Tirmizi Shareef

حضرت عبداللہ بن مسعود رضی اللہ عنہ سے روایت ہے نبی اکرم صلی اللہ علیہ وسلم نے قتل خطاء میں بیس اونٹ اور بیس اونٹنیاں ایک سالہ بیس اونٹ دو سالہ بیس اونٹ تین سالہ اور بیس اونٹ چار سالہ ﴿کل ایک سو اونٹ﴾دیت مقرر فرمائی۔ ابو ہشام رفاعی نے بواسطہ ابن ابی زائدہ اور ابو خالد احمر حجاج بن ارطاۃ سے اس کے ہم معنی حدیث روایت کی۔ اس باب میں حضرت عبداللہ بن عمرو رضی اللہ عنہ سے روایت مذکور ہے حضرت عبداللہ بن مسعود رضی اللہ عنہ سے روایت کو ہم صرف اسی طریق سے مرفوعاً جانتے ہیں اس سے مرفوعاً بھی مروی ہے بعض اہل علم اسی طرف گئے ہیں۔ امام احمد اور اسحاق رحمہم اللہ کا یہی قول ہے اہل علم کا اتفاق ہے کہ دیت تین سالوں میں ہر سال ایک تہائی کے حساب سے لی جائے نیز فرماتے ہیں کہ قتل خطاء کی دیت عاقلہ پر ہے بعض علماء کے نزدیک عاقلہ سے مرد کی طرف سے رشتہ دار مراد ہیں۔ امام شافعی اور مالک رحمہم اللہ کا یہی قول ہے بعض اہل علم فرماتے ہیں دیت مردوں پر ہے عورتوں اور بچوں پر نہیں ان میں سے ہر ایک پر ایک چوتھائی دینار جرمانہ کیا جائے بعض نے نصف دینار کہا ہے اگر دیت پوری ہو جائے تو ٹھیک ہے ورنہ باقی دیت رشتہ داروں میں سے زیادہ قریب کے قبیلہ پر ڈالی جائے۔ جامع ترمذی شریف،کتاب الدیت،باب۹۳۸،مَا جَاءَ فِي الدِّيَةِ كَمْ هِيَ مِنَ الْإِبِلِ،جلد۱ص۶۹۷،حديث نمبر ١٣٨٦)

عمرو بن شعیب بواسطہ والد اپنے دادا سے روایت کرتے ہیں نبی اکرم صلی اللہ علیہ وسلم نے فرمایا جو شخص کسی کو جان بوجھ کر قتل کرے وہ مقتول کے ورثا کے حوالہ کیا جائے وہ اگر چاہیں تو اسے قتل کر دیں اور اگر چاہیں دیت لے لیں۔ اور یہ (دیت)تیس تین سالہ تیس چار سالہ اور چالیس حاملہ اونٹنیاں ہیں اور اگر صلح کر لیں تو وہی ہے جس پر صلح کر لی اور یہ دیت کے سخت ہونے کی وجہ سے ہے عبداللہ بن عمرو کی روایت غریب ہے۔ (جامع ترمذی شریف،کتاب الدیت،باب۹۳۸،مَا جَاءَ فِي الدِّيَةِ كَمْ هِيَ مِنَ الْإِبِلِ،جلد۱ص۶۹۷،حديث نمبر ١٣٨٧)

نقد کی صورت میں دیت حضرت ابن عباس رضی اللہ عنہ سے روایت ہے نبی اکرم صلی اللہ علیہ وسلم نے بارہ ہزار درہم دیت مقرر فرمائی۔ (جامع ترمذی شریف،کتاب الدیت،باب۹۳۹،مَا جَاءَ فِي الدِّيَةِ كَمْ هِيَ مِنَ الدَّرَاهِم،جلد۱ص۶۹۸،حديث نمبر ١٣٨٨)

سعید بن عبدالرحمٰن مخزومی بواسطہ سفیان بن عیینہ عمرو بن دینار اور حضرت عکرمہ رضی اللہ عنہ نبی اکرم صلی اللہ علیہ وسلم سے اس کے ہم معنی روایت بیان کرتے ہیں حضرت ابن عباس رضی اللہ عنہما کا واسطہ مذکور نہیں ابن عیینہ کی روایت میں اس سے زیادہ کلام ہے ہم نہیں جانتے کہ حضرت ابن عباس رضی اللہ عنہما سے محمد بن مسلم کے علاوہ کسی اور نے یہ حدیث روایت کی ہو بعض اہل علم کے نزدیک اس حدیث پر عمل ہے امام احمد اور اسحٰاق کا یہی قول ہے بعض علماء کے نزدیک دیت دس ہزار درہم ہیں سفیان ثوری اور اہل کوفہ﴿ امام اعظم ابو حنیفہ رحمہ اللہ﴾ اسی کے قائل ہیں امام شافعی فرماتے ہیں دیت میں اونٹوں کا دینا ہی صحیح سمجھتا ہوں اور وہ سو اونٹ ہیں۔ (جامع ترمذی شریف،کتاب الدیت،باب۹۳۹،مَا جَاءَ فِي الدِّيَةِ كَمْ هِيَ مِنَ الدَّرَاهِم،جلد۱ص۶۹۸،حديث نمبر ١٣٨٩)

ایسے زخم کی دیت جس میں ہڈی ظاہر ہو جائے۔ عمرو بن شعیب بواسطہ والد اپنے دادا سے روایت کرتے ہیں نبی اکرم صلی اللہ علیہ وسلم نے فرمایا جن زخموں میں ہڈی کھل جائے ان میں پانچ پانچ اونٹ دیت ہیں یہ حدیث حسن صحیح ہے اہل علم کا اس پر عمل ہے سفیان ثوری، شافعی، احمد اور اسحٰاق رحمہم اللہ کا یہی قول ہے کہ ایسے زخموں میں پانچ اونٹ دیت ہے۔ (جامع ترمذی شریف،کتاب الدیت،باب۹۴۰،مَا جَاءَ فِي الْمُوْضِحَةِ،جلد۱ص۶۹۹،حديث نمبر ١٣٩٠)

حضرت ابن عباس رضی اللہ عنہما سے روایت ہے رسول اکرم صلی اللہ علیہ وسلم نے فرمایا ہاتھوں اور پاؤں کی انگلیوں کی دیت برابر ہے ایک انگلی کے بدلے دس اونٹ ہیں، اس باب میں حضرت ابو موسٰی اور عبداللہ بن عمرو رضی اللہ عنہما سے بھی روایات مذکور ہیں حدیث ابن عباس حسن صحیح غریب ہے، بعض علماء کے نزدیک اس پر عمل ہے سفیان ثوری، شافعی، احمد اور اسحٰاق رحمہم اللہ اسی کے قائل ہیں۔ (جامع ترمذی شریف،کتاب الدیت،باب۹۴۱،مَا جَاءَ فِي دِيَةِ الأَصَابِع،جلد۱ص۶۹۹،حديث نمبر ١٣٩١)

حضرت ابن عباس رضی اللہ عنہما سے روایت ہے نبی اکرم صلی اللہ علیہ وسلم نے فرمایا یہ اور یہ یعنی چھنگلی انگلی اور انگوٹھا ﴿دیت میں﴾ برابر ہیں یہ حدیث حسن صحیح ہے۔ (جامع ترمذی شریف،کتاب الدیت،باب۹۴۱،مَا جَاءَ فِي دِيَةِ الأَصَابِع،جلد۱ص۶۹۹،حديث نمبر ١٣٩٢)

دیت معاف کرنا حضرت ابو السفر سے روایت ہے قریش کے ایک آدمی نے ایک انصاری کا دانت توڑ دیا اس نے حضرت معاویہ رضی اللہ عنہ سے استغاثہ کرتے ہوئے عرض کیا امیر المومنین اس نے میرا دانت توڑا ہے حضرت معاویہ رضی اللہ عنہ نے فرمایا عنقریب ہم تجھے راضی کریں گے حضرت معاویہ رضی اللہ عنہ نے فرمایا تجھے اپنے ساتھی کا اختیار ہے حضرت ابو درداء رضی اللہ عنہ پاس بیٹھے ہوئے تھے انہوں نے فرمایا میں نے رسول اکرم صلی اللہ علیہ وسلم سے سنا آپ نے فرمایا جس شخص کا بدن زخمی ہو جائے اور وہ معاف کر دے اللہ تعالٰی اس کے بدلے اس کا ایک درجہ بلند فرماتا اور ایک گناہ مٹاتا ہے انصاری نے کہا آپ نے حضور صلی اللہ علیہ وسلم سے سنا ہے حضرت ابو درداء نے فرمایا میرے کانوں نے سنا اور دل نے محفوظ رکھا اس پر انصاری نے کہا میں اسے معاف کرتا ہوں حضرت معاویہ رضی اللہ عنہ نے فرمایا یقیناً میں تمہیں محروم نہیں کروں گا اور آپ نے اس کے لیے کچھ مال کا حکم دیا، یہ حدیث غریب ہے ہم اسے صرف اسی طریق سے جانتے ہیں مجھے نہیں معلوم کہ ابو السفر کو حضرت ابو درداء سے سماع حاصل ہے ابوالسفر کا نام سعید بن احمد ہے۔ ابن یحمد ثوری بھی کہا جاتا ہے۔ ﴿جامع ترمذی شریف،کتاب الذیت،باب۹۴۲،مَا جَاءَ فِي الْعَفْوِ،جلد۱ص۶۹۹،حديث نمبر ١٣٩٣﴾

کسی کا سر پتھر سے کچلنے والے کی سزا۔ حضرت انس سے روایت ہے ایک لڑکی باہر نکلی وہ زیور پہنے ہوئے تھی ایک یہودی نے اسے پکڑا اس کا سر پتھر سے کچل دیا اور زیور اتار لیا راوی فرماتے ہیں وہ اس حالت میں پائی گئی کہ اس میں جان باقی تھی وہ حضور صلی اللہ علیہ وسلم کی خدمت میں لائی گئی تو آپ نے اس سے پوچھا تجھے کس نے قتل کیا ؟ کیا فلاں نے قتل کیا ؟ لڑکی نے سر سے اشارہ کیا نہیں۔ آپ نے پوچھا کیا فلاں نے ؟ یہاں تک کہ آپ نے یہودی کا نام لیا تو اس نے سر کے اشارے سے ہاں کہا راوی فرماتے ہیں وہ یہودی پکڑا گیا اور اس نے اعتراف کر لیا چنانچہ رسول اکرم صلی اللہ علیہ وسلم کے حکم سے اس کا سر دو پتھروں کے درمیان کچل دیا گیا، یہ حدیث حسن صحیح ہے بعض علماء کے نزدیک اس پر عمل ہے امام احمد اور اسحٰاق رحمہم اللہ کا یہی قول ہے بعض اہل علم فرماتے ہیں قصاص صرف تلوار سے ہے۔ (جامع ترمذی شریف،کتاب الدیت،باب۹۴۳،مَا جَاءَ فِيمَنْ رُضِخَ رَأْسُهُ بِصَخْرَةٍ،جلد۱ص۷۰۰،حديث نمبر ١٣٩٤)

قتل مومن حضرت عبداللہ بن عمرو رضی اللہ عنہ سے روایت ہے نبی اکرم صلی اللہ علیہ وسلم نے فرمایا اللہ تعالٰی کے نزدیک مسلمان کے قتل سے دنیا کا ختم ہو جانا زیادہ بے وقعت ہے۔ محمد بن بشار نے بواسطہ محمد بن جعفر، شعبہ، یعلیٰ بن عطا اور عطاء حضرت عبداللہ بن عمرو رضی اللہ عنہ سے اس کے ہم معنی غیر مرفوع حدیث روایت کی۔ ابن ابی عدی کی روایت سے یہ زیادہ صحیح ہے، اس باب میں حضرت سعد ابن عباس ابو سعید، ابوہریرہ، عقبہ بن عامر اور بریدہ رضی اللہ عنہم سے بھی روایات مذکور ہیں،حضرت عبداللہ بن عمرو کی روایت کو ابن ابی عدی نے بواسطہ شعبہ یعلیٰ بن عطاء سے یوں ہی غیر مرفوع روایت کیا سفیان ثوری نے بھی یعلیٰ بن عطاء سے اسی طرح موقوف روایت کیا حدیث مرفوع سے یہ زیادہ صحیح ہے۔ (جامع ترمذی شریف،کتاب الدیت،باب۹۴۴،مَا جَاءَ فِي تَشْدِيدِ قَتْلِ الْمُؤْمِنِ،جلد۱ص۷۰۰،حديث نمبر ١٣٩٥)

حضرت عبداللہ رضی اللہ عنہ سے روایت ہے رسول اکرم صلی اللہ علیہ وسلم نے فرمایا بندوں کے درمیان سب سے پہلے خون (قتل) کا فیصلہ کیا جائے گا،حدیث عبداللہ حسن صحیح ہے۔ کئی افراد نے اعمش سے اسی طرح مرفوع روایت کی بعض نے اعمش سے غیر مرفوع حدیث روایت کی۔ (جامع ترمذی شریف،کتاب الدیت،باب۹۴۵،الْحُكْمِ فِي الدِّمَاءِ،جلد۱ص۷۰۱،حديث نمبر ١٣٩٦)

حضرت عبداللہ رضی اللہ عنہ سے روایت ہے رسول اکرم صلی اللہ علیہ وسلم نے فرمایا (قیامت کے دن) بندوں کے درمیان سب سے پہلے جس چیز کا فیصلہ ہوگا وہ خون ہے۔ (جامع ترمذی شریف،کتاب الدیت،باب۹۴۵،الْحُكْمِ فِي الدِّمَاءِ،جلد۱ص۷۰۱،حديث نمبر ١٣٩٧)

حضرت ابو سعید خدری اور حضرت ابوہریرہ رضی اللہ عنہما سے روایت ہے رسول اکرم صلی اللہ علیہ وسلم نے ارشاد فرمایا اگر تمام آسمانوں و زمین والے کسی مومن کے قتل میں شریک ہوں تو یقیناً اللہ تعالٰی ان سب کو جہنم میں جھونک دے گا یہ حدیث غریب ہے۔ (جامع ترمذی شریف،کتاب الدیت،باب۹۴۵،الْحُكْمِ فِي الدِّمَاءِ،جلد۱ص۷۰۱،حديث نمبر ١٣٩٨)

باپ بیٹے کو قتل کرے تو کیا حکم ہے ؟ حضرت سراقہ بن مالک رضی اللہ عنہ سے روایت ہے فرماتے ہیں میں بارگاہ نبوی میں حاضر ہوا رسول اکرم صلی اللہ علیہ وسلم بیٹے سے باپ کا قصاص لیتے تھے لیکن باپ سے بیٹے کا قصاص نہیں لیتے تھے اس حدیث کو سراقہ کی روایت سے ہم صرف اسی طریق سے پہچانتے ہیں اس کی سند صحیح نہیں اسماعیل بن عیاش نے مثنیٰ بن صباح سے روایت کیا اور مثنیٰ بن صباح کو حدیث میں ضعیف قرار دیا گیا ہے ابو خالد احمر نے اس کو بواسطہ حجاج بن ارطاۃ عمرو بن شعیب بواسطہ والد ان کے دادا حضرت عمر رضی اللہ عنہ سے مرسل روایت کیا اس حدیث میں اضطراب ہے اہل علم کے نزدیک اس پر عمل ہے کہ باپ بیٹے کو قتل کرے تو قصاص نہ لیا جائے اور اگر تہمت لگائے تو حد قائم نہ کی جائے۔ (جامع ترمذی شریف،کتاب الدیت،باب۹۴۶،مَا جَاءَ فِي الرَّجُلِ يَقْتَلُ ابْنَهُ يُقَادُ مِنْهُ اَمْ لَا،جلد۱ص۷۰۱،حديث نمبر ١٣٩٩)

حضرت عمر بن خطاب رضی اللہ عنہ سے روایت ہے فرماتے ہیں میں نے نبی اکرم صلی اللہ علیہ وسلم کو فرماتے سنا کہ باپ سے بیٹے کا قصاص نہ لیا جائے۔ (جامع ترمذی شریف،کتاب الدیت،باب۹۴۶،مَا جَاءَ فِي الرَّجُلِ يَقْتَلُ ابْنَهُ يُقَادُ مِنْهُ اَمْ لَا،جلد۱ص۷۰۱،حديث نمبر ١٤٠٠)

حضرت ابن عباس رضی اللہ عنہما سے روایت ہے رسول اکرم صلی اللہ علیہ وسلم نے فرمایا مسجدوں میں حدیں قائم نہ کی جائیں اور بیٹے کے بدلے باپ کو قتل نہ کیا جائے اس حدیث کو ہم صرف اسماعیل بن مسلم کی روایت سے مرفوعاً جانتے ہیں اسماعیل بن مسلم مکی کے حفظ میں بعض اہل علم نے کلام کیا۔ (جامع ترمذی شریف،کتاب الدیت،باب۹۴۶،مَا جَاءَ فِي الرَّجُلِ يَقْتَلُ ابْنَهُ يُقَادُ مِنْهُ اَمْ لَا،جلد۱ص۷۰۱،حديث نمبر ١٤٠١)

تین باتوں کے علاوہ مسلمان کا قتل جائز نہیں حضرت عبداللہ بن مسعود رضی اللہ عنہ سے روایت ہے نبی اکرم صلی اللہ علیہ وسلم نے فرمایا جو مسلمان اللہ تعالٰی کی وحدانیت اور میری رسالت کی گواہی دیتا ہے۔ تین صورتوں کے علاوہ ان کا خون حلال نہیں۔ شادی شدہ زانی۔ قتل کرنے والا اور دین اسلام کو چھوڑنے اور( مسلمان )جماعت سے الگ ہونے والا (مرتد) اس باب میں حضرت عثمان، حضرت عائشہ اور ابن عباس رضی اللہ عنہم سے بھی روایات مروی ہیں حدیث ابن مسعود حسن صحیح ہے۔ (جامع ترمذی شریف،کتاب الدیت،باب۹۴۷،مَا جَاءَ لَا يَحِلُّ دَمُ امْرِي مُسْلِمٍ إِلَّابِإِحْدَى ثَلٰثٍ،جلد۱ص۷۰۲،حديث نمبر ١٤٠٢)

معاہدہ کو قتل کرنا حضرت ابوہریرہ رضی اللہ عنہ سے روایت ہے رسول اکرم صلی اللہ علیہ وسلم نے فرمایا آگاہ رہو جو کسی معاہد (جس سے معاہدہ ہو) کو قتل کرے جس کے لیے اللہ اور رسول کا ذمہ ہو اس نے اللہ تعالٰی کا ذمہ توڑ دیا وہ جنت کی خوشبو نہیں پائے گا حالانکہ جنت کی خوشبو ستر سال کی مسافت سے آتی ہوگی۔ اس باب میں حضرت ابوبکرہ رضی اللہ عنہ سے بھی روایت مذکور ہے حدیث حضرت ابو ہریرہ حسن صحیح ہے اور آپ سے مختلف طرق سے مروی ہے۔ (جامع ترمذی شریف،کتاب الدیت،باب۹۴۸،مَا جَاءَ فِيمَنْ يَقْتُلُ نَفْسًا مُعَاهَدَةً،جلد۱ص۷۰۳،حديث نمبر ١٤٠٣)

حضرت ابن عباس رضی اللہ عنہما سے مروی ہے نبی اکرم صلی اللہ علیہ وسلم نے دو عامریوں کو مسلمان کی دیت دلوائی رسول اکرم صلی اللہ علیہ وسلم کا ان دونوں سے عہد تھا ، یہ حدیث غریب ہے ہم اسے صرف اسی طریق سے پہچانتے ہیں ابو سعید بقال کا نام سعید بن مرزبان ہے۔ (جامع ترمذی شریف،کتاب الدیت،باب۹۴۹،جلد۱ص۷۰۳،حديث نمبر ١٤٠٤)

مقتول کے ولی کو اختیار ہے حضرت ابوہریرہ رضی اللہ عنہ سے روایت ہے اللہ تعالٰی نے جب اپنے رسول کریم صلی اللہ علیہ وسلم کو مکہ مکرمہ میں فتح عطا فرمائی تو آپ لوگوں کے درمیان کھڑے ہوئے اللہ تعالٰی کی حمد و ثنا کی پھر فرمایا جس کا کوئی رشتہ دار قتل ہو جائے وہ معاف کرنے یا قتل کرنے میں سے جس کو بہتر سمجھے اختیار کرے اس باب میں حضرت وائل بن حجر، انس ابو شریح اور خویلد بن عمرو رضی اللہ عنہم سے بھی روایات مذکور ہیں۔ (جامع ترمذی شریف،کتاب الدیت،باب۹۵۰،مَا جَاءَ فِي حُكْمِ وَلِي الْقَتِيلِ فِي الْقِصَاصِ وَالْعَفْوِ . جلد۱ص۷۰۳، حديث نمبر ١٤٠٥)

حضرت ابو شریح کعبی رضی اللہ عنہ سے روایت ہے رسول اکرم صلی اللہ علیہ وسلم نے فرمایا اللہ تعالٰی نے مکہ مکرمہ کو حرم بنایا لوگوں نے نہیں بنایا جو شخص اللہ تعالٰی اور آخرت کے دن پر ایمان رکھتا ہے وہ نہ تو اس میں خونریزی کرے اور نہ ہی اس کا کوئی درخت کاٹے اور اگر کوئی بہانہ بنانے والا یہ عذر پیش کرے کہ یہ رسول اکرم صلی اللہ علیہ وسلم کے لیے بھی تو حلال کیا گیا تھا تو (بات یہ ہے کہ ) اللہ تعالٰی نے میرے لیے حلال کیا لوگوں کے لیے نہیں اور میرے لیے بھی دن کی ایک گھڑی حلال کیا تھا پھر یہ تا قیامت حرام ہے (اس کے باوجود) پھر تم نے اے خزاعہ کی جماعت ہزیل کہ ایک شخص کو قتل کیا میں اس کا خون بہا دیتا ہوں اس کے بعد جن کا رشتہ قتل ہو جائے انہیں دو باتوں میں بہتر بات کا اختیار ہے یا قتل کریں یا دیت لے لیں یہ حدیث اور حدیث ابو ہریرہ حسن صحیح ہے شیبان نے بھی اس کو یحییٰ بن ابی کثیر سے اس کی مثل روایت کیا ابو شریح خزاعی نبی اکرم صلی اللہ علیہ وسلم سے روایت کرتے ہیں آپ نے فرمایا جس کا کوئی عزیز قتل ہو جائے اسے اختیار ہے کہ قصاص لے یا معاف کر دے اور دیت لے لے۔ بعض اہل علم اس طرف گئے ہیں امام احمد اور اسحاق رحمہم اللہ بھی اسی کے قائل ہیں۔ (جامع ترمذی شریف،کتاب الدیت،باب۹۵۰،مَا جَاءَ فِي حُكْمِ وَلِي الْقَتِيلِ فِي الْقِصَاصِ وَالْعَفْوِ . جلد۱ص۷۰۳، حديث نمبر ١٤٠٦)

حضرت ابوہریرہ رضی اللہ عنہ سے روایت ہے نبی اکرم صلی اللہ علیہ وسلم کے زمانہ اقدس میں ایک آدمی قتل کیا گیا قاتل مقتول کے ورثاء کے حوالہ کیا گیا تو اس نے کہا یا رسول اللہ! اللہ کی قسم میں نے اسے قتل کرنے کا ارادہ نہیں کیا تھا رسول اللہ صلی اللہ علیہ وسلم نے فرمایا اگر یہ سچ کہتا ہے اور اس کے باوجود تو نے اس کے قصاص میں قتل کر دیا تو تو جہنم میں جائے گا اس پر اس نے قاتل کو چھوڑ دیا وہ رسی سے باندھا ہوا تھا اس کو گھسیٹتے ہوئے باہر نکالا گیا تو وہ رسی والا (ذالنسعہ) مشہور ہو گیا، یہ حدیث حسن صحیح ہے۔ (جامع ترمذی شریف،کتاب الدیت،باب۹۵۰،مَا جَاءَ فِي حُكْمِ وَلِي الْقَتِيلِ فِي الْقِصَاصِ وَالْعَفْوِ . جلد۱ص۷۰۳، حديث نمبر ١٤٠٧)

مثلہ کی ممانعت حضرت سلیمان بن بریدہ رضی اللہ عنہ اپنے والد سے روایت کرتے ہیں نبی اکرم صلی اللہ علیہ وسلم کسی کو امیر لشکر بنا کر بھیجتے تو اسے خاص طور پر اللہ تعالٰی سے ڈرتے رہنے اور اپنے مسلمان ساتھیوں سے بھلائی کرنے کی وصیت کرتے آپ فرماتے اللہ تعالٰی کے نام سے اس کے راستے میں کفار سے جہاد کرو۔ خیانت نہ کرو عہد شکنی نہ کرو مثلہ نہ کرو (اعضاء جسم نہ کاٹو) اور بچوں کو قتل نہ کرو اس حدیث میں ایک واقعہ ہے، اس باب میں حضرت عبداللہ بن مسعود شداد بن اوس، سمرہ، مغیرہ، یعلیٰ بن مرہ اور ابو ایوب رضی اللہ عنہم سے بھی روایات مذکور ہیں حدیث بریدہ حسن صحیح ہے اہل علم نے مثلہ کو مکروہ کہا ہے۔ (جامع ترمذی شریف،کتاب الدیت،باب۹۵۱،مَاجَاءَ فِي النَّهْي عَنِ الْمُثْلَةِ،جلد۱ص۷۰۵،حديث نمبر ١٤٠٨)

حضرت شداد بن اوس رضی اللہ عنہ سے روایت ہے نبی اکرم صلی اللہ علیہ وسلم نے فرمایا اللہ تعالٰی نے ہر چیز میں احسان کو لازم رکھا لہذا جب قتل کرو تو اچھے طریقے سے کرو۔ جب ذبح کرو تو اچھے طریقہ سے کرو جب تم میں سے کوئی ذبح کرنا چاہے تو چھری تیز کر لے اور ذبیحہ کو آرام دے۔ یہ حدیث حسن صحیح ہے ابوالاشعث کا نام شرجیل بن اُدہ ہے۔ (جامع ترمذی شریف،کتاب الدیت،باب۹۵۱،مَاجَاءَ فِي النَّهْي عَنِ الْمُثْلَةِ،جلد۱ص۷۰۵،حديث نمبر ١٤٠٩)

جنین کی دیت حضرت مغیرہ بن شعبہ رضی اللہ عنہ سے روایت ہے دوسو کنیں تھیں ایک نے دوسرے کو پتھر یا خیمہ کی لکڑی دے ماری جس سے اس کا حمل ساقط ہو گیا رسول اکرم ﷺ نے فرمایا جنین (پیٹ کے بچے) کی دیت ایک غلام یا لونڈی دینے کا فیصلہ فرمایا اور اسے عورت کے خاندان کے ذمہ قرار دیا۔ حسن کہتے ہیں زید بن حباب نے بواسطہ سفیان۔ منصور سے یہ حدیث روایت کی یہ حدیث حسن صحیح ہے۔ (جامع ترمذی شریف،کتاب الدیت،باب۹۵۲،مَا جَاءَ فِي دِيَةِ الْجَنِينِ۔ جلد۱ص۷۰۵،حديث نمبر ١٤١٠)

حضرت ابوہریرہ رضی اللہ عنہ سے روایت ہے رسول اکرم صلی اللہ علیہ وسلم نے جنین کی دیت میں ایک غلام یا لونڈی کا فیصلہ فرمایا جس کے خلاف فیصلہ دیا اس نے عرض کیا کیا ہم اس کی دیت دیں جس نے نہ کھایا نہ پیا اور نہ ہی چلایا اس قسم کے بچے کی دیت نہیں لی جا سکتی۔ نبی اکرم صلی اللہ علیہ وسلم نے فرمایا یہ تو شاعروں کی سی باتیں کرتا ہے بےشک اس کی دیت ایک غرہ ہے غلام ہو چاہے لونڈی اس باب میں حمید بن مالک بن نابغہ رضی اللہ عنہ سے بھی روایت مذکور ہیں حدیث ابوہریرہ حسن صحیح ہے اہل علم کے نزدیک اس پر عمل ہے بعض علماء فرماتے ہیں غرہ سے مراد غلام یا لونڈی یا پانچسو درہم ہیں بعض فرماتے ہیں گھوڑا یا خچر بھی اس میں داخل ہے۔ (جامع ترمذی شریف،کتاب الدیت،باب۹۵۲،مَا جَاءَ فِي دِيَةِ الْجَنِينِ۔ جلد۱ص۷۰۵،حديث نمبر ١٤١١)

کافر کے بدلے مسلمان کو قتل نہ کیا جائے حضرت ابو جحیفہ رضی اللہ عنہ سے روایت ہے انہوں نے حضرت علی مرتضیٰ کرم اللہ وجہ الکریم سے پوچھا کیا آپ کے پاس ایسی تحریر ہے جو اللہ کی کتاب میں نہ ہو آپ نے فرمایا اس ذات کی قسم جس نے دانے کو پھاڑا اور جاندار کو پیدا کیا مجھے تو وہی معلوم ہے جو اللہ تعالیٰ کسی آدمی کو سمجھ عطا فرماتا ہے اور جو کچھ صحیفہ میں ہے راوی فرماتے ہیں میں نے پوچھا صحیفہ میں کیا ہے حضرت علی رضی اللہ عنہ نے فرمایا دیت قیدی کا چھڑانا اور یہ کہ کسی کافر کے بدلے میں مسلمان کو نہ قتل کیا جائے، اس باب میں حضرت عبداللہ بن عمرو رضی اللہ عنہ سے بھی روایت مذکور ہیں حدیث علی حسن صحیح ہے بعض علماء کا اس پر عمل ہے سفیان ثوری، مالک بن انس، شافعی، احمد اور اسحٰاق رحمہم اللہ کا یہی مسلک ہے فرماتے ہیں کافر کے بدلے مومن کو قتل نہ کیا جائے بعض علماء فرماتے ہیں ذمی کافر کے بدلے مسلمان قتل کیا جائے گا پہلا قول اصح ہے۔ (جامع ترمذی شریف،کتاب الدیت،باب۹۵۳،مَا جَاءَ لَا يُقْتَلْ مُسْلِمُ بِكَافِرٍ،جلد۱ص۷۰۶،حديث نمبر ١٤١٢)

حضرت عمرو بن شعیب بواسطہ والد اپنے دادا سے روایت کرتے ہیں رسول اکرم صلی اللہ علیہ وسلم نے فرمایا کافر کے بدلے مسلمان کو قتل نہ کیا جائے اس اسناد سے نبی اکرم صلی اللہ علیہ وسلم سے مروی ہے کافر کی دیت مومن کی دیت کا نصف ہے۔ اس باب میں حضرت عبداللہ بن عمرو رضی اللہ عنہ کی روایت حسن ہے یہودی اور نصرانی کی دیت میں علماء کا اختلاف ہے بعض اہل علم اس طرف گئے ہیں جو رسول اکرم صلی اللہ علیہ وسلم سے مروی ہے۔ حضرت عمر بن عبدالعزیز رضی اللہ عنہ فرماتے ہیں یہودی اور نصرانی کی دیت مسلمان کی دیت کا نصف ہے امام احمد بن حنبل رحمہ اللہ بھی یہی فرماتے ہیں حضرت عمر بن خطاب رضی اللہ عنہ سے مروی ہے کہ یہودی اور نصرانی کی دیت چار ہزار درہم اور مجوسی کی دیت آٹھ سو درہم ہیں امام مالک، شافعی اور اسحٰاق رحمہم اللہ کا بھی یہی قول ہے۔ بعض اہل علم فرماتے ہیں یہودی اور عیسائی کی دیت مسلمان کی دیت کے برابر ہے سفیان ثوری اور اہل کوفہ رحمہم اللہ اسی کے قائل ہیں۔ (جامع ترمذی شریف،کتاب الدیت،باب۹۵۳،مَا جَاءَ لَا يُقْتَلْ مُسْلِمُ بِكَافِرٍ،جلد۱ص۷۰۶،حديث نمبر ١٤١٣)

غلام کو قتل کرنا حضرت سمرہ رضی اللہ عنہ سے روایت ہے رسول اکرم صلی اللہ علیہ وسلم نے فرمایا جس نے اپنے غلام کو قتل کیا ہم اسے قتل کریں گے اور جس نے غلام کے اعضاء کاٹے ہیں ہم اس کے اعضا کاٹیں گے یہ حدیث حسن غریب ہے بعض تابعی علماء جن میں حضرت ابراہیم نخعی رحمہ اللہ بھی شامل ہیں اسی طرف گئے ہیں۔ بعض علماء جن میں حضرت حسن بصری اور عطا بن ابی رباح رحمہ اللہ بھی شامل ہیں فرماتے ہیں آزاد اور غلام کے درمیان خون اور زخم میں قصاص نہیں ہے امام احمد اور اسحٰاق رحمہم اللہ کا یہی قول ہے بعض اہل علم فرماتے ہیں مالک اپنے غلام کو قتل کرے تو اس سے قصاص نہ لیا جائے دوسرے کے غلام کا قاتل قصاص میں قتل کیا جائے یہ سفیان ثوری اور اہل کوفہ رحمہم اللہ کا قول ہے۔ (جامع ترمذی شریف،کتاب الدیت،باب۹۵۴،مَا جَاءَ فِي الرَّجُلِ يَقْتُلُ عَبْدَهُ،جلد۱ص۷۰۷،حديث نمبر ١٤١٤)

خاوند کی دیت سے عورت کا حصہ حضرت سعید بن مسیب رحمہ اللہ سے روایت ہے حضرت عمر بن خطاب رضی اللہ عنہ فرماتے تھے دیت مرد کے قبیلہ پر ہیں اور عورت خاوند کی دیت سے وارث نہیں ہوتی یہاں تک کہ ضحاک بن سفیان کلابی نے حضرت عمر رضی اللہ عنہ کو خبر دی کہ حضور صلی اللہ علیہ وسلم نے ان کی طرف لکھا اشیم ضبابی کی بیوی کو اس کے شوہر کا وارث بناؤ۔ یہ حدیث حسن صحیح ہے اور اہل علم کے نزدیک اس پر عمل ہے۔ (جامع ترمذی شریف،کتاب الدیت،باب۹۵۵،مَا جَاءَ فِي الْمَرْأَةِ تَرِثُ مِنْ دِيَةِ زَوْجِهَا -جلد۱ص۷۰۷،حديث نمبر ١٤١٥)

قصاص حضرت عمران بن حصین رضی اللہ عنہ سے روایت ہے ایک شخص نے کسی دوسرے کا ہاتھ کاٹ کھایا اس نے ہاتھ کھینچا تو کاٹنے والے کے اگلے دو دانت ٹوٹ گئے یہ لوگ اپنا جھگڑا حضور صلی اللہ علیہ وسلم کی خدمت میں لے گئے آپ نے فرمایا تم میں سے ایک اپنے بھائی کو اس طرح کاٹ کھاتا ہے جس طرح اونٹ کاٹ کھاتے ہیں تمہارے لیے دیت نہیں اس پر اللہ تعالٰی نے آیت کریمہ نازل فرمائی ؛؛ والجروح قصاص ؛؛(سورہ مائدہ آیت نمبر ٤٥)( زخموں میں بدلہ ہے) اس باب میں حضرت یعلیٰ بن امیہ اور سلمہ بن امیہ رضی اللہ عنہما سے بھی روایات مذکور ہیں یہ دونوں بھائی ہیں عمران بن حصین کی روایت حسن صحیح ہے۔ (جامع ترمذی شریف،کتاب الدیت،باب۹۵۶،مَا جَاءَ فِي الْقِصَاصِ،جلد۱ص۷۰۸،حديث نمبر ١٤١٦)

تہمت میں قید کرنا حضرت بہز بن حکیم بواسطہ والد اپنے دادا سے روایت کرتے ہیں نبی اکرم صلی اللہ علیہ وسلم نے ایک آدمی کو تہمت لگانے کی سزا میں قید کر دیا پھر اسے چھوڑ دیا، اس باب میں حضرت ابوہریرہ رضی اللہ عنہ سے بھی روایت ہے حدیث بہز حسن ہے اسماعیل بن ابراہیم نے بہز بن حکیم سے یہ روایت اس سے زیادہ طویل اور مکمل روایت کی۔ (جامع ترمذی شریف،کتاب الدیت،باب۹۵۷،مَا جَاءَ فِي الْحَبْسِ فِي التُّہْمَةِ،جلد۱ص۷۰۸،حديث نمبر ١٤١٧)

حضرت سعید بن زید رضی الله عنہ سے روایت ہے کہ نبی اکرم صلی اللہ علیہ وسلم نے فرمایا: ”جو اپنے مال کی حفاظت کرتے ہوئے مارا جائے وہ شہید ہے“۔ امام ترمذی کہتے ہیں: ۱- یہ حدیث حسن صحیح ہے، ۲- اس حدیث میں حاتم بن سیاہ مروزی نے اضافہ کیا ہے، معمر کہتے ہیں: زہری سے مجھے حدیث پہنچی ہے، لیکن میں نے ان سے نہیں سنا کہ انہوں نے اس حدیث یعنی «من قتل دون ماله فهو شهيد» ”جو اپنے مال کی حفاظت کرتے ہوئے مارا جائے وہ شہید ہے“ میں کچھ اضافہ کیا ہو، اسی طرح شعیب بن ابوحمزہ نے یہ حدیث بطریق: «الزهري عن طلحة بن عبد الله عن عبدالرحمٰن بن عمرو بن سهل عن سعيد بن زيد عن النبي صلى الله عليه وسلم» روایت کی ہے، نیز سفیان بن عیینہ نے بطریق: «الزهري عن طلحة بن عبد الله عن سعيد بن زيد عن النبي صلى الله عليه وسلم» روایت کی ہے، اس میں سفیان نے عبدالرحمٰن بن عمرو بن سہل کا ذکر نہیں کیا۔ (جامع ترمذی شریف،کتاب الدیت،باب۹۵۸،مَا جَاءَ مَنْ قُتِلَ دُونَ مَالِهِ فَهُوَ شهيدٌ،جلد۱ص۷۰۸،حديث نمبر ١٣١٨)

حضرت عبداللہ بن عمرو رضی الله عنہما سے روایت ہے کہ نبی اکرم صلی اللہ علیہ وسلم نے فرمایا: ”جو اپنے مال کی حفاظت کرتے ہوئے مارا جائے وہ شہید ہے“۔ امام ترمذی کہتے ہیں: ۱- حضرت عبداللہ بن عمرو رضی الله عنہما کی حدیث حسن ہے، یہ دوسری سندوں سے بھی ان سے مروی ہے ۲- بعض اہل علم نے آدمی کو اپنی جان و مال کی حفاظت کے لیے دفاع کی اجازت دی ہے، ۳- اس باب میں حضرت علی، سعید بن زید، ابوہریرہ، ابن عمر، ابن عباس اور حضرت جابر رضی الله عنہم سے بھی احادیث آئی ہیں، ۴- عبداللہ بن مبارک کہتے ہیں: آدمی اپنے مال کی حفاظت کے لیے دفاع کرے خواہ اس کا مال دو درہم ہی کیوں نہ ہو۔ (جامع ترمذی شریف،کتاب الدیت،باب۹۵۸،مَا جَاءَ مَنْ قُتِلَ دُونَ مَالِهِ فَهُوَ شهيدٌ،جلد۱ص۷۰۸،حديث نمبر ١٤١٩)

حضرت عبداللہ بن عمرو رضی الله عنہما کہتے ہیں کہ رسول اللہ صلی اللہ علیہ وسلم نے فرمایا: ”جس آدمی کا مال ناحق چھینا جائے اور وہ اس کی حفاظت کے لیے دفاع کرتا ہوا مارا جائے تو وہ شہید ہے“۔ امام ترمذی کہتے ہیں: یہ حدیث حسن صحیح ہے۔ اس سند سے بھی حضرت عبداللہ بن عمرو بن العاص رضی الله عنہما نے نبی اکرم صلی اللہ علیہ وسلم سے اسی طرح روایت کی ہے۔ (جامع ترمذی شریف،کتاب الدیت،باب۹۵۸،مَا جَاءَ مَنْ قُتِلَ دُونَ مَالِهِ فَهُوَ شهيدٌ،جلد۱ص۷۰۸،حديث نمبر ١٤٢٠)

حضرت سعید بن زید رضی الله عنہ کہتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: ”جو اپنے مال کی حفاظت کرتے ہوئے قتل کیا جائے وہ شہید ہے، جو اپنے دین کی حفاظت کرتے ہوئے قتل کیا جائے وہ شہید ہے، جو اپنی جان کی حفاظت کی خاطر مارا جائے وہ شہید ہے اور جو اپنے اہل و عیال کی حفاظت کرتے ہوئے قتل کیا جائے وہ شہید ہے“۔ امام ترمذی کہتے ہیں: ۱- یہ حدیث حسن صحیح ہے، ۲- ابراہیم بن سعد سے کئی راویوں نے اسی جیسی حدیث روایت کی ہے۔ (جامع ترمذی شریف،کتاب الدیت،باب۹۵۸،مَا جَاءَ مَنْ قُتِلَ دُونَ مَالِهِ فَهُوَ شهيدٌ،جلد۱ص۷۰۸،حديث نمبر ١٤٢١)

قسامت حضرت رافع بن خدیج رضی اللہ عنہ سے روایت ہے حضرت عبداللہ بن سہیل بن زید اور محیصہ بن مسعود بن زید باہر نکلے خیبر میں پہنچے تو ایک دوسرے سے جدا ہو گئے پھر حضرت محیط نے حضرت عبداللہ بن سہیل کو مقتول پایا۔ چنانچہ وہ خود حویصہ بن مسعود اور عبدالرحمٰن بن سہیل رضی اللہ عنہم نبی اکرم صلی اللہ علیہ وسلم کی خدمت میں حاضر ہوئے عبدالرحمٰن ان میں سے چھوٹے تھے انہوں نے گفتگو کرنا چاہی تو حضور صلی اللہ علیہ وسلم نے فرمایا بڑے کی بڑائی کا خیال رکھو۔وہ خاموش ہو گئے اور ان کے دوسرے دونوں ساتھیوں نے گفتگو کی پھر یہ بھی ان کے ساتھ بولنے لگے اور نبی اکرم صلی اللہ علیہ وسلم سے عبداللہ بن سہیل کے قتل کا ذکر کیا آپ نے فرمایا تم پچاس قسمیں کھاتے ہو کہ اپنے ساتھی یا ان کے قاتل کے مستحق ہو جاؤ۔ انہوں نے عرض کیا ہم کیسے قسم کھائیں جبکہ ہم موجود نہیں تھے آپ نے فرمایا تو یہود پچاس قسمیں کھا کر تم کو بری کر دے کہنے لگے ہم کفار کی قسمیں کیسے قبول کریں۔جب حضور صلی اللہ علیہ وسلم نے یہ بات دیکھی تو اپنی طرف سے دیت عطا فرمائی۔ حسن بن علی خلال بواسطہ یزید بن ہارون یحیٰی بن معبد بشیر بن یسار اور سہیل بن ابی حثمہ حضرت رافع بن خدیج رضی اللہ عنہ سے اس کے ہم معنی روایت نقل کرتے ہیں یہ حدیث حسن صحیح ہے قسامت کے بارے میں اہل علم کا اس پر عمل ہے بعض فقہاء مدینہ کے خیال میں قسامت سے قصاص آتا ہے بعض اہل کوفہ اور دیگر علماء فرماتے ہیں قسامت سے قصاص واجب نہیں ہوتا صرف دیت واجب ہوتی ہے۔ (جامع ترمذی شریف،کتاب الدیت،باب۹۵۹،مَا جَاءَ فِي الْقَسَامَةِ،جلد۱ص۷۱۰،حديث نمبر ١٤٢٢)