Bukhari Shareef

Taraaveeh Ka Bayaan. Baab - Jisne Ramzaan Me'n Qayaam Kiya Uski Fazeelat. Hazrat Abu Hurairah Radiallaahu A'nhu Ne Bayaan Kiya Ke Mai'n Ne Rasoolullaah ﷺ Ko Yeh Farmaate Huwe Suna Hai Ke Jisne Ramzaan Ke Maheene Me'n Imaan Ke Saath Aur Sawaab Ki Niyat Se Qayaam Kiya, Uske Agle Aur Pichhle Gunaah Mu'aaf Kar Diye Jaaye'nge.

Hazrat Abu Hurairah Radiallaahu A'nhu Bayaan Karte Hai'n Ke Rasoole Akram ﷺ Ne Farmaaya, Jisne Imaan Ke Saath Aur Sawaab Ki Niyat Se Ramzaan Ke Maheene Me'n Qayaam Kiya, Uske Pichhle Tamaam Gunaaho'n Ko Mu'aaf Kar Diya Jaayega, Ibne Shihaab Ne Kaha, Rasoolullaah ﷺ Ka Wisaal Ho Gaya, Aur (Logo'n Ka Amal) Ispar Barqaraar Raha, Phir Hazrat Abu Bakar Radiallaahu A'nhu Ki Khilaafat Ke Ayyaam Me'n Aur Hazrat Umar Radiallaahu A'nhu Ki Khilaafat Ke Ibtedaayi Ayyaam Me'n Ispar Musalmaano'n Ka Amal Raha.

Abdur Rehmaan Bin Abdul Qaari Ne Bayaan Kiya Ke Mai'n Hazrat Umar Bin Khattaab Radiallaahu A'nhu Ke Saath Ramzaan Ke Maheene Me'n Ek Raat Masjid Ki Taraf Gaya, To Log Mukhtalif Toliyo'n Me'n Namaaz Padh Rahe The, Ek Shakhs Apni Namaaz Padh Raha Tha, Aur Kuchh Log Kisi Ke Peechhe Namaaz Padh Rahe The, Hazrat Umar Radiallaahu A'nhu Ne Kaha, Meri Raaye Yeh Hai Ke In Sabko Agar Ek Qaari (Imaam) Ki Iqteda Me'n Jama Kardu'n To Yeh Zyaadah Behtar Hoga, Phir Hazrat Umar Radiallaahu A'nhu Ne Pukhta Iraadah Kar Liya Aur Unko Hazrat Ubayi Bin Ka'ab Ki Iqteda Me'n Jama Kar Diya, Phir Mai'n Doosri Raat Ko Unke Saath Gaya Aur Sab Log Apne Qaari Ki Iqteda Me'n Namaaz Padh Rahe The To Hazrat Umar Radiallaahu A'nhu Ne Kaha, Yeh Achchi Bid'at Hai Aur Jis Namaaz Ke Waqt Woh Soye Huwe Hote The Woh Uss Namaaz Se Afzal Hai Jisme'n Woh Qayaam Karte Hai'n, Unki Muraad Raat Ke Aakhri Hisse Ki Namaaz Thi Aur Log Raat Ke Awwal Hisse Me'n Qayaam Karte The. Bid'at Ki Aqsaam :- Iss Hadees Shareef Me'n Mazkoor Hai Ke Hazrat Umar Radiallaahu A'nhu Ne Kaha, Yeh Achchi Bid'at Hai, Allaama Ayni A'laihir Rehma Iss Hadees Ki Sharah Me'n Likhte Hai'n, Bid'at Ki 2 Qisme'n Hai'n, Agar Woh Kaam Shar'an Nek Ho To Woh Bidat e Hasna Hai Aur Agar Woh Kaam Shar'an Bura Ho To Bid'at e Qabeeha Hai, (Umdatul Qaari, Jild No.11, Safha No.148, Daarul Kutub Ilmiya Bairoot) Aur Haafiz Shahaabuddeen Ahmad Bin Ali Bin Hajar Asqalaani Iss Hadees Ki Sharah Me'n Likhte Hai'n, Bid'at Asal Me'n Uss Naye Kaam Ko Kehte Hai'n Jiski Pehle Koi Misaal Na Ho Aur Sharee'at Me'n Bid'at Uss Kaam Ko Kehte Hai'n Jo Sunnat Ke Khilaaf Ho, Isliye Bid'at Mazmoom Hoti Hai, Aur Tehqeeq Yeh Hai Ke Agar Woh Naya Kaam Aise Kaam Ke Tahet Daakhil Ho Jo Shar'an Nek Ho To Woh Bid'at e Hasna Hai Aur Agar Woh Naya Kaam Aise Kaam Ke Tahet Ho Jo Shar'an Bura Ho To Woh Bid'at e Kabeeha Hai Warna Woh Mubaah Ki Qism Se Hai Aur Bidat Ki 5 Qisme'n Hai'n, (Fat'hul Baari, Jild No.3, Safha No.504, Daarul Ma'arfa Bairoot) Allaama Gulaam Rasool Sa'eedi A'laihir Rehma Ne Woh 5 Qisme'n Iss Tarah Shumaar Ki Hai'n, (1) Bidat e Waajiba. (2) Bid'at e Mustahebba. (3) Bid'at e Mubaaha. (4) Bid'at e Makrooh e Tanzeehi. (5) Bid'at e Makrooh e Tehreemi. (Bahawaala Ne'matul Baari Fee Saheehul Bukhaari, Jild No.4, Hadees No.2010, (Naaqil Shabbir Ahmad Raaj Mehli) Taraaveeh Ka Masla :- Taraaveeh Ki Namaaz 20 Rak'at Ham Log Padhte Hai'n Aur Aksar Logo'n Ka Yehi Amal Hai Haa'n Aajke Daur Me'n Chand Mut'thi Bhar Gair Muqallideen Naam Nihaad Ahle Hadees 8 Rak'at Taraaveeh Ki Namaaz Padhte Hai'n. To Aap Hazraat Ko Bata Doo'n Ke Yeh To Durust Hai Ke Taraaveeh Ki Rak'at Kitni Hai Isme'n Ikhtelaaf Hai Aur Iss Ikhtelaaf Ko Tirmizi Shareef Me'n Imaam Tirmizi Ne Zikr Kiya Hai Lekin Sab Se Ahem Baat Ke Imaam Tirmizi Ne 8 Rak'at Taraaveeh Ka Zikr Hi Nahee'n Kiya Mulaaheza Kare'n Imaam Tirmizi Likhte Hai'n, Qayaam e Ramzaan (Ya'ni Taraaveeh Ki Namaaz Me'n) Ahle Ilm Ka Ikhtelaaf Hai Ba'az Ki Raaye Hai Ke Woh Witr Ke Saath 41 Rak'aat Padhi Jaaye'n, Aur Yeh Ahle Madeena Ka Qaul Hai Aur Madeena Me'n Isi Par Amal Hota Tha, Aur Aksar Ahle Ilm Ka Mazhab Woh Hai Jo Hazrat Ali Radiallaahu A'nhu, Hazrat Umar Radiallaahu A'nhu, Aur Nabi e Kareem ﷺ Ke Deegar As'haab Radiallaahu A'nhum Ajma'een Se Marwi Hai Ke Taraaveeh Ki 20 Rak'aat Hai, Yeh Sufiyaan Sauri A'laihir Rehma, Ibne Mubaarak A'laihir Rehma, Aur Imaam Shaafayi A'laihir Rehma Ka Qaul Hai, Aur Imaam Shaafayi A'laihir Rehma Ne Kaha, Mai'n Ne Isi Tarah Apne Shaher Makka Ke Logo'n Ko Paaya Woh 20 Rak'at Padhte The, Aur Imaam Ahmad A'laihir Rehma Ne Kaha, Iss Masle Me'n Kayi Aqwaal Naql Kiye Gaye Hai'n Aur Unho'n Ne Isme'n Koi Faisla Nahee'n Kiya, Aur Is'haaq A'laihir Rehma Ne Kaha, Balke Ham 41 Rak'aat Ikhtiyaar Karte Hai'n Jaisa Ke Hazrat Ubayi Bin Ka'ab Se Marwi Hai Aur Ibne Mubaarak A'laihir Rehma Aur Ahmad A'laihir Rehma Aur Is'haaq A'laihir Rehma Ka Mukhtaar Yeh Hai Ke Ramzaan Ke Maheene Me'n Imaam Ke Saath Namaaz Padhi Jaaye Aur Shaafayi Ka Mukhtaar Yeh Hai Ke Agar Koi Shakhs Qir'at Kar Sakta Hai To Woh Tanha Padhe, (Sunane Tirmizi, Safha No.206 Se 253, Daarul Fikr, Bairoot) Imaam Tirmizi A'laihir Rehma Ki Wazaahat Se Ma'loom Huwa Ke Agarche Taraaveeh Ki Rak'at Ko Lekar Ikhtelaaf Hai Magar Aksar Ahle Ilm Ka Mauqif Yeh Hai Ke Taraaveeh 20 Rak'at Hai, Lekin Imaam Tirmizi A'laihir Rehma Ne In Ikhtelaafaat Me'n Kahee'n Par Bhi 8 Rak'at Taraaveeh Ka Zikr Nahee'n Kiya Magar Aaj Ke Gair Muqallideen 20 Rak'at Hi Ko Galat Kehne Par Lage Huwe Hai'n Jo Ke Imaam Tirmizi A'laihir Rehma Ke Baqaul Aksar Ahle Ilm Ka Mazhab Hai, Ab 20 Rak'at Taraaveeh Par Sahaaba e Kiraam Ka Amal Tha Ispar Ek Do Daleel Mulaaheza Keejiye, Saayeb Bin Yazeed Bayaan Karte Hai'n Ke Hazrat Umar Radiallaahu A'nhu Ne Ramzaan Me'n Logo'n Ko Hazrat Ubayi Bin Ka'ab Aur Hazrat Tameem Daarmi Radiallaahu A'nhu Ki Iqteda Me'n 21 Rak'at Par Jama Kiya Woh Namaaz Me'n 100 Ya 100 Se Zyaadah Aayaat Padhte Aur Namaaz e Fajr Ke Qareeb Laut'te The (Musannaf Abdur Razzaaq, Hadees No.7760, Jild No.4, Safha No.200, Darul Kutub Ilmiya, Bairoot) Yeh Yaad Rakhe'n Ho Sakta Hai Koi Gair Muqallid Kahe Ke Yahaa'n To 21 Rak'aat Hai'n To Ham Kehte Hai'n 20 Rak'at Taraaveeh Ki Hai Aur 1 Rak'at Witr Ki Hai Aur Ba'az Sahaaba e Kiraam Ke Nazdeek Witr Ki Ek Rak'at Bhi Ho Jaati Thi Aur Yeh Ijtehaadi Masla Hai Lekin Choo'nke 3 Rak'at Witr Padhne Par Bhi Ahadees Maujood Hai'n Isliye Ham Log 3 Rak'at Witr Padhte Hai'n, Aur Doosri Riwaayat Me'n Hai Ke Saayeb Bin Yazeed Ne Kaha, Ham Hazrat Umar Radiallaahu A'nhu Ke Zamaane Me'n Qayaam Se Uss Waqt Faarig Hote The Jab Namaaz e Fajr Ka Waqt Qareeb Ho Jaata Tha Aur Ham Hazrat Umar Radiallaahu A'nhu Ke Zamaane Me'n 23 Rak'aat Ke Saath Qayaam Karte The, (Musannaf Abdur Razzaaq, Hadees No.7763, Jild No.4, Safha No.201, Daarul Kutub Ilmiya, Bairoot) Yeh 23 Rak'aat Uss Soorat Me'n Hai Jab 20 Rak'aat Taraaveeh Aur 3 Rak'aat Witr Padhte The, Naafe Bin Umar Ne Bayaan Kiya Ke Hazrat Ibne Ubayi Mulaika Ham Ko Ramzaan Me'n 20 Rak'aat Padhaate The, (Musannaf Ibne Abi Shayba, Hadees No.7765, Majlis e Ilmi Bairoot) Abul Husna Bayaan Karte Hai'n Ke Hazrat Ali Radiallaahu A'nhu Ne Ramzaan Me'n Ek Shakhs Ko Hukm Diya Ke Woh 20 Rak'aat Padhaaye, (Musannaf Ibne Abi Shayba, Hadees No.7763 Majlis e Ilmi, Bairoot) Ab Dekhte Hai'n Uss Hadees Ko Jisko Gair Muqallideen 8 Rak'at Taraaveeh Par Fit Karte Hai'n Woh Hadees Yeh Hai Ke, Hazrat Abu Salma Bin Abdur Rehmaan Radiallaahu A'nhu Bayaan Karte Hai'n Ke Unho'n Ne Hazrat Aa'yesha Radiallaahu A'nha Se Sawaal Kiya Ke Rasoolullaah ﷺ Ramzaan Me'n Kis Tarah Namaaz Padhte The ? Hazrat Aa'yesha Radiallaahu A'nha Ne Farmaaya, Ramzaan Ho Ya Gair Ramzaan Aap 11 Rak'at Se Zyaadah Nahee'n Padhte The, Aap 4 Rak'at Padhte Tum Uske Husn Aur Tool Ko Na Poochho, Aap Phir 4 Rak'at Padhte Tum Uske Husn Aur Tool Ko Na Poochho, Phir Aap 3 Rak'at Padhte, Mai'n Ne Kaha, Ya Rasoolallaah ﷺ ! Aap Witr Padhne Se Pehle So Jaate Hai'n ? Aapne Farmaaya, Aye Aa'yesha ! Meri Aa'nkhe'n Soti Hai'n Mera Dil Nahee'n Sota. (Bukhaari Shareef, Hadees No.1147, Yeh Muslim, Abu Daawood, Tirmizi, Nisaayi, Me'n Bhi Maujood Hai) Ab Dekhe'n Iss Hadees Ko Gair Muqallideen Daleel Banaate Hai'n 8 Rak'at Taraaveeh Par Jab Ke Yahaa'n Taraaveeh Ki Namaaz Muraad Nahee'n Hai Kyu'nke Agar Yahaa'n Taraaveeh Ki Namaaz Muraad Hoti To Hazrat Aa'yesha Radiallaahu A'nha Gair Ramzaan Na Farmaatee'n Warna Gair Muqallideen Bataaye'n Kya Taraaveeh Ki Namaaz Gair Ramzaan Me'n Bhi Padhi Jaati Hai ? To Ma'loom Huwa Ke Iss Hadees Me'n Hazrat Aa'yesha Radiallaahu A'nha Ne Rasoolullaah ﷺ Ki Uss Namaaz Ke Muta'alliq Khabar Di Hai Jo Ramzaan Aur Gair Ramzaan Sab Me'n Padhi Jaati Thi Aur Zaahir Hai Woh Namaaz Koi Aur Nahee'n Balke Namaaz e Tahajjud Hai, (Iske Muta'alliq Mukammal Bahes Padhne Keliye Ne'matul Baari Fee Sharah Saheeh Bukhaari, Jild No.4, Hadees No.2010 Ki Tashreehaat Ki Taraf Ruju Kare'n Az Allaama Gulaam Rasool Sa'eedi A'laihir Rehma Ki, Naaqil Shabbir Ahmad Raaj Mehli)

Hazrat Aa'yesha Radiallaahu A'nha Nabi e Kareem ﷺ Ki Zauja Mohtarma Bayaan Karti Hai'n Ke Nabi Kareem ﷺ Ne Namaaz Padhi Aur Yeh Ramzaan Ka Waaqe'ah Hai.

Urwah Ne Khabar Di Ke Hazrat Aa'yesha Radiallaahu A'nha Ne Unko Khabar Di Ke Rasoolullaah ﷺ Aadhi Raat Ke Waqt Nikle, Pas Aapne Masjid Me'n Namaaz Padhi Aur Kuchh Mardo'n Ne Aapki Namaaz Ke Saath Namaaz Padhi, Phir Subah Logo'n Ne Ek Doosre Se Iska Zikr Kiya To Unme'n Se Bahot Zyaadah Log Jama Hogaye, Pas Unho'n Ne Aapke Saath Namaaz Padhi, Phir Subah Un Logo'n Ne Iska Zikr Kiya, To Phir (Usse Bhi) Zyaadah Log Jama Hogaye Aur Teesri Raat Ko Masjid Bhar Gayi, Phir Rasoolullaah ﷺ Ghar Se Baahar Aaye Pas Aapne Namaaz Padhi, So Logo'n Ne Aapki Namaaz Ke Saath Namaaz Padhi Phir Jab Chauthi Raat Aayi To Itne Zyaadah Log Aagaye Ke Masjid Unse Ta'ng Hogayi Hatta Ke Aap Subah Ki Namaaz Keliye Ghar Se Nikle, Jab Aapne Fajr Ki Namaaz Padha Li To Aapne Logo'n Ki Taraf Muh Kiya, Phir Kalma e Shahaadat Padha, Phir Farmaaya, Taaham Allaah A'zzowajal Ke Naam Aur Uski Hamd Ke Ba'ad Yeh Kehna Hai Ke Tumhaari Jagah (Tumhaara Namaaz Ka Shauq) Mujhse Pehle Posheedah Nahee'n Hai Lekin Mujhe Yeh Darr Hai Ke Yeh Namaaz Tum Par Farz Kardi Jaayegi Phir Tum Isko Padhne Se Aa'jiz Aajaaoge, Phir Rasoolullaah ﷺ Ka Wisaal Hogaya Aur (Uss Namaaz Ka) Mu'aamla Usi Tarah Barqaraar Raha.

Abu Salma Bin Abdur Rehmaan Bayaan Karte Hai'n Ke Unho'n Ne Hazrat Aa'yesha Radiallaahu A'nha Se Sawaal Kiya Ke Rasoolullaah ﷺ Ramzaan Me'n Kis Tarah Namaaz Padhte The ? Hazrat Aa'yesha Radiallaahu A'nha Ne Farmaaya, Ramzaan Ho Ya Gair Ramzaan Aap 11 Rak'aat Se Zyaada Nahee'n Padhte The, Aap 4 Rak'at Padhte Tum Uske Husn Aur Tool Ko Na Poochho, Phir Aap 4 Rak'at Padhte Tum Uske Husn Aur Tool Ko Na Poochho, Phir Aap 3 Rak'at Padhte, Mai'n Ne Kaha, Ya Rasoolallaah ﷺ ! Aap Witr Padhne Se Pehle So Jaate Hai'n ? Aapne Farmaaya, Aye Aa'yesha ! Meri Aa'nkhe'n Soti Hai'n Aur Mera Dil Nahee'n Sota.