Hazrat Abi Bakrah Radiallaahu Anhu Ne Bayaan Kiya Ke Ham Rasoolullaah ﷺ Ke Paas The Pas Sooraj Ko Gahen Lag Gaya, To Nabi e Kareem ﷺ Apni Chaadar Ko Ghaseet'te Huwe Uthe, Aap ﷺ Masjid Me'n Daakhil Huwe, Pas Ham Bhi Daakhil Huwe, Pas Aapne ﷺ Hamko 2 Rak'at Namaaz Padhaayi Hatta Ke Sooraj Munkashif Ho Gaya, Pas Nabi e Kareem ﷺ Ne Irshaad Farmaaya, Beshak Sooraj Aur Chaa'nd Ko Kisi Ki Maut Ki Wajah Se Gahen Nahee'n Lagta, Pas Jab Tum Dono'n Ko (Gehnaaya Huwa) Dekho To Namaaz Padho Aur Du'aa Karo Hatta Ke Tum Par Jo Gahen Hai Woh Door Ho Jaaye.
Hazrat Abu Mas'ood Radiallaahu Anhu Bayaan Karte Hai'n Ke Nabi e Kareem ﷺ Ne Irshaad Farmaaya, Sooraj Aur Chaa'nd Ko Logo'n Me'n Se Kisi Ki Maut Ki Wajah Se Gahen Nahee'n Lagta, Lekin Yeh Allaah Ki Nishaaniyo'n Me'n Se 2 Nishaaniyaa'n Hai'n, Pas Jab Tum In Nishaaniyo'n Ko Dekho To Khade Hokar Namaaz Padho.
Hazrat Ibne Umar Radiallaahu Anhuma Yeh Khabar Dete Hai'n Ke Nabi e Kareem ﷺ Ne Irshaad Farmaaya, Ke Sooraj Aur Chaa'nd Ko Kisi Ki Maut Aur Hayaat Ki Wajah Se Gahan Nahi Lagta, Lekin Yeh Dono'n Allaah Ki Nishaaniyo'n Me'n Se 2 Nishaaniyaa'n Hai'n, Pas Jab Tum In Dono'n Ko Dekho To Namaaz Padho.
Hazrat Mugeerah Bin Sho'ba Radiallaahu Anhu Ne Bayaan Kiya Ke Rasoolullaah ﷺ Ke Ahed Me'n Sooraj Ko Gahen Lag Gaya Jis Din (Aap ﷺ Ke Shehzaade) Hazrat Ibraaheem Radiallaahu Anhu Faut Huwe The, To Logo'n Ne Kaha, Hazrat Ibraaheem Ki Maut Ki Wajah Se Sooraj Ko Gahen Lag Gaya, Tab Rasoolullaah ﷺ Ne Irshaad Farmaaya, Beshak Sooraj Aur Chaa'nd Ko Kisi Ki Maut Aur Hayaat Ki Wajah Se Gahen Nahee'n Lagta, Pas Jab Tum (Gahen) Dekho To Namaaz Padho Aur Allaah Paak Se Du'aa Karo.
Hazrat Aa'yesha Radiallaahu Anha Bayaan Karti Hai'n Ke Nabi e Kareem ﷺ Ke Ahed Me'n Sooraj Ko Gahen Lag Gaya To Rasoolullaah ﷺ Ne Logo'n Ko Namaaz Padhaayi, Pas Aap ﷺ Ne Bahot Lamba Qayaam Kiya, Phir Ruku Kiya To Bahot Lamba Ruku Kiya, Phir Aap ﷺ Ne Qayaam Kiya To Bahot Lamba Qayaam Kiya, Aur Yeh Qayaam Pehle Qayaam Se Kam Tha, Phir Aap ﷺ Ne Ruku Kiya Pas Lamba Ruku Kiya, Aur Yeh Ruku Pehle Ruku Se Kam Tha, Phir Aap ﷺ Ne Sajdah Kiya, Pas Lamba Sajdah Kiya, Phir Aap ﷺ Ne Doosri Rak'at Pehli Rak'at Ki Misl Padhi, Phir Aap ﷺ Mude Aur Sooraj Saaf Ho Chuka Tha, Phir Aap ﷺ Ne Logo'n Ko Khutba Diya, Pas Allaah Paak Ki Hamd Wa Sana Ki, Phir Farmaaya, Sooraj Aur Chaa'nd Allaah Paak Ki Nishaaniyo'n Me'n Se 2 Nishaaniyaa'n Hai'n, Inko Na Kisi Ki Maut Ki Wajah Se Gahen Lagta Hai Na Kisi Ki Hayaat Ki Wajah Se, Pas Jab Tum Sooraj Gahen Dekho To Allaah Paak Se Du'aa Karo Aur Takbeer Padho Aur Namaaz Padho Aur Sadqa Karo, Phir Farmaaya, Aye Ummat e Muhammad ! Allaah Ki Qasam, Tum Me'n Se Koi Shakhs Allaah Se Zyaadah Gairat Waala Nahee'n Hai, Jab Uska Bandah Zina Kare Ya Uski Bandi Zina Kare Aur Aye Ummat e Muhammad ! Allaah Ki Qasam ! Agar Tum In Cheezo'n Ko Jaan Lete Jinko Mai'n Jaanta Hoo'n To Tum Kam Ha'nste Aur Zyaadah Rote.
Hazrat Abdullaah Bin Umar Radiallaahu Anhuma Ne Bayaan Kiya Ke Jab Rasoolullaah ﷺ Ke Ahed Me'n Sooraj Ko Gahen Lag Gaya To Yeh Nida Ki Gayi Ke Jamaa'at Tayyaar Hai.
Baab, Sooraj Gahen Ki Namaaz Me'n Imaam Ka Khutba, Aur Hazrat Aa'yesha Radiallaahu Anha Aur Hazrat Asma (Bint Abi Bakar Siddeeq Radiallaahu Anhu) Ne Kaha, Nabi e Kareem ﷺ Ne Khutba Diya, Hazrat Aa'yesha Radiallaahu Anha Zauja Nabi e Kareem ﷺ Bayaan Karti Hai'n Ke Nabi e Kareem ﷺ Ki Zindagi Me'n Sooraj Ko Gahen Lag Gaya, So Nabi e Kareem ﷺ Masjid Ki Taraf Nikle, Pas Musalmaano'n Ne Aap ﷺ Ke Peechhe Saf Banaayi, Pas Aap ﷺ Ne Allaahu Akbar Kaha, Pas Rasoolullaah ﷺ Ne Taweel Qir'aat Ki, Phir Aap ﷺ Ne Allaahu Akbar Kaha, Pas Taweel Ruku Kiya, Phir Aap ﷺ Ne "Sami'allaahu Liman Hamidah" Kaha, Pas Aap ﷺ Khade Ho Gaye Aur Sajdah Nahee'n Kiya Aur Taweel Qir'aat Ki Aur Yeh Pehli Qir'aat Se Kam Thi, Phir Aap ﷺ Ne Allaahu Akbar Kaha Aur Taweel Ruku Kiya Aur Yeh Pehle Ruku Se Kam Tha, Phir Aap ﷺ Ne "Sami'allaahu Liman Hamidah Rabbana Lakal Hamd" Kaha, Phir Sajdah Kiya, Phir Doosri Rak'at Pehli Rak'at Ki Misl Padhi, Pas 4 Sajdo'n Me'n 4 Ruku Mukammal Kar Diye Aur Aap ﷺ Ke Mudne Se Pehle Sooraj Saaf Ho Gaya Tha, Phir Aap ﷺ Khade Huwe Aur Allaah Ki Aisi Hamd Wa Sana Ki Jo Uski Shaayaan e Shaan Hai, Phir Farmaaya, Yeh Allaah Ki Nishaaniyo'n Me'n Se 2 Nishaaniyaa'n Hai'n, Inko Kisi Ki Maut Ki Wajah Se Gahen Nahee'n Lagta Na Kisi Ki Hayaat Ki Wajah Se Gahen Lagta Hai, Pas Jab Tum Inko Dekho To Namaaz Ki Panaah Me'n Aao. Aur Kaseer Bin Abbaas Ba Kasrat Yeh Hadees Bayaan Karte The Ke Hazrat Abdullaah Bin Abbaas Radiallaahu Anhu Jis Din Sooraj Ko Gahen Lag Jaata Iss Hadees Ki Misl Bayaan Karte Az Urwah Az Aa'yesha Radiallaahu Anha, Pas Mai'n Ne Urwah Se Kaha Ke Jis Din Madeena Me'n Gahen Lagta Tha Uss Din Tumhaare Bhaayi Subah Ki Namaaz Ki 2 Rak'ato'n Se Zyaadah Nahee'n Padhte The, Urwaah Ne Kaha, Haa'n ! Lekin Unho'n Ne Sunnat Me'n Khata Ki.
Baab, Sooraj Gahen Keliye, Kasafatish Shams, Kaha Jaaye Ya Khasafatish Shams Kaha Jaaye, Aur Allaah Paak Ne Farmaaya Hai, Wa Khasafal Qamar, (Sureh Qiyaamah, Aayat No.8) Ya'ni Chaa'nd Ko Gahen Lag Gaya, Urwah Ne Khabar Di Ke Hazrat Aa'yesha Radiallaahu Anha Zauja Nabi e Kareem ﷺ Ne Unko Khabar Di Ke Jis Din Khusoofish Shams Huwa (Sooraj Ko Gahen Laga) Uss Din Aap ﷺ Ne Khade Hokar Allaahu Akbar Padha, Phir Bahot Taweel Qir'aat Ki, Phir Bahot Taweel Ruku Kiya, Phir Apna Sar Uthaaya, Pas Padha "Sami'allaahu Liman Hamidah" Aur Usi Tarah Khade Rahe, Phir Aap ﷺ Ne Taweel Qir'aat Ki Aur Yeh Pehli Qir'aat Se Kam Thi, Phir Aap ﷺ Ne Taweel Ruku Kiya Aur Yeh Pehli Rak'at Se Kam Tha, Phir Aap ﷺ Ne Taweel Sajdah Kiya, Phir Aap ﷺ Ne Doosri Rak'at Bhi Pehli Rak'at Ki Misl Padhi, Phir Aap ﷺ Ne Salaam Pher Diya Aur Uss Waqt Sooraj Saaf Ho Chuka Tha, Phir Aap ﷺ Ne Logo'n Ko Khutba Diya, Pas Sooraj Aur Chaa'nd Ke Gahen Me'n Farmaaya, Yeh Dono'n Allaah Ki Nishaaniyo'n Me'n Se Nishaaniyaa'n Hai'n, Inhe'n Kisi Ki Maut Ki Wajah Se Gahen Nahee'n Lagta Na Kisi Ki Hayaat Ki Wajah Se Gahen Lagta Hai, Pas Jab Tum In Dono'n Ko Dekho To Namaaz Ki Panaah Me'n Aao.
Hazrat Abi Bakrah Radiallaahu Anhu Ne Bayaan Kiya Ke Nabi e Kareem ﷺ Ne Irshaad Farmaaya Ke Sooraj Aur Chaa'nd Allaah Ki Nishaaniyo'n Me'n Se Nishaaniyaa'n Hai'n, Inhe'n Kisi Ki Maut Ki Wajah Se Gahen Nahee'n Lagta Na Kisi Ki Hayaat Ki Wajah Se, Lekin Allaah Paak Isse Apne Bando'n Ko Daraata Hai. Aur Abu Ubaidullaah Ne Kaha, Abdul Waaris Aur Sho'ba Aur Khaalid Bin Abdullaah Aur Hammaad Bin Salma Ne Az Yoonus Zikr Nahee'n Kiya Ke Allaah Paak Unse Apne Bando'n Ko Daraata Hai Aur Yoonus Ki Mutaabe'at Ash'as Ne Ki Hai Az Hasan Aur Iski Mutaabe'at Moosa Ne Ki Hai, Az Mubaarak Az Hasan, Unho'n Ne Kaha, Mujhe Abu Bakrah Radiallaahu Anhu Ne Khabar Di Az Nabi e Kareem ﷺ Ke Allaah Paak Inse Apne Bando'n Ko Daraata Hai.
Hazrat Aa'yesha Radiallaahu Anha Zauja Nabi e Kareem ﷺ Bayaan Karti Hai'n Ke Unke Paas Ek Yahoodi Aurat Ne Aakar Sawaal Kiya, Pas Aapse Kaha, Allaah Aapko Azaab e Qabar Se Mehfooz Rakhe, Pas Hazrat Aa'yesha Radiallaahu Anha Ne Rasoolullaah ﷺ Se Dariyaaft Kiya, Aaya Logo'n Ko Unki Qabro'n Me'n Azaab Diya Jaayega? To Rasoolullaah ﷺ Ne Usse (Ya'ni Azaab e Qabar Se) Panaah Talab Karte Huwe Farmaaya, (Haa'n Azaab e Qabr Haq Hai).
Phir Rasoolullaah ﷺ Subah Ke Waqt Ek Sawaari Par Sawaar Huwe, Phir Sooraj Ko Gahen Lag Gaya, Phir Nabi e Kareem ﷺ Chaasht Ke Waqt Waapas Aaye, Phir Rasoolullaah ﷺ (Azwaaj Ke) Hujro'n Ke Darmiyaan Se Guzre, Phir Aap Khade Hokar Namaaz Padhne Lage Aur Musalmaan Aapke Peechhe Khade Ho Gaye, Pas Aapne Bahot Taweel Qayaam Kiya, Phir Aapne Bahot Taweel Ruku Kiya, Phir Aapne Ruku Se Sar Uthaaya, Phir Aapne Taweel Qayaam Kiya Aur Yeh Pehle Qayaam Se Kam Tha, Phir Aapne Taweel Ruku Kiya Aur Yeh Pehle Ruku Se Kam Tha, Phir Aapne Ruku Se Sar Uthaakar Sajdah Kiya, Phir Aapne Khade Hokar Taweel Qayaam Kiya, Phir Taweel Ruku Kiya, Phir Ruku Se Sar Uthaaya, Phir Taweel Qayaam Kiya Aur Yeh Pehle Qayaam Se Kam Tha, Phir Taweel Ruku Kiya Aur Yeh Pehle Ruku Se Kam Tha, Phir Ruku Se Sar Uthaaya, Pas Sajdah Kiya Aur Aap Namaaz Se Mude, Phir Jo Allaah Ne Chaaha Woh Aapne Kaha, Phir Logo'n Ko Hukm Diya Ke Woh Azaab e Qabar Se Panaah Talab Kare'n.
Abdullaah Bin Umar Radiallaahu Anhu Ne Bayaan Kiya Ke Jab Nabi e Kareem ﷺ Ke Ahed Me'n Sooraj Ko Gahen Lag Gaya To Yeh Nida Ki Gayi Ke Namaaz Tayyaar Hai, Phir Nabi e Kareem ﷺ Ne Ek Sajde Ke Saath 2 Ruku Kiye, Phir Aap ﷺ Baith Gaye, Phir Sooraj Saaf Ho Gaya, Hazrat Aa'yesha Radiallaahu Anha Ne Bataaya, Mai'n Ne Isse Pehle Kabhi Itna Taweel Sajdah Nahee'n Kiya.
Hazrat Abdullaah Bin Abbaas Radiallaahu Anhuma Ne Bayaan Kiya Ke Nabi e Kareem ﷺ Ke Ahed Me'n Sooraj Ko Gahen Lag Gaya, Pas Rasoolullaah ﷺ Ne Namaaz Padhaayi, So Aap ﷺ Ne Sureh Baqarah Ki Qir'aat Ke Lag Bhag Qayaam Kiya (Ya'ni Jitni Der Poori Sureh Baqarah Tilaawat Karne Me'n Lagta Hai Utni Der Ke Lag Bhag Qayaam Kiya), Phir Aap ﷺ Ne Taweel Ruku Kiya, Phir Aap ﷺ Ne Ruku Se Sar Uthaaya, Pas Taweel Qayaam Kiya Aur Yeh Pehle Qayaam Se Kam Tha Aur Phir Aap ﷺ Ne Taweel Ruku Kiya Aur Yeh Pehle Ruku Se Kam Tha, Phir Sajdah Kiya, Phir Taweel Qayaam Kiya Aur Yeh Pehle Qayaam Se Kam Tha, Phir Aap ﷺ Ne Taweel Ruku Kiya Aur Yeh Pehle Ruku Se Kam Tha, Phir Aap ﷺ Ne Ruku Se Sar Uthaaya, Phir Aap ﷺ Ne Taweel Qayaam Kiya Aur Yeh Pehle Qayaam Se Kam Tha, Phir Aap ﷺ Ne Lamba Ruku Kiya Aur Yeh Pehle Ruku Se Kam Tha, Phir Aap ﷺ Ne Sajdah Kiya, Phir Aap ﷺ Logo'n Ki Taraf Mude Aur Uss Waqt Sooraj Saaf Ho Chuka Tha, Pas Aap ﷺ Ne Farmaaya, Sooraj Aur Chaa'nd Allaah Ki Nishaaniyo'n Me'n Se 2 Nishaaniyaa'n Hai'n, Inko Kisi Ki Maut Ki Wajah Se Gahen Lagta Hai Na Kisi Ki Hayaat Ki Wajah Se Gahen Lagta Hai, Pas Jab Tum Isko Dekho To Allaah Ko Yaad Karo, Sahaaba Ne Kaha, Ya Rasoolallaah ﷺ ! Hamne Aap ﷺ Ko Dekha Hai Ke Aap ﷺ Apni Jagah Par Khade Huwe Kisi Cheez Ko Pakda Hai, Phir Hamne Aap ﷺ Ko Peechhe Hat'te Huwe Dekha Hai, Aap ﷺ Ne Irshaad Farmaaya, Mai'n Ne Jannat Ko Dekha, Pas Mai'n Ne Ek Gosha Pakda, Agar Mai'n Usko Le Leta To Tum Usko Jab Tak Duniya Baaqi Rehti Khaate Rehte Aur Mujhe Dozakh Dikhaayi Gayi Aur Mai'n Ne Aaj Jaisa Qabeeh Manzar Kabhi Nahee'n Dekha Aur Mai'n Ne Dozakh Waalo'n Me'n Aksar Aurato'n Ko Dekha, Sahaaba e Kiraam Ne Poochha Woh Kyu'n? Ya Rasoolallaah ﷺ ! Aap ﷺ Ne Farmaaya, Unke Kufr Ki Wajah Se, Kaha Gaya Ke Woh Allaah Ke Saath Kufr Karti Hai? Aap ﷺ Ne Farmaaya, Woh Khaawind Ki Na Shukri Karti Hai, Aur Uski Neki Ka Inkaar Karti Hai, Agar Tum Unme'n Se Kisi Ek Ke Saath Tamaam Umar Bhi Neki Karte Raho Phir Woh Kabhi Tumse Thodi Si Kami Dekhe To Woh Kahegi, Mai'n Ne Tumse Kabhi Koi Achchhaayi Nahee'n Dekhi.
Hazrat Asma Bint Abi Bakar Radiallaahu Anhuma Ne Bayaan Kiya Ke Jab Sooraj Ko Gahen Lag Gaya To Mai'n Hazrat Aa'yesha Radiallaahu Anha Zauja Nabi e Kareem ﷺ Ke Paas Aayi, Uss Waqt Log Khade Huwe Namaaz Padh Rahe The Aur Hazrat Aa'yesha Radiallaahu Anha Bhi Khadi Huwi Namaaz Padh Rahi Thi, Mai'n Ne Poochha Ke Logo'n Ko Kya Huwa Hai? Hazrat Aa'yesha Radiallaahu Anha Ne Apne Haath Se Aasmaan Ki Taraf Ishaarah Kiya, Aur Kaha, Sub'haan Allaah ! Mai'n Ne Poochha Yeh Koi Nishaani Hai? Hazrat Aa'yesha Radiallaahu Anha Ne Ishaarah Kiya, Haa'n ! Hazrat Asma Ne Kaha, Mai'n Khadi Rahi Hatta Ke Mujh Par Behoshi Taari Ho Gayi, Phir Mai'n Apne Sar Ke Upar Paani Daalne Lagi, Jab Rasoolullaah ﷺ Namaaz Se (Faarig Hokar) Logo'n Ki Taraf Mude To Aapne Allaah Paak Ki Hamd Aur Sana Ki, Phir Farmaaya, Mai'n Ne Jis Cheez Ko Bhi Pehle Nahee'n Dekha Tha Usko Mai'n Ne Apni Iss Jagah Dekh Liya Hai, Hatta Ke Jannat Aur Dozakh Ko Bhi Dekh Liya Hai, Aur Meri Taraf Yeh Wahi Ki Gayi Hai Ke Anqareeb Qabro'n Me'n Tumhaari Aazmaa'ish Ki Jaayegi Jo Dajjaal Ke Fitne Ki Misl Ya Qareeb Hogi, (Raawi Ne Kaha, Mujhe Pata Nahee'n Ke Hazrat Asma Ne Kya Kaha Tha), Tum Me'n Se Kisi Ek Ke Paas (Farishte) Ko Laaya Jaayega, Phir Usse Kaha Jaayega, Uss Shakhs (Nabi e Kareem ﷺ) Ke Muta'alliq Tumhe'n Kya Ilm Hai? Pas Raha Momin Ya Yaqeen Karne Waala (Raawi Ne Kaha Mujhe Pata Nahee'n Ke Hazrat Asma Ne Kya Kaha Tha), Hazrat Asma Ne Kaha, Woh Shakhs Kahega, Yeh Muhammad Rasoolullaah ﷺ Hai'n ! Yeh Hamaare Paas Mo'jezaat Aur Hidaayat Lekar Aaye The, Pas Hamne Unke Paigaam Ko Qabool Kiya Aur Unpar Imaan Laaye Aur Unki Pairwi Ki, To Usse Kaha Jaayega Tum Aaraam Se So Jaao, Hame'n Ma'loom Tha Ke Beshak Tum Yaqeen Karne Waale Ho Aur Raha Munaafiq Ya Shak Karne Waala (Mujhe Ma'loom Nahee'n Ke Hazrat Asma Ne Kya Kaha Tha), Woh Kahega, Mai'n Nahee'n Jaanta Mai'n Ne Logo'n Ko Kuchh Kehte Suna To Mai'n Ne Bhi Keh Diya.
Hazrat Asma Radiallaahu Anha Bayaan Karti Hai'n Ke Nabi e Kareem ﷺ Ne Sooraj Gahen Me'n Gulaam Aazaad Karne Ka Hukm Diya.
Hazrat Aa'yesha Radiallaahu Anha Woh Bayaan Karti Hai'n Ke Ek Yahoodi Aurat Unke Paas Sawaal Karne Aayi To Usne Kaha, Allaah Aapko Azaab e Qabar Se Apni Panaah Me'n Rakhe, To Hazrat Aa'yesha Radiallaahu Anha Ne Rasoolullaah ﷺ Se Sawaal Kiya, Kya Logo'n Ko Unki Qabro'n Me'n Azaab Diya Jaayega? To Rasoolullaah ﷺ Ne Allaah Se Panaah Maa'ngte Huwe Farmaaya, (Yeh Hadees Yahee'n Tak Hai).
Phir Subah Ko Rasoolullaah ﷺ Sawaari Par Sawaar Huwe, Pas Sooraj Ko Gahen Lag Gaya, Phir Chaasht Ke Waqt Rasoolullaah ﷺ Laut Aaye, Phir Rasoolullaah ﷺ Azwaaj e Mutahharaat Ke Hujro'n Ke Darmiyaan Se Guzre, Phir Aap ﷺ Khade Huwe, Pas Aap ﷺ Ne Namaaz Padhi, Aur Sahaaba e Kiraam Aap ﷺ Ke Peechhe Khade Ho Gaye, Pas Aap ﷺ Ne Taweel Qayaam Kiya, Phir Aap ﷺ Ne Taweel Ruku Kiya, Phir Aap ﷺ Ne Ruku Se Sar Uthaaya, Phir Aap ﷺ Ne Taweel Qayaam Kiya, Aur Yeh Pehle Qayaam Se Kam Tha, Phir Aap ﷺ Ne Taweel Ruku Kiya Aur Yeh Pehle Ruku Se Kam Tha, Phir Aap ﷺ Ne Sar Uthaaya, Pas Aap ﷺ Ne Taweel Sajdah Kiya, Phir Aap ﷺ Ne Qayaam Kiya Pas Taweel Qayaam Kiya, Aur Yeh Pehle Qayaam Se Kam Tha, Phir Aap ﷺ Ne Taweel Ruku Kiya Aur Yeh Pehle Ruku Se Kam Tha, Phir Aap ﷺ Ne Taweel Qayaam Kiya Aur Yeh Pehle Qayaam Se Kam Tha, Phir Aap ﷺ Ne Taweel Ruku Kiya Aur Yeh Pehle Ruku Se Kam Tha, Phir Aap ﷺ Ne Sajdah Kiya, Aur Yeh Pehle Sajde Se Kam Tha, Phir Aap ﷺ Namaaziyo'n Ki Taraf Mude, Pas Jo Allaah Ne Chaaha Woh Rasoolullaah ﷺ Ne Irshaad Farmaaya, Phir Aap ﷺ Ne Namaaziyo'n Ko Yeh Hukm Diya Ke Woh Allaah Paak Se Azaab e Qabr Se Panaah Talab Kare'n.
Baab, Kisi Ki Maut Aur Hayaat Ki Wajah Se Sooraj Ko Gahen Nahee'n Lagta, Ise Hazrat Abu Bakrah, Hazrat Mugeerah, Hazrat Abu Moosa, Hazrat Ibne Abbaas, Aur Hazrat Ibne Umar Radiallaahu Anhum Ajma'een Ne Riwaayat Kiya, (Aur Hadees No.1057 Yeh Hai Ke) Hazrat Abu Mas'ood Radiallaahu Anhu Ne Bayaan Kiya Ke Nabi e Kareem ﷺ Ne Irshaad Farmaaya, Sooraj Aur Chaa'nd Ko Kisi Ki Maut Ki Wajah Se Gahen Nahee'n Lagta Na Kisi Ki Hayaat Ki Wajah Se Gahen Lagta Hai, Lekin Yeh Dono'n Allaah Ki Nishaaniyo'n Me'n Se Nishaaniyaa'n Hai'n, Pas Jab Tum In 2 Nishaaniyo'n Ko Dekho To Namaaz Padho.
Hazrat Aa'yesha Radiallaahu Anha Ne Bayaan Kiya Ke Nabi e Kareem ﷺ Ke Ahed Me'n Sooraj Ko Gahen Lag Gaya To Nabi e Kareem ﷺ Ne Khade Hokar Logo'n Ko Namaaz Padhaayi, Pas Aapne Taweel Qir'aat Ki, Phir Aapne Ruku Kiya, Pas Taweel Ruku Kiya, Phir Aapne Ruku Se Sar Uthaaya Pas Taweel Qir'aat Ki Aur Yeh Pehli Qir'aat Se Kam Thi, Phir Ruku Kiya Pas Taweel Ruku Kiya Yeh Pehle Ruku Se Kam Tha, Phir Ruku Se Sar Uthaaya, Pas 2 Sajde Kiye, Phir Khade Huwe, Pas Farmaaya, Beshak Sooraj Aur Chaa'nd Ko Kisi Ki Maut Ki Wajah Se Gahen Nahee'n Lagta Na Kisi Ki Hayaat Ki Wajah Se Gahen Lagta Hai, Lekin Yeh Allaah Ki Nishaaniyo'n Me'n Se 2 Nishaaniyaa'n Hai'n, Allaah Inhe'n Apne Bando'n Ko Dikhaata Hai, Pas Jab Tum Inko Dekho To Namaaz Ki Panaah Me'n Aao.
Baab, Sooraj Gahen Me'n Zikr Karna, Isko Hazrat Ibne Abbaas Radiallaahu Anhuma Ne Riwaayat Kiya Hai, (Aur Hadees No.1059 Yeh Hai Ke) Hazrat Abu Moosa Radiallaahu Anhu Ne Bayaan Kiya Ke Sooraj Ko Gahen Lag Gaya, Pas Rasoolullaah ﷺ Ghabraaye Huwe Khade Huwe, Aapko Yeh Khauf Tha Ke Qayaamat Aa Gayi Hai, Pas Aap Masjid Me'n Aaye, So Aapne Bahot Taweel Qayaam Kiya Aur Ruku Kiya Aur Sujood Ke Saath Namaaz Padhaayi, Jo Mai'n Ne Aapko Kabhi Padhaate Huwe Nahee'n Dekhi Thi, Aur Aapne Farmaaya, Yeh Woh Nishaaniyaa'n Hai'n Jinko Allaah Paak Bhejta Hai Jo Kisi Ki Maut Ki Wajah Se Nahee'n Hoti Na Kisi Ki Hayaat Ki Wajah Se Hoti Hai, Lekin Allaah Inke Sabab Se Apne Bando'n Ko Daraata Hai, Pas Jab Tum Unme'n Se Kisi Cheez Ko Dekho To Allaah Ke Zikr Aur Usse Du'aa Aur Astagfaar Ki Panaah Me'n Aao.
Baab, Sooraj Gahen Ki Namaaz Me'n Du'aa Karna, Hazrat Abu Moosa Radiallaahu Anhu Aur Hazrat Aa'yesha Radiallaahu Anha Ne Sooraj Gahen Ki Namaaz Me'n Nabi e Kareem ﷺ Se Du'aa Ki Riwaayat Ki Hai, (Aur Hadees No.1060 Yeh Hai Ke) Hazrat Mugeerah Bin Sho'ba Radiallaahu Anhu Kehte Hai'n Ke Jis Din Hazrat Ibraaheem (Nabi e Kareem ﷺ Ke Saahebzaade) Radiallaahu Anhu Faut Huwe To Logo'n Ne Kaha, Hazrat Ibraaheem Radiallaahu Anhu Ki Wafaat Ki Wajah Se Sooraj Ko Gahen Lag Gaya Hai, Tab Rasoolullaah ﷺ Ne Irshaad Farmaaya, Sooraj Aur Chaa'nd Allaah Ki Nishaaniyo'n Me'n Se 2 Nishaaniyaa'n Hai'n, Inko Kisi Ki Maut Ki Wajah Se Gahen Nahee'n Lagta Na Kisi Ki Hayaat Ki Wajah Se Gahen Lagta Hai, Pas Jab Tum Inko Dekho To Allaah Se Du'aa Karo Aur Namaaz Padho Hatta Ke Sooraj Saaf Ho Jaaye.
Hazrat Asma Radiallaahu Anha Ne Bayaan Kiya, Pas Rasoolullaah ﷺ Namaaz Se Mude Aur Uss Waqt Sooraj Munkashif Ho Chuka Tha, Phir Aapne Khutba Diya Aur Allaah Ki Shaan Ke Laayeq Hamd Ki, Phir Farmaaya, Amma Ba'ad, (Ya'ni Hamd Wa Sana Ke Ba'ad).
Hazrat Abi Bakrah Radiallaahu Anhu Ne Bayaan Kiya Ke Rasoolullaah ﷺ Ke Ahed Me'n Sooraj Ko Gahen Lag Gaya, Pas Rasoolullaah ﷺ Ne 2 Rak'at Namaaz Padhaayi.
Hazrat Abu Bakrah Radiallaahu Anhu Ne Bayaan Kiya Ke Nabi e Kareem ﷺ Ke Ahed Me'n Sooraj Ko Gahen Lag Gaya, Pas Aap ﷺ Apni Chaadar Ko Ghaseet'te Huwe Nikle Hatta Ke Masjid Ki Taraf Paho'nche Aur Log Bhi Jhapat Kar Aap ﷺ Ki Taraf Paho'nche, Aap ﷺ Ne Unko 2 Rak'at Namaaz Padhaayi, Pas Sooraj Saaf Ho Gaya, Phir Aap ﷺ Ne Farmaaya, Sooraj Aur Chaa'nd Allaah Ki Nishaaniyo'n Me'n Se 2 Nishaaniyaa'n Hai'n Aur Unko Kisi Ki Maut Ki Wajah Se Gahen Nahee'n Lagta, Aur Jab Aisa Ho Jaaye To Namaaz Padho Aur Du'aa Karo Hatta Ke Woh Gahen Tum Se Door Ho Jaaye Aur Iski Wajah Yeh Thi Ke Uss Din Nabi e Kareem ﷺ Ke Saahabzaade Faut Ho Gaye The Jinka Naam (Hazrat) Ibraaheem (Radiallaahu Anhu) Tha, Pas Logo'n Ne Unke Muta'alliq Kaha Tha (Ke Unki Maut Ki Wajah Se Sooraj Ko Gahen Lag Gaya Hai).
Hazrat Aa'yesha Radiallaahu Anha Ne Bayaan Kiya Ke Nabi e Kareem ﷺ Ne Sooraj Gahan Ki 2 Rak'ato'n Me'n 4 Ruku Kiye Aur Pehli Rak'at Doosri Rak'at Se Lambi Thi.
Riwaayat Hai Hazrat Aa'yesha Radiallaahu Anha Se Ke Nabi e Kareem ﷺ Ne Chaa'nd Gahen Ki Namaaz Me'n Ba Aawaaz Buland Qir'aat Ki, Pas Jab Aap ﷺ Qir'aat Se Faarig Huwe To Aap ﷺ Ne "Allaahu Akbar" Kaha, Pas Ruku Kiya Aur Jab Ruku Se Sar Uthaaya To Kaha "Samiallaahu Liman Hamidah Rabbana Walakal Hamd" Phir Aap ﷺ Chaa'nd Gahen Ki Namaaz Isi Tarah Padhte Rahe, 4 Ruku 2 Rak'ato'n Aur 4 Sajdo'n Me'n.
Auzaayi Wagairah Ne Kaha, Mai'n Ne Zohri Se Suna Az Urwah Az Hazrat Aa'yesha Radiallaahu Anha Ke Rasoolullaah ﷺ Ke Ahed Me'n Sooraj Ko Gahen Lag Gaya, Pas Aap ﷺ Ne Ek Munaadi Bheja Ke Namaaz Ke Liye Ijtema Kiya Jaaye, Aap ﷺ Ne Aage Badh Kar 2 Rak'ato'n Me'n 4 Ruku Aur 4 Sajdo'n Ke Saath Namaaz Padhaayi, Waleed Ne Kaha, Aur Mujhe Abdur Rahmaan Bin Namir Ne Khabar Di Ke Unho'n Ne Ibne Shihaab Se Iski Misl Hadees Suni, Zohri Ne Kaha, Mai'n Ne Kaha, Tumhaara Yeh Bhaayi Abdullaah Bin Zubair Kya Karta Hai Woh Jab Madeena Me'n (Namaaz e Kusoof) Padhta Hai To Subah Ki Namaaz Ki Tarah Sirf 2 Rak'at Padhta Hai? (Urwah Ne) Kaha, Haa'n ! Usne Sunnat Me'n Khata Ki Hai.
Bukhari Shareef : Kitaabul Kusoof
|
Bukhari Shareef : کتاب الكُسُوفِ
|
•