Namaaz Ka Bayaan, Yeh Baab Hai Iss Muta'alliq Ke Shab e Me'raaj Me'n Namaazo'n Ko Farz Kiye Jaane Ki Kaifiyat (Kya Thi) (Imaam Bukhaari Aage Likhte Hai'n Ke) Aur Hazrat Ibne Abbaas Radiallahu Anhuma Ne Kaha, Mujhe Hazrat Abu Sufyaan Radiallahu Anhu Ne Hiraql Ki Hadees Me'n Bayaan Kiya Ke, Nabi e Kareem ﷺ Hume'n Namaaz Padhne, Sachh Bolne Aur Paak Daaman Rehne Ka Hukm Dete Hai'n (Yeh Hiraql Ke Waaqeye Par Mushtamil Mukammal Hadees, Hadees No.7 Me'n Mulaaheza Kare'n) (Phir Imaam Bukhaari Aage Yeh Hadees Naql Karte Hai'n Ke) Hazrat Anas Bin Maalik Radiallahu Anhu Ne Kaha Ke, Hazrat Abu Zar Radiallahu Anhu Hadees Bayaan Karte Hai'n Ke Rasoolullah ﷺ Ne Farmaaya, Mere Ghar Ki Chhat Me'n Shigaaf Kiya Gaya Aur Mai'n Uss Waqt Makka Me'n Tha, Phir Hazrat Jibra'il Naazil Huwe, Pas Mere Seene Ko Shak Kiya, Phir Unho'n Ne Usko Zamzam Ke Paani Se Dhoya, Phir Woh Sone Ka Tasht Lekar Aaye Jo Hikmat Aur Imaan Se Bhara Huwa Tha, Pas Usko Mere Seene Me'n U'ndail Diya, Phir Usko Band Kar Diya, Phir Mujhe Aasmaan e Duniya Ki Taraf Chadhaaya, Pas Jab Mai'n Aasmaan e Duniya Ki Taraf Aaya To Jibra'il Alaihissalaam Ne Aasmaan Ke Muhaafiz Se Kaha Kholo ! Usne Kaha Kaun Hai Unho'n Ne Kaha Jibra'il Hai, Usne Kaha Kya Aapke Saath Koi Aur Hai? Unho'n Ne Kaha Haa'n ! Mere Saath (Sayyiduna) Mohammad ﷺ Hai'n, Usne Kaha Kya Unhe'n Bulaaya Gaya Hai? Unho'n Ne Kaha Haa'n ! Pas Jab Usne Aasmaan Ko Khola To Hum Aasmaan e Duniya Ke Upar Gaye, Wahaa'n Ek Shakhs Baitha Huwa Tha, Uski Daaye'n Taraf Bhi Kuchh Log The Aur Baaye'n Taraf Bhi Kuchh Log The, Jab Woh Daaye'n Taraf Dekhte To Ha'nste Aur Jab Baaye'n Taraf Dekhte To Rote, Pas Unho'n Ne Kaha Nek Nabi Aur Nek Bete Ko Khush Aamdeed Ho, Mai'n Ne Jibra'il Alaihissalaam Se Kaha Yeh Kaun Hai'n? Unho'n Ne Kaha Yeh Aadam Alaihissalaam Hai'n Aur Yeh Log Jo Unki Daaye'n Taraf Aur Baaye'n Taraf Hai'n, Yeh Unki Aulaad Ki Roohe'n Hai'n, So Unme'n Se Jo Daaye'n Taraf Waale Hai'n Woh Ahle Jannat Hai'n Aur Jo Log Baaye'n Taraf Waale Hai'n Woh Ahle Dozakh Hai'n, Pas Jab Woh Daaye'n Taraf Dekhte Hai'n To Ha'nste Hai'n Aur Jab Baaye'n Taraf Dekhte Hai'n To Rote Hai'n, Hatta Ke Jibra'il Alaihissalaam Ne Mujhe Doosre Aasmaan Ki Taraf Chadhaaya, Phir Uske Muhaafiz Se Kaha Kholo, Uske Muhaafiz Ne Unse Usi Tarah Kalaam Kiya Jis Tarah Pehle Aasmaan Ke Muhaafiz Ne Kalaam Kiya Tha, Phir Usne (Aasmaan Ka Darwaazah) Khol Diya, Hazrat Anas Radiallahu Anhu Ne Bayaan Kiya, Nabi e Kareem ﷺ Ne Aasmaano'n Me'n Hazrat Aadam Alaihissalaam, Hazrat Idrees Alaihissalaam, Hazrat Moosa Alaihissalaam, Hazrat Esa Alaihissalaam, Aur Hazrat Ibraaheem Alaihissalaam Se Mulaaqaat Ki Aur Yeh Nahee'n Bayaan Kiya Ke Woh Kin Aasmaano'n Me'n The, Albatta Unho'n Ne Yeh Bayaan Kiya Ke, Nabi e Kareem ﷺ Ne Aasmaan e Duniya Me'n Hazrat Aadam Alaihissalaam Se Mulaaqaat Ki, Aur Hazrat Ibraaheem Alaihissalaam Se Chhate (6th) Aasmaan Me'n Mulaaqaat Ki, Hazrat Anas Radiallahu Anhu Ne Kaha, Jab Hazrat Jibra'il Alaihissalaam Nabi e Kareem ﷺ Ke Saath Hazrat Idrees Alaihissalaam Ke Paas Se Guzre To Unho'n Ne Kaha, Nek Nabi Aur Nek Bhaai Ko Khush Aamdeed Ho, Nabi e Kareem ﷺ Ne Jibra'il Alaihissalaam Se Kaha Yeh Kaun Hai'n? To Hazrat Jibra'il Alaihissalaam Ne Kaha Yeh Hazrat Idrees Alaihissalaam Hai'n, Phir Mai'n Hazrat Moosa Alaihissalaam Ke Paas Se Guzra To Unho'n Ne Kaha Nek Nabi Aur Nek Bhaai Ko Khush Aamdeed Ho, Mai'n Ne Jibra'il Alaihissalaam Se Kaha Yeh Kaun Hai'n? To Hazrat Jibra'il Alaihissalaam Ne Kaha Yeh Hazrat Moosa Alaihissalaam Hai'n, Phir Mai'n Hazrat Esa Alaihissalaam Ke Paas Se Guzra To Unho'n Ne Kaha Nek Nabi Aur Nek Bhaai Ko Khush Aamdeed Ho, Mai'n Ne Jibra'il Alaihissalaam Se Kaha Yeh Kaun Hai'n, To Jibra'il Alaihissalaam Ne Kaha Yeh Hazrat Esa Alaihissalaam Hai'n, Phir Mai'n Hazrat Ibraaheem Alaihissalaam Ke Paas Se Guzra To Unho'n Ne Kaha Nek Nabi Aur Nek Bete Ko Khush Aamdeed Ho, Mai'n Ne Jibra'il Alaihissalaam Se Kaha Yeh Kaun Hai'n? To Jibra'il Alaihissalaam Ne Kaha Yeh Hazrat Ibraaheem Alaihissalaam Hai'n, (Imaam Bukhaari Aage Likhte Hai'n Ke) Ibne Shihaab Zohri Ne Kaha Mujhe Ibne Hazam Ne Khabar Di Ke Hazrat Ibne Abbaas Aur Hazrat Abu Huba Ansaari Dono'n Yeh Kehte The Ke Nabi e Kareem ﷺ Ne Irshaad Farmaaya, Phir Mujhe Aur Upar Chadhaaya Gaya, Hatta Ke Mai'n Maqaam e Istawa Par Chadha Jahaa'n Mai'n Ne Qalmo'n Ke Chalne Ki Aawaaz Suni, Ibne Hazam Aur Hazrat Anas Radiallahu Anhu Ne Bayaan Kiya, Nabi e Kareem ﷺ Ne Irshaad Farmaaya, Pas Allah Ta'ala Ne Meri Ummat Par 50 Namaaze'n Farz Kardee'n, Mai'n Un Namaazo'n Ko Lekar Lauta, Hatta Ke Mai'n Hazrat Moosa Alaihissalaam Ke Paas Se Guzra, Unho'n Ne Kaha, Aapke Liye Aapki Ummat Par Allah Ta'ala Ne Kya Farz Kiya? Mai'n Ne Kaha 50 Namaaze'n Farz Ki Hai'n, Hazrat Moosa Alaihissalaam Ne Kaha Aap Apne Rab Ke Paas Waapas Jaaye'n Kyu'nke Aapki Ummat In (50 Namaazo'n Ko Padhne) Ki Taaqat Nahee'n Rakhti, Unho'n Ne Mujhe Waapas Kar Diya, (Jab Mai'n Waapas Allah Ta'ala Ki Baargaah Me'n Gaya) Pas Allah Ta'ala Ne Aadhi Namaaze'n Kam Kardee'n, (Phir) Mai'n Hazrat Moosa Alaihissalaam Ki Taraf Laut Gaya Aur Mai'n Ne Kaha Allah Ta'ala Ne Aadhi Namaaze'n Kam Kardee'n, (Phir) Unho'n Ne Kaha Apne Rab Ke Paas (Waapas) Jaa'ye'n Kyu'nke Aapki Ummat Inki (Bhi) Taaqat Nahee'n Rakhti, Phir Mai'n Allah Ta'ala Ke Paas Gaya To Allah Ta'ala Ne (Namaazo'n Ko Kam Karke 5 Kardi Aur) Farmaaya Yeh (Farz) 5 Namaaze'n Hai'n Aur (Ajar (Sawaab) Me'n) 5 (Namaazo'n Ke Baraabar) Hai'n, (Phir Allah Ta'ala Ne Farmaaya) Mera Qaul Mere Nazdeek Tabdeel Nahee'n Kiya Jaata, (Nabi e Kareem ﷺ Ne Irshaad Farmaaya) Phir Mai'n Hazrat Moosa Alaihissalaam Ki Taraf Lauta, To Unho'n Ne Kaha Aap Phir Apne Rab Ke Paas Jaaye'n, Mai'n Ne Kaha, (Ab) Mujhe Apne Rab Se Haya Aati Hai, Phir Hazrat Jibra'il Alaihissalaam Mujhe Le Gaye Hatta Ke Sidratul Muntaha Tak Paho'nche Aur Usko Mukhtalif Ra'ngo'n Ne Dhaa'np Rakha Tha, Mai'n Az Khud Nahee'n Jaanta Ke Woh Kya Hai'n, Phir Mujhe Jannat Me'n Daakhil Kiya Gaya, Achaanak Mai'n Ne Jannat Me'n Moti Ki Ladiyaa'n Dekhee'n Aur Jannat Ki Mitti Mushk Thi.
Hazrat Ummul Momineen Aa'yesha Radiallahu Anha Bayaan Karti Hai'n Ke Allah Ta'ala Ne Namaaz Farz Ki, Jab Namaaz Ko Farz Kiya To 2 - 2 Rak'at Farz Kee'n, Hazar Me'n Aur Safar Me'n, Phir Safar Ki Namaaz Barqaraar Rahi Aur Hazar Me'n Namaaz Zyaadah Kardi Gayi.
Yeh Baab Hai Iss Muta'alliq Ke, Kapde Pahen Kar Namaaz Padhne Ka Wujoob, (Phir Imaam Bukhaari Farmaate Hai'n Ke) Aur Allah Ta'ala Ka Irshaad Hai, Tum Masjid Me'n Har Baar Haazir Hone Ke Waqt Libaas Pahen Liya Karo (Sureh Aa'raaf, Aayat No.31) Aur Hazrat Salma Bin Ak'u Radiallahu Anhu Se Zikr Kiya Jaata Hai Ke, Nabi e Kareem ﷺ Ne Irshaad Farmaaya, Aur Kaa'nte Se Usko Band Karlo, (Imaam Bukhaari Farmaate Hai'n Ke) Iski Sanad Par Ae'teraaz Hai, (Phir Imaam Bukhaari Farmaate Hai'n Ke) Aur Jis Shakhs Ne Uss Kapde Me'n Namaaz Padhi Jisme'n Usne Jima Kiya Tha, (Phir Imaam Bukhaari Farmaate Hai'n Ke) Aur Nabi e Kareem ﷺ Ne Yeh Hukm Diya Ke Koi Shakhs Baitullah Ka Barhana Tawaaf Na Karega, (Phir Imaam Bukhari Aage Yeh Hadees Naql Karte Hai'n Ke) Hazrat Umme Atiya Radiallahu Anha Ne Bayaan Kiya Ke Hume'n Yeh Hukm Diya Gaya Tha Ke Hum Haiz Waali Aurto'n Ko Aur Pardah Daar Aurto'n Ko Eidain Ke Din Gharo'n Se Nikaale'n, Pas Woh Musalmaano'n Ki Jama'at Me'n Aur Unki Du'aa Me'n Haazir Ho'n, Aur Haiz Waali Aurte'n Unki Namaaz Ki Jagho'n Se Alag Baithe'n, Ek Aurat Ne Kaha, Ya Rasoolallah ﷺ ! Hum Me'n Se Kisi Ke Paas Chaadar Na Ho To? Nabi e Kareem ﷺ Ne Irshaad Farmaaya, Woh Apni Saheli Ki Chaadar Pahen Le, Aur Hazrat Abdullah Bin Raja Ne Kaha, Hume'n Imraan Ne Hadees Bayaan Ki, Unho'n Ne Kaha Ke Hume'n Mohammad Bin Seereen Ne Hadees Bayaan Ki, Unho'n Ne Kaha Ke Hume'n Hazrat Umme Atiya Radiallahu Anha Ne Hadees Bayaan Ki Ke Mai'n Ne Nabi e Kareem ﷺ Se Isi Tarah Suna Hai.
Yeh Baab Hai Iss Muta'alliq Ke, Namaaz Me'n Guddi Par Tehband Me'n Gireh Lagaana, (Phir Imaam Bukhaari Farmaate Hai'n Ke) Aur Abu Haazim Ne Hazrat Sahl Se Riwaayat Ki Hai Ke Sahaaba Ne Nabi e Kareem ﷺ Ke Saath Iss Haal Me'n Namaaz Padhi Ke Unho'n Ne Apne Kandho'n Par Apni Chaadaro'n Me'n Gireh Lagaayi Huwi Thi, (Phir Imaam Bukhaari Aage Yeh Hadees Naql Karte Hai'n Ke) Mohammad Bin Munkadir Bayaan Karte Hai'n Ke Hazrat Jaabir Radiallahu Anhu Ne Tehband Pehne Huwe Namaaz Padhi, Jiski Gireh Unho'n Ne Apni Guddi Ki Taraf Se Lagaayi Huwi Thi, Aur Unke (Deegar) Kapde Khu'nti Par Ta'nge Huwe The, Kisi Kehne Waale Ne Unse Kaha, Aap Ek Tehband Pehne Huwe Namaaz Padh Rahe Hai'n, Unho'n Ne Kaha Mai'n Sirf Isliye Yeh Kar Raha Hoo'n Taake Tum Jaise Ahmaq Mujhe Dekh Le, Nabi e Kareem ﷺ Ke Ahed Me'n Hum Me'n Se Kiske Paas 2 Kapde Hote The?
Mohammad Bin Munkadir Ne Kaha, Mai'n Ne Hazrat Jaabir Bin Abdullah Radiallahu Anhuma Ko Ek Kapda Pehne Huwe Namaaz Padhte Huwe Dekha Aur Unho'n Ne Kaha, Mai'n Ne Nabi e Kareem ﷺ Ko Dekha Ke Aap Ek Kapda Pehne Huwe Namaaz Padh Rahe The.
Yeh Baab Hai Iss Muta'alliq Ke, Ek Kapde Ko Apne Lapet Kar Namaaz Padhna, (Phir Imaam Bukhaari Farmaate Hai'n Ke) Zohri Ne Apni Hadees Me'n Bayaan Kiya Hai Ke, Multahif Ka Ma'ni Mutawashshah, Woh Shakhs Hai Jo Chaadar Ke Dono'n Siro'n Ke Palle Apne Kandho'n Par Daal Kar (Gireh Lagaade) Aur Yehi Kandho'n Par Chaadar Lapetne Ka Ma'ni Hai, Hazrat Umme Haani Radiallahu Anha Ne Kaha, Nabi e Kareem ﷺ Ne Chaadar Ke 2 Mukhaalif Siro'n Ko Apne Kandho'n Par Daal Liya, (Phir Imaam Bukhaari Aage Yeh Hadees Naql Karte Hai'n Ke) Riwaayat Hai Hazrat Umar Bin Abi Salma Radiallahu Anhu Se Ke, Nabi e Kareem ﷺ Ne Ek Kapda Pehne Huwe Namaaz Padhi, Uske Dono'n Sire Mukhaalif Rakhe, (Ya'ni Daayaa'n Sira Baaye'n Kandhe Par Daal Liya Aur Baayaa'n Sira Daaye'n Kandhe Par Daal Diya Aur Baham Gireh Lagaadi)
Riwaayat Hai Hazrat Umar Bin Abi Salma Radiallahu Anha Se Ke Unho'n Ne Nabi e Kareem ﷺ Ko Dekha, Aap Hazrat Umme Salma Radiallahu Anhu Ke Ghar Me'n Ek Kapda Pehne Huwe Namaaz Padh Rahe The Aur Uss Kapde Ke Dono'n Mukhaalif Sire Apne Kandho'n Par Rakhe Huwe The (Daayaa'n Sira Baaye'n Kandhe Par Daal Liya Aur Baayaa'n Sira Daaye'n Kandhe Par Daal Liya Phir Unme'n Gireh Lagaadi)
Hazrat Umar Bin Abi Salma Radiallahu Anhu Ne Khabar Di Ke Mai'n Ne Dekha Rasoolullah ﷺ Hazrat Umme Salma Radiallahu Anha Ke Ghar Me'n Ek Kapda Pehne Huwe Namaaz Padh Rahe The, Jisko Aapne Apne Gird Lapeta Huwa Tha Aur Uss Kapde Ke Dono'n Siro'n Ko Apne Dono'n Kandho'n Par Daala Huwa Tha.
Abu Murrah Maula Umme Haani Bint Abi Taalib Ne Khabar Di Ke Unho'n Ne Hazrat Umme Haani Bint Abi Taalib Radiallahu Anha Se Suna Ke Mai'n Fateh Makka Ke Saal Rasoolullah ﷺ Ke Paas Gayi, Uss Waqt Aap Gusl Kar Rahe The Aur Aapki Saahebzaadi Sayyadah Faatema Radiallahu Anha Aap Par Pardah Kar Rahi Thee'n, Woh Bayaan Karti Hai'n Ke Mai'n Ne Nabi e Kareem ﷺ Ko Salaam Kiya, Aapne Farmaaya Yeh Kaun Hai? Mai'n Ne Kaha Mai'n Umme Haani Bint Abi Taalib Hoo'n ! Nabi e Kareem ﷺ Ne Irshaad Farmaaya, Khush Aamdeed ! Umme Haani, (Phir) Jab Nabi e Kareem ﷺ Gusl Se Faarig Ho Gaye To Aapne Ek Kapda Apne Gird Lapet Kar 8 Rak'at Namaaz Padhi, (Phir) Jab Aap Namaaz Se Faarig Ho Gaye To Mai'n Ne Arz Kiya, Ya Rasoolallah ﷺ ! Meri Maa'n Ka Beta (Ya'ni Hazrat Ali Radiallahu Anhu) Yeh Kehta Hai Ke Woh Uss Shakhs Ko Qatl Karega Jisko Mai'n Panaah De Chuki Hoo'n, Woh Fulaa'n Bin Hubairah Hai, Tab Rasoolullah ﷺ Ne Irshaad Farmaaya, Aye Umme Haani Jisko Tumne Panaah Di Hai Usko Humne Panaah Di, Hazrat Umme Haani Ne Kaha Woh Chaasht Ka Waqt Tha.
Riwaayat Hai Hazrat Abu Hurairah Radiallahu Anhu Se Ke Ek Shakhs Ne Rasoolullah ﷺ Se Ek Kapde Me'n Namaaz Padhne Ke Muta'alliq Sawaal Kiya, To Rasoolullah ﷺ Ne Irshaad Farmaaya, Kya Tum Me'n Se Har Shakhs Ke Paas 2 Kapde Hai'n?
Hazrat Abu Hurairah Radiallahu Anhu Ne Bayaan Kiya Ke Nabi e Kareem ﷺ Ne Irshaad Farmaaya, Tum Me'n Se Koi Shakhs Ek Kapde Me'n Iss Tarah Namaaz Na Padhe Ke Uske Kandho'n Par Koi Cheez Na Ho.
Ikrima Ne Kaha Mai'n Ne Yahya Se Suna Ya Yahya Se Sawaal Kiya To Unho'n Ne Kaha Ke Mai'n Ne Hazrat Abu Hurairah Radiallahu Anhu Ko Yeh Kehte Huwe Suna Ke Jisne Ek Kapde Me'n Namaaz Padhi Woh Uske Dono'n Siro'n Ko Ek Doosre Ki Mukhaalif Jaanib Rakhe (Ya'ni Daayaa'n Sira Baaye'n Kandhe Par Aur Baayaa'n Sira Daaye'n Kandhe Par Rakh Kar Unme'n Gireh Lagaade)
Sa'eed Bin Haaris Bayaan Karte Hai'n Ke Humne Jaabir Bin Abdullah Radiallahu Anhuma Se Ek Kapde Me'n Namaaz Padhne Ke Muta'alliq Sawaal Kiya To Unho'n Ne Kaha Ke, Mai'n Kisi Safar Me'n Nabi e Kareem ﷺ Ke Saath Gaya, Phir Mai'n Apne Kisi Kaam Se Raat Ke Waqt Aapke Paas Aaya To Mai'n Ne Aapko Namaaz Padhte Huwe Paaya Aur Mujh Par Uss Waqt (Sirf) Ek Kapda Tha, Mai'n Ne Usko Apne Gird Lapet Liya Aur Nabi e Kareem ﷺ Ki Ek Jaanib Namaaz Padhne Laga, Jab Nabi e Kareem ﷺ Namaaz Se Faarig Huwe To Aapne Farmaaya, Aye Jaabir ! Raat Ko Kis Liye Aaye Ho? To Mai'n Ne Aapko Apni Haajat Ki Khabar Di, Pas Jab Mai'n Faarig Ho Gaya To Aapne Farmaaya, Mai'n Tumhaare Upar Yeh Kaisa Kapda Lipta Huwa Dekh Raha Hoo'n? Mai'n Ne Kaha Yeh Kapda Ta'ng Tha, Aapne Farmaaya, Agar Was'i Ho To Usko Lapet Liya Karo Aur Agar Ta'ng Ho To Uska Tehband Baa'ndh Liya Karo.
Hazrat Sahl Radiallahu Anhu Ne Bayaan Kiya Ke Nabi e Kareem ﷺ Ke Saath Mard Iss Tarah Namaaz Padhte The Ke Unka Tehband Bachcho'n Ki Tarah Unki Gardano'n Par Baa'ndha Hota Tha, Aur Nabi e Kareem ﷺ Ne Aurto'n Se Farmaaya, Tum Apne Saro'n Ko Sajdah Se Uss Waqt Tak Na Uthaao Hatta Ke Mard Seedhe Hokar Baith Jaaye'n.
Yeh Baab Hai Iss Muta'alliq Ke, Jubbah Shaamiya Pahen Kar Namaaz Padhna, (Phir Imaam Farmaate Hai'n Ke) Hasan (Basri) Ne Kaha, Jin Kapdo'n Ko Majoos Ne Buna Ho Un (Ko Pahenne) Me'n Koi Harj Nahee'n Hai, Aur Mo'mar Ne Kaha, Mai'n Ne Zohri Ko Dekha Woh Yaman Ke Un Kapdo'n Ko Pahente The Jinko Peshaab Se Ra'nga Jaata Tha, (Aur) Hazrat Ali Radiallahu Anhu Ne Bagair Dhule Huwe Kapde Me'n Namaaz Padhi, (Phir Imaam Bukhaari Ne Yeh Hadees Naql Ki Hai Ke) Hazrat Mugeerah Bin Sho'ba Radiallahu Anhu Ne Bayaan Kiya Ke Mai'n Nabi e Kareem ﷺ Ke Saath Ek Safar Me'n Tha, Aapne Farmaaya, Aye Mugeerah ! (Paani Ka) Bartan Uthaalo, Mai'n Ne Bartan Leliya, Phir Rasoolullah ﷺ Chale Gaye Hatta Ke Mujhse Chhup Gaye, Phir Aapne Qaza e Haajat Ki Aur Aapke Upar Shaami Jubbah Tha, Aap Uske Aasteen Se Apna Haath Nikaalne Lage, Woh Ta'ng Thi, Pas Aapne Apna Haath Aasteen Ke Neeche Se Nikaal Liya, Mai'n Ne Aapke Upar Paani Daala To Aapne Namaaz Ka Wazu Kiya Aur Apne Mozo'n Par Masah Kiya, Phir Aapne Namaaz Padhi.
Umro Bin Deenaar Ne Hadees Bayaan Ki Ke Unho'n Ne Kaha Ke Mai'n Ne Suna Hazrat Jaabir Bin Abdullah Radiallahu Anhuma Yeh Hadees Bayaan Karte The Ke Rasoolullah ﷺ Ka'ba Ki Ta'meer Keliye Logo'n Ke Saath Pat'thar Utha Kar La Rahe The Aur Aapne Tehband Baa'ndha Huwa Tha, Aapse Aapke Chacha Abbaas Radiallahu Anhu Ne Kaha, Aye Mere Bhateeje ! Agar Tum Apne Tehband Ko Utaar Do Aur Usko Apne Kandho'n Ke Upar Pat'thar Ke Neeche Rakh Do, Hazrat Jaabir Ne Kaha, Phir Unho'n Ne Aapka Tehband Utaar Kar Aapke Kandho'n Par Rakh Diya, So Aap Behosh Hokar Gir Gaye Uske Ba'ad Aap ﷺ Ko Kabhi Barhana Nahee'n Dekha Gaya . (Yaad Rahe Yeh Waaqeya Gaaleban Nabi e Kareem ﷺ Ke Bachpan Ka Hai Aur Ho Sakta Hai Uss Waqt Ka'ba Shareef Ki Ta'meer Huwi Ho Lekin Yeh Bhi Yaad Rahe Tehband Utaarte Hi Aap Zameen Par Behosh Hokar Gir Gaye The Aur Aap Par Kisi Ki Nazar Padne Se Pehle Yeh Sab Waaqeya Huwa, Ya'ni Uss Haalat Me'n Kisi Ne Aapko Dekha Nahee'n Aur Shaayad Allah Ta'ala Ki Jaanib Se Rasoolullah ﷺ Ke Takreem Ki Hifaazat Ki Gayi, (Lekin Allaama Gulaam Rasool Sa'eedi Rehmatullah Alaih Likhte Hai'n Ke Nabi e Kareem ﷺ Ke Tehband Utaarne Ka Waaqeya Agar Bachpan Ka Hai Tab To Ek Hisaab Se Yeh Waaqeya Durust Ho Sakta Hai Ke Chacha Apne Bhateeje Se Bachpan Ki Haalat Me'n Mushaqqat Ko Dekhte Huwe Shafqat Ke Taur Par Aisa Keh Sakte Hai'n Lekin Ka'ba Shareef Ki Ta'meer Uss Waqt Huwi Thi Jis Waqt Rasoolullah ﷺ Ki Umar Mubaarak 35 Saal Ki Thi Jaisa Ke Mash'hoor Yehi Hai To Phir Yeh Tehband Waala Waaqeya Uss Waqt Ka Hai Tab To Yeh Waaqeya (Aqal Wa Daanish) Ki Roshni Me'n Durust Nahee'n, Dekhe'n (Ne'matul Baari Fi Sharah Saheeh Bukhaari, Jild No.2, Kitaabus Salaat, Hadees No.364 Ke Tahet)
Hazrat Abu Hurairah Radiallahu Anhu Bayaan Karte Hai'n Ke Ek Shakhs Nabi e Kareem ﷺ Ki Taraf Khada Huwa Aur Usne Ek Kapde Me'n Namaaz Padhne Ke Muta'alliq Sawaal Kiya, Nabi e Kareem ﷺ Ne Irshaad Farmaaya, Kya Tum Me'n Se Har Shakhs Ke Paas 2 Kapde Hai'n? Phir Ek Shakhs Ne Hazrat Umar Radiallahu Anhu Se Sawaal Kiya, To Unho'n Ne Kaha, Jab Allah Ta'ala Ne Tumhe'n Wus'at Di Hai To Tum Wus'at Ko Ikhtiyaar Karo, Ek Shakhs Ne Apne Upar Apne Kapde Jam'a Kiye Aur Namaaz Padhi Aur Ek Shakhs Ne Tehband Aur Chaadar Me'n Namaaz Padhi, Aur Ek Shakhs Ne Tehband Aur Qamees Me'n Namaaz Padhi, Aur Ek Shakhs Ne Sherwaani Aur Chaadar Me'n Namaaz Padhi, Aur Ek Shakhs Ne Shalwaar Aur Qamees Me'n Namaaz Padhi, Aur Ek Shakhs Ne Shalwaar Aur Sherwaani Me'n Namaaz Padhi, Aur Ek Shakhs Ne Jaa'ngiya (Chhota Pant) Aur Qamees Me'n Namaaz Padhi, Aur Mera Gumaan Hai Unho'n Ne Kaha, Jaa'ngiya Aur Chaadar Me'n Namaaz Padhi.
Hazrat Umar Radiallahu Anhu Se Riwaayat Hai Ke Ek Shakhs Ne Rasoolullah ﷺ Se Sawaal Kiya Ke Mehrim (Ya'ni Jisne Ahraam Baa'ndh Liya Ho) Kya Pehne? Nabi e Kareem ﷺ Ne Irshaad Farmaaya, Woh Qamees Na Pehne Aur Shalwaar Na Pehne Aur Topi Na Pehne Aur Za'fraan Aur Khushbu Daar Ghaas Se Ra'nga Huwa Kapda Na Pehne Aur Jisko Joote Na Mile'n To Woh Moze Pahen Le Aur Mozo'n Ko Neeche Se Kaat Le Hatta Ke Woh Takhno'n Se Neeche Ho Jaaye'n Aur Az Naaf'e Az Hazrat Ibne Umar Radiallahu Anhuma Az Nabi e Kareem ﷺ Iss Hadees Ki Misl Marwi Hai.
Hazrat Abu Sa'eed Khudri Radiallahu Anhu Bayaan Karte Hai'n Ke Rasoolullah ﷺ Ne Ishtimaal Samma Se Aur Ek Kapde Me'n Bataur e Ahteba Baithne Se Man'a Farmaaya Ke Sharmgaah Par Kapde Ka Koi Hissa Na Ho. (Samma, Libaas Ki Uss Qism Ko Kehte Hai'n Ke Maslan Insaan Tehband Baa'ndhe Aur Aage Se Ya Peechhe Se Tehband Utha Kar Apne Kandho'n Par Rakh Le Jisse Uski Agli Ya Pichhli Sharmgaah Khul Jaaye Aur Ahteba Libaas Ki Uss Qism Ko Kehte Hai'n Ke Maslan Insaan Sirf Tehband Baa'ndha Huwa Ho Aur Woh Apni Maq'ad Zameen Par Tika Kar Dono'n Ghutne Khade Karke Baith Jaaye Iss Tarah Baithne Me'n Yeh Khatrah Hai Ke Uski Sharmgaah Khul Jaayegi Aur Dikhaayi Degi)
Hazrat Abu Hurairah Radiallahu Anhu Ne Bayaan Kiya Ke Nabi e Kareem ﷺ Ne 2 Qism Ki Baiy (Khareed Wa Farokht) Se Man'a Kiya, Allamaas Aur Alnabaaz Aur Ishtemaalus Samma Se Man'a Kiya, Aur Ek Kapde Me'n Bataur e Ahteba Baithne Se (Man'a Kiya). ( 1 - Baiy Allamaas Ka Mafhoom Yeh Hai Ke (Bechne Waala Ek Packet Me'n Khareedaar Ko Kapda De Ya Andhere Me'n De Aur Usse Kahe, Mai'n Ne Itne Rupye Me'n Tumko Yeh Kapda Farokht Kiya, Ba Shart Yeh Ke Tum Isko Chhu Kar Dekhlo Aur Tumhaara Chhuna Tumhaare Dekhne Ki Tarah Hoga, Aur Phir Dekhne Ke Ba'ad Tumko Ise Waapas Karne Ka Koi Ikhtiyaar Nahee'n Hoga, (Ya) Phir Bechne Waala Khareedaar Se Kahe Tumne Isko Chhu Liya To Tumko Khareedna Hoga, (Ya Bechne Waala Kahe, Tumne Chhu Liya To Tumko Khareedna Hoga Aur Waapas Karne Ka Koi Tumko Ikhtiyaar Na Hoga, (To Iss Tarah Ki Sharto'n Ke Saath Saamaan Bechna Durust Nahee'n) 2 - Baiy Alnabaaz Ka Mafhoom Yeh Hai Ke Saamaan Bechne Waala Khareedaar Se Kahe Mai'n Ne Saamaan Tumhaari Taraf Phe'nk Diya To Tumko Saamaan Khareedna Hoga Aur Waapas Ka Koi Ikhtiyaar Na Hoga Tumko (Iss Tarah Ki Sharto'n Ke Saath Bhi Saamaan Bechna Man'a Hai) Aur Raha Samma Aur Ahteba Ka Mafhoom To Uske Liye Hadees No 367 Padhe'n)
Humaid Bin Abdur Rehmaan Bin Auf Ne Khabar Di Ke Hazrat Abu Hurairah Radiallahu Anhu Ne Bayaan Kiya Ke Mujhe Hazrat Abu Bakar Radiallahu Anhu Ne Uss Hajj Me'n Yaumun Nahar Ko Ae'laan Karne Waalo'n Me'n Bheja Ke Hum Mana Me'n Yeh Ae'laan Kare'n Ke Iss Saal Ke Ba'ad Koi Mushrik Hajj Nahee'n Karega Aur Na Koi Baitullah Ka Barhana Tawaaf Karega, Humaid Bin Abdur Rehmaan Ne Kaha, Phir Unke Ba'ad Rasoolullah ﷺ Ne Hazrat Ali Radiallahu Anhu Ko Bheja Aur Unko Yeh Hukm Diya Ke Woh Bar'at Ka Ae'laan Kare'n, Hazrat Abu Hurairah Radiallahu Anhu Bayaan Karte Hai'n Ke Phir Humaare Saath Hazrat Ali Radiallahu Anhu Ne Yaumun Nahar (Ya'ni Qurbaani Ke Din) Ko Ahle Mana Me'n Yeh Ae'laan Kiya Ke Iss Saal Ke Ba'ad Koi Mushrik Hajj Nahee'n Karega Aur Na Koi Baitullah Ka Barhana Tawaaf Karega. (Jiss Saal Nabi e Kareem ﷺ Ne Hajj Ka Ameer Hazrat Abu Bakar Siddique Radiallahu Anhu Ko Banaaya Tha Jo Hajjatul Wada Se Pehle 9 Hijri Ka Saal Tha Tab Hazrat Abu Hurairah Radiallahu Anhu Ne Hazrat Abu Bakar Siddique Radiallahu Anhu Ke Kehne Par Ae'laan Kiya Tha Aur Phir Uske Ba'ad Nabi e Kareem ﷺ Ke Hukm Se Hazrat Ali Radiallahu Anhu Ne Ae'laan Kiya Tha)
Mohammad Bin Munkadir Bayaan Karte Hai'n Ke Mai'n Hazrat Jaabir Bin Abdullah Radiallahu Anhuma Ke Paas Gaya, Uss Waqt Woh Ek Kapde Ko Apne Gird Lapet Kar Namaaz Padh Rahe The, Aur Unki Chaadar Rakhi Huwi Thi, Jab Woh Namaaz Se Faarig Ho Gaye To Humne Kaha, Aye Abu Abdullah ! Aap Namaaz Padh Rahe Hai'n Aur Aapki Chaadar Rakhi Huwi Hai? Unho'n Ne Kaha Haa'n ! Mai'n Ne Yeh Pasand Kiya Ke Tum Jaise Jaahil Mujhko Dekhle'n, Mai'n Ne Nabi e Kareem ﷺ Ko Isi Tarah Namaaz Padhte Huwe Dekha Hai.
Yeh Baab Hai Iss Muta'alliq Ke, Raan Ke Muta'alliq Jo Ahaadees Zikr Ki Jaati Hai, (Phir) Imaam Abu Abdullah Ne Kaha Az Hazrat Ibne Abbaas Wa Hazrat Jarhad Wa Mohammad Bin Jahash Radiallahu Anhum Ajma'een Az Nabi e Kareem ﷺ Riwaayat Ki Gayi Hai Ke, Raan Sharmgaah Hai, Aur Imaam Bukhaari Ne Kaha, Hazrat Anas Bayaan Karte Hai'n Ke Nabi e Kareem ﷺ Ne Apni Raan Se Kapda Hataaya, (Phir Imaam Bukhaari Aage Farmaate Hai'n Ke) Hazrat Anas Ki Hadees Ki Sanad Zyaadah Qawi Hai Aur Hazrat Jarhad Ki Hadees Me'n Ahtiyaat Hai, Hatta Ke Hum Unke Ikhtelaaf Se Nikal Jaaye'n, (Phir Imaam Bukhaari Aage Farmaate Hai'n Ke) Aur Hazrat Abu Moosa Radiallahu Anhu Ne Kaha, Jab Hazrat Usmaan Daakhil Huwe To Nabi e Kareem ﷺ Ne Apne Ghutno'n Ko Dhaa'np Liya, (Phir Imaam Bukhaari Aage Farmaate Hai'n Ke) Aur Hazrat Zaid Bin Saabit Radiallahu Anhu Ne Kaha, Allah Ta'ala Ne Apne Rasool ﷺ Par Qur'aan Naazil Kiya Aur Aapki Raan Meri Raan Ke Upar Thi, Woh Mujhpar Itni Wazni Aur Bhaari Ho Gayi Ke Mujhe Khatrah Tha Ke Meri Raan Toot Jaayegi, (Phir Imaam Bukhaari Aage Yeh Hadees Naql Karte Hai'n Ke) Riwaayat Hai Hazrat Anas Radiallahu Anhu Se Ke Rasoolullah ﷺ Ne Khaibar Me'n Jihaad Kiya, Humne Khaibar Ke Paas Muh Andhere Subah Ki Namaaz Padhi, Pas Nabi e Kareem ﷺ Sawaar Huwe Aur Hazrat Abu Talha Radiallahu Anhu Sawaar Huwe Aur Mai'n Hazrat Abu Talha Ke Peechhe Sawaari Par Baitha Huwa Tha, Pas Nabi e Kareem ﷺ Ne Khaibar Ki Galiyo'n Me'n Ghode Ko Daudaaya, Aur Beshak Mera Ghutna Nabi e Kareem ﷺ Ki Raan Ko Chhu Raha Tha, Phir Nabi e Kareem ﷺ Ne Apni Raan Se Tehband Hataaya, Hatta Ke Mai'n Nabi e Kareem ﷺ Ki Raan Ki Safedi Ko Dekh Raha Tha, Pas Jab Nabi e Kareem ﷺ Basti Me'n Daakhil Huwe To Aapne Farmaaya Allahu Akbar, Khaibar Weeraan Ho Gaya, Beshak Hum Jin Logo'n Ki Basti Me'n Paho'nchte Hai'n To Un Logo'n Ki Subah Kaisi Buri Hoti Hai Jinko Daraaya Gaya Hai, Nabi e Kareem ﷺ Ne Yeh Kalmaat 3 Martaba Farmaaye, Khaibar Ke Log Apne Kaam Keliye Nikle To Unho'n Ne Kaha, Mohammad (Raawi) Abdul Azeez Ne Bayaan Kiya Aur Humaare Ba'az As'haab Ne Kaha Aur Khamees Ya'ni Lashkar, Humne Ja'ng Se Khaibar Ko Fateh Kar Liya, Phir Qaidiyo'n Ko Jam'a Kiya Gaya, Pas Hazrat Dihya Aaye Aur Kaha, Ya Rasoolallah ﷺ ! Mujhe Qaidiyo'n Me'n Se Ek Baa'ndi De De'n, Aapne Farmaaya Jaao Ek Baa'ndi Lelo, Unho'n Ne Sufiya Bint Huyya Ko Leliya, Ek Shakhs Ne Nabi e Kareem ﷺ Ke Paas Aakar Kaha, Ya Nabi Allah ! Aapne Hazrat Dihya Ko Safiya Bint Huyya Ata Kar Di Jo Banu Quraiza Aur Banu Nazeer Ki Sardaar Hai, Woh Sirf Aapke Laayeq Hai, Nabi e Kareem ﷺ Ne Irshaad Farmaaya, Dihya Ko Uske Saath Laao, Hazrat Dihya Uske Saath Aaye, Pas Nabi e Kareem ﷺ Ne Uski Taraf Dekha To Aapne Farmaaya, Tum Iske Siwa Qaidiyo'n Me'n Se Koi Aur Baandi Lelo, Phir Nabi e Kareem ﷺ Ne Unko Aazaad Karke Unse Nikaah Karliya, Hazrat Anas؛ Bin Saabit Ne Kaha, Aye Abu Hamzah, Hazrat Safiya Radiallahu Anha Ka Maher Kya Tha? Unho'n Ne Kaha Woh Khud Thee'n, Nabi e Kareem ﷺ Ne Unko Aazaad Karke Unse Nikaah Kar Liya, (Unke Aazaad Karne Ko Unka Maher Qaraar Diya) Hatta Ke Jab Nabi e Kareem ﷺ Raaste Me'n The To Hazrat Umme Sulaim Radiallahu Anha Ne Unko Tayyaar Kiya (Dulhan Banaaya) Phir Raat Ko Unhe'n Nabi e Kareem ﷺ Ke Paas Le Gayee'n, Nabi e Kareem ﷺ Ne Bataur e Dulha Ke Subah Ki, Pas Nabi e Kareem ﷺ Ne Irshaad Farmaaya, Jiske Paas (Khaane Ki) Koi Cheez Hai Woh Lekar Aaye Aur Chamde Ka Dastarkhwaan Bichha Diya, Phir Koi Shakhs Khajoore'n Lekar Aaya Aur Koi Shakhs Ghee Lekar Aaya Aur Mera Gumaan Hai Sattu Ka Zikr Kiya, Phir Unho'n Ne Hais (Ek Qism Ka Halwa) Bana Liya, Aur Yeh Rasoolullah ﷺ Ka Waleema Tha.
Yeh Baab Hai Iss Muta'alliq Ke, Aurat Kitne Kapde Pahen Kar Namaaz Padh Sakti Hai? (Phir Imaam Bukhaari Farmaate Hai'n Ke) Aur Ikrima Ne Kaha, Agar Aurat Apne Poore Jism Ko Ek Kapde Me'n Chhupa Le To Yeh Uske Liye Kaafi Hai, (Phir Imaam Bukhaari Yeh Hadees Naql Karte Hai'n Ke) Hazrat Aa'yesha Radiallahu Anha Ne Bayaan Kiya Ke Rasoolullah ﷺ Fajr Ki Namaaz Padhaate, Nabi e Kareem ﷺ Ke Saath Musalmaan Aurte'n Bhi Namaaz Padhtee'n Jo Apni Chaadaro'n Me'n Lipti Huwi Hoti Thee'n, Phir Woh Apne Gharo'n Ko Laut'tee'n Unko Koi Bhi Nahee'n Pehchaanta Tha. (Yaad Rahe Iss Hadees Se Yeh Saabit Hota Hai Ke Fajr Ki Namaaz Bilkul Awwal Waqt Me'n Padhi Jaaye Lekin Fajr Ki Namaaz Roshan Waqt Me'n Ya'ni Taakheer Karke Padhne Me'n Zyaadah Sawaab Hai Aur Yeh Bhi Hadees Se Saabit Hai, Chunaanche Hazrat Raaf'e Bin Khadeej Radiallahu Anhu Bayaan Karte Hai'n Ke Mai'n Ne Rasoolullah ﷺ Ko Yeh Farmaate Huwe Suna Hai Ke Subah Ki Namaaz Roshan Waqt Me'n Padho Kyu'nke Usme'n Zyaadah Ajar (Sawaab) Hai (Dekhe'n, Sunan Tirmizi 154, Sunan Abu Daawood 424, Sunan Ibne Maaja 672 Wagairah)
Hazrat Aa'yesha Radiallahu Anha Se Riwaayat Hai Ke Nabi e Kareem ﷺ Ne Aisi Chaadar Me'n Namaaz Padhi Jisme'n Naqsh Wa Nigaar The, Aapne Uske Naqsh Wa Nigaar Ki Taraf Nazar Daali, Phir Jab Namaaz Se Faarig Huwe To Farmaaya, Meri Iss Chaadar Ko Abu Jahm Ke Paas Le Jaao Aur Mujhe Abu Jahm Ki Saadah Chaadar Laa Do, Kyu'nke Iss Chaadar Ne Abhi Mujhe Namaaz Me'n Gaafil Kar Diya Tha, Aur Hishaam Bin Urwaah Ne Kaha Az Waalid Khud Az Hazrat Aa'yesha Radiallahu Anha Woh Bayaan Karti Hai'n Ke Nabi e Kareem ﷺ Ne Farmaaya, Mai'n Namaaz Me'n Uske Naqsh Wa Nigaar Ki Taraf Dekh Raha Tha, Pas Mujhe Khauf Huwa Ke Yeh Chaadar Mujhe Aazmaa'ish Me'n Daal Degi.
Hazrat Anas Radiallahu Anhu Bayaan Karte Hai'n Ke Hazrat Aa'yesha Radiallahu Anha Ke Paas Ek Pardah Tha, Jisko Unho'n Ne Ghar Ki Ek Jaanib Me'n Latkaaya Huwa Tha, Nabi e Kareem ﷺ Ne Irshaad Farmaaya, Tum Uss Parde Ko Humaare Saamne Se Hata Do Kyu'nke Uski Tasaaweer Musalsal Meri Namaaz Me'n Saamne Rahi Hai'n.
Hazrat Uqba Bin Aa'mir Radiallahu Anhu Bayaan Karte Hai'n Ke Nabi e Kareem ﷺ Ko Ek Resham Ki Achkan Hadiya Ki Gayi, Nabi e Kareem ﷺ Ne Usko Pahen Kar Namaaz Padhi, Phir Jab Aap Faarig Ho Gaye To Aapne Usko Bahot Sakhti Se Utaara, Jaise Usse Nafrat Karne Waale Ho'n Aur Aapne Farmaaya, Yeh Muttaqeen Ke Laayeq Nahee'n Hai.
Aun Bin Abi Juhaifa Apne Waalid Abu Juhaifa Radiallahu Anhu Se Riwaayat Karte Hai'n Ke Unke Waalid Ne Bayaan Kiya Ke Mai'n Ne Rasoolullah ﷺ Ko Surkh Chamde Ke Khaime Me'n Dekha, Aur Mai'n Ne Dekha Ke Hazrat Bilaal Radiallahu Anhu Ne Rasoolullah ﷺ Ke Bache Huwe Paani Ko Liya Aur Mai'n Ne Dekha Ke Log Uss Paani Par Jhapat Rahe The, Jisko Uss Paani Me'n Se Kuchh Paani Mil Jaata Woh Usko Apne Badan Par Lagaata Aur Jisko Uss Paani Me'n Se Kuchh Bhi Nahee'n Milta Woh Apne Saathi Ke Haath Ki Tari Ko Leta, Phir Mai'n Ne Hazrat Bilaal Ko Dekha, Unho'n Ne Ek Nezah Ko Zameen Me'n Gaad Diya Aur Nabi e Kareem ﷺ Surkh Hulla Pehne Huwe Nikle, Nabi e Kareem ﷺ Ne Neze Ke Saamne Logo'n Ko 2 Rak'at Namaaz Padhaayi Aur Mai'n Ne Dekha Log Aur Maweshi Neze Ke Paare Se Guzar Rahe The.
Yeh Baab Hai Iss Muta'alliq Ke, Chhat, Mimbar Aur Lakdi Par Namaaz Padhna, (Phir Imaam) Abu Abdullah (Bukhaari) Ne Kaha, Hasan Basri Isme'n Koi Harj Nahee'n Samajhte The Ke Barf Par Namaaz Padhi Jaaye Ya Pul Par Khwaah Uske Neeche Peshaab Beh Raha Ho Ya Uske Upar Ya Uske Saamne Ba Shart Yeh Ke Namaazi Aur Peshaab Ke Darmiyaan Sutrah Aur Hijaab Ho, (Phir Imaam Bukhaari Farmaate Hai'n Ke) Aur Hazrat Abu Hurairah Radiallahu Anhu Ne Masjid Ki Chhat Par Imaam Ki Iqteda Me'n Namaaz Padhi, (Phir Imaam Bukhaari Yeh Hadees Naql Karte Hai'n Ke) Abu Haazim Ne Hadees Bayaan Ki Ke, Logo'n Ne Hazrat Sahl Bin Sa'ad Radiallahu Anhu Se Sawaal Kiya Ke Mimbar Kiss Cheez Se Bana Tha? Unho'n Ne Kaha Ab Logo'n Me'n Usko Mujhse Zyaadah Jaanne Waala Koi Baaqi Nahee'n Hai, Yeh Maqaam e Gaaba Me'n Jhaao Ke Darakht Ki Lakdi Se Bana Huwa Hai, Fulaa'n Aurat Ka Jo Aazaad Kardah Fulaa'n Gulaam Tha Usne Usko Rasoolullah ﷺ Keliye Banaaya Tha, Jab Yeh Banaakar Rakha Gaya To Rasoolullah ﷺ Uspar Khade Huwe, Pas Aapne Qibla Ki Taraf Muh Karke Allahu Akbar Kaha Aur Log Aapke Peechhe Khade Ho Gaye, Aapne Qir'at Ki Aur Ruk'u Kiya Aur Logo'n Ne Aapke Peechhe Ruk'u Kiya, Phir Aapne Sar Uthaaya, Phir Aap Ulte Pair Waapas Mude, Phir Aapne Zameen Par Sajdah Kiya, Phir Aap Mimbar Ki Taraf Laute, Phir Aapne Qir'at Ki, Phir Ruk'u Kiya, Phir Aapne Ruk'u Se Sar Uthaaya, Phir Aap Ulte Pair Waapas Mude, Hatta Ke Aapne Zameen Par Sajdah Kiya, Pas Yehi Aapka Tareeqa Tha, Imaam Abdullah (Bukhaari) Ne Kaha, Ali Bin Abdullah Ne Kaha, Mujhse Imaam Ahmad Bin Hambal Rehmatullah Alaih Ne Iss Hadees Ke Muta'alliq Sawaal Kiya, Unho'n Ne Kaha, Mai'n Ne Sirf Yeh Iraadah Kiya Tha Ke Nabi e Kareem ﷺ Logo'n Se Buland The, Pas Iss Hadees Ki Bina Par Isme'n Koi Harj Nahee'n Hai Ke Imaam Logo'n Se Buland Ho, Ali Bin Abdullah Ne Imaam Ahmad Bin Hambal Rehmatullah Alaih Se Kaha, Sufiyaan Bin Uyaiyna Se Iss Hadees Ke Muta'alliq Bahot Sawaal Kiya Jaata Tha, Aapne Iss Hadees Ko Unse Nahee'n Suna? Unho'n Ne Kaha, Nahee'n !
Hazrat Anas Bin Maalik Radiallahu Anhu Se Riwaayat Hai Ke Rasoolullah ﷺ Apni Ghodi Se Gir Gaye, Pas Aapki Pindli Ya Aapka Kandha Zakhmi Ho Gaya Aur Aapne Apni Azwaaj Ke Paas Ek Maah Tak Na Jaane Ki Qasam Khaayi Thi, Pas Aap Apne Machaan (Gallery) Me'n Baith Gaye Jiski Seedhiyaa'n Khajoor Ke Darakht Ki Bani Huwi Thi, Pas Aapke As'haab Aapki Ayaadat Karne Keliye Aaye, Aapne Unko Baith Kar Namaaz Padhaayi, Aur Woh Khade Huwe The, Jab Aapne Salaam Phera To Farmaaya, Imaam Isliye Banaaya Jaata Hai Ke Uski Iqteda Ki Jaaye, Pas Jab Imaam Takbeer Kahe To Tum Bhi Takbeer Kaho, Aur Jab Imaam Ruk'u Kare To Tum Bhi Ruk'u Karo, Aur Jab Imaam Sajdah Kare To Tum Bhi Sajdah Karo, Aur Agar Woh Khade Hokar Namaaz Padhe To Tum Bhi Khade Hokar Namaaz Padho, Aur Nabi e Kareem Sallallaahu Alaihiwasallam 29 Din Ba'ad Machaan (Gallery) Se Utar Aaye, Sahaaba e Kiraam Ne Kaha, Ya Rasoolallah ﷺ ! Aapne To Ek Maah Ki Qasam Khaayi Thi? Nabi e Kareem ﷺ Ne Irshaad Farmaaya, Maheena 29 Din Ka Bhi Hota Hai.
Hazrat Maimoona Radiallahu Anha Bayaan Karti Hai'n Ke Rasoolullah ﷺ Namaaz Padh Rahe The Aur Mai'n Aapke Bilmuqaabil Thi, Kapda Mujh Par Pad Jaata Aur Aap Musalle (Ja Namaaz) Par Namaaz Padh Rahe The.
Yeh Baab Hai, Chataayi Par Namaaz Padhne Ke Muta'alliq, (Phir Imaam Bukhaari Farmaate Hai'n Ke) Aur Hazrat Jaabir Aur Hazrat Abu Sa'eed Radiallahu Anhuma Ne Kashti Me'n Khade Hokar Namaaz Padhi, Aur Hasan Basri Ne Kaha, Khade Hokar Namaaz Padhe Jab Tak Ke Tumhaare As'haab Par Dushwaar Na Ho, Tum Kashti Ke Saath Ghoomte Raho Warna Baith Kar Namaaz Padho, (Phir Imaam Bukhaari Ne Yeh Hadees Naql Ki Hai Ke) Riwaayat Hai Hazrat Anas Bin Maalik Radiallahu Anhu Se Ke Unki Daadi Hazrat Maleka Radiallahu Anha Ne Rasoolullah ﷺ Ko Uss Khaane Ki Da'wat Di Jo Unho'n Ne Aap ﷺ Keliye Tayyaar Kiya Tha, Nabi e Kareem ﷺ Ne Usko Khaaya Phir Farmaaya, Khade Ho Mai'n Tumko Namaaz Padhaau'n, Hazrat Anas Radiallahu Anhu Ne Kaha, Mai'n Uss Chataayi Ki Taraf Khada Huwa Jo Lambe Arse Se Iste'maal Ki Wajah Se Maili Ho Chuki Thi, Mai'n Ne Usko Paani Se Dhoya, Pas Rasoolullah ﷺ Khade Huwe Aur Mai'n Ne Aur Yateem Ne Aapke Peechhe Saf Banaayi Aur Budhiya Humaare Peechhe Khadi Huwi, Pas Rasoolullah ﷺ Ne Hume'n 2 Rak'at Namaaz Padhaayi Phir Aap Chale Gaye.
Hazrat Maimoona Radiallahu Anha Bayaan Karti Hai'n Ke Nabi e Kareem ﷺ Khumrah (Ja Namaaz) Par Namaaz Padhte The.
Yeh Baab Hai, Bistar Par Namaaz Padhne Ke Muta'alliq, (Phir Imaam Bukhaari Farmaate Hai'n Ke) Aur Hazrat Anas Radiallahu Anhu Ne Apne Bistar Par Namaaz Padhi, (Phir Farmaaya) Aur Hazrat Anas Radiallahu Anhu Ne Kaha, Hum Nabi e Kareem ﷺ Ke Saath Namaaz Padhte The To Hum Me'n Se Ek Shakhs Apne Kapde Par Sajdah Karta Tha, (Phir Imaam Bukhaari Yeh Hadees Naql Karte Hai'n Ke) Hazrat Aa'yesha Radiallahu Anha Zauja Nabi e Kareem ﷺ Bayaan Karti Hai'n Ke Mai'n Rasoolullah ﷺ Ke Saamne Soti Thi, Aur Mere Dono'n Pair Aapke Qibla Ki Jaanib Hote The, So Jab Aap Sajdah Karte To Mujhe Haath Se Ishaarah Karte To Mai'n Apne Pair Khee'nch Leti, Phir Jab Aap Khade Hote To Mai'n Apne Pairo'n Ko Phir Phaila Leti Aur Gharo'n Me'n Un Dino'n Chiraag Nahee'n Hote The.
Hazrat Aa'yesha Radiallahu Anha Ne Khabar Di Ke Rasoolullah ﷺ Namaaz Padh Rahe The Aur Hazrat Aa'yesha Radiallahu Anha Aapke Aur Qibla Ke Darmiyaan Aapke Ahel Ke Bistar Ke Upar Janaaze Ki Tarah Leti Huwi Thee'n.
Riwaayat Hai Urwaah Se Ke Nabi e Kareem ﷺ Namaaz Padh Rahe The Aur Hazrat Aa'yesha Radiallahu Anha Aapke Aur Qibla Ke Darmiyaan Uss Bistar Par Leti Huwi Thee'n Jispar Woh Dono'n Sote The.
Yeh Baab Hai, Shadeed Garmi Me'n Kapde Par Sajdah Karne Ke Muta'alliq, (Phir Imaam Bukhaari Farmaate Hai'n Ke) Aur Hasan Basri Ne Kaha, Log Imaama Par Sajdah Karte The Aur Topi Par Aur Unke Haath Apni Aasteen Me'n Hote The, (Phir Imaam Bukhaari Yeh Hadees Naql Karte Hai'n Ke) Hazrat Anas Bin Maalik Radiallahu Anhu Ne Bayaan Kiya Ke, Hum Nabi e Kareem ﷺ Ke Saath Namaaz Padhte The, Phir Hum Me'n Se Koi Shakhs Garmi Ki Shiddat Ki Wajah Se Apne Kapde Ka Pallu Sajdah Ki Jagah Par Rakhta.
Sa'eed Bin Yazeed Azdi Ne Khabar Di Unho'n Ne Kaha Ke, Mai'n Ne Hazrat Anas Bin Maalik Radiallahu Anhu Se Sawaal Kiya, Kya Nabi e Kareem ﷺ Joote Pehne Huwe Namaaz Padhte The? Unho'n Ne Kaha Haa'n ! (Yaad Rahe Agarche Iss Hadees Shareef Se Yeh Saabit Hota Hai Ke Joote Pahen Kar Nabi e Kareem ﷺ Ne Namaaz Padhi Hai, Lekin Choo'nke Humaare Shehro'n Ki Sadko'n Aur Galiyo'n Me'n Umooman Ghodo'n, Gadho'n, Kutto'n, Billiyo'n Ka Peshaab Aur Gataro'n Ka Paani Pada Rehta Hai Jiske Sabab Jooto'n Ke Talwe Napaak Ho Jaate Hai'n Aur Usse Najaasat Ko Door Karne Keliye Jooto'n Ko 3 Baar Dhona Zaroori Hai Aur Har Baar Dhokar Khushk Kiya Jaaye Aur Choo'nke Aaj Kal Ke Jo Joote Hai'n Usko Nichoda Nahee'n Ja Sakta To Phir Joote Dhokar Hume'n Khushk Karne Keliye Kaafi Der Rakhna Hoga Aur Napaak Jooto'n Ke Saath Namaaz Padhna Kisi Ke Bhi Nazdeek Jaa'iz Nahee'n Hai Iss Sabab In Saari Mushaqqato'n Se Bachne Keliye Behtar Aur Afzal Yeh Hai Ke Bagair Joote Ke Namaaz Padha Jaaye Aur Choo'nke Rasoolullah ﷺ Ne Bhi Na'nge Pair Namaaz Padhi Hai Isliye Isse Husool e Sunnat Ki Niyat Bhi Karli Jaaye.
Hammaam Bin Haaris Bayaan Karte Hai'n Ke Mai'n Ne Hazrat Jareer Bin Abdullah Radiallahu Anhuma Ko Dekha Ke Unho'n Ne Peshaab Kiya, Phir Wazu Kiya Aur Apne Mozo'n Par Masah Kiya, Phir Unho'n Ne Khade Hokar Namaaz Padhi, Pas Unse Sawaal Kiya Gaya To Unho'n Ne Kaha Ke, Mai'n Ne Dekha Nabi e Kareem ﷺ Ne Iss Tarah Kiya Tha, Ibraaheem Ne Kaha, Mohaddiseen Ko Yeh Hadees Isliye Pasand Thi Ke Hazrat Jareer Radiallahu Anhu Aakhir Me'n Islaam Laaye The.
Hazrat Mugeerah Bin Sho'ba Radiallahu Anhu Ne Bayaan Kiya Ke Mai'n Ne Nabi e Kareem ﷺ Ko Wazu Karaaya, Phir Nabi e Kareem ﷺ Ne Mozo'n Par Masah Kiya Aur Namaaz Padhi.
Hazrat Huzaifa Radiallahu Anhu Ne Ek Shakhs Ko Dekha Woh Poora Ruk'u Aur Poora Sajdah Nahee'n Kar Raha Tha, Jab Uss Shakhs Ne Namaaz Padhli To Hazrat Huzaifa Radiallahu Anhu Ne Usse Kaha, Tumne Namaaz Padhi Aur Mera Gumaan (Raawi Hadees Ka Gumaan) Hai Hazrat Huzaifa Radiallahu Anhu Ne Kaha Agar Tum (Isi Tarah Namaaz Padhte Huwe) Mar Gaye To Sayyiduna Mohammad ﷺ Ki Sunnat Ke Gair Par Maroge.
Abdullah Bin Maalik Bin Buhaina Radiallahu Anhu Bayaan Karte Hai'n Ke Jab Nabi e Kareem ﷺ Namaaz Padhte The To Apne Dono'n Baazuwo'n Ko Kushaadah Rakhte, Hatta Ke Aapki Baglo'n Ki Safedi (Ki Jagah) Zaahir Hoti, Aur Lais Ne Kaha, Mujhe Ja'far Bin Rab'i Ne Iski Misl Hadees Bayaan Ki.
Yeh Baab Hai, Qibla Ki Taraf Muh Karne Ki Fazeelat Ke Muta'alliq (Phir Imaam Bukhaari Farmaate Hai'n Ke) Hazrat Abu Humaid Radiallahu Anhu Nabi e Kareem ﷺ Se Riwaayat Karte Hai'n Ke Aap ﷺ (Sajde Me'n) Pairo'n Ki U'ngliyo'n Ke Siro'n Ko Qibla Ki Taraf Rakhte The, (Phir Imaam Bukhaari Yeh Hadees Naql Karte Hai'n Ke) Hazrat Anas Bin Maalik Radiallahu Anhu Ne Bayaan Kiya Ke Rasoolullah ﷺ Ne Irshaad Farmaaya, Jisne Humaari (Tarah) Namaaz Padhi Aur Humaare Qibla Ki Taraf Muh Kiya Aur Humaare Zabeeha Ko Khaaya, Pas Yeh Woh Musalmaan Hai Jiske Liye Allah Ka Zimma Hai Aur Uske Rasool Ka Zimma Hai, Pas Tum Allah Ke Zimme Ko Paamaal Na Karo.
Hazrat Anas Bin Maalik Radiallahu Anhu Ne Bayaan Kiya Ke Rasoolullah ﷺ Ne Irshaad Farmaaya, Mujhe Yeh Hukm Diya Gaya Hai Ke Mai'n Logo'n Se Qitaal Karu'n Hatta Ke Woh Kahe'n La Ilaaha Illallah, Pas Jab Woh Yeh Kalma Padh Le'n Aur Humaari (Tarah) Namaaz Padhe'n Aur Humaare Qibla Ki Taraf Muh Kare'n Aur Humaari Tarah Zibah Kare'n To Unki Jaane'n Aur Unke Amwaal Hum Par Haraam Ho Jaaye'nge, Maasiwa Uss Jaan Aur Maal Ke Jis Par Kisi Ka Haq Ho Aur Unka Hisaab Allah Par Hai.
Imaam Bukhaari Farmaate Hai'n Ke, Aur Ali Bin Abdullah Ne Kaha, Hume'n Khaalid Bin Haaris Ne Hadees Bayaan Ki, Unho'n Ne Kaha Ke Hume'n Humaid Ne Hadees Bayaan Ki, Unho'n Ne Kaha, Maimoon Bin Yasaar Ne Hazrat Anas Bin Maalik Radiallahu Anhu Se Sawaal Kiya Aur Kaha, Aye Abu Hamzah ! Bande Ki Jaan Aur Maal Ko Kya Cheez Haraam Karti Hai? To Unho'n Ne Kaha, Jisne La Ilaaha Illallah Ki Shahaadat Di Aur Humaare Qibla Ki Taraf Muh Kiya Aur Humaari (Tarah) Namaaz Padhi Aur Humaara Zabeeha Khaaya, Pas Woh Musalmaan Hai, Uske Woh Huqooq Hai'n Jo Musalmaan Ke Huqooq Hai'n Aur Uspar Woh Ahkaam Farz Hai'n Jo Musalmaan Par Farz Hai'n, (Phir Imaam Bukhaari Yeh Hadees Naql Karte Hai'n Ke) Ibne Abi Maryam Ne Kaha, Hume'n Yahya Ne Khabar Di, Unho'n Ne Kaha Ke, Hume'n Humaid Ne Hadees Bayaan Ki, Unho'n Ne Kaha, Hume'n Hazrat Anas Radiallahu Anhu Ne Hadees Bayaan Ki Az Nabi e Kareem ﷺ (Saabiq Hadees Ki Misl)
Yeh Baab Hai, Ahle Madeena, Ahle Shaam Aur Mashriq Ka Qibla Aur Mashriq Aur Magrib Me'n Koi Qibla Nahee'n Hai Iss Muta'alliq, (Phir Imaam Bukhaari Farmaate Hai'n) Kyu'nke Nabi e Kareem ﷺ Ka Irshaad Hai, Paakhaana Ya Peshaab Karte Waqt Qibla Ki Taraf Muh Na Karo Lekin Mashriq Ya Magrib Ki Taraf Muh Karo, (Yeh Mukammal Hadees Padhne Keliye Hadees No.144 Dekhe'n) (Phir Imaam Bukhaari Yeh Hadees Naql Karte Hai'n Ke) Riwaayat Hai Hazrat Abu Ayyub Ansaari Radiallahu Anhu Se Ke Nabi e Kareem ﷺ Ne Irshaad Farmaaya, Jab Tum Qaza e Haajat Keliye Jaao To Na Qibla Ki Taraf Muh Karo Na Qibla Ki Taraf Peeth Karo, Lekin Mashriq Ya Magrib Ki Taraf Muh Karo, Hazrat Abu Ayyub Ansaari Ne Kaha, Pas Hum (Mulk) Shaam Me'n Gaye Wahaa'n Humne Dekha Baitul Khala Qibla Ki Jaanib Bane Huwe The Hum Qibla Se Munharif Hokar Baithte The Aur Allah Ta'ala Se Magferat Talab Karte The, Aur Az Zohri Az Ata Unho'n Ne Kaha, Mai'n Ne Iss Hadees Ki Misl Abu Ayyub Se Suni Az Nabi e Kareem ﷺ.
Umro Bin Deenaar Ne Bayaan Kiya Ke Humne Hazrat Ibne Umar Radiallahu Anhuma Se Uss Shakhs Ke Muta'alliq Sawaal Kiya Jo Umrah Keliye Baitullah Ka Tawaaf Kare Aur Safa Aur Marwah Ke Darmiyaan Sa'ee Na Kare, Kya Woh Apni Biwi Se Mubaasherat Kar Sakta Hai? Hazrat Ibne Umar Radiallahu Anhuma Ne Kaha, Nabi e Kareem ﷺ Aaye Aur Aapne Baitullah Ke Gird Saat 7 Tawaaf Kiye, Phir Maqaam e Ibraaheem Ke Peechhe 2 Rak'at Namaaz Padhi Aur Safa Aur Marwah Ke Darmiyaan Sa'ee Ki, Aur Tumhaare Liye Rasoolullah ﷺ Me'n Umdah Namoona Hai. (Sureh Ahzaab, Aayat No.21)
Iss Hadees Ke Bhi Wohi Saare Raawi Hai'n Jo Hadees No.395 Ke Hai'n To Raawi Ne Kaha, Aur Humne Hazrat Jaabir Bin Abdullah Radiallahu Anhuma Se Sawaal Kiya To Unho'n Ne Kaha, (Umrah Karne Waala) Uss Waqt Tak Apni Biwi Se Muqaarebat Na Kare Jab Tak Ke Safa Aur Marwah Ke Darmiyaan Sa'ee Na Karle.
Mujaahid Bayaan Karte Hai'n Ke Hazrat Ibne Umar Radiallahu Anhuma Aaye, Unse Kaha Gaya Yeh Rasoolullah ﷺ Hai'n Jo Ka'ba Me'n Daakhil Ho Gaye, To Hazrat Ibne Umar Radiallahu Anhuma Ne Kaha, Mai'n Aaya Aur Nabi e Kareem ﷺ Ka'ba Se Baahar Nikal Aaye, Mai'n Ne Dekha Hazrat Bilaal Radiallahu Anhu 2 Darwaazo'n Ke Darmiyaan Khade Huwe The, Mai'n Ne Hazrat Bilaal Radiallahu Anhu Se Sawaal Kiya Aur Kaha, Kya Nabi e Kareem ﷺ Ne Ka'ba Me'n Namaaz Padhi Hai? Unho'n Ne Kaha, Jab Aap Ka'ba Me'n Daakhil Huwe To Aapki Baaye'n Jaanib Jo 2 Suttoon Hai'n Unke Darmiyaan Aapne 2 Rak'at Namaaz Padhi Hai, Phir Aap Baahar Nikle Aur Ka'ba Ke Saamne 2 Rak'at Namaaz Padhi.
Hazrat Ibne Abbaas Radiallahu Anhuma Ne Bayaan Kiya, Jab Nabi e Kareem ﷺ Baitullah Me'n Daakhil Huwe To Aapne Uski Tamaam Atraaf Me'n Du'aa Ki Aur Namaaz Nahee'n Padhi Hatta Ke Aap Usse Baahar Nikal Aaye, Phir Jab Aap Baahar Aaye To Aapne Ka'ba Ke Saamne 2 Rak'at Namaaz Padhi Aur Farmaaya, Yeh Qibla Hai. (Yaad Rahe Hadees No.397 Aur Hadees No.398 Me'n Ta'arruz Waaq'e Hai Isme'n Tatbeeq Ulma e Kiraam Ne Di Hai Aur Kaha Hai Ke Jab Isbaat Aur Nafi Me'n Ta'arruz Waaq'e Ho To Isbaat Ko Raajeh Qaraar Diya Jaayega Iss Sabab Hazrat Bilaal Radiallahu Anhu Waali Hadees Raajeh Hai, Aur Rahi Baat Ta'arruz Waaq'e Hone Ki Ke Kisi Sahaabi Ne Ka'ba Shareef Ke Andar Namaaz Padhte Dekha Kisi Ne Nahee'n Dekha Yeh Iss Sabab Huwa Ke Jab Nabi e Kareem ﷺ Aur Sahaaba e Kiraam Ka'ba Shareef Ke Andar Daakhil Huwe To Du'aa Me'n Mashgool Ho Gaye Ab Du'aa Ke Ba'ad Mukhtasaran 2 Rak'at Namaaz Mere Aaqa Kareem ﷺ Ne Padhi Aur Hazrat Bilaal Radiallahu Anhu Choo'nke Rasoolullah ﷺ Ke Qareeb The Uss Sabab Unho'n Ne Dekh Liya, Aur Deegar Sahaaba e Kiraam Maslan Hazrat Usaama Rasoolullah ﷺ Se Door The Aur Apni Du'aa Me'n Mashgool The Uss Sabab Namaaz Padhte Nahee'n Dekh Paaye, Yehi Mafhoom Hai Allaama Navvi Rehmatullah Alaih Ki Tatbeeq Ka, Dekhe'n Sahih Muslim, Basharah Navvi, Jild No.6, Safha No.3587 & 3588 Maktaba e Nazaar Mustafa, Makka Mukarrama, 1417 Hijri)
Yeh Baab Hai Iss Muta'alliq Ke, Qibla Ki Taraf Tawajjoh Ki Jaaye Insaan Jahaa'n Kahee'n Bhi Ho, (Phir Imaam Bukhaari Farmaate Hai'n Ke) Aur Hazrat Abu Hurairah Radiallahu Anhu Bayaan Karte Hai'n Ke Nabi e Kareem ﷺ Ne Irshaad Farmaaya, Qibla Ki Taraf Muh Karo Aur Takbeer Padho, (Yeh Hadees No.6251 Ka Ek Tukda Hai Mukammal Wahaa'n Padhe'n) (Phir Imaam Bukhaari Yeh Hadees Naql Karte Hai'n Ke) Hazrat Bara Bin Aa'zib Radiallahu Anhuma Bayaan Karte Hai'n Ke Rasoolullah ﷺ Ne Baitul Muqaddas Ki Taraf Muh Karke 16 Ya 17 Maheene Namaaz Padhi Aur Rasoolullah ﷺ Yeh Pasand Karte The Ke Aapko Ka'ba Ki Taraf Mutawajjeh Kar Diya Jaaye, Tab Allah Azzowajal Ne Yeh Aayat Naazil Farmaayi, Tarjuma - Hum Aapka Chehra Baar Baar Aasmaan Ki Taraf Phirna Dekh Rahe Hai'n, (Sureh Baqarah, Aayat No.144) Phir Nabi e Kareem ﷺ Ko Ka'ba Ki Taraf Mutawajjeh Kar Diya Gaya, Aur Logo'n Me'n Johla Ne Kaha Aur Woh Yahood The, Unko Unke Uss Qibla Se Kisne Pher Diya, Jispar Yeh Pehle The? Aap Kahiye, Mashriq Aur Magrib Allah Hi Keliye Hai'n, Woh Jisko Chaahta Hai Seedhe Raaste Ki Taraf Hidaayat Deta Hai, (Sureh Baqarah, Aayat No.142) Phir Nabi e Kareem ﷺ Ke Saath Ek Shakhs Ne Namaaz Padhi, Woh Namaaz Padhne Ke Ba'ad Baahar Nikla Aur Ansaar Ke Logo'n Ke Paas Se Guzra, Woh Baitul Muqaddas Ki Taraf Muh Karke Namaaz e Asar Padh Rahe The, Pas Usne Kaha, Woh Gawaahi Deta Hai Ke Usne (Abhi) Rasoolullah ﷺ Ke Saath Namaaz Padhi Hai Aur Nabi e Kareem ﷺ Ka'ba Ki Taraf Muh Kiye Huwe The, Phir Woh Log Mud Gaye Aur Unho'n Ne Ka'ba Ki Taraf Muh Kar Liya.
Hazrat Jaabir Radiallahu Anhu Bayaan Karte Hai'n Ke Rasoolullah ﷺ Sawaari Par Namaaz Padhte The, Jis Taraf Bhi Sawaari Ka Muh Ho, Pas Jab Aap Farz Padhne Ka Iraadah Karte To Sawaari Se Utarte Aur Qibla Ki Taraf Muh Karte.
Hazrat Abdullah Bin Mas'ood Radiallahu Anhu Bayaan Karte Hai'n Ke Nabi e Kareem ﷺ Ne Namaaz Padhaayi, Ibraaheem Ne Kaha, Mujhe Pata Nahee'n Iss Namaaz Me'n Aapne Kuchh Zyaadati Ki Ya Kuchh Kami Ki, Pas Jab Aapne Salaam Phera To Aapse Kaha Gaya, Ya Rasoolallah ﷺ ! Kya Namaaz Me'n Koi Naya Hukm Naazil Huwa Hai? Aapne Poochha, Iska Sabab Kya Hai? Sahaaba e Kiraam Ne Kaha, Aapne Iss Tarah Aur Iss Tarah Namaaz Padhi, Aapne Apne Pair Mode Aur Qibla Ki Taraf Muh Kiya Aur Sajde Kiye, Phir Salaam Phera, Phir Humaari Taraf Muh Karke Farmaaya, Agar Namaaz Me'n Koi Naya Hukm Naazil Hota To Mai'n Tumhe'n Uski Khabar Deta, Lekin Mai'n Sirf Tumhaari Misl Bashar Hoo'n, Mai'n Iss Tarah Bhoolta Hoo'n Jis Tarah Tum Bhoolte Ho, Pas Jab Mai'n Bhool Jaau'n To Tum Mujhe Yaad Dilaaya Karo Aur Jab Tum Me'n Se Kisi Ko Namaaz Me'n Shak Ho Jaaye To Use Gaur Karke Saheeh Baat Ma'loom Karni Chaahiye, Phir Apni Namaaz Poori Karni Chaahiye, Phir Salaam Pher Kar 2 Sajde Karne Chaahiye'n. (Mere Bhaa'iyo'n Yaad Rakhe'n, Iss Hadees Me'n Jo Bayaan Huwa Ke Nabi e Kareem ﷺ Ne Farmaaya Ke, Lekin Mai'n Sirf Tumhaari Misl Bashar Hoo'n, To Yaad Rakhe'n, "Innama" Ka Ma Hasr Keliye Hai, Lekin Kabhi Yeh Hasr Mutlaq Keliye Hota Hai Aur Kabhi Hasr Makhsoos Keliye Hota Hai, Jo Qaraa'in Aur Siyaaq e Kalaam Se Samajh Me'n Aata Hai Uss Irshaad Ka Yeh Matlab Nahee'n Ke Mai'n Aur Kuchh Nahee'n Hoo'n Sirf Bashar Hoo'n, Kyu'nke Aapki Bahot Sifaat Hai'n, Aap Nabi Hai'n Aur Rasool Hai'n, Balke Qaa'idul Mursaleen Hai'n, Sayyad e Aadam Wa Bani Aadam Hai'n, Rehmatullil Aa'lameen Hai'n, Shafiul Muznabeen Hai'n, Allah Ta'ala Ke Naayeb e Mutlaq Hai'n, Isliye Iss Irshaad Ka Matlab Yeh Hai Ke, Mai'n Bhi Tumhaari Tarah Bashar Hoo'n, Farishta Nahee'n Hoo'n, Jis Tarah Tum Farishta Nahee'n Ho Mai'n Bhi Farishta Nahee'n Hoo'n Ya Jis Tarah Tum Allah Nahee'n Ho Mai'n Bhi Allah Nahee'n Hoo'n Ke Mere Liye Bhoolna Muhaal Ho, Ab Baat Yeh Rahi Ke Nabi e Kareem ﷺ Kis Cheez Me'n Humaari Misl Hai'n? To Yaad Rakhe'n Nabi e Kareem ﷺ Ki Koi Sifat Humaari Sifat Ki Misl Nahee'n Hai, Aapka Dekhna Humaare Dekhne Ki Misl Nahee'n, Kyu'nke Aapka Dekhna To Aisa Tha Ke Aap Aage, Peechhe, Daaye'n, Baaye'n, Upar, Neeche Yaksaa'n Dekhte The, Aapke Liye Saari Jihaat Ek Jihat Ke Hukm Me'n Thee'n, Jaisa Ke Hadees Me'n Hai Ke Mai'n Jis Tarah Aage Dekhta Hoo'n Waise Hi Peechhe Bhi Dekhta Hoo'n, Yahaaa'n Tak Tumhaara Khush'u Wa Khuz'u Bhi Mujhse Chhupa Huwa Nahee'n Hai, Isi Tarah Nabi e Kareem ﷺ Jinnaat Aur Farishto'n Ko Dekhte The Hatta Ke Aapne Allah Azzowajal Ko Dekha, Isi Tarah Aap Haiwaanaat Ki Baate'n Sunte The Aur Samajhte Bhi The, Jinnaat Aur Farishto'n Ki Baate'n Bhi Sunte The, Khud Allah Ta'ala Ka Kalaam Sunte The, Iss Sabab Aapka Sunna, Aapka Dekhna, Aapka Kisi Cheez Ko Chakhna Aur Chhoona Mukhtasar Yeh Ke Koi Bhi Wasf Humaare Kisi Wasf Ki Misl Nahee'n Hai, Ba'az Logo'n Ne Kaha Hai Ke, Nabi e Kareem ﷺ Nafs e Bashariyat Me'n Humaari Misl Hai'n, To Hum Ahle Sunnat Wa Jama'at Kehte Hai'n Ke, Sirf Nafs e Bashariyat Khaarij Me'n Mutahaqqaq Nahee'n Hai, Khaarij Me'n Jo Bashariyat Hai Woh Bashariyat e Makhsoosa Hai Aur Hum Kisi Bhi Makhsoos Bashar Ki Misl Nahee'n Hai'n, Jab Aap, Hum, Aa'm Bashar Ki Bashariyat e Makhsoosa Ki Misl Nahee'n, To Rasoolullah ﷺ Ki Misl Kaise Ho Sakte Hai'n? To Phir Sawaal Paida Hota Hai Ke Nabi e Kareem ﷺ Kis Cheez Me'n Humaari Misl Hai'n? Iska Jawaab Yeh Hai Ke Aap Allah Na Hone Me'n Humaari Misl Hai'n Jis Tarah Hum Sab Allah Nahee'n, Usi Tarah Nabi e Kareem ﷺ Bhi Allah Nahee'n Hai'n, Farishta Na Hone Me'n Humaari Misl Hai'n Jis Tarah Hum Farishta Nahee'n, Rasoolullah ﷺ Bhi Farishta Nahee'n) (Phir Yeh Baat Bhi Yaad Rakhe'n Humaara Bhoolna Alag Hai Aur Rasoolullah ﷺ Ka Bhoolna Alag Hai Hum, Aap, Namaaz Me'n Iss Sabab Bhool Jaate Hai'n Ke Hum Dunyaawi Cheezo'n Ki Taraf Namaaz Me'n Mashgool Ho Jaate Hai'n Jis Sabab Namaaz Me'n Bhool Waaq'e Hoti Hai Lekin Rasoolullah ﷺ Se Kya Aisa Ho Sakta Hai Ke Aap Namaaz Me'n Dunyaawi Kaamo'n Ki Taraf Mashgool Ho Jaaye'n? Nahee'n Bilkul Nahee'n)
Yeh Baab Hai Iss Muta'alliq Ke, Qibla Ke Muta'alliq Ahaadees (Jo Waarid Huwi Hai'n) Aur Jiska Yeh Nazariya Hai Ke Jisne Galati Se Gair Qibla Ki Taraf Namaaz Padhi Uspar Namaaz Ka E'aa'dah (Dohraana) Nahee'n Hai, (Phir Imaam Bukhaari Farmaate Hai'n Ke) Aur Beshak Nabi e Kareem ﷺ Ne Zohar Ki 2 Rak'at Me'n Salaam Pher Diya Aur Logo'n Ki Taraf Apna Chehra Kar Liya, Phir Aapne Baaqi Namaaz Ko Poora Kiya, (Phir Imaam Bukhaari Yeh Hadees Naql Karte Hai'n Ke) Hazrat Anas Radiallahu Anhu Bayaan Karte Hai'n Ke Hazrat Umar Radiallahu Anhu Ne Kaha, Mai'n Ne Apne Rab Ki 3 Cheezo'n Me'n Muwaafiqat Ki Hai, Mai'n Ne Arz Kiya, Ya Rasoolallah ﷺ ! Kaash ! Hum Maqaam e Ibraaheem Ko Namaaz Padhne Ki Jagah Bana Le'n To Yeh Aayat Naazil Ho Gayi, Tarjuma - Aur Tum Maqaam e Ibraaheem Ko Namaaz Padhne Ki Jagah Bana Lo (Sureh Baqarah, Aayat No.125) Aur Parde Ki Aayat Me'n Mai'n Ne Arz Kiya, Ya Rasoolallah ﷺ, Kaash ! Aap Apni Azwaaj Ko Pardah Karne Ka Hukm De'n Kyu'nke Unse Nekokaar Aur Badkaar (Har Tarah Ka Aadmi) Baat Karta Hai, To Parde Ki Aayat Naazil Ho Gayi, Aur Nabi e Kareem ﷺ Ki Azwaaj Aapke Khilaaf Gairat Me'n Ikat'thi Ho Gayee'n To Mai'n Ne Aapki Azwaaj Se Kaha, Agar Aapne Tum Sabko Talaaq De Di To Anqareeb Aapka Rab Aapko (Tumhaare) Badle Me'n Tumse Behtar Azwaaj Ata Kar Dega (Sureh Tehreem, Aayat No.5) To Yehi Aayat Naazil Ho Gayi, Imaam Abdullah (Bukhaari) Ne Kaha, Hume'n Ibne Abi Maryam Ne Hadees Bayaan Ki, Unho'n Ne Kaha, Hume'n Yahya Bin Ayyub Ne Hadees Bayaan Ki, Unho'n Ne Kaha, Mujhse Humaid Ne Hadees Bayaan Ki, Unho'n Ne Kaha, Mai'n Ne Hazrat Anas Radiallahu Anhu Se Yeh Hadees Suni Hai (Ya'ni Jo Hadees Mazkoor Huwi)
Hazrat Abdullah Bin Umar Radiallahu Anhuma Bayaan Karte Hai'n Ke Jis Waqt Log Subah Ki Namaaz Me'n Quba Me'n The, Ek Aane Waala Aaya Aur Usne Kaha, Rasoolullah ﷺ Par Aaj Raat Qur'aan Naazil Huwa Hai (Ya'ni Qur'aan Ki Ek Aayat Naazil Huwi Hai) Aur Nabi e Kareem ﷺ Ko Yeh Hukm Diya Gaya Hai Ke Aap Qibla (Ka'ba) Ki Taraf Muh Kare'n, Pas Tum Bhi Qibla Ki Taraf Muh Karlo, Uss Waqt Namaaziyo'n Ke Chehre Shaam Ki Taraf The, Woh Fauran Ka'ba Ki Taraf Phir Gaye. (Yaad Rahe Qur'aan Shareef Ki Sureh Baqarah Ki Aayat No.144 Naazil Huwi Thi )
Hazrat Abdullah Bin Mas'ood Radiallahu Anhu Ne Bayaan Kiya Ke Nabi e Kareem ﷺ Ne Zohar Ki 5 Rak'at Namaaz Padhaayi To Logo'n Ne Kaha, Kya Namaaz Zyaadah Kardi Gayi Hai? Nabi e Kareem ﷺ Ne Irshaad Farmaaya, Iska Kya Sabab Hai? Logo'n Ne Kaha, Aapne 5 Rak'at Padhaayi Hai'n ! Aapne Apne Pair (Qibla Ki Taraf) Mode Aur (Sahw Ke) 2 Sajde Kiye.
Riwaayat Hai Hazrat Anas Radiallahu Anhu Se Ke, Nabi e Kareem ﷺ Ne Qibla (Ki Jaanib) Balgam Dekha To, Aapko Yeh Naagawaar Guzra Hatta Ke Aapke Chehre Par Uske Asraat Zaahir Huwe, Aapne Uss Balgam Ko Apne Haath Se Khurach Diya, Phir Aapne Irshaad Farmaaya, Jab Tum Me'n Se Koi Shakhs Apni Namaaz Me'n Hota Hai To Woh Apne Rab Se Kalaam Karta Hai Ya Uska Rab Uske Aur Qibla Ke Darmiyaan (Mutawajjeh) Hota Hai, So Tum Me'n Se Koi Shakhs Qibla Ki Jaanib Na Thooke, Lekin Apni Baaye'n Jaanib Ya Apne Qadmo'n Ke Neeche Thook De, Phir Aapne Apni Chaadar Ke Ek Pallu Ko Pakad Kar Usme'n Thooka, Phir Thook Ke Ba'az Hisse Ko Ba'az Par Mal Diya, Phir Nabi e Kareem ﷺ Ne Irshaad Farmaaya, Ya Iss Tarah Kare. (Nabi e Kareem ﷺ Ki Tawaaz'o Aur Inkesaari Dekhe'n Mere Bhaa'iyo'n Ke Jab Nabi e Kareem ﷺ Ne Kisi Ke Jame Huwe Balgam Ko Dekha To Apne Mubaarak Haatho'n Se Khurach Kar Saaf Kar Diya, Isse Ma'loom Huwa Ke Nabi e Kareem ﷺ Ke Dil Me'n Masjid Ki Kitni Izzat Aur Qibla Ka Kitna Ahteraam Tha, Aaj Agar Humaari Masaajid Me'n Se Kisi Masjid Ke Qibla Me'n Ya Deewaar e Qibla Me'n Kisi Ka Balgam Ya Re'nt Ho To Kisi Namaazi Ko Use Khud Saaf Karne Ka Khayaal Nahee'n Aayega, Balke Woh Khaadim Ya Mo'azzin Ko Bulaakar Daa'ntega Aur Use Saaf Karne Keliye Kahega Aur Use Khud Kisi Ka Balgam Saaf Karte Huwe Sharmindagi Mehsoos Hogi Ya Ghin Aayegi Aur Woh Usko Apne Waqaar Aur Martabe Ke Khilaaf Samjhega, Zara Soche'n Ke Hum Kya Hai'n? Aur Humaara Maqaam Kya Hai? Lekin Nabi e Kareem ﷺ Ka Maqaam Wa Martabe Ka Kya Kehna, Subhaan Allah, Kya Shaan Hai Mere Nabi e Kareem ﷺ Ki Ke Aap 2 Aa'lam Ke Sardaar Hai'n, Maalik Wa Mukhtaar Hai'n, Naayeb e Parwardigaar Hai'n, Arsh Ke Shah Sawaar Hai'n Aur Mehboob e parwardigar Hai'n, Phir Bhi Aapko Deewaar e Qibla Se Kisi Ka Balgam Ya Re'nt Saaf Karte Huwe Koi Karaahat Nahee'n Aa Rahi Hai, Koi Ghin Nahee'n Aa Rahi Hai, Balke Khud Apne Haath Mubaarak Se Balgam Saaf Kar Rahe Hai'n, Kaunse Haath Se? Uss Haath Se Jis Haath Se Laga Huwa Paani Sahaaba e Kiraam Tabarruk Samajh Kar Pi Jaaya Karte Hai'n, Jis Haath Se Barkat Lene Keliye Madeena Ke Log Paani Laate Hai'n Aur Rasoolullah ﷺ Paani Me'n Haath Daal Diya Karte Hai'n, Yeh Woh Haath Hai'n Jiske Ishaare Se Chaand Tukde Hota Hai, Jis Haath Ke Ishaare Se Sooraj Palat Aata Hai, Jis Haath Ke Zariye Se Paani Ka Chashma Jaari Hota Hai, Ji Haa'n Yeh Woh Haath Hai'n Ke Jab Nabi e Kareem ﷺ Ne Apne Haatho'n Se Kuffaar Ki Taraf Ka'nkariyaa'n Maare'n To Allah Ta'ala Farmaata Hai, (Aye Rasool ﷺ) Tumne Ka'nkariyaa'n Nahee'n Maree'n Jabke Tumne Ka'nkariyaa'n Maree'n Thee'n Woh Ka'nkariyaa'n Allah Ne Maare'n Thee'n, (Sureh Anfaal, Aayat No.17) Yeh Woh Haath Hai Ke Jab Yeh Haath Sahaaba e Kiraam Ke Haatho'n Par Ho To Allah Ta'ala Farmaata Hai, Allah Ka Haath Hai Unke Haatho'n Par (Sureh Fateh, Aayat No.10) Yeh Woh Haath Hai Ke Jab Uss Haath Par Sahaaba e Kiraam Bay'at Kare'n To Allah Ta'ala Farmaata Hai, Beshak Jo Log Aapse Bay'at Kar Rahe Hai'n Woh Yaqeenan Allah Se Bay'at Kar Rahe Hai'n (Sureh Fateh, Aayat No.10)
Riwaayat Hai Hazrat Abdullah Bin Umar Radiallahu Anhuma Se Ke, Rasoolullah ﷺ Ne Deewaar e Qibla Me'n Thook Dekha To Aapne Usko Khurach Diya, Phir Logo'n Ki Taraf Mutawajjeh Hokar Farmaaya, Jab Tum Me'n Se Koi Shakhs Namaaz Padhta Hai To Woh Apne Rab Ke Saamne Na Thooke, Kyu'nke Jab Woh Namaaz Padhta Hai To Allah Uske Saamne Hota Hai.
Riwaayat Hai Hazrat Ummul Mo'mineen Aa'yesha Radiallahu Anha Se Ke, Rasoolullah ﷺ Ne Deewaar e Qibla Me'n Re'nt (Naak Ki Ratoobat) Ya Thook Ya Balgam Dekha To Aapne Usko Khurach Kar Saaf Kar Diya.
Yeh Baab Hai Iss Muta'alliq Ke, Ka'nkari Ke Saath Masjid Se Re'nt Ko Khurach Kar Saaf Karna, (Phir Imaam Bukhaari Farmaate Hai'n Ke) Aur Hazrat Ibne Abbaas Radiallahu Anhuma Ne Farmaaya Ke, Agar Tum Tar Najaasat Par Chale Ho To Usko Dholo Aur Khushk Najaasat Par Chale Ho To Phir Nahee'n, (Phir Imaam Yeh Hadees Naql Karte Hai'n Jo 2 Sahaabi Se Marwi Hai Lekin Hadees Ek Hi Thi Iss Sabab Ek Jagah Riwaayat Kardi Gayi) Hazrat Abu Hurairah Radiallahu Anhu (Hadees No.408) Aur Hazrat Abu Sa'eed Radiallahu Anhu (Hadees No.409) Ne Hadees Bayaan Ki Ke, Rasoolullah ﷺ Ne Ek Ka'nkari Pakad Kar Usko Khurach Diya, (Ya'ni Balgam Ko) Phir Aapne Irshaad Farmaaya, Jab Tum Me'n Se Koi Shakhs Balgam Thooke To Woh Apne Saamne Thooke, Na Apni Daaye'n, Use Chaahiye Ke Woh Usko Apni Baaye'n Jaanib Thooke, Ya Apne Baaye'n Qadam Ke Neeche Thooke.
Hazrat Abu Hurairah Radiallahu Anhu Aur Hazrat Abu Sa'eed Radiallahu Anhu Dono'n Ne (Iss Sabab Yeh 2 Hadeese'n Huwi) Khabar Di Ke Rasoolullah ﷺ Ne Masjid Ki Deewaar Me'n Balgam Ko Dekha To Aapne Ka'nkari Pakad Kar Usko Khurach Diya, Phir Aapne Irshaad Farmaaya, Jab Tum Me'n Se Koi Shakhs Balgam Thooke To Apne Chehre Ke Saamne Na Thooke Na Apni Daaye'n Jaanib Thooke Balke Baaye'n Taraf Thooke Ya Apne Baaye'n Qadam Ke Neeche (Thooke).
Hazrat Anas Radiallahu Anhu Ne Kaha Ke, Nabi e Kareem ﷺ Ne Irshaad Farmaaya, Tum Me'n Se Koi Shakhs Apne Saamne Na Thooke Na Apni Daaye'n Jaanib Thooke Balke Baaye'n Taraf Thooke Ya Apne Pair Ke Neeche (Thooke).
Hazrat Anas Bin Maalik Radiallahu Anhu Ne Bayaan Kiya Ke Nabi e Kareem ﷺ Ne Irshaad Farmaaya, Beshak Jab Momin Namaaz Me'n Hota Hai To Apne Rab Se Munaajaat Karta Hai, So Woh Apne Saamne Na Thooke Aur Na Daaye'n Taraf Thooke, Lekin Baaye'n (Taraf) Thooke Ya Apne Qadam Ke Neeche (Thooke).
Riwaayat Hai Hazrat Abu Sa'eed Se Ke, Nabi e Kareem ﷺ Ne Masjid Ke Qibla Ki Jaanib Balgam Dekha, To Aapne Ka'nkari Ke Saath Usko Khurach Diya, Phir Aapne Isse Man'a Kiya Ke Koi Shakhs Na To Apne Saamne Thooke Na Apni Daaye'n Jaanib Thooke, Lekin Haa'n Apni Baaye'n Jaanib Thooke Ya Apne Qadam Ke Neeche Thooke, Aur Zohri Se Riwaayat Hai Ke Unho'n Ne Humaid Se Suna Az Abu Sa'eed Iski Misl.
Hazrat Anas Bin Maalik Radiallahu Anhu Ne Bayaan Kiya Ke Nabi e Kareem ﷺ Ne Irshaad Farmaaya, Masjid Me'n Thookna Gunaah Hai, Aur Iska Kaffaarah Usko Dafan Karna Hai.
Riwaayat Hai Hazrat Abu Hurairah Radiallahu Anhu Se Ke, Rasoolullah ﷺ Ne Irshaad Farmaaya, Jab Tum Me'n Se Koi Shakhs Namaaz Ki Taraf Khada Ho To Woh Apne Saamne Na Thooke, Kyu'nke Jab Tak Woh Apni Namaaz Ki Jagah Me'n Hai Allah Se Munaajaat Kar Raha Hai, Aur Na Apni Daaye'n Taraf Thooke, Kyu'nke Uski Daaye'n Taraf Farishta Hai (Haa'n) Usko Baaye'n Taraf Thookna Chaahiye Ya Apne Qadam Ke Neeche (Thooke) Phir Usko Dafan Karde.
Riwaayat Hai Hazrat Anas Radiallahu Anhu Se Ke, Rasoolullah ﷺ Ne Qibla Ki Jaanib Me'n Balgam Dekha, Aapne Usko Apne Haath Se Khurach Diya, Aur Aap Par Karaahiyat Dekhi Gayi, Ya Uss Wajah Se Aap Par Shadeed Karaahiyat Dekhi Gayi, Aur Aapne Farmaaya, Jab Tum Me'n Se Koi Shakhs Namaaz Me'n Khada Hota Hai To Woh Sirf Apne Rab Se Munaajaat Karta Hai Ya Uska Rab Uske Aur Uske Qibla Ke Darmiyaan Hota Hai, Pas Woh Apne Qibla Ki Jaanib Na Thooke, Lekin Baaye'n Jaanib Thooke Ya Apne Qadam Ke Neeche (Thooke) Phir Aapne Apni Chaadar Ka Pallu Pakda Aur Usme'n Thook Kar Usko Ek Doosre Ke Saath Milaaya Aur Farmaaya (Ya Iss Tarah Kare).
Riwaayat Hai Hazrat Abu Hurairah Radiallahu Anhu Se Ke, Rasoolullah ﷺ Ne Irshaad Farmaaya, Kya Tum Yeh Gumaan Karte Ho Ke Meri Tawajjoh Sirf Qibla Ki Taraf Hoti Hai (Aur Mai'n Kisi Aur Taraf Nahee'n Dekhta) Pas Allah Ki Qasam Mujh Par Tumhaara Na Khush'u Makhfi Hai Na Tumhaara Ruk'u Makhfi Hai Aur Beshak Mai'n Tumko Apni Peeth Ke Peechhe Bhi Dekhta Hoo'n.
Hazrat Anas Bin Maalik Radiallahu Anhu Bayaan Karte Hai'n Ke, Nabi e Kareem ﷺ Ne Hume'n Namaaz Padhaayi, Phir Aap Mimbar Par Chadhe, Phir Aapne Namaaz Aur Ruk'u Ke Muta'alliq Farmaaya, Beshak Mai'n Tumko Apne Peechhe Bhi Zaroor Usi Tarah Dekhta Hoo'n Jis Tarah Saamne Dekhta Hoo'n.
Riwaayat Hai Hazrat Abdullah Bin Umar Radiallahu Anhuma Se Ke, Rasoolullah ﷺ Ne Uzmaar Shudah Ghodo'n Ka Hafiya Se Lekar Saniyyatul Wada Tak Muqaabla Karaaya, Aur Jo Ghode Gair Uzmaar Shudah The Unka Muqaabla Saniyyatul Wada Se Lekar Masjid e Bani Zuraiq Tak Karaaya, Aur Hazrat Abdullah Bin Umar Radiallahu Anhuma Un Sahaaba Me'n Se The Jinho'n Ne Uss Muqaable Me'n Hissa Liya Tha. (Iss Hadees Me'n Uzmaar Shudah Aur Gair Uzmaar Shudah Ghodo'n Ka Zikr Hai, Uzmaar Ka Yeh Ma'ni Hai Ke, 40 Din Tak Ghode Ko Ba Tadreej Zyaadah Khilaaya Aur Pilaaya Jaaye Hatta Ke Woh Bahot Mota Taazah Ho Jaaye, Phir Ba Tadreej Uski Khooraak Kam Ki Jaaye Taake Ghode Ka Wazan Kam Ho Jaaye, Ek Qaul Yeh Hai Ke Ghode Par Zeen Aur Jal Wazan Daala Jaaye Aur Usse Mushaqqat Karaayi Jaaye Hatta Ke Usko Khoob Paseena Aa Jaaye, Aur Gair Uzmaar Shudah Ghode Ka Ma'ni Yeh Hai Ke Uss Ghode Ke Saath Uzmaar Ka Amal Na Kiya Jaaye) (Hafiya, Sanniyatul Wada Se 5 Se 7 Meel Ke Faasle Par Ek Maqaam Hai, Aur Saniyya Ka Ma'ni Ghaati Hai Aur Wada Ka Ma'ni Rukhsat Karna, Yeh Woh Ghaati Hai Jahaa'n Madeena Se Makka Jaane Waale Logo'n Ko Rukhsat Karte Hai'n, Yeh Ghaati Madeena Se Makka Ki Jaanib Hai, Yeh Woh Ghaati Hai Jahaa'n Madeena Se Tabook Jaane Waalo'n Ko Rukhsat Karte Hai'n) (Yaad Rakhe'n, Ghodo'n Me'n Daud Ka Muqaabla Agar Shart Aur Haar Jeet Ke Bagair Ho To Yeh Jaa'iz Hai Aur Agar Shart Aur Haar Jeet Ke Saath Ho To Phir Yeh Juwa Hai Aur Na Jaa'iz Aur Haraam Hai, Juwe Ki Soorat Yeh Hai Ke Muqaabla Karne Waale Yeh Shart Rakhe'n Ke Haarne Waala Jeetne Waale Ko Maslan 1000 Rupay Dega Aur Haarne Waala Jeetne Waale Ko Laazmi Taur Par Yeh Raqam De To Yeh Haraam Hai, Aur Jis Khel Me'n Bhi Iss Tarah Ki Shart Rakhi Jaaye Woh Haraam Hai, Khwaah Woh Taash Ho, Cricket Ho Ya Woli Ball Ho, Aur Agar Koi Teesra Aadmi Jeetne Waale Ko In'aam Ke Taur Par Kuchh In'aam De Ya Raqam Hi In'aam Ke Taur Par De Ya Muqaable Me'n Awwal, Duwwam, Suwwam, Chahaarum Aane Waalo'n Ko In'aamaat De To Yeh Jaa'iz Hai)
Yeh Baab Hai Iss Muta'alliq Ke, Taqseem Karna Aur Masjid Me'n Khosho'n Ka Latkaana, (Phir Imaam Bukhaari Farmaate Hai'n Ke) Al-Qinu Ka Ma'ni Khosha Hai, Aur Uska Tasniya Ka Sega Qinwaan Hai Aur Jam'a Ka Sega Qinwaan Hai Jaise Sinu, Sinwaan (Phir Imaam Bukhaari Yeh Hadees Naql Karte Hai'n Ke) Hazrat Anas Radiallahu Anhu Ne Kaha Ke, Nabi e Kareem ﷺ Ke Paas Behrain Ka Maal Aaya, Aur Yeh Sabse Zyaadah Maal Tha Jo Rasoolullah ﷺ Ke Paas Aaya Tha, Rasoolullah ﷺ Ne Irshaad Farmaaya, Isko Masjid Me'n Phaila Do, Rasoolullah ﷺ Namaaz Padhaane Keliye Chale Gaye, Aur Aapne Uss Maal Ki Taraf Koi Tawajjoh Nahee'n Di, Jab Aapne Namaaz Padhli To Aap Uss Maal Ke Paas Aakar Baith Gaye, Aap Jis Shakhs Ko Bhi Dekhte, Aap Usko Uss Maal Se Ata Karte, Achaanak Aapke Paas Hazrat Abbaas Radiallahu Anhu Aa Gaye Aur Unho'n Ne Kaha, Ya Rasoolallah ﷺ ! Mujhe (Maal) Dijiye Kyu'nke Mai'n Ne Apna Fidya Bhi Diya Tha Aur Aqeel Ka Fidya Bhi Diya Tha, To Rasoolullah ﷺ Ne Unse Farmaaya, Aap Le Le'n, Unho'n Ne Apna Kapda Bichhaaya Aur Usme'n Maal Daala Hatta Ke Uski Choti (Bada Dher) Ban Gayi, Phir Woh Usko Utha Na Sake, Unho'n Ne Kaha, Ya Rasoolallah ﷺ ! Aap Kisi Se Kahiye Ke Woh Isko Utha Kar Mere Upar Rakh De, Aapne Farmaaya Nahee'n, Unho'n Ne Kaha, Phir Aap Isko Uthha Kar Mere Upar Rakh De'n, Aapne Farmaaya Nahee'n, Unho'n Ne Usse Maal Kam Kiya Phir Bhi Uski Choti Ban Gayi, Pas Unho'n Ne Kaha, Ya Rasoolallah ﷺ ! Aap Kisi Se Kahiye Yeh Maal Utha Kar Mere Upar Rakh De Aapne Farmaaya Nahee'n, Unho'n Ne Kaha, Achcha Aap Khud Utha Kar Mere Upar Rakh De'n, Aapne Farmaaya Nahee'n, Unho'n Ne Usse Kuchh Maal Kam Kiya, Phir Utha Kar Usko Apne Kandhe Ke Upar Rakh Liya, Phir Chale Gaye Aur Unki Hirs Par Ta'ajjub Ki Wajah Se Rasoolullah ﷺ Ki Nazar Musalsal Unka Peechha Karti Rahi, Hatta Ke Woh Nazro'n Se Ojhal Ho Gaye, Aur Jab Tak Wahaa'n Ek Dirham Bhi Baaqi Tha Rasoolullah ﷺ Wahaa'n Se Nahee'n Uthe. (Nabi e Kareem ﷺ Ka Masaawaat Ka Tareeqa Dekhe'n Ke Sabko Baraabar Baraabar Maal Diya Aisa Nahee'n Ke Apne Rishtedaar Ko Zyaadah De Diya Aur Doosro'n Ko Kam De Diya Humaare Daur Ke Logo'n Ko Isse Sabaq Haasil Karna Chaahiye Jo Apne Rishtedaaro'n Ko Zyaadah Dete Hai'n Aur Doosro'n Ko Kam Dete Hai'n Kyu'nke Jab Maal Apna Nahee'n Hai Maal e Ganeemat Hai To Sabka Baraabar Ka Haq Hai)
Hazrat Anas Radiallahu Anhu Ne Bayaan Kiya Ke, Mai'n Ne Nabi e Kareem ﷺ Ko Masjid Me'n Paaya, Aapke Saath Kuchh Log The, Pas Mai'n Khada Ho Gaya, Aapne Mujhse Farmaaya, Tumko Abu Talha Radiallahu Anhu Ne Bheja Hai? Mai'n Ne Kaha Ji Haa'n ! Aapke Saath Jo Log The, Aapne Unse Farmaaya Utho, Pas Aap Chal Pade Aur Mai'n Bhi Unke Aage Chal Pada. (Iss Hadees Me'n Masla Yeh Tha Ke Hazrat Anas Radiallahu Anhu Ne Rasoolullah ﷺ Ko Hazrat Abu Talha Radiallahu Anhu Ki Taraf Se Khaane Ki Da'wat Di Jo Rasoolullah ﷺ Ne Qabool Farmaaya)
Riwaayat Hai Hazrat Sahl Bin Sa'ad Radiallahu Anhu Se Ke, Ek Shakhs Ne Kaha, Ya Rasoolallah ﷺ ! Yeh Bataa'iye Ke Ek Aadmi Apni Biwi Ke Paas Ek Shakhs Ko Paaye To Kya Woh Usko Qatl Karde? Phir Un Dono'n Ne Masjid Me'n La'an Kiya (Ek Doosre Par La'nat Ki) Aur Mai'n Uska Mushaahedah Kar Raha Tha. (Mukammal Waaqeya Kuchh Iss Tarah Hai Jo Ke Muslim Shareef Me'n Maujood Hai, Hadees No.1492 Me'n, Ke Hazrat Sahl Bin Sa'ad Saa'di Radiallahu Anhu Bayaan Karte Hai'n Ke Hazrat Awemar Ajlaani, Hazrat Aa'sim Bin Adi Ansaari Ke Paas Gaye Aur Unse Kaha, Aye Aa'sim ! Yeh Bataao Ke Agar Koi Shakhs Apni Biwi Ke Paas Kisi Mard Ko Paaye To Kya Usko Qatl Karde? Ya Phir Tum Usko Qatl Kardoge Ya Phir Woh Kya Kare? Aye Aa'sim ! Tum Rasoolullah ﷺ Se Mere Liye Iss Masle Ka Hal Ma'loom Karo, Phir Hazrat Aa'sim Radiallahu Anhu Ne Rasoolullah ﷺ Se Yeh Sawaal Kiya, Rasoolullah ﷺ Ne Iss Sawaal Ko Na Pasand Kiya, Aur Iski Mazammat Ki, Hatta Ke Hazrat Aa'sim Radiallahu Anhu Par Rasoolullah ﷺ Ki Yeh Baat Shaaq Guzri, Phir Hazrat Aa'sim Radiallahu Anhu, Hazrat Awemar Radiallahu Anhu Ke Paas Gaye, Unho'n Ne Poochha, Aye Aa'sim Tumse Rasoolullah ﷺ Ne Kya Farmaaya? Hazrat Aa'sim Radiallahu Anhu Ne Hazrat Awemar Radiallahu Anhu Se Kaha, Mai'n Tumhaare Paas Koi Achchi Khabar Nahee'n Laaya Hoo'n, Tumne Jo Sawaal Kiya Hai Woh Rasoolullah ﷺ Par Naagawaar Guzra Hai, Hazrat Awemar Radiallahu Anhu Ne Kaha, Allah Ki Qasam, Mai'n Iss Sawaal Se Hargiz Nahee'n Ruku'nga, Hatta Ke Mai'n Khud Rasoolullah ﷺ Se Sawaal Karlu'n, Phir Hazrat Awemar Radiallahu Anhu Ne Logo'n Ke Saamne Rasoolullah ﷺ Se Yeh Sawaal Kiya Aur Kaha Ya Rasoolallah ﷺ ! Yeh Bataa'iye Agar Koi Shakhs Apni Biwi Ke Paas Kisi (Ajnabi) Mard Ko Paaye To Kya Woh Usko Qatl Karde? Phir Aap Log Usko Qatl Kar De'nge? Ya Phir Woh Kya Kare? To Rasoolullah ﷺ Ne Irshaad Farmaaya, Tumhaare Muta'alliq Aur Tumhaari Biwi Ke Muta'alliq Hukm Naazil Ho Gaya Hai, Tum Jaao Aur Usko Lekar Aao, Hazrat Sahl Ne Kaha, Phir Un Dono'n Ne La'an Kiya, Ya'ni Ek Doosre Par La'nat Ki, Aur Mai'n Bhi Uss Waqt Logo'n Ke Saath Rasoolullah ﷺ Ke Paas Tha, Jab Woh Dono'n La'an Se Faarig Ho Gaye To Hazrat Awemar Radiallahu Anhu Ne Kaha, Ya Rasoolallah ﷺ ! Agar Mai'n Ne Isko Apne Paas Rakha To Phir Mai'n Jhoota Ho'nga, Phir Unho'n Ne Rasoolullah ﷺ Ke Faisle Se Pehle Usko 3 Talaaqe'n De Dee'n, Ibne Shabaab Ne Kaha Yeh La'an Ka Tareeqa Hai) (Mere Bhaa'iyo'n Iss Hadees Se Saraahat Ke Saath Yeh Baat Ma'loom Huwi Ke Ek Majlis Me'n 3 Talaaqe'n Waaq'e Ho Jaati Hai'n Aur Yeh Hadees Un Hazraat Ke Khilaaf Qawi Hujjat Hai Jo Ek Majlis Ki 3 Talaaq 3 Nahee'n Maante, Mukhaalifeen Iss Hadees Ke Jawaab Me'n Kehte Hai'n Ke Hazrat Awemar Radiallahu Anhu Ne La'an Ke Ba'ad 3 Talaaqe'n Di Thee'n, Aur La'an Se Aurat Baayena Ho Jaati Hai (Ya'ni Nikaah Se Nikal Jaati Hai) Aur Baayena Hone Ke Ba'ad Talaaq Ka Mahal Nahee'n Rehta, Iska Jawaab Yeh Hai Ke Woh Aurat Qaazi Ki Tafreeq Aur Uske Faisle Ke Ba'ad Baayena Hoti Hai Aur Iss Hadees Me'n Iss Baat Ki Tasreeh Maujood Hai Ke Hazrat Awemar Radiallahu Anhu Ne Rasoolullah ﷺ Ke Faisle Se Pehle Usko 3 Talaaqe'n Dee'n, Lehaaza Jab Unho'n Ne Talaaqe'n Di Thee'n To Woh Aurat Baayena Nahee'n Huwi Thee'n, Aur Talaaq Dene Ka Mahal Tha Tabhi Talaaqe'n Dee'n, Doosra Jawaab Yeh Hai Ke Hazrat Awemar Radiallahu Anhu Ne Yeh Keh Kar 3 Talaaqe'n Dee'n Ke Ya Rasoolallah ﷺ Agar Mai'n Isko Apne Paas Rakha To Phir Mai'n Jhoota Ho'nga, Iska Ma'ni Yeh Hai Ke Hazrat Awemar Radiallahu Anhu Ke Nazdeek Woh Unke Nikaah Se Nahee'n Nikli Thi Balke Nikaah Me'n Thee'n, Aur Unko Apne Paas Rakhna Mumkin Tha Aur Yeh Talaaq Ka Mahal Tha Tabhi Talaaqe'n Dee'n)
Hazrat Itbaan Bin Maalik Radiallahu Anhu Bayaan Karte Hai'n Ke, Nabi e Kareem ﷺ Unke Ghar Me'n Aaye, Pas Aapne Farmaaya, Tum Apne Ghar Me'n Kis Jagah Chaahte Hoke Mai'n Wahaa'n Tumhaare Liye Namaaz Padhaau'n, Hazrat Itbaan Radiallahu Anhu Ne Kaha, Pas Mai'n Ne Ek Jagah Ki Taraf Ishaarah Kiya To Nabi e Kareem ﷺ Ne Takbeer Padhi, Pas Humne Aapke Peechhe Saf Banaayi, So Aapne 2 Rak'at Namaaz Padhaayi.
Yeh Baab Hai Iss Muta'alliq Ke, Gharo'n Me'n Masaajid, (Phir Imaam Bukhaari Farmaate Hai'n Ke) Aur Hazrat Bara Bin Aa'zib Radiallahu Anhu Ne Apne Ghar Ki Masjid Me'n Jama'at Karaayi, (Phir Imaam Bukhaari Yeh Hadees Naql Karte Hai'n Ke) Mehmood Bin Rab'i Ansaari Radiallahu Anhu Ne Khabar Di Ke Hazrat Itbaan Bin Maalik Ansaari Radiallahu Anhu Rasoolullah ﷺ Ke As'haab Me'n Se Hai'n Aur Woh Un Ansaar Me'n Se Hai'n Jo Badar Me'n Haazir Huwe The, Woh Rasoolullah ﷺ Ke Paas Aaye Aur Unho'n Ne Kaha, Ya Rasoolallah ﷺ ! Meri Basaarat Bahot Kamzor Ho Gayi Hai Aur Mai'n Apni Qaum Ko Namaaz Padhaata Hoo'n, Aur Jab Baarish Hoti Hai To Mere Aur Unke Darmiyaan Jo Waadi Hai Woh Behne Lagti Hai Aur Mai'n Unki Masjid Me'n Jaane Ki Aur Unhe'n Namaaz Padhaane Ki Taaqat Nahee'n Rakhta, Aur Ya Rasoolallah ﷺ ! Mai'n Yeh Chaahta Hoo'n Ke Aap Mere Yahaaa'n Tashreef Laaye'n Aur Mere Ghar Me'n Namaaz Padhe'n, Pas Mai'n Uss Jagah Ko Musalla Banaalu, Unho'n Ne Bayaan Kiya, Pas Rasoolullah ﷺ Ne Irshaad Farmaaya, Mai'n Insha Allah Anqareeb Aisa Karu'nga, Hazrat Itbaan Ne Bayaan Kiya, Pas Doosre Roz Din Chadhne Ke Ba'ad Rasoolullah ﷺ Aur Hazrat Abu Bakar Radiallahu Anhu Aa Gaye, Rasoolullah ﷺ Ne Ijaazat Talab Ki To Mai'n Ne Aapko Ijaazat De Di, Ghar Me'n Daakhil Hone Ke Ba'ad Rasoolullah ﷺ Baithe Nahee'n, Aur Farmaaya, Tum Apne Ghar Me'n Kis Jagah Pasand Karte Ho Jahaa'n Mai'n Namaaz Padhu'n? Unho'n Ne Kaha, Mai'n Ne Apne Ghar Ki Ek Jaanib Aapko Ishaarah Kiya, Pas Rasoolullah ﷺ Khade Ho Gaye Aur Aapne Takbeer Padhi, Phir Hum Bhi Khade Ho Gaye Aur Humne Saf Banaayi, Aapne 2 Rak'at Namaaz Padhaayi, Phir Salaam Pher Diya, Humne Aapko Gosht Ka Khaana Khilaane Keliye Rok Liya, Jisko Humne Tayyaar Kiya Tha, Phir Ghar Me'n Haweli Ke Rehne Waale Kaafi Log Aa Gaye, Woh Sab Jam'a The, Unme'n Se Kisi Kehne Waale Ne Kaha, Maalik Bin Dukhaishin Ya Ibnul Dukhaishun Kahaa'n Hai? To Kisi Ne Kaha, Woh Munaafiq Hai Na Allah Se Mohabbat Karta Hai Na Rasoolullah ﷺ Se Mohabbat Karta Hai, Tab Rasoolullah ﷺ Ne Irshaad Farmaaya, Aisa Na Kaho Kya Tum Nahee'n Dekhte Ke Usne Allah Ki Raza Joyi Keliye "La Ilaaha Illallah" Padha Hai? Uss Shakhs Ne Kaha, Allah Aur Uske Rasool Ko Zyaadah Ilm Hai, Pas Beshak Hum Uska Milna Julna Aur Uski Khair Khwaahi Munaafiqo'n Ke Saath Dekhte Hai'n, Rasoolullah ﷺ Ne Irshaad Farmaaya, Pas Beshak Allah Ta'ala Ne Uss Shakhs Ko Dozakh Ke Upar Haraam Kar Diya Hai Jisne Allah Ta'ala Ki Raza Joyi Keliye "La Ilaaha Illallah" Padha, Ibne Shahaab Ne Kaha, Husain Bin Mohammad Ansaari Jo Bani Saalim Ke Ek Fard The Aur Unke Sardaaro'n Me'n Se The, Mai'n Ne Unse Mehmood Bin Rab'i Ki Hadees Ke Muta'alliq Sawaal Kiya To Unho'n Ne Uski Tasdeeq Ki.
Yeh Baab Hai Iss Muta'alliq Ke, Masjid Wagairah Me'n Dukhool Keliye Daaye'n Taraf Se Hona Chaahiye, (Phir Imaam Bukhaari Farmaate Hai'n Ke) Aur Hazrat Ibne Umar Radiallahu Anhuma Dukhool Ke Waqt Daaye'n Pair Se Ibteda Karte Aur Khurooj Ke Waqt Baaye'n Pair Se Ibteda Karte, (Phir Imaam Bukhaari Yeh Hadees Naql Karte Hai'n Ke) Hazrat Aa'yesha Radiallahu Anha Bayaan Karti Hai'n Ke, Nabi e Kareem ﷺ Jahaa'n Tak Ho Sake Apne Har Kaam Me'n Daaye'n Jaanib Se Ibteda Ko Pasand Karte The, Wazu Karne Me'n, Ka'nghi Karne Me'n Aur Jooti Pahenne Me'n.
Yeh Baab Hai Iss Muta'alliq Ke, Kya Zamaana e Jaahiliyat Ki Qabro'n Ko Khoda Jaaye Aur Uski Jagah Masjide'n Bana Di Jaaye'n? (Phir Imaam Bukhaari Farmaate Hai'n Ke) Kyu'nke Nabi e Kareem ﷺ Ka Irshaad Hai, Allah Ta'ala Yahood Par La'nat Farmaaye Jinho'n Ne Ambiya Alaihimussalaam Ki Qabro'n Ko Masaajid Bana Liya, (Phir Farmaate Hai'n Ke) Aur Qabro'n Par Namaaz Padhna Makrooh Hai (Phir Farmaate Hai'n Ke) Aur Hazrat Umar Radiallahu Anhu Ne Dekha Ke Hazrat Anas Radiallahu Anhu Qabr Ke Paas Namaaz Padh Rahe Hai'n To Unho'n Ne Kaha, Qabr Se Bacho, Qabr Se Bacho, Aur Unko Namaaz Dobaarah Padhne Ka Hukm Nahee'n Diya (Phir Imaam Bukhaari Yeh Hadees Naql Karte Hai'n Ke) Hazrat Aa'yesha Radiallahu Anha Bayaan Karti Hai'n Ke, Hazrat Umme Habeeb Radiallahu Anha Aur Hazrat Umme Salma Radiallahu Anha Ne Zikr Kiya Ke Unho'n Ne Habsha Me'n Ek Girja Ghar Dekha Jisme'n Tasaaweer Thee'n, Unho'n Ne Uska Nabi e Kareem ﷺ Se Zikr Kiya, Nabi e Kareem ﷺ Ne Irshaad Farmaaya, Yeh Woh Log Hai'n Ke Jab Unme'n Koi Mard e Saaleh Faut Ho Jaata Hai To Yeh Uski Qabr Ko Sajdah Gaah Bana Lete Hai'n, Aur Wahaa'n Mujassame Rakh Dete Hai'n, So Yeh Log Qayaamat Ke Din Allah Ta'ala Ki Bad Tareen Makhlooq Hai'n. (Iss Hadees Se Saaf Ho Gaya Ke Jaandaar Ki Tasweere'n Banaana Khususan Nek Aadmi Ki, Aur Qabro'n Par Ibaadat Karna Man'a Hai, Iss Sabab Ulamaaye Kiraam Farmaate Hai'n Ke Auliya Allah Ki Qabro'n Ki Ziyaarat Ko Jaao To Unki Qabro'n Ko Sajdah Na Karo Wahaa'n Ibaadat Na Karo, Haa'n Qabro'n Ki Ziyaarat Karna Sunnat Hai To Qabro'n Ki Mazaaraat Ki Ziyaarat Karo Aur Auliya e Kiraam Ki Qabro'n Ki Ziyaarat To Aur Behtar Hai Wahaa'n Jaakar Allah Azzowajal Se Du'aaye'n Karo, Darood e Paak Ki Kasrat Karo, Wahaa'n Jaakar Dhaage Wagairah Baa'ndhne Ki Zaroorat Nahee'n, Kisi Sunni Aa'lim Ne Nahee'n Kaha Ke Mazaaraat Ki Ziyaarat Ko Jaao To Dhaage Baa'ndho, Aur Na Wahaa'n Jaakar Morchhal Ke Chakkar Me'n Pado, Aaj Kal Ajeeb Mu'aamla Hai Mujaawar Ek Morchhal Liya Rehta Hai Aur Log Samajhte Hai Ke Jab Tak Morchhal Hum Apne Upar Nahee'n Marwaate Tab Tak Koi Faayedah Nahee'n Ziyaarat Ka, Yeh Galat Hai Na Morchhal Maarne Marwaane Ka Tareeqa Ahle Sunnat Ki Kutub Me'n Likha Hai Na Dhaage Baa'ndhne Ka Tareeqa Ahle Sunnat Ki Kutub Me'n Likha, Yeh Johla Mujaawaro'n Ki Ijaadaat Hai'n Baaqi Kuchh Nahee'n)
Hazrat Anas Radiallahu Anhu Ne Kaha Ke, Nabi e Kareem ﷺ Madeena Me'n Aaye, Aur Madeena Ki Buland Jagah Me'n Ek Qabeele Me'n Thehre, Jinko Banu Amr Wa Banu Auf Kaha Jaata Hai, Nabi e Kareem ﷺ Ne Wahaa'n 14 Raate'n Qayaam Ki, Phir Nabi e Kareem ﷺ Ne Banu Najjaar Ko Bulaaya, Pas Woh Log Talwaare'n Latkaaye Huwe Aaye, Goya Ke Mai'n Ab Bhi Dekh Raha Hoo'n Ke Nabi e Kareem ﷺ Apni Sawaari Par Sawaar Hai'n, Aur Hazrat Abu Bakar Radiallahu Anhu Aapke Peechhe Baithe Huwe Hai'n, Aur Banu Najjaar Ki Jama'at Nabi e Kareem ﷺ Ke Gird Hai Hatta Ke Nabi e Kareem ﷺ Ki Sawaari Hazrat Abu Ayyub Ansaari Radiallahu Anhu Ke Ghar Ke Sahen Me'n Thaher Gayi, Aur Aap Yeh Pasand Karte The Ke Jis Jagah Namaaz Ka Waqt Aa Jaaye Wahee'n Namaaz Padh Le'n, Aur Aap Bakriyo'n Ke Baade Me'n Bhi Namaaz Padh Lete The, Aur Beshak Aapne Masjid Banaane Ka Hukm Diya, Phir Aapne Banu Najjaar Ki Jama'at Ki Taraf Paigaam Bheja, Pas Aapne Farmaaya, Aye Banu Najjaar ! Mujhe Apna Yeh Baag Qeematan Dedo, Unho'n Ne Kaha Nahee'n, Allah Ki Qasam ! Hum Iski Qeemat Sirf Allah Se Le'nge, (Ya'ni Ajar) Hazrat Anas Radiallahu Anhu Ne Kaha, Uss Baag Me'n Woh Cheeze'n Thee'n Jo Mai'n Tumko Bataata Hoo'n, Usme'n Mushrikeen Ki Qabre'n Thee'n, Aur Usme'n Khandaraat The, Aur Usme'n Khajoor Ke Darakht The, Pas Nabi e Kareem ﷺ Ne Hukm Diya Ke Mushrikeen Ki Qabro'n Ko Khoda Jaaye, So Unko Khoda Gaya, Phir Aapne Hukm Diya Ke Khandaraat Ko Humwaar Kiya Jaaye, So Unko Humwaar Kiya Gaya, Aur Khajoor Ke Darakhto'n Ko Kaatne Ka Hukm Diya Gaya, So Unko Kaat Diya Gaya, Aur Masjid Ke Qibla Ki Taraf Un Darakhto'n Ki Qataar Laga Di Gayi, Aur Uske 2 Sutoon Pat'tharo'n Ke Bana Diye, Woh Pat'tharo'n Ko Utha Kar La Rahe The Aur Rajz Padh Rahe The (Ya'ni Ash'aar Padh Rahe The) Aur Nabi e Kareem ﷺ Bhi Unke Saath The (Padhne Me'n) Aur Aap Farma Rahe The, Aye Allah Aakherat Ki Bhalaayi Ke Siwa Aur Koi Bhalaayi Nahee'n Hai, Pas Tu Ansaar Aur Muhaajireen Ko Bakhsh De. (Yaad Rahe Yeh Baag Jisme'n Masjid e Nabwi Ta'meer Ki Gayi Yeh Baag Sahl Aur Sohel Naam Ke 2 Yateem Ladko'n Ka Tha (Wafaaul Wafa, Jild No.1, Safha No.323, Bahawaala Ne'matul Baari Fi Sharah Saheeh Bukhaari, Allaama Gulaam Rasool Sa'eedi Alaihir Rehma, Hadees No.428 Ke Tahet) Ek Riwaayat Me'n Yeh Bhi Aaya Hai Ke Hazrat Abu Bakar Siddique Radiallahu Anhu Ne Uss Baag Ki Qeemat Ada Ki Thi (At-Tabqaatul Kubra Ibne Sa'ad, Jild No.1, Safha No.239 & 240 Bahawaala Ne'matul Baari) Agar Yeh Riwaayat Durust Hai To Matlab Yeh Huwa Ke Rasoolullah ﷺ Ne Uss Baag Ko Bagair Qeemat Ke Qabool Nahee'n Kiya Wajah Zaahir Hai Kyu'nke Woh 2 Yateem Bachcho'n Ka Baag Tha, Lekin Yateem Bachcho'n Ke Isaar Wa Jazba Ko Salaam Ke Bagair Qeemat Dene Ko Tayyaar Ho Gaye)
Hazrat Anas Radiallahu Anhu Ne Bayaan Kiya Ke, Nabi e Kareem ﷺ Bakriyo'n Ke Baade Me'n Namaaz Padh Lete The, Phir Mai'n Ne (Raawi Hadees Abi Tayyaah Ne) Unse Hazrat Anas Radiallahu Anhu Se Yeh Suna Ke Nabi e Kareem ﷺ Masjid Banaane Se Pehle Bakriyo'n Ke Baade Me'n Namaaz Padh Lete The.
Naaf'e Bayaan Karte Hai'n Ke Mai'n Ne Hazrat Abdullah Bin Umar Radiallahu Anhuma Ko Oo'nt Ki Taraf Namaaz Padhte Huwe Dekha, Aur Unho'n Ne Kaha, Mai'n Ne Nabi e Kareem ﷺ Ko Iss Tarah Karte Huwe Dekha Hai. (Ya'ni Oo'nt Ki Taraf Muh Karke Namaaz Padha Matlab Oo'nt Ko Sutrah Banaaya)
Yeh Baab Hai Iss Muta'alliq Ke, Jisne Tannor Ya Aag Ya Kisi Aisi Cheez Ke Saamne Namaaz Padhi Jiski Ibaadat Ki Jaati Thi Aur Uska Iraadah Ikhlaas Se Allah Ki Ibaadat Karna Tha (To Kya Hukm Hai?) Phir Imaam Bukhaari Farmaate Hai'n Ke, Aur Zohri Ne Kaha, Mujhe Hazrat Anas Radiallahu Anhu Ne Khabar Di Ke Nabi e Kareem ﷺ Ne Irshaad Farmaaya, Mujh Par Aag Pesh Ki Gayi Aur Mai'n Uss Waqt Namaaz Padh Raha Tha, (Phir Imaam Bukhaari Yeh Hadees Naql Karte Hai'n Ke) Riwaayat Hai Hazrat Abdullah Bin Abbaas Radiallahu Anhuma Se Ke Sooraj Ko Gahen Lag Gaya, To Rasoolullah ﷺ Ne Namaaz Padhi, Phir Aapne Farmaaya, Mujhe Aag Dikhaayi Gayi Aur Mai'n Ne Aaj Ki Tarah Qabeeh Manzar Hargiz Nahee'n Dekha. (Iss Hadees Se Saabit Huwa Ke Rasoolullah ﷺ Ko Allah Ta'ala Ne Duniya Hi Me'n Dozakh Ka Mushaahedah Karwaaya Aur Usse Yeh Bhi Saabit Huwa Ke Dozakh Paida Ki Ja Chuki Hai)
Riwaayat Hai Hazrat Ibne Umar Radiallahu Anhuma Se Ke Nabi e Kareem ﷺ Ne Irshaad Farmaaya, Apne Gharo'n Me'n Bhi Apni Namaazo'n Ka Hissa Rakho Aur Apne Gharo'n Ko Qabrastaan Na Banaao.
Yeh Baab Hai Iss Muta'alliq Ke, Jis Jagah Dha'nsaaya Gaya Ho Aur Azaab Ki Jagah Namaaz Padhna (Kaisa Hai?) (Phir Imaam Bukhaari Farmaate Hai'n Ke) Aur Zikr Kiya Jaata Hai Ke Hazrat Ali Radiallahu Anhu Ne Baabil Ki Dha'nsi Huwi Jagah Me'n Namaaz Ko Makrooh Qaraar Diya Hai (Phir Imaam Bukhaari Yeh Hadees Naql Karte Hai'n Ke) Riwaayat Hai Hazrat Abdullah Bin Umar Radiallahu Anhuma Se Ke, Rasoolullah ﷺ Ne Irshaad Farmaaya, Un Azaab Shudah Logo'n Ke Paas Se Sirf Rote Huwe Guzarna, Pas Agar Tum Rote Huwe Na Guzar Sako To Unke Paas Daakhil Na Hona, Kahee'n Tum Par Bhi Woh Azaab Na Aa Jaaye Jo Unpar Aaya Tha. (Yeh Hadees e Paak Hazrat Ali Radiallahu Anhu Ke Asar Ke Muwaafiq Bhi Hai Kyu'nke Jab Nabi e Kareem ﷺ Tabook Ki Taraf Jaate Huwe Maqaam e Hijr Se Guzre Jahaa'n Qaum e Samood Ke Makaanaat The (Yeh Woh Jagah Hai Jahaa'n Par Allah Ta'ala Ka Azaab Naazil Huwa Tha) To Aap Uss Jagah Nahee'n Thehre, Usi Tarah Hazrat Ali Radiallahu Anhu Jab Baabil Ki Dha'nsi Huwi Jagah Par Paho'nche (Ja'ng e Naherwaan Ke Mauqe Par) To Wahaa'n Nahee'n Thehre.
Yeh Baab Hai Iss Muta'alliq Ke, Girje Me'n Namaaz Padhne Ka Hukm (Kya Hai?) (Phir Imaam Bukhaari Farmaate Hai'n Ke) Aur Hazrat Umar Radiallahu Anhu Ne Farmaaya, Beshak Hum Tumhaari Ibaadat Gaaho'n Me'n Un Soorto'n Ke Mujassamo'n Ki Wajah Se Daakhil Nahee'n Ho'nge, Aur Hazrat Ibne Abbaas Radiallahu Anhuma Har Girje Ghar Me'n Namaaz Padhte The, Siwa Uss Girje Ghar Ke Jisme'n Mujassame Hote The, (Phir Imaam Bukhaari Yeh Hadees Naql Karte Hai'n Ke) Riwaayat Hai Hazrat Aa'yesha Radiallahu Anha Se Ke, Hazrat Umme Salma Radiallahu Anha Ne Rasoolullah ﷺ Se Zikr Kiya Ke Unho'n Ne Habsha Ki Sar Zameen Me'n Ek Girja Dekha Tha Jiska Naam Maariya Tha, Unho'n Ne Zikr Kiya Aur Un Soorto'n Ke Mujassamo'n Ka Zikr Kiya Jo Unho'n Ne Usme'n Dekhe The, Tab Rasoolullah ﷺ Ne Irshaad Farmaaya, Yeh Woh Log Hai'n Ke Jab Unme'n Se Koi Nek Bandah Ya Nek Shakhs Faut Ho Jaata Hai To Yeh Uski Qabr Par Masjid Bana Dete Hai'n Aur Uski Qabr Par Un Soorto'n Ke Mujassame Bana Dete Hai'n, Yeh Allah Ta'ala Ke Nazdeek Bad Tareen Makhlooq Hai'n.
Hazrat Aa'yesha Radiallahu Anha Aur Hazrat Abdullah Bin Abbaas Radiallahu Anhuma Ne Kaha Jab Rasoolullah ﷺ Par Marzul Maut Naazil Huwa To Rasoolullah ﷺ Ne Apne Chehre Par Siyaah Munaqqash Chaadar Daali, Phir Jab Aapko Uss Chaadar Se Ta'ngi Huwi To Aapne Uss Chaadar Ko Chehre Se Hataaya, Phir Usi Haalat Me'n Aapne Farmaaya, Yahood Wa Nasaara Par Allah Ta'ala Ki La'nat Ho, Jinho'n Ne Ambiya Alaihimussalaam Ki Qabro'n Ko Masaajid Bana Diya, Aap Unke Kiye Huwe Kaamo'n Se Dara Rahe The.
Hazrat Abu Hurairah Radiallahu Anhu Bayaan Karte Hai'n Ke, Rasoolullah ﷺ Ne Farmaaya, Allah Ta'ala Yahood Ko Halaak Kare, Unho'n Ne Ambiya Alaihimussalaam Ki Qabro'n Ko Masaajid Bana Diya.
Hazrat Jaabir Bin Abdullah Radiallahu Anhuma Bayaan Karte Hai'n Ke Rasoolullah ﷺ Ne Irshaad Farmaaya, Mujhe 5 Aisi Cheeze'n Di Gayi Hai'n Jo Mujhse Pehle Ambiya Me'n Se Kisi Ko Nahee'n Di Gayee'n, Ek Maah Ki Musaafat Se Meri Ro'ab Se Madad Ki Gayi Aur Mere Liye Tamaam Ruwe Zameen Ko Masjid Aur Paak Karne Waali Bana Diya Gaya Hai, Aur Meri Ummat Me'n Se Jo Shakhs Kahee'n Bhi Namaaz Ka Waqt Paaye Wahee'n Namaaz Padh Le, Aur Mere Liye Ganeemato'n Ko Halaal Kar Diya Gaya (Pehle) Nabi Apni Makhsoos Qaum Ki Taraf Mab'oos Kiya Jaata Tha Aur Mujhe Tamaam Logo'n Ki Taraf Mab'oos Kiya Gaya Hai, Aur Mujhe Shafa'at Di Gayi Hai.
Riwaayat Hai Hazrat Aa'yesha Radiallahu Anha Se Ke, Arab Ke Qabeele Ki Ek Siyaah Faam Baa'ndi Thi, Pas Unho'n Ne Usko Aazaad Kar Diya Woh Unke Saath Rehti Thi Ek Din Un Logo'n Ki Ek Bachchi Baahar Nikli Uske Upar Surkh Chamde Ka Haar Tha, (Jisme'n Moti Jade Huwe The) Uss Bachchi Ne Uss Haar Ko Rakh Diya Ya Usse Kahee'n Gir Gaya, Wahaa'n Se Ek Cheel Guzri Aur Uss Jagah Woh Haar Gira Huwa Tha, Uss Cheel Ne Gumaan Kiya Ke Woh Gosht Hai, Woh Usko Jhapat Le Gayi, Uss Baa'ndi Ne Kaha, Un Logo'n Ne Uss Haar Ko Talaash Kiya Woh Unko Nahee'n Mila, Uss Baa'ndi Ne Kaha, Phir Unho'n Ne Mujh Par Uss Haar Ki Tohmat Lagaayi, Unho'n Ne Uski Talaashi Li, Hatta Ke Uski Indam Nehaani (Sharmgaah) Ki Bhi Talaashi Li, Uss Baa'ndi Ne Kaha, Allah Ki Qasam, Mai'n Unke Paas Khadi Huwi Thi Ke Achaanak Woh Cheel Guzri, Aur Usne Woh Haar Phe'nk Diya Aur Woh Haar Un Logo'n Ke Darmiyaan Gira, Uss Baa'ndi Ne Kaha, Yeh Hai Woh Haar Jiski Tumne Apne Gumaan Se Mujh Par Tohmat Lagaayi Thi, Aur Mai'n Usse Bari Thi (Ya'ni Mai'n Ne Chori Nahee'n Ki Thi) Aur Woh Yeh Pada Hai, Hazrat Aa'yesha Radiallahu Anha Ne Bayaan Kiya, Phir Woh Baa'ndi Rasoolullah ﷺ Ke Paas Aayi Aur Islaam Le Aayi, Hazrat Aa'yesha Radiallahu Anha Ne Bataaya Ke Uske Liye Ek Masjid Me'n Ek Khema Tha Ya Kutiya Thi, Hazrat Aa'yesha Radiallahu Anha Ne Kaha, Woh Mere Paas Aakar Baate'n Karti Thee'n, Woh Jab Bhi Mere Paas Baith'ti Thi To Yeh Sh'er Padhti Thee'n. Haar Ka Din Humaare Rab Ki Ajeeb Wa Gareeb Cheezo'n Se Hai Suno ! Usne Mujhe Kufr Ke Shaher Se Nijaat De Di Hazrat Aa'yesha Radiallahu Anha Bayaan Karti Hai'n Ke, Mai'n Ne Usse Kaha, Kya Wajah Hai Ke Jab Bhi Tum Mere Saath Baith'ti Ho To Tum Yeh Sh'er Zaroor Padhti Ho? Tab Usne Mujhe Poora Waaqeya Sunaaya.
Yeh Baab Hai Iss Muta'alliq Ke, Mardo'n Ka Masjid Me'n Sona (Kaisa Hai?) Phir Imaam Bukhaari Farmaate Hai'n Ke, Aur Abu Qilaaba Hazrat Anas Radiallahu Anhu Se Riwaayat Karte Hai'n Ke, Ukl Ki Ek Jama'at Nabi e Kareem ﷺ Ke Paas Aayi, To Woh Masjid Ke Chabootre Me'n Thehri, Aur Hazrat Abdur Rehmaan Bin Abu Bakar Radiallahu Anhuma Ne Kaha, Aur Woh As'haabe Suffa Ke Fuqara Me'n The, (Phir Imaam Bukhaari Ne Yeh Hadees Naql Ki Ke) Naaf'e Ne Hadees Bayaan Ki, Unho'n Ne Kaha Ke, Mujhe Hazrat Abdullah Bin Umar Radiallahu Anhuma Ne Hadees Bayaan Ki, Ke Woh Naujawaan Aur Ku'nwaare The, Unki Biwi Nahee'n Thi Aur Woh Nabi e Kareem ﷺ Ki Masjid Me'n Sote The.
Hazrat Sa'ad Radiallahu Anhu Ne Bayaan Kiya Ke, Rasoolullah ﷺ Hazrat Sayyadah Faatema Radiallahu Anha Ke Ghar Aaye, Pas Aapne Ghar Me'n Hazrat Ali Radiallahu Anhu Ko Na Paaya, Pas Aapne Farmaaya, Tumhaare Amzaad (Chacha Ka Beta) Kaha Hai? Hazrat Sayyadah Faatema Radiallahu Anha Ne Kaha, Mere Aur Unke Darmiyaan Kuchh Ikhtelaafaat Ho Gaya Tha, Woh Mujh Par Naaraaz Huwe, Pas Ghar Se Nikal Gaye Aur Mere Paas Qailoola Nahee'n Kiya, (Dopaher Ko Ghar Me'n Nahee'n Soye) Tab Rasoolullah ﷺ Ne Kisi Shakhs Se Farmaaya, Jaao Dekho Woh Kahaa'n Hai'n? Woh Shakhs Aaya Aur Usne Bataaya, Ya Rasoolallah ﷺ ! Woh Masjid Me'n Soye Huwe Hai'n, Rasoolullah ﷺ Aaye To Woh Masjid Me'n Lete Huwe The, Unki Chaadar Unke Pehlu Se Dhalak Gayi Thi Aur Uspar Mitti Lag Gayi Thi, To Rasoolullah ﷺ Unse Mitti Saaf Kar Rahe The Aur Farma Rahe The, Aye Abu Turaab Utho, Aye Abu Turaab Utho. (Iss Hadees Se Saabit Huwa Ke Kunniyat Keliye Beta Ya Beti Ki Taraf Nisbat Zaroori Nahee'n Hai, Iss Hadees Me'n Hazrat Ali Radiallahu Anhu Ki Ek Azeem Fazeelat Zikr Hai Ke Unko Bulaane Aur Uthaane Keliye Rasoolullah ﷺ Khud Tashreef Le Gaye Aur Pyaar Se Uthaaya)
Hazrat Abu Hurairah Radiallahu Anhu Bayaan Karte Hai'n Ke, Mai'n Ne 70 As'haab e Suffa Ko Dekha, Unme'n Se Koi Aisa Shakhs Nahee'n Tha Jiske Upar Ke Badan Ko Dhaa'npne Waali Chaadar Ho Ya Tehband Hota Tha Ya Poore Badan Par Odhne Waali Chaadar Hoti Thi, Woh Uss Chaadar Ko Apni Gardan Me'n Baa'ndh Lete The, Pas Ba'az Ki Chaadar Nisf Pindliyo'n Tak Paho'nchti Thi Aur Ba'az Ki Takhno'n Tak, Pas Woh Uss Chaadar Ko Apne Haath Se Samet Lete The Taake Unka Satr Na Khul Jaaye.
Yeh Baab Hai Iss Muta'alliq Ke, Safar Se Aane Ke Ba'ad Namaaz Padhna (Kaisa Hai?) Phir Imaam Bukhaari Farmaate Hai'n Ke, Aur Ka'ab Bin Maalik Ne Kaha, Jab Nabi e Kareem ﷺ Kisi Safar Se Waapas Aate To Aap Masjid Se Ibteda Karte Aur Usme'n Namaaz Padhte, (Yeh Mukammal Hadees Bukhaari Shareef, Hadees No.4418 Me'n Aayegi Insha Allah) (Phir Imaam Bukhaari Yeh Hadees Naql Karte Hai'n Ke) Hazrat Jaabir Bin Abdullah Radiallahu Anhuma Ne Kaha, Mai'n Nabi e Kareem ﷺ Ke Paas Aaya Aur Aap Masjid Me'n The, Unho'n Ne Kaha Mera Gumaan Hai, Woh Chaasht Ka Waqt Tha, Aapne Farmaaya, 2 Rak'at Namaaz Padho, Aur Mera Aap Par Qarz Tha, Aapne Woh Qarz Ada Kiya Aur Mujhe Zyaadah Diya.
Hazrat Abu Qataadah Salami Radiallahu Anhu Se Riwaayat Hai Ke Rasoolullah ﷺ Ne Irshaad Farmaaya, Jab Tum Me'n Se Koi Shakhs Masjid Me'n Daakhil Ho To Woh Baithne Se Pehle 2 Rak'at Namaaz Padhe. (Yaad Rahe Yahaaa'n 2 Rak'at Namaaz Se Muraad Namaaz e Tahiyatul Masjid Hai)
Hazrat Abu Hurairah Radiallahu Anhu Bayaan Karte Hai'n Ke Nabi e Kareem ﷺ Ne Irshaad Farmaaya, Farishte Tumhaare Liye Uss Waqt Tak Magferat Ki Du'aa Karte Rehte Hai'n Jab Tak Ke Aadmi Apni Namaaz Ki Jagah Me'n Rehta Hai Jab Tak Woh Apna Wazu Nahee'n Todta, Farishte Du'aa Karte Rehte Hai'n, Aye Allah Iski Magferat Farma, Aye Allah Ispar Rahem Farma.
Yeh Baab Hai, Masjid Ko Banaane Ke Muta'alliq, (Phir Imaam Bukhaari Farmaate Hai'n Ke) Aur Hazrat Abu Sa'eed Radiallahu Anhu Ne Kaha, Masjid (Nabwi) Ki Chhat Khajoor Ki Shaakho'n Se Humwaar Ki Gayi Thi, (Mukammal Hadees Bukhaari Shareef Hadees No.669 Me'n Mulaaheza Farmaaye'n) Phir Imaam Bukhaari Farmaate Hai'n Ke, Aur Hazrat Umar Radiallahu Anhu Ne Masjid (Nabwi) Ko Banaane Ka Hukm Diya Aur Farmaaya Logo'n Ko Baarish Se Mehfooz Rakho, Aur Surkh Ra'ng Ya Zard Ra'ng Lagaane Se Ijtenaab Karo Ke Log Fitna Me'n Mubtela Ho'nge (Mukammal Hadees Bukhaari Shareef Hadees No.446 Me'n Maujood Hai) Phir Imaam Bukhaari Farmaate Hai'n Ke, Hazrat Anas Radiallahu Anhu Ne Farmaaya, Log Masaajid Banaakar Fakhr Kare'nge Aur Usko (Namaazo'n Se) Bahot Kam Aabaad Kare'nge, (Mukammal Hadees Saheeh Ibne Khuzaima Hadees No.1321 Me'n Mulaaheza Farmaaye'n) Phir Imaam Bukhaari Farmaate Hai'n Ke, Aur Hazrat Ibne Abbaas Radiallahu Anhuma Ne Farmaaya, Tum Zaroor Masaajid Ko Muzayyan Karoge Jis Tarah Yahood Wa Nasaara Ne Muzayyan Kiya Hai (Mukammal Hadees Sunan Abi Dawood Hadees No.448 Me'n Mulaaheza Farmaaye'n) (Yaad Rahe Ke Yeh Saari Baate'n Uss Waqt Ki Hai'n Jab Sabke Ghar Saadah Huwa Karte The To Zamaane Ke Hisaab Se Masaajid Bhi Bilkul Saadah Huwa Karti Thi Ab Bhi Aisi Masaajid Ho'n To Durust Hai Lekin Ab Jab Sab Log Apne Ghar Ko Aa'lishaan Bana Rahe Hai To Phir Allah Ta'ala Ka Ghar Bhi Aa'lishaan Ho Taake Masaajid Ko Bhi Aaj Ke Zehniyat Ke Log Wuq'at Ki Nazro'n Se Dekhe'n Aur Yeh Baate'n Aane Waali Hadees Se Bhi Saabit Hogi Ke Hazrat Usmaan Gani Radiallahu Anhu Ne Masjid e Nabwi Ki Taus'ee Kis Andaaz Me'n Ki, (Phir Imaam Bukhaari Ne Yeh Hadees Naql Ki Ke, Hazrat Abdullah (Bin Umar Radiallahu Anhuma) Ne Khabar Di Ke Masjid (Nabwi) Rasoolullah ﷺ Ke Zamaane Me'n Kachchi E'nto'n Ki Bani Huwi Thi, Aur Uski Chhat Khajoor Ki Shaakho'n Ki Bani Thi Aur Uske Sutoon Khajoor Ke Tano'n Ke The, Hazrat Abu Bakar Radiallahu Anhu Ne Usme'n Koi Izaafa Nahee'n Kiya, Hazrat Umar Radiallahu Anhu Ne Usme'n Izaafa Kiya Aur Usko Rasoolullah ﷺ Ke Zamaane Ki Bina Par Ta'meer Kiya, Kachchi E'nto'n Aur Shaakho'n Se Banaaya, Aur Uske Sutoon Dobaarah Lakdi Ke Bana Diye, Phir Hazrat Usmaan Radiallahu Anhu Ne Usme'n Tabdeeli Ki Aur Usme'n Bahot Izaafa Kiya, Uski Deewaare'n Naqsh Wa Nigaar Waale Pat'tharo'n Aur Choone Ki Banaayee'n Aur Uske Sutoon Bhi Munaqqash Pat'tharo'n Ke Banaaye Aur Uski Chhat Saagwaan Ki Lakdi Ki Banaayi.
Yeh Baab Hai Iss Muta'alliq Ke, Masjid Ki Ta'meer Me'n Ta'awun (Karna Kiska Kaam Hai?) Phir Imaam Bukhaari Farmaate Hai'n Ke, Aur Allah Ta'ala Ka Irshaad Hai, Mushrikeen Keliye Yeh Jaa'iz Nahee'n Ke Woh Allah Ki Masaajid Ki Ta'meer Kare'n Jab Ke Woh Khud Apne Khilaaf Kufr Ki Gawaahi Dene Waale Ho'n, Unke Aa'maal Zaay'e Ho Gaye Aur Woh Dozakh Me'n Humesha Rehne Waale Hai'n, Allah Ki Masaajid Sirf Wohi Log Ta'meer Kar Sakte Hai'n Jo Allah Aur Roz e Aakherat Par Imaan Laaye Aur Unho'n Ne Namaaz Qaayem Ki Aur Zakaat Ada Ki Aur Allah Ke Siwa Kisi Se Nahee'n Dare Aur Anqareeb Yehi Log Hidaayat Yaafta Logo'n Me'n Se Ho'nge, (Sureh Taubah, Aayat No.17/18) Phir Imaam Bukhaari Yeh Hadees Naql Karte Hai'n Ke, Ikrama Ne Bayaan Kiya Ke, Hazrat Ibne Abbaas Radiallahu Anhuma Ne Mujhse Aur Apne Bete Ali Se Kaha, Tum Dono'n Hazrat Abu Sa'eed Ke Paas Jaao Aur Unse Hadees Ka Sam'a Karo, Pas Hum Dono'n Gaye, Uss Waqt Hazrat Abu Sa'eed Apne Baag Ki Islaah Kar Rahe The, Unho'n Ne Apni Chaadar Lekar Odh Li, Phir Hume'n Hadees Sunaane Lage Hatta Ke Masjid Ki Ta'meer Ka Zikr Aaya To Unho'n Ne Kaha, Hum Ek Ek Ee'nt Utha Kar La Rahe The, Aur Hazrat Ammaar Radiallahu Anhu Do Do Ee'nte'n Utha Kar La Rahe The To Nabi e Kareem ﷺ Ne Unhe'n Uss Haal Me'n Dekh Liya, Aapne Unse Mitti Jhaadi Aur Farmaaya, Ammaar Par Afsos Hai ! Usko Ek Baagi Jama'at Qatl Karegi, Yeh Unko Jannat Ki Taraf Bulaayega Aur Woh Usko Dozakh Ki Taraf Bulaaye'nge, Hazrat Abu Sa'eed Ne Kaha, Hazrat Ammaar Kehte The, Mai'n Fitno'n Se Allah Ki Panaah Me'n Aata Hoo'n. (Iss Hadees Me'n Rasoolullah ﷺ Ke Ilm e Gaib e Ataayi Ka Bhi Zikr Maujood Hai Ke Aap Mustaqbil Ki Khabar De Rahe Hai'n Ke Ammaar Radiallahu Anhu Ko Kaise Log Qatl Kare'nge Ya'ni Pehle Hi Bata Diya Ke Ammaar Radiallahu Anhu Shaheed Kiye Jaaye'nge, Doosri Ek Ahem Baat Ke Iss Hadees Ke Zariye Se Ba'az Log Hazrat Ameer Mu'aawiya Radiallahu Anhu Par Bhi Ae'teraaz Karte Hai'n Ke Iss Hadees Se Saabit Huwa Ke Hazrat Mu'aawiya Radiallahu Anhu Aur Unki Jama'at Dozakh Ki Taraf Bulaane Waale Huwe Aur Baagi Huwe Iss Ae'teraaz Ke Bahot Saare Jawaabaat Ulama e Kiraam Ne Diye Hai Unme'n Se Ek Yeh Bhi Jawaab Hai Ke, Iss Hadees Ki Bina Par Hazrat Ameer Mu'aawiya Radiallahu Anhu Aur Aap Ki Jama'at Par Baagi Aur Dozakh Ki Taraf Bulaane Waale Ka Itlaaq Karna Ba Ae'tebaar Zaahir To Durust Ho Sakta Hai Lekin Ba Ae'tebaar Haqeeqat Nahee'n, Kyu'nke Haqeeqat Me'n Hazrat Mu'aawiya Radiallahu Anhu Aur Unki Jama'at Ke Gumaan Ke Ae'tebaar Se Unka Iqdaam Bar Haq Tha, Kyu'nke Woh Hazrat Usmaan Gani Radiallahu Anhu Ke Qisaas Ke Taalib The, Haalaa'nke Waaq'e Me'n Unka Yeh Ijtehaad Mabni Bar Khata Tha Kyu'nke Woh Hazrat Ali Radiallahu Anhu Ke Khilaaf Ja'ng Kar Rahe The Aur Hazrat Ali Radiallahu Anhu Khaleefa e Bar Haq The Aur Khaleefatul Muslimeen The Aur Khaleefa e Bar Haq Ke Khilaaf Ja'ng Karna Bagaawat Hai Aur Dozakh Me'n Dukhool Ka Sabab Hai, Iss Sabab Zaahiri Ae'tebaar Se Woh Baagi The Aur Dozakh Ki Taraf Bulaane Waale The Lekin Haqeeqat Me'n Baagi Nahee'n The Kyu'nke Unka Iqdaam Apne Ijtehaad Ki Wajah Se Tha, (Naake Zaatiyaad Ki Wajah Se, Aur Sahaaba e Kiraam Radiallahu Anhum Ajma'een Se Zaatiyaat Ke Sabab Ek Doosre Ke Khilaaf Ja'ng Karna Mutasawwur Nahee'n Kiya Ja Sakta Kyu'nke Mohaddiseen Ka Ispar Ijma Hai Ke Tamaam Sahaaba Aa'dil Hai'n) (Maakhooz Az Ne'matul Baari Fi Sharhul Bukhaari, Jild No.2, Hadees No.447 Ke Tahet )
Hazrat Sahl Radiallahu Anhu Ne Bayaan Kiya Ke Nabi e Kareem ﷺ Ne Ek Aurat Ki Taraf Paigaam Bheja Ke Tum Apne Bete Ko Hukm Do Jo Badhayi (Ladki Ka Saamaan Banaane Waala) Hai Ke Woh Mere Liye (Mimbar Ki) Seedhiyaa'n Bana De Jin Par Mai'n Baithu'nga.
Riwaayat Hai Hazrat Jaabir Radiallahu Anhu Se Ke, Ek Aurat Ne Kaha, Ya Rasoolullah ﷺ ! Kya Mai'n Aapke Liye Ek Aisi Cheez Na Bana Doo'n Jis Par Aap Baithe'n? Kyu'nke Mera Ladka Badhayi (Lakdi Ka Saamaan Banaane Waala) Hai, Aapne Farmaaya, Agar Tum Chaaho, Pas Uss Aurat Ne Mimbar Bana Diya.
Hazrat Usmaan Bin Affaan Radiallahu Anhu Bayaan Karte Hai'n Ke, Jab Unho'n Ne Rasoolullah ﷺ Ki Masjid Banaayi Aur Logo'n Ne Unpar Ae'teraaz Kiye To Unho'n Ne Farmaaya, Beshak Tumne Bahot Ae'teraaz Kiye Hai'n, Aur Mai'n Ne Nabi e Kareem ﷺ Ko Yeh Farmaate Huwe Suna Hai Ke Jisne Masjid Banaayi, Bukair Ne Kaha Mera Gumaan Hai Ke Unho'n Ne Farmaaya, Aur Woh Masjid Banaane Se Allah Ki Riza Talab Karta Tha To Allah Uske Liye Jannat Me'n Uski Misl (Ghar) Bana Dega (Banaane Waalo'n Keliye)
Sufiyaan Ne Hadees Bayaan Ki Unho'n Ne Kaha Ke Mai'n Ne Umro Se Poochha Kya Tumne Hazrat Jaabir Bin Abdullah Radiallahu Anhu Se Suna Hai Woh Kehte The Ke Ek Shakhs Masjid Se Guzra Aur Uske Saath Teer The To Usse Rasoolullah ﷺ Ne Irshaad Farmaaya, Apne Teer Ki Nok Ya Paikaan Ko Pakad Kar Rakho? (Iss Hadees Me'n Ibhaam Hai Ke Umro Ne Jawaab Me'n Haa'n Kaha Ke Nahee'n? Yahaa'n Mazkoor Nahee'n Hai Lekin Jawaab Hadees No.7073 Me'n Mazkoor Hai Ke Umro Ne Kaha Haa'n)
Hazrat Abu Burdah Radiallahu Anhu Riwaayat Karte Hai'n Nabi e Kareem ﷺ Se Ke, Rasoolullah ﷺ Ne Irshaad Farmaaya, Jo Shakhs Humaari Masaajid Me'n Se Kisi Jagah Ya Humaare Baazaar Me'n Se Kisi Jagah Teer Lekar Guzre Pas Usko Chaahiye Ke Woh Uske Paikaan Ko Pakad Kar Rakhe, Woh Apne Haath Se Kisi Musalmaan Ko Zakhmi Na Kare.
Hazrat Abdur Rehmaan Bin Auf Radiallahu Anhu Ne Khabar Di Ke Unho'n Ne Hazrat Hassaan Bin Saabit Ansaari Radiallahu Anhu Se Suna, Ke Woh Hazrat Abu Hurairah Radiallahu Anhu Se Shaahadat Talab Karte The Ke Mai'n Tumhe'n Allah Ki Qasam Deta Hoo'n, Kya Tumne Nabi e Kareem ﷺ Ko Yeh Farmaate Huwe Suna Hai? Aye Hassaan ! Rasoolullah ﷺ Ki Taraf Se Jawaab Do, Aye Allah ! Iski Roohul Quds Se Taa'eed Farma, Hazrat Abu Hurairah Radiallahu Anhu Ne Kaha Haa'n ! (Iss Hadees Me'n Masjid Me'n Sh'er Padhne Ka Zikr Nahee'n Hai Lekin Hadees No.3212 Masjid Me'n Sh'er Padhne Ka Zikr Maujood Hai)
Hazrat Aa'yesha Radiallahu Anha Ne Bayaan Kiya Ke, Mai'n Ne Ek Din Rasoolullah ﷺ Ko Apne Hujre Ke Darwaazeh Par Dekha Aur Habshi Masjid Me'n Ja'ngi Mashqe'n Kar Rahe The Aur Rasoolullah ﷺ Mujhe Apni Chaadar Me'n Chhupa Rahe The, Mai'n Unki Mashqo'n Ko Dekh Rahi Thi ; (Isse Saabit Huwa Ke Shauharo'n Ko Apni Biwiyo'n Ki Khwaahishaat Ka Bhi Khayaal Rakhna Chaahiye Agar Woh Khilaaf e Shar'a Na Ho To)
Imaam Bukhaari Likhte Hai'n, Ibraaheem Bin Munzir Ne Izaafa Kiya Hai, Hume'n Ibne Wahab Ne Hadees Bayaan Ki, Unho'n Ne Kaha, Mujhe Yunus Ne Khabar Di Woh Riwaayat Karte Hai'n Ibne Shahaab Se Woh Urwaah Se Woh Hazrat Aa'iyesha Radiallahu Anha Se Ke, Unho'n Ne Bayaan Kiya, Mai'n Ne Nabi e Kareem ﷺ Ko Dekha Aur Habshi Apni Ja'ngi Mashqo'n Ke Saath Mashq Kar Rahe The.
Hazrat Aa'yesha Radiallahu Anha Ne Bayaan Kiya Ke, Unke Paas Hazrat Bareerah Radiallahu Anha Aayee'n Aur Unse Yeh Sawaal Kiya Ke Woh Unka Zar Kitaabat Ada Karde'n, Hazrat Aa'yesha Radiallahu Anha Ne Farmaaya, Agar Tum Chaaho To Mai'n Tumhaare Maaliko'n Ko Tumhaara Zar Kitaabat Ada Kardoo'n Aur Wala Mere Liye Hogi, Hazrat Bareerah Ke Maaliko'n Ne Kaha, Agar Aap Chaahe'n To Isko Aazaad Karde'n, Sufyaan Ne Ek Baar Kaha, Agar Aap Chaahe'n To Isko Aazaad Karde'n Aur Wala Humaare Liye Hogi, Pas Jab Rasoolullah ﷺ Aaye To Mai'n Ne Aapse Iska Zikr Kiya, To Nabi e Kareem ﷺ Ne Irshaad Farmaaya, Tum Bareerah Ko Khareed Kar Aazaad Kardo Kyu'nke Wala Uske Liye Hoti Hai Jo Aazaad Karta Hai, Phir Rasoolullah ﷺ Mimbar Par Chadhe Aur Farmaaya, Un Logo'n Ka Kya Haal Hai Jo Aisi Shart Aayed Karte Hai'n Jo Kitaabullah Me'n Nahee'n Hai, Jisne Aisi Shart Lagaayi Jo Kitaabullah Me'n Nahee'n Hai, Woh Shart Uske Liye Nahee'n Hogi, Khwaah Woh Sharte'n Lagaaye, Ali Ne Kaha, Yahya Ne Kaha, Aur Abdul Wahaab Ne Az Yahya Az Amrah Az Ja'far Bin Aun Ne Kaha Az Yahya, Unho'n Ne Kaha, Mai'n Ne Amrah Se Kaha, Unho'n Ne Kaha, Mai'n Ne Hazrat Aa'yesha Radiallahu Anha Se Suna, Iss Hadees Ko Imaam Maalik Ne Riwaayat Kiya Hai Az Yahya Az Amrah Ke Hazrat Bareerah Aur Usme'n Mimbar Par Chadhne Ka Zikr Nahee'n Kiya. (Iss Hadees Me'n Zikr Hai Ke Hazrat Bareerah Radiallahu Anha Ne Hazrat Aa'yesha Radiallahu Anha Se Yeh Darkhwaasht Ki Thi Ke Woh Unka Zar Kitaabat Ada Karde'n, Matlab Yeh Hai Ke, Jis Gulaam Ya Lau'ndi Ko Uska Maalik Yeh Kahe Ke Tum Agar Itni Raqam Mujhe Laakar De Do To Tum Aazaad Ho, Aise Gulaam Ko Makaatib Aur Aisi Baa'ndi Ko Makaatiba Kehte Hai'n, Aur Uss Raqam Ko Zar Kitaabat Ya Badal Kitaabat Kehte Hai'n, Khwaah Woh Raqam Gulaam Ya Baa'ndi Khud Se Kama Kar Laaye Ya Kisi Se La Kar De De, Makaatib Wa Makaatiba Gulaami Ki Zindagi Se Nikal Jaate Hai'n Aur Woh Mehnat Wa Mazdoori Kar Sakte Hai'n, Lekin Jab Tak Raqam Ada Nahee'n Kiye Mukammal Aazaad Nahee'n Hote Hai'n, Isliye Makaatib Gulaam Ya Makaatiba Baa'ndi Kisi Ka Nuqsaan Karde To Uska Jurmaana Uske Maalik Ko Dena Hoga, Yoo'n Samjhe Makaatib Gulaam Aur Makaatiba Baa'ndi Ek Tarah Se Aazaad Hai'n To Doosri Tarah Se Aazaad Nahee'n Hai'n, Baher Haal Hazrat Bareerah Radiallahu Anha Se Unke Maaliko'n Ne Kaha Tha Tum Itni Raqam Laakar Do To Tum Aazaad Ho To Woh Hazrat Aa'yesha Radiallahu Anha Ke Paas Gayi Taake Woh Unki Taraf Se Raqam Ada Karke Unko Gulaami Se Aazaad Karaaye'n Aur Hazrat Aa'yesha Radiallahu Anha Ne Aisa Kiya Aur Unko Aazaadi Mil Gayi, (Subhaan Allah) Aur Wala Ka Matlab Yeh Hai Ke, Agar Baa'ndi Ya Gulaam Aazaad Hone Ke Ba'ad Kuchh Maal Wa Daulat Kama Kar Haasil Kare Aur Phir Mar Jaaye, Phir Agar Uske Waaris Ho To Woh Maal Uske Waariso'n Ko Diya Jaayega Aur Agar Uske Waaris Na Ho'n To Phir Woh Maal Uske Aazaad Karne Waale Ko Diya Jaayega, Isko Asba Sababi Aur Maulaaye Itaaqa Kehte Hai'n Aur Uss Gulaam Ya Baa'ndi Ke Uss Wiraasat Ko Wala Kehte Hai'n, To Hazrat Aa'yesha Radiallahu Anha Ne Qaa'ide Ke Mutaabiq Hazrat Bareerah Se Yeh Farmaaya Tha Ke Mai'n Tumko Matlooba Raqam De Doo'ngi Aur Wala Meri Hogi Aur Hazrat Bareerah Radiallahu Anha Ke Maaliko'n Ne Matlooba Raqam Lekar Aazaad Karne Keliye Yeh Shart Aayed Ki Thi Ke Wala Humaare Liye Hogi, Iss Shart Ka Rasoolullah ﷺ Ne Rad Farmaaya Tha)
Riwaayat Hai Hazrat Ka'ab Radiallahu Anhu Se Ke Unho'n Ne Hazrat Ibne Abi Hadrad Radiallahu Anhu Se Apne Uss Qarz Ka Masjid Me'n Taqaaza Kiya Jo Unpar Tha, Pas Un Dono'n Ki Aawaaze'n Buland Ho Gayee'n Hatta Ke Rasoolullah ﷺ Ne Un Aawaazo'n Ko Apne Ghar Me'n Sun Liya, Aap Un Dono'n Ki Taraf Nikle Hatta Ke Aapne Apne Hujre Ka Pardah Khola, Phir Aapne Aawaaz Di, Aye Ka'ab ! Unho'n Ne Kaha, Labbaik Ya Rasoolallah ﷺ ! Aapne Farmaaya, Tum Apne Qarz Se Itna Kam Kardo Aur Haath Se Ishaarah Karke Bataaya, Nisf, Unho'n Ne Kaha, Mai'n Ne Kar Diya Ya Rasoolallah ﷺ ! Phir Aapne (Ibne Abi Hadrad Se) Farmaaya Utho ! Ab Inka Qarz Ada Kardo.
Riwaayat Hai Hazrat Abu Hurairah Radiallahu Anhu Se Ke, Ek Siyaah Faam Mard Ya Aurat Masjid Ki Safaayi Karte The, Pas Woh Shakhs Faut Ho Gaya, Nabi e Kareem ﷺ Ne Uss Muta'alliq Poochha, Musalmaano'n Ne Bataaya Ke Woh Shakhs Faut Ho Gaya, Aapne Farmaaya, Tumne Mujhe Uski Ittela Kyu'n Nahee'n Di? Mujhe Uski Qabr Bataao Ya Uss Aurat Ki Qabr Bataao, Aap Uski Qabr Par Gaye Aur Uski Namaaz e Janaazah Padhi. (Iss Hadees Se Ma'loom Huwa Ke Rasoolullah ﷺ Namaaz e Janaazah Ki Shirkat Ke Bade Harees The Aur Saath Yeh Bhi Ma'loom Huwa Ke Gaayebaana Namaaz e Janaazah Durust Nahee'n, Warna Rasoolullah ﷺ Khud Uss Siyaah Faam Ki Namaaz e Janaazah Gaayebaana Padh Sakte The Qabr Ke Paas Jaane Ki Zehmat Na Uthaate, Rahi Baat Nijaashi Baadshaah Ke Gaayebaana Namaaz e Janaazah Ki To Yeh Ek Martaba Aisa Huwa Aur Uski Wajah Doosri Thi Ab Isko Daleel Bana Kar Gaayebaana Janaazah Umooman Raa'ij Kar Dena Kya Durust Hai?) (Iss Hadees Ko Aad Banaakar Ba'az Log Nabi e Kareem ﷺ Ke Ilm Gaib e Ataayi Par Ae'teraaz Karte Hai'n Ke Poochhne Ki Zaroorat Kya Padi Agar Ilm Gaib e Ataayi Tha Nabi e Kareem ﷺ Ko, To Jawaabaat To Bahot Saare Hai'n Kuchh Ki Taraf Ishaarah Karta Hoo'n Un Mo'tarizeen Logo'n Ko Samajhna Chaahiye Ke Agar Yeh Usool Apnaaya Jaaye To Phir To Allah Ta'ala Ke Ilm e Gaib Ka Bhi Munkir Hona Padega Ke Jab Allah Aa'limul Gaib Hai To Phir Allah Ta'ala Farishto'n Se Kyu'n Poochhta Hai Ke Mere Bande Kya Kar Rahe The Mujhse Kya Maa'ng Rahe The Wagairah, Phir Allah Ne Hazrat Moosa Alaihissalaam Se Kyu'n Poochha Ke Aapke Haath Me'n Kya Hai? Kya Ab Bhi Kahoge, Poochhna Ilm Na Hone Ki Daleel Hai? Doosri Baat Agar Rasoolullah ﷺ Poochhte Nahee'n To Phir Uss Siyaah Faam Ki Fazeelat e Khaas Ka Ilm Kaise Logo'n Ko Hota? Aur Phir Yeh Masla Kaise Saamne Aata Ke Wali Ko Khabar Di Jaaye? Phir Yeh Masla Kaise Saabit Hota Ke Agar Wali Chaahe To Ba'ad e Dafan Ke Bhi Janaazah Ki Namaaz Padh Sakta Hai? To Yeh Maslehat Thi Usme'n, Phir Bhi Ae'teraaz ! Allah Samajh Ki Taufeeq Ata Kare, Aameen)
Hazrat Aa'yesha Radiallahu Anha Bayaan Karti Hai'n Ke, Jab Suratul Baqarah Ki Sood Se Muta'alliq Aayaat Naazil Huwee'n To Nabi e Kareem ﷺ Masjid Ki Taraf Nikle Aur Un Aayaat Ko Logo'n Se Saamne Padha, Phir Aapne Khamar (Sharaab) Ki Tijaarat Ko Haraam Kar Diya.
Yeh Baab Hai, Masjid Ke Khaadimeen Ke Muta'alliq, Phir Imaam Bukhaari Farmaate Hai'n Ke, Hazrat Ibne Abbaas Radiallahu Anhuma Ne Iss Aayat Ki Tafseer Me'n Farmaaya, Imraan Ki Biwi Ne Kaha, Mere Pet Me'n Jo Bachcha Hai Mai'n Ne Uski Tere Liye Nazr Maani Hai (Sureh Aale Imraan, Aayat No.35) Unka Iraadah Tha, Aazaad Kiya Huwa Woh Masjid Ki Khidmat Karega, (Phir Imaam Bukhaari Yeh Hadees Naql Karte Hai'n Ke) Riwaayat Hai Hazrat Abu Hurairah Radiallahu Anhu Se Ke, Ek Aurat Ya Ek Mard Masjid Ki Safaayi Karta Tha Aur Mera Gumaan Sirf Yeh Hai Ke Woh Aurat Thi, Phir Unho'n Ne Nabi e Kareem ﷺ Ki Yeh Hadees Zikr Ki Ke Aapne Uski Qabr Par Uski Namaaz e Janaazah Padhi.
Riwaayat Hai Hazrat Abu Hurairah Radiallahu Anhu Se Ke Nabi e Kareem ﷺ Ne Irshaad Farmaaya, Guzishta Raat Ek Sarkash Jinn Mujh Par Hamla Aawar Huwa Ya Koi Aur Baat Iski Misl Farmaayi, Taake Woh Meri Namaaz Munqat'e Karde, Pas Allah Ta'ala Ne Mujhe Uspar Qaadir Kar Diya, Pas Mai'n Ne Usko Masjid Ke Sutoono'n Me'n Se Kisi Sutoon Ke Saath Baa'ndhne Ka Iraadah Kiya, Hatta Ke Tum Sab Subah Ko Uski Taraf Dekhte, Phir Mujhe Apne Bhai Hazrat Sulemaan Alaihissalaam Ki Du'aa Yaad Aayi, Aye Mere Rab ! Mujhe Bakhsh De Aur Mujhe Aisa Mulk Ata Farma Jo Mere Ba'ad Aur Kisi Ke Laayeq Na Ho, (Sureh Saawd, Aayat No.35) Rooh Ne Kaha, Phir Aapne Usko Naakaam Waapas Kar Diya. (Iss Hadees Se Ma'loom Huwa Ke Rasoolullah ﷺ Jinno'n Ko Dekhte The Aur Saath Yeh Farmaaya Ke Mai'n Ne Usko Kisi Sutoon Se Baa'ndhna Chaaha Taake Subah Tum Sab Use Dekhlo, Ma'loom Huwa Ke Gair e Nabi Ka Bhi Jinno'n Ko Dekhna Mumkin Hai Muhaal Nahee'n Agarche Aa'datan Log Jinno'n Ko Nahee'n Dekh Paate Hai'n)
Yeh Baab Hai Iss Muta'alliq Ke, Jab Koi Shakhs Islaam Laaye Aur Gusl Kare Neez Qaidi Ko Masjid Me'n Baa'ndhna (Kaisa Hai) (Phir Imaam Bukhaari Farmaate Hai'n Ke, Aur Shareeh Maqrooz Ko Masjid Ke Sutoon Ke Saath Baa'ndhne Ka Hukm Dete The, (Phir Imaam Bukhaari Ne Yeh Hadees Naql Ki Hai Ke, Riwaayat Hai Hazrat Abu Hurairah Radiallahu Anhu Se Ke, Nabi e Kareem ﷺ Ne Ghode Sawaaro'n Ki Ek Jama'at Ko Najd Ki Taraf Bheja, Woh Bani Haneefa Ke Ek Shakhs Ko Giraftaar Karke Laaye, Jisko Sumaama Bin Usaal Kaha Jaata Tha, Unho'n Ne Usko Masjid Ke Sutoono'n Me'n Se Ek Sutoon Ke Saath Baa'ndh Diya, Nabi e Kareem ﷺ Uski Taraf Nikle To Logo'n Ne Kaha, Sumaama Ko Khol Do, Woh Masjid Ke Qareeb Khajoor Ke Ek Darakht Ki Taraf Gaya, Pas Usne Gusl Kiya, Phir Masjid Me'n Daakhil Huwa Phir Kaha, Mai'n Gawaahi Deta Hoo'n Ke Allah Ek Hai, Uske Siwa Koi Ibaadat Ke Laayeq Nahee'n Aur (Sayyiduna Mohammad) Allah Ke Rasool Hai'n. (Iss Hadees Se Samjha Ja Sakta Hai Ke Rasoolullah ﷺ Kis Tarah Logo'n Ke Saath Pesh Aate The Ke Log Aapke Akhlaaq Ko Dekh Kar Islaam Le Aate The Subhaan Allah)
Hazrat Aa'yesha Radiallahu Anha Bayaan Karti Hai'n Ke, Ja'ng e Khandaq Ke Din Hazrat Sa'ad Radiallahu Anhu Ke Baazu Ki Ek Rag Me'n Zakhm Aa Gaya Nabi e Kareem ﷺ Ne Masjid Me'n Unke Liye Khema Laga Diya Taake Log Unki Qareeb Se Iyaadat Karle'n Aur Masjid Me'n Banu Gaffaar Ka Bhi Khema Tha Phir Logo'n Ko Sirf Iss Cheez Ne Khauf Zadah Kiya Ke Unki Taraf Khoon Beh Kar Aa Raha Tha, Phir Logo'n Ne Kaha, Aye Kheme Waalo'n ! Yeh Kya Cheez Hai Jo Tumhaari Taraf Se Humaare Paas Aa Rahi Hai? Pas Logo'n Ne Kaha, Hazrat Sa'ad Radiallahu Anhu Ke Zakhm Se Khoon Beh Raha Hai, Pas Woh Usme'n Faut Ho Gaye.
Yeh Baab Hai Iss Muta'alliq Ke, Kisi Zaroorat Ki Bina Par Oo'nt Ko Masjid Me'n Daakhil Karna (Kaisa Hai) Phir Imaam Bukhaari Farmaate Hai'n Ke, Aur Hazrat Ibne Abbaas Radiallahu Anhuma Ne Bayaan Kiya Ke Nabi e Kareem ﷺ Ne Oo'nt Par Sawaar Hokar Tawaaf Kiya, (Phir Imaam Bukhaari Ne Yeh Hadees Naql Ki Ke) Hazrat Umme Salma Radiallahu Anha Bayaan Karti Hai'n Ke, Mai'n Ne Rasoolullah ﷺ Se Shikaayat Ki Ke Mai'n Beemaar Hoo'n, To Nabi e Kareem ﷺ Ne Irshaad Farmaaya, Tum Logo'n Ke Peechhe Sawaari Par Baith Kar Tawaaf Karo, Pas Mai'n Ne Tawaaf Kiya, Aur Rasoolullah ﷺ Baitullah Ke Pehlu Me'n Namaaz Padh Rahe The Aur Aap Yeh Tilaawat Kar Rahe The "Wattoor, Wa Kitaabim Mastoor, (Sureh Toor, Aayat No.1/2)
Hazrat Anas Radiallahu Anhu Ne Hadees Bayaan Ki Ke, Nabi e Kareem ﷺ Ke As'haab Me'n Se 2 Shakhs Nabi e Kareem ﷺ Ke Paas Se Andheri Raat Me'n Nikle Aur Unke Saath 2 Chiraago'n Ki Misl Koi 2 Cheeze'n Thee'n, Jo Unke Aage Roshni Kar Rahi Thee'n, Jab Woh Juda Huwe To Unme'n Se Har Ek Ke Saath Woh Cheez Thi, Hatta Ke Woh Apne Apne Ghar Paho'nch Gaye. (Iss Hadees Paak Se Auliya Allah Ki Karaamaat Ka Saboot Waazeh Taur Par Milta Hai ; )
Hazrat Abu Sa'eed Khudri Radiallahu Anhu Ne Bayaan Kiya Ke, Nabi e Kareem ﷺ Ne Khutba Diya, Pas Aapne Farmaaya, Allah Ta'ala Ne Ek Bande Ko Duniya Ke Darmiyaan Aur Jo Allah Ke Paas Hai Uske Darmiyaan Ikhtiyaar Diya, Pas Uss Bande Ne Usko Ikhtiyaar Kar Liya Jo Allah Ta'ala Ke Paas Hai, So Hazrat Abu Bakar Radiallahu Anhu Rone Lage To Mai'n Ne Apne Dil Me'n Kaha, Uss Boodhe Ko Kya Cheez Rula Rahi Hai, Agar Allah Ne Ek Bande Ko Duniya Ke Darmiyaan Aur Jo Allah Ke Paas Hai Usme'n Ikhtiyaar Diya Hai Aur Uss Bande Ne Usko Ikhtiyaar Kar Liya Jo Allah Ke Paas Hai? Pas Rasoolullah ﷺ Hi Woh Bande The, Aur Hazrat Abu Bakar Radiallahu Anhu Hum Sabse Zyaadah Ilm Waale The, Aapne Farmaaya, Aye Abu Bakar ! Tum Mat Ro'wo, Beshak Logo'n Me'n Se Zyaadah Apni Rafaaqat Me'n Mujh Par Ahsaan Karne Waale Tum Ho, Aur Agar Mai'n Apni Ummat Me'n Se Kisi Ko Khaleel Banaata To Mai'n Abu Bakar Ko Khaleel Banaata, Lekin Islaam Ke Ae'tebaar Se Bhaai Hone Ka Rishta Aur Dosti Apni Jagah Qaayem Hai, Masjid Me'n Koi Darwaazah Baaqi Nahee'n Rakha Jaayega Magar Usko Band Kar Diya Jaayega Siwaaye Abu Bakar Ke Darwaazeh Ke. (Iss Hadees Me'n Hazrat Abu Bakar Siddique Radiallahu Anhu Ki Badi Fazeelat Ka Bayaan Maujood Hai Ke Sahaaba e Kiraam Radiallahu Anhum Ajma'een Aapko Apne Se Bada Aa'lim Maante The Aur Rasoolullah ﷺ Aapko Apna Khaleel Banaate Agar Ijaazat Hoti Aur Aap Ke Naam Ka Darwaazah Masjid Me'n Baaqi Rakha Gaya Wagairah)
Hazrat Ibne Abbaas Radiallahu Anhuma Bayaan Karte Hai'n Ke, Jis Marz Me'n Rasoolullah ﷺ Faut Ho Gaye The, Aap Uss Marz Me'n Sar Par Patti Baa'ndhe Huwe Ghar Se Nikle, Phir Aap ﷺ Mimbar Par Baith Gaye Aur Allah Ta'ala Ki Hamd Wa Sana Ki, Phir Farmaaya, Logo'n Me'n Koi Aisa Nahee'n Hai Jisne Abu Bakar Bin Abi Qahaaza Se Zyaadah Apni Jaan Aur Maal Ke Saath Mujh Par Ahsaan Kiya Ho, Aur Agar Mai'n Logo'n Me'n Se Kisi Ko Khaleel Banaata To Abu Bakar Ko Khaleel Banaata, Lekin Islaam Ki Dosti Afzal Hai, (Phir Farmaaya) Iss Masjid (Nabawi) Me'n Khulne Waale Har Darwaazeh Ko Band Kardo Siwaaye Abu Bakar Ke Darwaazeh Ke.
Yeh Baab Hai Iss Muta'alliq Ke, Ka'ba Aur Masaajid Ke Darwaaze Aur Unme'n Taala Lagaana (Kaisa Hai?) Phir Imaam Bukhaari Farmaate Hai'n Ke, Mujhse Abdullah Bin Mohammad Ne Kaha, Ke Hume'n Sufyaan Ne Hadees Bayaan Ki, Az Ibne Juraij, Unho'n Ne Kaha Ke, Mujhse Ibne Abi Mulaika Ne Kaha, Aye Abdul Malik ! Kaash Tum Hazrat Ibne Abbaas Radiallahu Anhuma Ki Masaajid Aur Unke Darwaazo'n Ko Dekhte, (Phir Imaam Bukhaari Yeh Hadees Naql Karte Hai'n Ke) Riwaayat Hai Hazrat Ibne Umar Radiallahu Anhuma Se Ke, Nabi e Kareem ﷺ (Jab) Makkah Aaye (To) Aapne Hazrat Usmaan Bin Talha Radiallahu Anhuma Ko Bulaaya, Phir (Ka'be Ka) Darwaazah Khola Phir Nabi e Kareem ﷺ Aur Hazrat Bilaal Radiallahu Anhu Aur Hazrat Usaama Bin Zaid Radiallahu Anhu Aur Hazrat Usmaan Bin Talha Radiallahu Anhu Ka'be Ke Andar Daakhil Huwe, Phir Ka'be Ka Darwaazah Band Kar Diya Gaya, Nabi e Kareem ﷺ Ka'be Ke Andar Kuchh Saa'at Thehre, Phir Sab Nikal Aaye, Hazrat Ibne Umar Radiallahu Anhuma Ne Kaha, Mai'n Ne Sabqat Ki Aur Hazrat Bilaal Radiallahu Anhu Se Poochha To Unho'n Ne Bataaya Ke, Nabi e Kareem ﷺ Ne Ka'ba Shareef Ke Andar Namaaz Padhi Hai, Mai'n Ne Poochha, Kis Jagah? To Unho'n Ne Bataaya, 2 Sutoono'n Ke Darmiyaan, Hazrat Ibne Umar Radiallahu Anhuma Ne Kaha, Mujhe Yeh Khayaal Nahee'n Raha Ke Mai'n Yeh Poochhta Ke Aapne Kitni Rak'at Namaaz Padhi Thi.
Hazrat Abu Hurairah Radiallahu Anhu Bayaan Karte Hai'n Ke, Rasoolullah ﷺ Ne Ghode Sawaaro'n Ka Ek Dasta Najd Ki Taraf Bheja, Woh Banu Haneefa Ke Ek Shakhs Ko Giraftaar Karke Le Aaye, Jiska Naam Sumaama Bin Usaal Tha, Unho'n Ne Usko Masjid Ke Sutoono'n Me'n Se Ek Sutoon Ke Saath Baa'ndh Diya.
Hazrat Saa'ib Bin Yazeed Radiallahu Anhu Ne Kaha, Mai'n Masjid Me'n Khada Huwa Tha To Mujhe Ek Shakhs Ne Ka'nkar Maara, Mai'n Ne Dekha To Woh Hazrat Umar Bin Khattaab Radiallahu Anhu The, Unho'n Ne Farmaaya, Jaao ! Un 2 Aadmiyo'n Ko Bula Kar Laao, Mai'n Un Dono'n Ko Le Aaya, Hazrat Umar Radiallahu Anhu Ne Poochha, Tum Kaun Ho Ya Kahaa'n Se Aaye Ho? Un Dono'n Ne Kaha, Hum Taayef Ke Rehne Waale Hai'n, Hazrat Umar Radiallahu Anhu Ne Kaha, Agar Tum Uss Shaher Ke Rehne Waale Hote To Mai'n Tumko Dardnaak Saza Deta, Tum Rasoolullah ﷺ Ki Masjid Me'n Aawaaz Buland Kar Rahe The. (Iss Hadees Se Ma'loom Huwa Ke Masaajid Me'n Fuzool Baate'n Nahee'n Karni Chaahiye Na Zor Zor Se Chillaana Chaahiye Be Matlab Me'n)
Hazrat Ka'ab Bin Maalik Radiallahu Anhu Ne Khabar Di Ke, Unho'n Ne Hazrat Ibne Abi Hadrad Radiallahu Anhu Se Rasoolullah ﷺ Ke Zamaane Me'n Masjid Ke Andar Apne Qarz Ka Taqaaza Kiya, Phir Dono'n Ki Aawaaze'n Buland Ho Gayee'n Hatta Ke Rasoolullah ﷺ Ne Un Aawaazo'n Ko Apne Ghar Se Sun Liya To Rasoolullah ﷺ Un Dono'n Ki Taraf Nikle, Hatta Ke Aapne Apne Hujre Ka Pardah Khola Aur Aapne Aawaaz Di, Aye Ka'ab Bin Maalik Radiallahu Anhu ! Unho'n Ne Kaha, Mai'n Haazir Hoo'n Ya Rasoolallah ﷺ ! Aapne Haath Se Ishaarah Kiya Ke Tum Apna Aadha Qarz Kam Kardo, Hazrat Ka'ab Radiallahu Anhu Ne Kaha, Ya Rasoolallah ﷺ ! Mai'n Ne Kar Diya, Rasoolullah ﷺ Ne (Hazrat Ibne Abi Hadrad Radiallahu Anhu Se) Farmaaya Utho, Ab Qarz Ada Kardo.
Hazrat Ibne Umar Radiallahu Anhu Woh Bayaan Karte Hai'n Ke Ek Shakhs Ne Nabi e Kareem ﷺ Se Sawaal Kiya, Uss Waqt Aap ﷺ Mimbar Par The (Usne Kaha) Raat Ki Namaaz Ke Muta'alliq Aapka Kya Hukm Hai? Aap ﷺ Ne Farmaaya, Do Do Rak'at Namaaz Padho, Phir Jab Tumko Subah Hone Ka Khauf Ho To (Aakhri 3 Rak'at Ke Saath) Ek Rak'at Mila Lo To Tamaam Namaaz Witr Ho Jaayegi, Aur Hazrat Ibne Umar Radiallahu Anhu Yeh Kehte The Ke Tum Apni Aakhri Namaaz Witr Padho, Kyu'nke Nabi e Kareem ﷺ Ne Iska Hukm Diya Hai. (Yaad Rahe Witr Ki Namaaz 3 Rak'at Hadees Se Saabit Hai Iske Liye Bukhaari Shareef Hadees No.1147 Padhe'n)
Hazrat Ibne Umar Radiallahu Anhu Se Riwaayat Hai Ke Ek Shakhs Nabi e Kareem ﷺ Ke Paas Aaya Aur Uss Waqt Aap ﷺ Khutba De Rahe The, Usne Poochha, Raat Ki Namaaz Kis Tarah Hai? Aap ﷺ Ne Farmaaya, Do Do Rak'at, Pas Jab Tumhe'n Subah Hone Ka Khauf Ho To (Aakhri 2 Rak'at Ke Saath) Ek Rak'at Padhlo Yeh Tumhaari Tamaam Padhi Huwi Rak'aat Ko Witr (Taaq) Kardegi, Waleed Bin Kaseer Ne Kaha, Mujhe Ubaidullah Bin Abdullah Ne Hadees Bayaan Ki Ke Hazrat Ibne Umar Radiallahu Anhu Ne Unko Hadees Bayaan Ki Ke Ek Shakhs Ne Nabi e Kareem ﷺ Ko Pukaara Aur Uss Waqt Aap ﷺ Masjid Me'n The.
Hazrat Abu Waaqid Laisi Radiallahu Anhu Ne Bayaan Kiya Ke Rasoolullah ﷺ Masjid Me'n Tashreef Farma The Ke 3 Shakhs Aaye, 2 To Rasoolullah ﷺ Ki Taraf Badh Gaye Aur Ek Chala Gaya, Un 2 Me'n Se Ek Shakhs Ne Majlis Me'n Kushaadgi Dekhi To Woh Wahaa'n Baith Gaya Aur Doosra Logo'n Ke Peechhe Baith Gaya Aur Teesra Peeth Mod Kar Chala Gaya, Jab Rasoolullah ﷺ Apni Baat Se Faarig Ho Gaye To Aapne Farmaaya, Kya Mai'n Tumko Un 3 Aadmiyo'n Ki Khabar Na Doo'n? Raha Unme'n Se Ek Shakhs To Usne Allah Ki Taraf Panaah Li To Allah Ne Usko Panaah De Di, Raha Doosra Shakhs To Usne Allah Se Haya Ki To Allah Bhi Usse Haya Farmaaye (Ya'ni Usko Azaab Nahee'n Dega) Raha Teesra To Usne Ae'raaz Kiya So Allah Bhi Usse Ae'raaz Farmaayega.
Hazrat Abbaad Bin Tameem Ibne A'mm Se Khud Bayaan Karte Hai'n Ke, Unho'n Ne Rasoolullah ﷺ Ko Masjid Me'n Chit Lete Huwe Dekha Aapne Apni Taa'ng Doosri Taa'ng Ke Upar Rakhi Huwi Thi, Az Ibne Shihaab Az Sa'eed Bin Musayyab Unho'n Ne Kaha Ke Hazrat Umar Radiallahu Anhu Aur Hazrat Usmaan Radiallahu Anhu Iss Tarah Karte The, (Ya'ni Masjid Me'n Ek Taa'ng Par Doosri Taa'ng Rakh Kar Chit Sote The)
Yeh Baab Hai Iss Muta'alliq Ke, Logo'n Ke Zarar Ke Bagair Raaste Me'n Masjid Ka Hona (Kaisa Hai?) Phir Imaam Bukhaari Farmaate Hai'n Ke, Aur Hasan Basri, Ayyub Aur Maalik Ka Yehi Qaul Hai, (Ke Jaa'iz Hai) Phir Imaam Bukhaari Yeh Hadees Naql Karte Hai'n Ke, Hazrat Aa'yesha Radiallahu Anha Zauja Nabi e Kareem ﷺ Bayaan Karti Hai'n Ke, Mai'n Ne Uss Waqt Hosh Sambhaala Tha, Jab Mere Waalidain Deen Ke Ahkaam Par Amal Karte The Aur Har Roz Din Ki Dono'n Tarfo'n Me'n (Subah Wa Shaam Me'n) Humaare Paas Rasoolullah ﷺ Tashreef Laate The, Phir Hazrat Abu Bakar Radiallahu Anhu Ko Khayaal Aaya Ke Woh Apne Ghar Ke Sahen Me'n Masjid Bana Le'n, Phir Woh Uss Masjid Me'n Namaaz Padhte The Aur (Buland Aawaaz Se) Qur'aan Majeed Padhte The, Mushrikeen Ke Bete Aur Unki Aurte'n Sab Usko Sunte Aur Uspar Ta'ajjub Karte The Aur Hazrat Abu Bakar Radiallahu Anhu Ki Taraf Dekhte The Aur Hazrat Abu Bakar Radiallahu Anhu Pursoz Aur Dil Gudaaz Tabi'yat Ke Maalik The, Jab Woh Qur'aan Padhte To Unki Aa'nkhe'n Be Qaabu Ho Jaatee'n Thee'n Aur Woh Aa'nsu Bahaate, Quresh Ke Sardaar Uss Manzar Se Bahut Ghabra Gaye, (Ke Kahee'n Log Unki Wajah Se Musalmaan Na Ho Jaaye'n)
Yeh Baab Hai, Baazaar Ki Masjid Me'n Namaaz Padhne Ke Muta'alliq, Phir Imaam Bukhaari Farmaate Hai'n Ke, Aur Ibne Aun Ne Ghar Ki Masjid Me'n Namaaz Padhi Jiska Darwaazah Logo'n Par Band Kiya Huwa Tha, (Phir Imaam Bukhaari Yeh Hadees Naql Karte Hai'n Ke) Hazrat Abu Hurairah Radiallahu Anhu Rasoolullah ﷺ Se Riwaayat Karte Hai'n Ke, Rasoolullah ﷺ Ne Irshaad Farmaaya, Jama'at Ke Saath Namaaz Kisi Shakhs Ki Apne Ghar Ya Bazar Me Ada Ki Gai Namaaz Se 25 Darja Zyaadah Hoti Hai, Pas Jab Tum Me'n Se Koi Shakhs Umdah Tareeqe Se Wazu Kare Aur Masjid Me'n Aaye Aur Uska Sirf Namaaz Padhne Ka Iraadah Ho To Uske Har Qadam Par Allah Ta'ala Uska Ek Darja Buland Farmaata Hai Aur Uske Ek Gunaah Ko Mita Deta Hai, Hatta Ke Woh Masjid Me'n Daakhil Ho Jaaye, Aur Jab Woh Masjid Me'n Daakhil Ho To Jab Tak Woh Namaaz Ki Wajah Se Masjid Me'n Thehra Rehta Hai Uska Namaaz Me'n Hi Shumaar Hota Hai, Aur Farishte Uske Liye Du'aaye'n Karte Rehte Hai'n, Aye Allah Iski Magferat Farma, Aye Allah Ispar Rahem Farma, Jab Tak Woh Wazu Na Tode.
Hazrat Ibne Umar Radiallahu Anhuma Ya Ibne Amr Radiallahu Anhuma Ne Bayaan Kiya Ke, Nabi e Kareem ﷺ Ne Apni U'ngliyo'n Me'n U'ngliyaa'n Daali. (Iss Hadees Ko Samajhne Keliye Pehle Mukammal Baat Samaa'at Kare'n, Umdatul Qaari Sharah Bukhaari, Jild No.4, Safha No.382 Aur Masnad e Ahmad, Jild No.2, Safha No.162 Me'n Hai Ke, Hazrat Abdullah Bin Umar Radiallahu Anhuma Bayaan Karte Hai'n Ke Rasoolullah ﷺ Ne Irshaad Farmaaya, Ya Abdullah Bin Amr ! Uss Waqt Tumhaara Kya Haal Hoga Jab Tum Logo'n Ke Tilchhat Me'n (Chhata Huwa Mail Me'n) Iss Tarah Reh Jaaoge Aur Nabi e Kareem ﷺ Ne U'ngliyaa'n U'ngliyo'n Me'n Daalee'n (Matlab Jaise U'ngliyaa'n U'ngliyo'n Me'n Mil Jaaye To Ma'loom Nahee'n Hota Ke Kaunsi U'ngli Kidhar Hai) Unke Wa'de Aur Amaanate'n Khalat Malat Ho Jaaye'ngi, Phir Woh Is Tarah Ho Jaaye'nge, Phir Aapne Apni U'ngliyaa'n U'ngliyo'n Me'n Daalee'n (Ya'ni Wa'de Poore Nahee'n Kare'nge Balke Idhar Udhar Karke Wa'do'n Me'n Bhi Khalat Malat Kare'nge Aur Amaanate'n Barbaad Kare'nge Uski Misaal Bhi U'ngliyo'n Ki Tarah Ek Doosre Se Mil Kar Khalat Malat Ho Jaaye'nge Se Di Nabi e Kareem ﷺ Ne) Hazrat Abdullah Bin Amr Ne Poochha, Ya Rasoolallah ﷺ ! Mai'n Uss Waqt Kya Karu'nga? Aap ﷺ Ne Farmaaya, Jo Nek Baat Ho Uss Par Amal Karna Aur Jo Buri Baat Ho Usko Chhod Dena, Ya'ni Apne Khaas Logo'n Ki Taraf Aana (Ya'ni Jis Par Mukammal Itmenaan Ho Unki Baat Maanna Aur Aa'm Logo'n Ko Chhod Dena, Ya'ni Unki Baato'n Par Bharosa Na Karna Aise Daur Me'n. (Tilchhat Ka Matlab Yeh Hai Ke, Kisi Cheez Ka Asal Maal Nikaalne Ke Ba'ad Uske Raddi Ajza Jo Baaqi Reh Jaate Hai'n Usko Arbi Me'n Hisaala Aur Urdu Me'n Usko Tilchhat Kehte Hai'n, Jaise Baadaam Ya Sarso'n Ka Tel Nikaalne Ke Ba'ad Phook Baaqi Reh Jaata Hai, Ya Jaise Aata Chhaanne Ke Ba'ad Bhoosi Reh Jaati Hai, Hadees Shareef Se Bataana Maqsood Yeh Hai Ke, Jab Nek Logo'n Ke Uthh Jaane Ke Ba'ad Ghatiya Aur Raddi Qism Ke Log Reh Jaaye'nge Aur Ulama Ke Uth Jaane Ke Ba'ad Jaahil Log Reh Jaaye'nge, Uss Waqt Tumhaara Kya Haal Hoga? Aur Uss Waqt Haalat Yeh Hogi Ke Tum Un Jaahilo'n Aur Ghatiya Logo'n Ke Saath Khalat Malat Ghuttam Ghutta Ghul Mil Jaaoge Jis Tarah U'ngliyaa'n U'ngliyo'n Me'n Mil Jaati Hai'n, Aur Un Badkaar Raddi Logo'n Ki Haalat Yeh Hogi Ke Woh Apne Wa'do'n Ko Khalat Malat Kar De'nge Aur Amaanato'n Ko Barbaad Kar De'nge.
Hazrat Abdullah Bin Amr Radiallahu Anhuma Ne Bayaan Kiya Ke Rasoolullah ﷺ Ne Irshaad Farmaaya, Aye Abdullah Bin Amr ! Uss Waqt Tumhaara Kya Haal Hoga Jab Tum Logo'n Ke Tilchhat Me'n Iss Tarah Baaqi Reh Jaaoge (Phir Aapne Apni U'ngliyaa'n U'ngliyo'n Me'n Daalee'n) (Iss Hadees Ko Samajhne Keliye Bukhaari Shareef Ki Hadees No.478+479 Padhe'n)
Hazrat Abu Moosa Radiallahu Anhu Se Riwaayat Hai Ke Rasoolullah ﷺ Ne Irshaad Farmaaya, Beshak Momin Bunyaad Ki Tarah Hai, Woh Ek Doosre Ke Saath Jud Kar Mazboot Hote Hai'n Aur Nabi e Kareem ﷺ Ne Apni U'ngliyo'n Ko U'ngliyo'n Me'n Daala. (Iss Hadees Shareef Se Ma'loom Huwa Ke Musalmaan Ek Bunyaad Ki Tarah Hai'n Ya'ni Ek Doosre Ke Saath Ta'awun Karne Me'n Ek Bunyaad Ki Tarah Hai, Matlab Yeh Ke Musalmaano'n Ko Ek Doosre Ke Saath Iss Tarah Jud Kar Rehna Chaahiye Jis Tarah Ek Bunyaad Aur Deewaar Ki Ee'nte'n Ek Doosre Ke Saath Judi Hoti Hai'n Jab Hum Aisa Kare'nge Phir Humaari Taaqat Apne Urooj Wa Shabaab Par Hogi, To Ma'loom Huwa Ke Hume'n Ek Doosre Ka Support Karna Chaahiye Lekin Yaad Rahe Jaa'iz Kaamo'n Me'n Ek Doosre Ke Saath Ta'awun Karna Hai Ya'ni Unke Saath Jude Rehna Na Jaa'iz Kaamo'n Me'n Nahee'n, Iss Hadees Shareef Se Hume'n Yeh Sabaq Bhi Milta Hai Ke, Jis Tarah Hum Apne Ghar Ko Mazboot Banaana Chaahte Hai'n To Deewaaro'n Ko Ek Doosri Deewaaro'n Ke Saath Jodte Hai'n Tab Jaakar Ghar Mazboot Banta Hai Usi Tarah Agar Hum Apne Samaaj Ko Mazboot Banaana Chaahte Hai'n To Samaaj Me'n Rehne Waale Saare Logo'n Ko Jud Kar Rehna Hoga Agar Hum Apni Tanzeem Ko Mazboot Banaana Chaahte Hai'n To Tanzeem Ke Saare Logo'n Ko Jud Kar Rehna Hoga Isi Tarah Agar Hum Apne Apne Maslak Ko Mazboot Banaana Chaahte Hai'n To Maslak Ke Saare Logo'n Ko Jud Kar Rehna Hoga Isi Tarah Agar Hum Apne Mulk Ko Mazboot Karna Chaahte Hai'n To Mulk Ke Saare Logo'n Ko Jud Kar Rehna Hoga)
Hazrat Ibne Seereen Rehmatullah Alaih Riwaayat Karte Hai'n Hazrat Abu Hurairah Radiallahu Anhu Se Ke Unho'n Ne Bayaan Kiya Ke, Rasoolullah ﷺ Ne Hume'n Zohar Aur Asar Ki Namaazo'n Me'n Se Koi Ek Namaaz Padhaayi, Ibne Seereen Rehmatullah Alaih Ne Kaha, Hazrat Abu Hurairah Radiallahu Anhu Ne Uss Namaaz Ka Naam Liya Tha Lekin Mai'n Bhool Gaya, Unho'n Ne Kaha, Nabi e Kareem ﷺ Ne Hume'n 2 Rak'at Namaaz Padha Kar Salaam Pher Diya, Masjid Me'n Lakdi Ka Ek Sutoon Tha, Aap Uspar Tek Laga Kar Khade Ho Gaye, Goya Ke Aap Gusse Me'n The, Aapne Apna Daayaa'n Haath Baaye'n Haath Par Rakha Aur U'ngliyo'n Me'n U'ngliyaa'n Daalee'n Aur Apna Daayaa'n Rukhsaar Baaye'n Hatheli Par Rakha, Aur Log Tezi Ke Saath Chalte Huwe Masjid Ke Darwaaze Se Nikal Gaye, Phir Woh Keh Rahe The Ke Namaaz Ki Miqdaar Kam Ho Gayi (Kya)? Logo'n Me'n Hazrat Abu Bakar Radiallahu Anhu Aur Hazrat Umar Radiallahu Anhu Bhi The Woh Aapse Baat Karne Me'n Dare Aur Logo'n Me'n Lambe Haatho'n Waala Ek Shakhs Tha Usko Zul Yadain Kehte The Usne Kaha, Ya Rasoolallah ﷺ Aap (Namaaz Me'n) Bhool Gaye Hai'n Ya Namaaz Ki Miqdaar Kam Ho Gayi Hai? Aap ﷺ Ne Farmaaya, Na Mai'n Bhoola Hoo'n Na Namaaz Ki Miqdaar Kam Huwi Hai, Phir Aapne Farmaaya, Kya Isi Tarah Huwa Hai (Ya'ni Kya Waaqayi Namaaz Me'n Bhool Huwi Hai?) Jis Tarah Zul Yadain Ne Kaha Hai? Logo'n Ne Kaha Ji Haa'n ! Phir Aap ﷺ Aage Badhe Aur Jitni Namaaz Tark Ki Thi Woh Padha Di, Phir Aapne Salaam Phera, Phir Allahu Akbar Kaha Aur Pehle Ki Tarah Ya Usse Lamba Sajdah Kiya Phir Sajde Se Sar Uthaaya Aur Allahu Akbar Kaha, Phir Allahu Akbar Kaha Aur Pehle Ki Tarah Ya Usse Lamba Sajdah Kiya, Phir Aapne Sar Uthaaya Aur Allahu Akbar Kaha, Pas Ba'az Auqaat Log Ibne Seereen Rehmatullah Alaih Se Sawaal Karte, Aaya Phir Salaam Aapne Pher Diya (Ya Pehle Salaam Par Iktefa Kiya) Ibne Seereen Rehmatullah Alaih Ne Kaha, Mujhe Yeh Khabar Di Gayi Hai Ke Hazrat Imraan Bin Husain Ne Kaha, Phir Aapne Salaam Pher Diya Tha. (Iss Hadees Me'n Nabi e Kareem ﷺ Se Sahu Waaqe Huwa Isko Samajhne Keliye Yeh Hadees Kaafi Hai, Imaam Maalik Rehmatullah Bayaan Karte Hai'n Ke Unhe'n Yeh Hadees Paho'nchi Hai Ke Rasoolullah ﷺ Ne Irshaad Farmaaya, Beshak Mai'n Zaroor Bhoolta Hoo'n Ya Bhula Diya Jaata Hoo'n Taake Mai'n Kisi Amal Ko Sunnat Bana Doo'n, (Mo'ta Imaam Maalik, Kitaabul Sahu, Hadees No.2)
Hazrat Moosa Bin Uqba Ne Hadees Bayaan Ki Unho'n Ne Kaha Ke, Mai'n Ne Saalim Bin Abdullah (Hazrat Umar Radiallahu Anhu Ke Pote) Ko Dekha Ke Woh Raaste Me'n (Kuchh Khaas) Jagho'n Ko Talaash Kar Rahe The Taake Unme'n Namaaz Padhe'n Aur Woh Hadees Bayaan Karte Hai'n Ke Unke Waalid (Hazrat Abdullah Bin Umar Radiallahu Anhuma) Un (Khaas) Jagho'n Me'n Namaaz Padhte The, Beshak Jin Jagho'n Par Unho'n Ne Nabi e Kareem ﷺ Ko Namaaz Padhte Dekha Tha, Woh Kehte The, Mujhe Naaf'e Ne Hadees Bayaan Ki Az Hazrat Ibne Umar Radiallahu Anhuma Ke Woh Un Jagho'n Me'n Namaaz Padhte The Aur Mai'n Ne Saalim (Bin Abdullah Bin Umar Radiallahu Anhum) Se Sawaal Kiya To Unho'n Ne Un Tamaam Jagho'n Me'n Naaf'e Ki Muwaafeqat Ki, Magar Un Dono'n Ka Sharafil Roaha Ki Masjid Me'n Ikhtelaaf Tha. (Iss Hadees Shareef Se Waazeh Ho Gaya Ke Hazrat Abdullah Bin Umar Radiallahu Anhuma Un Jagho'n Se Barkat Haasil Karne Keliye Namaaz Padhte The Warna Namaaz To Kisi Bhi Jagah Padhi Ja Sakti Hai Phir Unhee'n Jagho'n Ko Talaash Karne Ka Kya Matlab Jahaa'n Nabi e Kareem ﷺ Ne Namaaz Padhi Thi? Matlab Saaf Hai Ke Jis Jagah Nabi e Kareem ﷺ Ne Namaaz Padhli Woh Jagah Barkat Waali Ho Jaati Hai Tabhi Doosre Sahaaba e Kiraam Radiallahu Anhum Ajma'een Apne Ghar Nabi e Kareem ﷺ Ko Bula Kar Ghar Ke Kisi Kone Par Rasoolullah ﷺ Se Namaaz Padhne Ki Ilteja Karte The Aur Nabi e Kareem ﷺ Ghar Ke Jis Kone Me'n Namaaz Padh Lete The Sahaaba e Kiraam Usi Jagah Ko Namaaz Keliye Khaas Kar Dete The, (Jaisa Ke Isi Bukhaari Me'n Iss Muta'alliq Hadees Guzri Hai Aur Woh Yeh Hai Ke Hazrat Itbaan Bin Maalik Radiallahu Anhu Bayaan Karte Hai'n Ke, Nabi e Kareem ﷺ Unke Ghar Me'n Aaye, Pas Aapne Farmaaya, Tum Apne Ghar Me'n Kis Jagah Chaahte Ho Ke Mai'n Wahaa'n Tumhaare Liye Namaaz Padhaau'n, Hazrat Itbaan Radiallahu Anhu Ne Kaha, Pas Mai'n Ne Ek Jagah Ki Taraf Ishaarah Kiya To Nabi e Kareem ﷺ Ne Takbeer Padhi, Pas Humne Aapke Peechhe Saf Banaayi, So Aapne 2 Rak'at Namaaz Padhaayi)
Hazrat Abdullah Bin Umar Radiallahu Anhuma Ne Khabar Di Ke Rasoolullah ﷺ Jab Umrah Karte Ya Haj Par Jate To Aap Zul Hulaifa Me'n Babool Ke Darakht Ke Neeche Qayam Farmate The, Uss Masjid Ki Jagah Me'n Jo Zul Hulaifa Me'n Hai Aur Jab Aap Kisi Gazwah Se Laut'te Aur Raaste Me'n Zul Hulaifa Se Hokar Guzarte Ya Hajj Ya Umrah Se Waapsi Ho Rahi Hoti To Waadi Aqeeq Ke Nasheni Ilaaqe Me'n Utarte, Phir Jab Waadi Ke Nasheb Se Upar Aate To Waadi Ke Baalaayi Kinaare Bat'ha Ke Uss Mashriqi Hisse Par Oo'ntni Bithaate Jahaa'n Ka'nkariyo'n Aur Ret Ka Kushaadah Naala Hai, Yahaaa'n Aap Raat Ke Aakhri Hisse Se Subah Tak Aaraam Farmaate, Uss Waqt Aap Uss Masjid Ke Qareeb Nahee'n Hote The Jo Pat'tharo'n Ki Hai, Aur Aap Uss Teele Par Bhi Nahee'n Hote The Jis Par Masjid Bani Huwi Hai, Wahaa'n Ek Gehra Naala Hai, Hazrat Abdullah (Bin Umar Radiallahu Anhuma) Wahee'n Namaaz Padhte The, Ka'nkariyo'n Aur Ret Ke Kushaadah Naale Ki Taraf, Sailaab Ne Uss Jagah Ke Aasaar Wa Nishaanaat Ko Mita Diya, Jahaa'n Hazrat Abdullah Bin Umar Radiallahu Anhuma Namaaz Padha Karte The. (Iss Hadees Me'n Zul Hulaifa Ka Lafz Hai, Yeh Jagah Ahle Madeena Ka Meeqaat Hai, Yeh Madeena e Munawwarah Se 4 Meel Ke Faasle Par Hai Aur Makkah Se 198 Meel Ke Faasle Par Hai, Usme'n Ek Jagah, Bat'ha Ka Lafz hai Iska Matlab Hai Woh Zameen Jis Par Ret Aur Bijri Phaili Huwi Ho, Iss Hadees Se Bhi Saabit Huwa Ke Sahaaba e Kiraam Radiallahu Anhum Ajma'een Un Jagho'n Ko Barkat Waala Samajhte The Jin Jagho'n Par Nabi e Kareem ﷺ Ne Namaaz Ada Ki Hai'n)
Hazrat Abdullah Bin Umar Radiallahu Anhuma Ne Bayaan Kiya Ke Nabi e Kareem ﷺ Ne Uss Jagah Namaaz Padhi, Jahaa'n Ab Sharfur Roaha Waali Masjid Ke Qareeb Ek Chhoti Si Masjid Hai Aur Hazrat Abdullah Bin Umar Radiallahu Anhuma Uss Jagah Ki Alaamat Bataate The Jahaa'n Nabi e Kareem ﷺ Ne Namaaz Padhi Thi Woh Kehte The Ke Yahaa'n Tumhaari Daaye'n Jaanib Jab Tum Masjid Me'n (Qibla Ki Taraf) Namaaz Padhne Keliye Khade Hote Ho, Jab Tum Madeena Se Makkah Jaao To Yeh Chhoti Masjid Raaste Ke Daaye'n Jaanib Padti Hai, Uske Aur Badi Masjid Ke Darmiyaan Pat'thar Phe'nkne Ki Miqdaar Ya Usi Ke Qareeb Qareeb Faasla Hai. (Iss Hadees Se Bhi Saabit Huwa Ke Sahaaba e Kiraam Un Jagho'n Ko Yaad Bhi Rakha Karte The Jahaa'n Nabi e Kareem ﷺ Ne Namaaz Padhi Hai)
Aur Hazrat Abdullah Bin Umar Radiallahu Anhuma Sharfur Roaha Se Waapsi Me'n Chhoti Pahaadi Par Namaaz Padhte The, Uska Kinaarah Uss Raaste Par Khatam Hota Hai Jo Masjid Se Qareeb Hai, Aur Masjid Aur Sharfur Roaha Ke Aakhri Hisse Ke Darmiyaan Makka Jaate Huwe, Ab Wahaa'n Ek Masjid Ban Gayi Hai, Hazrat Abdullah Bin Umar Radiallahu Anhuma Uss Masjid Me'n Namaaz Nahee'n Padhte The Balke Usko Apni Baaye'n Jaanib Aur Apne Peechhe Chhod Dete The Aur Uske Aakhri Me'n Uss Chhoti Pahaadi Par Namaaz Padhte The, Hazrat Ibne Umar Radiallahu Anhuma Sharfur Roaha Se Rawaana Hote To Uss Waqt Tak Zohar Ki Namaaz Nahee'n Padhte The Jab Tak Uss Jagah Na Paho'nch Jaaye'n Aur Yahaa'n Paho'nchne Ke Ba'ad Zohar Ki Namaaz Padhte The Aur Agar Woh Makka Se Aate Huwe Subah Saadiq Se Kuchh Pehle Ya Sehri Ke Aakhir Me'n Wahaa'n Se Guzarte To Fajr Ki Namaaz Tak Wahee'n Aaraam Karte Phir Wahaa'n Fajr Ki Namaaz Padhte. (Zara Tawajjoh Kare'n Ke Masjid Me'n Namaaz Na Padh Kar Uss Pahaadi Par Namaaz Sahaabi e Rasool Padhte Hai'n Jahaa'n Rasoolullah ﷺ Ne Kabhi Namaaz Padhi Thi Aur Uss Jagah Aaraam Farmaate Hai'n Jahaa'n Kabhi Rasoolullah ﷺ Ne Aaraam Kiya Tha, Ma'loom Huwa Yeh Sab Barkat Haasil Karne Ki Garaz Se Kiya Jaata Tha)
Aur Hazrat Abdullah Bin Umar Radiallahu Anhuma Ne Unko (Naaf'e Ko) Hadees Bayaan Ki Ke Nabi e Kareem ﷺ Ek Bahot Ghane Darakht Ke Qareeb Utarte Jo Ruwaisa Ki Basti Ke Qareeb Hai Raaste Ki Daaye'n Jaanib Aur Raaste Ke Saamne Narm Aur Wasi Jagah Me'n Hatta Ke Ruwaisa Se 2 Meel Ke Qareeb Jo Teela Hai Usse Guzar Jaate Uss Darakht Ka Upari Hissa Toot Gaya Hai Aur Darmiyaan Se Mud Gaya Hai Woh Ek Jad Par Khada Huwa Hai Aur Uski Jad Me'n Bahot Se Teele Hai'n. (Gaur Kare'n Sahaaba e Kiraam Kis Andaaz Me'n Un Jagho'n Ko Yaad Rakhte The Jin Jagho'n Par Rasoolullah ﷺ Kabhi Aaraam Kiya Karte The Un Jagho'n Ke Aas Paas Kya Hai Sab Yaad Rakhte The Un Jagho'n Me'n Kya Kya Hai Woh Bhi Yaad Rakhte The Aur Doosro'n Ko Bataaya Bhi Karte The Magar Aaj To Log Aasaar e Qadeema Ko Mitaane Me'n Lage Hai'n Allah Ta'ala Aajke Un Logo'n Ko Samajh Ki Taufeeq Ata Farmaaye. Aameen)
Aur Naaf'e Bayaan Karte Hai'n Ke Hazrat Abdullah Bin Umar Radiallahu Anhuma Ne Unko Hadees Bayaan Ki Ke Nabi e Kareem ﷺ Ne Arj Naami Basti Ke Peechhe Ek Naale Ke Kinaare Par Namaaz Padhi, Jabke Tum Ek Bade Pahaad Ki Taraf Ja Rahe Ho, Uss Masjid Ke Paas 2 Ya 3 Qabre'n Hai'n Un Qabro'n Ke Upar Safed Pat'thar Hai'n Aur Ye Sab (Qabr)Raaste Ke Daaye'n Janib Darakhto'n Ke Bich Me Waqe Hai, Un Darakhto'n Ke Darmiyaan Hazrat Abdullah Bin Umar Radiallahu Anhuma Dopaher Ke Waqt Sooraj Ke Dhalne Ke Ba'ad Arj Naami Basti Se Rawaana Hote Aur Phir Zohar Ki Namaaz Uss Masjid Me'n Padhte. (Yahaa'n Se Bhi Saabit Huwa Ke Sahaaba e Kiraam Nabi e Kareem ﷺ Ke Aasaar Ko Yaad Rakha Karte The Aur Barkat Haasil Kiya Karte The)
Aur Naaf'e Bayaan Karte Hai'n Ke Hazrat Abdullah Bin Umar Radiallahu Anhuma Ne Unko Hadees Bayaan Ki Ke Rasoolullah ﷺ Un Ghane Darakhto'n Ke Paas Utre Jo Raaste Ki Baaye'n Jaanib Harsha Ke Qareeb Waale Naale Me'n Hai'n Woh Naala Harsha Ke Kinaare Se Mil Gaya Hai Uske Aur Raaste Ke Darmiyaan Utna Faasla Hai Jitne Faasle Tak Teer Phe'nkne Se Jaata Hai Hazrat Abdullah Bin Umar Radiallahu Anhuma Uss Ghane Darakht Ke Paas Namaaz Padhte The Jo Un Ghane Darakhto'n Me'n Raaste Ke Sabse Zyaadah Qareeb Hai, Aur Woh Darakht Sabse Lamba Hai. (Iss Hadees Se Bhi Saabit Huwa Ke Sahaaba e Kiraam Un Jagho'n Ko Qadar Ki Nigaah Se Dekhte The Jin Jagho'n Ko Nisbat Hai Mere Aaqa Kareem ﷺ Se Aur Un Jagho'n Me'n Barkat Haasil Karne Ki Niyyat Se Namaaz Bhi Padhte The)
Aur Naaf'e Bayaan Karte Hai'n Ke Hazrat Abdullah Bin Umar Radiallahu Anhuma Ne Unko Hadees Bayaan Ki Ke Nabi e Kareem ﷺ Uss Naale Me'n Utarte The Jo Madeena Munawwarah Ki Jaanib Se Marraz Zahraan Ke Qareeb Hai, Jab Tum Safraawaat Se Neeche Utro To Raaste Ki Baaye'n Jaanib Uss Naale Ki Nasheb Me'n Utroge Aur Tum Makkah Mukarrama Ki Taraf Ja Rahe Ho Aur Rasoolullah ﷺ Ke Utarne Ki Jagah Aur Raaste Ke Darmiyaan Sirf Itna Faasla Hai Jitne Faasle Tak Pat'thar Phe'nkne Ke Ba'ad Jaata Hai. (Iss Hadees Se Bhi Saabit Huwa Ke Un Jagho'n Ki Sahaaba e Kiraam Ki Nigaaho'n Me'n Badi Qadar Thi Jinko Rasoolullah ﷺ Se Nisbat Haasil Hai)
Aur Naaf'e Bayaan Karte Hai'n Ke Hazrat Abdullah Bin Umar Radiallahu Anhuma Ne Unko Hadees Bayaan Ki Ke Nabi e Kareem ﷺ Zi Tuwa Me'n Utarte The Aur Wahee'n Subah Tak Raat Guzaarte The Aur Makkah Mukarrama Rawaana Hote Huwe Subah Ki Namaaz Yahee'n Padhte The Aur Zi Tuwa Me'n Rasoolullah ﷺ Ke Namaaz Padhne Ki Jagah Bade Teele Par Hai Yeh Woh Masjid Nahee'n Hai Jo Usse Neeche Bade Teele Par Banaayi Gayi Hai. (Iss Hadees Se Bhi Saabit Huwa Ke Aasaar e Nabi Ki Badi Qadar Thi Sahaaba e Kiraam Ke Nazdeek)
Aur Naaf'e Bayaan Karte Hai'n Ke Hazrat Abdullah Bin Umar Radiallahu Anhuma Ne Unko Hadees Bayaan Ki Ke Nabi e Kareem ﷺ Uss Pahaad Ke Dono'n Raasto'n Ki Taraf Mutawajjeh Huwe Jo Aapke Aur Ka'ba Ki Taraf Waale Taweel Pahaad Ke Darmiyaan Hai Pas Jo Masjid Wahaa'n Bani Huwi Hai Use Uss Masjid Ke Baaye'n Jaanib Rakha Jo Teele Ke Kinaare Par Bani Huwi Hai Aur Nabi e Kareem ﷺ Ke Namaaz Padhne Ki Jagah Uske Neeche Siyaah Teele Par Hai, Teele Se Taqreeban 10 Haath Chhod Kar Tum Uss Jagah Uss Pahaad Ke Dono'n Raasto'n Ki Taraf Muh Karke Namaaz Padho, Jo Pahaad Tumhaare Aur Ka'ba Ke Darmiyaan Hai. (Iss Hadees Shareef Se Bhi Nabi e Kareem ﷺ Ke Aasaar Ki Ta'zeem Wa Qadar Karna Sahaaba e Kiraam Se Saabit Hota Hai)
Hazrat Abdullah Bin Abbaas Radiallahu Anhuma Ne Bayaan Kiya Ke Mai'n Ek Gadhe Balke Gadhi Par Sawaar Hokar Aaya Aur Uss Waqt Mai'n Baalig Hone Ke Qareeb Tha Aur Rasoolullah ﷺ Mina Me'n Logo'n Ko Namaaz Padha Rahe The Saamne Deewaar Nahee'n Thi Pas Mai'n Saf Ke Ba'az Hisse Se Aage Guzra, Phir Mai'n Utra Aur Gadhi Ko Charne Keliye Chhod Diya Aur Mai'n Saf Me'n Daakhil Ho Gaya Aur Mujh Par Kisi Ne Ae'teraaz Nahee'n Kiya.
Riwaayat Hai Hazrat Abdullah Bin Umar Radiallahu Anhuma Se Ke Rasoolullah ﷺ Jab Eid Ke Din Baahar Nikalte To Aap Nezah Laane Ka Hukm Dete Jo Aap Ke Saamne Gaad Diya Jaata Phir Aap Uski Taraf Namaaz Padhte Aur Log Aapke Peechhe Hote Aur Aap Iss Tarah Safar Me'n Karte The Isi Wajah Se Hukmranon Ne Bhi Ye Tariqa Ikhtiyar Kiya Yani Hukmran Nezah Rakhte Hai'n.
Aun Bin Abi Juhaifa Kehte Hai'n Ke Mai'n Ne Apne Waalid Abi Juhaifa Radiallahu Anhu Se Suna Ke Nabi e Kareem ﷺ Ne Unko Khule Maidaan Me'n Namaaz Padhaayi Aur Aapke Saamne Nezah Tha Zohar Ki 2 Rak'at Aur Asar Ki 2 Rak'at Aur Aapke Saamne Se Aurat Aur Gadha Guzar Raha Tha. (Ma'loom Huwa Ke Yeh Waaqeya Kisi Safar Ka Hai Tabhi Zohar Wa Asar Ki Do Do Rak'at Ka Zikr Hai Aur Iss Hadees Shareef Se Ma'loom Huwa Ke Namaazi Jab Kisi Maidaan Me'n Namaaz Padhe To Usko Apne Saamne Sutrah Rakh Lena Chaahiye Aur Yeh Bhi Ma'loom Huwa Ke Namaazi Ke Saamne Se Aurat Ya Gadha Guzar Jaaye To Namaazi Ki Namaaz Me'n Farq Nahee'n Padega)
Riwaayat Hai Hazrat Sahl Radiallahu Anhu Se Ke Rasoolullah ﷺ Ki Jaye Namaaz Aur Deewaar Ke Darmiyaan Bakri Ke Guzarne Ki Jagah Thi.
Hazrat Salma Ne Kaha Ke, Masjid Ki Deewaar Mimbar Ke Paas Thi Usse Bakri Ba Mushkil Guzar Sakti Thi.
Riwaayat Hai Hazrat Abdullah Bin Umar Radiallahu Anhuma Se Ke Nabi e Kareem ﷺ Keliye Chhota Nezah Gaad Diya Jaata Tha Phir Aap Uski Taraf Namaaz Padhte The.
Aun Bin Abi Juhaifa Ne Hadees Bayaan Ki, Unho'n Ne Kaha Ke Mai'n Ne Apne Waalid Abi Juhaifa Radiallahu Anhu Se Suna Ke Nabi e Kareem ﷺ Dopaher Ke Waqt Humaari Taraf Nikle, Pas Aapke Wazu Ka Paani Laaya Gaya, Phir Aapne Wazu Kiya, Phir Aapne Hume'n Zohar Aur Asar Ki Namaaz Padhaayi Aur Aapke Saamne Nezah Tha, Aur Aurat Aur Gadha Uss Nezeh Ke Paas Se Guzar Rahe The.
Hazrat Anas Bin Maalik Radiallahu Anhu Ne Bayaan Kiya Ke Jab Nabi e Kareem ﷺ Qaza e Haajat Keliye Jaate To Mai'n Aur Ek Aur Ladka Aapke Peechhe Jaate Aur Humaare Saath Danda Ya Laathi Ya Nezah Hota Aur Humaare Saath Chamde Ka Bartan Hota Jab Aap Qaza e Haajat Se Faarig Ho Jaate To Hum Aapko Woh Chamde Ka Bartan Dete.
Hazrat Abi Juhaifa Radiallahu Anhu Bayaan Karte Hai'n Ke Rasoolullah ﷺ Dopaher Ke Waqt Nikle Phir Aapne Bajri Aur Reteeli Zameen (Madeena Ki Waadi) Me'n Zohar Aur Asar Ki Do Do Rak'at Namaaz Padhi Aur Apne Saamne Nezah Gaad Diya Aur Wazu Kiya Phir Log Aapke Wazu Ke Paani Ko Apne Jism Par Laga Rahe The. (Ya'ni Sahaaba e Kiraam Radiallahu Anhum Ajma'een Nabi e Kareem ﷺ Ke Bache Huwe Wazu Ke Paani Ko Barkat Haasil Karne Ki Niyat Se Apne Jismo'n Par Mal Rahe The)
Yeh Baab Hai Sutoon Ki Taraf Namaaz Padhne Ke Muta'alliq, Phir Imaam Bukhaari Farmaate Hai'n Ke, Aur Hazrat Umar Radiallahu Anhu Ne Kaha, Sutoono'n Ki Taraf Baate'n Karne Waalo'n Ki Ba Nisbat Namaaz Padhne Waale Zyaadah Mustahiq Hai'n, Aur Hazrat Umar Radiallahu Anhu Ne Ek Shakhs Ko Dekha Ke Woh Sutoono'n Ke Darmiyaan Namaaz Padh Raha Tha, Unho'n Ne Usko Ek Sutoon Ki Taraf Qareeb Karke Kaha, Iski Taraf Namaaz Padho, (Phir Imaam Bukhaari Ne Yeh Hadees Naql Ki Ke) Yazeed Bin Abi Ubaid Ne Hadees Bayaan Ki Unho'n Ne Kaha Ke, Mai'n Hazrat Salma Bin Akw'a Radiallahu Anhu Ke Paas Aaya Woh Mushaf Ke Paas Ek Sutoon Ke Nazdeek Namaaz Padh Rahe The Pas Mai'n Ne Kaha, Aye Abu Muslim ! Mai'n Dekhta Hoo'n Ke Aap Iss Sutoon Ko Talaash Karke Iske Paas Namaaz Padhte The? Unho'n Ne Kaha, Mai'n Ne Nabi e Kareem ﷺ Ko Qasd Karke Iss Sutoon Ke Paas Namaaz Padhte Huwe Dekha Hai. (Iss Hadees Shareef Se Bhi Saabit Huwa Ke Jis Jagah Par Nabi e Kareem ﷺ Namaaz Padh Le'n Woh Jagah Badi Mutabarrik Ho Jaati Hai Aur Sahaaba e Kiraam Uss Jagah Ko Badi Qadar Ki Nigaah Se Dekhte Hai'n Aur Barkat Haasil Karte Hai'n Zara Dekhe'n To Sahi Ke Sutoon To Aur Bhi The Lekin Sahaabi e Rasool Usi Sutoon Ke Paas Namaaz Padhne Ki Koshish Karte Hai'n Jahaa'n Rasoolullah ﷺ Ne Namaaz Ada Ki Hai)
Hazrat Anas Radiallahu Anhu Bayaan Karte Hai'n Ke Mai'n Ne Nabi e Kareem ﷺ Ke Jalilul Qadr Sahabaye Keram Ko Dekha Woh Magrib Ke Waqt Sutoono'n Ki Taraf Sabqat Karte The, Sho'ba Ne Az Amro Az Hazrat Anas Radiallahu Anhu Yeh Izaafa Kiya, Hatta Ke Nabi e Kareem ﷺ Hujre Se Nikal Aate. (Sutoono'n Ki Taraf Sabqat Iss Sabab Karte The Taake Sutoon Satrah Ban Jaaye)
Hazrat Ibne Umar Radiallahu Anhuma Bayaan Karte Hai'n Ke Nabi e Kareem ﷺ Aur Hazrat Usaama Bin Zaid Radiallahu Anhu Aur Hazrat Usmaan Bin Talha Radiallahu Anhu Aur Hazrat Bilaal Radiallahu Anhu Baitullah (Ka'ba Shareef) Ke Andar Daakhil Huwe Pas Bahot Der Andar Rahe Phir Baahar Nikle "To Sabse Pehle Mai'n Unke Peechhe Daakhil Huwa Phir Mai'n Ne Hazrat Bilaal Radiallahu Anhu Se Poochha Nabi e Kareem ﷺ Ne Kis Jagah Namaaz Padhi Thi? Unho'n Ne Bataaya, Saamne Ke 2 Sutoono'n Ke Darmiyaan.
Riwaayat Hai Hazrat Abdullah Bin Umar Radiallahu Anhuma Se Ke Nabi e Kareem ﷺ Aur Usaama Bin Zaid Radiallahu Anhu Aur Hazrat Bilaal Radiallahu Anhu Aur Hazrat Usmaan Bin Talha Hajabi Radiallahu Anhu Ka'ba Shareef Ke Andar Daakhil Huwe, Phir Ka'ba Ka Darwaazah Band Kar Diya, Aur Usme'n Kuchh Der Thehre, Phir Jab Woh Ka'ba Shareef Se Baahar Nikle To Mai'n Ne Hazrat Bilaal Radiallahu Anhu Se Sawaal Kiya Ke Nabi e Kareem ﷺ Ne Ka'ba Shareef Me'n Kya Kiya Tha? Unho'n Ne Kaha, Aapne Ek Sutoon Ko Baaye'n Jaanib Rakha Aur Ek Sutoon Ko Daaye'n Jaanib Rakha Aur 3 Sutoono'n Ko Apne Peechhe Aur Baitullah Un Dino'n 6 Sutoono'n Par Tha, Phir Nabi e Kareem ﷺ Ne Namaaz Padhi, Aur Humse Ismaa'il Ne Bayaan Kiya, Ke Mujhe Imaam Maalik Ne Hadees Bayaan Ki Aur Kaha, 2 Sutoon Nabi e Kareem ﷺ Ke Daaye'n Jaanib The.
Riwaayat Hai Hazrat Naaf'e Se Ke Hazrat Abdullah Bin Umar Radiallahu Anhuma Jab Ka'ba Shareef Ke Andar Daakhil Huwe To Dukhool Ke Waqt Woh Apne Muh Ki Taraf Chale Aur Darwaaze Ko Apni Peeth Ke Peechhe Rakha, Phir Chale Hatta Ke Unke Darmiyaan Aur Uss Deewaar Ke Darmiyaan Jo Unke Muh Ki Taraf Thi Taqreeban 3 Zara'a (Saade Chaar Fit) Ka Faasla Tha, (Phir) Unho'n Ne Namaaz Padhi Aur Uss Jagah Ka Qasd Kiya Jiss Jagah Ke Muta'alliq Unko Hazrat Bilaal Radiallahu Anhu Ne Yeh Khabar Di Thi Ke Nabi e Kareem ﷺ Ne Uss Jagah Namaaz Padhi Hai Aur Kaha, Hum Me'n Se Jo Shakhs Baitullah Ki Kisi Jaanib Namaaz Padhe Uspar Koi Harj Nahee'n Hai. (Iss Hadees Se Saabit Huwa Ke Jin Jagho'n Ko Rasoolullah ﷺ Se Nisbat Haasil Ho Jaati Hai Woh Jagah Sahaaba e Kiraam Keliye Bahot Hi Ahem Aur Qadar Waali Ho Jaati Ab Dekhe'n Ka'ba Shareef Ki Saari Jagah Khaas Hai Magar Nabi e Kareem ﷺ Ne Ka'ba Shareef Me'n Bhi Jis Jagah Namaaz Padhi Woh Jagah Bhi Baaqi Jagah Se Zyaadah Ahmiyat Ki Haamil Ho Gayi Sahaaba e Kiraam Keliye)
Riwaayat Hai Naaf'e Se Ke Hazrat Ibne Umar Radiallahu Anhuma Ne Bayaan Kiya Ke Nabi e Kareem ﷺ Apni Sawaari Ko Arz Me'n Kar Lete, Phir Uski Taraf Muh Karke Namaaz Padhte The, Mai'n Ne Kaha, Yeh Bataaye'n Ke Jab Sawaariyaa'n Uchhaltee'n (To Aap Kya Karte The ?) Unho'n Ne Kaha, Phir Aap Uss Paalaan Ya Kajaawe Ko Pakad Lete, Usko Baraabar Rakhte Aur Uski Aakhri Lakdi Ko Khada Karke Uski Taraf Namaaz Padhte Aur Hazrat Ibne Umar Radiallahu Anhuma Bhi Aisa Hi Karte The.
Hazrat Aa'yesha Radiallahu Anha Ne Farmaaya Ke, Kya Tumne Hume'n Kutte Aur Gadhe Ke Baraabar Kar Diya Hai? (Phir Farmaati Hai'n) Mai'n Ne Khud Ko Dekha Ke Mai'n Takht Par Leti Huwi Thi, Phir Rasoolullah ﷺ Aaye Aapne Takht Ko Saamne Beech Me'n Kar Liya Phir Aap Namaaz Padh Rahe The, Mai'n Ne Isko Na Pasand Kiya Ke Mai'n Namaaz Me'n Aapke Saamne Rahoo'n, Pas Mai'n Takht Ke Pairo'n Ki Jaanib Se Aahista Se Nikal Kar Apne Lihaaf Se Baahar Nikal Aati Thi. (Hazraat e Mohtaram Zara Iss Hadees Par Gaur Kare'n Ke, Hazrat Aa'yesha Radiallahu Anha Ne Farmaaya Ke Kya Tumne Hume'n Ya'ni Hum Aurto'n Ko Kutte Aur Gadhe Ke Baraabar Kar Diya ! Hazrat Aa'yesha Radiallahu Anha Ne Yeh Jumla Uss Mauqe Par Farmaaya Tha Jab Ba'az Logo'n Ne Yeh Hadees Bayaan Ki Ke, Namaazi Ke Saamne Se Kutta, Gadha Aur Aurat Guzar Jaaye To Namaazi Ki Namaaz Toot Jaati Hai, Hazrat Aa'yesha Radiallahu Anha Ko Unki Yeh Hadees Iss Sabab Na Gawaar Guzri Ke Usme'n Ek Jumle Me'n Aurat Ko Kutte Aur Gadhe Ke Saath Zikr Kiya Gaya Tha, Aur Choo'nke Hazrat Aa'yesha Radiallahu Anha Bhi Aurat Hai'n Iss Sabab Aapne Farmaaya Ke, Kya Tumne Hume'n Kutte Aur Gadhe Ke Baraabar Kar Diya Hai, Ab Aap Soche'n Jab Hazrat Aa'yesha Radiallahu Anha Ko Isse Takleef Huwi Ke Aurat Ka Zikr Kutte Aur Gadhe Ke Saath Kar Diya Gaya To Phir Jab Koi Gadhe Aur Bail Ke Saath Rasoolullah ﷺ Ka Zikr Kare To Bataaye'n Rasoolullah ﷺ Ko Kitni Takleef Hogi? Ab Aap Zara Ek Molvi Jiska Naam Ismaa'il Dahelvi Hai Uski Ek Ibaarat Dekhe'n Likhta Hai Ke, (Zina Ke Khayaal Se (Namaaz Me'n) Apni Biwi Se Jima Ka Khayaal Behtar Hai Aur Shaikh Aur Un Jaise Mo'azzimeen Khwaah Janaab Risaalat Ma'aab Hi Hoo'n, Ki Taraf Apni Tawajjeh Ko Laga Dena Apne Bail Aur Gadhe Ke Tasawwur Me'n Istagraaq Se Kahee'n Zyaadah Bura Hai, (Siraate Mustaqeem, Safha No.86, Matboo'a Maktaba Salafiya Laahor) Iss Ibaarat Me'n Rasoolullah ﷺ Ki Tauheen Ki, Sirf Yehi Ek Wajah Nahee'n Ke Gadhe Aur Bail Ke Tasawwur Ke Saath Aapki Taraf Tawajjeh Laga Dene Ka Zikr Hai Balke Nabi e Kareem ﷺ Ki Taraf Tawajjeh Laga Dene Ko Gadhe Aur Bail Ke Tasawwur Me'n Doob Jaane Se Zyaadah Bura Qaraar Diya Gaya Hai (M'aaz Allah) Zara Soche'n Iss Ibaarat Se Rasoolullah ﷺ Ko Kitni Takleef Huwi Hogi? Jabke Haalat e Namaaz Me'n Sahaaba e Kiraam Radiallahu Anhum Ajma'een Rasoolullah ﷺ Ki Ta'zeem Baja Laate The Zaahir Si Baat Hai Ke Namaaz Ki Haalat Me'n Hote Huwe Sahaaba e Kiraam Jab Rasoolullah ﷺ Ko Aata Dekhte Maslan Abu Bakar Siddique Radiallahu Anhu Ne Dekha To Ta'zeem Nabi e Kareem ﷺ Baja Laate Huwe Peechhe Hatne Lagte, (Dekhe'n Bukhaari Shareef, Hadees No.1234, 1218, 684) To Ab Bataaye'n Kya Sahaaba e Kiraam Radiallahu Anhum Ajma'een Ne Haalat e Namaaz Me'n Rasoolullah ﷺ Ki Ta'zeem Baja Laakar Rasoolullah ﷺ Ka Khayaal Apne Dil Me'n Laakar Bura Kiya?)
Yeh Baab Hai Iss Muta'alliq Ke, Namaazi Apne Saamne Se Guzarne Waale Ko Dhakka Dekar Door Bhagaaye, (Phir Imaam Bukhaari Farmaate Hai'n Ke) Aur Hazrat Ibne Umar Radiallahu Anhuma Ne Ka'ba Me'n Apni Namaaz Ke Tash'hud Me'n Saamne Se Guzarne Waale Ko Door Kiya Aur Farmaaya, Agar Guzarne Waala Bagair Ladaayi Ke Baaz Na Aaye To Usse Lado, (Phir Imaam Bukhaari Ne Yeh Hadees Naql Ki Ke) Abu Saaleh Sammaan Ne Hadees Bayaan Ki Unho'n Ne Kaha Ke Mai'n Ne Dekha Ke Hazrat Abu Sa'eed Khudri Radiallahu Anhu Jum'a Ke Din Kisi Cheez Ko Logo'n Se Satrah Bana Kar Namaaz Padh Rahe The, Banu Abi Mu'eet Ke Ek Naujawaan Ne Unke Saamne Se Guzarne Ka Iraadah Kiya, To Hazrat Abu Sa'eed Radiallahu Anhu Ne Uske Seene Par Dhakka Diya Uss Naujawaan Ne Idhar Udhar Dekha Magar Usne Hazrat Abu Sa'eed Radiallahu Anhu Ke Saamne Ke Alaawah Aur Koi Jagah Na Paayi Woh Dobaarah Unke Saamne Se Guzarne Laga Hazrat Abu Sa'eed Radiallahu Anhu Ne Usko Pehli Baar Se Zyaadah Zor Se Dhakka Diya, Usne Hazrat Abu Sa'eed Radiallahu Anhu Se Takleef Uthaayi, Usne Marwaan Ke Paas Jaakar Hazrat Abu Sa'eed Radiallahu Anhu Se Paho'nchne Waali Takleef Ki Shikaayat Ki, Hazrat Abu Sa'eed Radiallahu Anhu Bhi Uske Peechhe Peechhe Marwaan Ke Paas Aaye, Marwaan Ne Kaha, Aye Abu Sa'eed ! Aapke Aur Aapke Bhateeje Ke Darmiyaan Kya Mu'aamla Huwa? Unho'n Ne Bayaan Kiya Ke Mai'n Ne Nabi e Kareem ﷺ Ko Yeh Farmaate Huwe Suna Hai Ke Jab Tum Me'n Koi Kisi Cheez Ko Logo'n Se Satrah Bana Kar Namaaz Padhe Phir Koi Shakhs Uske Saamne Se Guzarne Ka Iraadah Kare To Usko Daf'a Kare Aur Agar Woh Baaz Na Aaye To Usse Lade Kyu'nke Wohi Shakhs Shaitaan Hai.
Riwaayat Hai Busr Bin Sa'eed Se Ke Hazrat Zaid Bin Khaalid Radiallahu Anhu Ne Unko Hazrat Abu Juhaim Radiallahu Anhu Ke Paas Bheja Woh Unse Yeh Sawaal Kar Rahe The Ke Unho'n Ne Namaazi Ke Aage Se Guzarne Waale Ke Muta'alliq Rasoolullah ﷺ Se Kya Suna Hai? To Hazrat Abu Juhaim Ne Kaha, Rasoolullah ﷺ Ne Irshaad Farmaaya, Agar Namaazi Ke Aage Se Guzarne Waale Ko Ma'loom Ho Jaaye Ke Usko Kitna Azaab Hoga To Woh 40 (Din Ya 40 Maheena Ya 40 Saal) Tak Thehra Rahe To Yeh Uske Namaazi Ke Aage Se Guzarne Se Behtar Hai, Abu Nazr Ne Kaha, Mujhe Yaad Nahee'n Ke Busr Bin Sa'eed Ne 40 Din Kaha Tha Ya 40 Maheena Ya 40 Saal.
Yeh Baab Hai Iss Muta'alliq Ke, Kisi Shakhs Ka Doosre Shakhs Ki Taraf Muh Karna Jabke Woh Namaaz Padh Raha Ho (Kaisa Hai?) Phir Imaam Bukhaari Farmaate Hai'n Ke, Aur Hazrat Usman Radi Allah Anho Ne (Yaad Rahe Fat'hul Baari Ke Mutaabiq Imaam Bukhaari Ne Yahaa'n Hazrat Umar Radiallahu Anhu Ke Naam Ke Bajaaye Hazrat Usmaan Radiallahu Anhu Ka Naam Likh Diya Hai) Isko Makrooh Qaraar Diya Ke Koi Shakhs Doosre Ki Taraf Muh Kare Jabke Woh Namaaz Padh Raha Ho (Imaam Bukhaari Ne Kaha) Yeh Hukm Uss Waqt Hai Jab Namaazi Uski Taraf Mashgool Ho Jaaye, Lekin Jab Woh Uski Taraf Mashgool Na Ho To Hazrat Zaid Bin Saabit Radiallahu Anhu Ne Kaha, Mai'n Iski Parwaah Nahee'n Karta, (Kyu'nke) Ek Shakhs Doosre Shakhs Ki Namaaz Ko Qat'e Nahee'n Karta, (Phir Imaam Bukhaari Ne Yeh Hadees Naql Ki Ke) Riwaayat Hai Masrooq Se Ke Hazrat Aa'yesha Radiallahu Anha Ke Saamne Yeh Zikr Kiya Gaya Ke Kya Cheez Namaaz Ko Tod Deti Hai, Logo'n Ne Kaha Kutta, Gadha Aur Aurat (Ka Namaazi Ke Saamne Se Guzarna) Namaaz Ko Tod Deta Hai, Hazrat Aa'yesha Radiallahu Anha Ne Farmaaya, Tumne Humko (Ya'ni Hum Aurto'n Ko) Kutta Bana Diya, (Phir Farmaati Hai'n Ke) Tehqeeq To Yeh Hai Ke Mai'n Ne Dekha Ke Nabi e Kareem ﷺ Namaaz Padh Rahe The Aur Mai'n Nabi e Kareem ﷺ Ke Aur Qibla Ke Darmiyaan Thi Aur Mai'n Takht Par Leti Huwi Thi Mujhe Koi Kaam Darpesh Hota To Mai'n Aapke Saamne Se Uthna Na Pasand Karti To Mai'n Chupke Se Nikal Jaati, Aur Az Aa'mash Az Ibraaheem Az Aswad Az Hazrat Aa'yesha Radiallahu Anha Iski Misl Marwi Hai.
Hazrat Aa'yesha Radiallahu Anha Bayaan Karti Hai'n Ke Nabi e Kareem ﷺ Namaaz Padh Rahe The Aur Mai'n Aapke Saamne Bistar Ke Arz Me'n Leti Huwi Thi Pas Jab Aap Witr Padhne Ka Iraadah Karte To Mujhe Bedaar Karte Phir Mai'n Witr Padhti.
Hazrat Aa'yesha Radiallahu Anha Zauja Nabi e Kareem ﷺ Ne Kaha, Mai'n Rasoolullah ﷺ Ke Saamne Soti Thi Aur Meri Dono'n Taa'nge'n Aapke Qibla Me'n Hoti Thi (Ya'ni Aapke Saamne Hoti Thi) Aap Jab Sajdah Karte To Mujhe Chhoote To Mai'n Apni Dono'n Taa'nge'n Samet Leti Aur Jab Aap Khade Hote To Mai'n Phir Apni Taa'nge'n Phaila Leti Aur Un Dino'n Gharo'n Me'n Chiraag Nahee'n Hote The. (Iss Hadees Se Saabit Huwa Ke Rasoolullah ﷺ Ki Sunnat Hai Gharo'n Me'n Nawaafil Padhna)
Riwaayat Hai Hazrat Masrooq Se Ke Hazrat Aa'yesha Radiallahu Anha Ke Saamne Zikr Kiya Gaya Ke Kutte Aur Gadhe Aur Aurat (Ka Namaazi Ke Saamne Se Guzarna) Namaaz Ko Tod Deta Hai, (To Yeh Sun Kar) Hazrat Aa'yesha Radiallahu Anha Ne Kaha, Tumne Hume'n (Ya'ni Hum Aurto'n Ko) Gadho'n Aur Kutto'n Ke Mushaaba Kar Diya Hai Aur Allah Ki Qasam Tahqeeq Yeh Hai Ke Mai'n Ne Dekha Ke Rasoolullah ﷺ Namaaz Padh Rahe The Aur Mai'n Aapke Aur Qibla Ke Darmiyaan Takht Par Leti Huwi Thi Mujhe Koi Kaam Hota To Mai'n Baithna Na Pasand Karti Ke Mai'n Nabi e Kareem ﷺ Ko Takleef Doo'n To Mai'n Nabi Karim ﷺ Ke Qadmon Ki Jaanib Se Chupke Se Nikal Jaati.
Ya'qoob Bin Ibraaheem Ne Khabar Di Ke Mujhse Mere Bhateeje Ibne Shihaab Ne Hadees Bayaan Ki Unho'n Ne Apne Chacha Se Sawaal Kiya Ke Kya Cheez Namaaz Ko Todti Hai? To Unho'n Ne Kaha, Namaaz Ko Koi Cheez Nahee'n Todti Hai, Mujhe Urwaah Bin Zubair Ne Khabar Di Ke Hazrat Aa'yesha Radiallahu Anha Zauja Nabi e Kareem ﷺ Ne Kaha Ke Tehqeeq Yeh Hai Ke Rasoolullah ﷺ Raat Ko Khade Hokar Namaaz Padh Rahe The Aur Mai'n Aapke Aur Aapke Qibla Ke Darmiyaan Ghar Ke Bistar Par Jaanib Arz (Saamne Ki Taraf) Me'n Leti Huwi Thi.
Riwaayat Hai Hazrat Abu Qataadah Ansaari Radiallahu Anhu Se Ke Rasoolullah ﷺ Namaaz Padh Rahe The Aur Aap Zainab Bint Rasoolullah ﷺ Ki Beti Umaama Ko Uthaaye Huwe The, Jo Abu Aa's Bin Rabee'a Bin Abde Shams Ki Beti Thee'n Jab Aap Sajdah Karte To Unko Neeche Rakh Dete (Zameen Par) Aur Jab Aap Khade Hote To Unko Utha Lete. (Yahaa'n Se Firqa e Shiya Ke Uss Qaul Ka Jo Woh Kehte Hai'n Ke Rasoolullah ﷺ Ki Ek Hi Shehzaadi Thi Uss Qaul e Baatil Ka Rad Huwa Kyu'nke Yahaa'n Se Ma'loom Huwa Ke Rasoolullah ﷺ Ki Ek Nahee'n Ek Se Zyaadah Shehzaadi Thi Jaisa Ke Dalaa'il Se Saabit Hai Ke 4 Thi Yahaa'n Se Yeh Bhi Saabit Huwa Ke Rasoolullah ﷺ Apni Tamaam Betiyo'n Se Aur Unke Bachcho'n Se Bahot Zyaadah Mohabbat Farmaate The.
Abdullah Bin Shaddaad Bin Haad Ne Kaha Mujhe Meri Khaala Hazrat Maimoona Bint Haaris Radiallahu Anha Ne Khabar Di Ke Mera Bistar Nabi e Kareem ﷺ Ke Musalle Ke Samne Hota Tha Aur Ba'az Auqaat Aapka Kapda Mujh Par Lag Jaata Tha Aur Mai'n Apne Bistar Par Hoti Thi. (Haalat e Haa'iz Me'n)
Abdullah Bin Shaddaad Ne Hadees Bayaan Ki Aur Kaha Ke Mai'n Ne Hazrat Maimoona Radiallahu Anha Se Suna Ke Nabi e Kareem ﷺ Namaaz Padh Rahe The Aur Mai'n Aapke Pehlu Me'n Soyi Huwi Thi Jab Aap Sajdah Karte To Aapka Kapda Mere Jism Par Lagta Aur Mai'n Halate Haiz Me Hoti Thi, Aur Musaddad Ne Az Khaalid Yeh Izaafa Kiya Ke, Hume'n Sulemaan Shaibaani Ne Hadees Bayaan Ki, Aur Mai'n Halate Haiz Me Hoti Thi.
Hazrat Aa'yesha Radiallahu Anha Ne Bayaan Farmaaya Ke, Kitni Buri Baat Hai Ke Tumne Hume'n (Ya'ni Hum Aurto'n Ko) Kutte Aur Gadhe Ke Baraabar Kar Diya Aur Tehqeeq Yeh Hai Ke Rasoolullah ﷺ Namaaz Padh Rahe The Aur Mai'n Aapke Aur Qibla Ke Darmiyaan Leti Huwi Thi Pas Jab Aap Sajdah Karne Ka Iraadah Karte To Mere Pairo'n Ko Haath Laga Kar Ishaarah Karte Pas Mai'n Apne Pair Suked Leti. (Samet Leti)
Riwaayat Hai Hazrat Abdullah Bin Mas'ood Radiallahu Anhu Se Ke Jis Waqt Rasoolullah ﷺ Ka'ba Ke Paas Khade Huwe Namaaz Padh Rahe The Aur (Kuffaar) Quresh Ki Ek Jama'at Apni Majaalis Me'n Baithi Huwi Thi Uss Waqt Unme'n Se Kisi Kehne Waale Ne Kaha, Kya Tum Uss Riyakaar Ki Taraf Nahee'n Dekh Rahe? Tum Me'n Se Koi Shakhs Aale Fulaa'n Ki U'ntni Ki Taraf Jaaye Aur Uske Gobar Aur Khoon Aur Uski Bachcha Daani (Isse Majaaza Ojhdi Muraad Hai) Le Aaye Phir Usko Mohlat De Hatta Ke Jab Yeh Sajdah Me'n Jaaye'n To Usko Unke Dono'n Kandho'n Ke Darmiyaan Rakh De Phir Jo Unme'n Sabse Zyaadah Bad Bakht Tha, Woh Utha Aur Jab Rasoolullah ﷺ Ne Sajdah Kiya To Usne Uss Ojhdi Ko Nabi e Kareem ﷺ Ke Dono'n Kandho'n Ke Darmiyaan Rakh Diya Aur Nabi e Kareem ﷺ Sajdah Me'n Barqaraar Rahe, So Woh Kuffaar Ha'nste Rahe Aur Ha'nste Huwe Ek Doosre Par Gir Rahe The Phir Koi Jaane Waala Hazrat Sayyadah Faatema Radiallahu Anha Ke Paas Gaya, Aur Woh (Uss Waqt) Kamsin Ladki Thi, Pas Woh Daudi Huwi Aayee'n Aur Nabi e Kareem ﷺ (Ba Dastoor) Sajdah Me'n The Hatta Ke Unho'n Ne Uss Ojhdi Ko Aapke Upar Se Utha Kar Phe'nk Diya Aur Kuffaar e Quresh Ki Taraf Mutawajjeh Hokar Unko Sakht Sast Kaha, Jab Rasoolullah ﷺ Ne Namaaz Ada Karli To Aapne Unke Khilaaf Du'aa e Zarar Ki, Aye Allah ! Quresh Ko Pakad Le Aye Allah ! Quresh Ko Pakad Le, Phir Unke Naam Liye Aye Allah ! Umro Bin Hishaam Ko Halaak Karde (Ya'ni Abu Jahel Ko) Aur Utba Bin Rabee'a Ko Aur Shaiba Bin Rabee'a Ko Aur Waleed Bin Utba Ko Aur Umiya Bin Khalf Ko Aur Uqba Bin Abi Mu'eet Ko Aur Ammaarah Bin Waleed Ko, Hazrat Abdullah Bin Mas'ood Radiallahu Anhu Bayaan Karte Hai'n Ke, Pas Allah Ta'ala Ki Qasam ! Guzwah Badar Ke Din Mai'n Ne Dekha Ke Yeh Sab Zameen Par (Murdah) Pade Huwe The Phir Un Sabko Ghaseet Kar Badar Ke Ku'nwe'n Me'n Daala Gaya Phir Rasoolullah ﷺ Ne Farmaaya Ku'nwe'n Waalo'n Par La'nat Ki Gayi Hai.
Bukhari Shareef : Kitaabus Salaat
|
Bukhari Shareef : كِتَابُ الصَّلاَةِ
|
•