Farmaan e Rasoolullaah ﷺ Hai Ke Islaam Ki Buniyaad 5 Cheezo'n Par Hai Aur Imaan Qaul Fe'l Ka Naam Hai Badhta Bhi Hai Aur Ghat'ta Bhi Hai. Allaah Paak Irshaad Farmaata Hai (Tarjuma) Taake Imaan Waalo'n Ka Imaan Badh Jaaye Aur Hamne Unke Liye Hidaayat Ko Zyaadah Kar Diya Aur Allaah Paak Hidaayat Yaaftah Logo'n Ki Hidaayat Ko Badha Deta Hai Jo Log Hidaayat Yaab Hai'n Allaah Paak Ne Unki Hidaayat Badha Di Aur Unhe'n Parhezgaari Ata Ki Aur Un Logo'n Ka Imaan Badh Jaaye. Allaah Paak Irshaad Farmaata Hai (Tarjuma) Tum Me'n Se Kisi Ke Imaan Ko Usne Badha Diya So Jo Log Imaandaar Hai'n Unka Imaan Usne Badha Diya. Allaah Paak Irshaad Farmaata Hai (Tarjuma) (Logo'n Ne Musalmaano'n Se Kaha) Kaafiro'n Se Daro To Unka Imaan Aur Badh Gaya. Allaah Paak Irshaad Farmaata Hai Unka Imaan Aur Khoowe Tasleem Badhti Hi Ja Rahi Hai, Aur Allaah Paak Keliye Mohabbat Karna Aur Allaah Paak Hi Keliye Nafrat Bhi Imaan Hai. Hazrat Umar Bin Abdul Azeez Radiallaahu Anhu Ne Addi Bin Addi Ko Likh Bheja Ke Imaan Ke Kuchh Faraa'iz Hai'n Kuchh Aqaa'id Hai'n Kuchh Hudood Hai'n Aur Kuchh Sunan Hai'n Jo Koi Unhe'n Poori Tarah Ada Na Karega To Apna Imaan Adhoora Chhodega, Agar Zindagi Baaqi Hai To Mai'n Tumhe'n Yeh Sab Baate'n Likh Kar Bheju'nga Taake Tum Un Par Amal Dar Aamad Karo, Aur Agar Maut Ne Aa Liya To Mujhe Tumhaare Haa'n Rehne Ki Thodi Bhi Khwaahish Nahee'n. Hazrat Ibraaheem Alaihissalaam Ne Farmaaya Tha Taake Mera Dil Mutma'in Ho Jaaye. Hazrat Ma'aaz Bin Jabal Radiallaahu Anhu Ne Ek Baar Aswad Radiallaahu Anhu Se Kaha Tha, Hamaare Paas Baitho Ke Lamhe Bhar Ko Sachche Momin Ho Jaaye'n. Hazrate Ibne Mas'ood Radiallaahu Anhu Ne Farmaaya Yaqeen e Kulliya (Poora Ka Poora) Imaan Hai. Hazrate Abdullaah Bin Umar Radiallaahu Anhu Farmaate Hai'n, Koi Bandah Taqwa Ki Haqeeqat Tak Nahee'n Paho'nch Sakta Jab Tak Mashkook Cheezo'n Ko Iss Khayaal Se Na Chhod Diya Jaaye Ke Shaayad Yeh Mamnu Ho'n. Mujaahid Ne Shara لکم من الدین ماوصی بہ نوحا Ki Tashreeh Karte Huwe Kaha Hai Ke, Hamne Tumhe'n Aur Nooh Alaihissalaam Ko Ek Hi Ta'leem Di Hai. Hazrate Ibne Abbaas Radiallaahu Anhu Ka Kehna Hai Ke Shar'iyyah Aur Minhaaj Ke Ma'ni Raah Aur Tareeqa Ke Hai'n Aur Tumhaara Du'aa Karna Tumhaara Imaan Hai.
Hazrat Abdullaah Bin Umar Radiallaahu Anhu Farmaate Hai'n Ke Rasoolullaah ﷺ Ne Irshaad Farmaaya, Islaam Ki Buniyaad 5 Cheezo'n Par Istewaar Hai, (1) Iss Baat Ki Gawaahi Dena Ke Allaah Paak Ke Siwa Koi Ma'bood Nahee'n Aur Muhammad ﷺ Allaah Paak Ke Rasool Hai'n, (2) Namaaz Qaayem Karna (3) Zakaat Dena (4) Hajj Karna (5) Aur Maahe Siyaam Ya'ni Ramzaan Ke Roze Rakhna.
Hazrat Abu Hurairah Radiallaahu Anhu Bayaan Karte Hai'n Ke Nabi e Kareem ﷺ Ne Irshaad Farmaaya, Imaan Ki 60 Se Kuchh Upar Shaakhe'n Hai'n Aur Haya Bhi Unhee'n Me'n Se (Ek) Hai.
Hazrat Abdullaah Bin Amro Bin Aa's Radiallaahu Anhu Riwaayat Karte Hai'n Ke Nabi e Kareem ﷺ Ne Irshaad Farmaaya "Musalmaan Woh Hai Jiski Zabaan Aur Haath Se Musalmaan Mehfooz Rahe'n Aur Haqeeqi Muhaajir Woh Hai Jo Un Tamaam Cheezo'n Se Parhez Kare Jin Se Allaah Paak Ne Mana Kiya Hai. Phir Imaam Abu Abdullah Bukhaari Ne Kaha "Aur Abu Mu'aawiyah Ne Kaha Hume'n Daawood Ne Hadees Bayaan Ki A'amir Se Unho'n Ne Kaha Ke Mai'n Ne Abdullah Bin Umro Se Suna Ke Nabi e Kareem ﷺ Ne Irshaad Farmaaya Aur Abdul A'ala Ne Kaha Az Daawood Az A'amir Az Abdullah Riwaayat Hai Ke Nabi e Kareem ﷺ Ne (Jo Hadees Upar Mazkoor Huwi Ya'ni Hadees No.10 Aur Bhi 2 Sanado'n Se Marwi Hai) (Mere Bhaa'iyo'n Zara Gaur Karo Musalmaan Kaun Hai? Musalmaan Woh Hai Jiski Zabaan Se Kisi Musalmaan Ko Takleef Na Ho Aur Jiske Haath Se Bhi Kisi Musalmaan Ko Takleef Na Ho Ho, Woh Hai Pakka Musalmaan Ab Aap Aur Hum Apne Upar Gaur Kare'n Kya Hum Aise Musalmaan Hain?) (Aur Doosri Baat Par Bhi Gaur Kare'n Ke Aaj To Sab Sufi Aur Mufti Hone Ka Da'wa Karte Hain To Iss Hadees Ki Roshni Me'n Hume'n Aap Ko Dekhna Hai Ke Mufti Kaun Hai? To Sab Se Bada Mufti Woh Hai Jo Har Uss Baat Se Bache Jisse Bachne Ka Hukm Allah Ta'ala Ne Diya Hai. (Az Maulaana Shabbir Ahmad)).
Hazrat Abu Moosa Radiallaahu Anhu Farmaate Hai'n Ke Rasoole Kareem ﷺ Se Arz Kiya Gaya Ke (Kis Shakhs Ka Islaam) Behtar Hai? (Jawaab Me'n Nabi e Kareem ﷺ Ne Irshaad Farmaaya) Ke (Uss Shakhs Ka Islaam Behtar Hai) Jiski Zabaan Aur Haath Se Doosre Musalmaan Mehfooz Rahe'n.
Hazrat Abdullaah Ibne Umar Radiallaahu Anhu Farmaate Hai'n, Rasoolullaah ﷺ Se Poochha (Kisi Sahaabi Ne Ke) Islaam Ki Kaunsi Khaslat Sab Se Behtar Hai? Nabi e Kareem ﷺ Ne Irshaad Farmaaya, Tum Khaana Khilaao Aur Salaam Karo Jinko Tum Pehchaante Ho Aur (Usko Bhi Salaam Karo) Jisko Tum Nahee'n Pehchaante Ho. (Mere Bhaa'iyo'n Zara Gaur To Karo Khaana Khilaana Kitna Achchha Kaam Hai Ke Islaam Ki Behtareen Khaslat Bataaya Gaya Aur Salaam Karna Bhi Behtareen Khaslat e Islaam Hai Magar Afsos Aaj Log Ek Doosre Ko Salaam Tak Nahee'n Karte, Jab Ke Iss Hadees Me'n Aaya Jinko Jaante Ho Unhe'n Bhi Salaam Karo Aur Jinko Nahee'n Jaante Unhe'n Bhi Salaam Karo Magar Aaj Haal To Yeh Hai Ke Ham Jaanne Waale Ko Bhi Salaam Nahee'n Karte Allaah Paak Ham Sab Ko Hidaayat Ata Farmaaye. Ameen). Yaad Rahe Ke Salaam Sunni Saheehul Aqeedah Musalmaan Ko Hi Kiya Jaayega Bad Aqeedah Ko Nahee'n.
Hazrat Anas Radiallaahu Anhu Se Riwaayat Hai Ke Nabi e Kareem ﷺ Ne Irshaad Farmaaya, Tum Me'n Se Koi Shakhs (Uss Waqt Tak Kaamil) Momin Nahee'n Ho Sakta Jab Tak Ke Apne Bhaayi Keliye Bhi Usi Cheez Ko Pasand Na Kare Jisko Apne Liye Pasand Karta Hai.
Hazrat Abu Hurairah Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, Qasam Hai Uss Zaat Ki Jiske Qabza (Qudrat) Me'n Meri Jaan Hai, Tum Me'n Se Koi Shakhs Uss Waqt Tak Momin Nahee'n Ho Sakta Jab Tak Ke Mai'n (Muhammad ﷺ) Uske Nazdeek Uske Waalidain Aur Uski Aulaad Se Zyaadah Mehboob Na Ho Jaaoo'n. (Ya'ni Iss Hadees e Paak Se Saaf Ho Gaya Jo Hamaare Aaqa Nabi e Kareem ﷺ Se Mohabbat Karta Hai Wohi Momin Hai Aur Jo Gustaakh e Rasool ﷺ Hai Phir Chaahe Woh Kitni Hi Badi Topi Laga Le Chaahe Kitni Hi Badi Zulfe'n Rakhe Chaahe Kitni Hi Namaaze'n Padhe Momin Nahee'n Ho Sakta).
Hazrat Anas Radiallaahu Anhu Se Riwaayat Hai Ke Nabi e Kareem ﷺ Ne Irshaad Farmaaya, Tum Me'n Se Koi Shakhs Uss Waqt Tak Momin Nahee'n Ho Sakta Jab Tak Ke Mai'n (Muhammad ﷺ) Uske Nazdeek Uske Waalidain Aur Uski Aulaad Aur Tamaam Logo'n Se Zyaadah Mehboob Na Ho Jaaoo'n.
Hazrat Anas Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, Jis Shakhs Me'n 3 Khaslate'n Ho'n Woh Imaan Ki Mithaas Ko Pa Lega, (1) Yeh Ke Uske Nazdeek Allaah Paak Aur Uske Rasool ﷺ Unke Maasiwa Se Zyaadah Mehboob Ho, (2) Aur Yeh Ke Woh Jis Shakhs Se Bhi Mohabbat Kare Sirf Allaah Paak Keliye Kare, (3) Aur Yeh Ke Uske Nazdeek Kufr Me'n Lautna Aisa Na Pasandeedah Ho Jaise Aag Me'n Daala Jaana Na Pasandeedah Hai.
Hazrat Anas Bin Maalik Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, Ansaar Se Mohabbat Karna Imaan Ki Alaamat Hai Aur Unse Bugz Rakhna Nifaaq Ki Alaamat Hai.
Hazrat Ubaadah Bin Saamit Radiallaahu Anhu Farmaate Hai'n Ke Yeh Ubaadah Woh Hai'n Ke Jo Badar Ki Ladaayi Me'n Shareek The Aur Uqbah Ki Raat Me'n Naqeeb The, Rasoolullaah ﷺ Ne (Sahaaba e Kiraam Radiallaahu Anhum Ajma'een) Se Farmaaya Jab Ke Nabi e Kareem ﷺ Ke Ird Gird Sahaaba e Kiraam Radiallaahu Anhum Ajma'een Ki Ek Jamaa'at Maujood Thi Ke Tum Log Iss Baat Par Mujh Se Bay'at Karo Ke Allaah Paak Ke Saath Kisi Ko Shareek Nahee'n Karoge, Chori Nahee'n Karoge, Zina Nahee'n Karoge, Apni Aulaad Ko Qatal Nahee'n Karoge, (Deedah Wa Daanistah) Kisi Par Bohtaan (Ilzaam) Nahee'n Lagaaoge, Nek Kaamo'n Me'n Na Farmaani Nahee'n Karoge, Pas Tum Me'n Se Jo Koi Iss Ahed Ko Poora Karega Uska Sawaab Allaah Paak Ke Zimme Hai Aur Jo In Me'n Se Kisi Me'n Mubtala Ho Jaayega Aur Duniya Me'n Use Uski Saza Mil Jaaye To Woh Uska Kaffaarah Ban Jaayegi Aur Agar Koi Galat Kaamo'n Me'n Mubtala Huwa Aur Allaah Paak Uska Pardah Rakh Le To Woh Allaah Paak Ke Supurd Ho Gaya Chaahe To Aakherat Me'n Azaab De Chaahe To Mu'aaf Kar De, Phir Hamne In Baato'n Par Nabi e Kareem ﷺ Se Bay'at Karli.
Hazrat Abu Sa'eed Khudri Radiallaahu Anhu Se Riwaayat Hai Ke Rasoole Kareem ﷺ Ne Irshaad Farmaaya Ke Woh Zamaana Qareeb Hai Ke Musalmaan Ki Behtareen Mata Bakriyaa'n Hogi Jinhe'n Lekar Woh Pahaad Ki Chotiyo'n Aur Chatiyal Maidaano'n Me'n Chala Jaayega Taake Woh Apne Imaan Ko Bacha Sake.
Hazrat Sayyadah Aa'yesha Siddeeqa Radiallaahu Anha Farmaati Hai'n Ke Jab Kabhi Rasoolullaah ﷺ Logo'n Ko Achchhe Kaamo'n Ka Hukm Dete To Aise A'amaal Bataate Jinhe'n Woh Ba Aasaani Kar Sakte, Woh Arz Karte Ya Rasoolullaah ﷺ Ham Aapki Tarah To Nahee'n, Beshak Allaah Paak Ne Aap ﷺ Ke Agle Aur Pichle Tamaam Ba Zaahir Khilaafe Aula Kaamo'n Ko Mu'aaf Farma Diya (Ye Sun Kar) Nabi e Kareem ﷺ Gazabnaak Huwe Hatta Ke Nabi e Kareem ﷺ Ke Chehra e Mubaarak Se Gazab Ke Aasaar Zaahir Huwe, Phir Nabi e Kareem ﷺ Ne Irshaad Farmaaya, Beshak Tum Sab Se Zyaadah Allaah Paak Se Darne Waala Aur Tum Sab Se Zyaadah Allaah Paak Ka Ilm Rakhne Waala Mai'n Hoo'n. (Hazraat Zara Gaur Kare'n Sahaaba e Kiraam Radiallaahu Anhum Ajma'een Ka Aqeedah Ke Woh Arz Karte Hai'n Ya Rasoolullaah ﷺ Ham To Aap Ki Tarah Nahee'n, To Mere Bhaa'iyo'n Jab Sahaaba e Kiraam Hamaare Nabi e Kareem ﷺ Ki Tarah Nahee'n To Phir Aaj Ka Koi Gair e Sahaabi Nabi e Kareem ﷺ Ke Baraabar Kaise Ho Sakta Hai? Ya Phir Koi Kaise Nabi e Kareem ﷺ Ko Apni Tarah Bashar Keh Sakta Hai? Aise Logo'n Ko Sabaq Haasil Karna Chaahiye Sahaaba e Kiraam Ki Jamaa'at Se, Allaah Paak Hame'n Seekhne Ki Taaufeeq Ata Farmaaye. Ameen).
Hazrat Anas Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, Jiss Shakhs Me'n Yeh 3 Khaslate'n Ho'n Woh Imaan Ki Mithaas Ko Pa Lega (1) Jo Shakhs Allaah Paak Aur Uske Rasool ﷺ Ko Duniya Bhar Ki Cheezo'n Se Zyaadah Mehboob Jaane (2) Kisi Bande Se Sirf Allaah Paak Hi Keliye Mohabbat Kare (3) Aur Kufr Ki Taraf Laut Kar Jaane Ko Aisa Bura Jaane Jis Tarah Aag Me'n Jho'nke Jaane Ko Bura Samajhta Hai.
Hazrat Abu Sa'eed Khudri Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, Jannati Jannat Aur Dozakhi Dozakh Me'n Chale Jaaye'nge, Phir Allaah Paak Farmaayega Jiske Dil Me'n Raayi Baraabar Bhi Imaan Ho Use Dozakh Se Nikaal Lo Aise Logo'n Ko Dozakh Se Nikaal Liya Jaayega (Lekin Dozakh Me'n Pehle Rehne Ki Wajah Se) Woh Jal Kar Siyaah Ho Chuke Ho'nge Phir Woh Nehre Haya Ya Hayaat Me'n Daal Diye Jaaye'nge (Ya'ni Aabe Hayaat Ke Dariya Me'n Unko Daala Jaayega (Yahaa'n Imaam Maalik Rehmatullaah Alaih Ko Shak Hai) (Phir Aabe Hayaat Ke Dariya Me'n Daale Jaane Ke Ba'ad) Woh Yoo'n Taro Taazah Ho Jaaye'nge Jis Tarah Daana (Taro Taazgi Ke Saath) Paani Ki Rawaani Ki Jaanib Ugta Hai, Kya Tu Ne Nahee'n Dekha Sabz Ku'nchal Zardi Maa'il Nikalta Hai.
Hazrat Abu Sa'eed Khudri Radiallaahu Anhu Bayaan Karte Hai'n Ke Nabi e Kareem ﷺ Ne Irshaad Farmaaya, Mai'n (Muhammad ﷺ) So Raha Tha Aur Usi Haalat Me'n Khwaab Me'n Dekha Ke Logo'n Ko Mere Saamne Laaya Jaata Hai, Unho'n Ne Qamees Pahen Rakhe Hai'n, Ba'az Ki Qamees Seene Tak Aur Ba'az Ki Zara Neeche Hai'n, Usi Asna Me'n Hazrat Umar Bin Khattaab Radiallaahu Anhu Mere Saamne Pesh Kiye Gaye, Unki Qamees Iss Qadar Neeche Thi Ke Woh Use Ghaseet Rahe Hai'n, Sahaaba e Kiraam Radiallaahu Anhum Ajma'een Ne Arz Kiya, Ya Rasoolallaah ﷺ Aap Ne Uss Khwaab Ki Ta'beer Kya Li? Nabi e Kareem ﷺ Ne Irshaad Farmaaya (Uss Khwaab Ki Ta'beer) Deen (Hai). (Mere Bhaa'iyo'n Yeh Hadees e Paak Hazrat Umar Radiallaahu Anhu Ki Fazeelat Par Mehmool Hai)
Hazrat Abdullaah Ibne Umar Radiallaahu Anhuma Farmaate Hai'n Ke Rasoolullah ﷺ Ek Baar Kisi Ansaari Ke Paas Se Guzre, Woh Ansaari Apne Kisi Bhaayi Ko Hayaa Ke Baare Me'n Naseehat Kar Rahe The Ke Iss Qadar Hayaa Karne Ka Kya Matlab (Y'ani Jis Bhaayi Ko Naseehat Kar Rahe The Woh Hayaadaar The Aur Unko Iss Qadar Hayaa Karne Se Mana Kiya Ja Raha Tha), Tab Rasoolullaah ﷺ Ne Irshaad Farmaaya, Chhod Do Isko Kyu'nke Hayaa Imaan Me'n Se Hai.
Hazrat Abdullaah Ibne Umar Radiallaahu Anhuma Raawi Hai'n Ke Rasoolullaah ﷺ Ne Irshaad Farmaaya Ke Mujhe Allaah Paak Ne Iss Par Ma'moor Kiya Hai Ke Mai'n Logo'n Se Uss Waqt Tak Ladu'n Jab Tak Woh Yeh Gawaahi Na De Ke Allaah Paak Ke Siwa Koi Sachcha Ma'bood Nahee'n Aur Muhammad ﷺ Allaah Paak Ke Sachche Rasool Hai'n, Aur Theek Tarah Se Namaaz Ada Kare'n, Zakaat De'n, Pas Agar Aisa Karle'n To Mujh Se Unke Maal Aur Jaane'n Mehfooz Ho Jaaye'nge Alaawah Uss Saza Ke Jo Islaam Ne (Kisi Hadd Ke Silsile Me'n) Unpar Laazim Kar Di Ho. (Yaad Rakho Mere Bhaa'iyo'n Aisa Nahee'n Hai Ke Aap Iss Hadees Ko Padh Kar Yeh Kahe'nge Ke Gair Muslimo'n Ko Qatal Kar Diya Jaaye, Nahee'n Bilkul Nahee'n, Balke Nabi e Kareem ﷺ Ki Ta'leem Se Saabit Hai Ke Gairo'n Se Bhi Husne Akhlaaq Se Pesh Aao, Haa'n Unhe'n Da'wate Haq Do, Haq Waazeh Hoga To Islaam Qabool Kare'n Warna Qur'aan Ne Kaha Hai Tumhaara Deen Tumko Mubaarak Hamaara Deen Hamko, Warna Iss Hadees Ke Tahet To Woh Musalmaan Jo Namaaz Nahee'n Padhte Ya Namaaz To Padhte Hai'n Zakaat Nahee'n Dete, Woh Bhi Qatal Kiye Jaaye'nge, Jab Ke Aisa Nahee'n, Aap Dekhe'n Aaj Kitne Musalmaan Hai'n Jo Namaaz Nahee'n Padhte, Zakaat Nahee'n Dete, To Mere Bhaa'iyo'n Nabi e Kareem ﷺ Ne Saaf Kar Diya Ke Mujhe Iss Par Ma'moor Kiya Gaya Hai, Iska Matlab Doosra Koi Iss Par Ma'moor Nahee'n Hai.
Hazrat Abu Hurairah Radiallaahu Anhu Bayaan Karte Hai'n Ke Nabi e Kareem ﷺ Se Poochha Gaya, Kaunsa Amal Afzal Hai? Nabi e Kareem ﷺ Ne Irshaad Farmaaya, Allaah Paak Par Imaan Laana Aur Uske Rasool Par (Ya'ni Mujh Muhammad ﷺ Par Imaan Laana), Phir Sawaal Kiya Gaya Phir Kaunsa Amal Afzal Hai? Nabi e Kareem ﷺ Ne Irshaad Farmaaya, Allaah Paak Ki Raah Me'n Jihaad Karna, Phir Sawaal Kiya Gaya Phir Kaunsa Amal Afzal Hai? Nabi e Kareem ﷺ Ne Irshaad Farmaaya Hajj e Mabroor.
Hazrat Sa'ad Bin Abi Waqaas Radiallaahu Anhu Farmaate Hai'n Ke Nabi e Kareem ﷺ Ne Kuchh Logo'n Ko Maal Diya, Hazrat Sa'ad Bhi (Wahaa'n) Baithe Huwe The, Nabi e Kareem ﷺ Ne Ek Shakhs Ko Chhod Diya (Ya'ni Uss Shakhs Ko Kuchh Maal Ata Nahee'n Kiya) Woh (Jis Shakhs Ko Kuchh Maal Nahee'n Mila Tha) Mujhe (Ya'ni Hazrat Sa'ad Radiallaahu Anhu Ko) Sab Logo'n Se Zyaadah Mehboob Tha, (Hazrat Sa'ad Farmaate Hai'n) Mai'n Ne Arz Kiya Ya Rasoolallaah ﷺ Aap Ne Fulaa'n Shakhs Se Ae'raaz Kyu'n Farmaaya? (Ya'ni Uss Aadmi Ko Kuchh Ata Kyu'n Nahee'n Farmaaya) Haalaa'nke Allaah Paak Ki Qasam Mai'n (Sa'ad) Use Momin Samajhta Hoo'n, To Nabi e Kareem ﷺ Ne Irshaad Farmaaya Ya Musalmaan? (Ya'ni Tum Use Momin Samajhte Ho Ya Musalmaan)? Mai'n (Sa'ad) Kuchh Der Tak Chup Raha, Ba'ad Azaa'n Jo Kuchh Mai'n Uske Muta'alliq Jaanta Tha Usne Mujhe Majboor Kiya Aur Phir Wohi Baat Kahi (Ya'ni Hazrat Sa'ad Kuchh Der Khaamoshi Ke Ba'ad Phir Nabi e Kareem ﷺ Se Arz Karne Lage Ke Aapne Fulaa'n Aadmi Ko Kuchh Ata Kyu'n Nahee'n Farmaaya Aur Hazrat Sa'ad Majboor The Sawaal Karne Keliye Kyu'n Ke Woh Jo Fulaa'n Shakks Tha Unko Woh Jaante The Pehchaante The Aur Momin Bhi Samajte The, Jab Dobaarah Hazrat Sa'ad Radiallaahu Anhu Ne Sawaal Kiya To Nabi e Kareem ﷺ Ne Dobaarah) Phir Wohi Farmaaya (Ya'ni Aye Sa'ad Tum Use Momin Samajte Ho Ya Musalmaan?) Phir Teesri Baar Sawaal Arz Kiya To Nabi e Kareem ﷺ Ne Teesri Baar Bhi Wohi Jawaab Diya Ke (Tum Use Momin Samajte Ho Ya Musalmaan?), Bil Aakhir Nabi e Kareem ﷺ Ne Irshaad Farmaaya, Aye Sa'ad Mai'n Kisi Shakhs Ko Maal Iss Darr Se Kuchh De Deta Hoo'n (Ke Agar Use Kuchh Na Mile To Woh Kaafir Ho Jaaye Aur Maal Nahee'n Milne Ki Wajah Se Woh Kaafir Ho Gaya Aur Uski Saza Me'n) Allaah Paak Use Aag (Dozakh) Me'n Ruswa Karke Daal De, Haalaa'nke Doosra Shakhs Mujhe Kahee'n Usse Azeez Hota Hai (Ya'ni Jisko Mai'n Maal Nahee'n Deta Use Mai'n Zyaadah Pyaar Karta Hoo'n), Imaam Bukhaari Ne Kaha Aur Iss Hadees Ko Yoonus Aur Saaleh Aur Mo'mar Aur Zohri Ke Bhateeje Ne Zohri Se Riwaayat Kiya Hai Ya'ni Yeh Mazkoorah Hadees Doosri Sanad Se Bhi Marwi Hai).
Hazrat Abdullaah Bin Amro Radiallaahu Anhuma Farmaate Hai'n Ke Rasoolullaah ﷺ Se Ek Shakhs Ne Sawaal Kiya Ke Islaam Ka Kaunsa Kaam Sab Se Achchha Hai? Nabi e Kareem ﷺ Ne Irshaad Farmaaya, Tum Khaana Khilaao Aur Har Shakhs Ko Salaam Karo, Khwaah Usko Pehchaante Ho Ya Nahee'n Pehchaante Ho.
Hazrat Abdullaah Bin Abbaas Radiallaahu Anhuma Riwaayat Karte Hai'n Ke Nabi e Kareem ﷺ Ne Irshaad Farmaaya, Mujhe Dozakh Dikhlaayi Gayi Aur Wahaa'n Dozakh Me'n Mai'n Ne Aurato'n Ko Ba Kasrat Paaya, Wajah Yeh Hai Ke Woh Na Shukri Karti Hai'n, Arz Kiya Gaya Kya Allaah Paak Ki Na Shukri Karti Hai'n? Nabi e Kareem ﷺ Ne Irshaad Farmaaya, Woh Shauhar Ki Na Shukri Karti Hai'n, Ahsaan Ka Inkaar Karti Hai'n, Agar Tum Unme'n Se Kisi Ke Saath Zindagi Bhar Ahsaan Karo Phir Woh Tum Se Thodi Si Kami Dekh Le To Kahegi, Mai'n Ne To Tum Se Kabhi Achchhaayi Nahee'n Dekhi.
Hazrat Ma'roor Farmaate Hai'n Ke Mai'n Hazrat Abu Zar Se Abzah (Ek Gao'n Jo Jawaare Madeena Ya'ni Madeena Shareef Ke Qareeb Me'n Hai) Me'n Mila, Unka Libaas Aur Gulaam Ka Libaas Ek Jaisa Tha, Mai'n Ne Hazrat Abu Zar Radiallaahu Anhu Se Iska Sabab Poochha To Farmaane Lage, Mai'n Ne Ek Baar Kisi Ko Bura Bhala Kaha Tha Aur Uski Maa'n Ki Aa'r Dilaayi, Yeh Khabar Rasoolullaah ﷺ Tak Paho'nch Gayi, Nabi e Kareem ﷺ Ne Mujh Se Farmaaya, Aye Abu Zar Kya Tum Ne Waaqayi Usko Bura Bhala Kaha? Tum Aise Aadmi Ho Jis Me'n Abhi Tak Jahaalat Ki (Khaslat) Baaqi Hai, (Suno) Tumhaare Gulaam Tumhaare Bhaayi Hi Hai'n, Allaah Paak Ne Tum Ko Un Par Ikhtiyaar Diya Hai Ke Jis Shakhs Ka Bhaayi Uske Maatahet Ho Use Chaahiye Ke Khud Jo Khaaye Wohi Use Bhi Khilaaye, Jo Khud Pehne Use Bhi Wohi Pehnaaye, Aur Haa'n Gulaam Ko Aisa Kaam Mat Bataao Jiske Karne Se Use Gair Ma'mooli Takleef Ho, Agar Aisa Kaam Karna Zaroori Ho To Tum Khud Uska Haath Bataao.
Hazrat Akhnaf Bin Qais Farmaate Hai'n Ke (Jang e Siffain Ke Dauraan) Ma'in Uss Mard (Ya'ni Hazrat Maula Ali Radiallahu Anhu) Ki Madad Ko Chala To Raaste Me'n Hazrat Abu Bakrah Radiallahu Anhu Se Mulaaqaat Ho Gayi Unho'n Ne Mujhse Poochha Kahaa'n Ka Iraadah Hai? Mai'ne Kaha Ma'in Uss Mard (Ya'ni Hazrat Ali Radiallahu Anhu) Ki Madad Ka Iraadah Rakhta Hoo'n Unho'n Ne Kaha Yahee'n Se Laut Jaao Kyu'nke Maine Rasoolullah ﷺ Se Suna Farmaate The Ke Jab 2 Musalmaan Apni Talwaar'on Se (Aapas Me'n) Ladte Hai'n To Qaatil Aur Maqtool Dono'n Jahannami Hai'n, Maine Arz Kiya Ya Rasoolallah ﷺ Qaatil Ki Baat To Waazeh Hai Magar Maqtool Ka Kya Matlab? To Nabi e Kareem ﷺ Ne Irshaad Farmaaya Woh Bhi Apne Hareef Ke Qatl Ka Khwaahishmand Tha. (Mere Bhaa'iyo'n Iss Hadees Par Yeh A'eteraaz Kiya Jaata Hai Ke Ba'az Sahaaba e Kiraam Ke Darmiyaan Jo Aapas Me'n Jang Huwi Hai Uss Me'n Jo Shaheed Huwe Hai'n To Hum Ahle Sunnat Wa Jama'at Kehte Hai'n Ba'az Sahaaba Ke Darmiyaan Jo Jang Huwi Hai Woh Jang Ijtehaad Ki Buniyaad Par Huwi Iss Sabab Unme'n Se Qaatil Aur Maqtool Sab Jannati Hai'n Maslan Jang e Jamal Wa Siffain Me'n Shaheed Hone Waale Sahaaba e Kiraam Bhi Jannati Hai'n To A'eteraaz Karne Waale Kehte Hai'n Ke Iss Hadees Me'n To Mutlaqan Farmaaya Gaya Hai Jab Ke 2 Musalmaan Aapas Me'n Lade To Qaatil Aur Maqtool Dono'n Dozakh Me'n Hai? Iska Jawaab Yehi Hai Ke Yeh Hadeesh Un Musalmaano'n Keliye Hai Jo Aapas Me'n Ijtehaad Ki Buniyaad Par Nahee'n Balke Hawaaye Nafs Ki Buniyaad Par Lade'n Aur Dono'n Ka Mauquf Sharr Aur Baatil Ho Ek Doosre Ko Zaleel Karna Maqsood Ho, Jab Ke Sahaaba e Kiraam Radiallahu Anhum Ajmai'n Ke Darmiyaan Jo Aapas Me'n Jang Huwi Thi Woh Iss Tarah Ki Na Thi Balke Woh Ijtehaad Par Mabni Thi, Doosra A'eteraaz Yeh Kiya Jaata Hai Ke Jab Hazrat Ali Radiallahu Anhu Aur Hazrat Ameer Muawiya Radiallahu Anhu Ke Darmiyaan Jang Ijtehaad Par Mabni Thi To Hazrat Abu Bakarah Ne Hazrat Ali Radiallahu Anhu Ki Madad Keliye Jaane Waale Ko Kyu'n Mana Farmaaya? Iska Jawaab Yeh Hai Ke Hazrat Abu Bakrah Radiallahu Anhu Ka Mana Karna Bhi Ijtehaad Par Mabni Tha Baher Haal Humaari Aur Aapki Kya Majaal Ke Hum Sahaaba e Kiraam Ke Darmiyaan Hone Waali Baato'n Ko Lekar Baate'n Banaate Rahe Balke Hum Sab Ko Chaahiye Ke Hum Saare Sahaaba e Kiraam Saare Ahle Baite Izaam Ka Ahteraam Wa Ikraam Kare'n Inka Jab Bhi Naam Le'n Adab Wa Ahteraam Ke Saath Le'n.
Hazrat Abdullah (Bin Mas'ood) Radiallahu Anhu Farmaate Hai'n Ke Jab (Aayat) Sureh An'aam Aayat No.82 Tarjuma (Woh Log Jo Imaan Laaye Aur Apne Imaan Ko Zulm Se Aalooda Nahee'n Kiya) Naazil Huwi To Ashaabe Rasoolullah ﷺ Pareshaan Huwe Aur Arz Karne Lage Ya Rasoolallah ﷺ Hum Me'n Se Kaun Aisa Hai Jisne Zulm Nahee'n Kiya Ho Tab Allah Ta'ala Ne (Yeh Aayat) Naazil Farmaayi Sureh Luqmaan Aayat No.13 Tarjuma (Shirk Bada Zulm Hai).
Hazrat Abu Hurairah Radiallahu Anhu Riwaayat Karte Hai'n Ke Nabi e Kareem ﷺ Ne Irshaad Farmaaya Munaafiq Ki 3 Nishaaniyaa'n Hai'n (1) Jab Baat Kare To Jhoot Bole (2) Jab Wa'dah Kare To Wa'dah Khilaafi Kare (3) Aur Jab Uske Paas Amaanat Rakhi Jaaye To Usme'n Khayaanat Kare. (Allahu Akbar Mere Bhaa'iyo'n Iss Hadees Ko Dekhe'n Aur Apne Aap Ko Dekhe'n Kahee'n Aapke Andar Bhi To Yeh Munaafiq Waali Teeno'n Nishaaniyaa'n Maujood To Nahee'n Ya In Teeno'n Me'n Se Koi 1 To Nahee'n Agar Hai To Jitni Jaldi Ho Sake Tauba Kare'n.
Hazrat Abdullah Bin Umro Radiallahu Anhu Riwaayat Karte Hai'n Ke Nabi e Kareem ﷺ Ne Irshaad Farmaaya Jiss Shakhs Me'n Yeh 4 Baate'n Ho'ngi Woh Pakka Munaafiq Hai Aur Jisme'n Inme'n Se Koi 1 Hogi To Usme'n Nifaaq Ki Alaamat Hogi Jab Tak Ke Use Chhodh Na De (1) Jab Uske Paas Amaanat Rakhi Jaaye To Khayaanat Kare (2) Aur Jab Baat Kare To Jhoot Bole (3) Aur Jab Wa'dah Kare To Wa'dah Poora Na Kare (4) Aur Jab Jhagda Kare To Gaali Dene Par Aajaaye. (Iss Hadees Ki Sho'ba Ne Az Al-A'mash Mutaabe'at Ki Hai).
Hazrat Abu Hurairah Radiallahu Anhu Riwaayat Karte Hai'n Ke Nabi e Kareem ﷺ Ne Irshaad Farmaaya Jo Shakhs Imaan Ke Saath Aur Sawaab Ki Niyat Se Laylatul Qadr Me'n Qayaam Kiya Uske Pichle Gunaaho'n Ki Magferat Kardi Jaati Hai.
Hazrat Abu Hurairah Radiallahu Anhu Riwaayat Karte Hai'n Ke Nabi e Kareem ﷺ Ne Irshaad Farmaaya Allah Ta'ala Uss Shakhs Ka Zaamin Hai Jo Shakhs Allah Ta'ala Ki Raah Me'n Ghar Se Nikla (Jihaad Keliye) Aur Uska Ghar Se Nikalna Sirf Mujh (Allah Ta'ala) Par Imaan Aur Mere Rasool ﷺ Ki Tasdeeq Ki Wajha Se Tha Ke Mai'n Usko Haasil Kardah Ajar Ya Maale Ganeemat Ke Saath Lautaau'n Ya Usko Jannat Me'n Daakhil Karu'n Aur Agar Ma'in Apni Ummat Par Dushwaar Nahee'n Samjhta To Ma'in Kisi Lashkar Ke Peechhe Baitha Nahee'n Rehta Aur Ma'in Isko Zaroor Pasand Karta Hoo'n Ke Mai'n Allah Ta'ala Ki Raah Me'n Qatl Kiya Jaau'n Phir Ma'in Zindah Kiya Jaau'n Phir Qatl Kiya Jaau'n Phir Zindah Kiya Jaau'n Phir Qatl Kiya Jaau'n Phir Zindah Kiya Jaau'n.
Hazrat Abu Hurairah Radiallahu Anhu Riwaayat Karte Hai'n Ke Nabi e Kareem ﷺ Ne Irshaad Farmaaya Jo Shakhs Imaan Aur Yaqeen Ke Saath Ramzaan Me'n Qayaam Karega To Uske Agle Gunaah (Jo Usne Kiya Hai Pehle) Bakhsh Diye Jaaye'nge.
Hazrat Abu Hurairah Radiallahu Anhu Riwaayat Karte Hai'n Ke Nabi e Kareem ﷺ Ne Irshaad Farmaaya Jo Shakhs Imaan Aur Yaqeen Ke Saath Ramzaan Ke Roze Rakhega To Uske Agle Gunaah Bakhsh Diye Jaaye'nge.
Hazrat Abu Hurairah Radiallahu Anhu Riwaayat Karte Hai'n Ke Nabi e Kareem ﷺ Ne Irshaad Farmaaya Deen Bahot Aasaan Hai Jo Isme'n Naarawa (Gair Munaasib) Sakhti Bartega To Deen Uspar Gaalib Aa Jaayega Pas Tum Mayaana Ro Raho, Qareeb Tar Raho, Subah Wa Shaam Ki Ibaadat Guzaari Aur Khairaat Se Deeni Quwwat Haasil Karo.
Hazrat Bara (Bin A'azib) Radiallahu Anhu Farmaate Hai'n Ke Jab Hijrat Karke Rasoolullah ﷺ Madeena Tashreef Laaye To Apne Nanihaal Ke Yahaa'n Farokash Huwe (Thehre) Jo Ansaar The Aur Nabi e Kareem ﷺ Ne 16 Ya 17 Maah Baitul Muqaddas Ki Taraf Muh Karke Namaaz Padhi Aur Nabi e Kareem ﷺ Ko Yeh Pasand Tha Ke Ka'ba Shareef Aapka Qibla Ho, Nabi e Kareem ﷺ Ne (Ka'ba Shareef Ki Taraf Muh Karke) Pehli Namaaz, Namaaze Asar Ada Ki Aur Nabi e Kareem ﷺ Ke Saath Aur Doosre Log Bhi The, Unme'n Se 1 Shakhs Baahar Gaya Aur Uska Guzar Kisi Masjid Ki Jama'at Par Huwa Woh Baitul Muqaddas Ke Rukh Namaaz Ada Karrahe The, Usne Kaha Ma'in Allah Ta'ala Ko Gawaah Banaakar Kehta Hoo'n Maine Rasoolullah ﷺ Ke Humraah Makka Shareef Ke Rukh Namaaz Ada Ki Hai Woh Log Usi Haalat Me'n Ka'ba Shareef Ki Taraf Ghoom Gaye, Jab Rasoolullah ﷺ Baitul Muqaddas Ki Taraf Padhte The To Yahoodi Aur Doosre Ahle Kitaab (Nasaara) Bahot Khush Hote The Magar Jab Nabi e Kareem ﷺ Ne Apna Rukh Tabdeel Karliya To Yeh Un Par Shaaq Guzra, Zaheer Ne Kaha, Hume'n Abu Is'haaq Ne Hadees Bayaan Ki Az Al-Bara Unki Iss Hadees Me'n Yeh Hai Ke Thehweel e Qibla Se Pehle Kuchh Log Faut Hogaye Aur Kuchh Log Shaheed Hogaye Pas Humne Az Khud Nahee'n Jaana Ke Hum Unke Muta'alliq Kya Kahe'n To Allah Ta'ala Ne Yeh Aayat Naazil Farmaayi (Tarjuma) Allah Ta'ala Tumaare Imaan Ko Zaaye Nahee'n Farmaayega.
Hazrat Abu Sa'eed Khudri Radiallahu Anhu Ne Rasoollulah ﷺ Ko Yeh Irshaad Farmaate Huwe Suna Ke Jab Koi Musalmaan Ho Jaata Hai Aur Haqeeqi Musalamaan Ban Jaata Hai To Allah Ta'ala Uske Tamaam Gunaaho'n Ko Jinka Murtaqib Huwa Mu'aaf Kar Deta Hai Phir Uske Ba'ad (Uske Amal Ka) Badla Shuru Ho Jaata Hai Ke Neki Ka Badla 10 Se 700 Guna Tak Hai Aur Badi Ka Sirf 1 Buraayi Ki Soorat Me'n Diya Jaata Hai Aur Woh Allah Ta'ala Chaahe To Mu'aaf Kar Deta Hai.
Hazrat Abu Hurairah Radiallahu Anhu Riwaayat Karte Hai'n Ke Nabi e Kareem ﷺ Ne Irshaad Farmaaya Jo Shakhs Tum Me'n Se Apne Andar Islaam Ka Husn Paida Karleta Hai To Woh Jo Neki Karta Hai To Uske Liye 10 Se 700 Guna Tak Nekiyaa'n Likhi Jaati Hai Aur Jo Buraayi Woh Karta Hai To Bas Utni Hi Likhi Jaati Hai (Jitni Ke Usne Ki Hai).
Hazrat Saiyyadah Ayesha Siddiqa Radiallahu Anha Farmaati Hai'n Ke Rasoolullah ﷺ Ek Martaba Unke Paas Tashreef Laaye Uss Waqt Koi Aurat Baithi Huwi Thi Nabi e Kareem ﷺ Ne Irshaad Farmaaya Yeh Aurat Kaun Hai? Hazrat Ayesha Radiallahu Anha Ne Arz Ki Yeh Fulaa'n Hai Phir Hazrat Ayesha Radiallahu Anha Ne Uss Aurat Ki Kasrat e Namaaz Ka Zikr Chedh Diya Nabi e Kareem ﷺ Ne Irshaad Farmaaya Thehro Sirf Utna Amal Karo Jitna Humesha Kar Sakti Ho Allah Ta'ala Ki Qasam Allah Ta'ala Ajar (Sawaab) Dete Huwe Nahee'n Thakega Magar Tum Ibaadat Karne Se (Thak) Jaaogi Aur Allah Ta'ala Ke Nazdeek Pasandeedah Amal Woh Hai Jiska Karne Waala Use Humesha Kare.
Hazrat Anas Radiallahu Anhu Se Riwaayat Hai Ke Rasoolullah ﷺ Ne Irshaad Farmaaya Jo Shakhs "La Ilaaha Illallah" Ka Iqraar Kare Aur Uske Dil Me'n Jow Ke Baraabar Neki (Ya'ni Imaan) Hoto Woh Dozakh Se Zaroor Aazad Kiya Jaayega Aur Jo Shakhs "La Ilaaha Illallah" Kahe Aur Uske Dil Me'n Gehu'n Ke Daana Baraabar Neki Ho Woh Bhi Dozakh Se Nikaala Jaayega Aur Jisne "La Ilaaha Illallah" Padh Liya Aur Uske Dil Me'n Zarra Baraabar Neki Ho (Woh) Bhi Dozakh Se Nikaala Jaayega, Imaame Bukhaari Kehte Hai'n Ke Hazrat Abaan Ka Kehna Hai Ke Hume'n Qataadah Ne Hadees Bayaan Ki Unho'n Ne Kaha Ke Hume'n Anas Radiallahu Anhu Ne Hadees Bayaan Ki Woh Nabi e Kareem ﷺ Se Riwaayat Karte Hai'n, Isme'n Khair Ke Bajaaye Imaan Ka Lafz Hai (Ya'ni Yehi Hadees Doosri Sanad Ke Saath Bhi Hai Jisme'n Khair Ke Bajaaye Imaan Ka Lafz Hai). (Mere Bhaa'iyo'n Yahaa'n Yaad Rakho, Iss Hadees Me'n "La Ilaaha Illallah" Se Muraad Poora Kalma "La Ilaaha Illallah Mohammadur Rasoolullah ﷺ" Muraad Hai Aur Hadees Me'n Juz Bol Kar Qul Muraad Liya Gaya Hai Aur Choo'nke "La Ilaaha Illallah" Par Imaan Ka Ma'na Hai Ke Allah Ta'ala Par Uski Tamaam Sifaat Ke Saath Imaan Laana Aur Allah Ta'ala Ki Ek Sifat Yeh Hai Ke Woh Sayyiduna Mohammad ﷺ Ko Rasool Banaane Waala Hai Iss Sabab "La Ilaaha Illallah" Par Imaan Laane Ka Matlab Allah Aur Uske Rasool Par Imaan Laana Hi Muraad Hoga Tabhi "La Ilaaha Illallah" Par Imaan Laana Mukammal Hoga Warna Nahee'n).
Hazrat Umar Bin Khattaab Radiallahu Anhu Farmaate Hai'n Ke Ek Yahoodi Ne Unse Kaha Ke Ya Ameerul Momineen Tumhaari Kitaab (Ya'ni Qur'aan Me'n) Ek Aisi Aayat Hai Agar Hum Par Woh Aayat Utarti To Hum Uss (Nuzool Ke Din) Ko Apne Liye Eid Qaraar De Lete (Tab Hazrat Umar Radiallahu Anhu Ne Farmaaya) Woh Kaunsi Aayat Hai (Yahoodi Bola) Sureh Maa'idah Aayat No.3 (Tarjuma) Aaj Humne Tumhaare Deen Ko Mukammal Kardiya Aur Tumpar Apni Ne'mat Ko Tamaam Kar Diya Aur Tumhaare Liye Deen e Islaam Ke Intekhaab Par Raazi Hogaya) Hazrat Umar Radiallahu Anhu (Yeh Sunkar) Farmaane Lage Bila Shubah Humne Uss Din (Ki Ahmiyat) Aur Uske Maqaam (Nuzool) Ko Yaad Karliya Hai Nabi e Kareem ﷺ Uss Din Arfaat Me'n Muqeem The Aur Jum'ah Ka Din Tha (Aur Yeh Aayat Naazil Huwi Thi). (Mere Bhaa'iyo'n Yaad Rakho Hadees Me'n Saa'il (Sawaal Karne Waale) Ne Kaha Ke Hum Uss Din Ko Eid Ka Din Bana Lete Magar Jawaab Me'n Hazrat Umar Radiallahu Anhu Ne Farmaaya Yeh Jum'ah Aur Arf'a Ke Din Me'n Naazil Huwi Hume'n Ma'loom Hai To Sawaal Aur Jawaab Me'n Koi Munaasebat Bazaahir Nahee'n Lagti Lekin Haqeeqat Me'n Sawaal Ke Mutaabiq Hi Jawaab Hai Kyu'nke Hazrat Umar Radiallahu Anhu Ki Muraad Yeh Thi Ke Yeh Dono'n Eid Ka Hi Din Hai Isliye Hume'n Alag Se Eid Ka Din Banaane Ki Zaroorat Nahee'n Jaisa Ke Ahaadees Se Zaahir Hota Hai, Ma'loom Huwa Yaumul Jum'ah Bhi Yaumul Eid Hai Aur Yaumul Arf'a Bhi Yaumul Eid Hai Yahaa'n Un Hazraat Ko Sabaq Haasil Karna Chaahiye Jo Kehte Hai'n Ke Islaam Me'n Faqat 2 Hi Eid Hai Jabke Hadees Se Saabit Hai Ke Jum'ah Ka Din Musalmaano'n Ki Eid Hai, Chunaa'nche Doosri Riwaayat Me'n Aaya Ke, Ka'ab Bin Ahbaar Radiallahu Anhu Bayaan Karte Hai'n Ke Ma'in Ne Hazrat Umar Bin Khattaab Radiallahu Anhu Se Kaha Ma'in Aisi Qaum Ko Pehchaanta Hoo'n Ke Agar Unme'n Yeh Aayat Naazil Hoti Ya'ni (Sureh Maa'idah Aayat No.3) To Woh Uss Din Par Gaur Karte Aur Usko Eid Bana Lete Hazrat Umar Radiallahu Anhu Ne Poocha Kaunsi Aayat Unho'n Ne Kaha (Sureh Maa'idah Aayat No.3) Hazrat Umar Radiallahu Anhu Ne Farmaaya Mujhe Ma'loom Hai Yeh Aayat Kaunse Din Aur Kahaa'n Naazil Huwi Hai Yeh Aayat Jab Naazil Huwi To Woh Din Jum'ah Aur Arf'a Ka Tha Aur Ye Dono'n Humaare Liye Eid Hai (Al Mo'jamul Ausat) Isi Tarah Hazrat Ibne Abbaas Radiallahu Anhuma Ne Bhi Yahoodi Se Kaha Yeh Aayat Eid Ke Din Naazil Huwi Hai Jum'ah Aur Arf'a Ke Din (Tirmizi Shareef) Ab Ma'loom Huwa Ke Pehle Jo Bukhaari Me'n Kaha Gaya Ke Ek Yahoodi Ne Sawaal Kiya Jab Ke Sawaal Hazrat Ka'ab Bin Ahbaar Radiallahu Anhu Ne Kiya Tha To Iska Matlab Yeh Hai Ke Hazrat Ka'ab Bin Ahbaar Radiallahu Anhu Ke Saath Yahoodiyo'n Ki Ek Jama'at Thi Aur Woh Unhi Yahoodiyo'n Ke Sawaal Ko Pesh Karrahe The Iss Sabab Aisa Huwa Hai.
Hazrat Talha Bin Ubaidullah Radiallahu Anhu Farmaate Hai'n Ke Najd Ka Ek Aadmi Rasoolullah ﷺ Ki Khidmat Me'n Haazir Huwa Jiske Baal Uljhe Huwe The Uski Aawaaz Ki Gungunaahat To Sunaayi Deti Thi Lekin Uski Baat Samajh Me'n Nahee'n Aarahi Thi Lekin Jab Woh Qareeb Huwa Toh (Pata Chala) Ke Islaam Ke Baare Me'n Kuchh Daryaaft Karraha Hai, Rasoolullah ﷺ Ne Irshaad Farmaaya Din Raat Me'n 5 Namaaze'n Hai'n (Woh Aadmi Bola) Kya Isse Zaayed Bhi Mujh Par Farz Hai? Nabi e Kareem ﷺ Ne Irshaad Farmaaya, Nahee'n, Haa'n Yeh Ke Agar Tum Apni Khushi Se Kuchh (Nafil) Padho, Rasoolullah ﷺ Ne Irshaad Farmaaya Aur Ramzaan Ke Roze Usne Kaha Kya Iske Alaawa Bhi Kuchh Roze Mere Zimme Hai? Nabi e Kareem ﷺ Ne Irshaad Farmaaya, Nahee'n, Magar Yeh Ke Agar Tum Chaaho To (Nafli) Roze Rakho. Hazrat Talha Radiallahu Anhu Ne Kaha Ke Aur Rasoolullah ﷺ Ne Uss Shakhs Se Zakaat Ka Zikr Kiya To Usne Kaha Kya Zakaat Ke Alaawa Aur Bhi Kuchh Dena Mere Zimme Farz Hai'n? Nabi e Kareem ﷺ Ne Irshaad Farmaaya Nahee'n Magar Yeh Ke Agar Tum Chaaho Toh (Nafli) Sadqa Karo. Woh Shakhs Yeh Kehta Huwa Peeth Modhkar Chala Gaya Ke Allah Ta'ala Ki Qasam Mai'n In Faraa'iz Par Kuchh Zyaadah Nahee'n Karu'nga Na Kuchh Kam Karu'nga, Rasoolullah ﷺ Ne Irshaad Farmaaya, Agar Isne Yeh Sach Kaha Hai Toh Yeh Kaamiyaab Ho Gaya.
Hazrat Abu Hurairah Radiallahu Anhu Riwaayat Karte Hai'n Ke Nabi e Kareem ﷺ Ne Irshaad Farmaaya Jo Shakhs Kisi Musalmaan Ke Janaazah Ke Humraah Imaan Ke Saath Aur Sawaab Ki Niyat Se Jaaye Aur Namaaz Aur Tadfeen Tak Wahaa'n Rahe To Woh 2 Qairaat Sawaab Lekar Lautega Har Qairaat Ohad Pahaad Ke Misl Hoga Aur Jo Uski Namaaz e Janaazah Padhkar Tadfeen Se Pehle Laut Aaya To Woh Ek Qairaat Sawaab Le Kar Lautega. (Iss Hadees Me'n Usmaan Mo'azzin Ne Rooh Ki Mutaabe'at Ki Hai Unho'n Ne Kaha Hume'n Auf Ne Hadees Bayaan Ki Woh Mohammad Se Woh Hazrat Abu Hurairah Radiallahu Anhu Se Woh Nabi e Kareem ﷺ Se Isi Hadees e Mazkoor Ke Misl (Ya'ni Mazkoorah Hadees Doosri Sanad Se Bhi Marwi Hai).
Hazrat Zubaid Farmaate Hai'n Ke Mai'ne Abu Waa'il Se (Firqa) Murjiya Ke Baare Me'n Poochha Unho'n Ne Kaha Mujhe Hazrat Abdullah (Bin Mas'ood) Radiallahu Anhu Ne Bataaya Ke Rasoolullah ﷺ Ne Irshaad Farmaaya Ke Musalmaan Ko Gaali Dena Fisq Aur Usse Ladaayi Karna Kufr (Ke Mutaraadif) Hai. (Mere Bhaaiyo'n Yaad Rakho, Murjiya Ek Firqa Hai Jiska Nazariya Hai Ke Imaan Laane Ke Ba'ad Ma'siyat Se (Gunaah Se) (Imaan Ko) Zarar (Nuqsaan) Nahee'n Hota.
Hazrat Anas Radiallahu Anhu Se Riwaayat Hai Ke Mujhe Hazrat Ubaadah Bin Saamit Radiallahu Anhu Ne Bataaya Ke Rasoolullah ﷺ Logo'n Ko Shabe Qadr Ke Muta'alliq Bataane Keliye Nikle (To) Dekha Ke 2 Musalmaan Aapas Me'n Ghuttam Ghutta Hai'n ( Ya'ni Aapas Me'n Lad Rahe Hai'n) (To) Nabi e Kareem ﷺ Ne Irshaad Farmaaya Ke Mai'n Tumhe'n Shabe Qadr Ke Baare Me'n Aagaah Karne Keliye Nikla Tha Magar (Choo'nke) Fulaa'n Aur Fulaa'n Aapas Me'n Lad Rahe The Iss Bina Par (Shabe Qadr Ke Ta'ayyun Ka Ilm) Utha Liya Gaya Aur Ho Sakta Hai Ke Yeh Tumhaare Liye Zyaadah Behtar Ho (Ab) Tum Shabe Qadr Ko Ramzaan Ki 27vi, 29vi Aur 25vi Shab Me'n Talaash Karo.
Hazrat Abu Hurairah Radiallahu Anhu Farmaate Hai'n Ke Ek Din Rasoolullah ﷺ Logo'n Ke Paas Tashreef Farma The Puss Nabi e Kareem ﷺ Ke Paas Hazrat Jibra'il Alaihissalaam Aaye Phir Nabi e Kareem ﷺ Se Unho'n Ne Poochha Imaan Ki Kya Ta'reef Hai? Nabi e Kareem ﷺ Ne Irshaad Farmaaya Imaan Yeh Hai Ke Tum Allah Azzowajal Par Imaan Laao Aur Allah Ta'ala Ke Farishto'n Par Aur Allah Ta'ala Se (Aakherat Me'n) Mulaaqaat Par Aur Allah Ke Rasoolo'n Par Imaan Laao Aur Marne Ke Ba'ad Dobaarah Zindah Hone Par Imaan Laao (Phir) Unho'n Ne Poochha Aur Islaam Ki Kya Ta'reef Hai? Nabi e Kareem ﷺ Ne Irshaad Farmaaya Ke : Islaam Yeh Hai Ke Tum Allah Azzowajal Ki Ibaadat Karo Aur Uske Saath Kisi Ko Shareek Na Karo Aur Namaaz Qaayem Karo Aur Zakaat e Mafrooza Ada Karo Aur Ramzaan Ke Roze Rakho (Phir) Unho'n Ne Poochha Ke Ahsaan Ki Kya Ta'reef Hai? Nabi e Kareem ﷺ Ne Irshaad Farmaaya Ke Ahsaan Yeh Hai Ke Tum Allah Ki Iss Tarah Ibaadat Karo Goya Ke Allah Ta'ala Ko Tum Dekh Rahe Ho Puss Agar Tum Aisa Na Kar Sako (To Dil Me'n Yeh Yaqeen Rakho) Ke Allah Azzowajal Tumhe'n Dekh Raha Hai (Phir) Unho'n Ne Poochha Ke Qayaamat Kab Aayegi? Nabi e Kareem ﷺ Ne Irshaad Farmaaya Ke Jisse Yeh Sawaal Kiya Ja Raha Hai Woh Saa'il Se Zyaadah Jaanne Waala Nahee'n Haa'n Albatta Mai'n Tumhe'n Uski Alaamato'n Ki Kuchh Khabar Deta Hoo'n Jab Lau'ndi Apne Maalik Ko Janam Dene Lage Jab Charwaahe Aalishaan Imaarato'n Me'n Qayaam Pazeer Ho (Agar Aisa Ho To Qurbe Qayaamat Ki Alaamaat Hai'n) (Aur Haa'n Qayaamat Ka Ilm) Un 5 Cheezo'n Me'n Se Hai Jinhe'n Bajuz Allah Ta'ala Ke Az Khud Koi Nahee'n Jaanta Phir Nabi e Kareem ﷺ Ne Yeh Aayat Tilaawat Farmaayi (إِنَّ اللَّهَ عِنْدَهُ عِلْمُ السَّاعَةِ} (Sureh Luqmaan Aayat No.34) Tarjuma : Allah Hi Ke Paas Qayaamat Ka Ilm Hai ; Raawi Farmaate Hai'n Ke Uske Ba'ad Woh Saa'il Shakhs Chala Gaya To Nabi e Kareem ﷺ Ne Sahaaba e Kiraam Se Farmaaya Use Waapas Bulaao Lekin Wahaa'n Koi Nahee'n Tha Phir Nabi e Kareem ﷺ Ne Irshaad Farmaaya Yeh Saa'il Jibra'il Alaihissalaam The Aur Logo'n Ko Unka Deen Sikhaane Aaye The. (Mere Bhaaiyo'n Iss Hadees Me'n Jo Aaya Ke Qayaamat Ka Ilm Un 5 Cheezo'n Me'n Se Hai Jisko Allah Ta'ala Ke Siwa Az Khud Koi Nahee'n Jaanta Un 5 Cheezo'n Se Muraad (1) Qayaamat Kab Aayegi (2) Baarish Kab Hogi (3) Maa'n Ke Pet Me'n Kya Hai (4) Bandah Kal Kya Karega (5) Bandah Kis Zameen Me'n Marega : To Yaad Rakhe'n Yeh 5 Cheezo'n Me'n Se Bhi Bahot Se Ilm Ke Baare Me'n Hadees Se Shahaadat Mil Jaati Hai Ke Nabi e Kareem ﷺ Ko Allah Ne Ata Kiya Tha Tabhi Farmaaya Ke Fulaa'n Fulaa'n Fula Fulaa'n Jagah Marega.
Hazrat Abdullah Bin Abbaas Radiallahu Anhuma Farmaate Hai'n Ke Mujhse Abu Sufiyaan Bin Harb Ne Bayaan Kiya Ke Hiraql Ne Mujhse Kaha Ke Mai'ne Tumse Poochha Tha Ke Uss (Paigambar Mohammad ﷺ) Ke Pairokaar Badh Rahe Hai'n Ya Kam Ho Rahe Hai'n To Tumne Kaha Ke (Aaye Din Unki Pairwi Karne Waalo'n Me'n) Izaafa Ho Raha Hai Aur Imaan Ki Bhi Yehi Kaifiyat Hai Ta Aa'nke Woh Darja e Kamaal Tak Paho'nch Jaaye Mai'ne Tumse Yeh Bhi Dariyaaft Kiya Tha Ke Koi Uss (Paigambar Mohammad ﷺ Ke Halqah) Deen Me'n Daakhil Ho Kar Phira Use Bura Samajhte Huwe Koi Nikal Bhi Jaata Hai? (Ya'ni Kya Koi Islaam Qabool Karke Phir Islaam Ko Chhoda Bhi Hai?) To Tumne Kaha Ke Nahee'n Puss Imaan Ki Bhi Yehi Haalat Hai Jab Uski Khushi Dil Me'n Rach Bas Jaaye To Phir Koi Shakhs Use Bura Nahee'n Samajhta (Ya'ni Use Tark Karne Par Aamaadah Nahee'n Hota).
Hazrat No'maan Bin Basheer Radiallahu Anhu Farmaate Hai'n Ke Mai'ne Rasoolullah ﷺ Ko Yeh Farmaate Huwe Suna Ke Halaal Bhi Waazeh Hai Aur Haraam Bhi Waazeh Hai, Aur Dono'n Ke Darmiyaan Kuchh Mashkook (Ya'ni Mushtabeh Cheeze'n Jiske Halaal Ya Haraam Hone Par Koi Saraahat Na Ho Shak Ho Ke Halaal Hai Ya Haraam) Cheeze'n Hai'n Jinka Ilm Aksar Logo'n Ko Nahee'n Puss Jo Shakhs Mushtabeh Cheezo'n Se Bache Usne Apna Deen Aur Apni Izzat Bacha Li Aur Jo Shakhs Mushtabeh Cheezo'n Par Pad Gaya Woh Uss Charwaahe Ki Tarah Hai Jo Apna Rewad Shaahi Charaagaah Ke Qareeb Charaaye Andesha Hai Ke Woh Shaahi Charaagaah Me'n Ghus Jaayega (Logo'n Suno) Har Baadshaah Ki Ek Makhsoos Charaagaah Hai (Usi Tarah) Allah Ki Bhi Charaagaah Hai Jo Uski Zameen Me'n Haraam Ki Huwi Cheeze'n Hai'n Hoshiyaar Raho Ke Jism Me'n Ek Lothda Gosht Ka Hai Jab Woh Sa'nware To Poora Jism Sa'nwarta Hai Agar Woh Bigde To Poora (Nizaam) Jism Bigadta Hai (Aur) Haa'n Woh Dil Hai.
Hazrat Abu Jamzah Ka Bayaan Hai Ke Mai'n Hazrat Ibne Abbaas Radiallahu Anhuma Ke Paas Baith'ta To Woh Mujhe Apne Takht (Khaas) Par Baitha Lete Unho'n Ne (Ek Baar) Mujhse Farmaaya Tum Mere Paas Reh Jaao Mai'n Tumhe'n Apne Maal Me'n Se Kuchh De Du'nga Garz Mai'n Dobaarah Unke Paas Raha Phir (Ek Baar) Farmaane Lage (Ke Qabeela) Abdul Qais Ke Log Jab Rasoolullah ﷺ Ke Paas Aaye To Nabi e Kareem ﷺ Ne Unse Farmaaya Tum Kis Qaum Se Ho Ya Kis Jama'at Se Ho? Woh Bole Hum Rabee'aa Ke Khaandaan Se Hai'n Nabi e Kareem ﷺ Ne Irshaad Farmaaya Khush Aamdeed غَيْرَ خَزَايَا وَلاَ نَدَامَى Tum Log Sharmindah Hoge Na Naadim, Unho'n Ne Kaha Ya Rasoolallah ﷺ Hum Log Aapke Paas Sirf Hurmat Waale Maheeno'n Me'n Aa Sakte Hai'n Kyu'n Ke Humaare Aur Aapke Darmiyaan Kuffaar Ka Qabeela Muzir Hai, Aap Hume'n Koi Faisla Kun Hukm Bataaye'n Jiski Khabar Hum Apne Peechhe Chhode Huwe (Woh Log Jo Nahee'n Aa Sake Hai'n) Unko De'n Aur Hum Sab Uspar Amal Karke (Jannat) Me'n Daakhil Ho'n Unho'n Ne Nabi e Kareem ﷺ Se Mashrubaat Ke Bartano'n Ke Muta'alliq Sawaal Kiya Nabi e Kareem ﷺ Ne Unhe'n 4 Bartano'n Me'n Peene Ki Ijaazat Di Aur 4 Bartano'n Me'n Peene Se Man'a Farmaaya (Aur) Aap Ne Unhe'n Ek Allah Par Imaan Laane Ka Hukm Diya, Phir Aap Ne Farmaaya Kya Tum Jaante Ho Ke Allah Par Imaan Laane Ka Kya Matlab Hai? Unho'n Ne Arz Kiya Allah Aur Uska Rasool Behtar Jaante Hai'n Aap Ne Farmaaya (Allah Par Imaan Laane Ka Matlab Yeh Hai Ke) Tum Yeh Gawaahi Do Ke Allah Ta'ala Ek Hai Aur Uske Siwa Koi Ibaadat Ka Mustahiq Nahee'n Aur Mohammad ﷺ Allah Ke Rasool Hai'n Aur Namaaz Qaayem Karne Zakaat Ada Karne Ramzaan Ke Roze Rakhne Aur Maal e Ganeemat Ke 5ve Hisse Ko Ada Karne Ka Hukm Diya Aur Unko 4 Qism Ke Bartano'n Me'n Peene Se Man'a Farmaaya (Woh 4 Qism Ke Bartan Yeh Hai'n) (1) Sabz Rang Ke Ghade (2) Khokhla Kaddu (3) Khokhli Lakdi (4) Aur Taarkol Mila Huwa Bartan, Aur Farmaaya Tum Isko Yaad Karlo Aur Apne Peechhe Chhode Huwe Logo'n Ko Iski Khabar Do. (Hazraat Iss Hadees Shareef Me'n Ek Ahem Masle Ka Hal Bhi Maujood Hai Aur Woh Yeh Ke Sahaaba e Kiraam Ke Daur Me'n Bhi Deeni Khidmaat Ka Mu'aaweza Lena Aur Dena Raa'ij Tha Zara Gaur Kare'n Ke Hazrat Abu Jamzah Se Hazrat Ibne Abbaas Radiallahu Anhuma Ne Farmaaya Tum Mere Paas Thehro Hatta Ke Mai'n Apne Maal Se Tumhe'n Hissa Doo'n ( Kis Kaam Ke Badle Apne Maal Se Hissa Dene Ko Kaha Unka Kaam Kya Tha To Bukhaari Ki Hadees No. 87 Se Samajh Aata Hai Ke Woh Kaam Kya Karte The Jiska Mafhoom Yeh Hai Ke Hazrat Abu Jamzah Saa'ileen Ki Ajami Zabaan Ke Sawaalaat Ka Tarjuma Karke Hazrat Ibne Abbaas Radiallahu Anhuma Ko Arabi Me'n Sunaate The Phir Jo Jawaab Hazrat Ibne Abbaas Arabi Me'n Dete The Uss Jawaab Ka Bhi Abu Jamzah Ajami Zabaan Me'n Tarjuma Karke Saa'ileen Ko Bataate The Aur Hazrat Ibne Abbaas Radiallahu Anhuma Unko Iss Khidmat Ka Mu'aaweza Dete The, Ma'loom Huwa Deeni Khidmaat Keliye Mu'aaweza Lena Bhi Durust Aur Deeni Khidmaat Keliye Mu'aaweza Dena Bhi Durust Hai).
Hazrat Umar Radiallahu Anhu Se Riwaayat Hai Ke Rasoolullah ﷺ Ne Irshaad Farmaaya Aa'maal Ka Daaromadaar Niyat Par Hai Aur Har Shakhs Keliye Wohi Ajar (Badla) Hai Jiski Usne Niyat Ki Hai Puss Jiski Hijrat (Ki Niyat) Allah Aur Uske Rasool Ki Taraf Hai To Uski Hijrat (Waaqe'yi Me'n) Allah Aur Uske Rasool Ki Taraf Hai Aur Jiski Hijrat (Ki Niyat) Duniya (Maal o Daulat Kamaane) Keliye Ya Kisi Aurat Se Nikaah Karne Keliye Hai (To Waaqe'yi Me'n) Uski Hijrat Usi Ki Taraf Hai Jiski Taraf Usne Hijrat Ki Hai.
Hazrat Abu Mas'ood Radiallahu Anhu Se Riwaayat Hai Ke Rasoolullah ﷺ Ne Irshaad Farmaaya Jab Koi Shakhs Apni Biwi Par Sawaab Ki Niyat Se Kharch Karta Hai To Woh Uske Liye Sadqa Hai.
Hazrat Sa'ad Bin Abi Waqaas Radiallahu Anhu Se Riwaayat Hai Ke Rasoolullah ﷺ Ne Irshaad Farmaaya Tum Allah Ki Raza Ke Talab Keliye Jo Bhi Kharch Karoge Uss Par Tumko Ajar Diya Jaayega Hatta Ke Tum Jo Luqma Apni Biwi Ke Muh Par Rakhoge Uska Bhi (Ajar Sawaab Milega).
Hazrat Jareer Bin Abdullah Radiallahu Anhu Farmaate Hai'n Ke Mai'ne Rasoolullah ﷺ Se Namaaz Qaayem Karne Zakaat Dene Aur Har Musalmaan Ke Saath Khair Khwaahi Karne Par Bay'at Ki. (Mere Bhaa'iyo'n Yaad Rakho, Allah Ta'ala Ki Khair Khwaahi Ka Matlab Yeh Hai Ke Insaan Allah Azzowajal Par Imaan Laaye Aur Uski Sifaat Me'n Shak Aur Ilhaad Na Kare Aur Tamaam Uyoob Se Uski Zaat Ko Pakeezah Qaraar De Uske Ahkaam Ki Itaa'at Kare Aur Uski Na Farmaani Se Ijtenaab Kare Uski Itaa'at Karne Waalo'n Se Mohabbat Kare Aur Uski Na Farmaani Karne Waalo'n Se Mohabbat Na Kare Uski Ne'mato'n Ka A'eteraaf Kare Aur Shukr Ada Kare Aur Tamaam Ibaadaat Ikhlaas Se Kare Aur Haqeeqat Yeh Hai Ke Yeh Sab Haqeeqat Me'n Insaan Ki Apne Nafs Ki Khair Khwaahi Hai Kyu'n Ke Allah Ta'ala Tamaam Khair Khwaahi Karne Waalo'n Aur Tamaam Jahaano'n Se Mustagni (Be Niyaaz) Hai, Aur Rasoolullah ﷺ Ke Saath Khair Khwaahi Ka Matlab Yeh Hai Ke Aapki Risaalat Ki Tasdeeq Kare Aur Aapki Di Huwi Tamaam Khabro'n Par Imaan Laaye Aur Aapke Tamaam Ahkaam Ki Itaa'at Kare Aur Aapke Deen Ki Nusrat Kare Aur Aapki Sunnato'n Par Amal Kare Aur Aapki Ta'zeem Baja Laaye Aur Aap Par Kasrat Se Darood o Salaam Padhe Aur Aapke Ahle Bait Aur Tamaam Sahaaba e Kiraam Se Mohabbat Kare (Aur Yeh Bhi Haqeeqat Me'n Insaan Ki Apne Nafs Ki Khair Khwaahi Hai Warna Allah Ta'ala Ne Apne Nabi Aur Ahle Bait Aur Sahaaba e Kiraam Ka Maqaam Itna Buland Kiya Hai Ke Unko Humaari Khair Khwaahi Ki Zaroorat Hi Nahee'n Woh Humaare Mohtaaj Nahee'n Balke Haqeeqat Yeh Hai Ke Hum Unke Mohtaaj Hai'n Kyu'n Ke Hume'n Deen Bhi Unhee'n Ke Sadqe Me'n Mila Hai) Aur Aa'm Logo'n Ke Saath Khair Khwaahi Karne Ka Matlab Yeh Hai Ke Unki Duniya Aur Aakherat Ki Behtari Keliye Unko Achchi Naseehat Kare Unse Takleef Ko Door Kare Jo Ahkaam Na Jaante Ho'n Use Bataaye Neki Ke Kaamo'n Me'n Unki Madad Kare Unke Uyoob Par Pardah Rakhe Unpar Shafqat Kare Unke Liye Unhi Cheezo'n Ko Pasand Kare Jinko Apne Liye Pasand Karta Hai Apne Haath Aur Zabaan Se Unko Takleef Na De Zaroorat Mando'n Ki Madad Kare Jo Beemaar Ho Uski Ayaadat Kare Unki Namaaz e Janaazah Padhe Maut Ke Ba'ad Unke Liye Isaal e Sawaab Kare Aur Du'aa Kare (Maakhooz Az Ne'matul Baari Fi Sharahul Bukhaari Az Allaama Gulaam Rasool Sa'eed Rehmatulla Alaih Ba Hawaala Umdatul Qaari Jild No.1, Safah 499 Mauzuha Wa Mazeeda.)
Ziyaad Bin Ilaaqa Farmaate Hai'n Ke Mai'ne Jareer Bin Abdullah Ko Yeh Kehte Huwe Suna Ke Jis Din Hazrat Mugeerah Bin Sho'ba Radiallahu Anhu Ki Wafaat Huwi Uss Din Unho'n Ne Khade Hokar Allah Azzowajal Ki Hamd o Sana Bayaan Ki (Aur Phir Farmaaya) Tum Log Allah "Wahdahu La Shareeka Lahu" Ke Darr Aur Uski Ta'zeem Aur Sukoon Ko Laazim Rakho Hatta Ke Tumhaare Paas Naya Ameer Aa Jaaye Kyu'nke Woh Abhi Aayega Phir Kaha Ke Apne (Saabiq) Ameer Keliye Allah Ta'ala Se Mu'aafi Talab Karo Kyu'nke Woh Bhi Mu'aafi Ko Pasand Karte The Phir Kaha Ke Hamd o Salawaat Ke Ba'ad Mai'n Kehta Hoo'n Mai'n Nabi e Kareem ﷺ Ke Saath Haazir Huwa Mai'ne Kaha Mai'n Aapse Islaam Par Bay'at Karta Hoo'n Aapne Mujh Par Yeh Shart Lagaayi Ke Mai'n Har Musalmaan Ki Khair Khwaahi Karu'nga So Mai'ne Nabi e Kareem ﷺ Se Iss Baat Par Bay'at Karli Aur Iss Masjid Ke Rab Ki Qasam ! Mai'n Tumhaari Khair Khwaahi Karne Waala Hoo'n Phir Unho'n Ne Hazrat Mugeerah Radiallahu Anhu Keliye Magferat Talab Ki Aur (Mimbar) Se Utar Gaye.
Bukhari Shareef : Kitaabul Imaan
|
Bukhari Shareef : کتاب الایمان
|
•