Woh Umoor (Hukm) Jo Un Aayaat e Mo'awwala (Jinki Ulama Ne Taaweel Ki Ho) Se Saabit Ho'n Jinke Muraadi Ma'ni Me'n Ahle Sunnat Muttafiq Ho'n Ya Ahaadees e Mash'hoorah Se Saabit Ho'n Unka Munkir Kisi Ke Nazdeek Bhi Kaafir Nahee'n Hota, Balke Musalmaan Hi Rehta Hai, Lekin Ahle Sunnat Se Nikal Kar Gumraah Aur Badmazhab Ho Jaata Hai, Aur Jab Woh Sunni Nahee'n Rehta To Maslake Aa'la Hazrat Ke Daayere Se Bhi Khaarij Ho Jaata Hai, Kyu'nke Maslake Aa'la Hazrat Aajke Daur Me'n Sunniyat Hi Ki Doosri Ta'beer Hai, Aur Sunniyat Zarooriyaat e Deen Ke Saath Zarooriyaat e Ahle Sunnat Ko Tasleem Karne (Maanne) Ka Naam Hai, To Maslake Aa'la Hazrat Bhi Zarooriyaat e Deen Ke Saath Zarooriyaat e Ahle Sunnat Ko Maanne Ka Naam Hai.
Zarooriyaat e Ahle Sunnat Ki Kuchh Misaale'n
(1) Allaah A'zzowajal Ki Sifaat Ka Makhlooq Aur Haadis (Khatam) Na Hona.
(2) Insaan Ka Bilkul Majboor Ya Bilkul Mukhtaar Na Hona.
(3) Huzoor Nabi e Kareem ﷺ Keliye Shafaa'at Bil Wajaahat, Shafaa'at Bil Muhabbat, Shafaa'at Bil Izn Har Qism Ki Shafaa'at Ka Saabit Hona.
(4) Allaah A'zzowajal Ka Huzoor Nabi e Kareem ﷺ Ko 5 Gaibo'n Me'n Se Bahot Se Juz'iyyaat Ka Ilm Dena.
(5) Auliya e Kiraam Ko Bhi Bawaasta Ambiya e Kiraam Kuchh Ilm e Gaib Ka Milna.
(6) Maut Ka Ma'ni Rooh Ka Jism Se Juda Hona Na Ke Rooh Ka Fana Ho Jaana.
(7) Azaab Aur Tan'eem e Qabr (Nek Logo'n Ko Qabr Me'n Jo In'aam Milega) Ka Barhaq Hona.
(8) Imaamo'n Ka Ambiya e Kiraam Ki Tarah Ma'soom Na Hona.
(9) Hazrat Abu Bakar Siddeeq Aur Hazrat Umar Radiallaahu A'nhuma Ka Hazrat Ali Radiallaahu A'nhu Se Afzal Hona.
(10) Hazrat Ali Radiallaahu A'nhu Aur Hazrat Usmaan Radiallaahu A'nhu Se Muhabbat Hona.
(11) Kisi Bhi Sahaabi Ke Saath Sooye Aqeedat (Bure Aqeede) Ka Na Hona.
(12) Hazrat Imaam e Hasan Wa Hazrat Imaam e Husain Radiallaahu A'nhuma Ka Shaheed Hona.
(13) Sharee'at Aur Tareeqat Ka Ek Hona.
(14) Karaamat e Auliya Ka Barhaq Hona.
(15) Hanfi, Shaafayi, Maaliki, Hambali In Chaaro'n Mazhab Se Baahar Na Hona.
(16) Mohsin (Shaadi Shuda) Zaani Ka Rajam (Pat'thar Maarna) Kiya Jaana.
(17) Mozo'n Par Masah Jaa'iz Hona.
Yeh Aur Iss Tarah Ke Doosre Woh Umoor Jo Ahle Sunnat Wa Jamaa'at Ke Nazdeek Muttafaq A'laih Ho'n Zarooriyaat e Ahle Sunnat Hai'n Inka Munkir Gumraah Musalmaan Hai Kaafir Nahee'n.
By Alahazrat Foundation Research Team - 7710809266/9892708816
