Abu Dawood Shareef

حضرت ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں:جس نے کتا پالا جو جانوروں کی حفاظت،شکار کرنے،کھیت کی حفاظت کے لیے نہ ہو تو اس کے اجر میں روزانہ ایک قیراط کم ہوتا ہے۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي اتِّخَاذِ الْكَلْبِ لِلصَّيْدِ وَغَيْرِهِ؛شکار یا کسی اور کام کے لیے کتا رکھنے کا بیان؛جلد٣،ص١٠٨؛حدیث نمبر؛٢٨٤٤)

حضرت عبداللہ بن مغفل رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا ہے: اگر کتے مخلوق کی ایک مخصوص قسم نہ ہوتے،تو میں انہیں قتل کرنے کا حکم دے دیتا البتہ تم ان میں سے سیاہ کتے کو مار دیا کرو۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي اتِّخَاذِ الْكَلْبِ لِلصَّيْدِ وَغَيْرِهِ؛شکار یا کسی اور کام کے لیے کتا رکھنے کا بیان؛جلد٣،ص١٠٨؛حدیث نمبر؛٢٨٤٥)

حضرت جابر رضی اللہ عنہ بیان کرتے ہیں:(پہلے ایسا ہوا)نبی اکرم صلی اللہ علیہ وسلم نے کتے کو مار دینے کا حکم دیا یہاں تک کہ کوئی عورت دیہات سے آتی اور اس کے ساتھ کوئی کتا ہوتا تو اسے بھی مار دیا کرتے تھے،پھر نبی اکرم صلی اللہ علیہ وسلم نے ہمیں انہیں مارنے سے منع کر دیا،آپ صلی اللہ علیہ وسلم نے فرمایا:کالے کتے کو مارنا تم پر لازم ہے۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي اتِّخَاذِ الْكَلْبِ لِلصَّيْدِ وَغَيْرِهِ؛شکار یا کسی اور کام کے لیے کتا رکھنے کا بیان؛جلد٣،ص١٠٨؛حدیث نمبر؛٢٨٤٦)

حضرت عدی بن حاتم رضی اللہ عنہ کہتے ہیں کہ میں نے نبی اکرم صلی اللہ علیہ وسلم سے پوچھا کہ میں تربیت یافتہ کتے کو شکار پر چھوڑتا ہوں تو وہ میرے لیے شکار پکڑ کر لاتا ہے تو کیا میں اسے کھاؤں؟ آپ صلی اللہ علیہ وسلم نے فرمایا: ”جب تم اپنے تربیت یافتہ کتوں کو چھوڑو، اور اللہ کا نام اس پر لو تو ان کا شکار جس کو وہ تمہارے لیے روکے رکھیں کھاؤ“۔ حضرت عدی بن حاتم رضی اللہ عنہ کہتے ہیں: میں نے عرض کیا: اگرچہ وہ شکار کو قتل کر ڈالیں؟ آپ صلی اللہ علیہ وسلم نے فرمایا: ”ہاں اگرچہ وہ قتل کر ڈالیں جب تک دوسرا غیر شکاری کتا اس کے قتل میں شریک نہ ہو“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي الصَّيْدِ؛شکار کرنے کا بیان؛جلد٣،ص١٠٨؛حدیث نمبر؛٢٨٤٧)

حضرت عدی بن حاتم رضی اللہ عنہ کہتے ہیں کہ میں نے نبی اکرم صلی اللہ علیہ وسلم سے دریافت کیا: میں اپنے تربیت یافتہ کتوں کو چھوڑتا ہوں اور وہ میرے لیے کسی شکار کو روک لیتے ہیں تو میں اسے کھا لیا کروں؟تو آپ صلی اللہ علیہ وسلم نے مجھ سے فرمایا: ”جب تم اپنے سکھاے ہوئے کتوں کو اللہ کا نام لے کر شکار پر چھوڑو تو وہ جو شکار تمہارے لیے پکڑ کر رکھیں انہیں کھاؤ گرچہ وہ انہیں مار ڈالیں سوائے ان کے جنہیں کتا کھا لے، اگر کتا اس میں سے کھا لے تو پھر نہ کھاؤ کیونکہ مجھے اندیشہ ہے کہ اس نے اسے اپنے لیے پکڑا ہو“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي الصَّيْدِ؛شکار کرنے کا بیان؛جلد٣،ص١٠٩؛حدیث نمبر؛٢٨٤٨)

حضرت عدی بن حاتم رضی اللہ عنہ کہتے ہیں کہ نبی اکرم صلی اللہ علیہ وسلم نے فرمایا: ”جب تم بسم اللہ کہہ کر تیر چلاؤ، پھر اس شکار کو دوسرے روز پاؤ (یعنی شکار تیر کی چوٹ کھا کر نکل گیا پھر دوسرے روز ملا) اور وہ تمہیں پانی میں نہ ملا ہو، اور نہ تمہارے تیر کے زخم کے سوا اور کوئی نشان ہو تو اسے کھاؤ، اور جب تمہارے کتے کے ساتھ دوسرا کتا بھی شامل ہو گیا ہو (یعنی دونوں نے مل کر شکار مارا ہو) تو پھر اس کو مت کھاؤ، کیونکہ تمہیں معلوم نہیں کہ اس جانور کو کس نے قتل کیا ہے؟ ہو سکتا ہے کہ دوسرے کتے نے اسے قتل کیا ہو“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي الصَّيْدِ؛شکار کرنے کا بیان؛جلد٣،ص١٠٩؛حدیث نمبر؛٢٨٤٩)

حضرت عدی بن حاتم رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں جب تمہارا شکار پانی میں گر کر ڈوب کر مر جائے تو تم اسے نہ کھاؤ۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي الصَّيْدِ؛شکار کرنے کا بیان؛جلد٣،ص١٠٩؛حدیث نمبر؛٢٨٥٠)

حضرت عدی بن حاتم رضی اللہ عنہ کہتے ہیں کہ نبی اکرم صلی اللہ علیہ وسلم نے فرمایا: ”جس کتے یا باز کو تم سکھاے ہوے ہو اور اسے اللہ کا نام لے کر یعنی (بسم اللہ کہہ کر) شکار کے لیے چھوڑو تو جس شکار کو اس نے تمہارے لیے روک رکھا ہو اسے کھاؤ“۔ حضرت عدی رضی اللہ عنہ کہتے ہیں: میں نے عرض کیا: اگرچہ اس نے مار ڈالا ہو؟ آپ نے فرمایا: ”جب اس نے مار ڈالا ہو اور اس میں سے کچھ کھایا نہ ہو تو سمجھ لو کہ اس نے شکار کو تمہارے لیے روک رکھا ہے“۔ امام ابوداؤد کہتے ہیں: باز جب کھا لے تو اس کے کھانے میں کوئی حرج نہیں اور کتا جب کھا لے تو وہ مکروہ ہے اگر خون پی لے تو کوئی حرج نہیں۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي الصَّيْدِ؛شکار کرنے کا بیان؛جلد٣،ص١٠٩؛حدیث نمبر؛٢٨٥١)

حضرت ابوثعلبہ خشنی رضی اللہ عنہ کہتے ہیں کہ رسول اللہ صلی اللہ علیہ وسلم نے شکاری کتے کے سلسلہ میں فرمایا: ”جب تم اپنے (شکاری) کتے کو چھوڑو، اور اللہ کا نام لے کر (یعنی بسم اللہ کہہ) کر چھوڑو تو (اس کا شکار) کھاؤ اگرچہ وہ اس میں سے کھا لے اور اپنے ہاتھ سے کیا ہوا شکار کھاؤ“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي الصَّيْدِ؛شکار کرنے کا بیان؛جلد٣،ص١٠٩؛حدیث نمبر؛٢٨٥٢)

حضرت عدی بن حاتم رضی اللہ عنہ کہتے ہیں کہ میں نے کہا: اللہ کے رسول! ہم میں سے کوئی اپنے شکار کو تیر مارتا ہے پھر اسے دو دو تین تین دن تک تلاش کرتا پھرتا ہے، پھر اسے مرا ہوا پاتا ہے، اور اس کا تیر اس میں پیوست ہوتا ہے تو کیا وہ اسے کھائے؟ آپ صلی اللہ علیہ وسلم نے فرمایا: ”ہاں اگر چاہے“ یا فرمایا: ”کھا سکتا ہے اگر چاہے“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي الصَّيْدِ؛شکار کرنے کا بیان؛جلد٣،ص١٠٩؛حدیث نمبر؛٢٨٥٣)

حضرت عدی بن حاتم رضی اللہ عنہ کہتے ہیں کہ میں نے نبی اکرم صلی اللہ علیہ وسلم سے بھالے کے ذریعے کے گئے شکار کے بارے میں پوچھا تو آپ نے فرمایا: ” اگر اس کی دھار کے ذریعے(شکار کیا گیا) ہو تو تم اسے کھا لو اور اگر چوڑائی کی سمت سے(یعنی اسے لاٹھی کے طور پر استعمال کر کے شکار کیا گیا ہو)تو تم اسے نہ کھاؤ کیونکہ وہ چوٹ کھا کر مرا ہوا ہوگا۔میں نے عرض کی میں اپنا کتا چھوڑتا ہوں؟(اس بارے میں کیا حکم ہے؟) آپ صلی اللہ علیہ وسلم نے فرمایا: ”جب «بِسْمِ اللهِ» پڑھ کر چھوڑو تو کھاؤ، ورنہ نہ کھاؤ، اور اگر کتے نے اس میں سے کھایا ہو تو اس کو مت کھاؤ، اس لیے کہ اس نے اسے اپنے لیے پکڑا ہے“۔ پھر میں نے پوچھا: میں اپنے کتے کو شکار پر چھوڑتا ہوں کہ دوسرا کتا بھی آ کر اس کے ساتھ لگ جاتا ہے (تب کیا کروں؟) آپ صلی اللہ علیہ وسلم نے فرمایا: ”مت کھاؤ، اس لیے کہ «بِسْمِ اللهِ» تم نے صرف اپنے ہی کتے پر کہا ہے“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي الصَّيْدِ؛شکار کرنے کا بیان؛جلد٣،ص١١٠؛حدیث نمبر؛٢٨٥٤)

حضرت ابوثعلبہ خشنی رضی اللہ عنہ کہتے ہیں کہ میں نے عرض کیا: اللہ کے رسول! میں تربیت یافتہ اور بے تربیت یافتہ کتوں سے شکار کرتا ہوں، تو آپ صلی اللہ علیہ وسلم نے فرمایا: ”جو شکار تم سدھائے ہوئے کتے سے کرو اس پر اللہ کا نام لو“ (یعنی «بِسْمِ اللهِ» کہو) اور کھاؤ، اور جو شکار اپنے غیر سدھائے ہوئے کتے کے ذریعہ کرو اور اس کے ذبح کو پاؤ (یعنی زندہ پاؤ) تو ذبح کر کے کھاؤ (ورنہ نہ کھاؤ کیونکہ وہ کتا جو تربیت یافتہ نہیں ہے تو اس کا مار ڈالنا ذبح کے قائم مقام نہیں ہو سکتا)“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي الصَّيْدِ؛شکار کرنے کا بیان؛جلد٣،ص١١٠؛حدیث نمبر؛٢٨٥٥)

حضرت ابوثعلبہ خشنی رضی اللہ عنہ کہتے ہیں کہ رسول اللہ صلی اللہ علیہ وسلم نے مجھ سے فرمایا: ”ابوثعلبہ! جس جانور کو تم اپنے تیر و کمان سے یا اپنے کتے سے مارو اسے کھاؤ“۔ ابن حرب کی روایت میں اتنا اضافہ ہے کہ: ”وہ کتا سدھایا ہوا (شکاری) ہو، اور اپنے ہاتھ سے (یعنی تیر سے) شکار کیا ہوا جانور ہو تو کھاؤ خواہ اس کو ذبح کر سکو یا نہ کر سکو“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي الصَّيْدِ؛شکار کرنے کا بیان؛جلد٣،ص١١٠؛حدیث نمبر؛٢٨٥٦)

عمرو بن شعیب اپنے والد کے حوالے سے اپنے دادا کا یہ بیان نقل کرتے ہیں:کہ ابوثعلبہ رضی اللہ عنہ نامی ایک دیہاتی نے کہا: اللہ کے رسول! میرے پاس شکار کے لیے تیار سدھائے ہوئے کتے ہیں، ان کے شکار کے سلسلہ میں مجھے بتائیے، نبی اکرم صلی اللہ علیہ وسلم نے فرمایا: ”اگر تمہارے پاس سدھائے ہوئے کتے ہیں تو جو شکار وہ تمہارے لیے پکڑ رکھیں انہیں کھاؤ“۔ ابو ثعلبہ نے کہا: خواہ میں ان کو ذبح کر سکوں یا نہ کر سکوں؟ آپ صلی اللہ علیہ وسلم نے فرمایا: ”ہاں“۔ ابو ثعلبہ نے کہا: اگرچہ وہ کتے اس جانور میں سے کھا لیں؟ آپ صلی اللہ علیہ وسلم نے فرمایا: ”اگرچہ وہ اس جانور میں سے کھا لیں“۔ پھر انہوں نے کہا: اللہ کے رسول! میرے تیر کمان سے شکار کے متعلق بتائیے، آپ صلی اللہ علیہ وسلم نے فرمایا: ”تمہارا تیر کمان جو تمہیں لوٹا دے اسے کھاؤ، خواہ تم اسے ذبح کر پاؤ یا نہ کر پاؤ“۔ انہوں نے کہا: اگرچہ وہ شکار تیر کھا کر میری نظروں سے اوجھل ہو جائے؟ آپ صلی اللہ علیہ وسلم نے فرمایا: ”ہاں اگرچہ وہ تمہاری نظروں سے اوجھل ہو جائے جب تک کہ گلے سڑے نہیں، اور تمہارے تیر کے سوا اس کی ہلاکت کا کوئی اور اثر معلوم نہ ہو سکے“۔ پھر انہوں نے کہا: مجوسیوں (پارسیوں) کے برتن کے متعلق بتائیے جب کہ ہمیں اس کے سوا دوسرا برتن نہ ملے، آپ صلی اللہ علیہ وسلم نے فرمایا: ”دھو ڈالو اور اس میں کھاؤ“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي الصَّيْدِ؛شکار کرنے کا بیان؛جلد٣،ص١١٠؛حدیث نمبر؛٢٨٥٧)

حضرت ابوواقد لیثی رضی اللہ عنہ کہتے ہیں کہ نبی اکرم صلی اللہ علیہ وسلم نے فرمایا: ”زندہ جانور کے بدن سے جو چیز کاٹی جائے وہ مردار ہے“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي صَيْدٍ قُطِعَ مِنْهُ قِطْعَةٌ؛جب شکار کا کوئی ایک حصہ کاٹ لیا جائے؛جلد٣،ص١١١؛حدیث نمبر؛٢٨٥٨)

حضرت عبداللہ بن عباس رضی اللہ عنہما سے روایت ہے کہ نبی اکرم صلی اللہ علیہ وسلم نے فرمایا: ”جو شخص صحراء اور بیابان میں رہے گا اس کا دل سخت ہو جائے گا، اور جو شکار کے پیچھے رہے گا وہ (دنیا یا دین کے کاموں سے) غافل ہو جائے گا، اور جو شخص بادشاہ کے پاس آئے جائے گا وہ فتنہ و آزمائش میں پڑے گا (اس سے دنیا بھی خراب ہو سکتی ہے اور آخرت بھی)“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي اتِّبَاعِ الصَّيْدِ؛شکار کا پیچھا کرنا کیسا ہے؟؛جلد٣،ص١١١؛حدیث نمبر؛٢٨٥٩)

حضرت ابوہریرہ رضی اللہ عنہ نے نبی اکرم صلی اللہ علیہ وسلم سے مسدد والی حدیث کے ہم معنی حدیث روایت کی ہے اس میں ہے: ”جو شخص بادشاہ کے ساتھ چمٹا رہے گا وہ فتنے میں پڑے گا“ اور اتنا اضافہ ہے: ”جو شخص بادشاہ کے جتنا قریب ہوتا جائے گا اتنا ہی وہ اللہ سے دور ہوتا جائے گا“۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي اتِّبَاعِ الصَّيْدِ؛شکار کا پیچھا کرنا کیسا ہے؟؛جلد٣،ص١١١؛حدیث نمبر؛٢٨٦٠)

حضرت ابوثعلبہ خشنی رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا: ”جب تم کسی شکار کو تیر مارو اور تین دن بعد اس جانور کو اس طرح پاؤ کہ تمہارا تیر اس میں موجود ہو تو جب تک کہ اس میں سے بدبو پیدا نہ ہو اسے کھاؤ۔ (سنن ابی داؤد؛كِتَاب الصَّيْدِ؛شکار کے احکام و مسائل؛باب فِي اتِّبَاعِ الصَّيْدِ؛شکار کا پیچھا کرنا کیسا ہے؟؛جلد٣،ص١١١؛حدیث نمبر؛٢٨٦١)