Allaah Paak Ne Insaan Ko Paida Kiya Aur Uske Saath Kayi Saari Cheezo'n Ka Ta'alluq Joda, Beemaari Bhi Unhee'n Me'n Se Ek Hai, Insaan Jab Beemaar Hota Hai To Beemaari Se Shifa Haasil Karne Keliye Mukhtalif Tareeqo'n Ko Apnaata Hai, Un Tareeqo'n Me'n Se Ek Tareeqa Qur'aan Wa Sunnat Ke Mutaabiq Ta'weezaat Wagairah Bhi Hai'n.
Yaad Rahe Ta'weez Ke Baare Me'n Ahle Sunnat Wa Jamaa'at Ka Aqeedah Aur Nazariya Yeh Hai Ke Ta'weez Na To Zarooriyaat e Deen Ka Masla Hai Na Hi Zarooriyaat e Ahle Sunnat Wa Jamaa'at Ka Masla Hai Balke Qur'aan e Muqaddas Ki Aayaat Aur Ahaadees Me'n Waarid Du'aa'on Par Mushtamil Ta'weez Gale Me'n Daalna Jaa'iz Wa Durust Amal Hai.
Mumaane'at (Ya'ni Man'a Kiya Gaya) Sirf Un Ta'weezaat Ke Muta'alliq Hai Jo Shirkiya Kalimaat Par Mushtamil Ho, Chunaanche Imaam e Ahle Sunnat Imaam Ahmad Raza Khaan Qaadri Barelvi Alaihir Rehma "Fataawa Razviya" Me'n Likhte Hai'n Ke "Ta'weez Mom Jaama Wagairah Karke Gilaaf Judaagaana Me'n Rakh Kar Bachcho'n Ke Gale Me'n Daalna Jaa'iz Hai". (Fataawa Razviya, 24/31)
Mazeed Ta'weezaat Pahenne Ke Ta'alluq Se Imaam e Ahle Sunnat Aa'la Hazrat Alaihir Rehma Fataawa Razviya Shareef Me'n Farmaate Hai'n, Jiska Khulaasa Yeh Hai Ke Ta'weez Pahenna Yeh Jaa'iz Hai Agar Ta'weezaat Ke Zariye Faa'idah Paho'nchaana Maqsood Ho Aur Agar Uske Bar Khilaaf Ho Ya'ni Kisi Ko Sataana Ho, Kisi Ko Takleef Paho'nchaana Ho To Phir Yeh Durust Nahee'n Hai. (Fataawa Razviya, 31/34)
Aur Sadrush Sharee'ah Allaama Mufti Amjad Ali Aa'zami Alaihir Rehma "Bahaare Sharee'at" Me'n Likhte Hai'n Ke "Gale Me'n Ta'weez Latkaana Jaa'iz Hai Jabke Woh Ta'weez Jaa'iz Ho Aayaat e Qur'aani Ya Asma e Ilaahiya Ya Ad'iya (Ya'ni Du'aa'on Se) Ta'weez Kiya Jaaye Aur Ba'az Hadeeso'n Me'n Jo Mumaane'at Aayi Hai Usse Muraad Woh Ta'weezaat Hai'n Jo Na Jaa'iz Alfaaz Par Mushtamil Ho Jo Zamaana e Jaahiliyat Me'n Kiye Jaate The, Isi Tarah Ta'weezaat Aur Aayaat Wa Ahaadees Ko Rikaabi Me'n Likh Kar Mareez Ko Ba Niyat e Shifa Pilaana Bhi Jaa'iz Hai, Junub (Ya'ni Jispar Gusl Farz Ho) Aur Haa'iza Wa Nof'asa (Ya'ni Haiz Wa Nifaas Waali Aurat) Bhi Ta'weezaat Ko Gale Me'n Pahen Sakti Hai, Baazu Par Baa'ndh Sakti Hai Jabke Gilaaf Me'n Ho". (Bahaare Sharee'at, Safha No.421 Se 422 Tak)
Zamaana e Jaahiliyat Me'n Jab Kisi Ko Koi Nazar Lag Jaati To Ahle Arab Uspar Kuchh Padh Kar Dam Karte Jaisa Ke Hazrat Auf Bin Maalik Ashjayi Radiallaahu Anhu Farmaate Hai'n, Ham Daure Jaahiliyat Me'n Dam Kiya Karte The To Hamne Arz Ki Ya Rasoolallaah ﷺ Iss Baare Me'n Aapki Kya Raaye Hai ? Irshaad Farmaaya, Apne Dam Mujhe Sunaao, Unme'n Koi Harj Nahee'n Jab Tak Ke Unme'n Shirk Na Ho. (Saheeh Muslim, Kitaabus Salaam, Hadees No.5732)
Hamaare Mu'aashre Me'n Jahaa'n Logo'n Ki Ek Badi Te'daad Iss Amal Se Fawaa'id Haasil Karti Hai'n Magar Afsos Hai Gair Muqallideen Naam Nihaad Ahle Hadees Par Ke Yeh Log Ta'weez Likhne Aur Gale Me'n Latkaane Ko Mutlaqan Shirk Kehte Hai'n, Agarche Yeh Ta'weez Qur'aan e Muqaddas Ki Aayaat Aur Asma e Baari Ta'aala Se Ho, Neez Sahaabi e Rasool Hazrat Abdullaah Bin Amro Radiallaahu Anhu Ko Bhi Mujrim Qaraar Dete Hai'n Aur Ta'weez Likhne Aur Gale Me'n Latkaane Ko Shirk Qaraar Dete Huwe Apne Mauqif Ki Taa'eed Me'n Aisi Hadeese'n Pesh Karte Hai'n Jiska Ta'alluq Shirkiya Kalimaat Par Mushtamil Ta'weez Ke Na Jaa'iz Hone Se Hai Aur Hadees Ka Khud Saakhta Maf'hoom Bayaan Karke Ummat e Muslima Ko Gumraah Karna Iss Jamaa'at Ka Buniyaadi Maqsad Hai.
Aa'iye Qur'aan Wa Sunnat Ki Roshni Me'n Iski Sharayi Haysiyat Jaante Hai'n, Ta'weezaat Me'n Umooman Qur'aan e Paak Ki Aayaat Aur Allaah Paak Ke Asma Likhe Hote Hai'n Aur Unko Padh Kar Dam Kiya Jaata Hai, Lehaaza Ta'weezaat Se Istefaadah Karne Waala Qur'aan Se Shifa Talab Karne Waala Hai Aur Yaqeenan Qur'aan e Kareem Me'n Shifa Hai Chunaanche Allaah Paak Ka Irshaad Hai,
Tarjuma :- Aur Ham Qur'aan Me'n Utaarte Hai'n Woh Cheez Jo Imaan Waalo'n Keliye Shifa Aur Rehmat Hai. (Paarah 15, Sureh Bani Israa'eel, Aayat No.82)
Yehi Mazmoon Ahaadees Me'n Bhi Maujood Hai Chunaanche Hazrat Maula Ali Radiallaahu Anhu Se Riwaayat Hai Ke Rasoolullaah ﷺ Ne Farmaaya, Qur'aan Behtareen Dawa Hai. (Ibne Maaja Shareef, Hadees No.3533)
Hazrat Amro Bin Sho'aib Woh Apne Waalid Se Aur Unke Waalid Unke Daada Se Riwaayat Karte Hai'n Ke Rasoole Akram ﷺ Ne Irshaad Farmaaya, Jab Tum Me'n Se Koi Neend Me'n Darr Jaaye To Yeh Kalimaat Kahe,
Tarjuma - Allaah Paak Ke Mukammal Wa Tamaam Kalimaat Ke Zariye Uske Azaab Aur Uske Bando'n Ke Sharr Aur Shaitaani Waswaso'n Aur Shaitaano'n Ki Haazri Se Panaah Chaahta Hoo'n.
To Phir Uss Shakhs Ko Koi Nuqsaan Nahee'n Paho'nchega, Hazrat Abdullaah Bin Amro Apni Baalig Aulaad Ko Yeh Kalimaat Sikha Dete Aur Na Baalig Aulaad Ke Gale Me'n Iss Du'aa Ko Likh Kar (Ta'weez Ki Shakal Me'n) Daal Dete The. (Abu Daawood Shareef, 4/21, Hadees No.3893)
Mohtaram Qaari'een ! Jaisa Ke Aapne Daleele'n Mulaaheza Farmaayee'n Ke Dam Aur Ta'weezaat Agar Qur'aan Wa Sunnat Ke Mutaabiq Ho'n To Unse Ilaaj Karna Na Sirf Jaa'iz Balke Aslaaf Se Saabit Hai Aur Yehi Ahle Sunnat Wa Jamaa'at Ka Nazariya Hai.
Gunyatut Taalibeen, Safha No.130 Me'n Sarkaar Gause Aa'zam Shykh Abdul Qaadir Jeelaani Rehmatullaah Alaih Likhte Hai'n.
Bukhar Ka Ta'weez :- Neeche Di Huwi Du'aa Likh Kar Aur Ta'weez Banaakar Bukhaar Waale Ki Gardan Me'n Daal Do, Imaam Ahmad Bin Hamble Rehmatullaah Alaih Farmaate Hai'n Ke Mujhe Bukhaar Huwa To Yeh Du'aa Likh Kar Di Gayi,
Tarjuma - Allaah Ke Naam Se Jo Bada Maherbaan Nihaayat Rahem Karne Waala Hai, Allaah Ke Naam Ki Barkat Se, Mohammad Allaah Ke Rasool Hai'n, Aye Aag Ibraaheem Par Thandi Aur Salaamati Waali Hoja, Unho'n Ne Ibraaheem Ke Saath Tadbeer Ki Lekin Hamne Unhe'n Nuqsaan Uthaane Waala Bana Diya, Aye Jibra'eel, Meekaa'eel Aur Israafeel Ke Rab, Apni Qudrat e Kaamila Se Iss Saahibe Ta'weez Ko Shifa Bakhsh, Tu Hi Sabse Badh Kar Rahem Karne Waala Hai.
Fathul Baari Sharah Saheh Bukhaari, Jild No.10, Safha No.196 Me'n Imaam Ibne Hajar Askalaani Rehmatullaah Alaih Likhte Hai'n,
Tarjuma - "Tamaa'im Tameemah Ki Jama Hai, Isse Muraad Woh Daane Aur Maale Hai'n Jo Gale Me'n Latkaaye Jaate Hai'n, Ahle Arab Zamaana e Jaahiliyat Me'n Aqeedah Rakhte The Ke Yeh Tameemah Aafaat Ko Dafa Karte Hai'n.
Imaam Ibne Hajar Askalaani Rehmatullaah Alaih Ki Iss Wazaahat Se Yeh Saaf Hogaya Ke Jo Hadees Me'n "Tameemah Ko Shirk Kaha Gaya Hai" Woh Qur'aani Ya Du'aa'iyah Ta'weez Nahi Balke Mushriko'n Ke Daane Aur Maale Wagaira Hai'n.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Dam Aur Ta'weez Ka Masla Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57).
By Alahazrat Foundation Research Team - 7710809288/9892708816
