Khaarij Ho Bidati Aur Jahannami Hai. (Haashiya Tahtaawi Ala Durrul Mukhtaar,Kitaabuzzabayih,4/153)
By Alahazrat Foundation Research Team - 7710809266/9892708816
