Baab, Jiska Aakhri Kalaam Ho "Laa Ilaaha Illallaah". Imaam Bukhaari Farmaate Hai'n Ke, Aur Wahab Bin Munabbeh Se Kaha Gaya, Kya "Laa Ilaaha Illallaah" Jannat Ki Chaabi Nahee'n Hai ? Unho'n Ne Kaha, Kyu'n Nahee'n ! Lekin Har Chaabi Ke Dandaane (Daa'nt) Hote Hai'n, Agar Tum Dandaane Waali Chaabi Laaye To (Jannat Ka Taala) Khol Diya Jaayega Warna Nahee'n Khola Jaayega, (Hadees No.1237 Ka Tarjuma Yahaa'n Se Shuru Hota Hai Ke) Hazrat Abu Zar Radiallahu Anhu Se Marwi Hai Ke Rasoolullah ﷺ Ne Farmaaya, Mere Paas Mere Rab Ki Taraf Se Aane Waala Aaya, Pas Usne Mujhe Khabar Di Ya Farmaaya, Mujhe Bashaarat Di Ke Jo Shakhs Meri Ummat Me'n Se Iss Haal Me'n Mara Ke Woh Allah Se Bilkul Shirk Nahee'n Karta Tha To Woh Jannat Me'n Daakhil Hoga Mai'n Ne Kaha, Khwaah Usne Zina Kiya Ho Aur Khwaah Usne Chori Ki Ho, Aap ﷺ Ne Farmaaya, Khwaah Usne Zina Kiya Ho Aur Khwaah Usne Chori Ki Ho.
Hazrat Abdullah Radiallahu Anhu Ne Bayaan Kiya Ke Nabi e Kareem ﷺ Ne Farmaaya, Jo Shakhs Allah Azzowajal Ke Saath Zara Sa Bhi Shirk Karte Huwe Mar Gaya Woh Dozakh Me'n Daakhil Hoga, Aur Mai'n Kehta Hoo'n Ke Jo Shakhs Iss Haal Me'n Mara Ke Usne Allah Ke Saath Bilkul Shirk Nahee'n Kiya Woh Jannat Me'n Daakhil Hoga.
Baab, Janaa'iz Ke Saath Jaane Ka Hukm. Hazrat Bara Radiallahu Anhu Ne Bayaan Kiya Ke Hume'n Nabi e Kareem ﷺ Ne 7 Cheezo'n Ka Hukm Diya Aur 7 Cheezo'n Se Mana Farmaaya, Hume'n Janaazo'n Ke Saath Jaane Ka, Mareez Ki Iyaadat Karne Ka, Da'wat Dene Waale Ki Da'wat Qabool Karne Ka, Mazloom Ki Madad Karne Ka, Qasam Poori Karne Ka, Salaam Ka Jawaab Dene Ka Aur Chhee'nk Lene Waale Ko Du'aa Dene Ka Hukm Diya, Aur Humko Chaa'ndi Ke Bartan Iste'maal Karne Se, Sone Ki A'ngoothi Pahenne Se, Resham, Deebaaj,(Aisa Kapda Jo Misr O Sham Me Tayyar Kiya Jata Tha Aur Un Kapdon Par Kuch Shaklen Bani Hoti Thi) Qassi Aur Istabraq Pahenne Se Mana Farmaaya.
Hazrat Sa'eed Bin Musayyab Ne Khabar Di Ke Hazrat Abu Hurairah Radiallahu Anhu Ne Bayaan Kiya Ke Mai'n Ne Rasool e Akram ﷺ Ko Yeh Farmaate Huwe Suna Hai Ke Musalmaan Ke Musalmaan Par 5 Haq Hai'n, Salaam Ka Jawaab Dena, Mareez Ki Iyaadat Karna, Janaazo'n Ke Saath Jaana, Da'wat Qabool Karna Aur Chhee'nk Lene Waale Ko Jawaab Dena, Amro Bin Salma Ki Mutaabe'at Abdur Razzaaq Ne Ki Hai Unho'n Ne Kaha, Hume'n Ma'mar Ne Khabar Di Aur Iss Hadees Ko Salaamah Ne Uqail Se Riwaayat Kiya Hai.
Baab, Jab Mayyat Ko Kafan Me'n Lapet Diya Jaaye To Phir Uske Paas Jaana, Hazrat Aa'yesha Radiallahu Anha Rasoolullah ﷺ Ki Biwi Ne Khabar Di Unho'n Ne Bataaya Ke Hazrat Abu Bakar Radiallahu Anhu Sanakh Me'n Waaqe Apne Ghar Se Ghode Par Sawaar Hokar Aaye Hatta Ke Masjid Me'n Thehre, Phir Kisi Shakhs Se Koi Baat Nahee'n Ki, Hatta Ke Hazrat Aa'yesha Radiallahu Anha Ke Paas Aaye, Pas Nabi e Kareem ﷺ Ka Qasad Kiya, Uss Waqt Aap ﷺ Ek Sooti Chaadar Me'n Lapte Huwe The, Hazrat Abu Bakar Radiallahu Anhu Ne Aap ﷺ Ke Chehre Ko Khola, Phir Aap ﷺ Par Jhuk Kar Aap ﷺ Ke Chehre Ko Bosa Diya, Phir Rone Lage, Pas Kaha, Aap ﷺ Par Mere Maa'n Baap Fida Ho'n, Aye Allah Ke Nabi ! Allah Aap ﷺ Par 2 Mauto'n Ko Jama Nahee'n Karega, Rahi Woh Maut Jo Allah Ne Aap ﷺ Keliye Likh Di Thi, So Aap ﷺ Uss Maut Ko Pa Chuke, Abu Salma Ne Kaha, Mujhe Hazrat Ibne Abbaas Radiallahu Anhuma Ne Khabar Di Ke Hazrat Abu Bakar Radiallahu Anhu Nikal Gaye Aur Hazrat Umar Radiallahu Anhu Logo'n Se Baate'n Kar Rahe The, Hazrat Abu Bakar Radiallahu Anhu Ne Kaha, Baith Jaaye'n ! Pas Unho'n Ne Inkaar Kiya, Unho'n Ne Phir Kaha Baith Jaaye'n ! Unho'n Ne Inkaar Kiya, Phir Hazrat Abu Bakar Radiallahu Anhu Ne Kalma e Shahaadat Padha To Log Unki Taraf Mutawajjeh Ho Gaye Aur Hazrat Umar Radiallahu Anhu Ko Chhod Diya, Pas Hazrat Abu Bakar Radiallahu Anhu Ne Kaha, Ba'ad Hamd Wa Salaat Ke Yeh Ma'loom Hona Chaahiye Ke Tum Me'n Se Jo Shakhs (Sayyaduna) Mohammad (ﷺ) Ki Ibaadat Karta Tha To Beshak (Sayyaduna) Mohammad (ﷺ) Ko Maut Aa Gayi Aur Jo Allah Ki Ibaadat Karta Tha To Allah Azzowajal Zindah Hai Usko Maut Nahee'n Aayegi, Allah Azzowajal Ka Irshaad Hai, Aur Mohammad (Khuda Nahee'n Hai) Sirf Rasool Hai'n, Shaakireen, Tak, (Sureh Aale Imraan, Aayat No.144) Aur Allah Ki Qasam ! Logo'n Ko Yoo'n Lagta Tha Ke Allah Azzowajal Ne Iss Aayat Ko Abhi Naazil Kiya Hai Hatta Ke Iss Aayat Ki Hazrat Abu Bakar Radiallahu Anhu Ne Tilaawat Ki Aur Logo'n Ne Hazrat Abu Bakar Radiallahu Anhu Se Sunkar Iss Aayat Ko Yaad Kiya, Pas Jis Bashar Ne Bhi Iss Aayat Ko Suna Iski Tilaawat Kar Raha Tha.
Khaarija Bin Zaid Bin Saabit Ne Khabar Di Ke Hazrat Ummal Ala Radiallahu Anha Ansaar Ki Ek Khaatoon Thee'n, Unho'n Ne Nabi e Kareem ﷺ Se Bay'at Ki Thi Woh Bayaan Karti Hai'n Ke Muhaajireen Ko Qura Andaazi Se Taqseem Kiya Gaya, Pas Humaare Hisse Me'n Hazrat Usmaan Bin Maz'oon Radiallahu Anhu Aaye, Pas Humne Unhe'n Apne Gharo'n Me'n Thehraaya, Pas Unko Bahot Shadeed Dard Ho Gaya, Jisme'n Woh Faut Ho Gaye, Pas Jab Woh Faut Ho Gaye, To Unko Gusl Diya Gaya, Aur Unhe'n Unke Kapdo'n Me'n Kafan Pehnaaya Gaya, Rasoolullah ﷺ Tashreef Laaye To Mai'n Ne Arz Kiya, Aye Abus Saa'ib ! Tum Par Allah Ki Rehmat Ho, Meri Tumhaare Muta'alliq Yeh Shahaadat Hai Ke Beshak Allah Azzowajal Ne Tumhaari Takreem Ki Hai, Pas Nabi e Kareem ﷺ Ne Farmaaya, Tumhe'n Kisne Bataaya Ke Allah Ne Unki Takreem Ki Hai ? Mai'n Ne Arz Kiya Ya Rasoolallah ﷺ ! Aap ﷺ Par Mere Maa'n Baap Fida Ho'n ! Phir Allah Kiski Takreem Karega ? Pas Aap ﷺ Ne Farmaaya, Rahe Woh To Unke Paas Yaqeeni Baat Aa Chuki Hai, Aur Allah Ki Qasam ! Mai'n Unke Liye Khair Ki Tawaqqo Rakhta Hoo'n, Aur Allah Ki Qasam Mai'n Az Khud Nahee'n Jaanta Haalaa'nke Mai'n Allah Ka Rasool Hoo'n Ke Mere Saath Kya Kiya Jaayega, Hazrat Ummal Ala Ne Kaha, Pas Allah Ki Qasam ! Mai'n Iske Ba'ad Kabhi Bhi Kisi Ki Ta'reef Nahee'n Karti, Hume'n Sa'eed Bin Ufair Ne Hadees Bayaan Ki Unho'n Ne Kaha Hume'n Lais Ne Iski Misl Hadees Bayaan Ki Aur Naafe Bin Yazeed Ne Kaha Az Uqail, "Maa Yuf'alu Bihi", Aur Shoeb Aur Amro Bin Deenaar Aur Ma'mar Ne Iss Hadees Ki Mutaabe'at Ki.
Hazrat Jaabir Bin Abdullah Radiallahu Anhu Ne Bayaan Kiya Ke, Jab Mere Waalid Ko Shaheed Kar Diya Gaya, To Mai'n Unke Chehre Se Kapde Khol Kar Ro Raha Tha, Aur Log Mujhe Usse Mana Kar Rahe The, Aur Nabi e Kareem ﷺ Mujhe Usse Mana Nahee'n Farma Rahe The, Phir Phoophi Faatema Rone Lagee'n, To Nabi e Kareem ﷺ Ne Farmaaya, Tum Ro'o Ya Na Ro'o Farishte Unpar Apne Paro'n Se Saaya Kar Rahe Hai'n Hatta Ke Tumne Un (Ke Janaaze) Ko Utha Liya, Sho'ba Ki Mutaabe'at Ibne Juraij Ne Ki Hai, Unho'n Ne Kaha Mujhe Ibne Munkadir Ne Khabar Di Ke Unho'n Ne Hazrat Jaabir Radiallahu Anhu Se Suna.
Hazrat Abu Hurairah Radiallahu Anhu Ne Bayaan Kiya Ke Jis Din Najaashi Faut Huwe, Uss Din Rasoolullah ﷺ Ne Unki Maut Ki Khabar Di, Aap ﷺ Eidgaah Ki Taraf Nikle Aap ﷺ Ne Musalmaano'n Ki Safe'n Banaayee'n Aur 4 Takbeere'n Padhee'n. (Iss Hadees Se Koi Yeh Na Samajh Le'n Ke Gaayebaana Namaaz e Janaazah Padhna Jaa'iz Hai Balke Rasoolullah ﷺ Ne Najaashi Baadshaah Ki Gaayebaana Namaaz e Janaazah Iss Sabab Se Padhi Taake Logo'n Par Unka Musalmaan Hona Zaahir Ho Jaaye Kyu'nke Logo'n Ko Ma'loom Nahee'n Tha Ke Woh Musalmaan Hai'n To Unke Islaam Ke Izhaar Keliye Rasoolullah ﷺ Ne Aisa Kiya Warna Aap Dekhe'n Rasoolullah ﷺ Ki Hayaat e Paak Me'n Bahot Se Sahaaba e Kiraam Tabayi Maut Aur Shahaadat Ki Maut Paate Rahe'n Hai'n Lekin Najaashi Ke Alaawah Kisi Aur Ki Gaayebaana Namaaz e Janaazah Padhne Ke Muta'alliq Saheeh Sanad Se Daleel Maujood Nahee'n Warna Agar Gaayebaana Namaaz e Janaazah Padhna Jaa'iz Hota Umooman To Bataaye'n Bair e Ma'oona Me'n 70 Sahaaba e Kiraam Shaheed Huwe Jiska Rasoolullah ﷺ Ko Bahot Ranj Huwa Aur Aap ﷺ Ek Maah Tak Unke Qaatilo'n Ke Khilaaf Du'aa e Zarar Farmaate Rahe Lekin Aap ﷺ Ne Unpar Namaaz e Janaazah Nahee'n Padhi, Agar Ba'az Za'eef Riwaayaat Se Koi Gaayebaana Namaaz e Janaazah Par Istedlaal Karta Hai To Un Hadees Me'n Namaaz e Janaazah Muraad Nahee'n Balke Du'aa Muraad Hai (Maakhooz Az Ne'matul Baari Sharah Saheeh Bukhaari, Safha No.403, Hadees No.1245 Ke Tahet)
Hazrat Anas Bin Maalik Radiallahu Anhu Ne Bayaan Kiya Ke Nabi e Kareem ﷺ Ne Farmaaya, Zaid (Bin Haarisa) Ne Jhanda Pakda, Pas Woh Shaheed Ho Gaye, Phir Abdullah Bin Rawaaha Ne Jhanda Pakda, Pas Woh Shaheed Ho Gaye Aur Beshak Rasoolullah ﷺ Ki Dono'n Aa'nkho'n Se Aa'nsu Beh Rahe The, Phir Bagair Kisi Mashware Ke Khaalid Bin Waleed Ne Jhanda Pakda Pas Unko Fateh Haasil Ho Gayi.
Baab, Janaaze Ki Khabar Dena. Imaam Bukhaari Farmaate Hai'n Ke, Aur Abu Raafe Ne Hazrat Abu Hurairah Radiallahu Anhu Se Riwaayat Ki Ke Rasoolullah ﷺ Ne Farmaaya, Tumne Mujhe Khabar Kyu'n Nahee'n Di ? (Iss Ta'leeq Ki Asal Hadees Padhne Keliye Bukhaari Shareef Hadees No.458 Aur Muslim Shareef 956 Dekhe'n) Hazrat Ibne Abbaas Radiallahu Anhuma Bayaan Karte Hai'n Ke Ek Insaan Faut Ho Gaya Jiski Rasoolullah ﷺ Iyaadat Karte The, Woh Raat Ko Faut Huwa Tha To Sahaaba e Kiraam Ne Use Raat Ko Dafan Kar Diya, Jab Subah Huwi To Unho'n Ne Aap ﷺ Ko Khabar Di, Aap ﷺ Ne Farmaaya, Tumhe'n Kis Cheez Ne Mujhe Iski Ittela Dene Se Baaz Rakha Tha ? Sahaaba e Kiraam Ne Arz Kiya, Woh Raat Ka Waqt Tha, Humne Isko Na Pasand Kiya Ke Andhere Me'n Aap ﷺ Ko Aane Me'n Mushkil Pesh Aaye, Pas Aap ﷺ Uski Qabar Par Aaye Aur Uski Namaaz e Janaazah Padhi.
Baab, Uss Shakhs Ki Fazeelat Jiska Beta Faut Ho Gaya Aur Usne Sawaab Ki Niyyat Se Sabar Kiya, Imaam Bukhaari Likhte Hai'n Ke, Aur Allah Azzowajal Ka Irshaad Hai, Aap Sabar Karne Waalo'n Ko Bashaarat Dijiye (Sureh Baqarah, Aayat No.155) Hazrat Anas Radiallahu Anhu Ne Kaha Ke Nabi e Kareem ﷺ Ne Irshaad Farmaaya, Jis Musalmaan Ke Bhi 3 Aise Bete Faut Ho Jaaye'n Jo Baloogat Ki Umar Ko Na Paho'nche Ho'n To Uss Shakhs Ki Un Bachcho'n Par Rehmat Ke Fazal Ki Wajah Se Allah Uss Shakhs Ko Jannat Me'n Daakhil Kardega.
Riwaayat Hai Hazrat Abu Sa'eed Radiallahu Anhu Se Ke Aurto'n Ne Nabi e Kareem ﷺ Se Arz Kiya Ke Aap Alaihissalaam Humaare Liye Ek Din Muqarrar Karde'n, Pas Aap Alaihissalaam Ne Unko Waa'z Kiya Ke Jis Aurat Ke Bhi 3 Bachche Faut Ho Jaaye'n To Woh Uske Liye Dozakh Ki Aag Se Hijaab Ho Jaaye'nge, Ek Aurat Ne Kaha, Agar 2 Faut Ho'n ? Aap Alaihissalaam Ne Farmaaya, Aur 2 Bhi.
Hazrat Abu Sa'eed Radiallahu Anhu Aur Hazrat Abu Hurairah Radiallahu Anhu Dono'n Nabi e Kareem ﷺ Se Riwaayat Karte Hai'n, Hazrat Abu Hurairah Radiallahu Anhu Ne Kaha, Woh Bachche Baloogat Ki Umar Ko Na Paho'nche Ho'n.
Hazrat Abu Hurairah Radiallahu Anhu Se Marwi Hai Ke Rasoolullah ﷺ Ne Farmaaya, Jis Musalmaan Ke 3 Bachche Faut Ho'n To Woh Sirf Qasam Ko Poora Karne Keliye Dozakh Me'n Daakhil Hoga, Imaam Abu Abdullah Ne Kaha, Allah Ki Qasam ! Tum Me'n Se Har Shakhs Dozakh Me'n Daakhil Hoga (Sureh Mariyam, Aayat No.71) (Iss Hadees Ki Muta'addid Tashreehaat Ulama e Kiraam Ne Bayaan Ki Hai'n Jiska Khulaasa Yeh Hai Ke, Ek Qaul Ke Mutaabiq Sirf Kuffaar Dozakh Me'n Daakhil Ho'nge Musalmaan Daakhil Nahee'n Ho'nge, Doosre Qaul Ke Mutaabiq Momin Aur Kaafir Sab Dozakh Me'n Daakhil Ho'nge, Teesra Qaul Hai Ke, Dozakh Me'n Dukhool Se Muraad Sab Ka Pul Siraat Se Guzarna Hai, Chautha Qaul Hai Ke, Sab Dozakh Ke Qareeb Se Dozakh Ko Dekhe'nge, Aur Paa'nchwaa'n Qaul Yeh Hai Ke, Musalmaano'n Par Jo Duniya Me'n Bukhaar Aata Hai Ya Deegar Masaa'ib Aate Hai'n Woh Unke Dozakh Me'n Daakhil Hone Ke Ewaz Hai'n.
Baab, Mard Ka Qabar Ke Paas Kisi Aurat Se Yeh Kehna, Sabar Karo. Riwaayat Hai Hazrat Anas Bin Maalik Radiallahu Anhu Se Ke Nabi e Kareem ﷺ Qabar Ke Nazdeek Ek Aurat Ke Paas Se Guzre Woh Uss Waqt Ro Rahi Thi, Aap Alaihissalaam Ne Farmaaya, Allah Se Darr Aur Sabar Karo.
Baab, Mayyat Ko Beri Ke Paani Se Gusl Dena Aur Wazu Karaana. Imaam Bukhaari Likhte Hai'n Ke Aur Hazrat Ibne Umar Radiallahu Anhuma Ne Hazrat Sa'eed Bin Zaid Ke Bete Ko Khushbu Lagaayi, Unke Janaaze Ko Uthaaya, Namaaz Padhi Aur Wazu Nahee'n Kiya, Aur Hazrat Ibne Abbaas Radiallahu Anhuma Ne Kaha, Musalmaan Najis Nahee'n Hota Khwaah Zindah Ho Ya Murdah, Aur Hazrat Sa'd Ne Kaha, Agar Murdah Najis Hota To Mai'n Usko Na Chhoota, Aur Nabi e Kareem ﷺ Ne Farmaaya, Momin Najis Nahee'n Hota, (Phir Hadees No.1253 Ka Tarjuma Yeh Hai Ke) Hazrat Umme Atiya Ansaariya Radiallahu Anha Ne Bayaan Kiya Ke Jab Rasoolullah ﷺ Ki Saahebzaadi (Hazrat Zainab Radiallahu Anha) Faut Hogayee'n To Rasoolullah ﷺ Humaare Paas Tashreef Laaye Pas Aap Alaihissalaam Ne Farmaaya, Isko 3 Dafa Ya 5 Dafa Isse Zyaadah Dafa Gusl Do, Agar Tum Isko Munaasib Samjho, Paani Aur Beri Ke Patto'n Se Aur Iske Aakhir Me'n Kaafoor Ya Kuchh Kaafoor Rakh Dena, Pas Jab Tum Faarig Ho Jaao To Mujhe Bataana, Pas Jab Hum Faarig Hogayee'n To Humne Aap Alaihissalaam Ko Bataaya, Pas Aap Alaihissalaam Ne Humko Apna Tehband Diya Aur Farmaaya, Iss Tehband Ko Iska Izaar Bana Dena.
Baab, Taaq Martaba Gusl Dene Ka Istehbaab. Hazrat Umme Atiya Radiallahu Anha Bayaan Karti Hai'n Ke Humaare Paas Rasoolullah ﷺ Tashreef Laaye, Hum Uss Waqt Aap Alaihissalaam Ki Saahebzaadi Ko Gusl De Rahi Thee'n, Aap Alaihissalaam Ne Farmaaya, Inko 3 Martaba Ya 5 Martaba Ya Isse Zyaadah Paani Se Aur Beri Ke Patto'n Se Gusl Do, Aur Iske Aakhir Me'n Kaafoor Rakhna Aur Jab Tum Faarig Ho Jaao To Mujhe Ittela Dena, Pas Jab Hum Faarig Hogayee'n To Humne Aap Alaihissalaam Ko Ittela Di, Aap Alaihissalaam Ne Humko Apna Tehband Diya Aur Farmaaya, Isko Inke Badan Se Mila Dena, Pas Ayyub Ne Kaha, Mujhe Hafsa Ne Mohammad Ke Misl Hadees Bayaan Ki Aur Hafsa Ki Hadees Me'n Mazkoor Tha, Inko Taaq Martaba Gusl Dena Aur Isme'n 3 Ya 5 Ya 7 Martaba Ka Zikr Tha Ke Unke Daaye'n Jaanib Se Ibteda Karna Aur Wazu Ke Aa'za Se Gusl Shuru Karna, Aur Usme'n Yeh Zikr Tha Ke Hazrat Umme Atiya Ne Kaha, Aur Humne Unke Baalo'n Ki 3 Chotiyaa'n Banaayee'n.
Baab, Mayyat Ki Daaye'n Jaanib Se Gusl Ki Ibteda Karna. Hazrat Umme Atiya Radiallahu Anha Bayaan Karti Hai'n Ke Nabi e Kareem ﷺ Ne Apni Saahebzaadi Ke Gusl Ke Muta'alliq Irshaad Farmaaya, Unki Daaye'n Jaanib Se Aur Wazu Ke Aa'za Se Gusl Ki Ibteda Karna.
Baab, Mayyat Ki Wazu Ki Jagahe'n. Hazrat Umme Atiya Radiallahu Anha Ne Bayaan Kiya Ke, Jab Humne Nabi e Kareem ﷺ Ki Saahebzaadi Ko Gusl Diya To Jiss Waqt Hum Gusl De Rahi Thi, Aap Alaihissalaam Ne Humse Farmaaya, Inki Daaye'n Jaanib Se Aur Wazu Ke Aa'za Se Gusl Ki Ibteda Karna.
Baab, Kya Aurat Ko Mard Ke Tehband Me'n Kafan Diya Ja Sakta Hai. Hazrat Umme Atiya Radiallahu Anha Bayaan Karti Hai'n Ke Nabi e Kareem ﷺ Ki Saahebzaadi Faut Hogayee'n, Pass Aap Alaihissalaam Ne Humse Farmaaya, Inko 3 Martaba Gusl Do Ya 5 Martaba Ya Isse Zyaadah Martaba Agar Tum Munaasib Samjho, Phir Jab Tum Faarig Ho Jaao To Mujhe Muttala Karna, Phir Jab Hum Faarig Hogayee'n To Humne Aap Alaihissalaam Ko Muttala Kiya, Aap Alaihissalaam Ne Apna Tehband Utaar Kar Hume'n Ata Kiya Aur Farmaaya Isko Inke Jism Se Mila Dena.
Baab, Kaafoor Ko Aakhir Me'n Rakha Jaaye. Hazrat Umme Atiya Radiallahu Anha Bayaan Karti Hai'n Ke Nabi e Kareem ﷺ Ki Ek Saahebzaadi Faut Hogayee'n, Aap Alaihissalaam Ghar Se Nikle Pas Farmaaya, Inko 3 Martaba Gusl Do Ya 5 Martaba Ya Isse Zyaadah Martaba Agar Tum Munaasib Samjho, Aur Beri Ke Patto'n Se Gusl Do Aur Aakhir Me'n Kaafoor Rakho Ya Kuchh Kaafoor, Pas Jab Tum Faarig Ho Jaao To Mujhe Muttala Karna, Hazrat Umme Atiya Radiallahu Anha Ne Kaha, Pas Jab Hum Faarig Hogayee'n To Humne Aap Alaihissalaam Ko Ittela Ki, Aap Alaihissalaam Ne Apna Tehband Humko Ata Kiya Aur Farmaaya, Isko Inke Jism Se Mila Dena, Aur Ayyub Ne Hadees Bayaan Ki Az Hafsa Az Hazrat Umme Atiya Radiallahu Anha Iski Misl.
Aur Unho'n Ne (Ya'ni Hazrat Umme Atiya Radiallahu Anha Ne) Bayaan Kiya Ke Aap Alaihissalaam Ne Farmaaya, Inko 3 Martaba Ya 5 Martaba Ya 7 Martaba Gusl Do Ya Isse Zyaadah Martaba Agar Tum Munaasib Samjho, Hafsa Ne Bayaan Kiya Ke Hazrat Umme Atiya Radiallahu Anha Ne Kaha, Aur Humne Unke Sar Me'n 3 Chotiyaa'n Banaayee'n.
Baab, Aurat Ke Baalo'n Ko Kholna. Aur Ibne Seereen Ne Kaha, Aurat Ke Baalo'n Ko Kholne Me'n Koi Harj Nahee'n, Hazrat Umme Atiya Radiallahu Anha Ne Hadees Bayaan Ki Ke Unho'n Ne Rasoolullah ﷺ Ki Saahebzaadi Ke Sar Me'n 3 Me'ndhiyaa'n Banaayee'n, Unko Khol Diya Phir Unko Dhoya Phir Unki 3 Me'ndhiyaa'n Bana Dee'n.
Baab, Mayyat Ke Badan Ke Saath Kapda Kis Tarah Lapeta Jaaye. Aur Hasan Basri Ne Kaha, Paa'nchwe'n Kapde Ke Saath Mayyat Ki Raane'n Aur Uske Kolhe Qamees Ke Saath Baa'ndhe Jaaye'n. Hadees - Ayyub Ne Kaha Ke Mai'n Ne Ibne Seereen Se Suna Ke Hazrat Umme Atiya Radiallahu Anha Ansaar Ki Un Aurto'n Me'n Se Thee'n Jinho'n Ne Rasoolullah ﷺ Se Bay'at Ki Thi, Woh Apne Bete Ko Dekhne Keliye Sabqat Karke Basra Aayee'n Aur Usko Na Dekh Sakee'n, Unho'n Ne Hume'n Hadees Bayaan Ki Ke Hum Aap Alaihissalaam Ki Saahebzaadi Ko Gusl De Rahi Thee'n, Aap Alaihissalaam Ne Farmaaya Inko 3 Martaba Gusl Do Ya 5 Martaba Ya Isse Zyaadah Martaba Agar Tum Munaasib Samjho, Inko Paani Aur Beri Ke Patto'n Se Gusl Do Aur Iske Aakhir Me'n Kaafoor Rakho, Pas Jab Tum Faarig Ho Jaao To Mujhe Muttala Karna, Hazrat Umme Atiya Radiallahu Anha Ne Kaha, Pas Jab Hum Faarig Hogayee'n To Rasoolullah ﷺ Ne Hume'n Apna Tehband Ata Kiya, Pas Farmaaya Isko Inke Badan Ke Saath Mila Do, Aur Ispar Izaafa Na Kiya Jaaye, Aur Mujhe Nahee'n Ma'loom Woh Aap Alaihissalaam Ki Kaunsi Saahebzaadi Thee'n, Aur Unka Gumaan Tha Ke Tehband Ko Lapeta Jaaye, Aur Isi Tarah Ibne Seereen Aurat Keliye Hukm Dete The Ke Unke Badan Par Kapda Lapet Diya Jaaye Aur Unko Tehband Na Pehnaaya Jaaye.
Baab, Kya Aurat Ke Baalo'n Ki 3 Me'ndhiyaa'n Banaayi Jaaye'n. Hazrat Umme Atiya Radiallahu Anha Ne Kaha, Humne Nabi e Kareem ﷺ Ki Saahebzaadi Ki 3 Me'ndhiyaa'n Banaayee'n Aur Waki Ne Kaha Ke Sufyaan Ne Kaha Ke Uski Peshaani Aur Kanpattiyo'n Ke Baalo'n Ki.
Baab, Aurat Ke Baalo'n Ko Peechhe Daal Diya Jaaye. Hazrat Umme Atiya Radiallahu Anha Ne Bayaan Kiya Ke Nabi e Kareem ﷺ Ki Saahebzaadiyo'n Me'n Se Ek Faut Hogayee'n, Pas Humaare Paas Nabi e Kareem ﷺ Tashreef Laaye, Pas Farmaaya, Isko Beri Ke Patto'n Se 3 Martaba Ya 5 Martaba Ya Isse Zyaadah Martaba Gusl Do, Agar Tum Munaasib Samjho, Aur Iske Aakhir Me'n Kaafoor Rakhna Ya Kuchh Kaafoor, Phir Jab Tum Faarig Ho Jaao To Mujhe Muttala Karna, Pas Jab Hum Faarig Hogayee'n To Humne Aap Alaihissalam Ko Muttala Kiya, Aap Alaihissalam Ne Humko Apna Tehband Ata Kiya, Pas Humne Unke Baalo'n Ki 3 Me'ndhiyaa'n Banaayee'n Aur Unko Unke Peeche Daal Diya.
Baab, Kafan Keliye Safed Kapda. Hazrat Aa'yesha Siddeeqa Radiallahu Anha Bayaan Karti Hai'n Ke Nabi e Kareem ﷺ Ko 3 Safed Sooti Kapdo'n Me'n Kafan Diya Gaya Jo Yamani Sahooli Rooyi Se Bune Huwe The, Unme'n Qamees Thi Imaama Nahee'n Tha.
Baab, 2 Kapdo'n Me'n Kafan. Hazrat Ibne Abbaas Radiallahu Anhuma Bayaan Karte Hai'n Ke Ek Shakhs Maidaan e Arfa Me'n Khada Huwa Tha, Achaanak Woh Apni Oo'ntni Se Gir Gaya, Pas Oo'ntni Ne Usko Halaak Kardiya,Nabi e Kareem ﷺ Ne Farmaaya, Isko Paani Aur Beri Ke Patto'n Se Gusl Do, Aur Isko 2 Kapdo'n Me'n Kafan Do, Aur Isko Khushbu Na Lagaao, Aur Na Iska Sar Dhaa'npo, Kyu'n Ke Yeh Qayaamat Ke Din Talbiya Padhte Huwe Uthaaya Jaayega.
Baab, Mayyat Ko Khushbu Lagaana. Hazrat Ibne Abbaas Radiallahu Anhuma Bayaan Karte Hai'n Ke Ek Shakhs Rasoole Akram ﷺ Ke Saath Maidaan e Arfa Me'n Khada Huwa Tha, Achaanak Woh Apni Sawaari Se Gira, Jisne Usko Halaak Kardiya, Pas Rasoolullah ﷺ Ne Farmaaya, Isko Paani Se Aur Beri Ke Patto'n Se Gusl Do, Aur Isko 2 Kapdo'n Me'n Kafan Do, Aur Isko Khushbu Na Lagaao, Aur Na Iska Sar Dhaa'npo Kyu'n Ke Allah Isko Qayaamat Ke Din Iss Haal Me'n Uthaayega Ke Woh Talbiya Padh Raha Hoga.
Baab, Mehram Ko Kaise Gusl Diya Jaaye. Riwaayat Hai Hazrat Ibne Abbaas Radiallahu Anhuma Se Ke Ek Shakhs Ko Uske Oo'nt Ne Gira Diya Aur Hum Nabi e Kareem ﷺ Ke Saath The, Aur Woh Shakhs Mehram Tha, Pas Nabi e Kareem ﷺ Ne Farmaaya, Isko Paani Aur Beri Ke Patto'n Se Gusl Do, Aur Isko 2 Kapdo'n Me'n Kafan Pehnaao, Aur Isko Khushbu Na Lagaana, Aur Iska Sar Na Dhaa'npna Kyu'n Ke Allah Isko Qayaamat Ke Din Talbiya Padhte Huwe Uthaayega.
Hazrat Ibne Abbaas Radiallahu Anhuma Se Riwaayat Hai Ke Ek Shakhs Maidaan e Arfa Me'n Rasoolullah ﷺ Ke Saath Khada Huwa Tha, Woh Apni Sawaari Se Gir Pada, Ayyub Ne Kaha "Fawaqasat Hu" Aur Amro Ne Kaha "Fa Aqsa'at Hu" (Pas Usko Sawaari Ne Gira Diya) Pas Woh Faut Hogaya, Pas Aap Alaihissalaam Ne Farmaaya, Isko Paani Aur Beri Ke Patto'n Se Gusl Do, Aur Isko 2 Kapdo'n Me'n Kafan Do, Aur Isko Khushbu Na Lagaao, Aur Iska Sar Na Dhaa'npna Kyu'n Ke Isko Qayaamat Ke Din Uthaaya Jaayega, Ayyub Ne Kaha, Iss Haal Me'n Ke Woh Talbiya Padh Raha Hoga, Amro Ne Kaha Woh Talbiya Padhne Waala Hoga.
Baab, Uss Qamees Me'n Kafan Dena Jiska Haashiya Sila Huwa Ho Ya Be Sila Aur Bagair Qamees Ke Kafan Dena. Riwaayat Hai Hazrat Ibne Umar Radiallahu Anhuma Se Ke Abdullah Bin Ubi Jab Margaya To Uska Beta Radiallahu Anhu, Nabi e Akram ﷺ Ke Paas Aaya, Pas Usne Kaha Ya Rasoolallah ﷺ ! Aap Alaihissalaam Apni Qamees Mujhe Ata Kare'n, Mai'n Usko Kafan Paho'nchaau'nga Aur Uski Namaaz e Janaaza Aap Padhe'n Aur Uske Liye Astagfaar Kare'n, Pas Nabi e Kareem ﷺ Ne Unko Apni Qamees Ata Farma Di Aur Farmaaya, Mujhe Muttala Karna Mai'n Uski Namaaz Padhaau'nga, Pass Unho'n Ne Aap Alaihissalaam Ko Muttala Kiya, Pas Jab Aap Alaihissalaam Ne Unki Namaaz e Janaaza Padhaane Ka Iraadah Kiya, To Hazrat Umar Radiallahu Anhu Ne Aap Alaihissalaam Ko Kapda Pakad Kar Khee'ncha, (Ya'ni Rasoolullah ﷺ Ke Kapde Ko Pakad Kar) Arz Kiya, (Ya Rasoolallah ﷺ) Kya Allah Azzowajal Ne Aap Alaihissalaam Ko Munaafiqeen Ki Namaaz e Janaaza Padhaane Se Mana Nahee'n Kiya Hai ? Aap Alaihissalaam Ne Farmaaya, Aap Unke Liye Astagfaar Kare'n Ya Astagfaar Na Kare'n, Agar Aap Unke Liye 70 Martaba (Bhi) Astagfaar Kare'n To Allah Unki Magferat Nahee'n Farmaayega, (Sureh Tauba, Aayat No.80) Aapne Uski Namaaz e Janaaza Padhaayi To Phir Yeh Aayat Naazil Huwi, Aur Unme'n Se Jo Ko Marjaaye To Aap Uski Kabhi Bhi Namaaz e Janaaza Na Padhe'n. (Sureh Tauba, Aayat No.84)
Hazrat Jaabir Radiallahu Anhu Ne Bayaan Kiya Ke Nabi e Kareem ﷺ, Abdullah Bin Ubi Ke Dafan Hone Ke Ba'ad Uske Paas Gaye, Aap Alaihissalaam Ne Usko Qabar Se Nikaala, Phir Usme'n Apna Lu'aab Daala Aur Usko Apni Qamees Pehnaayi.H
Baab, Bagair Imaama Ke Kafan Dena. Hazrat Aa'yesha Radiallahu Anha Se Riwaayat Hai Ke Rasoolullah ﷺ Ko 3 Safed Sooti Kapdo'n Me'n Kafan Diya Gaya, Unme'n Qamees Thi Na Imaama.
Hishaam Ne Kaha, Mujhe Mere Waalid Ne Hadees Bayaan Ki Hazrat Aa'yesha Radiallahu Anha Ke Waaste Se Ke Rasoolullah ﷺ Ko 3 Kapdo'n Me'n Kafan Diya Gaya, Usme'n Qamees Thi Na Imaama.
Hazrat Aa'yesha Radiallahu Anha Se Riwaayat Hai Ke Rasoolullah ﷺ Ko "Yaman" Ke Bune Huwe 3 Safed Sooti Kapdo'n Me'n Kafan Diya Gaya, Unme'n Qamees Thi Na Imaama.
Baab, Tamaam Maal Se Kafan Dena. Imaam Bukhaari Likhte Hai'n Ke, Aur Ata Aur Zohri, Amro Bin Deenaar Aur Qataadah Ka Yehi Qaul Hai, (Ke Kafan Jamee Maal Se Hai) Aur Amro Bin Deenaar Ne Kaha Ke Khushbu Bhi Tamaam Maal Se Hai. Aur Ibraaheem Ne Kaha, Kafan Se Ibteda Ki Jaayegi Phir Qarz Se, Phir Wasiyyat Se, Aur Sufyaan Ne Kaha, Qabar Khodne Ki Aur Gusl Ki Ujrat Kafan Se Shumaar Ki Jaayegi. Sa'ad Apne Waalid Se Riwaayat Karte Huwe Bayaan Karte Hai'n Ke, Ek Din Hazrat Abdur Rehmaan Bin Auf Radiallahu Anhu Ke Saamne Khaana Laaya Gaya, To Unho'n Ne Kaha Ke Hazrat Mus'ab Bin Umair Radiallahu Anhu Ko Shaheed Kardiya Gaya Hai, Aur Woh Mujh Se Behtar The, Unko Kafan Pehnaane Keliye Sirf Ek Chaadar Mil Saki Aur Hazrat Hamzah Radiallahu Anhu Ko Shaheed Kardiya Gaya, Aur Ek Doosre Shakhs Ko Jo Mujh Se Afzal The, Unko Kafan Dene Keliye Sirf Ek Chaadar Mil Saki, Mujhe Iska Khatrah Hai Ke Humaari Pasandeedah Cheeze'n Hume'n Duniya Ki Zindagi Me'n Hi Dedi Gayi Hai'n, Phir Woh Rone Lage.
Baab, Jab Ek Kapde Ke Siwa Aur Koi Cheez Na Mile. Sa'ad Bin Ibraaheem Apne Waalid Ibraaheem Se Riwaayat Karte Hai'n, Unho'n Ne Bayaan Kiya Ke, Hazrat Abdur Rehmaan Bin Auf Radiallahu Anhu Ke Paas Khaana Laaya Gaya, Woh Uss Waqt Rozahdaar The, Pass Unho'n Ne Kaha, Hazrat Mus'ab Bin Umair Radiallahu Anhu Ko Shaheed Kardiya Gaya Aur Woh Mujh Se Behtar The, Unko Ek Aisi Chaadar Me'n Kafan Diya Gaya Tha Ke Agar Unka Sar Dhaa'npa Jaata To Unke Pair Khul Jaate Aur Agar Unke Pair Dhaa'npe Jaate To Unka Sar Khul Jaata Aur Unko Dafan Kardiya Gaya, Aur Unho'n Ne Kaha Ke, Hazrat Hamzah Radiallahu Anhu Ko Shaheed Kardiya Gaya, Aur Woh Mujh Se Behtar The, Phir Humaare Liye Zameen Kushaadah Kardi Gayi Aur Humko Duniya Se Woh Diya Gaya Jo Diya Gaya Aur Humko Yeh Darr Hai Ke Humaari Nekiyo'n Ka Ajar Hume'n Jaldi Dediya Gaya Hai, Hazrat Abdur Rehmaan Bin Auf Radiallahu Anhu Rone Lage Aur Khaana Tark Kardiya.
Baab, Jab Iske Siwa Kafan Na Mile Jo Sar Ko Chhupaaye Ya Qadmo'n Ko To Phir Sar Ko Dhaa'npa Jaaye. Hazrat Khabbaab Radiallahu Anhu Ne Kaha Ke, Humne Nabi e Kareem ﷺ Ke Saath Hijrat Ki, Hum Allah Azzowajal Ki Raza Dhoo'ndte The, Pas Humaara Ajar Allah Azzowajal Ke Zimma e Karam Par Hogaya, Pas Ba'az Hum Me'n Se Woh Hai'n Jo Faut Hogaye Aur Unho'n Ne Apne Ajar Me'n Se Kuchh Haasil Na Kiya, Unme'n Se Hazrat Mus'ab Bin Umair Radiallahu Anhu Hai'n, Aur Hum Me'n Se Ba'az Aise Log Hai'n Jin Keliye Unka Phal Pak Gaya Hai Aur Woh Use Chun Chun Kar Khaate Hai'n, Hazrat Mus'ab Bin Umair Radiallahu Anhu Gazwa e Ohad Me'n Shaheed Hogaye, Hume'n Unke Kafan Keliye Kuchh Na Mila, Pas Ek Chaadar Thi Jisse Unka Sar Dhaa'npte To Paa'on Khul Jaate The, Paa'on Dhaa'npte To Sar Khul Jaata Tha, Pas Nabi e Kareem ﷺ Ne Hume'n Hukm Diya Ke Hum Unka Sar Dhaa'np De'n, Aur Unke Pairo'n Par Izkhir (Ghaas) Daal De'n.
Baab, Jisne Nabi e Kareem ﷺ Ke Zamaane Me'n Kafan Tayyaar Kiya To Uss Par Inkaar Nahee'n Kiya Jaayega. Hazrat Sahal Radiallahu Anhu Bayaan Karte Hai'n Ke, Ek Aurat Rasoolullah ﷺ Ki Baargaah Me'n Ek Chaadar Lekar Aayi, Jiske Kinaaro'n Par Bunaayi Ki Huwi Thi, Kya Tum Jaante Ho Ke Burdah Kya Cheez Hai ? Logo'n Ne Kaha, Woh Chaadar Hai, Unho'n Ne Kaha Haa'n ! Uss Aurat Ne Kaha, Mai'n Ne Iss Chaadar Ko Apne Haath Se Buna Hai, Taake Mai'n Yeh Aap Alaihissalaam Ko Pehnaau'n, Nabi e Kareem ﷺ Ne Yeh Chaadar Leli, Uss Waqt Aap Alaihissalaam Ko Uski Zaroorat Bhi Thi, Aap Alaihissalaam Humaare Paas Uss Chaadar Ko Pahen Kar Aaye, Fulaa'n Shakhs Ne Uss Chaadar Ki Ta'reef Ki, Pas Kehne Laga, Yeh Kitni Achchi Chaadar Hai, Yeh Chaadar Aap Alaihissalaam Mujhe Inaayat Farma Dijiye, Logo'n Ne Usse Kaha, Yeh Tumne Achcha Nahee'n Kiya, Uss Chaadar Ko Nabi e Kareem ﷺ Ne Pehna Tha, Aur Uss Waqt Aap Alaihissalaam Ko Uski Zaroorat Thi, Phir Tumne Usko Maa'ng Liya, Aur Tumko Ma'loom Hai Ke Aap Alaihissalaam Sawaal Ko Mustarad Nahee'n Karte, Uss Shakhs Ne Kaha, Allah Ki Qasam. Mai'n Ne Pahenne Keliye Iss Chaadar Ka Sawaal Nahee'n Kiya Hai, Mai'n Ne Isliye Sawaal Kiya Hai, Taake Yeh Mera Kafan Ho Jaaye, Hazrat Sahal Radiallahu Anhu Ne Kaha, Pas Yeh Chaadar Uss Shakhs Ka Kafan Hogayi.
Baab, Aurto'n Ka Janaazo'n Ke Saath Jaana. Riwaayat Hai Hazrat Umme Atiya Radiallahu Anha Se Ke, Hume'n Janaazo'n Ke Saath Jaane Se Mana Kiya Gaya Tha, Aur Hume'n Janaazo'n Ke Saath Jaane Ki Zyaadah Targeeb Nahee'n Di Gayi Thi, Ya Humko Zyaadah Taakeed Se Mana Nahee'n Kiya Gaya.
Baab, Khaawind Ke Gair Par Aurat Ka Sog Karna. Hazrat Mohammad Bin Seereen Ne Bayaan Kiya Ke, Hazrat Umme Atiya Radiallahu Anha Ka Beta Faut Hogaya, Jab Teesra Din Aaya To Unho'n Ne Peela Rang Ma'ngaaya Aur Usko Apne Jism Par Lagaaya Aur Kaha Ke Hume'n Isse Mana Kiya Gaya Tha, Ke Hum Apne Khaawind Ke Alaawa Kisi Aur Ke Upar 3 Din Se Zyaadah Sog Kare'n.
Hazrat Zainab Binte Abi Salma Ne Bayaan Kiya Ke, Jab Hazrat Abu Sufyaan Radiallahu Anhu Ki Maut Ki Khabar (Mulk) Shaam Se Aayi To Hazrat Umme Habeeba Radiallahu Anha Ne Teesre Din Peela Ra'ng Ma'ngaaya Aur Rukhsaaro'n Aur Kalaa'iyo'n Par Mala Aur Kaha, Beshak Mai'n Isse Mustagni Hoo'n, Agar Mai'n Ne Nabi e Akram ﷺ Se Yeh Na Suna Hota Ke Jo Aurat Bhi Allah Par Aur Roze Aakherat Par Imaan Laayi Ho Uske Liye Yeh Jaa'iz Nahee'n Hai Ke Woh Apne Shauhar Ke Alaawa Kisi Aur Par 3 Din Se Zyaadah Sog Kare Pas Beshak Woh Shauhar Ke Upar 4 Maah Aur 10 Din Sog Kare.
Hazrat Zainab Binte Abi Salma Ne Khabar Di Ke, Woh Hazrat Umme Habeeba Radiallahu Anha Nabi e Kareem ﷺ Ki Biwi Ke Paas Gayee'n, Unho'n Ne Bayaan Kiya Ke Mai'n Ne Rasool e Akram ﷺ Ko Yeh Farmaate Huwe Suna Hai, Jo Aurat Allah Aur Yaum e Aakherat Par Imaan Rakhti Hai, Uske Liye Yeh Jaa'iz Nahee'n Hai Ke Woh Kisi Mayyat Ke Upar 3 Din Se Zyaadah Sog Kare Siwaaye Apne Shauhar Ke, Uspar 4 Maah 10 Din Sog Kare.
Phir Woh (Ya'ni Hazrat Zainab Binte Abi Salma) Hazrat Zainab Binte Jahash Radiallahu Anha Ke Paas Gayee'n, Jab Unke Bhaayi Faut Hogaye The, Phir Unho'n Ne Khushbu Ma'nga Kar Lagaayi, Phir Kaha, Mujhe Ab Khushbu Ki Zaroorat To Nahee'n Hai Lekin Mai'n Ne Rasool e Akram ﷺ Ko Mimbar Par Yeh Farmaate Huwe Suna Hai Ke Jo Aurat Allah Aur Yaum e Aakherat Par Imaan Laayi Ho, Uske Liye Yeh Jaa'iz Nahee'n Ke Woh Kisi Mayyat Par 3 Din Se Zyaadah Sog Kare Siwa Apne Shauhar Ke, Uspar 4 Maheene 10 Din Sog Kare.
Baab, Qabro'n Ki Ziyaarat Ka Bayaan. Hadees - Hazrat Anas Bin Maalik Radiallahu Anhu Bayaan Karte Hai'n Ke Nabi e Kareem ﷺ Ek Aurat Ke Paas Se Guzre Jo Qabar Ke Paas Baithi Huwi Ro Rahi Thi, Aap Alaihissalaam Ne Usse Farmaaya, Tum Allah Se Daro Aur Sabar Karo, Usne Arz Kiya, Tum Mujh Se Ek Taraf Hato, Tum Par Woh Museebat Nahee'n Aayi Jo Mujh Par Aayi Hai, Aur Uss Aurat Ne Aap Alaihissalaam Ko Pehchaana Nahee'n Tha, Uss Aurat Ko Bataaya Gaya Ke Yeh Nabi e Kareem ﷺ The, Tab Woh Nabi e Kareem ﷺ Ke Darwaaze Par Aayi, Usne Wahaa'n Darbaan Nahee'n Dekhe, Usne Kaha, Mai'n Ne Aap Alaihissalaam Ko Pehchaana Nahee'n Tha, Aap Alaihissalaam Ne Farmaaya, Sabar Uss Waqt Shumaar Hota Hai Jab Pehli Martaba Sadma Paho'nche.
Baab, Nabi e Akram ﷺ Ka Irshaad, Mayyat Ke Baa'z Ghar Waalo'n Ke Rone Se Mayyat Ko Azaab Diya Jaata Hai, Jab Ke Mayyat Par Noha Karna, Iska Tareeqa Ho, Kyu'n Ke Allah Azzowajal Ka Irshaad Hai, Apne Aapko Aur Apne Ghar Waalo'n Ko Dozakh Ki Aag Se Bachaao, (Sureh Tehreem, Aayat No.6), Aur Nabi e Kareem ﷺ Ne Farmaaya, Tum Me'n Se Har Ek Nigehbaan Hai Aur Usse Apne Maatahet Logo'n Ke Muta'alliq Sawaal Kiya Jaayega, Aur Agar Noha Karna Mayyat Ki Sunnat Na Ho To Phir Yeh Iss Tarah Hai Jiss Tarah Hazrat Aa'yesha Radiallahu Anha Ne Farmaaya, Koi Bojh Uthaane Waala Kisi Doosre Ka Bojh Nahee'n Uthaayega, (Sureh An'aam, Aayat No.164), Aur Woh Allah Ke Iss Qaul Ke Misl Hai, Aur Koi Bojh Waala Doosre Ko Bojh Uthaane Keliye Bulaayega To Usse Kuchh Bhi Uthaaya Nahee'n Jaayega (Sureh Faatir, Aayat No.18), Aur Woh Jo Bagair Noha Ke Rone Ki Ijaazat Di Gayi Hai, Aur Nabi e Kareem ﷺ Ne Farmaaya, Jiss Nafs Ko Bhi Zulman Qatal Kiya Jaayega To Pehle Ibne Aadam Par Uske Khoon Ke Gunaah Ka Hissa Hoga Aur Uski Wajah Yeh Hai Ke Usne Sabse Pehle Qatal Karna Ka Tareeqa Ijaad Kiya, Aur Hadees No.1284 Ka Tarjuma Yeh Hai Ke, Hazrat Usaama Bin Zaid Radiallahu Anhu Ne Hadees Bayaan Ki Ke, Nabi e Kareem ﷺ Ki Saahebzaadi Ne Aap Alaihissalaam Ki Taraf Paigaam Bheja Ke Mera Beta Faut Hogaya Hai, Aap Alaihissalaam Humaare Paas Tashreef Laaye'n, Aap Alaihissalaam Ne Jawaabi Paigaam Me'n Salaam Kaha Aur Farmaaya, Beshak Allah Hi Keliye Hai Jo Usne Leliya Aur Usi Keliye Hai Jo Usne Ata Kiya Aur Har Cheez Ki Uske Paas Muddat Muqarrar Hai, Pas Tum Sabar Karo Aur Sawaab Ki Ummeed Rakho, Unho'n Ne Phir Aap Alaihissalaam Ki Taraf Paigaam Bheja Aur Aap Alaihissalaam Ko Qasam Di Ke Aap Alaihissalaam Unke Paas Zaroor Tashreef Laaye'n, So Aap Alaihissalaam Khade Huwe Aur Aap Alaihissalaam Ke Saath Hazrat Saa'd Bin Ubaada, Hazrat Mu'aaz Bin Jabal, Hazrat Abi Bin Kaa'b, Hazrat Zaid Bin Saabit Aur Doosre Mard The (Radiallahu Anhum), Uss Bachche Ko Utha Kar Aap Alaihissalaam Ke Paas Laaya Gaya Aur Uski Saa'ns Ukhad Rahi Thi, Raawi Ne Kaha, Mere Gumaan Me'n Uska Jism Puraani Mushk Ki Tarah Tha, Pas Aap Alaihissalaam Ki Dono'n Aa'nkho'n Se Aa'nsu Behne Lage, Hazrat Saa'd Ne Arz Kiya, Ya Rasoolallah ﷺ Yeh Kya Hai ? Aap Alaihissalaam Ne Farmaaya, Yeh Allah Ki Rehmat Hai Jisko Allah Ne Apne Bando'n Ke Dil Me'n Kardiya Hai Aur Allah Apne Bando'n Me'n Se Sirf Rahem Karne Waalo'n Par Rahem Farmaata Hai.
Hazrat Anas Bin Maalik Radiallahu Anhu Ne Bayaan Kiya Ke, Hum Rasoolullah ﷺ Ki Saahebzaadi Ke Janaaze Me'n Haazir Huwe Aur Rasoolullah ﷺ Qabar Ki Ek Jaanib Baithe Huwe The, Pas Mai'n Ne Dekha Ke Aap Alaihissalaam Ki Dono'n Aa'nkho'n Se Aa'nsu Jaari Hai, Pas Aap Alaihissalaam Ne Poocha, Tum Me'n Se Koi Aisa Shakhs Hai Jisne Raat Ko Jima Na Kiya Ho ? Hazrat Abu Talha Radiallahu Anhu Ne Arz Kiya, Mai'n Hoo'n ! Aap Alaihissalaam Ne Farmaaya, Tum Qabar Me'n Utro, Pas Woh Aap Alaihissalaam Ki Saahebzaadi Ki Qabar Me'n Utre.
Abdullah Bin Ubaidullah Bin Abi Mulaika Ne Bayaan Kiya Ke, Hazrat Usmaan Radiallahu Anhu Ki Beti Makka Me'n Faut Hogayi, Hum Unke Janaaze Me'n Aaye, Aur Hazrat Ibne Abbaas Radiallahu Anhu Aur Hazrat Ibne Umar Radiallahu Anhu Bhi Unke Janaaze Me'n Aaye The Aur Beshak Mai'n Un Dono'n Ke Darmiyaan Me'n Baitha Huwa Tha, Ya Kaha, Mai'n Unme'n Se Kisi Ek Ke Paas Baitha Huwa Tha Ke Doosra Bhi Aagaya, Pas Woh Mere Pehlu Me'n Baith Gaya, Pas Hazrat Abdullah Bin Umar Radiallahu Anhuma Ne Hazrat Amro Bin Usmaan Se Kaha, Kya Aap Inko Rone Se Nahee'n Rokte Kyu'n Ke Rasoolullah ﷺ Ne Farmaaya Hai Ke Beshak Ghar Waalo'n Ke Rone Se Mayyat Ko Zaroor Azaab Diya Jaata Hai.
(Hadees No.1286 Me'n Jo Baat Mazkoor Hai Usko Sunne Ke Baa'd) Pas Hazrat Ibne Abbaas Radiallahu Anhuma Ne Kaha, Beshak Hazrat Umar Radiallahu Anhu Bhi Iss Qism Ki Baat Kehte The Phir Unho'n Ne Hadees Bayaan Ki Ke Mai'n Hazrat Umar Radiallahu Anhu Ke Saath Makka Se Lauta, Hatta Ke Jab Hum Maqaam e Baida Me'n Paho'nche To Uss Waqt Sawaaro'n Ki Jama'at Kekar Ke Darakht Ke Saaye Me'n Thi, Hazrat Umar Radiallahu Anhu Ne Farmaaya, Jaao ! Dekho Yeh Kaun Sawaar Hai'n ? Hazrat Ibne Abbaas Radiallahu Anhuma Ne Kaha Ke Mai'n Ne Dekha To Woh Hazrat Sohaib Radiallahu Anhu The, Mai'n Ne Hazrat Umar Radiallahu Anhu Ko Bataaya, To Hazrat Umar Radiallahu Anhu Ne Farmaaya, Unko Mere Paas Bula Kar Laao, Mai'n Waapas Hazrat Sohaib Radiallahu Anhu Ke Paas Gaya, Aur Unse Kaha Chaliye, Pas Woh Hazrat Ameerul Momineen Se Mile, Phir Jab Hazrat Umar Radiallahu Anhu Zakhmi Hogaye The To Hazrat Sohaib Radiallahu Anhu Rote Huwe Aaye Aur Kehne Lage, Haaye Mere Bhaayi ! Haaye Mere Bhaayi ! Pas Hazrat Umar Radiallahu Anhu Ne Kaha, Aye Sohaib ! Kya Tum Mujh Par Ro Rahe Ho ! Haalaa'nke Rasoolullah ﷺ Ne Farmaaya Hai, Mayyat Par Uske Baa'z Ghar Waalo'n Ke Rone Se Usko Azaab Diya Jaata Hai.
Hazrat Ibne Abbaas Radiallahu Anhuma Bayaan Karte Hai'n Ke, Jab Hazrat Umar Radiallahu Anhu Shaheed Hogaye To Mai'n Ne Hazrat Umar Radiallahu Anhu Ke Iss Qaul Ka Hazrat Aa'yesha Radiallahu Anha Se Zikr Kiya To Hazrat Aa'yesha Radiallahu Anha Ne Kaha, Allah Azzowajal Hazrat Umar Radiallahu Anhu Par Rahem Farmaaye, Allah Ki Qasam ! Rasoolullah ﷺ Ne Yeh Nahee'n Farmaaya Tha Ke Beshak Momin Mayyat Ke Ghar Waalo'n Ke Uspar Rone Se Allah Usko Azaab Deta Hai, Lekin Rasoolullah ﷺ Ne Yeh Farmaaya Tha, Beshak Kaafir Ke Ghar Waalo'n Ke Uspar Rone Se Allah Azzowajal Usko Zyaadah Azaab Deta Hai Aur Hazrat Aa'yesha Radiallahu Anha Ne Kaha, Tumhaare Liye Qur'aan Kaafi Hai, Aur Koi Bojh Uthaane Waala Doosre Ka Bojh Nahee'n Uthaayega (Sureh An'aam, Aayat No.164), Hazrat Ibne Abbaas Radiallahu Anhuma Ne Uss Waqt Kaha, Allah Ki Qasam ! Wohi Ha'nsaata Hai Aur Wohi Rulaata Hai (Sureh Najm, Aayat No.43), Ibne Abu Mulaika Ne Kaha, Allah Ki Qasam ! Yeh Sunkar Hazrat Ibne Umar Radiallahu Anhuma Ne Kuchh Nahee'n Kaha.
Hazrat Aa'yesha Siddeeqa Radiallahu Anha Nabi e Kareem ﷺ Ki Zauja Nabi e Kareem ﷺ Se Sunkar Bayaan Karti Hai'n Ke, Nabi e Kareem ﷺ Ek Yahoodiya Ke Paas Se Guzre, Jiss Par Uske Ghar Waale Ro Rahe The, Aap Alaihissalaam Ne Farmaaya, Yeh Uss Par Ro Rahe Hai'n Haalaa'nke Usko Uski Qabar Me'n Azaab Ho Raha Hai.
Abi Burdah Apne Waalid Se Riwaayat Karte Hai'n Ke Unho'n Ne Bayaan Kiya Ke, Jab Hazrat Umar Radiallahu Anhu Zakhmi Hogaye To Hazrat Sohaib Radiallahu Anhu Kehne Lage, Haaye Mere Bhaayi, Pas Hazrat Umar Radiallahu Anhu Ne Kaha, Kya Tumko Ma'loom Nahee'n Ke Nabi e Kareem ﷺ Ne Farmaaya Hai Ke Zindah Ke Rone Se Mayyat Ko Azaab Diya Jaata Hai.
Baab, Mayyat Par Noha Karna Makrooh Hai. Aur Hazrat Umar Radiallahu Anhu Ne Kaha, Un Aurato'n Ko Abu Sufyaan Par Rone Do Jab Tak Yeh Baalo'n Me'n Mitti Na Daale'n, Aur Na Chillaaye'n, "Naq'oo" Ka Ma'ni Hai, Baalo'n Me'n Mitti Daalna, "Laqlaqatu" Ka Ma'ni Hai Chillaana. Hazrat Mugeerah Radiallahu Anhu Ne Bayaan Kiya Ke Mai'n Ne Rasool e Akram ﷺ Ko Yeh Farmaate Huwe Suna Hai, Mujh Par Jhoot Baa'ndhna Tum Me'n Se Kisi Ek Par Jhoot Baa'ndhne Ki Misl Nahee'n Hai, Jisne Mujh Par Jaan Boojh Kar Jhoot Baa'ndha Woh Apne Baithne Ki Jagah Dozakh Me'n Banaale, Mai'n Ne Nabi e Akram ﷺ Ko Farmaate Huwe Suna, Jiss Par Noha Kiya Gaya, Usko Qayaamat Ke Din Usse Azaab Diya Jaayega, Jisse Noha Kiya Gaya Ho.
Hazrat Ibne Umar Radiallahu Anhuma Ne Hazrat Umar Radiallahu Anhu Se Riwaayat Kiya Aur Unho'n Ne Rasoolullah ﷺ Se Riwaayat Kiya Ke Nabi e Kareem ﷺ Ne Farmaaya, Mayyat Ko Qabar Me'n Uss Cheez Se Azaab Diya Jaata Hai Jisse Uspar Noha Kiya Jaaye. Iss Hadees Ki Riwaayat Me'n Abdaan Ki Mutaabe'at Abdul Aa'la Ne Ki Hai Unho'n Ne Kaha, Hume'n Yazeed Bin Zaree Ne Hadees Bayaan Ki, Unho'n Ne Kaha, Hume'n Sa'eed Ne Hadees Bayaan Ki, Unho'n Ne Kaha, Hume'n Qataadah Ne Hadees Bayaan Ki Aur Aadam Ne Kaha Az Sho'ba, Zindah Ke Rone Se Mayyat Ko Azaab Diya Jaata Hai.
Hazrat Jaabir Bin Abdullah Radiallahu Anhuma Ne Bayaan Kiya Ke Mere Waalid Ko Ja'ng e Ohad Ke Din Iss Haal Me'n Laaya Gaya Ke Unko Musla Kiya Ja Chuka Tha, Hatta Ke Unko Rasoolullah ﷺ Ke Paas Laakar Rakh Diya Gaya, Aur Unko Ek Chaadar Se Dhaa'np Diya Gaya, Mai'n Iraadah Karraha Tha Ke Unki La'sh Se Chaadar Kholu'n To Mujhe Meri Qaum Ne Mana Kiya, Phir Mai'n Dobaarah Unse Chaadar Kholne Gaya To Meri Qaum Ne Phir Mujhe Mana Kardiya, Pas Rasoolullah ﷺ Ne Hukm Diya To Unke Janaaze Ko Uthaaya Gaya, Phir Aap Alaihissalaam Ne Kisi Chillaane Waale Ki Aawaaz Suni, Aap Alaihissalaam Ne Poocha, Yeh Kaun Hai ? To Logo'n Ne Bataaya Ke Yeh Amro Ki Beti Ya Amro Ki Bahen Hai, Aap Alaihissalaam Ne Farmaaya, Yeh Kyu'n Ro Rahi Hai ? Ya Yeh Farmaaya, Yeh Na Roye, Farishte Uss Par Musalsal Saaya Kiye Huwe The Hatta Ke Uska Janaazah Utha Liya Gaya.
Baab, Woh Shakhs Hum Me'n Se Nahee'n Jisne Apna Girebaan Phaada. Hazrat Abdullah Radiallahu Anhu Ne Kaha Ke Nabi e Kareem ﷺ Ne Farmaaya, Woh Shakhs Hum Me'n Se Nahee'n Jo Apne Rukhsaaro'n Par Tamaa'nche Maare Aur Girebaan Phaade Aur Zamaana e Jaahiliyat Ki Chee'nkh Wa Pukaar Kare.
Baab, Nabi e Akram ﷺ Ka Saa'd Bin Khaula Ki Maut Par Afsos Karna. Hazrat Saa'd Bin Abi Waqaas Radiallahu Anhu Apne Waalid Se Khud Riwaayat Karte Huwe Bayaan Karte Hai'n Ke, Hajjatil Wada Ke Saal Mujhe Shadeed Dard Tha, To Rasoolullah ﷺ Meri Iyaadat Karne Keliye Tashreef Laaye, Tab Mai'n Ne Kaha, Mujhe Itna Dard Ho Raha Hai, Aur Mai'n Maaldaar Hoo'n, Aur Meri Waaris Sirf Meri Ek Beti Hai, Kya Mai'n Apna 2 Tihaayi Maal Sadqa Kardu'n ? Aap Alaihissalaam Ne Farmaaya, Nahee'n ! Phir Mai'n Ne Poocha, Mai'n Aadha Maal Sadqa Kardu'n ? Aap Alaihissalaam Ne Farmaaya, Nahee'n ! Phir Aap Alaihissalaam Ne Farmaaya Tihaayi Maal Sadqa Kardo, (Nabi e Kareem ﷺ Ne Farmaaya) Tihaayi Maal Bhi Bahot Zyaadah Hai, Beshak Agar Tum Apne Waariso'n Ko Khush Haal Chhodo To Yeh Isse Behtar Hai, Ke Tum Unko Fuqara Chhodo ! Woh Logo'n Ke Aage Haath Phailaate Rahe'n, Aur Beshak Tum Jo Bhi Kharch Karoge Jisse Tum Allah Ki Raza Joyi Ka Iraadah Karoge To Tumko Uspar Ajar Milega Hatta Ke Tum Jo Kuchh Apni Biwi Ke Muh Me'n Rakhoge (Uspar Bhi Tumko Ajar Milega) Pas Mai'n Ne Arz Kiya, Ya Rasoolallah ﷺ ! Kya Mai'n Apne As'haab Ke Peeche Reh Jaau'nga ? Aap Alaihissalaam Ne Farmaaya, Beshak Tum Hargiz Peeche Nahee'n Chhode Jaaoge Aur Tum Jo Bhi Nek Kaam Karoge Usse Tumhaara Darja Zyaadah Aur Buland Hoga Phir Shaayad Ke Tum Peeche Chhode Jaaoge Hatta Ke Ek Qaum Tumse Nafa Haasil Karegi Aur Doosri Qaum Tumse Nuqsaan Uthaayegi, Aye Allah ! Mere As'haab Ki Hijrat Ko Jaari Rakhna Aur Unko Unki Ae'diyo'n Par Na Lautaana, Lekin Bechaare Saa'd Bin Khaula ! Rasoolullah ﷺ Unke Liye Afsos Karrahe The Ke Woh Makka Me'n Faut Hogaye The.
Baab, Museebat Ke Waqt Baal Moo'ndne Ki Mumaane'at. Abu Burdah Bin Moosa Radiallahu Anhu Ne Bayaan Kiya Ke, Hazrat Abu Moosa Radiallahu Anhu Ko Bahot Shadeed Dard Hogaya, Pas Woh Behosh Hogaye, Aur Unka Sar Unke Ghar Waalo'n Se Unki Biwi Ki God Me'n Tha, Aur Woh Unke Kisi Kaam Ko Mustarad Karne Ki Taaqat Nahee'n Rakhte The, Pas Jab Unko Hosh Aaya To Unho'n Ne Kaha, Mai'n Unse Bari Hoo'n, Jinse Rasoolullah ﷺ Bari The, Aur Beshak Rasoolullah ﷺ Chee'nkh Wa Pukaar Karne Waali, Baal Moo'ndne Waali, Aur Kapde Phaadne Waali Se Bari The.
Baab, Jisne Apne Chehre Par Tamaa'nche Maare Woh Hum Me'n Se Nahee'n. Hazrat Abdullah Radiallahu Anhu Nabi e Akram ﷺ Se Riwaayat Karte Hai'n Ke Nabi e Kareem ﷺ Ne Farmaaya, Woh Hum Me'n Se Nahee'n Hai Jisne Apne Rukhsaaro'n Par Maara Aur Girebaano'n Ko Phaada Aur Zamaana e Jaahiliyat Ki Chee'nkh Wa Pukaar Ki.
Baab, Museebat Ke Waqt Waavelah Aur Jaahiliyat Ki Chee'nkh Wa Pukaar Karne Ki Mumaane'at. Hazrat Abdullah Radiallahu Anhu Ne Bayaan Kiya Ke Nabi e Kareem ﷺ Ne Farmaaya, Woh Shakhs Hum Me'n Se Nahee'n Hai Jisne Chehro'n Par Maara Aur Girebaano'n Ko Phaada Aur Jaahiliyat Ki Chee'nkh Wa Pukaar Ki.
Baab, Jo Shakhs Museebat Ke Waqt Iss Tarah Baitha Tha Ke Uske Chehre Se Gam Zaahir Ho. Hazrat Aa'yesha Radiallahu Anha Bayaan Karti Hai'n Ke Jab Nabi e Kareem ﷺ Ke Paas Hazrat Ibne Haarisa Aur Hazrat Ja'far Aur Hazrat Ibne Rawaaha Ki Shahaadat Ki Khabar Aayi To Nabi e Kareem ﷺ Iss Tarah Baithe Ke Aap Alaihissalaam Ke Chehre Se Gam Zaahir Ho Raha Tha, Aur Mai'n Darwaaze Ki Jhurri Se Dekh Rahi Thi, Pas Aap Alaihissalaam Ke Paas Ek Shakhs Aaya, Aur Usne Hazrat Ja'far Radiallahu Anhu Ki Khawaateen Ka Aur Unke Rone Ka Zikr Kiya, Aap Alaihissalaam Ne Unko Hukm Diya Ke Woh Un Aurato'n Ko (Aawaaz Se Rone Se) Mana Kare, Woh Chala Gaya, Phir Doosri Baar Aaya Ke Woh Aurate'n Uski Baat Nahee'n Maantee'n, Aap Alaihissalaam Ne Farmaaya, Unko Mana Karo, Woh Teesri Baar Aaya, Pas Kaha, Allah Ki Qasam ! Woh Hum Par Gaalib Aagayee'n Ya Rasoolallah ﷺ ! Hazrat Aa'yesha Radiallahu Anha Ne Gumaan Kiya Ke Aap Alaihissalaam Ne Farmaaya, Unke Muho'n Me'n Mitti Daal Do, Mai'n Ne (Dil Me'n) Kaha, Allah Teri Naak Ko Khaak Aalood Kare, Tu Ne Woh Nahee'n Kiya Jiska Rasoolullah ﷺ Ne Tujhe Hukm Diya Tha, Aur Tu Rasoolullah ﷺ Ko Ranjeeda Karna Bhi Nahee'n Chhodta.
Hazrat Anas Radiallahu Anhu Ne Kaha Ke, Rasoolullah ﷺ Ek Maheena Tak Qunoot Padhte Rahe Jab (70) Qaariyo'n Ko Shaheed Kiya Gaya, Pas Mai'n Ne Rasool e Akram ﷺ Ko Isse Zyaadah Gamzadah Kabhi Nahee'n Dekha.
Baab, Jo Museebat Ke Waqt Apne Gam Ko Zaahir Na Kare. Imaam Bukhaari Farmaate Hai'n Ke, Aur Mohammad Bin Kaa'b Qurazi Ne Kaha, "Jaza'oo" Bura Qaul Hai Aur Bura Gumaan Hai, Aur Hazrat Ya'qoob Alaihissalaam Ne Farmaaya, Mai'n Apni Pareshaani Aur Gam Ki Taraf Sirf Allah Azzowajal Se Shikaayat Karta Hoo'n (Sureh Yusuf, Aayat No.86), Hazrat Anas Bin Maalik Radiallahu Anhu Bayaan Karte Hai'n Ke, Hazrat Abu Talha Ka Beta Beemaar Ho Gaya, Pas Woh Faut Hogaya, Aur Hazrat Abu Talha Radiallahu Anhu Ghar Se Nikle Huwe The, Jab Unki Biwi Ne Yeh Dekha Ke Bachcha Faut Hogaya Hai, To Unho'n Ne Usko Gusl Diya, Aur Kafan Pehnaaya Aur Usko Ghar Ke Ek Kone Me'n Rakh Diya, Jab Hazrat Abu Talha Radiallahu Anhu Aaye Aur Poocha, Bachcha Kaisa Hai ? To Unho'n Ne Kaha Woh Pursukoon Hai, Aur Mujhe Yaqeen Hai Ke Woh Raahat Pa Chuka Hai, Hazrat Abu Talha Radiallahu Anhu Ne Gumaan Kiya Ke Woh Sachchi Hai'n, Hazrat Anas Radiallahu Anhu Ne Kaha, Unho'n Ne Raat Guzaari, Jab Subah Huwi To Gusl Kiya, Jab Woh Ghar Se Baahar Nikalne Lage To Unki Biwi Ne Unko Bataaya Ke Bachcha Faut Ho Chuka Hai, Pas Unho'n Ne Nabi e Kareem ﷺ Ke Saath Namaaz (Janaazah) Padhi, Phir Unho'n Ne Nabi e Kareem ﷺ Ko Bataaya Ke, Un Dono'n Ke Saath Raat Ko Kya Huwa, Tab Nabi e Kareem ﷺ Ne Farmaaya, Ummeed Hai Ke Allah Azzowajal Tumhaare Raat Ke Mu'aamle Me'n Barkat Dega, Sufyaan Ne Kaha, Pas Ansaar Ke Ek Shakhs Ne Kaha, Mai'n Ne Dekha Ke Unke 9 Bete Huwe Aur Woh Sab Qur'aan e Majeed Ke Qaari The.
Baab, Sabar Uss Waqt Mo'tabar Hota Hai Jab Pehli Baar Sadma Paho'nche. Hazrat Umar Radiallahu Anhu Ne Kaha, Kya Khoob 2 Ek Jaise Alfaaz Hai'n (Salawaat Aur Rehmat) Aur Kya Khoob Iske Alaawah, Ya'ni (Ula'ika Humul Mohtadoon) Woh Log Jab Unhe'n Koi Museebat Paho'nchti Hai To Woh Kehte Hai'n, Beshak Hum Allah Keliye Hai'n Aur Beshak Hum Uski Taraf Lautne Waale Hai'n, Yeh Woh Log Hai Jin Par Unke Rab Ki Taraf Se Ba Kasrat Darood Hai'n Aur Rehmat Hai Aur Yehi Log Hidaayat Yaafta Hai'n (Sureh Baqarah, Aayat No. 156/157), Aur Allah Azzowajal Ka Irshaad Hai, Aur Sabar Aur Namaaz Se Madad Haasil Karo Beshak Namaaz Allah Se Darne Waalo'n Ke Siwa Sab Par Dshwaar Hai (Sureh Baqarah, Aayat No.45), Hazrat Anas Radiallahu Anhu Ne Bayaan Kiya Ke, Nabi e Kareem ﷺ Ne Farmaaya, Sabar Uss Waqt Shumaar Hota Hai Jab Pehli Baar Sadma Paho'nche.
Baab, Nabi e Akram ﷺ Ka Irshaad, Beshak Hum Tumhaari Wajah Se Gamzadah Hai'n. Aur Hazrat Ibne Umar Radiallahu Anhuma Ne Nabi e Kareem ﷺ Se Yeh Hadees Riwaayat Ki, Aa'nkh Aa'nsu Baha Rahi Hai Aur Dil Gamzadah Hai, Hazrat Anas Bin Maalik Radiallahu Anhu Bayaan Karte Hai'n Ke Hum Rasoolullah ﷺ Ke Saath Abu Saif Lohaar Ke Paas Gaye, Aur Woh Hazrat Ibraaheem Radiallahu Anhu (Shehzaada e Nabi) Ke Razaayi Baap The, Pas Rasoolullah ﷺ Ne Hazrat Ibraaheem Radiallahu Anhu Ko Uthaaya, Pas Unko Bosa Diya, Aur Soo'ngha, Phir Uske Baa'd Hum Unke Paas Gaye Aur Hazrat Ibraaheem Radiallahu Anhu Uss Waqt Apni Jaan Ki Sakhaawat Karrahe The, Pas Rasoolullah ﷺ Ki Dono'n Aa'nkhe'n Sakhaawat Karne Lagee'n, Phir Hazrat Abdur Rehmaan Bin Auf Radiallahu Anhu Ne Aap Alaihissalaam Se Kaha, Ya Rasoolallah ﷺ ! Aap (Bhi Ro Rahe Hai'n!) Aap Alaihissalaam Ne Farmaaya ! Aye Ibne Auf, Yeh Aa'nsu Rehmat Hai'n Phir Dobaarah Aa'nsu Bahe, Pas Rasoolullah ﷺ Ne Farmaaya, Beshak Aa'nkh Ro Rahi Hai Aur Dil Gamgeen Hai Aur Hum Sirf Wohi Baat Kehte Hai'n Jisse Humaara Rab Raazi Hai Aur Aye Ibraaheem ! Hum Tumhaari Judaayi Se Gamzadah Hai'n ! Iss Hadees Ko Moosa Ne Az Sulemaan Bin Mugeerah Az Saabit Az Anas Az Nabi e Kareem ﷺ Riwaayat Kiya Hai.
Baab, Mareez Ke Paas Rona. Hazrat Abdullah Bin Umar Radiallahu Anhuma Ne Bayaan Kiya Ke, Hazrat Saa'd Bin Ubaadah Radiallahu Anhu Beemaar Hogaye Pas Unki Iyaadat Keliye Nabi e Kareem ﷺ Tashreef Laaye, Aap Alaihissalaam Ke Saath Hazrat Abdur Rehmaan Bin Auf, Hazrat Saa'd Bin Abi Waqaas Aur Hazrat Abdullah Bin Mas'ood Radiallahu Anhum Bhi The, Pas Jab Aap Alaihissalaam Unke Paas Paho'nche, To Aap Alaihissalaam Ne Unko Apne Ghar Waalo'n Ke Darmiyaan Behoshi Me'n Paaya, Aap Alaihissalaam Ne Poocha, Kya Yeh Faut Hogaye ? Ghar Waalo'n Ne Kaha Nahee'n ! Ya Rasoolallah ﷺ ! Phir Nabi e Kareem ﷺ Rone Lage, Jab Logo'n Ne Nabi e Kareem ﷺ Ko Rote Huwe Dekha To Woh Bhi Rone Lage, Aap Alaihissalaam Ne Farmaaya, Kya Tumne Yeh Nahee'n Suna Ke Allah Azzowajal Aa'nkh Ke Aa'nsuwo'n Par Azaab Nahee'n Deta Aur Na Dil Ke Gam Par Azaab Deta Hai, Aap Alaihissalaam Ne Zabaan Ki Taraf Ishaarah Karke Farmaaya, Lekin Iski Wajah Se Azaab Deta Hai Ya Rahem Farmaata Hai, Aur Mayyat Par Mayyat Ke Ghar Waalo'n Ke Rone Se Mayyat Ko Azaab Diya Jaata Hai Aur Hazrat Umar Radiallahu Anhu Rone Par Laathi Se Maarte The Aur Pat'thar Maarte The Aur Muh Me'n Mitti Daal Dete The.
Baab, Noha Karne Aur Rone Ki Mumaane'at Aur Iss Par Daa'nt Dapat. Umrah Ne Kaha, Mai'n Ne Hazrat Aa'yesha Radiallahu Anha Ko Yeh Kehte Huwe Suna Hai Ke, Jab Hazrat Zaid Bin Haarisa, Hazrat Ja'far Aur Hazrat Abdullah Bin Rawaaha Radiallahu Anhum Ajma'een Ki Shahaadat Ki Khabar Aayi To Nabi e Kareem ﷺ Baith Gaye, Aap Alaihissalaam Ke Chehre Se Gam Zaahir Ho Raha Tha Aur Mai'n Darwaaze Ki Jhurri Se Dekh Rahi Thi, Pas Aap Alaihissalaam Ke Paas Ek Shakhs Aaya, Usne Kaha, Ya Rasoolallah ﷺ ! Hazrat Ja'far Radiallahu Anhu Ki Aurate'n Ro Rahi Hai'n, Aap Alaihissalaam Ne Hukm Diya Unko Mana Karo, Woh Shakhs Gaya Aur Phir Aaya, Pas Usne Kaha, Mai'n Ne Unko Mana Kiya Tha, Unho'n Ne Meri Baat Nahee'n Maani, Aap Alaihissalaam Ne Unko Dobaarah Hukm Diya Ke Unko Mana Kare, (Woh Shakhs Gaya) Aur Phir Aaya, Pas Kaha, Allah Ki Qasam ! Woh Mujh Par Gaalib Aagayee'n Ya Kaha, Woh Hum Par Gaalib Aagayee'n, Isme'n Mohammad Bin Hoshab Ko Shak Hai, Pas Mai'n Ne Gumaan Kiya Ke Nabi e Kareem ﷺ Ne Farmaaya, Pas Tum Unke Muho'n Me'n Mitti Daal Do, Mai'n Ne Dil Me'n Kaha, Allah Teri Naak Ko Khaak Aalood Kare Tu Yeh Karne Waala Nahee'n Aur Tu Ne Rasoolullah ﷺ Ko Sataana Nahee'n Chhoda.
Hazrat Umme Atiya Radiallahu Anha Bayaan Karti Hai'n Ke Nabi e Kareem ﷺ Ne Bay'at Ke Waqt Hum Se Yeh Ahed Liya Ke Hum Noha Nahee'n Kare'nge Pas 5 Aurato'n Ke Siwa Hum Me'n Se Kisi Ne Yeh Ahed Poora Nahee'n Kiya, Hazrat Umme Sulaim, Hazrat Ummul Ula, Abu Sabzah Ki Beti, Mu'aaz Ki Biwi, Aur 2 Aurate'n, Ya Kaha Abu Sabzah Ki Beti, Mu'aaz Ki Biwi, Aur Ek Aur Ek Aurat.
Baab, Janaazah Keliye Khada Hona. Hazrat Aa'mir Bin Rabee'ah Radiallahu Anhu Rasool e Akram ﷺ Se Riwaayat Karte Hai'n Ke Aapne Farmaaya, Jab Tum Janaazah Ko Dekho To Khade Ho Jaao Hatta Ke Janaazah Tumko Peeche Chhod De, Sufiyaan Ne Kaha, Zohri Ne Kaha, Mujhe Saalim Ne Khabar Di, Az Waalid Khud, Unho'n Ne Kaha, Hume'n Aa'mir Bin Rabee'ah Ne Khabar Di Az Nabi e Kareem ﷺ, Humaidi Ne Yeh Izaafa Kiya, Hatta Ke Janaazah Tumhe'n Peeche Chhod De Ya Rakh Diya Jaaye.
Hazrat Aa'mir Bin Rabee'ah Radiallahu Anhu Rasool e Akram ﷺ Se Riwaayat Karte Hai'n Ke Aapne Farmaaya, Jab Tum Me'n Koi Shakhs Janaazah Ko Dekhe, Pas Agar Woh Uske Saath Chal Na Raha Ho, To Khade Ho Jaaye Hatta Ke Janaazah Usko Peechhe Chhod De, Ya Tum Usko Peechhe Chhod Do Ya Tumhaare Chhodne Se Pehle Janaazah Rakh Diya Jaaye.
Hazrat Sa'eed Maqburi Apne Waalid Se Riwaayat Karte Huwe Kehte Hai'n Ke, Hum Ek Janaazah Me'n The, Pas Hazrat Abu Hurairah Radiallahu Anhu Ne Marwaan Ka Haath Pakda Pas Woh Dono'n Janaazah Ko Rakhne Se Pehle Baith Gaye, Pas Hazrat Abu Sa'eed Radiallahu Anhu Aaye, Unho'n Ne Marwaan Ka Haath Pakad Kar Kaha, Khade Ho ! Pas Allah Ki Qasam, Unko Khoob Ilm Hai Ke Nabi e Kareem ﷺ Humko Isse Mana Karte The, Hazrat Abu Hurairah Radiallahu Anhu Ne Kaha, Unho'n Ne Sach Kaha.
Baab, Jo Janaazah Ke Saath Gaya Woh Uss Waqt Tak Na Baithe Hatta Ke Janaazah Ko Mardo'n Ke Kaa'ndho'n Se Utaar Kar Rakh Diya Jaaye Agar Koi Baith Jaaye To Use Khade Hone Ka Hukm Diya Jaaye. Hazrat Abu Sa'eed Khudri Radiallahu Anhu Rasool e Akram ﷺ Se Riwaayat Karte Hai'n Ke Aapne Farmaaya, Jab Tum Janaazah Ko Dekho To Khade Ho Jaao, Pas Jo Janaazah Ke Saath Gaya Hai Woh Uss Waqt Tak Na Baithe Hatta Ke Janaazah Ko Rakh Diya Jaaye.
Baab, Jo Shakhs Yahoodi Ke Janaazah Keliye Khada Huwa. Hazrat Jaabir Bin Abdullah Radiallahu Anhu Ne Bayaan Kiya Ke, Humaare Saath Ek Janaazah Guzra, Pas Nabi e Kareem ﷺ Uske Liye Khade Ho Gaye, Aur Hum Bhi Aap Alaihissalaam Ke Saath Khade Ho Gaye, Pas Hum Ne Kaha Ya Rasoolallah ﷺ ! Yeh Yahoodi Ka Janaazah Tha ? Aap Alaihissalaam Ne Farmaaya, Jab Tum Janaazah Ko Dekho To Khade Ho Jaao.
Hazrat Abdur Rehmaan Bin Abi Laila Ne Kaha Ke, Hazrat Sahal Bin Hunaif Aur Hazrat Qais Bin Saa'd Dono'n Qaadisiya Me'n Baithe Huwe The, Pas Unke Paas Se Ek Janaazah Guzra To Woh Dono'n Khade Ho Gaye, Unse Kaha Gaya Ke Yeh Ahle Zimma Ka Janaazah Hai, To Un Dono'n Ne Kaha Ke Nabi e Kareem ﷺ Ke Paas Se Ek Janaazah Guzra, Pas Aap Alaihissalaam Khade Ho Gaye, Pas Aap Alaihissalaam Se Kaha Gaya Ke Yeh Yahoodi Ka Janaazah Hai, To Aap Alaihissalaam Ne Farmaaya, Kya Zee Rooh Nahee'n Hai ?
Ibne Abi Laila Ne Kaha Ke Mai'n Qais Aur Sahal Radiallahu Anhuma Ke Saath Tha, Pas Un Dono'n Ne Kaha, Hum Nabi e Kareem ﷺ Ke Saath The, Aur Zakariya Ne Kaha Az Sho'bi Az Ibne Abi Laila, Hazrat Abu Mas'ood Aur Qais Radiallahu Anhuma Janaazah Keliye Khade Hote The.
Baab, Janaazo'n Ko Mardo'n Ko Uthaana (Chaahiye) Na Ke Aurato'n (Ko). Riwaayat Hai Abu Sa'eed Khudri Radiallahu Anhu Se Ke, Nabi e Kareem ﷺ Ne Farmaaya, Jab Janaazah Rakha Jaata Hai Aur Mard Usko Apni Gardano'n Par Utha Lete Hai'n, Pas Agar Woh Janaazah Nek Ho To Woh Kehta Hai, Mujhe Aage Le Chalo Aur Agar Woh Nek Na Ho To Woh Kehta Hai Ke Haaye Afsos ! Yeh Isko Kaha Le Jaarahe Ho, Uski Aawaaz Ko Insaan Ke Alaawah Sab Cheez Sunti Hai Aur Agar Insaan Sunta To Woh Behosh Ho Jaata.
Baab, Janaazah Ko Jaldi Le Jaana. Aur Hazrat Anas Radiallahu Anhu Ne Kaha, Tum Janaazah Ko Rukhsat Karrahe Ho, Pas Tum Uske Aage Chalo Aur Peeche Chalo, Aur Daaye'n Chalo Aur Baaye'n Chalo, Aur Doosro'n Ne Kaha, Janaazah Ke Qareeb Chalo, Riwaayat Hai Hazrat Abu Hurairah Radiallahu Anhu Se Ke, Nabi e Kareem ﷺ Ne Farmaaya, Janaazah Ko Jaldi Le Jaao, Pas Agar Woh Nek Hai To Tum Uski Taraf Neki Ko Jaldi Paho'ncha Rahe Ho, Aur Agar Woh Iske Siwa Hai To Tum Sharr Ko Apni Gardano'n Se Utaar Rahe Ho.
Baab, Mayyat Ka Janaazah Par Kehna, Mujhe Jaldi Le Jaao. Riwaayat Hai Abu Sa'eed Khudri Radiallahu Anhu Se Woh Kehte Hai'n Ke Nabi e Kareem ﷺ Farmaate The, Jab Janaazah Rakh Diya Jaaye, Pas Log Usko Apni Gardano'n Par Utha Le'n Pas Agar Woh Janaazah Nek Ho To Kehta Hai, Mujhe Aage Le Jaao Aur Nek Na Ho To Le Jaane Waalo'n Se Kehta Hai, Haaye Afsos ! Isko Kahaa'n Le Jaarahe Ho, Insaan Ke Siwa Uski Aawaaz Ko Har Cheez Sunti Hai Aur Agar Insaan Sunta To Behosh Ho Jaata.
Baab, Jisne Imaam Ke Peeche Janaazah Ki 2 Ya 3 Safe'n Banaayee'n. Riwaayat Hai Hazrat Jaabir Bin Abdullah Radiallahu Anhu Se Ke, Rasoolullah ﷺ Ne Najaashi Ki Namaaz e Janaazah Padhaayi, Pas Mai'n Doosri Ya Teesri Saf Me'n Tha.
Baab, Namaaz e Janaazah Ki Safe'n. Hazrat Abu Hurairah Radiallahu Anhu Ne Bayaan Kiya Ke Nabi e Kareem ﷺ Ne Apne As'haab Ko Najaashi Ki Maut Ki Khabar Di, Phir Aap Alaihissalaam Aage Badh Gaye, Pas Sahaaba e Kiraam Ne Aap Alaihissalaam Ke Peeche Saf Banaayi, Pas Aap Alaihissalaam Ne 4 Takbeere'n Padhee'n.
Shaibaani Ne Hadees Bayaan Ki Sho'bi Ke Waaste Se, Unho'n Ne Kaha Ke, Mujhe Unho'n Ne Khabar Di Jinho'n Ne Iski Shahaadat Di Ke Nabi e Kareem ﷺ Ek Munfarid Qabar Par Aaye, Pas Aap Alaihissalaam Ne Musalmaano'n Ki Saf Banaayi Aur 4 Takbeere'n Padhee'n, Mai'n Ne Poocha, Aye Abu Amro ! Aapse Yeh Hadees Kisne Bayaan Kiya ? Unho'n Ne Kaha, Hazrat Ibne Abbaas Radiallahu Anhuma Ne.
Hazrat Jaabir Bin Abdullah Radiallahu Anhu Bayaan Karte Hai'n Ke, Nabi e Kareem ﷺ Ne Farmaaya, Aaj Habash Ka Ek Nek Shakhs Faut Hogaya, Aao Uski Namaaz e Janaazah Padhe'n, Raawi Ne Kaha, Pas Humne Safe'n Banaayee'n, Phir Nabi e Kareem ﷺ Ne Namaaz e Janaazah Padhaayi, Aur Humaari Kayi Safe'n Thi, Abu Zubair Ne Hazrat Jaabir Se Riwaayat Ki Ke Mai'n Doosri Saf Me'n Tha.
Baab, Janaazah Me'n Bachcho'n Ki Mardo'n Ke Saath Safe'n. Hazrat Ibne Abbaas Radiallahu Anhuma Bayaan Karte Hai'n Ke, Nabi e Kareem ﷺ Aisi Qabar Ke Paas Se Guzre Jisme'n Raat Ko Dafan Kiya Gaya Tha, Aap Alaihissalaam Ne Poocha, Isko Kab Dafan Kiya Gaya ? Musalmaano'n Ne Kaha, Guzishta Raat, Aap Alaihissalaam Ne Farmaaya, Tumne Mujhe Khabar Kyu'n Nahee'n Ki ? Musalmaano'n Ne Arz Kiya, Humne Isko Raat Ke Andhere Me'n Dafan Kardiya Tha, Humne Aap Alaihissalaam Ko Bedaar Karna Pasand Nahee'n Kiya Tha, Pas Aap Alaihissalaam Khade Huwe, Humne Aap Alaihissalaam Ke Peeche Saf Banaayi, Hazrat Ibne Abbaas Radiallahu Anhuma Ne Farmaaya, Mai'n Bhi Unme'n Tha, Pas Aap Alaihissalaam Ne Uski Namaaz e Janaazah Padhi.
Baab, Namaaz e Janaazah Padhne Ka Tareeqa. Aur Nabi e Kareem ﷺ Ne Irshaad Farmaaya, Jisne Janaazah Par Namaaz Padhi, Aur Aap Alaihissalaam Ne Farmaaya, Tum Apne Saathi Par Namaaz (Janaazah) Padho, Aur Nabi e Kareem ﷺ Ne Irshaad Farmaaya, Najaashi Par Namaaz (Janaazah) Padho, Nabi e Kareem ﷺ Ne Namaaz e Janaazah Ko Namaaz Farmaaya Haalaa'nke Usme'n Ruku Aur Sujood Nahee'n Hai, Aur Namaaz e Janaazah Me'n Kalaam Nahee'n Kiya Jaata, Aur Usme'n Allahu Akbar Padhna Aur Salaam Pherna Hai, Aur Hazrat Ibne Umar Radiallahu Anhuma Sirf Tahaarat Ke Saath Namaaz e Janaazah Padhte The Aur Tulu Shams Aur Guroob Shams Ke Waqt Namaaz (Janaazah) Nahee'n Padhte The Aur Usme'n Rafa Yadain Karte The, (Yaad Rahe Fuqaha e Ahnaaf Namaaz e Janaazah Me'n Sirf Pehli Takbeer Ke Waqt Rafa Yadain Karte Hai'n Aur Istedlaal Yeh Aasaar Hai, Abdullah Bin Jamee Zohri Bayaan Karte Hai'n Ke Mai'n Ne Ibraaheem Nakahyi Ko Dekha Woh Namaaz e Janaazah Me'n Rafa Yadain Karke Allahu Akbar Padhte Aur Phir Baaqi Takbeeraat Me'n Rafa Yadain Nahee'n Karte The Aur Woh 4 Takbeeraat Padhte The (Musannaf Ibne Abi Shaiba, Hadees No.11504, Majlis e Ilmi Bairoot) Sufyaan Bayaan Karte Hai'n Ke Hasan Bin Ubaidullah Namaaz e Janaazah Ki Sirf Pehli Takbeer Me'n Rafa Yadain Karte The (Musannaf Ibne Abi Shaiba, Hadees No.11505, Majlis e Ilmi Bairoot), Nifaa'ah Bin Muslim Bayaan Karte Hai'n Ke Suwaid Humaare Janaazo'n Me'n Takbeeraat Padhte The Aur Woh Sirf Pehli Takbeer Me'n Rafa Yadain Karte The (Musannaf Ibne Abi Shaiba, Hadees No.1390, Majlis e Ilmi Bairoot), Aur Hasan (Basri) Ne Kaha, Mai'n Ne Logo'n Ko Iss Haal Me'n Paaya Ke Unke Janaaze Padhaane Ke Zyaadah Haqdaar Woh Log The Jinki Iqteda Me'n Woh Faraa'iz Padhne Par Raazi The, Aur Jab Koi Shakhs Eid Ke Din Be Wazu Ho Ya Janaazah Ke Waqt To Woh Paani Ko Talab Kare Tayammum Na Kare, Aur Jab Koi Shakhs Janaazah Me'n Paho'nche Aur Woh Namaaz Padh Rahe Ho'n To Woh Takbeer Padh Kar Unme'n Shaamil Ho Jaaye, Aur Ibne Musayyab Ne Kaha, Raat Aur Din Aur Safar Aur Hazar Me'n 4 Takbeeraat Padhe, Aur Hazrat Anas Radiallahu Anhu Ne Kaha Ke, Ek Takbeer Se Namaaz e Janaazah Ko Shuru Karna Hai, Aur Allah Azzowajal Ka Irshaad Hai, Aur Aap Unme'n Se Kisi Ek Par Namaaz e Janaazah Na Padhe'n (Sureh Tauba, Aayat No.84), Aur Namaaz e Janaazah Me'n Safe'n Bhi Hai'n Aur Usme'n Imaam Bhi Hota Hai, (Ab Hadees No.1322 Ka Tarjuma Yeh Hai Ke) Shaibaani Ne Sho'bi Se Riwaayat Kiya, Unho'n Ne Bayaan Kiya Ke, Mujhe Uss Shakhs Ne Khabar Di Jo Tumhaare Nabi e Kareem ﷺ Ke Saath Ek Munfarid Qabar Ke Paas Se Guzra Tha, Pas Aap Alaihissalaam Ne Humaari Imaamat Ki, Pas Humne Aap Alaihissalaam Ke Peeche Safe'n Banaayee'n, Pas Humne Kaha, Aye Abu Amro ! Tumko Yeh Hadees Kisne Bayaan Ki ? Unho'n Ne Kaha, Hazrat Ibne Abbaas Radiallahu Anhuma Ne.
Baab, Janaazo'n Ke Saath Jaane Ki Fazeelat. Aur Hazrat Zaid Bin Saabit Radiallahu Anhu Ne Kaha, Jab Tumne Namaaz Padhli To Tumne Uss Haq Ko Ada Kardiya Jo Tum Par Tha, Aur Humaid Bin Hilaal Ne Kaha, Hume'n Ilm Nahee'n Ke Janaazah Padh Kar Jaane Ki Ijaazat Di Jaati Hai Lekin Jisne Janaazah Padh Liya, Phir Laut Aaya, Usko Ek Qairaat Ka Ajar Milta Hai, Hazrat Ibne Umar Radiallahu Anhuma Ne Hadees Bayaan Ki Ke Hazrat Abu Hurairah Radiallahu Anhu Yeh Farmaate The Ke Jo Shakhs Janaaze Ke Saath Gaya Usko Ek Qairaat Ajar Milega Pas Unho'n Ne Kaha Ke Hazrat Abu Hurairah Radiallahu Anhu Ne Iss Hadees Ko Hum Se Bahot Martaba Bayaan Kiya Hai.
Pas Hazrat Aa'yesha Radiallahu Anha Ne Hazrat Abu Hurairah Radiallahu Anhu Ki Tasdeeq Ki Aur Kaha, Mai'n Ne Rasool e Akram ﷺ Ko Yeh Farmaate Huwe Suna Hai, Pas Hazrat Ibne Umar Radiallahu Anhuma Ne Kaha, Beshak Humne Bahot Kaseer Qaraareet Me'n Kami Kardi "Farrattu" Ka Ma'ni Hai, Mai'n Ne Allah Ke Hukm Par Amal Karne Me'n Taqseer Ki.
Baab, Jisne Dafan Tak Mayyat Ka Intezaar Kiya. Hazrat Abu Hurairah Radiallahu Anhu Se 3 Sanado'n Ke Saath Marwi Hai Ke Aapne Kaha Ke, Mai'n Ne Rasool e Akram ﷺ Se Suna Hai, Aap Alaihissalaam Ne Farmaaya, Jo Shakhs Janaazah Par Haazir Huwa Hatta Ke Usne Namaaz Padhli, Pas Uske Liye 1 Qairaat Ajar Hai Aur Jo Shakhs Janaazah Par Haazir Huwa Hatta Ke Usko Dafan Kardiya Jaaye Uske Liye 2 Qairaat Ajar Hai, Poocha Gaya, 2 Qairaat Kitne Hai'n ? To Unho'n Ne Kaha, 2 Bade Pahaado'n Jitne.
Baab, Bachcho'n Ka Logo'n Ke Saath Namaaz e Janaazah Padhna. Hazrat Ibne Abbaas Radiallahu Anhuma Ne Bayaan Kiya Ke, Rasoolullah ﷺ Ek Qabar Par Aaye, Pas Musalmaano'n Ne Kaha, Iss Shakhs Ko Raat Ko Dafan Kiya Gaya Hai, Ya Iss Aurat Ko Raat Ko Dafan Kiya Gaya Hai, Hazrat Ibne Abbaas Radiallahu Anhuma Ne Kaha, Pas Humne Aapke Peeche Safe'n Banaayee'n Phir Aap Alaihissalaam Ne Uski Namaaz e Janaazah Padhaayi.
Baab, Eidgaah Aur Masjid Me'n Namaaz e Janaazah Padhna. Hazrat Abu Hurairah Radiallahu Anhu Ne Bayaan Kiya Ke Nabi e Kareem ﷺ Ne Najaashi Ki Maut Ki Khabar Di Jo Habsha Ke Baadshaah The, Jis Din Woh Faut Hogaye The, Aap Alaihissalaam Ne Farmaaya, Tum Apne Bhaayi Keliye Magferat Talab Karo.
Hazrat Abu Hurairah Radiallahu Anhu Ne Farmaaya, Beshak Nabi e Kareem ﷺ Ne Eidgaah Me'n Musalmaano'n Ki Saff Banaayi Pas Aap Alaihissalaam Ne Janaazah Par 4 Takbeere'n Padhee'n.
Hazrat Abdullah Bin Umar Radiallahu Anhuma Ne Bayaan Kiya Ke, Yahood Nabi e Kareem ﷺ Ke Paas 1 Mard Aur 1 Aurat Ko Lekar Aaye, Jinho'n Ne Zina Kiya Tha, Aap Alaihissalaam Ke Hukm Se Un Dono'n Ko Janaazah Gaah Ki Jagah Me'n Masjid Ke Paas Rajam Kiya Gaya.
Baab, Qabro'n Par Sajdah Gaah Banaane Ki Karaahat. Aur Jab Hazrat Hasan Bin Hasan Bin Ali Radiallahu Anhuma Faut Hogaye To Unki Zauja Ne Unki Qabar Par Ek Khema Laga Diya, Jisko 1 Saal Ke Baa'd Utha Liya Gaya, Phir Logo'n Ne Kisi Pukaarne Waale Ki Aawaaz Suni, Suno ! Kya Unho'n Ne Jisko Gum Paaya Tha Usko Pa Liya, Pas Doosre Ne Jawaab Diya, Balke Woh Maayoos Ho Kar Laut Gaye, Hazrat Aa'yesha Radiallahu Anha Rasoolullah ﷺ Se Riwaayat Karti Hai'n Ke Nabi e Kareem ﷺ Ne Uss Marz Me'n Irshaad Farmaaya Jis Marz Me'n Aap Alaihissalaam Ki Wafaat Hogayi, Allah Yahoodi Aur Nasraani Par La'nat Farmaaye, Jinho'n Ne Ambiya Alaihimussalaam Ki Qabro'n Ko Masjid Bana Liya, Hazrat Aa'yesha Radiallahu Anha Ne Farmaaya, Agar Yeh Khatrah Na Hota To Sahaaba e Kiraam Aap Alaihissalaam Ki Qabar Ko Zaahir Kar Dete, Lekin Mujhe Yeh Khatrah Hai Ke Usko Masjid Bana Liya Jaayega.
Baab, Nifaas Me'n Marne Waali Aurat Ki Namaaz e Janaazah. Hazrat Samurah Radiallahu Anhu Ne Bayaan Kiya Ke Mai'n Ne Rasool e Akram ﷺ Ke Peechhe Ek Aurat Ki Namaaz e Janaazah Padhi Jo Nifaas Me'n Faut Hogayi Thi, Aap Alaihissalaam Uss Aurat Ke Wast Me'n Khade Huwe.
Baab, Mayyat Aurat Ho Ya Mard To Namaazi Kis Jagah Khada Ho ? Hazrat Samurah Bin Jundab Radiallahu Anhu Ne Hadees Bayaan Ki, Unho'n Ne Bayaan Kiya Ke Mai'n Ne Nabi e Akram ﷺ Ke Peechhe Ek Aurat Ki Namaaz e Janaazah Padhi, Jo Nifaas Me'n Faut Hogayi Thi, Aap Alaihissalaam Uske Darmiyaan Khade Huwe.
Baab, Janaazah Par 4 Takbeere'n Padhna. Aur Humaid Ne Kaha, Humko Hazrat Anas Radiallahu Anhu Ne Namaaz Padhaayi, Pas Unho'n Ne 3 Takbeere'n Padhee'n, Phir Salaam Pher Diya Phir Unko Bataaya Gaya To Unho'n Ne Qibla Ki Taraf Muh Kiya Phir Chauthi (4rth) Takbeer Padhi Phir Salaam Pher Diya, Riwaayat Hai Hazrat Abu Hurairah Radiallahu Anhu Se Ke Jis Din Najaashi Faut Huwe Rasoolullah ﷺ Ne Unki Maut Ki Khabar Di Aur Musalmaano'n Ko Lekar Eidgaah Gaye Pas Unki Safe'n Banaayee'n Aur Janaazah Par 4 Takbeere'n Padhee'n.
Riwaayat Hai Hazrat Jaabir Radiallahu Anhu Se Ke Rasoolullah ﷺ Ne Ashama Najaashi Ki Namaaz e Janaazah Padhaayi, Pas 4 Takbeeraat Padhee'n, Aur Yazeed Bin Haaroon Aur Abdus Samad Ne Kaha Az Sulaim Ashama.
Baab, Namaaz e Janaazah Me'n Sureh Faateha Ko Padhna. Yaad Rahe ! Iss Baab Me'n Yeh Bayaan Kiya Gaya Hai Ke Namaaz e Janaazah Me'n Sureh Faateha Padhna Jaa'iz Hai, Jabke Iss Masle Me'n Sahaaba e Kiraam, Fuqaha e Islaam, Taaba'een e Izaam Aur A'imma e Mujtahideen Ka Ikhtelaaf Hai, Hazrat Ibne Mas'ood, Hazrat Hasan Bin Ali, Hazrat Ibne Zubair, Aur Hazrat Miswar Bin Mukhremah Radiallahu Anhum Ke Nazdeek Namaaz e Janaazah Me'n Sureh Faateha Padhna Jaa'iz Hai Aur Imaam Shaafayi Aur Imaam Ahmad, Aur Mohaddis Is'haaq Alaihimur Rehma Ka Bhi Yehi Moqif Hai Ke Sureh Faateha Padhna Namaaz e Janaazah Me'n Jaa'iz Hai, Aur Hazrat Abu Hurairah Radiallahu Anhu, Hazrat Ibne Umar Radiallahu Anhuma Se Manqool Hai Ke Namaaz e Janaazah Me'n Qur'aan e Majeed Ki Qir'aat Nahee'n Hai Aur Yehi Imaam Maalik Alaihir Rehma Aur Fuqaha e Ahnaaf Ka Moqif Hai, (Umdatul Qaari, Jild No.8, Safha No.201) Imaam Bukhaari Likhte Hai'n Ke, Aur Hasan Basri Ne Kaha, Bachche Par Sureh Faateha Padhi Jaayegi Aur Namaazi Yeh Du'aa Kare, Aye Allah ! Isko Humaare Liye Pesh Row Aur Jannat Tak Le Jaane Waala Aur Baa'is e Ajar Bana De, (Ab Hadees No.1335 Ka Tarjuma Yeh Hai) Talha Se Riwaayat Hai Unho'n Ne Kaha Ke, Mai'n Ne Hazrat Ibne Abbaas Radiallahu Anhuma Ke Peechhe Namaaz e Janaazah Padhi (Phir Doosri Sanad Ke Saath Hai Ke) Talha Bin Abdullah Bin Auf Ne Bayaan Kiya Ke, Mai'n Ne Hazrat Abdullah Bin Abbaas Radiallahu Anhuma Ke Peeche Ek Janaaze Par Namaaz Padhi, Pas Unho'n Ne Sureh Faateha Padhi Aur Farmaaya, Taake Log Jaan Le'n Ke Sureh Faateha Padhna Sunnat Hai. (Yaad Rahe Namaaz e Janaazah Me'n Sureh Faateha Padhne Ke Muta'alliq Aur Bhi Riwaayat Maujood Hai'n Lekin Jaisa Ke Upar Bayaan Huwa Ke Iss Masle Me'n Ikhtelaaf Maujood Hai Iss Sabab Neeche Chand Riwaayaat Woh Zikr Ki Jaati Hai'n Jinme'n Namaaz e Janaazah Me'n Qur'aan e Majeed Padhne Ko Mana Kiya Gaya Hai, Naafe Bayaan Karte Hai'n Ke Hazrat Umar Radiallahu Anhuma Namaaz e Janaazah Me'n Qur'aan Nahee'n Padhte The, (Musannaf Ibne Abi Shaiba, Hadees No.11522, Majlis e Ilmi Bairoot) Abu Minhaal Bayaan Karte Hai'n Ke, Mai'n Ne Abu Aa'liya Se Poocha, Kya Namaaz e Janaazah Me'n Sureh Faateha Padhi Jaayegi ? Unho'n Ne Kaha, Mera Gumaan Yeh Hai Ke Sureh Faateha Sirf Uss Namaaz Me'n Padhi Jaayegi Jisme'n Ruku Aur Sujood Ho'n, (Musannaf Ibne Abi Shaiba, Hadees No.11525, Majlis e Ilmi Bairoot) Moosa Bin Ali Apne Waalid Se Riwaayat Karte Hai'n Ke, Mai'n Ne Hazrat Fuzaala Bin Ubaid Radiallahu Anhu Se Poocha, Kya Namaaz e Janaazah Me'n Qur'aan Padha Jaayega ? Unho'n Ne Kaha Nahee'n, (Musannaf Ibne Abi Shaiba, Hadees No.11526, Majlis e Ilmi Bairoot) Sa'eed Bin Abi Burdah Apne Waalid Se Riwaayat Karte Hai'n Ke, Ek Shakhs Ne Unse Poocha, Mai'n Namaaz e Janaazah Me'n Sureh Faateha Padhu'n ? Unho'n Ne Kaha Mat Padho, (Musannaf Ibne Abi Shaiba, Hadees No.11526, Majlis e Ilmi Bairoot) Abu Husain Ne Sho'bi Se Riwaayat Kiya Ke Namaaz e Janaazah Me'n Qur'aan e Majeed Ki Tilaawat Nahee'n Hai, (Musannaf Ibne Abi Shaiba, Hadees No.11528, Majlis e Ilmi Bairoot) Taa'oos Aur Ata Namaaz e Janaazah Me'n Qur'aan Padhne Ka Inkaar Karte The, (Musannaf Ibne Abi Shaiba, Hadees No.11529, Majlis e Ilmi Bairoot) Bakar Bin Abdullah Ne Kaha, Mujhe Namaaz e Janaazah Me'n Qur'aan Padhne Ka Ilm Nahee'n, (Musannaf Ibne Abi Shaiba, Hadees No.11530, Majlis e Ilmi Bairoot) Mohammad Bin Abdullah Bayaan Karte Hai'n Ke, Mai'n Ne Saalim Se Poocha, Kya Namaaz e Janaazah Me'n Qur'aan Padha Jaayega ? Unho'n Ne Kaha, Namaaz e Janaazah Me'n Qur'aan Nahee'n Padha Jaayega, (Musannaf Ibne Abi Shaiba, Hadees No.11532, Majlis e Ilmi Bairoot) Qataadah Bayaan Karte Hai'n Ke, Ibne Musayyab Ne Kaha, Hume'n Ilm Nahee'n Ke Namaaz e Janaazah Me'n Qur'aan Ki Tilaawat Hai Na Kisi Mo'ayyan Du'aa Ki, (Musannaf Abdur Razzaaq, Hadees No.6464, Daarul Kitaab Ilmiya Bairoot) Hazrat Abdullah Bin Mas'ood Radiallahu Anhu Ne Farmaaya, Namaaz e Janaazah Me'n Humaare Liye Qir'aat Mo'ayyan Ki Gayi Hai Aur Na Koi Aur Qaul, Imaam Ki Takbeer Par Takbeer Kaho, Aur Achchi Tarah Du'aa Aur Sana Karo, (Majma'uz Zawaa'id, Jild No.3, Safha No.32, Haafiz Haisami Ne Kaha, Iss Hadees Ko Imaam Ahmad Ne Riwaayat Kiya Aur Iske Tamaam Raawi Saheeh Hai'n (Ba Hawaala Ne'matul Baari Fi Sharah Saheeh Bukhaari Az Allaama Gulaam Rasool Sa'eedi Alaihir Rehma, Hadees No.1335 Ke Tahet).
Baab, Dafan Ke Baa'd Qabar Par Namaaz e Janaazah Padhna. Sho'bi Ne Kaha Ke, Mujhe Uss Shakhs Ne Khabar Di Jo Nabi e Kareem ﷺ Ke Saath Ek Munfarid Qabar Ke Paas Se Guzra Tha, Aap Alaihissalaam Ne Musalmaano'n Ki Imaamat Ki Aur Unho'n Ne Aap Alaihissalaam Ke Peechhe Namaaz Padhi, Mai'n Ne Poochha Aye Abu Amro ! Aapko Kisne Yeh Hadees Bayaan Ki, Unho'n Ne Kaha, Hazrat Ibne Abbaas Radiallahu Anhuma Ne.
Hazrat Abu Hurairah Radiallahu Anhu Bayaan Karte Hai'n Ke, Ek Siyaah Faam Mard Ya Aurat Jo Masjid Ki Safaayi Karta Tha, Pas Woh Faut Hogaya, Aur Nabi e Kareem ﷺ Ko Unki Wafaat Ka Ilm Nahee'n Huwa, Pas Ek Din Aap Alaihissalaam Ne Uska Zikr Kiya, Pas Farmaaya Uss Insaan Ko Kya Huwa ? Musalmaano'n Ne Bataaya, Ya Rasoolallah ﷺ ! Woh Faut Hogaya Hai, Aap Alaihissalaam Ne Farmaaya, Tumne Mujhe Khabar Kyu'n Nahee'n Ki, Pas Musalmaano'n Ne Arz Kiya, Uska Iss Tarah Aur Iss Tarah Qissa Hai, Unho'n Ne Usko Kam Haisiyat Ka Samjha Tha, Aap Alaihissalaam Ne Farmaaya, Mujhe Uski Qabar Bataao, Phir Aap Alaihissalaam Uski Qabar Par Aaye Aur Uss Par Namaaz Padhi.
Baab, Murdah Jooto'n Ki Aawaaz "Bhi" Sunta Hai. Riwaayat Hai Hazrat Anas Radiallahu Anhu Se Ke Rasoolullah ﷺ Ne Farmaaya, Jab Bandah Qabar Me'n Rakh Diya Jaata Hai, Aur Uske Saathi Peeth Pher Kar Chale Jaate Hai'n, Hatta Ke Woh Unke Jooto'n Ki Aawaaz Sunta Hai, Phir Uske Paas 2 Farishte Aate Hai'n, Aakar Usko Bithaate Hai'n, Pas Woh Usse Kehte Hai'n, Tum Uss Shakhs Mohammad (ﷺ) Ke Baare Me'n Kya Kehte The ? Pas Woh Kahega Mai'n Gawaahi Deta Hoo'n Ke Yeh Allah Ke Bande Aur Uske Rasool Hai'n, Phir Usse Kaha Jaayega Dekho ! Tumhaare Baithne Ki Jagah Dozakh Me'n Thi, Allah Ne Usko Tumhaare Liye Jannat Me'n Baithne Ki Jagah Se Tabdeel Kardiya, Nabi e Kareem ﷺ Ne Farmaaya, Pas Woh Un Dono'n Jagaho'n Ko Dekhega, Raha Kaafir Ya Munaafiq To Woh Kahega, Mai'n Nahee'n Jaanta, Mai'n Wohi Kehta Tha Jo Log Kehte The, Pas Usse Kaha Jaayega, Tu Ne Aqal Se Jaana Na Qur'aan e Majeed Ki Tilaawat Ki, Phir Uske Dono'n Kaano'n Ke Darmiyaan Lohe Ke Hathode Se Zarb Lagaayi Jaayegi, Jisse Woh Chillaayega Aur Uske Chillaane Ko Jinn Wa Ins (Insaan) Ke Alaawah Uske Qareeb Tamaam Cheeze'n Sune'ngi.
Baab, Jo Arze Muqaddasa Ya Uski Misl Jagah Me'n Dafan Hone Ko Pasand Kare. Hazrat Abu Hurairah Radiallahu Anhu Bayaan Karte Hai'n Ke Hazrat Moosa Alaihissalaam Ki Taraf Malakul Maut Ko Bheja Gaya, Jab Unke Paas Malakul Maut Aaya, To Unho'n Ne Usko Ek Thappad Maara, Woh Apne Rab Ki Taraf Laut Gaya, Pas Kaha, Aye Allah ! Tu Ne Mujhe Aise Bande Ki Taraf Bheja Jo Maut Ka Iraadah Hi Nahee'n Karta, Allah Azzowajal Ne Uski Aa'nkh Lauta Di, Aur Farmaaya, Jaao Unse Kehna, Aap Bail Ki Pusht Par Haath Rakh De'n, Aapke Haath Se Jitne Baal Chhupe'nge To Har Baal Ke Badle Me'n Aapki 1 Saal Ki Umar Hogi, Hazrat Moosa Alaihissalaam Ne Poochha, Aye Mere Rab ! Phir Kya Hoga ? Farmaaya, Phir Maut Hogi ! Hazrat Moosa Alaihissalaam Ne Kaha, Phir Maut Abhi Ho Jaaye, Phir Allah Se Sawaal Kiya Ke Woh Unko Arze Muqaddasa Se Itni Door Karde Jitni Door Pat'thar Phe'nkne Se Jaata Hai, Hazrat Abu Hurairah Radiallahu Anhu Ne Kaha, Rasoolullah ﷺ Ne Irshaad Farmaaya, Agar Mai'n Uss Jagah Hota To Mai'n Tumko Hazrat Moosa Alaihissalaam Ki Qabar Dikhaata, Woh Raaste Ki Jaanib Surkh Ret Ke Teele Ke Paas Hai.
Baab, Raat Ko Dafan Karna. Aur Hazrat Abu Bakar Radiallahu Anhu Ko Raat Me'n Dafan Kiya Gaya. Hazrat Ibne Abbaas Radiallahu Anhuma Bayaan Karte Hai'n Ke Nabi e Kareem ﷺ Aur Aap Alaihissalaam Ke As'haab Ne Ek Shakhs Ke Dafan Kiye Jaane Ke Ba'ad Raat Ko Uski Namaaz e Janaazah Padhi, Aap Alaihissalaam Ne Poocha, Yeh Kaun Hai ? Musalmaano'n Ne Kaha, Yeh Fulaa'n Shakhs Hai, Jise Raat Ko Dafan Kardiya Gaya Tha, Pas Musalmaano'n Ne Uski Namaaz e Janaazah Padhi.
Baab, Qabar Par Masjid Banaana. Hazrat Aa'yesha Radiallahu Anha Bayaan Karti Hai'n Ke Jab Nabi e Kareem ﷺ Beemaar Hogaye To Aapki Ba'az Azwaaj Ne 1 Girje Ka Zikr Kiya, Jisko Unho'n Ne Habsha Ki Sarzameen Me'n Dekha Tha, Jiska Naam Maariya Tha, Aur Hazrat Umme Salma Aur Hazrat Umme Habeeba Habsha Ki Sarzameen Me'n Gayi Thee'n, Pas Unho'n Ne Uski Khoobsurati Aur Usme'n Lagi Huwi Tasveero'n Ka Zikr Kiya, To Aap Alaihissalaam Ne Apna Sar e Mubaarak Uthaaya Phir Farmaaya, Jab Un Logo'n Me'n Se Koi Nek Aadmi Mar Jaata Hai To Yeh Log Uski Qabar Par Masjid Bana Dete Hai'n, Phir Usme'n Tasveere'n Bana Dete Hai'n Yeh Log Allah Ke Nazdeek Badtareen Makhlooq Hai'n.
Baab, Aurato'n Ki Qabar Me'n Kaun Daakhil Hoga. Hazrat Anas Radiallahu Anhu Bayaan Karte Hai'n Ke Hum Rasoolullah ﷺ Ki Saahebzaadi Ke Janaaze Me'n Haazir Huwe Aur Rasoolullah ﷺ Qabar Ke Paas Baithe Huwe The, Pas Mai'n Ne Dekha Ke Aap Alaihissalaam Ki Dono'n Aa'nkho'n Se Aa'nsu Jaari The, Aap Alaihissalaam Ne Poocha, Tum Me'n Se Koi Aisa Shakhs Hai Jisne Raat Ko Jima Na Kiya Ho, Hazrat Abu Talha Radiallahu Anhu Ne Kaha, Mai'n Hoo'n, Aap Alaihissalaam Ne Farmaaya, Tum Inki Qabar Me'n Utro, Pas Hazrat Abu Talha Radiallahu Anhu Aap Alaihissalaam Ki Saahebzaadi "Hazrat Ruqayya" Ki Qabar Me'n Utre Pas Unko Qabar Me'n Utaara, Ibne Mubaarak Ne Bayaan Kiya, Faleeh Ne Kaha, Iska Ma'ni Yeh Hai Ke, Jisne Raat Ko Gunaah Na Kiya Ho, Imaam Bukhaari Ne Kaha, Qur'aan e Majeed Me'n "Liyaqtarifu" Ka Ma'ni Hai, Taake Woh Gunaah Kare'n.
Baab, Shaheed Par Namaaz e Janaazah Padhna. Hazrat Jaabir Bin Abdullah Radiallahu Anhu Ne Bayaan Kiya Ke, Nabi e Kareem ﷺ Ohad Me'n Se 2 Aadmiyo'n Ko 1 Kapde Me'n Jama Karrahe The, Phir Aap Alaihissalaam Poochhte, In Me'n Se Kisko Zyaadah Qur'aan Yaad Hai ? Pas Unme'n Se Jab Kisi 1 Ki Taraf Ishaarah Kiya Jaata, To Aap Alaihissalaam Usko Lahed Me'n Muqaddam Rakhte, Aur Farmaate, Mai'n Qayaamat Ke Din In Logo'n Par Gawaah Hoo'nga Aur Aap Alaihissalaam Ne Hukm Farmaaya Ke Inko Inke Khoon Ke Saath Dafan Kardiya Jaaye, Aur Inko Gusl Na Diya Jaaye, Aur Na In Par Namaaz Padhi Jaaye. (Yaad Rahe Shaheed Ki Namaaz e Janaazah Padhne Me'n Bhi A'imma e Kiraam Ke Darmiyaan Ikhtelaaf Hai, Imaam Tirmizi Farmaate Hai'n Ke Shaheed Ki Namaaz e Janaazah Padhne Me'n Ikhtelaaf Hai Ba'az Ne Kaha, Shaheed Ki Namaaz e Janaazah Nahee'n Padhi Jaayegi Yeh Ahle Madeena Ka Qaul Hai, Imaam Shaafayi Aur Imaam Ahmad Ka Bhi Yehi Mazhab Hai, Aur Ba'az Ne Kaha Ke Shaheed Ki Namaaz e Janaazah Padhi Jaayegi, Unka Istedlaal Woh Hadees Hai Jisme'n Hai Ke Nabi e Kareem ﷺ Ne Hazrat Sayyaduna Hamzah Radiallahu Anhu Ki Namaaz e Janaazah Padhi, Yeh Imaam Sauri Aur Fuqaha e Ahnaaf Aur Mohaddis Is'haaq Ka Qaul Hai (Dekhe'n Sunane Tirmizi Shareef, Safha No.437, Daarul Ma'refa Bairoot).
Riwaayat Hai Hazrat Uqba Bin Aa'mir Radiallahu Anhu Se Ke Rasoolullah ﷺ Ek Din Ghar Se Nikle Aur Aap Alaihissalaam Ne Ahle Ohad Par Iss Tarah Namaaz Padhi Jis Tarah Mayyat Par Namaaz Padhi Jaati Hai, Phir Aap Alaihissalaam Mimbar Ki Taraf Mude, Pas Farmaaya, Mai'n Tumhaara Pesh Row Hoo'n, Aur Mai'n Tum Par Gawaah Hoo'n, Aur Beshak Allah Ki Qasam ! Mai'n Ab Bhi Apne Hauz Ki Taraf Zaroor Dekh Raha Hoo'n, Aur Beshak Mujhe Rooye Zameen Ke Khazaano'n Ki Chaabiyaa'n Ata Ki Gayi Hai'n, Aur Allah Ki Qasam ! Beshak Mujhe Yeh Khatrah Nahee'n Hai Ke Tum (Sab) Mere Ba'ad Mushrik Ho Jaaoge Lekin Mujhe Khatrah Hai Tum Duniya Me'n Ragbat Karoge.
Baab, 2 Ya 3 Murdo'n Ko 1 Qabar Me'n Dafan Karna. Hazrat Jaabir Bin Abdullah Radiallahu Anhu Ne Khabar Di Ke Rasoolullah ﷺ Shohada e Ohad Me'n Se 2 Murdo'n Ko (1 Qabar Me'n) Jama Karte The.
Baab, Jinke Nazdeek Shohada Ko Gusl Dena Jaa'iz Nahee'n. Riwaayat Hai Hazrat Jaabir Radiallahu Anhu Se Ke Rasoolullah ﷺ Ne Farmaaya, Unko Unke Khoono'n Me'n Dafan Kardo, Ya'ni Gazwa e Ohad Ke Din Aur Unko Gusl Nahee'n Diya.
Baab, Jisko Lahed Me'n Rakha Jaaye. Aur "Lahed" Ko Lahed Isliye Kaha Jaata Hai Ke Woh Ek Jaanib (Bagali Qabar) Hoti Hai. Aur Har Zaalim Ilhaad Karne Waala Hai. "Multahada" Ka Ma'ni Hai "Ma'dila" Adool Ki Jagah. Hazrat Jaabir Bin Abdullah Radiallahu Anhuma Bayaan Karte Hai'n Ke Nabi e Kareem ﷺ Shohada e Ohad Me'n Se 2 Murdo'n Ko 1 Kapde Me'n Jama Karte The, Phir Poochhte The Ke In Me'n Se Kisko Zyaadah Qur'aan Yaad Hai ? Pas Jab Unme'n Se Kisi 1 Ki Taraf Ishaarah Kiya Jaata To Usko Lahed Me'n Pehle Rakha Jaata Aur Aap Alaihissalaam Ne Farmaaya, Mai'n In Par Gawaah Hoo'n Aur Unko Unke Khoono'n Me'n Dafan Karne Ka Hukm Diya Aur Unme'n Se Kisi Ki Namaaz e Janaazah Nahee'n Padhi Aur Na Unko Gusl Diya.
Aur Ibne Mubaarak Ne Kaha, Aur Hume'n Auzaayi Ne Khabar Di Az Zohri Az Hazrat Jaabir Bin Abdullah Radiallahu Anhu Ke Rasoolullah ﷺ Shohada e Ohad Ke Muta'alliq Poochhte Ke Unme'n Se Kisko Zyaadah Qur'aan Yaad Hai ? Pas Jab Kisi Mard Ki Taraf Ishaarah Kiya Jaata To Aap Alaihissalaam Usko Uske Saathi Se Pehle Lahed Me'n Rakhte, Aur Hazrat Jaabir Radiallahu Anhu Ne Kaha, Pas Mere Waalid Aur Mere Chacha Ko 1 Chaadar Me'n Kafan Diya Gaya, Aur Sulemaan Bin Kaseer Ne Kaha, Mujhe Zohri Ne Hadees Bayaan Ki, Unho'n Ne Kaha, Mujhe Uss Shakhs Ne Hadees Bayaan Ki Jisne Hazrat Jaabir Radiallahu Anhu Se Suna Tha.
Baab, Qabar Me'n Izkhir Aur Hasheesh (Ghaas) Ko Rakhna. Riwaayat Hai Hazrat Ibne Abbaas Radiallahu Anhuma Se Ke Nabi e Kareem ﷺ Ne Farmaaya, Allah Azzowajal Ne Makkah Ko Haram Bana Diya, Pas Mujhse Pehle Kisi Keliye Isme'n (Qitaal) Jaa'iz Na Tha, Na Mere Ba'ad Jaa'iz Hai, Mere Liye Din Ki 1 Saa'at Me'n Isko Halaal Kiya Gaya Tha, Iski Ghaas Kaati Na Jaaye Na Iska Darakht Kaata Jaaye Aur Na Yahaa'n Ke Jaanwar (Shikaar) Ko Bhagaaya Jaaye Aur Na Wahaa'n Ki Padi Huwi Cheez Uthaayi Jaaye Maasiwa Ae'laan Karne Waale Ke, Hazrat Abbaas Radiallahu Anhu Ne Kaha, Siwaaye Izkhir (Ghaas) Ke Kyu'n Ke Woh Humaare Sunaaro'n Ke Kaam Aati Hai, Aur Humaari Qabro'n Me'n Rakhi Jaati Hai, Aap Alaihissalaam Ne Farmaaya, Siwaaye Izkhir Ke, Aur Hazrat Abu Hurairah Radiallahu Anhu Ne Kaha Ke, Nabi e Kareem ﷺ Ne Farmaaya, Humaari Qabro'n Aur Gharo'n Keliye, Aur Abaan Bin Saaleh Ne Kaha Az Hasan Bin Muslim Az Safiya Bint Shabiya Riwaayat Hai Ke Mai'n Ne Rasool e Akram ﷺ Se Iski Misl Suni Hai Aur Mujaahid Ne Kaha, Az Taa'oos Az Hazrat Ibne Abbaas Radiallahu Anhuma, Unke Lohaaro'n Keliye Aur Unke Gharo'n Keliye.
Baab, Kya Kisi Sabab Ki Wajah Se Mayyat Ko Qabar Aur Lahed Se Nikaala Jaayega ? Amro Ne Kaha, Mai'n Ne Hazrat Jaabir Bin Abdullah Radiallahu Anhuma Se Suna Ke Abdullah Bin Ubayi Ki Tadfeen Ke Ba'ad Rasoolullah ﷺ Unke Paas Gaye, Phir Aap Alaihissalaam Ke Hukm Se Usko Qabar Se Nikaala Gaya, Aap Alaihissalaam Ne Usko Apne Ghutno'n Par Rakha, Aur Uspar Apna Lu'aabe Dahen Daala, Aur Usko Apni Qamees Pehnaayi, Pas Allah Hi Zyaadah Jaanne Waala Hai, Ibne Ubayi Ne Hazrat Abbaas Radiallahu Anhu Ko Qamees Pehnaayi Thi, (Jab Woh Gazwa e Badar Me'n Hazrat Abbaas Radiallahu Anhu Ko Kisi Ki Qamees Poori Nahee'n Aarahi Thi) Sufiyaan Ne Kaha, Aur Hazrat Abu Hurairah Radiallahu Anhu Ne Bayaan Kiya Ke Nabi e Kareem ﷺ Ke Upar 2 Qamees Thee'n, To Abdullah Ke Bete Ne Kaha, Ya Rasoolallah ﷺ ! Mere Baap Ko Woh Qamees Paho'nchaaye'n Jo Aapke Jism Ke Saath Mili Huwi Hai, Sufiyaan Ne Kaha, Musalmaano'n Ka Yeh Gumaan Tha Ke Nabi e Kareem ﷺ Ne Abdullah Ko Isliye Qamees Pehnaayi Ke Usne Hazrat Abbaas Radiallahu Anhu Ko Qamees Pehnaayi Thi Uska Badla Ho Jaaye.
Hazrat Jaabir Radiallahu Anhu Bayaan Karte Hai'n Ke Jab Gazwa e Ohad Pesh Aaya, To Mere Waalid Ne Mujhe Raat Ko Bulaaya Aur Kaha, Mera Yehi Gumaan Hai Ke Nabi e Kareem ﷺ Ke As'haab Me'n Se Jo Shaheed Ho'nge Mai'n Unme'n Sabse Pehle Shaheed Ho Jaau'nga Aur Mai'n Jinko Chhod Kar Jaau'nga Unme'n Rasoolullah ﷺ Ke Ba'ad Mujhe Sabse Zyaadah Azeez Tum Ho Pas Mujh Par Qarz Hai, So Tum Mera Qarz Ada Kardena, Aur Tum Apni Behno'n Ke Saath Nek Sulook Karna, Phir Subah Huwi To Woh Sabse Pehle Shaheed The, Aur Unke Saath Ek Aur Shakhs Ko Bhi Qabar Me'n Dafan Kiya Gaya, Mera Dil Isse Khush Nahee'n Huwa Ke Mai'n Unko Doosre Shakhs Ke Saath Rakhu'n, Pas Mai'n Ne 6 Maheene Ba'ad Unko Qabar Se Nikaal Liya, Pas Woh Usi Tarah The Jaise Uss Waqt Unko Rakha Tha, Albatta Kaan Thoda Sa Mutagayyar Huwa Tha.
Hazrat Jaabir Radiallahu Anhu Bayaan Karte Hai'n Ke Mere Waalid Ke Saath Ek Shakhs Ko Dafan Kiya Gaya, Pas Mera Dil Isse Khush Nahee'n Huwa, Hatta Ke Mai'n Ne Apne Waalid Ko Nikaala Pas Mai'n Ne Unko Alag Qabar Me'n Rakha.
Baab, Qabar Ko Lahde Aur Shaq Ki Soorat Me'n Banaana. Hazrat Jaabir Bin Abdullah Radiallahu Anhuma Bayaan Karte Hai'n Ke Nabi e Kareem ﷺ Shohada e Ohad Me'n Se 2 Murdo'n Ko 1 Qabar Me'n Jama Karte The, Phir Aap Alaihissalaam Farmaate, Inme'n Se Kisko Qur'aan Zyaadah Yaad Hai ? Pas Jab Unme'n Se Kisi Ek Ki Taraf Ishaarah Kiya Jaata, To Aap Alaihissalaam Usko Pehle Lahed Me'n Rakhte Phir Farmaate, Mai'n Qayaamat Ke Din In Logo'n Ko Gawaah Ho'nga, Phir Aap Alaihissalaam Ne Hukm Diya Ke In Logo'n Ko Inke Khoono'n Ke Saath Dafan Kardiya Jaaye Aur Unko Gusl Nahee'n Diya.
Baab, Jab Bachcha Islaam Le Aaye Pas Faut Ho Jaaye To Kya Uski Namaaz e Janaazah Padhi Jaayegi ? Aur Kya Bachche Ke Upar Islaam Pesh Kiya Jaayega ? Aur Hasan Basri, Aur Shareeh Aur Ibraaheem Aur Qataadah Ne Yeh Kaha Hai Ke Jab Maa'n Baap Me'n Se Koi Ek Musalmaan Ho Jaaye To Bachcha Musalmaan Ke Saath Hoga. Aur Hazrat Ibne Abbaas Radiallahu Anhuma Za'eef Logo'n Me'n Apni Maa'n Ke Saath The Aur Apni Qaum Ke Deen Par Apne Baap Ke Saath The. Aur Aap Alaihissalaam Ne Farmaaya, Islaam Gaalib Rehta Hai Aur Magloob Nahee'n Hota. Hazrat Ibne Umar Radiallahu Anhuma Ne Khabar Di Ke Hazrat Umar Radiallahu Anhu Aur Chand Musalmaan Nabi e Kareem ﷺ Ke Saath Ibne Sayyaad Ki Taraf Gaye, Hatta Ke Usko Iss Haal Me'n Dekha Ke Woh Bachcho'n Ke Saath Bani Magaala Ke Makaano'n Ke Saath Khel Raha Tha, Aur Uss Waqt Ibne Sayyaad Baloogat Ke Qareeb Tha, Usko Pata Nahee'n Chala Hatta Ke Nabi e Kareem ﷺ Ne Uspar Apna Haath Maara, Phir Aap Alaihissalaam Ne Ibne Sayyaad Se Farmaaya, Kya Tum Shahaadat Dete Ho Ke Mai'n Allah Ka Rasool Hoo'n, Ibne Sayyaad Ne Aap Alaihissalaam Ki Taraf Dekha, Phir Kaha, Mai'n Gawaahi Deta Hoo'n Ke Aap Ummiyeen (Anpadh Logo'n) Ke Rasool Hai'n, Phir Ibne Sayyaad Ne Rasoolullah ﷺ Se Kaha, Kya Aap Gawaahi Dete Hai'n Ke Mai'n Allah Ka Rasool Hoo'n ? Pas Nabi e Kareem ﷺ Ne Usko Chhod Diya, Aur Farmaaya, Mai'n Allah Par Imaan Laata Hoo'n, Aur Uske Tamaam Rasoolo'n Par, Phir Aap Alaihissalaam Ne Usse Poocha, Tum Kya Dekhte Ho ? To Ibne Sayyaad Ne Kaha, Mere Paas Saadiq Aur Kaazib (Khabre'n) Aati Hai'n, Tab Nabi e Kareem ﷺ Ne Farmaaya, Tum Par Mu'aamla Mutashabbeh Hogaya Hai, Phir Nabi e Kareem ﷺ Ne Usse Farmaaya, Mai'n Ne Tumhaare Liye Ek Baat Chhupaayi Hai, (Bataao ! Woh Kya Hai ?) Ibne Sayyaad Ne Kaha, Woh Dukh Hai, Aap Alaihissalaam Ne Farmaaya, Dafa Ho Ja, Tu Apni Had Se Tajaawuz Nahee'n Kar Sakta, Phir Hazrat Umar Radiallahu Anhu Ne Arz Kiya, Ya Rasoolallah ﷺ ! Mujhe Ijaazat De'n Mai'n Iski Gardan Uda Doo'n, Pas Nabi e Kareem ﷺ Ne Farmaaya, Agar Yeh Wohi Hai (Ya'ni Dajjaal) To Tum Iss Par Musallat Nahee'n Ho, Aur Agar Yeh Woh Nahee'n Hai To Phir Isko Qatal Karne Me'n Tumhaare Liye Koi Khair Nahee'n Hai.
Aur Saalim Ne Kaha, Mai'n Ne Hazrat Ibne Umar Radiallahu Anhuma Se Suna, Woh Bayaan Karte The Ke Uske Ba'ad Rasoolullah ﷺ Aur Hazrat Ubayi Bin Ka'ab Radiallahu Anhu Un Khajoor Ke Darakhto'n Ki Taraf Gaye, Jinme'n Ibne Sayyaad Tha, Aur Aap Alaihissalaam Yeh Heela Karrahe The Ke Ibne Sayyaad Ke Dekhne Se Pehle Uski Koi Baat Sunle'n, Pas Nabi e Kareem ﷺ Ne Usko Dekha, Woh Ek Chaadar Odh Kar Leta Huwa Tha, Usme'n Uski Gungunaahat Ki Aawaaz Aarahi Thi, Ibne Sayyaad Ki Maa'n Ne Rasoolullah ﷺ Ko Dekh Liya, Uss Waqt Aap Alaihissalaam Khajoor Ke Darakhto'n Ki Aad Me'n Chhupe Huwe The, Usne Ibne Sayyaad Se Kaha, Ya Saaf, Aur Yeh Ibne Sayyaad Ka Naam Hai, Uski Maa'n Ne Kaha, Yeh Mohammad ﷺ Hai'n, Pas Ibne Sayyaad Uth Kar Khada Hogaya, Tab Nabi e Kareem ﷺ Ne Farmaaya, Agar Woh Ibne Sayyaad Ko Chhod Deti To Uska Mu'aamla Munkashif Ho Jaata, Aur Shoeb Ne Apni Hadees Me'n Kaha, Pas Aap Alaihissalaam Ne Usko Chhod Diya, Ramrama Ya Zamzama, Aur Aqeel Ne Kaha, Ramrama, Aur Mo'mar Ne Kaha Ramza,
Hazrat Anas Radiallahu Anhu Ne Bayaan Kiya Ke Ek Yahoodi Ladka Nabi e Kareem ﷺ Ki Khidmat Kiya Karta Tha, Pas Woh Beemaar Hogaya, To Nabi e Kareem ﷺ Uski Iyaadat Karne Keliye Gaye, Pas Aap Alaihissalaam Uske Sar Ke Paas Baith Gaye, Aap Alaihissalaam Ne Usse Farmaaya, Islaam Qabool Karlo, Uska Baap Bhi Uske Paas Tha, So Uss Ladke Ne Apne Baap Ki Taraf Dekha, Uske Baap Ne Kaha, Abul Qaasim ﷺ Ka Hukm Maano, So Woh Islaam Le Aaya, Pas Nabi e Kareem ﷺ Wahaa'n Se Nikle, Uss Waqt Aap Alaihissalaam Farma Rahe The, Allah Ka Shukr Hai Jisne Usko Dozakh Se Nijaat Di.
Ubaidullah Ne Bayaan Kiya Ke Mai'n Ne Hazrat Ibne Abbaas Radiallahu Anhuma Ko Yeh Farmaate Huwe Suna Hai Ke Mai'n Aur Meri Waalidah Aurato'n Me'n Se Thee'n.
Shoeb Ne Khabar Di Unho'n Ne Bayaan Kiya Ke, Ibne Shihaab Har Faut Shudah Bachche Ki Namaaz e Janaazah Padhte The Khwaah Woh Kisi Tawaa'if Ka Bachcha Ho, Kyu'n Ke Woh Bachcha Fitrat e Islaam Par Paida Huwa Hai, Uske Maa'n Baap Islaam Ke Muddayi Hai'n, Ya Khusoosan Uska Baap, Khwaah Uski Maa'n Islaam Ke Alaawa Kisi Aur Deen Par Ho, Jab Bachcha Paida Hone Ke Ba'ad Aawaaz Se Royega To Uski Namaaz e Janaazah Padhi Jaayegi Aur Jo Paida Hone Ke Ba'ad Aawaaz Se Nahee'n Royega Uski Namaaz e Janaazah Nahee'n Padhi Jaayegi, Kyu'n Ke Ho Sakta Hai Woh Na Tamaam Bachcha Ho, Kyu'n Ke Hazrat Abu Hurairah Radiallahu Anhu Yeh Hadees Bayaan Karte The Ke Nabi e Kareem ﷺ Ne Farmaaya, Har Bachcha Fitrat Par Paida Hota Hai, Phir Uske Maa'n Baap Usko Yahoodi Bana Dete Hai'n Ya Nasraani Bana Dete Hai'n Ya Majoosi Bana Dete Hai'n, Jaise Chaupaaye Hai'n Sab Mukammal Jism Ke Saath Paida Hote Hai'n Kya Tum Unme'n Se Kisi Ko Kankata Ya Nakta Dekhte Ho, Phir Hazrat Abu Hurairah Radiallahu Anhu Ne Yeh Aayat Padhi, Allah Ne Jis Fitrat (Banaawat) Par Logo'n Ko Paida Kiya Hai (Sureh Room, Aayat No.30).
Hazrat Abu Hurairah Radiallahu Anhu Ne Bayaan Kiya Ke Nabi e Kareem ﷺ Ne Farmaaya, Jo Bachcha Bhi Paida Hota Hai Woh Fitrat Par Paida Hota Hai, Phir Uske Maa'n Baap Usko Yahoodi Ya Nasraani Ya Majoosi Bana Dete Hai'n, Jaise Chaupaaya Saheeh Saalim Bachcha Janta Hai, Kya Tum Usme'n Kaan Ya Naak Kati Huwi Dekhte Ho ? Phir Hazrat Abu Hurairah Radiallahu Anhu Ne Yeh Aayat Padhi, Allah Ki Woh Fitrat (Banaawat) Jis Par Usne Logo'n Ko Paida Kiya, Allah Ki Takhleeq Me'n Koi Tabdeeli Nahee'n Hai, Yehi Saheeh Deen Hai. (Sureh Room, Aayat No.30)
Baab, Jab Mushrik Maut Ke Waqt "La Ilaaha Illallaah" Padhe. Sa'eed Bin Musayyab Ne Khabar Di Apne Waalid Ke Waaste Se, Unho'n Ne Bayaan Kiya Ke Jab Abu Taalib Par Maut Ka Waqt Aaya, To Uske Paas Rasoolullah ﷺ Gaye, Pas Aap Alaihissalaam Ne Uske Paas Abu Jahel Bin Hishaam Aur Abdullah Bin Abi Umayya Bin Mugeerah Ko Paaya, Tab Rasoolullah ﷺ Ne Abu Taalib Se Farmaaya, Aye Mere Chacha ! Aap Yeh Kalma Padhe'n "La Ilaaha Illallaah" To Mai'n Allah Ke Paas Aapke Haq Me'n Shahaadat Doo'nga, Pas Abu Jahel Aur Abdullah Bin Abi Umayya Ne Kaha, Aye Abu Taalib ! Kya Tum Abdul Muttalib Ki Ummat Se Ae'raaz Karoge ? Rasoolullah ﷺ Abu Taalib Par Musalsal Kalma Pesh Karte Rahe Aur Woh Dono'n Apni Baat Dohraate Rahe, Hatta Ke Abu Taalib Ne Unse Jo Aakhri Baat Kahi Woh Yeh Thi Ke Woh Abdul Muttalib Ki Millat Par Hai, Aur Usne "La Ilaaha Illallaah" Padhne Se Inkaar Kardiya, Tab Rasoolullah ﷺ Ne Farmaaya, Sune'n ! Allah Ki Qasam ! Mai'n Aapke Liye Allah Se Magferat Talab Karta Rahoo'nga Jab Tak Mujhe Isse Mana Nahee'n Kiya Jaayega, Tab Allah Azzowajal Ne Iske Muta'alliq Yeh Aayat Naazil Ki, Nabi Keliye Aur Imaan Waalo'n Keliye Yeh Jaa'iz Nahee'n Hai Ke Woh Mushrikeen Keliye Allah Se Magferat Talab Kare'n Khwaah Woh Unke Rishtedaar Ho'n. (Sureh Tauba, Aayat No.113)
Baab, Qabar Par Darakht Ki Shaakh Rakhna. Aur Hazrat Buraidah Aslami Ne Yeh Wasiyyat Ki Ke Unki Qabar Par Khajoor Ke Darakht Ki 2 Shaakhe'n Rakhi Jaaye'n. Aur Hazrat Ibne Umar Radiallahu Anhuma Ne Hazrat Abdur Rehmaan Bin Abu Bakar Radiallahu Anhu Ki Qabar Par Khaima Laga Huwa Dekha, To Farmaaya, Aye Gulaam ! Isko Ukhaad Lo, Iss Shakhs Par Iske Amal Ka Saaya Hoga. Aur Khaarja Bin Zaid Ne Kaha, Aur Mai'n Ne Apne Aapko Ko Dekha Aur Uss Waqt Hazrat Usmaan Radiallahu Anhu Ke Zamaane Me'n Hum Jawaan The Aur Hum Me'n Sabse Badi Chhalaang Woh Shakhs Lagaata Tha Jo Hazrat Usmaan Radiallahu Anhu Ki Qabar Ko Phalaang Leta Tha. Aur Usmaan Bin Hakeem Ne Kaha, Khaarja Ne Mera Haath Pakad Kar Mujhe Qabar Par Bithaaya Aur Mujhe Yeh Khabar Di Ke Mere Chacha Yazeed Bin Saabit Ne Kaha Hai Ke Qabar Par Baithna Uske Liye Mana Hai Jo Qabar Par Baith Kar Wazu Tode. Aur Naafe Ne Kaha Ke, Hazrat Ibne Umar Radiallahu Anhuma Qabro'n Par Baith'te The. Hadees : Hazrat Ibne Abbaas Radiallahu Anhuma Nabi e Kareem ﷺ Se Riwaayat Karte Hai'n Ke Nabi e Kareem ﷺ Aisi 2 Qabro'n Ke Paas Se Guzre Jinko Azaab Diya Jaaraha Tha, Aapne Farmaaya, Beshak Inko Azaab Diya Jaaraha Hai, Aur Inko Kisi Aisi Cheez Me'n Azaab Nahee'n Diya Jaaraha Hai Jisse Bachna Dushwaar Ho, Raha In Dono'n Me'n Se Ek To Woh Peshaab Se Nahee'n Bachta Tha, Aur Raha Doosra To Woh Chugli Karta Tha, Phir Aap Alaihissalaam Ne Khajoor Ke Darakht Ki Ek Tar (Geeli) Shaakh Li, Pas Uske 2 Tukde Kiye, Phir Har Ek Ki Qabar Me'n Ek Tukda Gaad Diya, Pas Musalmaano'n Ne Poocha, Ya Rasoolallah ﷺ ! Aapne Aisa Kyu'n Kiya ? Aapne Farmaaya, Tehqeeq Yeh Hai Ke Jab Tak Yeh Shaakhe'n Khush Nahee'n Ho'ngi Inke Azaab Me'n Takhfeef Hoti Rahegi.
Baab, Mohaddis Ka Qabar Ke Paas Naseehat Karna Aur Uske As'haab Ka Uske Paas Baithna. Jis Din Log "Ajdaas" Se Nikaale Jaaye'nge (Ma'arij 43) Ajdaas Ka Ma'ni Quboor Hai. Aur Soor Phoo'nka Jaayega, Pas Uss Waqt Qabro'n Se Nikal Kar Apne Rab Ki Taraf Daudte Huwe Jaaye'nge (Yaseen, 51). Ba'sarat (Infitaar, 4) Ukhaad Di Jaaye'ngi Ya Unko Ulat Pulat Kardiya Jaayega, "Ba'sarat Hauzi" Ka Ma'ni Hai, Mai'n Ne Uske Nichle Hisse Ko Upar Kardiya. Aur Jab Qabro'n Ko Palat Diya Jaayega (Infitaar, 4) "Efaaz" Ka Ma'ni Hai, Jaldi Jaldi Bhaagte Huwe Jaana. Jis Din Woh Qabro'n Se Daudte Huwe Nikle'nge Goya Ke Woh Buto'n Ki Taraf Bhaagte Huwe Jaarahe Hai'n (Ma'arij, 43). Aa'mash Ne Iss Aayat Me'n "Ila Nasab" Padha Hai, Ya'ni Jo Cheez Nasab Ki Gayi Ho Aur Log Uski Taraf Sabqat Karrahe Ho'n, "Nusb" Masdar Hai. "Yaumul Khurooj" Qabro'n Se Nikalne Ke Din, "Yansiloon" Nikle'nge. Jis Roz Woh Uss Zabardast Chinghaad Ko Yaqeen Ke Saath Sune'nge Yehi (Qabro'n Se) Nikalne Ka Din Hoga (Qaaf, 42). Hadees : Hazrat Ali Radiallahu Anhu Bayaan Karte Hai'n Ke, Hum Baqee'il Garqad Me'n Ek Janaaze Ke Saath The, Humaare Paas Nabi e Kareem ﷺ Tashreef Laaye, Pas Aap Alaihissalaam Baith Gaye Aur Hum Bhi Aap Alaihissalaam Ke Gird Baith Gaye, Aap Alaihissalaam Ke Paas Chhadi Thi, Aap Alaihissalaam Ne Sar Jhukaaya Aur Apni Chhadi Ke Saath Zameen Khuraidne Lage, Phir Farmaaya, Tum Me'n Se Har Shakhs Ka Jannat Me'n Ya Dozakh Me'n Thikaana Likh Diya Gaya Hai Aur Yeh Bhi Likh Diya Gaya Hai Ke Woh Nek Bakht Hai Bad Bakht Hai, Ek Shakhs Ne Kaha, Ya Rasoolallah ﷺ ! Kya Hum Apne Muta'alliq Likhe Huwe Par Ae'temaad Na Karle'n Aur Amal Karne Ko Chhod De'n, Pas Jo Shakhs Hum Me'n Se Nek Bakht Hoga Pas Woh Anqareeb Nek Bakhto'n Ke Amal Ki Taraf Ruju Karega Aur Raha Woh Jo Hum Me'n Se Bad Bakht Hoga Pas Woh Bad Bakhto'n Ke Amal Ki Taraf Ruju Karega ? Aap Alaihissalaam Ne Farmaaya, Rahe Woh Jo Ahle Sa'aadat Hai'n Unke Keliye Sa'aadat Ke Amal Kardiye Jaaye'nge Aur Jo Ahle Shaqaawat Hai'n Unke Liye Shaqaawat Ke Amal Aasaan Kardiye Jaaye'nge, Phir Aap Alaihissalaam Ne Iss Aayat Ki Tilaawat Ki, Pas Raha Woh Jisne (Allah Ki Raah Me'n) Ata Kiya Aur (Allah Se) Dara, Aur Neki Ki Tasdeeq Ki, To Hum Uske Liye Neki Ke Raaste Aasaan Karde'nge (Sureh Lail, Aayat No.5 To 7).
Baab, Apni Jaan Ke Qaatil Ke Muta'alliq Jo Hukm Hai. Hazrat Saabit Bin Dahhaak Radiallahu Anhu Nabi e Akram ﷺ Se Riwaayat Karte Hai'n Ke Aapne Farmaaya, Jisne Gair Millat Islaam Ki Amadan Jhooti Qasam Khaayi Pas Woh Iss Tarah Hai, Aur Jisne Lohe Ke Hathiyaar Se Apne Aapko Qatal Kiya, Usko Usi Hathiyaar Se Dozakh Me'n Azaab Hota Rahega.
Aur Hajjaaj Bin Minhaal Ne Kaha, Hume'n Jareer Bin Haazim Ne Hadees Bayaan Ki Az Hasan, Unho'n Ne Kaha, Hume'n Hazrat Jundab Radiallahu Anhu Ne Iss Masjid Me'n Yeh Hadees Bayaan Ki, So Hum Isko Nahee'n Bhoole Aur Hume'n Yeh Khauf Nahee'n Hai Ke Hazrat Jundab Ne Nabi e Kareem ﷺ Se Jhooti Baat Riwaayat Ki Hogi, Aapne Farmaaya, Ek Shaksh Zakhmi Tha, Usne Khudko Ko Qatal Karliya To Allah Azzowajal Ne Farmaaya, Mere Bande Ne Apni Jaan Nikaalne Me'n Mujh Par Sabqat Ki, Mai'n Ne Ispar Jannat Haraam Kardi.
Hazrat Abu Hurairah Radiallahu Anhu Ne Bayaan Kiya Ke Nabi e Kareem ﷺ Ne Farmaaya, Jo Shakhs Apna Gala Gho'ntega Uska Dozakh Me'n Gala Gho'nta Jaata Rahega, Aur Jo Shakhs Apne Aapko Neezah Ya Teer Maarega Woh Dozakh Me'n Bhi Apne Aapko Neezah Ya Teer Maarta Rahega.
Baab, Munaafiqeen Ki Namaaz e Janaazah Aur Mushrikeen Keliye Astagfaar Ka Makrooh Hona. Isko Ibne Umar Radiallahu Anhuma Ne Nabi e Kareem ﷺ Se Riwaayat Kiya Hai. Hadees : Hazrat Ibne Abbaas Radiallahu Anhuma Hazrat Umar Bin Khattaab Radiallahu Anhu Se Riwaayat Karte Hai'n, Unho'n Ne Bayaan Kiya Ke Jab Abdullah Bin Ubayi Ibne Salool Mar Gaya To Rasoolullah ﷺ Ko Uspar Namaaz e Janaazah Padhne Keliye Bulaaya Gaya, Jab Rasoolullah ﷺ (Jaane Keliye) Khade Huwe To Mai'n Jaldi Se Aage Badha, Pas Mai'n Ne Kaha, Ya Rasoolallah ﷺ ! Kya Aap Ibne Ubayi Ki Namaaz e Janaazah Padha Rahe Hai'n ? Haalaa'nke Usne Fulaa'n Din Yeh Kaha Tha, Aur Fulaa'n Din Yeh Kaha Tha, Mai'n Uski Sab Baate'n Ginwaata Raha, To Rasoolullah ﷺ Mukuraaye Aur Farmaaya, Aye Umar ! Mujhe Chhod Do, Jab Mai'n Ne Zyaadah Israar Kiya To Aap Alaihissalaam Ne Farmaaya, Mujhe Ikhtiyaar Diya Gaya Tha, Pas Mai'n Ne Ikhtiyaar Karliya, Agar Mujhe Ma'loom Hota Ke Mai'n Ne 70 Dafa Se Zyaadah Magferat Talab Ki To Uski Magferat Kardi Jaayegi To Mai'n 70 Martaba Se Zyaadah Magferat Talab Karta, Hazrat Umar Radiallahu Anhu Ne Kaha, Pas Rasoolullah ﷺ Ne Uski Namaaz e Janaazah Padhaayi, Phir Aap Alaihissalaam Waapas Aagaye, Phir Aap Alaihissalaam Thodi Der Thehre The Ke Sureh Tauba Ki Yeh Aayat Naazil Hogayi, Aur Unme'n Se Koi Mar Jaaye To Aap Uski Kabhi Bhi Namaaz e Janaazah Na Padhe'n Aur Na Uski Qabar Par Khade Ho'n, Kyu'n Ke Unho'n Ne Allah Aur Uske Rasool ﷺ Ke Saath Kufr Kiya Aur Usi Haalat Me'n Mar Gaye Aur Woh Faasiq Hai'n (Sureh Tauba, Aayat No.84) Phir Ba'ad Me'n Mujhe Uss Din Rasoolullah ﷺ Ke Saamne Apni Jur'at Par Bahot Ta'ajjub Huwa, Aur Allah Aur Uske Rasool Ko Hi Zyaadah Ilm Hai.
Baab, Logo'n Ka Mayyat Ki Tehseen Karna. Hazrat Anas Bin Maalik Radiallahu Anhu Bayaan Karte Hai'n Ke, Musalmaan Ek Janaaze Ke Paas Se Guzre To Unho'n Ne Uski Tehseen Ki, Pas Nabi e Akram ﷺ Ne Farmaaya, Yeh Waajib Hogayi, Phir Woh Doosre Janaaze Ke Paas Se Guzre To Unho'n Ne Uski Mazammat Ki, Pas Aap Alaihissalaam Ne Farmaaya, Yeh Waajib Hogayi, Phir Hazrat Umar Bin Khattaab Radiallahu Anhu Ne Poochha, Kya Waajib Hogayi ? To Aap Alaihissalaam Ne Farmaaya, Yeh Janaazah Jiski Tumne Tehseen Ki Hai Iske Liye Jannat Waajib Hogayi Hai Aur Yeh Janaazah Jiski Tumne Mazammat Ki Hai Iske Liye Dozakh Waajib Hogayi, Tum Zameen Par Allah Ke Gawaah Ho.
Hazrat Abdullah Bin Buraidah Az Abi Aswad Riwaayat Karte Hai'n, Unho'n Ne Bayaan Kiya Ke Mai'n Madeene Me'n Aaya, Aur Wahaa'n Ek Beemaari Pheli Huwi Thi, Pas Mai'n Hazrat Umar Bin Khattaab Radiallahu Anhu Ke Paas Baitha, Phir Wahaa'n Se Ek Janaazah Guzra, Pas Uski Tehseen Ki Gayi To Hazrat Umar Radiallahu Anhu Ne Kaha, Waajib Hogayi, Phir Doosra Janaazah Guzra To Uski Bhi Tehseen Ki Gayi, Pas Hazrat Umar Radiallahu Anhu Ne Kaha, Waajib Hogayi, Phir Teesra Janaazah Guzra To Uski Mazammat Ki Gayi, Pas Hazrat Umar Radiallahu Anhu Ne Kaha, Waajib Hogayi, Abul Aswad Ne Kaha, Mai'n Ne Poochha, Aye Ameerul Momineen ! Kya Cheez Waajib Hogayi ? Hazrat Umar Radiallahu Anhu Ne Kaha, Mai'n Ne Usi Tarah Kaha Jis Tarah Rasoolullah ﷺ Ne Farmaaya Tha Ke Jis Musalmaan Ke Haq Me'n Bhi 4 Musalmaan Neki Ki Gawaahi De'nge Allah Usko Jannat Me'n Daakhil Kardega, Humne Kaha, Aur 3 ? Aapne Farmaaya, Aur 3, Pas Humne Kaha, Aur 2 ? Aapne Farmaaya, Aur 2, Phir Humne 1 Ke Muta'alliq Aapse Sawaal Nahee'n Kiya.
Baab, Azaab e Qabar Ke Muta'alliq Jo Ahaadees Hai'n. Aur Allah Azzowajal Ka Yeh Irshaad, Aur Kaash Aap Uss Waqt Dekhte Jab Yeh Zaalim Log Maut Ki Sakhtiyo'n Me'n Ho'nge Aur Maut Ke Farishte Unki Taraf Apne Haath Badha Rahe Ho'nge (Aur Keh Rahe Ho'nge) Apni Jaane'n Nikaalo ! Aaj Tumhe'n Zillat Waala Azaab Diya Jaayega, (Sureh An'aam, Aayat No.93) "Hawaan" Ka Ma'ni Zillat Hai Aur "Hon" Mulaayemat (Narmi) Hai, Aur Allah Azzowajal Ka Yeh Irshaad, Hum Anqareeb Unko 2 Martaba Azaab De'nge, Phir Unko Azeem Azaab Ke Taraf Lautaaya Jaayega, (Sureh Tauba, Aayat No.101) Aur Allah Azzowajal Ka Yeh Irshaad, Aur Aale Fir'aon Ka Sakht Azaab Ne Ehaata Karliya, Unko Har Subah Wa Shaam Aag Par Pesh Kiya Jaata Hai, Aur (Uss Din Bhi Pesh Kiya Jaayega) Aale Fir'aon Ko Zyaadah Sakht Azaab Me'n Jho'nko (Sureh Momin, Aayat No.45/46) Hadees : Hazrat Bara Bin Aa'zib Radiallahu Anhu Nabi e Akram ﷺ Se Riwaayat Karte Hai'n Ke Aapne Farmaaya, Jab Momin Ko Qabar Me'n Bitha Diya Jaata Hai To Uske Paas Farishte Laaye Jaate Hai'n, Phir Woh Gawaahi Deta Hai "La Ilaha Illallah Mohammadur Rasoolullah" Pas Yeh Uss Aayat Ka Misdaaq Hai, Allah Imaan Waalo'n Ko Qaul e Saabit Par Saabit Qadam Rakhta Hai (Sureh Ibraaheem, Aayat No.27) Sho'ba Ne Yeh Hadees Bayaan Ki Aur Yeh Izaafa Kiya, Allah Azzowajal Imaan Waalo'n Ko Saabit Qadam Rakhta Hai (Sureh Ibraaheem, Aayat No.27) Yeh Aayat Azaab e Qabar Ke Baare Me'n Naazil Huwi.
Hazrat Ibne Umar Radiallahu Anhuma Ne Khabar Di Ke Badar Ke Jis Kuwe'n Me'n Badar Ke Din Jin Kaafiro'n Ko Daal Diya Gaya Tha, Nabi e Kareem ﷺ Ne Uss Kuwe'n Me'n Jhaa'nka Aur Farmaaya, Tumhaare Rab Ne Tumse Jo Wa'dah Kiya Tha Tumne Usko Sachcha Paaliya, Aap Alaihissalaam Se Kaha Gaya, Kya Aap Murdo'n Ko Pukaar Rahe Hai'n ? Aap Alaihissalaam Ne Farmaaya, Tum Inse Zyaadah Sunne Waale Nahee'n Ho Lekin Woh Jawaab Nahee'n De Sakte.
Hazrat Aa'yesha Radiallahu Anha Bayaan Karti Hai'n Ke Nabi e Kareem ﷺ Ne Sirf Yeh Farmaaya Tha, Woh Ab Iss Baat Ko Jaan Rahe Hai'n Ke Beshak Mai'n Unse Haq Kehta Tha Aur Allah Azzowajal Ne Farmaaya Hai, Beshak Aap Murdo'n Ko Nahee'n Suna Sakte.
Riwaayat Karte Hai'n Masrooq Hazrat Aa'yesha Radiallahu Anha Se Ke Ek Yahoodi Aurat Hazrat Aa'yesha Radiallahu Anha Ke Paas Aayi Phir Usne Azaab e Qabar Ka Zikr Kiya, Usne Kaha, Allah Aapko Azaab e Qabar Se Apni Panaah Me'n Rakhe, Phir Hazrat Aa'yesha Radiallahu Anha Ne Rasoolullah ﷺ Se Azaab e Qabar Ke Baare Me'n Sawaal Kiya, To Aap Alaihissalaam Ne Farmaaya, Haa'n ! Azaab e Qabar Hota Hai, Hazrat Aa'yesha Radiallahu Anha Ne Bayaan Kiya, Phir Uske Ba'ad Mai'n Ne Dekha Ke Jab Bhi Rasoolullah ﷺ Ne Namaaz Padhi To Azaab e Qabar Se Panaah Talab Ki.
Hazrat Asma Binte Abu Bakar Radiallahu Anha Bayaan Karti Hai'n Ke Nabi e Kareem ﷺ Khutba Dene Keliye Khade Huwe, Phir Aap Alaihissalaam Ne Qabar Ke Uss Fitne Ka Zikr Kiya Jisme'n Har Shakhs Mubtala Hoga, Jab Aap Alaihissalaam Ne Yeh Zikr Kiya To Musalmaano'n Ne Sunkar Cheekh Wa Pukaar Ki.
Hazrat Anas Bin Maalik Radiallahu Anhu Ne Bayaan Kiya Ke Rasoolullah ﷺ Ne Farmaaya, Jab Bande Ko Uski Qabar Me'n Rakh Diya Jaata Hai Aur Uske Saathi Peeth Pher Kar Chale Jaate Hai'n To Beshak Woh Zaroor Unki Jootiyo'n Ki Aawaaz Sunta Hai, Uske Paas 2 Farishte Aate Hai'n, Pas Usko Bitha Dete Hai'n, Phir Woh Kehte Hai'n, Tum Iss Shakhs (Sayyaduna) Mohammad (ﷺ) Ke Muta'alliq Kya Kehte The ? Pas Raha Momin To Woh Kahega, Mai'n Gawaahi Deta Hoo'n Ke Yeh Allah Ke Bande Aur Uske Rasool Hai'n, Phir Usse Kaha Jaayega, Dozakh Me'n Apne Thikaane Ki Taraf Dekh, Allah Ne Isko Jannat Ke Thikaane Se Badal Diya, Pas Woh Dono'n Thikaano'n Ki Taraf Dekhega, Qataadah Ne Kaha, Humse Yeh Bayaan Kiya Gaya Hai Ke Uski Qabar Me'n Wus'at Kardi Jaayegi, Phir Unho'n Ne Hazrat Anas Radiallahu Anhu Ki Hadees Ki Taraf Ruju Kiya, Aur Kaha, Raha Munaafiq Aur Kaafir Pas Usse Kaha Jaayega, Tum Iss Shakhs Ke Muta'alliq Kya Kehte The ? Woh Kahega, Mai'n Nahee'n Jaanta ! Log Jo Kehte The Mai'n Bhi Wohi Kehta Tha, Usse Kaha Jaayega, Tumne Aqal Se Jaana Na Qur'aan Se Tilaawat Ki, Aur Usko Lohe Se Zarb Lagaayi Jaayegi, Phir Woh Zor Se Chee'nkhega Jisko Jin Aur Insaan Ke Alaawah Sab Qareeb Waale Sune'nge.
Baab, Azaab e Qabar Se Panaah Talab Karna. Hazrat Bara Bin Aa'zib Radiallahu Anhu Az Hazrat Abu Ayyub Radiallahu Anhu Bayaan Karte Hai'n Ke Nabi e Kareem ﷺ Baahar Nikle, Uss Waqt Sooraj Guroob Ho Chuka Tha, Pas Aap Alaihissalaam Ne Aawaaz Suni To Farmaaya, Yahood Ko Unki Qabar Me'n Azaab Ho Raha Hai, Aur Nazar Ne Kaha, Hume'n Sho'ba Ne Khabar Di, Unho'n Ne Kaha, Hume'n Ao'n Ne Khabar Di, Unho'n Ne Kaha, Mai'n Ne Apne Waalid Se Suna, Unho'n Ne Kaha, Mai'n Ne Hazrat Bara Bin Aa'zib Radiallahu Anhu Se Suna Az Abu Ayyub Radiallahu Anhu Az Nabi e Kareem ﷺ.
Uqba Ne Kaha, Khaalid Bin Sa'eed Bin Aa's Ki Beti Ne Mujh Se Hadees Bayaan Ki, Unho'n Ne Kaha Ke Mai'n Ne Rasool e Akram ﷺ Ko Qabar Ke Azaab Se Panaah Maa'ngte Huwe Suna Hai.
Hazrat Abu Hurairah Radiallahu Anhu Ne Bayaan Kiya Ke Nabi e Kareem ﷺ Yeh Du'aa Karte The, Aye Allah ! Mai'n Qabar Ke Azaab Se Aur Dozakh Ke Azaab Se Aur Zindagi Aur Maut Ke Fitne Se Aur Maseeh Dajjaal Ke Fitne Se Teri Panaah Talab Karta Hoo'n.
Baab, Geebat Karne Aur Peshaab Ki Aaloodgi Se Na Bachne Ki Wajah Se Azaab. Hazrat Ibne Abbaas Radiallahu Anhuma Ne Farmaaya, Nabi e Kareem ﷺ Do Qabar Ke Paas Se Guzre, Aap Alaihissalaam Ne Farmaaya, In Dono'n Ko Zaroor Azaab Ho Raha Hai, Aur Inko Kisi Badi Cheez Ki Wajah Se Azaab Nahee'n Ho Raha Hai, Phir Farmaaya, Kyu'n Nahee'n ! Inme'n Se Ek Shakhs Chugli Karta Tha Aur Doosra Peshaab Ke (Chhee'nto'n) Se Nahee'n Bachta Tha, Phir Aap Alaihissalaam Ne Khajoor Ki Ek Tar (Geeli) Shaakh Todi Aur Uske 2 Tukde Kiye, Phir Unme'n Se Har Ek Ki Qabar Par Ek Ek Tukda Gaad Diya, Phir Farmaaya, Tehqeeq Yeh Hai Ke Jab Tak Yeh Khushk Nahee'n Ho'ngi Inke Azaab Me'n Takhfeef Hoti Rahegi.
Baab, Mayyat Par Uska Thikaana Subah Aur Shaam Ko Pesh Kiya Jaata Hai. Hazrat Abdullah Bin Umar Radiallahu Anhuma Bayaan Karte Hai'n Ke Nabi e Kareem ﷺ Ne Farmaaya, Beshak Tum Me'n Se Koi Shakhs Faut Ho Jaata Hai To Uspar Uska Thikaana Subah Aur Shaam Pesh Kiya Jaata Hai, Agar Woh Jannati Ho To Jannat Waalo'n Me'n Aur Agar Woh Dozakhi Ho To Dozakh Waalo'n Me'n (Uska Thikaana Hota Hai) Pas Kaha Jaata Hai, Yeh Tumhaara Thikaana Hai Hatta Ke Qayaamat Ke Din Tumko Uthaaya Jaayega.
Baab, Mayyat Ka Janaazah Uthaane Ke Ba'ad Kalaam Karna. Sa'eed Bin Abi Sa'eed Az Waalid Khud, Unho'n Ne Hazrat Abu Sa'eed Khudri Radiallahu Anhu Ko Yeh Bayaan Karte Huwe Suna Ke Rasoolullah ﷺ Ne Farmaaya, Jab Janaazah Rakh Diya Jaata Hai, Phir Log Usko Apni Gardano'n Par Utha Lete Hai'n, Phir Agar Woh Janaazah Nek Ho To Woh Kehta Hai, Mujhe Aage Le Jaao, Mujhe Aage Le Jaao, Aur Agar Woh Nek Na Ho To Kehta Hai, Haaye Haaye, Yeh Kaha Le Jaarahe Hai'n, Insaan Ke Siwa Uski Aawaaz Ko Har Cheez Sunti Hai Aur Agar Insaan Uski Aawaaz Ko Sunta To Woh Behosh Ho Jaata.
Baab, Musalmaano'n Ki Aulaad Ke (Thikaane Ke) Muta'alliq Kya Kaha Gaya Hai ? Hazrat Abu Hurairah Radiallahu Anhu Ne Nabi e Kareem ﷺ Se Yeh Riwaayat Zikr Ki Hai Ke Jis Shakhs Ke 3 Aise Bachche Faut Hogaye Jo Abhi Gunaah Ki Umar Ko Nahee'n Paho'nche The, Woh Uske Liye Dozakh Ki Aag Se Hijaab Ho Jaaye'nge Ya Jannat Me'n Daakhil Ho Jaaye'nge. Hadees - Hazrat Anas Bin Maalik Radiallahu Anhu Bayaan Karte Hai'n Ke Nabi e Kareem ﷺ Ne Farmaaya, Logo'n Me'n Jis Musalmaan Ke 3 Na Baalig Bachche Faut Hogaye Usko Allah Jannat Me'n Daakhil Kardega, Unpar Apni Rehmat Ke Fazl Ki Wajah Se.
Hazrat Bara Bin Aa'zib Radiallahu Anhu Bayaan Karte Hai'n Ke Jab Hazrat Ibraaheem (Nabi e Kareem ﷺ Ke Shehzaade) Faut Hogaye To Rasoolullah ﷺ Ne Farmaaya, Inke Liye Jannat Me'n Doodh Pilaane Waali Hai.
Baab, Mushrikeen Ki Na Baalig Aulaad Ke Thikaane Ke Muta'alliq Jo Aqwaal Hai'n. Hazrat Ibne Abbaas Radiallahu Anhuma Bayaan Karte Hai'n Ke Nabi e Kareem ﷺ Se Mushrikeen Ki Aulaad Ke Muta'alliq Sawaal Kiya Gaya, To Aap Alaihissalaam Ne Farmaaya, Jab Allah Ne Unko Paida Kiya Tha, To Usko Ilm Tha Ke Woh Kya Amal Karne Waale Hai'n.
Hazrat Abu Hurairah Radiallahu Anhu Bayaan Karte Hai'n Ke Nabi e Kareem ﷺ Se Mushrikeen Ki Na Baalig Aulaad Ke Muta'alliq Sawaal Kiya Gaya To Aap Alaihissalaam Ne Farmaaya, Allah Hi Zyaadah Jaanne Waala Hai Ke Woh Kya Karne Waale The.
Hazrat Abu Hurairah Radiallahu Anhu Bayaan Karte Hai'n Ke Nabi e Kareem ﷺ Ne Farmaaya, Har Bachcha Fitrat Par Paida Hota Hai, Pas Uske Maa'n Baap Usko Yahoodi Ya Nasraani Ya Majoosi Bana Dete Hai'n, Jaise Chaupaaye Se Jo Chaupaaya Paida Hota Hai, Kya Usko Nakta Ya Kan Kata Dekhte Ho.
Hazrat Samurah Bin Jundab Radiallahu Anhu Ne Bayaan Kiya, Jab Nabi e Kareem ﷺ Namaaz Padhaate To Humaari Taraf Mutawajjeh Hote, Pas Poochhte, Tum Me'n Se Aaj Raat Kisne Khwaab Dekha Hai ? Pas Agar Kisi Ne Khwaab Dekha Hota To Bayaan Karta, Pas Jo Allah Chaahta Woh Aap Farmaate, So Ek Din Aap Alaihissalaam Ne Humse Sawaal Kiya, Pas Farmaaya, Kya Tum Me'n Se Kisi Ne Khwaab Dekha Hai ? Humne Kaha, Nahee'n ! Aap Alaihissalaam Ne Farmaaya, Lekin Mai'n Ne Aaj Raat Khwaab Dekha Ke 2 Aadmi Mere Paas Aaye, Pas Woh Dono'n Mera Haath Pakad Kar Mujhe Arze Muqaddas Me'n Legaye, Pas Wahaa'n Ek Aadmi Baitha Huwa Tha, Aur Doosra Aadmi Lohe Ka Aa'nkda (Huk) Lekar Khada Huwa Tha, Raawi Ne Kaha, Humaare Ba'az As'haab Ne Moosa Se Riwaayat Kiya, Woh Khada Huwa Shakhs Uss Baithe Huwe Shakhs Ke Jabde Me'n Uss Aa'nkde Ko Daakhil Karta Hatta Ke Woh Jabde Me'n Uski Guddi Tak Cheer Deta, Phir Uske Doosre Jabde Me'n Usi Tarah Aa'nkde Ko Daakhil Karta Aur Uska Pehla Jabda Theek Ho Chuka Hota, Phir Woh Uss Jabde Me'n Usi Tarah Aa'nkda Daakhil Karta, Mai'n Ne Un Dono'n Se Poocha, Yeh Kya Ho Raha Hai ? Unho'n Ne Kaha, Aage Chaliye ! Pas Hum Chal Pade Hatta Ke Hum Ek Shakhs Ke Paas Paho'nche Jo Peeth Ke Bal Leta Huwa Tha, Aur Doosra Shakhs Uske Sar Ke Paas Pat'thar Liye Khada Hai Aur Uska Sar Phod Raha Hai, Pas Jab Woh Uske Sar Par Zarb Lagaata To Woh Pat'thar Ludakta Huwa Chala Jaata, Phir Woh Uss Pat'thar Ko Lene Keliye Chala Jaata, Jab Woh Waapas Aata To Uska Sar Pehle Ki Tarah Theek Ho Chuka Hota, Woh Phir Laut Kar Uska Sar Phodta, Mai'n Ne Un Dono'n Se Poochha, Yeh Kya Ho Raha Hai ? Unho'n Ne Kaha, Aage Chaliye ! Pas Hum Aage Badh Gaye, To Tanor Ki Tarah Ek Sooraakh Tha, Woh Upar Se Ta'ng Tha Neeche Se Faraakh Tha, Uske Neeche Aag Jal Rahi Thi, Phir Jab Woh Aag Upar Uthti To Usme'n Jo Log The Woh Uss Tanor Se Nikalne Ke Qareeb Hote, Aur Jab Woh Aag Bujh Jaati To Phir Woh Log Neeche Chale Jaate, Usme'n Barhana Mard Aur Aurte'n Thee'n, Mai'n Ne Poocha, Yeh Kya Ho Raha Hai ? Unho'n Ne Kaha, Aage Chaliye ! Pas Hum Aage Gaye Hatta Ke Hum Khoon Ke Dariya Par Aaye, Dariya Ke Wast Me'n Ek Shakhs Khada Huwa Tha, Yazeed Ne Aur Wahab Bin Jareer Ne Kaha Az Jareer Bin Haazim, Dariya Ke Kinaare Ek Aur Shakhs Tha, Jiske Saamne Pat'thar Tha, Phir Woh Shakhs Aage Badha Jo Dariya Me'n Tha, Jab Woh (Dariya Se) Nikalne Ka Iraadah Karta To Doosra Shakhs Uske Muh Par Pat'thar Khee'nch Kar Maarta Aur Usko Usi Jagah Lauta Deta Pas Jab Bhi Woh Nikalne Keliye Aata To Doosra Shaksh Uske Muh Par Pat'thar Maarta, Phir Woh Usi Jagah Laut Jaata, Mai'n Ne Un Dono'n Se Poocha, Yeh Kya Ho Raha Hai ? Unho'n Ne Kaha, Aage Chaliye ! Pas Hum Aage Chale Hatta Ke Hum Ek Sar Sabz Baag Ke Qareeb Paho'nche, Usme'n Bahot Bada Darakht Tha, Uski Jad Me'n Ek Boodha Shakhs Baitha Tha Aur Bachche Baithe The Aur Ek Shakhs Darakht Ke Qareeb Tha, Woh Apne Saamne Aag Jala Raha Tha, Un Dono'n Ne Mujhe Uss Darakht Par Chadhaaya Aur Mujhe Ek Ghar Me'n Daakhil Kardiya, Usse Zyaadah Khoobsurat Ghar Mai'n Ne Usse Pehle Nahee'n Dekha Tha, Usme'n Boodhe Mard The Aur Jawaan Mard The Aur Aurte'n Thee'n, Aur Bachche The, Phir Un Dono'n Ne Mujhe Uss Ghar Se Nikaala, Phir Mujhe Uss Darakht Par Chadhaaya, Phir Mujhe Ek Aur Ghar Me'n Daakhil Kiya Jo Uss Ghar Se Bhi Zyaadah Khoobsurat Aur Afzal Tha Usme'n Boodhe Aur Jawaan The, Mai'n Ne Kaha, Tum Dono'n Ne Mujhe Saari Raat Ghumaaya Hai, Ab Mujhe Bataao Ke Mai'n Ne Kya Kuchh Dekha Hai, Un Dono'n Ne Kaha, Haa'n ! Raha Woh Shakhs Jisko Aapne Uske Jabde Jo Toda Jaaraha Tha, Yeh Bahot Jhoota Tha, Yeh Jhooti Khabre'n Deta Tha, Jo Usse Naqal Ki Jaati Thee'n, Hatta Ke Saari Duniya Me'n Phail Jaati Thee'n, So Uske Saath Qayaamat Tak Yehi Kiya Jaata Rahega, Jo Aapne Dekha, Aur Jis Shakhs Ko Aapne Dekha Ke Uska Sar Phoda Jaaraha Tha Yeh Woh Shakhs Hai Jisko Allah Azzowajal Ne Qur'aan Ka Ilm Diya Tha, Yeh Raat Ko So Jaata Tha Aur Din Me'n Uspar Amal Nahee'n Karta Tha, Uske Saath Qayaamat Tak Yehi Kiya Jaata Rahega, Aur Jin Logo'n Ko Aapne Tanor Me'n Dekha Woh Zina Karne Waale Log The, Aur Jinko Aapne Khoon Ke Dariya Me'n Dekha, Woh Sood Khaane Waale The, Aur Jis Boodhe Shakhs Ko Aapne Darakht Ki Jad Ke Paas Baitha Dekha, Woh Hazrat Ibraaheem Alaihissalaam The Aur Jo Bachche Unke Gird The Woh Logo'n Ki (Na Baalig) Aulaad Hai'n Aur Jo Shakhs Aag Jala Raha Tha Woh Dozakh Ka Daaroga Maalik Hai Aur Pehla Ghar Jo Aapne Dekha Jisme'n Aap Daakhil Huwe The Woh Aa'm Musalmaano'n Ka Ghar Hai Aur Raha Yeh Ghar To Yeh Shohada Ka Ghar Hai Aur Mai'n Jibra'il Hoo'n Aur Yeh Meekaa'il Hai'n, Aap Apna Sar Uthaaye'n, Pas Mai'n Ne Apna Sar Uthaaya To Mere Upar Baadal Ki Tarah Tha Un Dono'n Ne Kaha, Yeh Aapka Thikaana Hai, Mai'n Ne Kaha, Mujhe Chhodo, Mai'n Apne Ghar Me'n Daakhil Ho'n, Un Dono'n Ne Kaha, Abhi Aapki Umar Baaqi Hai Jisko Aapne Mukammal Nahee'n Kiya Hai, Pas Agar Aapne Apni Umar Ki Takmeel Karli To Aap Apne Thikaane Me'n Jaaye'nge.
Baab, Peer Ke Din Maut. Hazrat Aa'yesha Radiallahu Anha Bayaan Karti Hai'n Ke Mai'n Hazrat Abu Bakar Radiallahu Anhu Ke Paas Gayi, Unho'n Ne Poochha, Aapne Nabi e Kareem ﷺ Ko Kitne Kapdo'n Me'n Kafan Diya Tha ? Hazrat Aa'yesha Radiallahu Anha Ne Bataaya, 3 Safed Yaman Ke Bune Huwe Kapdo'n Me'n Unme'n Na Qamees Thi Na Imaama Tha, Aur Unho'n Ne Hazrat Aa'yesha Radiallahu Anha Se Poochha, Rasoolullah ﷺ Kis Din Faut Huwe The ? Hazrat Aa'yesha Radiallahu Anha Ne Bataaya, Peer Ke Din, Phir Hazrat Abu Bakar Radiallahu Anhu Ne Poochha, Aaj Kaunsa Din Hai ? Hazrat Aa'yesha Radiallahu Anha Ne Bataaya, Peer Ka Din Hai, Hazrat Abu Bakar Radiallahu Anhu Ne Kaha, Mujhe Uss Waqt Se Lekar Aaj Raat Tak Ummeed Hai, Phir Hazrat Abu Bakar Radiallahu Anhu Ne Apne Un Kapdo'n Ko Dekha Jinme'n Woh Beemaar Huwe The, Unme'n Za'fraan Ka Asar Tha, Pas Unho'n Ne Kaha, Mere Iss Kapde Ko Dhodo, Aur Uske Saath 2 Kapdo'n Ka Aur Izaafa Kiya, Phir Unme'n Mujhe Kafan Dena, (Hazrat Aa'yesha Radiallahu Anha Ne Bataaya) Mai'n Ne Kaha, Yeh Puraana Kapda Hai, Hazrat Abu Bakar Radiallahu Anhu Ne Kaha, Zindah Aadmi Ko Murdah Aadmi Ki Ba Nisbat Naye Kapde Ki Zyaadah Zaroorat Hai, Murde Ko Kapda Khoon Aur Peep Keliye Hai, Phir Hazrat Abu Bakar Radiallahu Anhu Faut Nahee'n Huwe Hatta Ke Unho'n Ne Mangal Ki Raat Guzaar Li Aur Subah Se Pehle Unko Dafan Kardiya Gaya.
Baab, Achaanak Maut Ka Aajaana. Riwaayat Hai Hazrat Aa'yesha Radiallahu Anha Se Ke Ek Mard Ne Nabi e Kareem ﷺ Se Kaha, Beshak Meri Maa'n Achaanak Faut Hogayi, Aur Mera Unke Muta'alliq Gumaan Hai Ke Agar Woh (Marne Se Pehle Mujh Se) Baat Karti To Kuchh Sadqa Karti, Pas Kya Usko Ajar (Sawaab) Milega Agar Mai'n Uski Taraf Se Sadqa Kardu'n (To) ? Nabi e Kareem ﷺ Ne Farmaaya, Haa'n.
Baab, Woh Ahaadees Jo Nabi e Kareem ﷺ Ki Qabar Aur Hazrat Abu Bakar Aur Hazrat Umar Radiallahu Anhuma Ki Qabro'n Ke Muta'alliq Hai'n. Aur Allah Azzowajal Ka Irshaad Hai, Pas Usko Dafan Kiya, (Sureh Abas, Aayat No.21), "Akbartur Rajul" Yeh Uss Waqt Kaha Jaayega Jab Tum Usko Dafan Kardo. "Kifaata" Ya'ni Hifaazat Ki Jagah, Iss Zameen Me'n Zindah Log Bhi Hote Hai'n Aur Isme'n Murdo'n Ko Bhi Dafan Kiya Jaata Hai. Hadees - Hazrat Aa'yesha Radiallahu Anha Bayaan Karti Hai'n Ke Rasoolullah ﷺ Apni Beemaari Ki (Ibteda) Me'n Doosri Azwaaj Se Bataur e Ma'zerat Farmaate The, Mai'n Aaj Kahaa'n Hoo'n ? Aur Mai'n Kal Kahaa'n Ho'nga ? Hazrat Aa'yesha Radiallahu Anha Ki Baari Ko Aap Alaihissalaam Door Gumaan Karte The, Pas Jis Din Allah Azzowajal Ne Aap Alaihissalaam Ki Rooh Jo Qabz Farmaaya, Uss Din Aap Alaihissalaam Mere Pehlu Aur Mere Seene Ke Darmiyaan The Aur Mere Hujre Me'n Aap Alaihissalaam Ko Dafan Kiya Gaya.
Hazrat Aa'yesha Radiallahu Anha Bayaan Karti Hai'n Ke Nabi e Kareem ﷺ Ne Apni Beemaari Me'n Farmaaya Jisse Aap Alaihissalaam Sehatyaab Nahee'n Huwe, Allah Yahood Aur Nasaara Par La'nat Kare Jinho'n Ne Ambiya Alaihimussalaam Ki Qabro'n Ko Sajdah Gaah Bana Liya, Agar Yeh Khatrah Na Hota To Mai'n Aap Alaihissalaam Ki Qabar Ko Zaahir Kar Deti Lekin Yeh Khatrah Hai Ke Aap Alaihissalaam Ki Qabar Ko Sajdah Gaah Bana Liya Jaayega, Aur Hilaal Ne Kaha Ke Urwah Bin Zubair Ne Meri Kunniyat Rakhi Haalaa'nke Meri Aulaad Nahee'n Huwi. Hume'n Mohammad Bin Muqaatil Ne Hadees Bayaan Ki, Unho'n Ne Kaha, Hume'n Abdullah Ne Khabar Di, Unho'n Ne Kaha, Hume'n Abu Bakar Bin Ayyaash Ne Khabar Di Az Sufiyaan Tammaar, Unho'n Ne Yeh Hadees Bayaan Ki Ke Unho'n Ne Nabi e Kareem ﷺ Ki Qabar Ko Dekha, Woh Kohaan Ki Tarah Thi. (Kohaan Ki Tarah Qabar Ka Matlab Hai Ke Zameen Se Uthi Huwi Aur Buland Hai) Hume'n Farwah Ne Hadees Bayaan Ki, Unho'n Ne Kaha, Hume'n Ali Ne Hadees Bayaan Ki Az Hishaam Bin Urwah Az Waalid Khud, Jab Waleed Bin Abdul Malik Ke Zamaane Me'n Unpar Deewaar Gir Gayi (Ya'ni Nabi e Kareem ﷺ Ke Hujre Ki Deewaar Gir Gayi) Aur Woh Usko Banaane Lage To Unke Saamne Ek Qadam Zaahir Huwa, Pas Woh Khauf Zadah Hogaye Aur Unho'n Ne Gumaan Kiya Ke Yeh Nabi e Kareem ﷺ Ka Qadam Hai, Pas Unhe'n Usko Jaanne Waala Koi Nahee'n Mila Hatta Ke Unse Urwah Ne Kaha, Nahee'n ! Allah Ki Qasam ! Yeh Nabi e Kareem ﷺ Ka Qadam Nahee'n Hai, Yeh Sirf Hazrat Umar Radiallahu Anhu Ka Qadam Hai.
Hishaam Apne Waalid Se Riwaayat Karte Hai'n Ke Hazrat Aa'yesha Radiallahu Anha Ne Hazrat Abdullah Bin Zubair Radiallahu Anhuma Ko Wasiyyat Ki Ke Mujhe In (Rasoolullah ﷺ, Hazrat Abu Bakar Siddeeq Radiallahu Anhu Aur Hazrat Umar Radiallahu Anhu) Ke Saath Dafan Na Karna Aur Mujhe Meri Sokano'n Ke Saath Baqee Me'n Dafan Kardena, Mai'n Yeh Nahee'n Chaahti Ke Unke Saath Dafan Hone Ki Wajah Se Ba'ad Me'n Meri (Khusoosi) Ta'zeem Ki Jaaye.
Amro Bin Maimoon Adooyi Ne Bayaan Kiya Ke Mai'n Ne Hazrat Umar Bin Khattaab Radiallahu Anhu Ko Dekha, Unho'n Ne Kaha, Aye Abdullah Bin Umar ! Tum Ummul Momineen Hazrat Aa'yesha Radiallahu Anha Ke Paas Jaao, Pas Unse Kaho Ke Umar Bin Khattaab Radiallahu Anhu Aap Radiallahu Anha Ko Salaam Kehte Hai'n, Phir Unse Sawaal Karna Ke Mai'n Apne 2 Saahibo'n Ke Saath Dafan Kardiya Jaau'n ? Hazrat Aa'yesha Radiallahu Anha Ne Kaha, Mai'n Uss Jagah Ka Apne Liye Iraadah Rakhti Thi, Pas Mai'n Aaj Unko Zaroor Apne Upar Tarjeeh Doo'ngi, Phir Jab Hazrat Abdullah Bin Umar Aaye To Hazrat Umar Radiallahu Anhu Ne Poochha, Tumhaare Paas Kya Jawaab Hai ? Unho'n Ne Kaha, Aye Ameerul Momineen ! Hazrat Ummul Momineen Ne Aapke Liye Ijaazat Dedi Hai, Hazrat Umar Radiallahu Anhu Ne Kaha, Uss Jagah Se Zyaadah Mere Nazdeek Aur Koi Jagah Ahem Nahee'n Thi, Pas Jab Meri Rooh Qabz Karli Jaaye To Mujhe Wahaa'n Utha Kar Le Jaana, Phir Salaam Arz Karna, Phir Kehna, Umar Bin Khattaab Radiallahu Anhu Ijaazat Talab Karta Hai, Pas Agar Woh Mere Liye Ijaazat Dede'n To Mujhe Wahaa'n Dafan Kardena Warna Mujhe Musalmaano'n Ke Qabrastaan Me'n Dafan Kardena, Beshak Mere Ilm Me'n Iss Khilaafat Ka Un Logo'n Se Zyaadah Haqdaar Koi Nahee'n Hai Jinse Rasoolullah ﷺ Apni Wafaat Ke Waqt Raazi The, Pas Woh Mere Ba'ad Jisko Khaleefa Bana De'n Wohi Khaleefa Hoga, Tum Uske Ahkaam Sunna Aur Unki Itaa'at Karna, Phir Unho'n Ne Hazrat Usmaan, Hazrat Ali, Hazrat Talha, Hazrat Zubair, Hazrat Abdur Rehmaan Bin Ao'f, Aur Sa'ad Bin Ao'f, Aur Hazrat Sa'ad Bin Abi Waqaas (Radiallahu Anhum Ajma'een) Ke Naam Liye Aur Unke Paas Ansaar Ka Ek Jawaan Aaya Aur Usne Kaha, Aye Ameerul Momineen ! Aapko Mubaarak Ho ! Aapko Allah Ki Bashaarat Hai, Aap Pehle Islaam Laane Waalo'n Me'n Se Hai'n Jaisa Ke Aapko Ma'loom Hai Phir Aapko Khaleefa Banaaya Gaya To Aapne Adal Kiya, Phir Uske Ba'ad Aapko Shahaadat Mili, Hazrat Umar Radiallahu Anhu Ne Kaha, Kaash ! Aye Mere Bhateeje, Yeh Sab Baraabar Saraabar Ho Jaaye, Na Mujhe Azaab Ho Aur Na Mujhe Sawaab Mile, Mere Ba'ad Jo Khaleefa Ho Mai'n Usko Muhaajireen e Awwaleen Ke Saath Nek Sulook Karne Ki Wasiyyat Karta Hoon, Aur Woh Unke Haq Ko Pehchaane, Aur Unki Hurmat Ki Hifaazat Kare Aur Mai'n Use Ansaar Ke Saath Nek Sulook Karne Ki Wasiyyat Karta Hoo'n, Jinho'n Ne Gharo'n Me'n Thikaana Diya, Aur Muhaajiro'n Ki Hijrat Se Pehle Imaan Laaye, Unki Nekiyo'n Ko Qabool Kiya Jaaye Aur Unki Khataao'n Ko Mu'aaf Kardiya Jaaye Aur Mai'n Use Yeh Wasiyyat Karta Hoo'n Ke Allah Ke Zimmah Ko Aur Uske Rasool Ke Zimmah Ko Poora Kare Aur Unke Ahed Ko Mukammal Kiya Jaaye Aur Unke Peechhe Ja'ng Ki Jaaye Aur Unki Taaqat Se Zyaadah Mukallaf Na Kiya Jaaye.
Baab, Murdo'n Ko Bura Kehne Ki Mumaane'at. Hazrat Aa'yesha Radiallahu Anha Ne Bayaan Kiya Ke Nabi e Kareem ﷺ Ne Farmaaya, Murdo'n Ko Bura Na Kaho Kyu'n Ke Woh Apne Aa'maal Ki Jaza Tak Paho'nch Gaye, Aur Iss Hadees Ko Abdullah Bin Abdul Quddoos Ne Riwaayat Kiya Hai Az Aa'mash Wa Mohammad Bin Anas Az Aa'mash, Ali Bin Ja'ad Ne Aur Ibne Ar Arah Ne Aur Ibne Adi Ne Iss Hadees Ki Riwaayat Me'n Aadam Ki Mutaabe'at Ki Hai Az Sho'ba.
Baab, Badtareen Murdo'n Ka Zikr Karna. Hazrat Ibne Abbaas Radiallahu Anhuma Ne Bayaan Kiya Ke Abu Laheb La'natullah Alaih Ne Nabi e Kareem ﷺ Se Kaha, Tumhaare Liye Saara Din Halaakat Ho, Tab Yeh Aayat Naazil Huwi, Abu Laheb Ke Dono'n Haath Toot Jaaye'n Aur Woh Khud Halaak Ho Jaaye. (Sureh Laheb, Aayat No.1)
Bukhari Shareef : Kitaabul Janaa Iz
|
Bukhari Shareef : كِتَابُ الجَنَائِزِ
|
•