Abbaad Bin Tameem Apne Chacha (Hazrat Abdullah Bin Zaid Bin Aa'sim Bin Ka'ab Bin Umar Ansaari Radiallahu Anhu) Se Riwaayat Karte Hai'n, Unho'n Ne Bayaan Kiya Ke Nabi e Kareem ﷺ Baahar Nikle Aap ﷺ Duwaye Baran Ke Liye Bahar Tashrif Le Gaye Aur ﷺ Ne Apnee Chadar Mubarak Palat Di۔
Riwaayat Hai Hazrat Abu Hurairah Radiallahu Anhu Se Ke Nabi e Kareem ﷺ Jab Aakhri Ruku Se Sar Uthaate To Yeh Du'aa Karte, Aye Allah ! Ayyaash Bin Abi Rabee'a Ko Nijaat De, Aye Allah ! Aye Allah ! Salma Bin Hishaam Ko Nijaat De, Aye Allah ! Waleed Bin Waleed Ko Nijaat De, Aye Allah ! Kamzor Momino'n Ko Nijaat De, Muzir Par Apni Girift Ko Sakht Kar, Aye Allah ! Unpar Aise Saal Musallat Karde Jaise Yusuf Alaihissalaam Ke Zamaane Me'n Qahet Ke Saal The, Aur Nabi e Kareem ﷺ Ne Du'aa Ki, Aye Allah ! Qabeela e Gaffaar Ki Magferat Karde Aur Aye Allah ! Qabeela e Aslam Ko Salaamat Rakh, Ibne Abi Zinaad Ne Apne Waalid Se Riwaayat Ki Ke Yeh Sab Subah Ki Namaaz Me'n Tha.
Masrooq Ne Bayaan Kiya Ke Hum Hazrat Abdullah Bin Mas'ood Radiallahu Anhu Ke Paas Baithe Huwe The Unho'n Ne Bataaya Ke Jab Nabi e Kareem ﷺ Ne Logo'n Ki Islaam Se Roogardaani Dekhi To Aap ﷺ Ne Unke Liye Yeh Du'aa e Zarar Ki, Aye Allah ! Inko 7 Saal Tak Keliye Qahet Me'n Mubtala Karde, Jaise Yusuf ﷺ Ke Zamaane Me'n 7 Saal Qahet Pada Tha, Pas Qahet Ne Unko Iss Tarah Pakda Ke Har Cheez Fana Ho Gayi, Hatta Ke Un Logo'n Ne Chamda, Murdaar Aur Mare Huwe Jaanwar Tak Khaaliye, Unme'n Se Koi Shakhs Aasmaan Ki Taraf Dekhta To Use Bhook Ki Shiddat Se Dhuwaa'n Nazar Aata, Phir Abu Sufiyaan Ne Aap ﷺ Ke Paas Aakar Kaha Aye (Sayyaduna) Mohammad (ﷺ) ! Aap Allah Ki Itaa'at Aur Aqraba Parwari Ka Hukm Dete Hai'n Aur Aapki Qaum Halaak Ho Rahi Hai So Aap Unke Liye Allah Ta'ala Se Du'aa Kijiye Aur Allah Ta'ala Ne Farmaaya Hai, Aye Nabi ! Uss Din Ka Intezaar Kijiye Jab Aasmaan Se Ek Waazeh Dhuwaa'n Zaahir Hoga (Sureh Dukhaan, Aayat No.10) ,Jis Din Ham Sab Se Badi Pakad Karengge Be Shak Ham Badla Lene Wale Hai'n(Sureh Dukhaan, Aayat No.15-16) Hazrat Ibne Mas'ood Ne Bataaya Ke Sakht Pakad To Badar Ke Din Thi Aur Dhuwaa'n, Pakad, Lizaam Aur Aayat e Room Guzar Chuki Hai.
Abdur Rehmaan Bin Abdullah Bin Deenaar Ne Hadees Bayaan Ki Apne Waalid Se Unho'n Ne Bayaan Kiya Ke Mai'n Ne Hazrat Ibne Umar Radiallahu Anhuma Se Suna Woh Abi Taalib Ke Iss Sher Ko Padhte The, Woh Gore Shakhs Jinke Chehre Ke Waseele Se Baadal Se Baarish Talab Ki Jaati Hai, Jo Yateemo'n Ka Sahaara Hai'n Aur Bewaa'on Ke Sarparast Hai'n
Saalim Ne Hadees Bayaan Ki Apne Waalid Se Unho'n Ne Kaha, Basa Auqaat Mujhe Shaayer Ka Yeh Qaul Yaad Aata Jab Mai'n Nabi e Kareem ﷺ Ke Chehre Ki Taraf Dekhta Aap Baarish Talab Karte Aur Abhi Mimbar Se Nahee'n Utarte The Hatta Ke Har Par Naala Zor Wa Shor Se Beh Raha Hota Aur Woh Sher Yeh Tha, Woh Gore Shakhs Jinke Waseele Se Baadal Se Baarish Talab Ki Jaati Hai, Jo Yateemo'n Ka Sahaara Aur Bewaa'on Ke Sarparast Hai'n, Aur Yeh Sher Abi Taalib Ka Hai.
Riwaayat Hai Hazrat Anas Radiallahu Anhu Se Ke Jab Logo'n Par Qahet Pada To Hazrat Umar Bin Khattaab Radiallahu Anhu Ne Hazrat Abbaas Bin Abdul Muttalib Ke Waseele Se Baarish Talab Ki Aur Yeh Du'aa Ki, Aye Allah ! Hum Teri Taraf Apne Nabi Ke Waseele Se Du'aa Karte The To Pas Tu Hum Par Baarish Naazil Farmaata Tha Aur Ab Hum Teri Taraf Apne Nabi Ke Chacha Ke Waseele Ko Pesh Kar Rahe Hai'n, So Tu Hum Par Baarish Naazil Farma, Phir Unpar Baarish Naazil Hoti. (Wazaahat Karta Chaloo'n Ke Iss Hadees Ke Sabab Kuchh Log Kehte Hai'n Ke Ab Rasoolullah ﷺ Ka Waseela Lena Jaa'iz Nahee'n Hai, Waseela Sirf Unka Liya Ja Sakta Hai Jo Zaahiri Hayaat Se Zindah Ho'n, Jabke Iss Hadees Me'n Kahee'n Nahee'n Likha Hai Ke Zaahir Hayaat Se Jo Hai'n Sirf Unka Waseela Jaa'iz Aur Jo Wisaal Farma Jaaye'n Unka Waseela Jaa'iz Nahee'n, Haa'n Iss Hadees Se Ek Ahem Masla Yeh Saabit Hota Hai Ke Sirf Rasoolullah ﷺ Ka Hi Waseela Lena Jaa'iz Nahee'n Balke Gair e Nabi Ka Waseela Lena Bhi Jaa'iz Hai, Aur Iss Hadees Se Yeh Bhi Saabit Hota Hai Ke Sirf Rasoolullah ﷺ Ke Waseele Hi Se Du'aa Qabool Nahee'n Hoti Balke Rasoolullah ﷺ Ke Aqraba Aur Ahle Bait Ke Waseele Se Bhi Du'aa Qabool Hoti Hai, Khair ! Rasoolullah ﷺ Ke Wisaal Ke Ba'ad Bhi Rasoolullah ﷺ Ka Waseela Liya Gaya, Chunaanche Imaam Ibne Abi Shaiba Sanad e Saheeh Ke Saath Maalik Addaari Se Riwaayat Ki Hai Ke Hazrat Umar Radiallahu Anhu Ke Zamaane Me'n Logo'n Par Qahet Pad Gaya, Pas Ek Shakhs (Ya'ni Hazrat Bilaal Bin Haaris Mazni Radiallahu Anhu) Nabi e Kareem ﷺ Ki Qabr Par Gaye Aur Arz Kiya, Ya Rasoolallah ! Apni Ummat Keliye Baarish Talab Kijiye Kyu'nke Woh Halaak Ho Rahi Hai'n To Rasoolullah ﷺ Uss Aadmi (Ya'ni Hazrat Bilaal Bin Haaris Mazni Radiallahu Anhu) Ko Khwaab Me'n Nazar Aaye Aur Usse Kaha Gaya Ke Tum Umar Radiallahu Anhu Ke Paas Jaao Aur Unko Mera Salaam Kaho Aur Unko Khabar Do Ke Log Sairaab Hone Ki Jagah Me'n Hai (Ya'ni Tum Par Anqareeb Baarish Hogi) Aur Unse Kaho Ke Tum Par Daanishmandi Laazim Hai Tum Par Daanishmandi Laazim Hai Phir Woh Aadmi (Hazrat Bilaal Bin Haaris Mazani Radiallahu Anhu) Hazrat Umar Radiallahu Anhu Ke Paas Gaye Aur Unko Iss Khwaab Ki Khabar Di To Hazrat Umar Radiallahu Anhu Rone Lage Aur Kaha Aye Mere Rab ! Mai'n Sirf Usi Kaam Ko Tark Karta Hoo'n Jisse Mai'n Aa'jiz Hoo'n (Mafhoomi Tarjuma) Musannaf Ibne Abi Shaiba Se Iss Hadees Ke Alfaaz Ma Sanad Wa Matan Ke Mulaaheza Kare'n. Isi Tarah Sunan e Daarmi Ki Ek Riwaayat Jabke Tamaami Raawi Siqa Hai'n Riwaayat Ke Alfaaz Ma Sanad Wa Matan Ke Mulaaheza Farmaaye'n Aur Dekhe'n Ke Rasoolullah ﷺ Ki Zaat Se Ba'ad Wisaal Bhi Waseela Liya Gaya Hai, (Tarjuma) Aus Bin Abdullah Bayaan Karte Hai'n Ke Ahle Madeena Shadeed Qahet Me'n Mubtala Ho Gaye To Unho'n Ne Hazrat Aa'yesha Radiallahu Anha Ke Paas Uss Qahet Ki Shikaayat Ki, To Hazrat Aa'yesha Radiallahu Anha Ne Unse Kaha, Nabi e Akram ﷺ Ki Qabr e Anwar Ki Taraf Dekho Aur Usme'n Iss Tarah (Ek Chhota Sa Qabr Shareef Ke Upari Hisse Me'n) Sooraakh Kardo Ke Aap ﷺ Aur Aasmaan Ke Darmiyaan Koi Chhat Na Rahe, Aus Bin Abdullah Kehte Hai'n Unho'n Ne Aisa Hi Kiya, To Hum Par Baarish Barasne Lagi, Ghaas Ug Aayi, Aur Oo'nt Aise Mote Huwe Ke Unki Aa'nkhe'n Charbi Se Phool Gayee'n Uss Saal Ka Naam Aam ul Fataq (Ya'ni Chaupaayo'n Ke Mote Hone Ka Saal) Rakha Gaya, (Sunan e Daarmi, Jild No.1, Safha No.227, Kitaabul Muqaddama, Hadees No.93)
Abdullah Bin Zaid Se Riwaayat Hai Ke, Beshak Nabi e Kareem ﷺ Ne Baarish Keliye Du'aa Ki Aur Chaadar Ko Palta.
Riwaayat Hai Hazrat Abdullah Bin Zaid Se Ke, Nabi e Kareem ﷺ Eidgaah Ki Taraf Nikle Pas Aap ﷺ Ne Baarish Talab Ki, Pas Qibla Ki Taraf Muh Kiya, Aur Chaadar Ko Palta, Aur 2 Rak'at Namaaz Padhi, Abu Abdullah Ne Kaha, Ibne Uyaiyna Yeh Kehte The Ke Yeh Abdullah Bin Zaid Saahibul Azaan Hai'n Lekin Yeh Wahem Hai Kyu'nke Yeh Abdullah Bin Zaid Bin Aa'sim Maazini Ansaari Hai.
Shareek Bin Abdullah Bin Abi Namir Ne Hadees Bayaan Ki Ke Unho'n Ne Hazrat Anas Bin Maalik Radiallahu Anhu Se Suna, Woh Zikr Kar Rahe The Ke Jum'ah Ke Din Ek Shakhs Mimbar Ke Saamne Waale Darwaazeh Se Daakhil Huwa Aur Rasoolullah ﷺ Uss Waqt Khade Ho Kar Khutba De Rahe The Woh Shakhs Rasoolullah ﷺ Ki Taraf Muh Karke Khada Huwa Pas Usne Kaha, Ya Rasoolallah ﷺ ! Maweshi Halaak Ho Gaye, Aur Raaste Munqate Ho Gaye, Lehaaza Aap Allah Se Du'aa Kijiye Ke Woh Hum Par Baarish Naazil Kare, Hazrat Anas Radiallahu Anhu Ne Kaha, Pas Rasoolullah ﷺ Ne Apne Dono'n Haath Buland Kiye, Phir Du'aa Ki, Aye Allah ! Hum Par Baarish Naazil Kar, Hazrat Anas Radiallahu Anhu Ne Kaha, Aur Allah Ki Qasam ! Hum Aasmaan Me'n Ikatthe Baadal Dekh Rahe The Na Mutafarriq Baadal Aur Na Koi Aur Cheez Aur Na Humaare Sula Pahaad Ke Darmiyaan (Koi Baadal Chhupa Huwa Tha) Aur Na Kisi Haweli Aur Ghar Ke Darmiyaan, (Ya'ni Kahee'n Baadal Ka Naam Wa Nishaan Na Tha) Pas Achaanak Sula Pahaad Ke Peechhe Se Dhaal Ki Tarah Baadal Umad Aaye Aur Jab Woh Aasmaan Ke Wast Me'n Paho'nche To Muntashir Ho Gaye Phir Barasne Lage, Hazrat Anas Radiallahu Anhu Ne Kaha, Aur Allah Ki Qasam ! Humne 6 Din Tak Sooraj Ko Nahee'n Dekha, Phir Agle Jum'ah Ko Ek Shakhs Usi Darwaaze Se Daakhil Huwa Aur Uss Waqt Rasoolullah ﷺ Khade Hokar Khutba De Rahe The, Pas Woh Aap ﷺ Ki Taraf Muh Karke Khada Ho Gaya, Aur Kehne Laga Ya Rasoolallah ﷺ ! Amwaal Halaak Ho Gaye Aur Raaste Munqate Ho Gaye, Pas Aap Allah Ta'ala Se Du'aa Kijiye Ke Woh Ab Baarish Ko Rok Le, Phir Rasoolullah ﷺ Ne Apne Dono'n Haatho'n Ko Buland Kiya, Phir Aap ﷺ Ne Du'aa Ki, Aye Allah ! Humaare Ird Gird Baarish Naazil Kar Hum Par Na Naazil Kar, Aye Allah ! Teelo'n Par Pahaado'n Par Maidaano'n Par Pahaadiyo'n Par Waadiyo'n Par Aur Darakhto'n Ke Ugne Ke Maqaamaat Par Baarish Naazil Farma, Hazrat Anas Radiallahu Anhu Bayaan Karte Hai'n Ke Phir Baarish Fauran Band Ho Gayi Aur Hum Dhoop Me'n Chalne Lage, Shareek Ne Kaha Mai'n Ne Hazrat Anas Radiallahu Anhu Se Poochha Kya Yeh Wohi Pehla Shakhs Tha? Unho'n Ne Kaha, Mujhe Ma'loom Nahee'n.
Hazrat Anas Bin Maalik Radiallahu Anhu Bayaan Karte Hai'n Ke Ek Shakhs Jum'ah Ke Din Masjid Me'n Uss Darwaazeh Se Daakhil Huwa Jo Daarul Qaza Ki Taraf Hai, Aur Rasoolullah ﷺ Uss Waqt Khade Hokar Khutba De Rahe The, Usne Khade Hokar Rasoolullah ﷺ Ki Taraf Muh Kiya Phir Kaha, Ya Rasoolallah ﷺ ! Amwaal Halaak Ho Gaye, Aur Raaste Munqate Ho Gaye, Lehaaza Aap ﷺ Allah Se Du'aa Kijiye Ke Woh Hum Par Baarish Naazil Kare, Phir Rasoolullah ﷺ Ne Apne Haatho'n Ko Buland Kiya, Phir Du'aa Ki, Aye Allah ! Hum Par Baarish Naazil Kar, Aye Allah Hum Par Baarish Naazil Kar, Aye Allah Hum Par Baarish Naazil Kar, Hazrat Anas Radiallahu Anhu Ne Kaha, Aur Allah Ki Qasam ! Hum Aasmaan Me'n Ikatthe Baadal Dekh Rahe The Na Mutafarriq Baadal Aur Na Humaare Aur Sula Pahaad Ke Darmiyaan (Koi Baadal Kisi Oat Me'n Tha) Aur Na Kisi Haweli Aur Ghar Ke Darmiyaan (Ya'ni Kahee'n Baadal Ka Naam Wa Nishaan Na Tha) Phir Sula Pahaad Ke Peechhe Se Dhaal Ki Tarah Baadal Umad Aaye Aur Jab Woh Aasmaan Ke Wast Me'n Paho'nche To Muntashir Ho Gaye Phir Barasne Lage, Aur Allah Ki Qasam ! Humne 6 Din Tak Sooraj Ko Nahee'n Dekha, Phir Jum'ah (Ya'ni Doosri Jum'ah) Ke Din Ek Shakhs Usi Darwaaze Se Daakhil Huwa Aur Uss Waqt Rasoolullah ﷺ Khade Hokar Khutba De Rahe The, Pas Woh Aap ﷺ Ki Taraf Muh Karke Khada Ho Gaya, Aur Kehne Laga Ya Rasoolallah ﷺ ! Amwaal Halaak Ho Gaye Aur Raaste Munqate Ho Gaye, Pas Aap Allah Ta'ala Se Du'aa Kijiye Ke Woh Ab Baarish Ko Rok Le, Phir Rasoolullah ﷺ Ne Apne Haatho'n Ko Buland Kiya, Phir Aap ﷺ Ne Du'aa Ki, Aye Allah ! Humaare Ird Gird Baarish Barsa Hum Par Na Barsa, Aye Allah ! Teelo'n Par Pahaadiyo'n Par Aur Waadiyo'n Ke Batan Me'n Aur Darakhto'n Ke Ugne Ki Jagah Par Baarish Barsa, Hazrat Anas Radiallahu Anhu Bayaan Karte Hai'n Ke Phir Baarish Ruk Gayi Aur Hum Dhoop Me'n Chal Rahe The, Shareek Ne Kaha Mai'n Ne Hazrat Anas Radiallahu Anhu Se Poochha Kya Yeh Wohi Pehla Shakhs Tha? Unho'n Ne Kaha, Mujhe Ma'loom Nahee'n.
Hazrat Anas Radiallahu Anhu Ne Kaha Ke, Jis Waqt Rasoolullah ﷺ Jum'ah Ka Khutba De Rahe The Achaanak Ek Shakhs Aaya Usne Kaha, Ya Rasoolallah ﷺ ! Baarish Ka Qahet Pad Gaya Lehaaza Aap ﷺ Allah Se Du'aa Kijiye Ke Hum Par Baarish Naazil Kare, So Aap ﷺ Ne Du'aa Ki, So Hum Par Baarish Naazil Ki Gayi Pas Qareeb Na Tha Ke Hum Apne Gharo'n Ko Paho'nchte, So Agle Jum'ah Tak Musalsal Baarish Hoti Rahi Phir Wohi Shakhs Khada Huwa Ya Doosra Shakhs, Pas Usne Kaha, Ya Rasoolallah ﷺ ! Allah Se Du'aa Kijiye Ke Woh Iss Baarish Ko Humse Door Karde So Rasoolullah ﷺ Ne Du'aa Ki, Aye Allah, Humaare Ird Gird Barsa, Hum Par Na Barsa, Hazrat Anas Radiallahu Anhu Ne Kaha, Pas Mai'n Ne Tehqeeq Se Dekha Ke Baadal Baraste Huwe Daaye'n Baaye'n Phat Rahe The Aur Ahle Madeena Par Baarish Nahee'n Ho Rahi Thi.
Hazrat Anas Radiallahu Anhu Ne Kaha Ke Ek Shakhs Nabi e Kareem ﷺ Ke Paas Aaya, Pas Usne Kaha, Maweshi Halaak Ho Gaye Aur Raaste Munqate Ho Gaye, To Aap ﷺ Ne Du'aa Ki, Phir Hum Par Ek Jum'ah Se Doosre Jum'ah Tak Baarish Hoti Rahi Phir Woh Shakhs Aaya Pas Usne Kaha, Makaanaat Gir Gaye Aur Raaste Munqate Ho Gaye Aur Maweshi Halaak Ho Gaye, Pas Aap ﷺ Allah Se Du'aa Kijiye Ke Woh Iss Baarish Ko Rok Le, Phir Rasoolullah ﷺ Khade Huwe Pas Du'aa Ki, Aye Allah ! Teelo'n Par Aur Pahaadiyo'n Par Aur Waadiyo'n Par Aur Darakhto'n Ke Ugne Ki Jagho'n Par Baarish Naazil Farma ! Pas Baarish Madeena Se Iss Tarah Munqate Ho Gayi Jaise Kapda Munqate Ho Jaata Hai.
Hazrat Anas Bin Maalik Radiallahu Anhu Ne Bayaan Kiya Ke Ek Shakhs Rasoolullah ﷺ Ke Paas Aaya Pas Usne Kaha, Ya Rasoolallah ﷺ ! Maweshi Halaak Ho Gaye Aur Raaste Munqate Ho Gaye Lehaaza Aap Allah Se Du'aa Kijiye, Pas Rasoolullah ﷺ Ne Du'aa Ki To Ek Jum'ah Se Doosre Jum'ah Tak Baarish Huwi, Phir Ek Shakhs Rasoolullah ﷺ Ke Paas Aaya, Pas Usne Kaha Ya Rasoolallah ﷺ ! Makaanaat Gir Gaye, Raaste Munqate Ho Gaye Aur Maweshi Halaak Ho Gaye To Rasoolullah ﷺ Ne Du'aa Ki, Aye Allah ! Pahaadiyo'n Ke Saro'n Par Aur Teelo'n Par Aur Waadiyo'n Ke Batan Me'n Aur Darakhto'n Ke Ugne Ki Jagho'n Me'n, (Baarish Barsa Hum Par Nahee'n) Pas Madeena (Baarish Se) Iss Tarah Munqate Ho Gaya Jis Tarah Kapda Munqate Hota Hai.
Hazrat Anas Bin Maalik Radiallahu Anhu Bayaan Karte Hai'n Ke Ek Shakhs Ne Nabi e Kareem ﷺ Se Maal Ke Halaak Hone Aur Biwi Bachcho'n Ki Mushaqqat Ki Shikaayat Ki To Aapne Allah Se Baarish Ke Nuzool Ki Du'aa Ki Aur Hazrat Anas Radiallahu Anhu Ne Yeh Zikr Nahee'n Kiya Ke Aapne Chaadar Palta Aur Na Yeh Zikr Kiya Ke Aapne Qibla Ki Taraf Muh Kiya.
Hazrat Anas Bin Maalik Radiallahu Anhu Bayaan Karte Hai'n Ke Ek Shakhs Rasoolullah ﷺ Ke Paas Aaya Pas Usne Kaha, Ya Rasoolallah ﷺ ! Maweshi Halaak Ho Gaye Aur Raaste Munqate Ho Gaye Lehaaza Aap ﷺ Allah Se Du'aa Kijiye So Aap ﷺ Ne Allah Se Du'aa Ki Phir Hum Par Ek Jum'ah Se Doosre Jum'ah Tak Baarish Huwi Phir Ek Shakhs Nabi e Kareem ﷺ Ke Paas Aaya Pas Usne Kaha Ya Rasoolallah ﷺ ! Makaanaat Gir Gaye Raaste Munqate Ho Gaye Aur Maweshi Halaak Ho Gaye, Pas Rasoolullah ﷺ Ne Du'aa Ki, Aye Allah ! Pahaado'n Ki Pushto'n Par Aur Teelo'n Par Aur Waadiyo'n Ke Batan Me'n Aur Darakhto'n Ke Paida Hone Ki Jagho'n Par (Baarish Naazil Farma Humaare Upar Nahee'n) So Madeena Baarish Se Kapde Ki Tarah Kat Gaya.
Masrooq Ne Kaha, Mai'n Hazrat Ibne Mas'ood Radiallahu Anhu Ke Paas Aaya, Pas Unho'n Ne Kaha, Ke Quresh Ne Islaam Laane Me'n Taakheer Kardi To Nabi e Kareem ﷺ Ne Unke Khilaaf Du'aa e Zarar Ki, So Unko Khushk Saali Ne Pakad Liya, Hatta Ke Woh Usme'n Halaak Ho Gaye, Aur Unho'n Ne Murdo'n Ko Aur Haddiyo'n Ko Khaaya, Pas Aap ﷺ Ke Paas Abu Sufiyaan (Radiallahu Anhu) Aaye Aur Kaha Aye Mohammad ﷺ, Aap ﷺ Yeh Hukm Dene Aaye Hai'n Ke Rishtedaaro'n Se Milaap Rakho Aur Aapki ﷺ Qaum Halaak Ho Rahi Hai Lehaaza Aap ﷺ Allah Ta'ala Se Du'aa Kijiye, Pas Aap ﷺ Ne Yeh Aayat Padhi,To Tum Us Din Ke Muntazir Raho Jab Aasman Ek Zahir Dhhuwa Laye Ga,(Sureh Dukhaan, Aayat No.10) Phir Woh Apne Kufr Ki Taraf Laut Gaye, Iske Muta'alliq Allah Ta'ala Ka Yeh Irshaad Hai, Jis Din Hum Sab Se Badi Pakad Pakdengge Be Shak Ham Badla Lene Wale Hai'n,(Sureh Dukhaan, Aayat No.16) Isse Muraad Yaum e Badar Hai, Asbaat Ne Az Mansoor Yeh Izaafa Kiya Hai Ke Phir Rasoolullah ﷺ Ne Du'aa Ki Phir Unko Baarish Se Sairaab Kiya Gaya, Phir 7 Din Unpar Musalsal Baarish Hoti Rahi Aur Logo'n Ne Baarish Ki Kasrat Ki Shikaayat Ki To Aap ﷺ Ne Du'aa Ki, Aye Allah ! Humaare Ird Gird Barsa Hum Par Na Barsa, Phir Baadal Bilkul Chhat Gaye Pas Uss Saal Logo'n Ko Sairaab Kiya Gaya.
Hazrat Anas Radiallahu Anhu Bayaan Karte Hai'n Ke Nabi e Kareem ﷺ Jum'ah Ke Din Khutba De Rahe The To Log Khade Hokar Ba Aawaaz e Buland Kehne Lage, Ya Rasoolallah ﷺ ! Baarish Ka Qahet Pad Gaya Aur Darakht Surkh Ho Gaye Aur Jaanwar Halaak Ho Gaye Pas Aap ﷺ Allah Se Du'aa Kijiye Ke Woh Hum Par Baarish Naazil Farmaaye Tab Rasoolullah ﷺ Ne Du'aa Ki, Aye Allah ! Hum Par Baarish Naazil Farma, Yeh Aap ﷺ ne 2 Baar Kaha, Aur Allah Ki Qasam Hum Aasmaan Par Koi Baadal Ka Tukda Nahee'n Dekh Rahe The Pas Baadal Umad Aaye Aur Barasne Lage Aur Aap ﷺ Mimbar Se Utre Phir Aap ﷺ Ne Namaaz Padhaayi, Phir Jab Aap ﷺ Namaaz Padha Kar Mude To Agle Jum'ah Tak Musalsal Baarish Hoti Rahi, Phir Jab Nabi e Kareem ﷺ Khade Hokar Khutba Dene Lage To Logo'n Ne Buland Aawaaz Se Kaha, Makaanaat Gir Gaye Aur Raaste Munqate Ho Gaye So Aap Allah Se Du'aa Kijiye Ke Woh Iss Baarish Ko Humse Rok Le, Pas Nabi e Kareem ﷺ Muskuraaye Phir Du'aa Ki, Aye Allah ! Humaare Ird Gird Barsa, Hum Par Na Barsa, Phir Madeena Baarish Ke Paani Se Khaali Ho Gaya, Phir Madeena Ke Ird Gird Baarish Hoti Thi Aur Madeena Par Baarish Ka Ek Qatrah Bhi Nahee'n Girta Tha, Phir Mai'n Ne Madeena Ki Taraf Nazar Ki To Goya Kisi Taaj Ke Halqe Ki Tarah Barish Khara huwa Tha.
Abu Is'haaq Bayaan Karte Hai'n Ke Abdullah Bin Yazeed Ansaari Baarish Talab Karne Keliye Nikle Aur Unke Saath Hazrat Bara Bin Aa'zib Radiallahu Anhu Aur Hazrat Zaid Bin Arqam Radiallahu Anhu Nikle Unho'n Ne Baarish Ki Talab Ki Du'aa Ki To Woh Bagair Mimbar Ke Apne Paa'on Par Khade Huwe Pas Unho'n Ne Astagfaar Kiya Phir 2 Rak'at Namaaz Padhaayi Aur Buland Aawaaz Se Qir'aat Ki Aur Na Azaan Di Aur Na Iqaamat Kahi, Abu Is'haaq Ne Kaha Ke Abdullah Bin Yazeed Ne Nabi e Kareem ﷺ Ki Ziyaarat Ki Thi, Ya'ni Woh Sahaabi The.
Zohri Ne Kaha Ke Mujhe Abbaad Bin Tameem Ne Hadees Bayaan Ki Ke Unke Chacha, Aur Woh Nabi e Kareem ﷺ Ke As'haab Me'n Se The, Woh Bayaan Karte Hai'n Ke Nabi e Kareem ﷺ Logo'n Ko Namaaz e Istisqaa Keliye Le Gaye To Aap ﷺ Ne Qayaam Kiya Phir Allah Se Khade Hokar Du'aa Ki, Phir Qibla Ki Taraf Mutawajjeh Huwe Aur Apni Chaadar Ko Palta To Unpar Baarish Ho Gayi.
Abbaad Bin Tameem Apne Chacha Se Riwaayat Karte Hai'n Ke Unho'n Ne Bayaan Kiya Ke Nabi e Kareem ﷺ Baarish Talab Karne Keliye Nikle Aap ﷺ Ne Qibla Ki Taraf Mutawajjeh Hokar Du'aa Ki Aur Apni Chaadar Ko Palta Phir 2 Rak'at Namaaz Padhi Aur Usme'n Buland Aawaaz Se Qir'aat Ki.
Abbaad Bin Tameem Ne Apne Chacha Se Riwaayat Ki Woh Bayaan Karte Hai'n Ke, Mai'n Ne Ek Din Dekha Ke Nabi e Kareem ﷺ Baarish Talab Karne Keliye Nikle Aap ﷺ Ne Logo'n Ki Taraf Peeth Pheri Aur Qibla Ki Taraf Muh Karke Du'aa Karne Lage, Phir Aap ﷺ Ne Apni Chaadar Pheri Phir Humko 2 Rak'at Namaaz Padhaayi Jisme'n Buland Aawaaz Se Qir'aat Ki.
Abbaad Bin Tameem Ne Apne Chacha Se Riwaayat Ki Ke Woh Bayaan Karte Hai'n Ke Nabi e Kareem ﷺ Ne Baarish Talab Ki Pas 2 Rak'at Namaaz Padhi Aur Apni Chaadar Ko Palta.
Abbaad Bin Tameem Ne Apne Chacha Se Riwaayat Ki Unho'n Ne Kaha Ke Nabi e Kareem ﷺ Baarish Talab Karne Eidgaah Ki Taraf Gaye Aur Aap ﷺ Ne Qibla Ki Taraf Rukh Kiya Pas Aap ﷺ Ne 2 Rak'at Namaaz Padhi Aur Apni Chaadar Palti, Sufiyaan Ne Kaha Mujhe Mas'oodi Ne Khabar Di Az Abi Bakar Unho'n Ne Bataaya Aap ﷺ Ne Daayaa'n Haath Baaye'n Haath Par Rakha.
Abbaad Bin Tameem Ne Khabar Di Ke Hazrat Abdullah Bin Zaid Ansaari Ne Unko Khabar Di Ke Nabi e Kareem ﷺ Namaaz Ada Karne Keliye Eidgaah Ki Taraf Nikle Aur Jab Aap ﷺ Du'aa Karte Ya Du'aa Ka Iraadah Karte To Qibla Ki Taraf Muh Karte Aur Apni Chaadar Palat'te, Imaam Abu Abdullah Ne Kaha Yeh Ibne Zaid Maazini Hai Aur Pehla Koofi Hai Aur Woh Ibne Yazeed Hai.
Hazrat Anas Bin Maalik Radiallahu Anhu Bayaan Karte Hai'n Ke Jum'ah Ke Din Ek Dehaat Waalo'n Me'n Se Ek Dehaati Rasoolullah ﷺ Ke Paas Aaya Pas Kehne Laga Ya Rasoolallah ﷺ ! Maweshi Halaak Ho Gaye Baal Bachche Halaak Ho Gaye Log Halaak Ho Gaye, Tab Rasoolullah ﷺ Apne Dono'n Haath Buland Karke Du'aa Karne Lage, Aur Log Bhi Aap ﷺ Ke Saath Apne Haath Buland Karke Du'aa Karne Lage, Unho'n Ne Kaha, Hum Abhi Masjid Se Nahee'n Nikle The Hatta Ke Baarish Naazil Ho Gayi Phir Hum Par Musalsal Baarish Hoti Rahi Hatta Ke Doosra Jum'ah Aa Gaya Phir Wohi Shakhs Nabi e Kareem ﷺ Ki Taraf Aaya Pas Usne Kaha, Ya Rasoolallah ﷺ ! Musaafir Safar Karne Se Aa'jiz Ho Gaye Aur Raaste Rok Diye Gaye.
Riwaayat Hai Hazrat Anas Radiallahu Anhu Se Woh Riwaayat Karte Hai'n Nabi e Kareem ﷺ Se Ke Aap Alaihissalaam Ne Apne Dono'n Haath Buland Kiye Hatta Ke Mai'n Ne Aap Alaihissalaam Ki Baglo'n Ki Safedi (Ki Jagah) Dekhi.
Hazrat Anas Bin Maalik Radiallahu Anhu Ne Bayaan Kiya Ke Nabi e Kareem ﷺ Namaaz e Istisqaa Ke Siwa Kisi Du'aa Me'n Apne Haatho'n Ko Buland Nahee'n Karte The Aur Aap Haath (Iss Qadar) Buland Karte Ke Aapki Baglo'n Ki Safedi Dikhaayi Deti.
Baab, Jab Baarish Ho To Kya Kaha Jaaye? Aur Hazrat Ibne Abbaas Radiallahu Anhuma Ne Kaha, Kasayyab, Se Muraad Baarish Hai, Aur Doosro'n Ne Kaha, Saab Wa Asaab Yasoob, (Aur Hadees No.1032 Yeh Hai) Riwaayat Hai Hazrat Aa'yesha Radiallahu Anha Se Ke Rasoolullah ﷺ Jab Baarish Ko Dekhte To Farmaate Aye Allah ! Isko Nafa Waali Baarish Banaade, Qaasim Bin Mohammad Ne Abdullah Ki Mutaabe'at Ki Hai Az Ubaidullah Aur Isko Auzaa'yi Aur Aqeel Ne Naafe Se Riwaayat Kiya Hai.
Hazrat Anas Bin Maalik Radiallahu Anhu Ne Kaha Ke, Rasoolullah ﷺ Ke Ahed Me'n Logo'n Par Khushk Saali Aa Gayi Pas Jis Waqt Rasoolullah ﷺ Jum'ah Ke Din Mimbar Par Khutba De Rahe The Ek Dehaati Khada Hokar Kehne Laga Ya Rasoolallah ﷺ ! Maal Halaak Ho Gaya Aur Baal Bachche Bhooke Hai'n, Lehaaza Aap Allah Se Humaare Liye Yeh Du'aa Kijiye Ke Woh Hum Par Baarish Naazil Kare, Hazrat Anas Radiallahu Anhu Ne Kaha, Phir Rasoolullah ﷺ Ne Apne Dono'n Haath Uthaaye Aur Uss Waqt Aasmaan Par Baadal Nahee'n The, So Pahaadiyo'n Ki Misl Baadal Umad Aaye Phir Aap Mimbar Par Hi Rahe Hatta Ke Mai'n Ne Dekha Ke Baarish Aapki Daadhi Par Gir Rahi Thi, Pas Uss Din Hum Par Baarish Hoti Rahi Aur Uske Doosre Din Aur Uske Teesre Din Aur Uske Ba'ad Waale Din Doosre Jum'ah Tak, Phir Wohi Dehaati Khada Huwa Ya Koi Aur Shakhs Tha, Pas Usne Kaha, Ya Rasoolallah ﷺ ! Makaan Gir Gaya Aur Maal Garq Ho Gaya, Lehaaza Aap Humaare Liye Allah Se Du'aa Kijiye, Phir Rasoolullah ﷺ Ne Apne Dono'n Haath Upar Uthaaye Aur Du'aa Ki Aye Allah ! Humaare Ird Gird Barsa, Aur Hum Par Na Barsa, Pas Aap Apne Haath Se Aasmaan Ke Jis Taraf Bhi Ishaarah Karte Wahee'n Se Baadal Phat Jaate, Hatta Ke Madeena Hauz Ki Tarah Ho Gaya, Hatta Ke Qanaata Naam Ki Waadi Ek Maah Tak Behti Rahi, Pas Jo Shakhs Jis Taraf Se Bhi Aaya Usne Yehi Khabar Di Ke Khoob Baarish Ho Rahi Hai.
Humaid Ne Khabar Di Unho'n Ne Hazrat Anas Radiallahu Anhu Ko Yeh Kehte Huwe Suna Hai Ke Jab Bahot Shadeed Aa'ndhi Chalti To Nabi e Kareem ﷺ Ke Chehre Par Khauf Ke Aasaar Dikhaayi Dete.
Hazrat Ibne Abbaas Radiallahu Anhuma Bayaan Karte Hai'n Ke Nabi e Kareem ﷺ Ne Irshaad Farmaaya, Meri Saba Se Madad Ki Gayi Hai Aur Qaum e Aa'd Ko Daboor Se Halaak Kar Diya Gaya. (Iss Hadees Me'n Saba, Se Muraad (Mashriq Se Chalne Waali Aa'ndhi Hai, Iski Tafseel Yeh Hai Ke Allah Ta'ala Ne Jan'g e Khandaq Ke Din Intehaayi Sard Raat Me'n Mushrikeen Ke Upar Sard Aa'ndhi Bheji Jisne Mushrikeen Ke Choolhe Bujha Diye Aur Unke Kheemo'n Ki Rassiyaa'n Aur Mekhe'n Ukhaad Dee'n, Aur Unke Upar Unke Kheeme'n Aur Hathiyaar Gir Gaye Aur Woh Bagair Ja'ng Ke Raato'n Raat Bhaag Gaye, (Dekhe'n Sureh Ahzaab, Aayat No.9) Aur Qaum e Aa'd Ko Daboor Se Halaak Kiya Uski Tafseel Yeh Hai Ke, (Daboor Magrib Se Chalne Waali Aa'ndhi Ko Kehte Hai'n, Aa'd Se Muraad Aus Bin Iram Bin Saam Bin Nooh Alaihissalaam Ka Beta Hai Uski Aulaad 13 Qabeelo'n Par Mushtamil Thi Yeh Log Ahqaaf (Ret Ke Buland Teele Ya Pahaado'n Me'n Banaaye Huwe Gaar Yeh Maqaam e Hazar Maut Yaman Ke Qareeb Tha) Me'n Rehte The Jab Unho'n Ne Hazrat Hood Alaihissalaam Ki Naafarmaani Ki Aur Unki Musalsal Tableeg Ke Baawajood Allah Par Imaan Nahee'n Laaye To Allah Ta'ala Ne 7 Raate'n Aur 8 Din Tak Musalsal Sakht Tand Wa Tez Aa'ndhi Bheji, Jisne Unko Halaak Kar Diya, Yeh Log Apni Quwwat Par Bahot Takabbur Karte The Lekin Allah Ta'ala Ke Azaab Ke Saamne Khajoor Ke Khokhle Tano'n Ki Tarah Pade Reh Gaye (Dekhe'n Sureh Haaqqa, Aayat No.6 Ta Aayat No.8)
Hazrat Abu Hurairah Radiallahu Anhu Bayaan Karte Hai'n Ke Nabi e Kareem ﷺ Ne Irshaad Farmaaya, Uss Waqt Tak Qayaamat Qaayem Nahee'n Hogi Hatta Ke Ilm Utha Liya Jaayega Aur Ba Kasrat Zalzale Aaye'n Aur Zamaana Ek Doosre Ke Qareeb Ho Aur Fitno'n Ka Zahoor Ho Aur Harj Zyaadah Ho Aur Woh Qatl Hai, Aur Tum Me'n Maal Zyaadah Hoga, Pas Woh Logo'n Me'n Phail Jaayega.
Riwaayat Hai Naafe Se, Woh Riwaayat Karte Hai'n Hazrat Ibne Umar Radiallahu Anhuma Se Ke Hazrat Ibne Umar Radiallahu Anhuma Ne Du'aa Ki, Aye Allah ! Humaare Shaam Me'n Barkat De Aur Yaman Me'n Barkat De, Hazrat Ibne Umar Radiallahu Anhuma Ne Bayaan Kiya Ke, Sahaaba e Kiraam Ne Kaha, Aur Humaare Najd Me'n, Hazrat Ibne Umar Radiallahu Anhuma Ne Kaha, Aapne Farmaaya, Aye Allah ! Humaare Shaam Aur Humaare Yaman Me'n Barkat De, Hazrat Ibne Umar Radiallahu Anhuma Ne Bayaan Kiya, Sahaaba e Kiraam Ne Kaha, Aur Humaare Najd Me'n, Aapne Farmaaya, Wahaa'n Zalzale Aur Fitne Barpa Ho'nge Aur Wahee'n Se Shaitaan Ka See'ng Tulu Hoga. (Iss Hadees Me'n Hai Ke Hazrat Ibne Umar Radiallahu Anhuma Ne Du'aa Ki Haalaa'nke Doosri Hadees Aur Isi Hadees Ke Aage Ke Alfaaz Ispar Waazeh Hai Ke Yeh Du'aa Rasoolullah ﷺ Ne Ki Hai)
Zaid Bin Khaalid Juhani Ne Bayaan Kiya Ke Rasoolullah ﷺ Ne Hudaibiya Me'n Subah Ki Namaaz Padhaayi Uss Waqt Aasmaan Par Raat Ki Baarish Ka Asar Tha, Jab Nabi e Kareem ﷺ Mud Kar Logo'n Ki Taraf Mutawajjeh Huwe To Farmaaya, Kya Tum Jaante Ho Ke Tumhaare Rab Ne Kya Farmaaya? Sahaaba e Kiraam Ne Kaha, Allah Aur Uske Rasool Hi Zyaadah Jaante Hai'n (Tab Aap ﷺ Ne Bataaya) Allah Ta'ala Ne Farmaaya, Mere Bande Ne Iss Haal Me'n Subah Ki Ke Ba'az Mujh Par Imaan Laane Waale The Aur Ba'az Mera Kufr Karne Waale The, So Jinho'n Ne Kaha Ke Allah Ke Fazl Aur Uski Rehmat Se Baarish Huwi Woh Mujh Par Imaan Laane Waale The Aur Sitaaro'n Ka Kufr Karne Waale The, Aur Jinho'n Ne Kaha Ke Fulaa'n Fulaa'n Sitaare Ki Wajah Se Baarish Huwi To Woh Mera Kufr Karne Waale The Aur Sitaaro'n Par Imaan Laane Waale The.
Hazrat Ibne Umar Radiallahu Anhuma Ne Bayaan Kiya Ke Nabi e Kareem ﷺ Ne Irshaad Farmaaya, Gaib Ki 5 Chaabiyaa'n Hai'n, Jinko Allah Ke Siwa Koi Nahee'n Jaanta, Koi Shakhs Nahee'n Jaanta Ke Kal Kya Hoga, Aur Koi Shakhs Nahee'n Jaanta Ke Maa'on Ke Peto'n Me'n Kya Hai, Aur Koi Shakhs Nahee'n Jaanta Ke Woh Kal Kya Karega, Aur Koi Shakhs Nahee'n Jaanta Ke Woh Zameen Par Kis Jagah Marega, Aur Koi Shakhs Nahee'n Jaanta Ke Baarish Kab Hogi. (Iss Hadees Ke Baawajood Hum Dekhte Hai'n Ke Mustaqbil Ki Bahot Si Baate'n Rasoolullah ﷺ Ne Bataayi Hai'n To Iska Matlab Huwa Ke Rasoolullah ﷺ Ko Yeh Mustaqbil Ki Gaibi Baato'n Ka Ilm Allah Ta'ala Ne Ata Kiya Hai Rasoolullah ﷺ Ko Zaati Taur Par Gaib Ka Ilm Nahee'n Tha, Aur Allah Ta'ala Ko Gaib Ka Ilm Kisi Ne Bataaya Nahee'n Hai Balke Allah Ta'ala Jumla Guyoob Ko Apne Zaati Ilm Se Jaanta Hai)
Bukhari Shareef : Kitaabul Istisqaa
|
Bukhari Shareef : کتاب الِاسْتِسْقَاءِ
|
•