Bukhari Shareef

Hazrat Abu Hurairah Radiallaahu Anhu Riwaayat Karte Hai'n, Ham Log Nabi e Kareem ﷺ Ke Saath Baithe Huwe The, Aap Sahaaba e Kiraam Ke Saamne Hadees Bayaan Farma Rahe The Ke Ek Dehaati Aakar Arz Karne Laga Ke Qayaamat Kab Aayegi? (Lekin) Rasoolullaah ﷺ Apni Guftagu Me'n Mashgool Rahe, Ba'az Sahaaba Ne Kaha Ke Nabi e Kareem ﷺ Ne Uski Baat Suni Aur Uski Baat Ko Na Pasand Farmaaya Aur Ba'az Ne Kaha Balke Aapne Suna Nahee'n, Hatta Ke Jab Nabi e Kareem ﷺ Ne Apni Hadees Mukammal Karli To Irshaad Farmaaya, Woh (Saa'il) Kahaa'n Hai? Raawi Kehte Hai'n Ke Mera Gumaan Hai, Aapne Uske Muta'alliq Farmaaya Jisko Mai'n Ne Qayaamat Ke Muta'alliq Sawaal Karte Huwe Dekha Tha, Uss Saa'il Ne Kaha, Ya Rasoolallaah ﷺ! Mai'n Yahaa'n Hoo'n, Nabi e Kareem ﷺ Ne Irshaad Farmaaya, Jab Amaanat Ko Zaaye Kar Diya Jaaye To Tum Qayaamat Ka Intezaar Karo, Saa'il Ne Kaha, Amaanat Kaise Zaaye Hogi? Nabi e Kareem ﷺ Ne Irshaad Farmaaya, Jab Koi Mansab Na Ahel Ke Supurd Kar Diya Jaaye To Qayaamat Ka Intezaar Karo.

Hazrat Abdullaah Bin Amro Farmaate Hai'n Ke Hamne Ek Safar Kiya (Nabi e Kareem ﷺ Ke Saath Lekin) Nabi e Kareem ﷺ Uss Safar Me'n (Ham Logo'n Se) Peechhe Reh Gaye The, Phir Nabi e Kareem ﷺ (Kuchh Der Ba'ad) Hamse Mil Gaye, Uss Waqt Namaaz Hamse Mokhkhar Ho Gayi Thi (Ya'ni Namaaz Me'n Taakheer Ho Gayi Thi) Aur Ham Wazu Kar Rahe The, Ham Apne Pairo'n Par Masah Karne Lage To Nabi e Kareem ﷺ Ne Buland Aawaaz Se 2 Ya 3 Martaba Irshaad Farmaaya, (Be Dhuli) Aediyo'n Keliye Aag Ka Azaab Hai.

Hazrat Ibne Umar Radiallaahu Anhu Farmaate Hai'n Ke Rasoolullaah ﷺ Ne Irshaad Farmaaya, Beshak Darakhto'n Me'n Se Ek Aisa Darakht Hai Jiske Patte Nahee'n Girte Aur Beshak Woh Musalmaan Ki Misl Hai, (Pas Nabi e Kareem ﷺ Ne Sahaaba e Kiraam Se) Farmaaya, (Bataao) Woh Kaunsa Darakht Hai? Logo'n Ka Zahen Ja'ngal Ke Darakhto'n Me'n Chala Gaya, Hazrat Abdullaah Bin Umar Radiallaahu Anhuma Ne Kaha, Mere Dil Me'n Khayaal Aaya Ke Woh Khajoor Ka Darakht Hai Lekin Mujhe (Bataane Se) Haya Aayi (Ya'ni Sharmindagi Mehsoos Huwi) Phir Sahaaba e Kiraam Ne Kaha, Ya Rasoolallaah ﷺ! (Aap Hi Hame'n Bataaye'n Ke) Woh Kaunsa Darakht Hai? Nabi e Kareem ﷺ Ne Irshaad Farmaaya Woh Khajoor Ka Darakht Hai.

Hazrat Ibne Umar Radiallaahu Anhuma Se Riwaayat Hai Ke Rasoolullaah ﷺ Ne Irshaad Farmaaya, Beshak Darakhto'n Me'n Se Ek Aisa Darakht Hai Jiske Patte Nahee'n Girte Aur Beshak Woh Musalmaan Ki Misl Hai, Pas Mujhe Bataao Woh Kaunsa Darakht Hai? Hazrat Abdullaah (Bin Umar) Radiallaahu Anhuma Ne Kaha Ke Logo'n Ka Zahen Ja'ngal Ke Darakhto'n Me'n Chala Gaya, Hazrat Abdullaah (Bin Umar) Radiallaahu Anhuma Ne Kaha, Mere Dil Me'n Khayaal Aaya Ke Woh Khajoor Ka Darakht Hai, (Lekin Apne Khayaal Ka Izhaar Nahee'n Kiya) Phir Sahaaba e Kiraam Radiallaahu Anhum Ajma'een Ne Arz Kiya Ke Ya Rasoolallaah ﷺ! Aap Hame'n Bataa'iye Woh Kaunsa Darakht Hai? Nabi e Kareem ﷺ Ne Irshaad Farmaaya, Woh Khajoor Ka Darakht Hai..

Hazrat Anas Bin Maalik Radiallaahu Anhu Bayaan Karte Hai'n Ke Ham Log Nabi e Kareem ﷺ Ke Saath Masjid Me'n Baithe Huwe The Ke Ek Shakhs Oo'nt Par Baitha Huwa Aaya Aur Usne Oo'nt Ko Masjid Me'n Bithaaya, Phir Oo'nt Ko Baa'ndh Diya, Phir Sahaaba e Kiraam Se Kaha Tum Me'n Se Kaun Shakhs (Sayyaduna) Muhammad (ﷺ) Hai? Uss Waqt Nabi e Kareem ﷺ Sahaaba e Kiraam Ke Darmiyaan Tek Laga Kar Baithe Huwe The, Ham (Sahaaba e Kiraam) Ne Kaha, Yeh Safed Ru Shakhs Jo Tek Lagaaye Huwe Hai'n (Woh Hai'n Mohammad ﷺ) Phir Nabi e Kareem ﷺ Se Uss Shakhs Ne Kaha, (Kya Aap) Abdul Muttalib Ke Bete Ho? To Nabi e Kareem ﷺ Ne Irshaad Farmaaya, Mai'n Tumhe'n Jawaab De Chuka Hoo'n, Pas Uss Shakhs Ne Nabi e Kareem ﷺ Se Kaha, Mai'n Aapse Sawaal Karne Waala Hoo'n Aur Sawaal Me'n Aapse Sakhti Karu'nga, Aap Apne Dil Me'n Mujh Par Gussa Na Kare'n, To Nabi e Kareem ﷺ Ne Irshaad Farmaaya, Jo Dil Me'n Aaye Sawaal Karo, Usne Kaha Mai'n Aapko Aapke Rab Ki Qasam Dekar Aur Aapse Pehle Logo'n Ke Rab Ki Qasam Dekar Sawaal Karta Hoo'n, Kya Waaqayi Allaah Ne Aapko Tamaam Logo'n Ki Taraf Rasool Bana Kar Bheja Hai? Nabi e Kareem ﷺ Ne Pehle Allaahumma Kaha Ya'ni Aye Allaah Aur Phir Jawaab Dete Huwe Farmaaya Haa'n, Usne Kaha Mai'n Aapko Allaah Ki Qasam Dekar Sawaal Karta Hoo'n, Kya Waaqayi Allaah Ne Aapko Hukm Diya Hai Ke Ham Din Aur Raat Me'n 5 Namaaze'n Padhe'n? Phir Nabi e Kareem ﷺ Ne Pehle Allaahumma Kaha Aur Farmaaya Haa'n, Usne Kaha Mai'n Aapko Allaah Ki Qasam Deta Hoo'n, Kya Waaqayi Allaah Ne Aapko Hukm Diya Hai Ke Ham Saal Ke Uss Maheene (Ya'ni Ramzaan) Me'n Roze Rakha Kare'n, Phir Nabi e Kareem ﷺ Ne Pehle Allaahumma Kaha Aur Farmaaya Haa'n, Phir Usne Kaha, Mai'n Aapko Allaah Ki Qasam Deta Hoo'n, Kya Waaqayi Aapko Allaah Ne Hukm Diya Hai Ke Aap Hamaare Daulatmand Logo'n Se Sadqa Lekar Usko Hamaare Fuqara (Gareeb) Me'n Taqseem Kare'n? Phir Nabi e Kareem ﷺ Ne Pehle Allaahumma Kaha Aur Farmaaya Haa'n, Phir Uss Shakhs Ne Kaha, Aap Jo Kuchh Lekar Aaye Hai'n Mai'n Uspar Imaan Le Aaya Aur Mai'n Apne Peechhe Apni Qaum Ka Rasool (Ya'ni Numaa'indah) Hoo'n Aur Mai'n Zamaam Bin So'lba Hoo'n Jo Banu Sa'ad Bin Abi Bakar Ka Bhaayi Hai. Phir Imaam Bukhaari Farmaate Hai'n Ke Iss Hadees Ko Moosa Aur Ali Bin Abdul Hameed Ne Riwaayat Kiya Hai, Woh Sulemaan Se, Woh Saabit Se, Woh Hazrat Anas Radiallaahu Anhu Se, Woh Riwaayat Karte Hai'n Nabi e Kareem ﷺ Se, Ya'ni Yeh Mazkoorah Hadees Doosri Sanad Se Bhi Marwi Hai.

Utba Bin Mas'ood Kehte Hai'n Ke Unko Hazrat Abdullaah Bin Abbaas Radiallaahu Anhuma Ne Khabar Di Ke Rasoolullaah ﷺ Ne Ek Shakhs Ko Apna Maktoob (Khat) Dekar Bheja Aur Usko Hukm Diya Ke Yeh Maktoob Behrain Ke Ameer (Baadshaah) Ko De, (Jab Yeh Khat Behrain Ke Ameer Tak Paho'ncha To) Behrain Ke Ameer Ne Woh Maktoob Kisra (Faaras Ke Baadshaah) Ko De Diya, Usne Jab Uss Maktoob Ko Padha To Usko Phaad Kar Tukde Tukde Kar Diya, Ibne Shihaab Kehte Hai'n Ke Mera Gumaan Hai Ke Ibnul Musayyab Rehmatullaah Alaih Ne Kaha Ke Rasoolullaah ﷺ Ne Unke Khilaaf (Ya'ni Faaras Ke Baadshaah Ke Khilaaf) Yeh Du'aa e Zarar Ki, Unke Tukde Tukde Kar Diye Jaaye'n Poore Poore Tukde.

Hazrat Anas Bin Maalik Radiallaahu Anhu Farmaate Hai'n Ke Rasoolullaah ﷺ Ne Ek Maktoob (Khat) Likha Ya Aapne Likhne Ka Iraadah Kiya, (To) Aapse Arz Kiya Gaya Ke Woh Log Sirf Usi Maktoob Ko Padhte Hai'n Jo Mohar Shudah Ho, Tab Nabi e Kareem ﷺ Ne Chaa'ndi Ki Ek A'ngoothi Banwaayi Jiska Naqsh (Muhammad Rasoolullaah) ﷺ Tha, Goya Mai'n Aap ﷺ Ke Haath Me'n Uski Safedi Dekh Raha Hoo'n, Sho'ba Ne Kaha Mai'n Ne Qataadah Se Poochha, Yeh Kisne Kaha Ke Uska Naqsh (Muhammad Rasoolullaah) ﷺ Tha, Unho'n Ne Bataaya Hazrat Anas Ne.

Hazrat Aqeel Bin Abi Taalib Ke Aazaad Kardah Gulaam Abu Murrah Kehte Hai'n Ke Unko Abu Waaqid Laisi Ne Bayaan Kiya Ke (Ek Martaba Ki Baat Hai Ke) Jis Waqt Rasoolullaah ﷺ Masjid Me'n Logo'n Ke Saath Baithe Huwe The Uss Waqt Teen Shakhs Aaye, Unme'n Se Do To Rasoolullaah ﷺ Ki Taraf Badh Kar Aa Gaye Aur Ek Chala Gaya, Woh Dono'n Rasoolullaah ﷺ Ke Paas Khade Ho Gaye, Unme'n Se Ek Ne Halqe Me'n (Ya'ni Wahaa'n Jo Sahaaba e Kiraam Mehfil Me'n Baithe Huwe The To Uss Mehfil Ke Darmiyaan Ek Jagah Kushaadgi Dekhi Khaali Jagah Dekhi To) Woh Wahaa'n Baith Gaya Aur Doosra Majlis Ke Peechhe Baith Gaya (Mehfil Ke Darmiyaan Aur Jagah Nahee'n Hone Ki Wajah Se) Aur Teesra Peeth Mod Kar Chala Gaya, Phir Jab Rasoolullaah ﷺ Faarig Ho Gaye (Khaas Guftagu Se) To Nabi e Kareem ﷺ Ne Irshaad Farmaaya, Suno Kya Mai'n Tumhe'n Un 3 Aadmiyo'n Ke Baare Me'n Khabar Na Doo'n? (Phir Un Teeno'n Ke Baare Me'n Bataate Huwe Farmaaya Ke) Unme'n Se 1 Ne Allaah Ki Panaah Li To Allaah Ne Usko Panaah De Di Aur Doosre Ne Allaah Se Haya Ki To Allaah Bhi Usse Haya Farmaayega Aur Teesre Ne Ae'raaz Kiya To Allaah Bhi Usse Ae'raaz Farmaayega.

Abdul Rehmaan Bin Abi Bakrah Bayaan Karte Hai'n Ke Unke Waalid Ne Bataaya Ke (Ek Baar) Nabi e Kareem ﷺ Apne Oo'nt Par Baithe Huwe The Aur Ek Shakhs Ne Unki Mohaar Ya Lagaam Thaami Huwi Thi, Phir Nabi e Kareem ﷺ Ne Irshaad Farmaaya, Aaj Kaunsa Din Hai? Ham Khaamosh Rahe, Hamne Gumaan Kiya Ke Aap Anqareeb Uss Din Ke Naam Ke Siwa Koi Aur Naam Rakhe'nge, Phir Aapne Farmaaya, Kya Aaj Qurbaani Karne Ka Din Nahee'n Hai? Hamne Kaha Kyu'n Nahee'n, Phir Aapne Farmaaya, Yeh Kaunsa Maheena Hai? Ham Khaamosh Rahe, Hatta Ke Hamne Gumaan Kiya Ke Anqareeb Aap Uss Maheene Ke Naam Ke Alaawa Koi Aur Naam Rakhe'nge, Phir Aapne Farmaaya Kya Yeh Zil Hijja Ka Maheena Nahee'n Hai? Hamne Kaha Kyu'n Nahee'n, Aapne Farmaaya, Tumhaare Khoon Aur Tumhaare Maal Aur Tumhaari Izzate'n Tumhaare Darmiyaan Iss Tarah Haraam Hai'n Jis Tarah Yeh Aaj Ke Din Iss Maheene Me'n Aur Iss Shaher Me'n Haraam Hai, Haazir (Ya'ni Jo Yahaa'n Hai'n Un) Ko Yeh Khabar Paho'nchaaye Jo Iss Hadees Ko Usse Zyaadah Yaad Rakhne Waala Ho .

Hazrat Ibne Mas'ood Radiallaahu Anhu Bayaan Karte Hai'n Ke Nabi e Kareem ﷺ Mukhtalif Ayyaam Me'n (Hame'n) Naseehat Karke Hamaari Hifaazat Aur (Saath Hamaari) Ri'aayat (Bhi) Karte The, Hamaari Uktaahat Ko Na Pasand Karne Ki Wajah Se. (Mere Bhaa'iyo'n, Ma'loom Huwa Ke Taqreer Utni Karni Chaahiye, Bayaan Utni Der Tak Dena Chaahiye Jitni Der Tak Log Sukoon Se Sune'n, Yeh Nahee'n Ke Poori Poori Raat Chaalu Hai Koi So Raha Hai Koi Pareshaan Ho Raha Hai Aur Raat Bhar Taqreer Sun Kar Din Bhar So Raha Hai Aisa Nahee'n Hona Chaahiye)

Hazrat Anas Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, Aasaan Ahkaam Bayaan Karo Aur Mushkil Ahkaam Na Bayaan Karo Aur Bashaarat Do Aur Logo'n Ko Mutanaffir Na Karo.

Abi Waa'il Kehte Hai'n Ke Hazrat Abdullaah Bin Mas'ood Radiallaahu Anhu Logo'n Ko Har Jume'raat Ke Din Naseehat Kiya Karte The, Unse Ek Shakhs Ne Kaha Aye Abu Abdur Rehmaan, Mai'n Chaahta Hoo'n Ke Aap Hame'n Har Roz Naseehat Kiya Kare'n, Hazrat Abdullaah Bin Mas'ood Radiallaahu Anhu Ne Kaha, Lekin Mujhe Jo Cheez Isse Baaz Rakhti Hai Woh Yeh Hai Ke Mai'n Tumhe'n Malaal Aur Uktaahat Me'n Mubtala Karne Ko Na Pasand Karta Hoo'n Aur Mai'n Naseehat Karne Me'n Tumhaari Iss Tarah Hifaazat Aur Ri'aayat Karta Hoo'n Jis Tarah Nabi e Kareem ﷺ Uktaahat Aur Malaal Ke Khadshe Se Hamaari Hifaazat Aur Ri'aayat Karte The.

Abdur Rehmaan Ne Kaha Ke Mai'n Ne Hazrat Mu'aawiya Radiallaahu Anhu Ko Khutba Dete Huwe Suna, Woh Keh Rahe The Ke Mai'n Ne Nabi e Kareem ﷺ Ko Yeh Farmaate Huwe Suna Ke Jis Shakhs Ke Saath Allaah Paak Khair (Bhalaayi) Ka Iraadah Farmaata Hai To Usko Deen Me'n Fiqh Ata Farmaata Hai (Usko Deen Ka Faqeeh Banaata Hai), (Phir Nabi e Kareem ﷺ Ne Irshaad Farmaaya) Aur Mai'n Qaasim Ya'ni Taqseem Karne Waala Hoo'n Aur Allaah Paak Ata Farmaata Hai Aur Yeh Ummat Hamesha Allaah Paak Ke Deen Par Qaayem Rahegi Aur Kisi Ki Mukhaalefat Se Isko Nuqsaan Na Hoga Yahaa'n Tak Ke Allaah Ka Hukm (Qayaamat) Aa Jaaye. (Iss Hadees Shareef Se Bahot Se Masaa'il Ma'loom Hote Hai'n, Lekin Yahaa'n Sirf Ek Baat Arz Karta Hoo'n Ke Nabi e Kareem ﷺ Ne Irshaad Farmaaya, Mai'n Qaasim Ya'ni Taqseem Karne Waala Hoo'n, Ab Nabi e Kareem ﷺ Kya Taqseem Karte Hai'n Woh Nahee'n Bataaya Balke Yeh Taqseem Aa'm Rakha Taake Koi Yeh Na Keh Sake Ke Nabi e Kareem ﷺ Ilm Fiqh Taqseem Karte Hai'n Balke Allaah Paak Aapko Ata Karta Hai Aur Aap Taqseem Karte Hai'n Yeh Aa'm Hai Khwaah Woh Ilm Ho Ya Maal Ho Kisi Ko Haq Nahee'n Ke Nabi e Kareem ﷺ Ki Iss Sifat Ko Kisi Par Muqayyad Kar De Aur Kahe Nabi e Kareem ﷺ Sirf Yehi Taqseem Karte Hai'n, Yehi Sabab Hai Ke A'imma Mohaddiseen Ne Bhi Iss Hadees Ko Kayi Baab Me'n Zikr Kiya Jaise Baabul Ilm Me'n Bhi Laaya Taake Ma'loom Ho Nabi e Kareem ﷺ Ilm Bhi Taqseem Karte Hai'n Aur Baabul Ganeemah Me'n Bhi Zikr Kiya Taake Ma'loom Ho Ke Aap Maal Bhi Taqseem Karte Hai'n Balke Agar Kaha Jaaye To Baja Hoga Ke Insaan Ko Jo Kuchh Mila Sab Nabi e Kareem ﷺ Ke Sadqe Me'n Mila Aur Nabi e Kareem ﷺ Ne Irshaad Bhi Farmaaya Hai Ke Allaah Paak Ne Mujhe Zameen Ke Khazaane Ki Ku'nji Ata Ki Hai)

Hazrat Mujaahid Ne Kaha Ke Mai'n Madeena Shareef Tak Hazrat Ibne Umar Radiallaahu Anhuma Ke Saath Raha, Mai'n Ne Unse Rasoolullaah ﷺ Ki Sirf Ek Hadees Suni, Unho'n Ne Kaha Ke Ham Nabi e Kareem ﷺ Ke Paas Baithe Huwe The Ke Aap ﷺ Ke Paas Khajoor Ke Darakht Ka Gond Laaya Gaya Jo Charbi Se Mushaaba Hota Hai, Nabi e Kareem ﷺ Ne Irshaad Farmaaya, Darakhto'n Me'n Se Ek Darakht Hai Jo Muslim Ke Mushaaba Hai, Mere Dil Me'n Khayaal Aaya Ke Mai'n Kahu'n Ke Woh Khajoor Ka Darakht Hai Lekin Mai'n Haazireen Me'n Se Sabse Chhota Tha (Iss Wajah Se) Khaamosh Raha, Nabi e Kareem ﷺ Ne Irshaad Farmaaya, Woh Khajoor Ka Darakht Hai.

Hazrat Abdullaah Bin Mas'ood Radiallaahu Anhu Bayaan Karte Hai'n Ke Nabi e Kareem ﷺ Ne Irshaad Farmaaya, Hasad (Ya'ni Rashk) Sirf 2 Aadmiyo'n Me'n Kiya Jaaye (Ya'ni 2 Tarah Ke Aadmi Par Rashk Karna Jaa'iz Hai), Ek Woh Shakhs Jisko Allaah Paak Ne Maal Diya Ho Aur Woh Usko Masaarif e Haq Me'n Kharch Kare (Ya'ni Aisa Maaldaar Jo Apni Daulat Ko Neki Ke Kaamo'n Me'n Kharch Kare Maslan Gareebo'n Ki Madad Kare Wagairah To Aise Shakhs Par Rashk Karna Jaa'iz Hai Ke Aye Kaash Mujhe Bhi Uski Tarah Maal Mila Hota To Mai'n Bhi Nek Kaamo'n Me'n Kharch Karta Uski Tarah) Doosra Woh Shakhs Jisko Allaah Paak Ne Hikmat Ata Ki Aur Woh Uss Hikmat (Ilm) Ke Mutaabiq Faisla Kare Aur Logo'n Ko Ta'leem De (Aise Shakhs Par Bhi Rashk Karna Jaa'iz Hai Aur Woh Iss Tarah Ke Kaash Mai'n Bhi Saahib e Ilm Hota To Logo'n Ko Ilm Sikhaata, Lekin Yeh Rashk Nahee'n Hai Ke Doosre Ke Ilm Se Jale Doosre Ke Maal Se Jale.

Hazrat Ubaidullaah Bin Abdullaah Ka Bayaan Hai Ke Abdullaah Bin Abbaas Radiallaahu Anhuma Aur Hur Bin Qais Fazaari Ne Hazrat Moosa Ke Hamsafar Ke Baare Me'n Ikhtelaaf Kiya, Hazrat Ibne Abbaas Ka Kehna Hai Ke Woh Khizar Hai'n, (Utne Me'n) Ubayi Bin Ka'ab Radiallaahu Anhu Ka Achaanak Un Dono'n Ke Paas Se Guzar Huwa, (Jab Unhe'n Hazrat Ibne Abbaas Radiallaahu Anhuma Ne Dekha) To Hazrat Ibne Abbaas Ne Unhe'n Bulaaya Aur Kaha Mere Aur Mere Dost Ke Darmiyaan Hazrat Moosa Alaihissalaam Ke Hamsafar Ke Baare Me'n Ikhtelaaf e Raaye Hai, (Woh Hamsafar) Jinse Milne Ka Raasta Moosa Alaihissalaam Ne (Allaah Paak Se) Poochha Tha, (To Aye Ubayi Bin Ka'ab Radiallaahu Anhu) Kya Aapne Rasoolullaah ﷺ Se Iss Baare Me'n (Kuchh) Suna Hai? (To Ubayi Bin Ka'ab Radiallaahu Anhu) Ne Kaha, Haa'n Mai'n Ne Rasoolullaah ﷺ Ko Iss Baare Me'n Farmaate Huwe Suna Ke Moosa Alaihissalaam Ek Martaba Bani Israa'eel Me'n Tashreef Rakhte The, Ek Shakhs Aaya Aur Usne Aap Alaihissalaam Se Poochha, Kya Aapko Aise Shakhs Ke Baare Me'n Ilm Hai Jo Aapse Zyaadah Aa'lim Ho? Hazrat Moosa Alaihissalaam Ne Jawaab Diya Nahee'n (To Utne Me'n Allaah Paak Ne Wahi Farmaayi Ke Kyu'n Nahee'n Hamaara Ek Bandah Khizar Hai (Jo Tumse Zyaadah Aa'lim Hai)) Pas Hazrat Moosa Alaihissalaam Ne Allaah Paak Se Unse Milne Ka Raasta Poochha To Allaah Paak Ne Hazrat Moosa Alaihissalaam Keliye Machhli Ko Unke Liye Alaamat Bana Diya (Ya'ni Machhli Ke Zari'ye Se Raasta Bataaya Hazrat Khizar Se Mulaaqaat Ka) Aur Hazrat Moosa Alaihissalaam Ko Bata Diya Ke Jab Tum Machhli Na Paao To Laut Aana Unse Mulaaqaat Ho Jaayegi (Ya'ni Jahaa'n Tumse Machhli Gum Jaaye Samajh Jaana Wahee'n Mulaaqaat Hogi) Pas Moosa Alaihissalaam Unse Mulaaqaat Ko Chal Pade Aur Machhli Ke Bataaye Huwe Nishaan Par Rawaana Huwe (Ya'ni Machhli Chalti Jaati Usi Ke Saath Saath Hazrat Moosa Alaihissalaam Bhi Chalte Jaate (Chalte Chalte Raaste Me'n Ek Jagah) Moosa Alaihissalaam Ke Khaadim Ne Kaha Kya Aapne Dekha Hai Ke Jab Ham Pat'thar Ke Paas Baithe The To Mai'n Machhli Ko Bhool Gaya Aur Shaitaan Hi Ne Mujh Par Nisyaan (Bhool) Taari Kar Diya (Ya'ni Hazrat Moosa Alaihissalaam Aur Unke Khaadim Chalte Chalte Ek Pat'thar Ke Paas Aaraam Karne Lage To Wahee'n Machhli Gum Ho Gayi Lekin Unke Khaadim Bhool Gaye Ke Hamse Machhli Gum Ho Gayi Hai Aur Yehi Hamaari Manzil Ka Pata Hai, Phir Woh Jab Aage Chale Gaye To Raaste Me'n Khayaal Aaya To Bataaya Khaadim Ne Hazrat Moosa Alaihissalaam Ko Saara Waaqe'ah) (To) Moosa Alaihissalaam Farmaane Lage Hame'n (To) Usi Jagah Ki Talaash Thi Woh (Phir Woh Ulte Paao'n) Apne Qadmo'n Ke Nishaan Par Laute (Ya'ni Waapas Palte Uss Taraf Jis Taraf Se Aaye The Qadmo'n Ke Nishaan Ko Dekhte Huwe Jab Uss Pat'thar Ke Paas Aa Gaye) Tab Unki Hazrat Khizar Se Mulaaqaat Huwi, Phir Wohi Maajra Huwa Jo Allaah Paak Ne Apni Kitaab Qur'aan Majeed Me'n Bayaan Kiya. (Yahaa'n Yaad Rakhe Hazrat Khizar Alaihissalaam Ke Baare Me'n Jo Zikr Huwa Unke Nabi Ya Wali Hone Me'n Ikhtelaaf Hai Lekin Durust Yeh Hai Ke Woh Nabi Hai'n Kyu'nke Unho'n Ne Kaha, "Mai'n Ne Yeh Kaam Apni Raaye Se Nahee'n Kiye" (Sureh Kahaf, Aayat No.82) Ya'ni Jin Kaamo'n Par Hazrat Moosa Alaihissalaam Ne Ae'teraaz Kiye The Hazrat Khizar Alaihissalaam Ke, Woh Sab Kaam Unho'n Ne Apni Raaye Se Nahee'n Kiye The Balke Wahi Se Kiye The Aur Wahi Sirf Nabiyo'n Par Naazil Hoti Hai Warna Ilhaam Ki Bina Par Kisi Ko Qatl Karna Jaa'iz Nahee'n Ya Kisi Ki Kashti Todna Jaa'iz Nahee'n)

Hazrat Ibne Abbaas Radiallaahu Anhuma Bayaan Karte Hai'n Ke Nabi e Kareem ﷺ Ne Mujhe (Apne) Seene (Mubaarak) Se Lagaaya Aur Nabi e Kareem ﷺ Ne (Mere Haq Me'n) Du'aa Ki Ke Aye Allaah Isko Kitaab (Qur'aan) Ka Ilm Sikha.

Hazrat Abdullaah Bin Abbaas Radiallaahu Anhuma Farmaate Hai'n Ke Mai'n Gadhe (Ya) Gadhi Par Sawaar Tha Aur Uss Waqt Mai'n Baloogat Ke Qareeb Tha (Ya'ni Baalig Hone Ki Umar Ke Qareeb Tha), (To Dekha Ke) Aur Rasoolullaah ﷺ Maqaam e Mana Me'n Bagair Kisi Deewaar Ki Taraf Muh Kiye Huwe Namaaz Padh Rahe The, Mai'n Kisi Saf Ke Saamne Se Guzra Aur Mai'n Ne Gadhi Ko Charne Chhod Diya, Phir Mai'n Saf Me'n Daakhil Ho Gaya To Kisi Ne Mujh Par Inkaar Nahee'n Kiya.

Hazrat Mehmood Bin Al-Rabi Radiallaahu Anhu Farmaate Hai'n Ke Mujhe Abhi Tak (Bachpan Ka Waaqe'ah) Yaad Hai Ke Nabi e Kareem ﷺ Ne Mere Chehre Par Dol Ke Paani Se Kulli Ki Thi. (Yahaa'n Par Jo Sahaabi Ne Zikr Kiya Ke Nabi e Kareem ﷺ Ne Unke Muh Par Kulli Ki Thi Yeh Barkat Keliye Tha, Kyu'n Ke Nabi e Kareem ﷺ Ne Jis Paani Ko Apne Mubaarak Dahen (Muh) Me'n Le Liya Woh Paani Bhi Barkat Waala Ho Gaya Aur Sahaaba e Kiraam Radiallaahu Anhum Ajma'een Nabi e Kareem ﷺ Se Hamesha Barkat Haasil Karne Ki Koshish Karte The. (Lekin Iska Yeh Matlab Hargiz Nahee'n Ke Aaj Koi Peer Bhi Kulli Kare Aur Uska Gaali Mureed Paani Peeta Rahe, Aisa Nahee'n Hona Chaahiye Kyu'n Ke Woh Nabi e Kareem ﷺ The Jinka Poora Jisme Mubaarak Hi Barkat Hai Aur Uss Jism Se Chhu Jaane Waali Har Shay Bhi Barkat Waali Ban Jaaya Karti Hai).

Hazrat Abdullaah Bin Abbaas Radiallaahu Anhuma Farmaate Hai'n Ke Unka Aur Hur Bin Qais Fuzaari Ka Hazrat Moosa Ke Hamsafar Ke Baare Me'n Ikhtelaaf Huwa, Hazrat Ibne Abbaas Ka Kehna Hai Ke Woh Khizr Hai'n, (Utne Me'n) Ubayi Bin Ka'ab Radiallaahu Anhu Ka Achaanak Un Dono'n Ke Paas Se Guzar Huwa, (Jab Unhe'n Hazrat Ibne Abbaas Radiallaahu Anhuma Ne Dekha) To Hazrat Ibne Abbaas Ne Unhe'n Bulaaya Aur Kaha, Mere Aur Mere Dost Ke Darmiyaan Hazrat Moosa Alaihissalaam Ke Hamsafar Ke Baare Me'n Ikhtelaaf e Raaye Hai, (Woh Hamsafar) Jinse Milne Ka Raasta Moosa Alaihissalaam Ne (Allaah Paak Se) Poochha Tha (To Aye Ubayi Bin Ka'ab Radiallaahu Anhu) Kya Aapne Rasoolullaah ﷺ Se Iss Baare Me'n (Kuchh) Suna Hai? (To Ubayi Bin Ka'ab Radiallaahu Anhu) Ne Kaha, Haa'n Mai'n Ne Rasoolullaah ﷺ Ko Iss Baare Me'n Farmaate Huwe Suna Ke Moosa Alaihissalaam Ek Martaba Bani Israa'eel Me'n Tashreef Rakhte The, Ek Shakhs Aaya Aur Usne Aap Alaihissalaam Se Poochha, Kya Aapko Aise Shakhs Ke Baare Me'n Ilm Hai Jo Aapse Zyaadah Aa'lim Ho? Hazrat Moosa Alaihissalaam Ne Jawaab Diya Nahee'n, (To Utne Me'n Allaah Paak Ne Wahi Farmaayi Ke Kyu'n Nahee'n, Hamaara Ek Bandah Khizr Hai (Jo Tumse Zyaadah Aa'lim Hai), Pas Hazrat Moosa Alaihissalaam Ne Allaah Paak Se Unse Milne Ka Raasta Poochha To Allaah Paak Ne Hazrat Moosa Alaihissalaam Keliye Machhli Ko Alaamat Bana Diya (Ya'ni Machhli Ke Zariye Se Raasta Bataaya Hazrat Khizr Se Mulaaqaat Ka) Aur Hazrat Moosa Alaihissalaam Ko Bata Diya Ke Jab Tum Machhli Na Paao To Laut Aana Unse Mulaaqaat Ho Jaayegi (Ya'ni Jahaa'n Tumse Machhli Gum Jaaye Samajh Jaana Wahee'n Mulaaqaat Hogi) Pas Moosa Alaihissalaam Unse Mulaaqaat Ko Chal Pade Aur Machhli Ke Bataaye Huwe Nishaan Par Rawaana Huwe (Ya'ni Machhli Chalti Jaati Usi Ke Saath Saath Hazrat Moosa Alaihissalaam Bhi Chalte Jaate (Chalte Chalte Raaste Me'n Ek Jagah)) Moosa Alaihissalaam Ke Khaadim Ne Kaha, Kya Aapne Dekha Hai Ke Jab Ham Pat'thar Ke Paas Baithe The To Mai'n Machhli Ko Bhool Gaya Aur Shaitaan Hi Ne Mujh Par Nisyaan (Bhool) Taari Kar Diya (Ya'ni Hazrat Moosa Alaihissalaam Aur Unke Khaadim Chalte Chalte Ek Pat'thar Ke Paas Aaraam Karne Lage To Wohi Machhli Gum Ho Gayi Lekin Unke Khaadim Bhool Gaye Ke Hamse Machhli Gum Ho Gayi Hai Aur Yehi Hamaari Manzil Ka Pata Hai, Phir Woh Jab Aage Chale Gaye To Raaste Me'n Khayaal Aaya To Bataaya Khaadim Ne Hazrat Moosa Alaihissalaam Ko Saara Waaqe'ah) (To) Moosa Alaihissalaam Farmaane Lage Hame'n (To) Usi Jagah Ki Talaash Thi, Woh (Phir Woh Ulte Paao'n) Apne Qadmo'n Ke Nishaan Par Laute (Ya'ni Waapas Palte Uss Taraf Jis Taraf Se Aaye The Qadmo'n Ke Nishaan Ko Dekhte Huwe Jab Uss Pat'thar Ke Paas Aa Gaye) Tab Unki Hazrat Khizr Se Mulaaqaat Huwi, Phir Wohi Maajra Huwa Jo Allaah Paak Ne Apni Kitaab Qur'aan Majeed Me'n Bayaan Kiya. (Yahaa'n Yaad Rakhe Hazrat Khizr Alaihissalaam Ke Baare Me'n Jo Zikr Huwa Unke Nabi Ya Wali Hone Me'n Ikhtelaaf Hai Lekin Durust Yeh Hai Ke Woh Nabi Hai'n, Kyu'nke Iss Hadees Me'n Aaya Hai Ke Woh Hazrat Moosa Alaihissalaam Se Bade Aa'lim Hai'n, Aur Wali Kabhi Bhi Nabi Se Bada Aa'lim Nahee'n Ho Sakta).

Hazrat Abu Moosa Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, Allaah Paak Ne Jo Mujhe Hidaayat Aur Ilm Dekar Bheja Hai Uski Misaal Uss Baarish Ki Tarah Hai Jo Chhama Chham Kisi Zameen Par Barse, Pas Ba'az Zameene'n Zarkhez Hoti Hai'n Jo Paani Ko (Apne Andar) Qabool Karti Hai Aur Ghaas Aur Sabzah Ugaati Hai Aur Ba'az Zameene'n Banjar Hoti Hai'n Woh Paani Ko Rok Leti Hai (Ya'ni Apne Andar Jaane Nahee'n Deti Hai Balke Apne Upar Rok Leti Hai) Phir Allaah Paak Usse Logo'n Ko Faa'idah Paho'nchaata Hai, Log (Khud Bhi) Peete Hai'n Aur (Jaanwaro'n Ko Bhi) Pilaate Hai'n Aur Zara'at Ko Sairaab Karte Hai'n (Ya'ni Kheti Baadi Me'n Bhi Uss Paani Ko Iste'maal Karte Hai'n) Aur Kuchh Baarish Zameen Ke Doosre Hisse Par Hoti Hai'n Jo Zameene'n Bilkul Chikni Chatyal Hai Aisi Zameen Na Paani Ko Rokti Hai Na Sabzah Ugaati Hai, Pas Aisi Hi Misaal Uss Shakhs Ki Hai Jisne Allaah Ke Deen Me'n Tafaqqoh (Deen Ka Fahem) Haasil Kiya (Aur) Padhe Aur Padhaaye Aur Doosri Misaal Uss Shakhs Ki Hai Jisne Iss Hidaayat Ki Taraf Tawajjoh Na Di Aur Allaah Ki Iss Hidaayat Ko Bilkul Qabool Na Kiya Jiske Saath Mujhe Bheja Gaya Hai, (Aage Imaam Bukhaari Ne Kaha Ke Jiss Par Paani Buland Hota Hai "Wassafsaf" Iska Ma'ni Hai Hamwaar Zameen).

Hazrat Anas Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, Qayaamat Ki Nishaaniyo'n Me'n Se Ek Yeh Hai Ke Ilm Uth Jaayega Aur Jahaalat Qaayem Ho Jaayegi, Sharaab Noshi (Bahot Aa'm Ho Jaayegi) Aur Khullam Khulla Zina Hoga. (Mere Bhaa'iyo'n, Ilm Uth Jaane Ka Matlab Yeh Hai Ke Ulama Uth Jaaye'nge, Isse Muraad Yeh Nahee'n Ke Ulama Ke Seeno'n Se Ilm Khatam Kar Diya Jaayega, Lekin Jab Ulama Faut Ho Jaaye'nge Aur Log Jaahilo'n Ko Apna Peer Aur Peshwa Aur Apna Mufti Bana Le'nge To Phir Kya Hoga Ke Woh Jaahil Peer Jaahil Peshwa Jaahil Mufti Apni Raaye Se Deen Me'n Ahkaam Jaari Karega Aur Apni Jahaalat Ke Bawajood Qur'aan Wa Hadees Ka Galat Tarjuma Karega Urdu Ki Chand Kitaabe'n Padh Kar Muqarrir e Aa'zam Bana Huwa Hoga Aur Khud Bhi Gumraah Hoga Logo'n Ko Bhi Gumraah Karega Hamaare Aajke Zamaane Me'n Iski Bahot Si Misaale'n Maujood Hai'n).

Hazrat Anas Radiallaahu Anhu Farmaate Hai'n Ke Aaj Mai'n Tumse Aisi Hadees Bayaan Karu'nga Ke Mere Ba'ad Koi Tumse Bayaan Nahee'n Karega, Mai'n Ne Rasoolullaah ﷺ Se Suna, Farmaate The Ke Qayaamat Ki Nishaaniyo'n Me'n Se Ek Yeh Hai Ke Ilm Kam Ho Jaayega Aur Jahaalat Chha Jaayegi, Alaaniya Zina Hoga, Aurato'n Ki Kasrat Aur Mardo'n Ki Qillat Hogi Yahaa'n Tak Ke 50 Aurato'n Ka Ek Mard Kafeel (Sar Parast) Hoga. (Mere Bhaa'iyo'n, Iss Hadees Me'n Jo Yeh Kaha Gaya Hai Ke Mard Kam Aur Aurat Zyaadah Ho Jaaye'ngi Iski Kayi Wajoohaat Hai'n, Maslan Mukhtalif Ja'ngo'n Aur Aapsi Jhagde Me'n Bhi Mard Qatl Kar Diye Jaaye'nge Aur Aurat Baaqi Reh Jaayegi, Aakhri Zamaane Me'n Mardo'n Ki Paidaa'ish Kam Aur Aurato'n Ki Paidaa'ish Zyaadah Hogi).

Hazrat Abdullaah Bin Umar Radiallaahu Anhuma Ka Bayaan Hai Ke Mai'n Ne Rasoolullaah ﷺ Ko Farmaate Huwe Suna Ke Mai'n So Raha Tha, Mujhe Doodh Ka Pyaala Diya Gaya, Mai'n Ne (Uss Pyaale Se Use) Pi Liya Hatta Ke Mai'n Ne Dekha Ke (Doodh Ki) Seeri (Taraawat) Mere Naakhuno'n Se Nikal Rahi Hai, Phir Mai'n Ne Apna Bacha Huwa (Doodh) Umar Bin Khattaab Radiallaahu Anhu Ko De Diya, (Khwaab Sunne Ke Ba'ad Sahaaba e Kiraam Ne) Poochha Ya Rasoolallaah ﷺ! Aapne Iss (Khwaab) Ki Kya Ta'beer Li ? To Nabi e Kareem ﷺ Ne Irshaad Farmaaya (Iss Khwaab Ki Ta'beer) Ilm (Hai). (Yahaa'n Se Ma'loom Huwa Ke Hazrat Umar Bin Khattaab Radiallaahu Anhu Ka Ilm Rasoolullaah ﷺ Ke Ilm Ka Faiz Tha Ya'ni Yahaa'n Par Nabi e Kareem ﷺ Ne Goya Hazrat Umar Radiallaahu Anhu Ke Ilm Ki Fazeelat Bhi Bayaan Kardi).

Hazrat Abdullaah Bin Amro Bin A'as Radiallaahu Anhu Se Riwaayat Hai Ke Rasoolullaah ﷺ Hajjatul Wada (Ke Mauqe Par) Logo'n Keliye Maqaam e Mana Me'n Thaher Gaye, (Utne Me'n) Ek Shakhs Aaya Aur Kaha Ke Mujhe Khayaal Nahee'n Raha Aur Qurbaani Se Pehle Sar Mundwa Liya, Nabi e Kareem ﷺ Ne Irshaad Farmaaya, (Ab Qurbaani Ka Jaanwar) Zibah Karlo Koi Muzaayeqa Nahee'n, (Utne Me'n) Ek Aur Shakhs Aaya Aur Kaha (Mai'n Ne) Bhoole Se Rami Jemaar (Shaitaan Ko Pat'thar Maarne) Se Pehle Qurbaani Karli (To Nabi e Kareem ﷺ Ne Irshaad Farmaaya Ke Tum) Ab Rami Jemaar Karlo Koi Muzaayeqa Nahee'n, (Hazrat Abdullaah Bin Amro) Kehte Hai'n Ke Nabi e Kareem ﷺ Se Jis Cheez Ke Baare Me'n Sawaal Kiya Gaya Aur Woh Aage Peechhe Ho Gaye (Ya'ni Hazrat Abdullaah Bin Amro Bhool Gaye Ke Pehle Kaunsa Sawaal Tha Lekin Woh Kehte Hai'n Ke Nabi e Kareem ﷺ Se Jo Bhi Sawaal Kiya Gaya) To Aapne Yehi Farmaaya Ab Karlo Koi Muzaayeqa Nahee'n.

Hazrat Abdullaah Bin Abbaas Radiallaahu Anhuma Farmaate Hai'n Ke Rasoolullaah ﷺ Se Aapke (Aakhri Hajj Ke Mauqe) Par Sawaalaat Kiye Gaye, (Kisi Ne Sawaal Kiya Ke Mai'n Ne) Rami Jemaar Se Pehle Qurbaani Karli, To Nabi e Kareem ﷺ Ne Haath Ke Ishaare Se Farmaaya Koi Harj Nahee'n, (To Kisi Ne Sawaal Kiya Ke Mai'n Ne) Qurbaani Karne Se Pehle Sar Mundwa Liya, To Aapne Haath Ke Ishaare Se Bataaya Ke Koi Muzaayeqa Nahee'n.

Hazrat Abu Hurairah Radiallaahu Anhu Bayaan Karte Hai'n Ke Nabi e Kareem ﷺ Ne Irshaad Farmaaya Ke Ilm Utha Liya Jaayega Aur Jahaalat Aur Fitno'n Ka Zahoor Hoga Aur Kasrat Se Harj Hoga (Sahaaba e Kiraam Radiallaahu Anhum Ajma'een Ne Sunne Ke Ba'ad) Arz Kiya l, Ya Rasoolallaah ﷺ! Harj Kya Hai? To Nabi e Kareem ﷺ Ne Ishaare Se Apne Haath Mubaarak Ko Gardan Par Phera Goya Aapne Uss Lafz Se Qatl Ka Iraadah Kiya (Ya'ni Qatl Ki Kasrat Ho Jaayegi )

Hazrat Asma (Binte Abi Bakar Radiallaahu Anha) Farmaati Hai'n Ke (Ek Din) Mai'n Hazrat Sayyadah Aa'yesha Siddeeqa Radiallaahu Anha Ke Paas (Mulaaqaat Ko) Aayi Aur (Dekha Ke) Woh Uss Waqt Namaaz Padh Rahi Thee'n, (Jabke Woh Namaaz Ka Waqt Nahee'n Tha To Mai'n Ne Unse) Poochha (Ke Yeh) Logo'n Ko Kya Ho Gaya Hai? (Ya'ni Yeh Log Be Waqt Namaaz Kyu'n Padh Rahe Hai'n To) Unho'n Ne (Ya'ni Hazrat Aa'yesha Ne) Aasmaan Ki Taraf Ishaarah Kiya (Ya'ni Kyu'n Namaaz Padh Rahe Hai'n Uski Wajah Bataayi Ishaare Se) Pas Uss Waqt Sab Log Namaaz Ke Qayaam Me'n The, (Phir) Hazrat Aa'yesha Radiallaahu Anha Ne Kaha, Sub'haan Allaah, (To) Mai'n Ne Poochha, Yeh Koi Nishaani Hai? (Ya'ni Yeh Sooraj Ka Gahen Lagna Koi Allaah Ki Nishaani Hai Kya To) Hazrat Aa'yesha Radiallaahu Anha Ne Sar Ke Ishaare Se Jawaab Diya Haa'n! Phir Mai'n Bhi Khadi Ho Gayi (Namaaz Padhne Keliye) Hatta Ke Mujh Par Be Hoshi Chhaane Lagi (Waqt Zyaadah Hone Ki Wajah Se) To Mai'n Apne Sar Ke Upar Paani Daalne Lagi, (Taake Be Hoshi Door Ho Jaaye) Phir (Namaaz Ke Ba'ad) Nabi e Kareem ﷺ Ne Allaah Paak Ki Hamd Wa Sana Ki, Phir Irshaad Farmaaya, Jis Cheez Ko Mai'n Ne (Pehle) Nahee'n Dekha Tha, Uss Cheez Ko Mai'n Ne Iss Jagah Me'n Dekh Liya, Hatta Ke Jannat Aur Dozakh Ko Bhi, (Dekh Liya) Pas Meri Taraf Yeh Wahi Ki Gayi Hai Ke, Beshak Tumhaari Qabro'n Me'n Tumhaari Aazmaa'ish Hogi (Ya'ni Qabr Me'n Imtehaan Se Guzarna Hoga Aur Aisi Aazmaa'ish Hogi Ke) Jo Maseehud Dajjaal Ki Aazmaa'ish Ki Misl Hogi Ya Uske Qareeb Hogi, (Raawi Kehte Hai'n) Mujhe Yaad Nahee'n Ke Hazrat Asma Radiallaahu Anha Ne Kya Kaha Tha, (Lekin Haa'n Qabr Me'n) Kaha Jaayega Ke Iss Shakhs Ke Muta'alliq Tumhe'n Kya Ilm Hai? (Ya'ni Kya Tum Iss Shakhs Ya'ni Muhammad e Arabi ﷺ Ke Baare Me'n Kuchh Jaante Ho? To Jawaab Me'n) Raha Imaan Laane Waala Aur Yaqeen Karne Waale (Jawaab) (Yahaa'n Par Bhi Raawi Kehte Hai'n) Mujhe Yaad Nahee'n Ke Hazrat Asma Radiallaahu Anha Ne Kya Kaha Tha, (Lekin Haa'n Jo Saahibe Imaan Wa Yaqeen Hai) To Woh Kahega Yeh Muhammad Rasoolullaah ﷺ Hai'n, (Yeh Aise Hai'n Ke) Hamaare Paas Mo'jezaat Aur Dalaa'il Lekar Aaye The So Hamne Unke Paigaam Par Labbaik Kaha Aur Unki Pairwi Ki Aur Teen Dafa (Jawaab Me'n) Kaha, Yeh Muhammad ﷺ Hai'n, Phir Usse (Durust Jawaab Dene Waale Se) Kaha Jaayega Tum (Apne Aa'maal Se) Nafa Uthaate Huwe So Jaao, Hame'n Ma'loom Tha Ke Beshak Tum Inpar Yaqeen Karne Waale Ho, Aur Raha Munaafiq Ya Shak Karne Waale (Raawi Kehte Hai'n Ke) Mujhe Yaad Nahee'n Raha Ke Hazrat Asma Radiallaahu Anha Ne Kya Kaha Tha, So Woh (Munaafiq Aur Shak Karne Waale Jawaab Me'n) Kahega, Mujhe Nahee'n Ma'loom ! (Ke Yeh Kaun Hai'n Haa'n) Mai'n Ne Logo'n Ko Jo Kehte Huwe Suna, So Woh Mai'n Ne Keh Diya.

Hazrat Abu Jamrah Ka Bayaan Hai Ke Mai'n Hazrat Ibne Abbaas Radiallaahu Anhuma Aur Logo'n Ke Darmiyaan Tarjuma Karta Tha (Ya'ni Ajami Ke Sawaal Ko Arabi Me'n Hazrat Abdullaah Bin Abbaas Ko Sunaata Tha Aur Unke Jawaab Ko Ajami Zabaan Me'n Ajami Logo'n Ko Sunaata Tha) (Ek Baar) Woh Farmaane Lage (Ke Qabeela) Abdul Qais Ke Log Jab Rasoolullaah ﷺ Ke Paas Aaye To Nabi e Kareem ﷺ Ne Unse Farmaaya, Tum Kis Wafad Se Ho Ya Kis Qaum Se Ho? Woh Bole Ham Rabee'ah Ki Qaum Se Hai'n, Nabi e Kareem ﷺ Ne Irshaad Farmaaya, Khush Aamdeed غَيْرَ خَزَايَا وَلاَ نَدَامَى Tum Log Sharmindah Hoge Na Naadim, Unho'n Ne Kaha Ya Rasoolallaah ﷺ! Ham Log Aapke Paas Door Daraaz Ki Musaafat Se Aaye'n Hai'n Aur Hamaare Aur Aapke Darmiyaan Kuffaar Ka Qabeela Muzir Hai Aur Ham Aapke Paas Sirf Hurmat Waale Maheeno'n Me'n Aane Ki Taaqat Rakhte Hai'n, Aap Hame'n Koi Faisla Kun Hukm Bataaye'n Jiski Khabar Ham Apne Peechhe Chhode Huwe (Woh Log Jo Nahee'n Aa Sake Hai'n) Unko De'n Aur Ham Sab Uspar Amal Karke (Jannat) Me'n Daakhil Ho'n, Nabi e Kareem ﷺ Ne Unhe'n 4 Kaamo'n Ke Karne Ki Ijaazat Di Aur 4 Kaamo'n Se Mana Farmaaya, Aapne Unhe'n Ek Allaah Wahdahu La Shareek Par Imaan Laane Ka Hukm Diya, Phir Aapne Farmaaya, Kya Tum Jaante Ho Ke Allaah Par Imaan Laane Ki Kya Ta'reef Hai? Unho'n Ne Arz Kiya, Allaah Aur Uska Rasool Behtar Jaante Hai'n, Aapne Farmaaya (Allaah Par Imaan Laane Ka Matlab Yeh Hai Ke) Tum Yeh Gawaahi Do Ke Allaah Paak Ek Hai Aur Uske Siwa Koi Ibaadat Ka Mustahiq Nahee'n Aur Muhammad ﷺ Allaah Ke Rasool Hai'n, Aur Namaaz Qaayem Karne, Zakaat Ada Karne, Ramzaan Ke Roze Rakhne, Aur Maale Ganeemat Ka Paa'nchwa (5th) Hissa Ada Karne Ka Hukm Diya, Aur Aapne Unhe'n Khokle Kaddu, Sabz Ra'ng Ke Ghado'n Aur Taarkol Mila Huwa Bartan, (Me'n Nabeez Peene Se) Mana Farmaaya, Imaam Bukhaari Kehte Hai'n Ke Sho'ba Ne Kaha Ba'az Auqaat Nabi e Kareem ﷺ Ne Naqeer Kaha Aur Ba'az Auqaat Muqeer Kaha (Khokhla) Aapne Farmaaya In Baato'n Ko Yaad Rakho Aur Apne Peechhe Chhode Huwe Logo'n Ko Inki Khabar Do. (Hazraat Iss Hadees Shareef Se Ma Qabl Me'n Bhi Iss Qism Ki Ek Hadees Guzri Hadees No 53 Jisme'n Humne Bataaya Tha Ke Yahaa'n Se Ek Ahem Masle Ka Hal Nikalta Hai Aur Woh Yeh Ke Sahaaba e Kiraam Ke Daur Me'n Bhi Deeni Khidmaat Ka Mu'aaweza Lena Aur Dena Raa'ij Tha Zara Gaur Kare'n Ke Hazrat Abu Jamrah Se Hazrat Ibne Abbaas Radiallahu Anhuma Ne Farmaaya Tum Mere Paas Thehro Hatta Ke Mai'n Apne Maal Se Tumhe'n Hissa Doo'n (Kiss Kaam Ke Badle Aapne Maal Se Hissa Dene Ko Kaha Unka Kaam Kya Tha To Bukhaari Ki Hadees No.87 Se Samajh Aata Hai Ya'ni Abhi Jo Hadees Guzri Ke Woh Kaam Kya Karte The? Ya'ni Hazrat Abu Jamrah Saa'ileen Ke Ajami Zabaan Ke Sawaalaat Ka Tarjuma Karke Hazrat Ibne Abbaas Radiallahu Anhuma Ko Arabi Me'n Sunaate The Phir Jo Jawaab Hazrat Ibne Abbaas Arabi Me'n Dete The Uss Jawaab Ka Bhi Abu Jamrah Ajami Zabaan Me'n Tarjuma Karke Saa'ileen Ko Bataate The Aur Hazrat Ibne Abbaas Radiallahu Anhuma Unko Iss Khidmat Ka Mu'aaweza Dete The, Ma'loom Huwa Deeni Khidmaat Keliye Mu'aaweza Lena Durust Hai).

Hazrat Abdullaah Bin Abi Mulaika Farmaate Hai'n Ke Hazrat Uqba Bin Haaris Radiallaahu Anhu Ne Unhe'n Bataaya Ke Unho'n Ne Abu Ihaab Bin Uzaiz Ki Beti Se Shaadi Ki, Phir (Shaadi Ke Ba'ad) Unke Paas Ek Aurat Ne Aakar Kaha, Beshak Mai'n Ne Uqba Ko Aur Uski Beewi Ko Doodh Pilaaya Hai, (Ya'ni Uss Aurat Ne Hazrat Uqba Bin Haaris Se Kaha Ke Mai'n Ne Tumko Aur Tumhaari Beewi Ko Doodh Pilaaya Hai, Ya'ni Woh Yeh Kehna Chaahti Thi Ke Tum Aur Tumhaari Beewi Doodh Shareek Bhaayi Bahen Ho To Yeh Nikaah Kaise Huwa) (Phir Woh Aurat Boli) Aur Na Tumne (Pehle) Mujhe Iski Khabar Di Thi (Ya'ni Agar Shaadi Se Pehle Mujhe Khabar Di Hoti To Mai'n Bata Deti Ke Tum Dono'n Doodh Shareek Bhaayi Bahen Ho, Baher Haal Hazrat Uqba Bin Haaris Uss Aurat Ki Baate'n Sunne Ke Ba'ad) Phir Woh Sawaar Hokar Madeena Me'n Rasoolullaah ﷺ Ke Paas Gaye Aur Aapse Iss Muta'alliq Sawaal Kiya, (Ya'ni Saara Mu'aamla Sunaaya) To Rasoolullaah ﷺ Ne Irshaad Farmaaya, Tum Kaise (Usko Apne Nikaah Me'n Barqaraar Rakhoge?) Haalaa'nke Uske Muta'alliq Kaha Gaya Hai, (Ya'ni Yeh Ke Razaayi Bhaayi Bahen Nikaah Nahee'n Kar Sakte) Phir Hazrat Uqba Apni Beewi Se Alag Ho Gaye Aur Usne (Ya'ni Uss Aurat Ne Jinse Hazrat Uqba Ne Shaadi Ki Thi Hazrat Uqba Ke Alag Hone Ke Ba'ad) Phir Kisi Aur Shakhs Se Nikaah Kar Liya.

Hazrat Umar Radiallaahu Anhu Farmaate Hai'n, Mai'n Aur Mera Ansaari Padosi Bani Umayya Bin Zaid (Ke Mohalle) Me'n Rehte The, Yeh (Gaao'n) Madeena (Shareef) Ki Bulandi Par Tha, Aur Ham Rasoolullaah ﷺ Ki Baargaah Me'n Baari Baari Aate, Ek Din Woh Aate Aur Ek Din Mai'n Aata, Jis Din Mera Aana Hota To Mai'n Wahi Ki Nayi Soorat e Haal Se Use Aagaah Karta Aur Jis Din Woh Aata Woh Bhi Mujhe Aisa Hi Karta, Ek Din Apni Baari Ke Mutaabiq Mera Padosi (Nabi e Kareem ﷺ Ki Baargaah Me'n) Aaya, Usne (Waapas Aakar) Mera Darwaazah Zor Zor Se Khatkhataaya Aur (Mera Naam Lekar) Poochha, Woh Yahaa'n Hai'n? Mai'n Ghabra Gaya Aur Baahar Nikla, (Usne Kaha) Aaj Bada Saaneha Hogaya Hai (Ya'ni Bada Sangeen Haadsa Ho Gaya Hai) (Phir Usne Kaha Ke), Rasoolullaah ﷺ Ne Apni Azwaaj (Beewiyo'n) Ko Talaaq (De Di Hai), (Yeh Sunte Hi) Mai'n Hafsa Radiallaahu Anha Ke Paas Gaya To Woh Ro Rahi Thi, Mai'n Ne Unse Poochha, Kya Rasoolullaah ﷺ Ne Tum Sabko Talaaq De Di Hai? (Woh) Bolee'n Mujhe Ma'loom Nahee'n, Ba'ad Azaa'n Mai'n Rasoolullaah ﷺ Ke Paas Gaya Aur Mai'n Ne Wahee'n Khade Khade Arz Kiya Ke Kya Aapne Apni Azwaaj Ko Talaaq De Di? Nabi e Kareem ﷺ Ne Irshaad Farmaaya Nahee'n, (Nabi e Kareem ﷺ Ka Jawaab Sunte Hi) Mai'n Ne (Zor Se) Kaha Allaahu Akbar. (Yahaa'n Se Masle To Bahot Ma'loom Huwe Lekin Ek Masla Yeh Bhi Ma'loom Huwa Ke Baap Ka Apni Beti Ke Ghar Uske Shauhar Ki Ijaazat Ke Bagair Daakhil Hona Jaa'iz Hai Aur Unke Ghar Ke Gharelu Haalaat Ki Tafteesh Karna Bhi Jaa'iz Hai Kyu'nke Hazrat Umar Radiallahu Anhu Ne Apni Beti Hafsa Ke Ghar Jaakar Aisa Hi Kiya.

Hazrat Abu Mas'ood Radiallaahu Anhu Se Riwaayat Hai Ke Ek Shakhs Ne (Nabi e Kareem ﷺ Ki Baargaah Me'n Haazir Hokar) Arz Kiya, Ya Rasoolallaah ﷺ! Mumkin Hai Ke Mai'n Namaaz Ba Jamaa'at Ada Na Kar Sakoo'n, Kyu'nke Fulaa'n (Imaam) Badi Lambi Namaaz Padhaata Hai, (Hazrat Abu Mas'ood Kehte Hai'n) Mai'n Ne Waa'az Wa Naseehat Me'n Nabi e Kareem ﷺ Ko Uss Din Se Zyaadah Gazabnaak Kabhi Nahee'n Dekha, Nabi e Kareem ﷺ Ne Irshaad Farmaaya, Logo! Tum (Gair Zaroori Sakhti Karke Logo'n Ko) Deen Se Mutanaffir Karte Ho, (Phir Farmaaya Suno) Jo Koi Namaaz Padhaaye Har Rukn (Namaaz Ka) Halka Phulka Ho, Kyu'nke Muqtadiyo'n Me'n Mareez Kamzor Aur Kaam Kaaj Waale Log Bhi Hote Hai'n. (Ma'loom Huwa Imaam Ko Muqtadiyo'n Ki Uktaahat Ka Bhi Khayaal Rakh Kar Namaaz Padhaana Chaahiye).

Hazrat Zaid Bin Khaalid Zohni Radiallaahu Anhu Se Riwaayat Hai Ke Kisi Shakhs Ne Rasoolullaah ﷺ Se Giri Padi Cheez Ka Hukm Poochha, (Ya'ni Ke Giri Padi Cheez Ko Lena Chaahiye Ke Nahee'n Agar Haa'n To Phir Kya Kare'n? To Nabi e Kareem ﷺ Ne Irshaad Farmaaya) Uski Bandish Ko (Ya'ni Jis Dori Se Thaili Baa'ndhi Jaati Hai Usko) Pehchaan Le Ya Farmaaya Uss Thaili (Batwe) Aur Usko Band Karne Ki Cheez Ko Pehchaan Le, (Ya'ni Uss Paane Waali Cheez Ko Khoob Achchhi Tarah Se Pehchaan Le) (Phir) Ek Saal Tak Uska Ae'laan Karo, (Ya'ni Ek Saal Tak Ae'laan Karte Raho, Agar Uss Darmiyaan Koi Maalik Mil Jaaye To Theek Warna) Phir Tum Khud Usse Nafa Haasil Karo, (Phir Agar Ek Saal Ba'ad Bhi) Uska Maalik Mil Jaaye To Usko Woh Cheez Ada Kardo, (Phir) Uss Shakhs Ne Poochha, Gumshudah Oo'nt (Ka Kya Hukm Hai? Ya'ni Gumshudah Oo'nt Mile To Kya Oo'nt Bhi Apne Paas Rakh Le'n?) So Aap Gazabnaak Huwe Hatta Ke Aap ﷺ Ke Dono'n Rukhsaar Surkh Ho Gaye Ya Raawi Ne Kaha Ke Aap ﷺ Ka Chehra e Mubaarak Surkh Ho Gaya, (Phir Nabi e Kareem ﷺ Ne) Irshaad Farmaaya Tumhaara Usse Kya Ta'alluq Hai? Uske Saath Uss (Ke Paani Ka) Mashkeezah Hai Aur Uska Joota Hai, Woh Paani (Ke Chashme) Par Ja Kar Paani Pi Lega Aur Darakhto'n Ko Charta Rahega, (Iss Sabab) Usko Chhod Do, (Ya'ni Oo'nt Gumshudah Hai Tab Bhi Use Mat Pakdo Chhod Do) Hatta Ke Uska Maalik Usko Pa Lega, (Phir) Uss Saa'il Ne Poochha Ke Gumshudah Bakri Ka Kya Hukm Hai? Nabi e Kareem ﷺ Ne Irshaad Farmaaya, Woh Tumhaari Hai Ya Tumhaare Bhaayi Ki Hai Ya Bhediye Ki Hai.

Hazrat Abu Moosa (Ash'ari) Radiallaahu Anhu Farmaate Hai'n Ke Rasoolullaah ﷺ Se Chand (Kuchh) Baate'n Poochhi Gayee'n Jo Mizaaj (Aqdas) Ke Mawaafiq Na Thee'n, Jab Poochhne Par Israar Kiya Gaya (Ya'ni Baar Baar Poochha Gaya) To Nabi e Kareem ﷺ Gazabnaak Huwe, Phir Nabi e Kareem ﷺ Ne Logo'n Se Farmaaya, Tum Mujhse Jo Chaaho Sawaal Karo, Ek Shakhs Ne Poochha, Mera Baap Kaun Hai? Nabi e Kareem ﷺ Ne Irshaad Farmaaya, Tumhaara Baap Huzaafa Hai, Phir Ek Doosre Shakhs Ne Khade Hokar Poochha, Ya Rasoolallaah ﷺ! Mera Baap Kaun Hai? Nabi e Kareem ﷺ Ne Irshaad Farmaaya, Tumhaara Baap Saalim Hai, Shaiba Ka Aazaad Shudah Gulaam, Jab Hazrat Umar Radiallaahu Anhu Ne Dekha Ke Nabi e Kareem ﷺ Ke Chehre Me'n (Gazab Ke) Aasaar Hai'n To Unho'n Ne Kaha, Ya Rasoolallaah ﷺ, Ham Allaah Paak Ki Taraf Tauba Karte Hai'n. (Mere Bhaa'iyo'n, Yaad Rakho Hazrat Umar Radiallaahu Anhu Ne Iss Sabab Tauba Ki Kyu'nke Sawaalaat Aise Kiye Ja Rahe The Jisse Nabi e Kareem ﷺ Gazabnaak Ho Rahe The To Aapne Tauba Karli, Iss Hadees Shareef Se Saabit Huwa Ke Nabi e Kareem ﷺ Ko Allaah Paak Ne Gaib Ka Ilm Ata Kiya Hai Kyu'nke Nabi e Kareem ﷺ Ne Irshaad Farmaaya Tum Mujhse Jo Sawaal Karoge Mai'n Jawaab Doo'nga, Aur Phir Dekhe'n Ke Kaun Kiska Baap Hai Uska Naam Kya Hai Nabi e Kareem ﷺ Ko Ilm Hai Tabhi To Bataaya Fulaa'n Tumhaara Baap Aur Fulaa'n Tumhaara Baap Saath Yeh Bhi Bataaya Ke Woh Gulaam Tha Phir Aazaad Huwa).

Hazrat Anas Bin Maalik Radiallaahu Anhu Farmaate Hai'n Ke Rasoolullaah ﷺ Baahar Nikle To Hazrat Abdullaah Bin Huzaafa Khade Ho Gaye, (Aur Unho'n Ne) Sawaal Kiya, Mera Baap Kaun Hai? Nabi e Kareem ﷺ Ne Irshaad Farmaaya, Tumhaara Baap Huzaafa Hai, Phir Nabi e Kareem ﷺ Ne Bahot Martaba Farmaaya, Mujhse Sawaal Karo To Hazrat Umar Radiallaahu Anhu Apne Ghutno'n Par Baith Gaye, Phir Arz Ki (Ya Rasoolallaah ﷺ) Ham Allaah Ko Rab Maan Kar Raazi Hai'n, Islaam Ko Deen Maan Kar Raazi Hai'n, Aur Sayyaduna (Muhammad ﷺ) Ko Nabi Maan Kar Raazi Hai'n, Uske Ba'ad Nabi e Kareem ﷺ Khaamosh Ho Gaye. (Yaad Rakho Mere Bhaa'iyo'n Abdullah Bin Huzaafa Radiallahu Anhu Ne Apne Nasab Ya'ni Baap Ke Mutaa'lliq Iss Wajah Se Sawaal Kiya Tha Ke Jab Unka Kisi Se Jhagda Hota Tha To Log Unhe'n Kisi Aur Ki Taraf Mansoob Karte The Ke Tu Fulaa'n Ka Beta Nahee'n Balke Fulaa'n Ka Hai To Unho'n Ne Nabi e Kareem ﷺ Se Yeh Sawaal Kiya Kyu'nke Woh Sahaabi The Unko Ma'loom Tha Ke Allah Ta'ala Ne Aapko Gaib Ka Bhi Ilm Diya Hai Unko Ma'loom Tha Ke Mera Durust Nasab Kya Hai Mera Baap Kaun Hai Aap Ko Ma'loom Hai Tabhi Sawaal Kiya Aur Nabi e Kareem ﷺ Ne Jawaab Ata Farmaaya Phir Koi Shak Baaqi Na Raha).

Hazrat Anas Radiallaahu Anhu Farmaate Hai'n Ke Rasoolullaah ﷺ (Ki Aa'dat e Shareefa Thi Ke Aap) Jab Salaam Karte To 3 Baar Salaam Karte Aur Jab Baat Karte To Kisi (Ahem) Baat Ko 3 Baar Dohraate.

Hazrat Anas Radiallaahu Anhu Farmaate Hai'n Ke Rasoolullaah ﷺ (Ki Aa'dat e Shareefa Thi Ke) Jab Aap Baat Karte To Kisi (Ahem) Baat 3 Baar Dohraate Taake Use Samajh Liya Jaaye Aur Unhe'n Salaam Karte To 3 Baar Salaam Karte.

Hazrat Abdullaah Bin Amro Farmaate Hai'n Ke Hamne Ek Safar Kiya (Nabi e Kareem ﷺ Ke Saath Lekin) Nabi e Kareem ﷺ Ke Iss Safar Me'n Peechhe Reh Gaye The, Phir Nabi e Kareem ﷺ (Kuchh Der Ba'ad) Hamse Mil Gaye, Uss Waqt Namaaz Hamse Mo'akhkhar Ho Gayi Thi (Ya'ni Namaaz Me'n Taakheer Ho Gayi Thi) Aur Ham Wazu Kar Rahe The, Ham Apne Pairo'n Par Masah Karne Lage To Nabi e Kareem ﷺ Ne Buland Aawaaz Se 2 Ya 3 Martaba Irshaad Farmaaya (Be Dhuli) Aediyo'n Keliye Aag Ka Azaab Hai. (Mere Bhaaiyo'n Yaad Rakho Iss Hadees Se Ma'loom Huwa Ke Wazu Me'n Pairo'n Ka Dhona Farz Hai Kyu'nke Agar Pairo'n Ka Masah Kar Lena Kaafi Hota To Nabi e Kareem ﷺ Sahaaba e Kiraam Ko Pairo'n Ka Masah Karne Ki Wajah Se Tokte Nahee'n Aur Azaab e Dozakh Ki Wa'eed Nahee'n Sunaate, Yahaa'n Ek Baat Yeh Bhi Ma'loom Huwi Ke Azaab Sirf Rooh Ko Nahee'n Jism Ko Bhi Hota Hai Tabhi To Nabi e Kareem ﷺ Ne Irshaad Farmaaya Ke Be Dhuli Aediyo'n Keliye Aag Ka Azaab Hai, Aur Yehi Hum Ahle Sunnat Wa Jama'at Ka Aqeedah Hai Ke Azaab Jism Wa Rooh Dono'n Ko Hota Hai, Teesri Baat Yeh Ma'loom Huwi Ke Jab Kisi Aa'lim Ke Saamne Koi Galat Baat Ya Galat Kaam Kare To Uss Aa'lim Ko Chaahiye Ke Buland Aawaaz Se Man'a Kare Roke, Yeh Sunnat e Nabawi Hai Magar Aaj Ka Maahol To Ajeeb Ho Gaya Hai Ke Bade Bade Aa'lim Ke Saamne Bhi Koi Muqarrir Galat Baat Karde To Rokte Nahee'n Tokte Nahee'n Aur Agar Kisi Ne Rok Diya Ya Tok Diya To Ulta Usi Par Baras Jaate Hai'n).

Hazrat Abu Burdah Apne Waalid Se Riwaayat Karte Hai'n Ke Nabi e Kareem ﷺ Ne Irshaad Farmaaya, 3 (Qism) Ke Logo'n Keliye 2 Ajar Hai (Ya'ni Dabal Sawaab Hai), (1) Woh Ahle Kitaab Jo Apne Nabi Par Imaan Laaya Aur Sayyaduna Muhammad ﷺ Par Imaan Laaya (2) Woh Mamlook Gulaam (Ya'ni Aisa Gulaam Jinke Kayi Maalik Ho'n) Jisne Apne Allaah Ka Haq Ada Kiya (Ya'ni Gulaam Hote Huwe Bhi Allaah Ki Ibaadat Ki Uske Ahkaamaat Ki Paabandi Ki) Aur (Saath Me'n) Apne Maaliko'n Ka Haq Bhi Ada Kiya (3) Aur Woh Shakhs Jiske Paas Ek Baa'ndi Thi Usne Uss Baa'ndi Ko Adab Sikhaaya To Achchha Adab Sikhaaya Aur Usko Ta'leem Di To Achchhi Ta'leem Di Phir Usko Aazaad Kar Diya Phir Usse Nikaah Karliya To Usko 2 Ajar Mile'nge. (Aage Imaam Bukhaari Likhte Hai'n Ke Aur Phir Aa'mir Ne Kaha Hamne Tumko Yeh Hadees Bagair Kisi Mu'aaweza Ke Sunaayi Hai Beshak Iss Kam Ibaarat Ki Hadees Ke Sunne Keliye Madeene Ka Safar Kiya Jaata Hai).

Hazrat Ata Ne Kaha, Mai'n Ne Hazrat Ibne Abbaas Radiallaahu Anhuma Se Suna, Unho'n Ne Kaha, Mai'n Rasoolullaah ﷺ Ke Muta'alliq Shahaadat Deta Hoo'n, Ya Ata Ne Kaha, Mai'n Hazrat Ibne Abbaas Radiallaahu Anhuma Ke Muta'alliq Shahaadat Deta Hoo'n (Ke Unho'n Ne Kaha Ke) Rasoolullaah ﷺ Baahar Tashreef Laaye Aur Aapke Saath Hazrat Bilaal Radiallaahu Anhu The, Nabi e Kareem ﷺ Ne Gumaan Kiya Ke Aapne Aurato'n Ko Wa'az Nahee'n Sunaaya Hai, To Nabi e Kareem ﷺ Ne Aurato'n Ko Wa'az Kiya Aur Aurato'n Ko Sadqa Karne Ka Hukm Diya, Phir Aurate'n Apne Kaano'n Ki Baaliyaa'n Aur Angoothi (Hazrat Bilaal Ki Jholi Me'n) Daalti Aur Hazrat Bilaal Radiallaahu Anhu Kapde Ki Ek Taraf Ko Pakde Huwe The. (Mere Bhaa'iyo'n Gaur Karo Ke Jab Aurto'n Ko Sadqa Karne Ka Hukm Mila Jabke Yeh Sadqa e Naafila Ka Hukm Tha Tab Bhi Aurto'n Ne Baaliyaa'n Aur Angoothiyaa'n Tak Sadqa Kardi Lekin Aaj Humaare Maal Daar Mard Bhi Sadqa e Naafila To Door Ki Baat Zakaat Tak Durust Ada Nahee'n Karte Allah Hum Sabko Sadqa Karne Ki Taufeeq Ata Farmaaye, Ek Baat Aur Sadqa Jam'a Kaun Kar Rahe The Aurto'n Ke Saamne Jholi Lekar Kaun Ghoom Rahe The Woh Hazrat Bilaal The Ma'loom Huwa Nek Kaamo'n Keliye Chandah Jam'a Karna Bhi Durust Aur Jholi Ghumaana Bhi Durust).

Hazrat Abu Hurairah Radiallaahu Anhu Bayaan Karte Hai'n Ke (Unho'n Ne Nabi e Kareem ﷺ Se Arz Kiya Ke) Ya Rasoolallaah ﷺ! Yeh Kaha Gaya Hai Ke Qayaamat Ke Din Aapki Shafaa'at Ke Husool Me'n Kaun Zyaadah Kaamiyaab Hoga? (Ya'ni Qayaamat Ke Din Aapki Jo Shafaa'at Milegi To Aapki Shafaa'at Ka Sabse Zyaadah Haqdaar Kaun Hoga?) Rasoolullaah ﷺ Ne Irshaad Farmaaya, Aye Abu Hurairah ! Beshak Mera Yeh Gumaan Tha Ke Iss Hadees Ke Upar Tumhaari Hirs Mujhe Ma'loom Hai, (Ya'ni Aye Abu Hurairah Mujhe Ma'loom Tha Ke Tum Hi Sabse Pehle Iss Hadees Ke Baare Me'n Sawaal Karoge To Suno) Qayaamat Ke Din Meri Shafaa'at Ke Husool Me'n Sabse Zyaadah Woh Shakhs Kaamiyaab Hoga, Jisne Khuloos e Qalb Ya Ikhlaas e Nafs Ke Saath "La Ilaaha Illallaah" Padha.

Hazrat Abdullaah Bin Amro Bin Aa's Radiallaahu Anhu Bayaan Karte Hai'n Ke Mai'n Ne Nabi e Kareem ﷺ Ko Irshaad Farmaate Huwe Suna, (Nabi e Kareem ﷺ Ne Irshaad Farmaaya) Beshak Allaah Paak Ilm Ko (Iss Tarah) Nahee'n Uthaayega Ke Ilm Ko Bando'n (Ke Seeno'n) Se Nikaal Le, Lekin (Haa'n Allaah Paak Ilm Ko Iss Tarah Uthaayega Ke) Ulama Ke Uthaane Se Ilm Ko Utha Lega, Hatta Ke Jab Woh Kisi Aa'lim Ko Baaqi Nahee'n Rakhega (Ya'ni Ulama Ka Inteqaal Hota Jaayega Ilm Uthta Jaayega Phir Ek Daur Aisa Bhi Aayega Ke) Log Jaahilo'n Ko Apna Sardaar (Mufti) Bana Le'nge Aur Phir Un Jaahil Sardaaro'n Se (Deeni) Sawaalaat Kiye Jaaye'nge To Jaahil Sardaar Bagair Ilm Ke Fatwa De'nge, Pas Khud Bhi Gumraah Ho'nge Aur Logo'n Ko Bhi Gumraah Kare'nge. Imaam Bukhaari Aage Farmaate Hai'n Ke Farbari Ne Kaha Hame'n Abbaas Ne Hadees Bayaan Ki, Unho'n Ne Kaha Hame'n Qutaiba Ne Hadees Bayaan Ki, Unho'n Ne Kaha Ke Hame'n Jareer Ne Hadees Bayaan Ki, Woh Riwaayat Karte Hai'n Hishaam Se Iss Hadees Ki Misl, Ya'ni Yeh Mazkoorah Hadees Doosri Sanad Se Bhi Waarid Hai.

Hazrat Abu Sa'eed Khudri Radiallaahu Anhu Bayaan Karte Hai'n Ke Aurato'n Ne Nabi e Kareem ﷺ Se Arz Ki (Bataur e Shikaayat) Ke Aapke Upar Mard Gaalib Ho Gaye Hai'n, (Ya'ni Mard Hazraat Hi Hafta Ke Tamaam Dino'n Me'n Aapke Saath Rehte Hai'n Aur Wohi Log Aapse Ilm Ki Baate'n Karte Hai'n Aur Deeni Masaa'il Seekhte Hai'n To) Aap Apni Taraf Se Ek Din Hamaare Liye Muqarrar Kare'n (Taake Ham Bhi Aapse Deeni Masaa'il Seekh Sake'n) Aapne Unse Ek Din Ka Wa'dah Farma Liya Aur Uss Din Aapne Unse Mulaaqaat Ki Aur Unko Naseehat Ki Aur Unko (Kuchh Aa'maal Ka) Hukm Irshaad Farmaaya Aur Aapne Unse Jo Kuchh Irshaad Farmaaya Usme'n Yeh Irshaad Bhi Tha Ke, Tum Me'n Se Jo Bhi Aurat Apne Teen Bachcho'n Ko Pehle Bhej Degi (Ya'ni Jis Aurat Ke 3 Bachche Maa'n Se Pehle Inteqaal Kar Jaaye'nge) Woh Uske Liye (Ya'ni Maa'n Baap Keliye) Dozakh Ki Aag Se Hijaab Ho Jaaye'nge (Utne Me'n) Ek Khaatoon Ne Kaha Aur Do? (Ya'ni Jis Aurat Ke 2 Bachche Pehle Inteqaal Kar Jaaye To Uske Maa'n Baap Keliye Kya Hai? To) Aapne Farmaaya Aur 2 Bhi (Ya'ni Jiske 2 Bachche Pehle Inteqaal Kar Jaaye To Woh Bhi Apne Waalidain Keliye Dozakh Ki Aag Se Hijaab Ban Jaaye'nge).

Hazrat Sa'eed Radiallaahu Anhu Ne Nabi e Kareem ﷺ Se Yehi Hadees Riwaayat Ki (Ya'ni Hadees No.101 Jo Guzri Ma'loom Huwa Yeh Hadees Doosri Sanad Se Bhi Marwi Hai), Imaam Bukhaari Aage Kehte Hai'n Ke Aur Riwaayat Hai Abdur Rehmaan Bin Asbahaani Se, Unho'n Ne Kaha, Mai'n Ne Abu Haazim Se Suna, Woh Riwaayat Karte Hai'n Hazrat Abu Hurairah Radiallaahu Anhu Se, Unho'n Ne Kaha, Teen Aise Bachche Jo Baloogat Ko Nahee'n Paho'nche Ho'n (Ya'ni Bachche Se Muraad Woh Chhote Bachche Hai'n Jo Baalig Na Huwe Ho To Aise Bachche Apne Waalidain Keliye Jannat Me'n Jaane Aur Dozakh Se Bachne Ka Zariya Ban Jaaye'nengge).

Ibne Mulaika Bayaan Karte Hai'n Ke Hazrat Aa'yesha Radiallaahu Anha Nabi e Kareem ﷺ Ki Zauja, Jab Kisi Baat Ko Suntee'n Jo Unko Samajh Na Aati To Woh Usme'n Ruju Karti, Hatta Ke Usko Samajh Letee'n Aur Nabi e Kareem ﷺ Ne Irshaad Farmaaya, Jis Shakhs Se Hisaab Liya Gaya, Usko Azaab Diya Gaya, Hazrat Aa'yesha Radiallaahu Anha Farmaati Hai'n, Mai'n Ne Arz Kiya, Kya Allaah Paak Ne Qur'aan Me'n Yeh Nahee'n Farmaaya, Ke Pas Anqareeb Aasaan Hisaab Liya Jaayega, Sureh Inshiqaaq Aayat No.8. Hazrat Aa'yesha Radiallaahu Anha Bayaan Karti Hai'n Ke Aap ﷺ Ne Irshaad Farmaaya, Yeh To Sirf Hisaab Ko Pesh Karna Hai, Lekin Jisse Hisaab Me'n Jarah Ki Gayi, Woh Halaak Ho Jaaye. (Yaad Rakho Iss Hadees Me'n Jo Hai Ke Jiska Hisaab Liya Gaya Usko Azaab Diya Gaya, Iska Matlab 2 Ho Sakta Hai Ek To Yeh Ke Jis Din Insaan Ke Saamne Uske Gunaah Pesh Kiye Jaaye'nge Aur Usko Uske Kiye Huwe Kaamo'n Par Muttal'e Kiya Jaayega Yeh Uske Liye Sakht Azaab Aur Mazammat Ka Baa'is Hoga, Aur Doosra Matlab Yeh Ho Sakta Hai Ke Uska Hisaab Lena Uske Azaab Ke Istehqaaq Ki Taraf Paho'nchaata Hai Kyu'nke Bandah Jo Bhi Neki Karta Hai Woh Allah Ke Fazl Se Aur Uski Taufeeq Se Karta Hai Aur Neki Par Uske Hidaayat Dene Aur Qudrat Dene Se Karta Hai Aur Bande Ke Aise Aa'maal Bahot Kam Hai Jo Ikhlaas Se Allah Ta'ala Keliye Kiye Ho'n).

Sa'eed Ne Riwaayat Ki Shareeh Se Ke Unho'n Ne Amro Bin Sa'eed Se Uss Waqt Kaha, Jab Woh Makkah Ki Taraf Lashkar Bhej Raha Tha, (Hamle Keliye To Kaha) Aye Ameer! Mai'n Aapse Ek Hadees Bayaan Karta Hoo'n, Jisko Kal Nabi e Kareem ﷺ Ne Fateh Makkah Ke Din Khade Hokar Irshaad Farmaaya Tha, Uss Hadees Ko Mere Dono'n Kaano'n Ne Suna, Aur Mere Dil Ne Usko Yaad Rakha, Aur Jis Waqt Nabi e Kareem ﷺ Ne Woh Hadees Irshaad Farmaayi, Meri Dono'n Aa'nkho'n Ne Nabi e Kareem ﷺ Ko Dekha, Nabi e Kareem ﷺ Ne Allaah Paak Ki Hamd Wa Sana Bayaan Ki, Phir Irshaad Farmaaya, Beshak Makka Ko Allaah Paak Ne Haram Qaraar Diya Hai, Usko Logo'n Ne Haram Qaraar Nahee'n Diya, Pas Jo Shakhs Bhi Allaah Par Aur Yaum e Aakherat Par Imaan Laaya Ho, Uske Liye Makka Me'n Khoon Bahaana Jaa'iz Nahee'n, Aur Na Makka Ke Darakht Ko Kaatna Jaa'iz Hai, Pas Agar Koi Shakhs Makka Me'n Rasoolullaah ﷺ Ke Qitaal Karne Se Qitaal Ki Rukhsat Par Istedlaal Kare To Usse Kaho, Beshak Allaah Paak Ne Apne Rasool Ko Ijaazat Di Thi, Aur Tumhe'n Ijaazat Nahee'n Di Hai, Aur Mujhe Sirf Din Ki Ek Saa'at Me'n Ijaazat Di Thi, Aaj Uski Hurmat Phir Laut Aayi, Jaisa Ke Kal Uski Hurmat Thi, Aur Shaahid (Haazir) Ko Chaahiye Ke Gaa'ib Ko Yeh (Hadees) Paho'nchaade. Aage Imaam Bukhaari Likhte Hai'n Ke, Phir Abu Shuraih Se Poochha Gaya Ke (Uske Jawaab Me'n) Amro Bin Sa'eed Ne Kya Kaha? Usne Kaha Aye Abu Shuraih, Mai'n Iss Masle Ko Tumse Zyaadah Jaanta Hoo'n, Beshak Makka Kisi Na Farmaan Ko Panaah Nahee'n Deta Aur Na Qatl Karke Bhaagne Waale Ko Aur Na Kisi Ki Chori Karke Bhaagne Waale Ko.

Hazrat Abi Bakrah Radiallaahu Anhu Bayaan Karte Hai'n Ke Zikr Kiya Gaya Ke Nabi e Kareem ﷺ Ne Irshaad Farmaaya, Tumhaari Jaane'n Aur Tumhaare Amwaal (Raawi) Muhammad Ne Kaha Mera Gumaan Hai Ke Nabi e Kareem ﷺ Ne Irshaad Farmaaya Aur Tumhaari Izzate'n Tum Par (Iss Tarah) Haraam Hai Jis Tarah Aaj Ke Din Tumhaare Iss Shaher (Makka) Me'n Haraam Hai, Suno! Tum Me'n Se Shaahid (Haazir) Ko Chaahiye Ke Gaa'ib Ko (Yeh Hadees) Paho'ncha De Aur Raawi (Muhammad) Yeh Kehte The, Rasoolullaah ﷺ Ne Sach Farmaaya, Aapne Dobaarah Farmaaya Tha, Suno! Kya Mai'n Ne Tableeg Kardi Hai.

Rib'ee Bin Hiraash Kehte Hai'n Ke Mai'n Ne Hazrat Ali Radiallaahu Anhu Ko Yeh Kehte Huwe Suna Hai Ke Nabi e Kareem ﷺ Ne Irshaad Farmaaya, Mujh Par Jhoot Na Baa'ndho Kyu'n Ke Jisne Mujh Par Jhoot Baa'ndha Use Dozakh Me'n Daakhil Hona Chaahiye.

Hazrat Aa'mir Bin Abdullaah Bin Zubair Apne Waalid Se Riwaayat Karte Hai'n Ke Unho'n Ne Kaha, Mai'n Ne Hazrat Zubair Radiallaahu Anhu Se Kaha, Mai'n Aapse Rasoolullaah ﷺ Ki Iss Qadar Hadeese'n Nahee'n Sunta Jis Tarah Fulaa'n Fulaa'n Hadees Bayaan Karte Hai'n, Unho'n Ne Kaha, Baher Haal Mai'n Nabi e Kareem ﷺ Se Kabhi Alaahedah (Alag) Nahee'n Huwa, Lekin Mai'n Ne Nabi e Kareem ﷺ Ko Yeh Farmaate Huwe Suna Hai Ke, Jis Shakhs Ne Mujh Par Jhoot Baa'ndha Woh Dozakh Ki Aag Me'n Apne Baithne Ki Jagah Banaale.

Hazrat Anas Radiallaahu Anhu Farmaate Hai'n Ke Mujhe Tumko Ba Kasrat Hadeese'n Bayaan Karne Se Zaroor Yeh Cheez Mana Karti Hai Ke Beshak Nabi e Kareem ﷺ Ne Irshaad Farmaaya, Jisne Mujh Par Amadan Jhoot Baa'ndha, Woh Dozakh Ki Aag Me'n Apne Baithne Ki Jagah Banaale.

Hazrat Salma Bayaan Karte Hai'n Ke Mai'n Ne Nabi e Kareem ﷺ Ko Yeh Irshaad Farmaate Huwe Suna Ke, Jisne Meri Taraf Uss Baat Ki Nisbat Ki Jisko Mai'n Ne Nahee'n Kaha, Woh Apne Baithne Ki Jagah Dozakh Ki Aag Me'n Banaale.

Hazrat Abu Hurairah Radiallaahu Anhu Bayaan Karte Hai'n Ke Nabi e Kareem ﷺ Ne Irshaad Farmaaya, Ke Mera Naam Rakho Aur Meri Kunniyat Na Rakho, Aur Jisne Mujhe Khwaab Me'n Dekha Usne Beshak Mujhe Hi Dekha Hai, Kyu'nke Shaitaan Meri Soorat Ki Misl Nahee'n Bana Sakta, Aur Jisne Mujh Par Amadan Jhoot Baa'ndha Woh Apne Baithne Ki Jagah Dozakh Ki Aag Me'n Banaale.

Hazrat Abi Juhaifa Kehte Hai'n Ke Mai'n Ne Hazrat Ali Radiallaahu Anhu Se Poochha, Kya Aapke Paas Kuchh Likha Huwa Hai? Unho'n Ne Kaha, Sirf Kitaabullaah Ya Woh Fahem Hai Jo Har Musalmaan Ko Di Gayi Hai Ya Jo Kuchh Uss Saheefe Me'n Likha Huwa Hai, Mai'n Ne Poochha, Uss Saheefe Me'n Kya Likha Huwa Hai? Unho'n Ne Kaha Ke Diyat Ke Ahkaam (Likhe Huwe Hai'n) Aur Qaidiyo'n Ko Chhudaane Ki Aur Yeh Ke Musalmaan Ko Kaafir (Harbi) Ke Badle Me'n Qatl Nahee'n Kiya Jaayega.

Hazrat Abu Hurairah Radiallaahu Anhu Se Riwaayat Hai Ke, Fateh Makkah Ke Saal Khuzaa'ah Ne Apne Ek Maqtool Ke Badle Me'n Jisko Banu Lais Ne Qatl Kiya Tha, Unke Ek Shakhs Ko Qatl Kar Diya, Pas Nabi e Kareem ﷺ Ko Iski Khabar Di Gayi, Aap ﷺ Apni Sawaari Par Sawaar Huwe, Phir Nabi e Kareem ﷺ Ne Khutba Diya, Aap Ne Irshaad Farmaaya, Beshak Allaah Paak Ne Makka Se Qatl Ko, Ya (Nabi e Kareem ﷺ Ne) Farmaaya, Feel (Haathi) Ko Rok Diya Hai, Isme'n Abu Abdullaah (Imaam Bukhaari) Ko Shak Hai, Aur Unpar Rasoolullaah ﷺ Aur Momineen Ko Musallat Kar Diya Hai, (Ya'ni Makka Me'n To) Suno ! Beshak Makka (Me'n Qatl Karna) Mujhse Pehle Kisi Keliye Halaal Na Tha Aur Na Mere Ba'ad Kisi Keliye Halaal Hoga, (Phir Farmaaya) Suno! Beshak Yeh Mere Liye Din Ki Ek Saa'at Me'n Halaal Kiya Gaya Tha, Aur Beshak Woh Iss Saa'at Me'n Haraam Hai, Iske (Ya'ni Shaher e Makka Ke) Kaa'nte Nahee'n Kaate Jaaye'nge Na Iske Darakht Kaate Jaaye'nge Aur Na Iski Giri Huwi Koi Cheez Uthaayi Jaayegi, (Haa'n) Ae'laan Karne Waale (Shakhs) Ke Siwa Aur Kisi Keliye Uthaana Jaa'iz Nahee'n, Pas Jis Shakhs Ka Koi Maqtool Qatl Kiya Gaya Hai Usko 2 Cheezo'n Me'n Se Ek Ka Ikhtiyaar Hai, Ya To Usko Diyat Di Jaaye (Qatl Ke Badle Mu'aaweza Diya Jaaye) Ya Maqtool Ke Ahle Khaana Qisaas Le'n, (Ya Badla Le'n), (Utne Me'n) Phir Ahle Yaman Se Ek Shakhs Aaya Aur Usne Kaha, Ya Rasoolullaah ﷺ! Yeh Mere Liye Likh De'n, (Ya'ni Yeh Hukm Jo Abhi Aapne Irshaad Farmaaya Woh Likh De'n) Aapne Farmaaya, Yeh Abu Fulaa'n Keliye Likh Do, Phir Quraish Ke Ek Shakhs Ne Kaha, Ya Rasoolallaah ﷺ! Ma Siwa Izkhir (Ghaas) Ke, Kyu'nke Ham Usko Apne Gharo'n Aur Apni Qabro'n Me'n Rakhte Hai'n To Nabi e Kareem ﷺ Ne Irshaad Farmaaya, Ma Siwa Izkhir Ke. Aage Imaam Bukhaari Ne Kaha Ke Yaqaad, Qaaf Ke Saath Padha Jaata Hai, Phir Abu Abdullaah Se Poochha Gaya, Kya Cheez Likhi Gayi Thi, Unho'n Ne Kaha, Yeh Khutba Likha Gaya Tha. (Iss Hadees Me'n Jo Aaya Hai Ke Ma Siwa Izkhir Ke To Izkhir Yeh Ek Khushbudaar Ghaas Ka Naam Hai, Ma'loom Huwa Sahaaba e Kiraam Radiallahu Anhum Ajma'een Bhi Qabro'n Me'n Khushbudaar Ghaas Rakha Karte The To Aaj Agar Koi Qabro'n Me'n Khushbudaar Phool Rakhe To Logo'n Ko Takleef Kyu'n Hoti Hai Samajh Nahee'n Aata, Jabke Doosri Riwaayat Se Yeh Bhi Saabit Hai Ke Nabi e Kareem ﷺ Ne Bhi 2 Qabro'n Me'n Khajoor Ki Tar Tehni Rakhi Taake Azaab Halka Ho To Agar Koi Aa'm Qabr Hai To Unke Azaab Me'n Kami Hogi Unki Tasbeehaat Se Aur Agar Khaas Insaan Ki Qabar Hai To Unki Tasbeehaat Se Uns Bhi Milega Aur Darajaat Me'n Bulandi Bhi Hogi. Insha Allah)

Hazrat Abu Hurairah Radiallaahu Anhu Farmaate Hai'n Ke Rasoolullaah ﷺ Ke Ashaab Me'n Se Kisi Ko Mujhse Zyaadah Ahaadees Yaad Nahee'n Thee'n Siwaaye Hazrat Abdullaah Bin Amro Radiallaahu Anhu Ke, Kyu'nke Woh Likhte The Aur Mai'n Nahee'n Likhta Tha, Imaam Bukhaari Kehte Hai'n, Wahab Bin Munabbeh Ki Mo'mar Ne Mutaabe'at Ki Hai Az Humaam Az Hazrat Abu Hurairah Radiallaahu Anhu.

Hazrat Ibne Abbaas Radiallaahu Anhuma Kehte Hai'n Ke Jab Nabi e Kareem ﷺ Ka Dard Bahot Zyaadah Ho Gaya To Nabi e Kareem ﷺ Ne Irshaad Farmaaya, Mere Paas Kitaab (Kaagaz) Laao (Taake) Mai'n Tumhaare Liye Ek Aisa Maktoob (Wasiyyat Naama) Likh Du Jiske Ba'ad Tum Gumraah Nahee'n Ho'nge, Hazrat Umar Radiallaahu Anhu Ne Kaha, Beshak Nabi e Kareem ﷺ Par Dard Ka Galba Hai, Aur Hamaare Paas Kitaabullaah Hai Jo Hame'n Kaafi Hai, Phir Sahaaba e Kiraam Me'n Aapas Me'n Ikhtelaaf Huwa Aur Kaafi Shor Ho Gaya, (Tab Nabi e Kareem ﷺ Ne) Irshaad Farmaaya, Mere Paas Se Uth Jaao, Mere Paas Ikhtelaaf Nahee'n Karna Chaahiye, Phir Hazrat Ibne Abbaas Radiallaahu Anhuma Yeh Kehte Huwe Baahar Aaye, Beshak Sabse Badi Museebat Woh Thi Jo Rasoolullaah ﷺ Aur Aapke Likhne Ke Darmiyaan Haa'il Ho Gayi Thi.

Hazrat Umme Salma Radiallaahu Anha Bayaan Karti Hai'n Ke Ek Raat Nabi e Kareem ﷺ Bedaar Huwe To Aapne Farmaaya, Sub'haan Allaah! (Phir Farmaaya) Aaj Raat Kya Kya Fitne Naazil Kiye Gaye Hai'n? Aur Kya Kya Khazaane Khole Gaye Hai'n, (Phir Nabi e Kareem ﷺ Ne Irshaad Farmaaya) Hujro'n Waaliyo'n Ko Bedaar Karo, Bahot Si Aurate'n Jo Duniya Me'n Malboos Hoti Hai'n, Aakherat Me'n Barhana Hogi. (Yahaa'n Yaad Rakhe'n Ke Nabi e Kareem ﷺ Ne Jo Irshaad Farmaaya Ke Aaj Raat Kya Kya Fitne Naazil Huwe Aur Kya Kya Khazaane Khole Gaye Uska Ma'ni Yeh Hai Ke Rasoolullaah ﷺ Ne Uss Raat Khwaab Dekha Tha, Aur Usme'n Aapne Woh Fitne Dekhe Jo Aapke Ba'ad Waaqe Ho'nge, Aur Aapne Woh Khazaane Dekhe Jo Aapki Ummat Keliye Khole Jaaye'nge Aur Khwaab Se Bedaar Hone Ke Ba'ad Uski Haqeeqat Aap Par Munkashif Huwi, Aapke Ba'ad Jo Fitne Huwe Woh Mash'hoor Hai'n, Jaise Qatl e Hazrat Usmaan Gani Radiallaahu Anhu, Ja'nge Jamal, Ja'nge Siffain, Ja'nge Naherwaan, Hazrat Ali Wa Hazrat Imaam Hasan Wa Husain Radiallaahu Anhum Ajma'een Ki Shahaadat Wagairah Wagairah, Saath Iss Hadees Me'n Jo Hai Ke Hujro'n Waaliyo'n Ko Bedaar Karo, Isse Muraad Nabi e Kareem ﷺ Ki Azwaaj Hai'n, Aur Yeh Jo Farmaaya Ke Duniya Me'n Malboos Hogi Aur Aakherat Me'n Barhana Matlab Yeh Ke Jo Dikhaawe Ke Aa'maal Kare'nge Woh Aakherat Me'n Be Amal Ho'nge.)

Hazrat Abdullaah Bin Umar Radiallaahu Anhuma Ne Bayaan Kiya Ke Nabi e Kareem ﷺ Ne Apni Aakhri Hayaat Me'n Hame'n Isha Ki Namaaz Padhaayi, Pas Jab Aapne Salaam Phera To Aapne Khade Hokar Farmaaya, Mujhe Bataao Yeh Kaunsi Raat Hai? Kyu'nke Theek Iske 100 Saal Ba'ad Jo Log Ab Ruwe Zameen Par Hai'n Unme'n Koi Baaqi Nahee'n Rahega. (Yaad Rahe Yahaa'n Muraad Nabi e Kareem ﷺ Ki Yeh Hai Ke Aapki Ummat Me'n Se Jo Bhi Uss Waqt Nabi e Kareem ﷺ Ke Zamaana e Hayaat Me'n The Woh Muraad Hai'n, Aur Aap Iske Zari'ye Yeh Paigaam Dena Chaahte The Ke Tumhaari Umar Taweel Nahee'n Qaleel Hai Iss Sabab Jitna Ho Sake Zyaadah Se Zyaadah Ibaadaat Karo, Iss Hadees Shareef Se Nabi e Kareem ﷺ Ka Ilm e Gaib e Ataayi Bhi Saabit Huwa Ke Mustaqbil Ka Ilm Bhi Rasoolullah ﷺ Ko Allah Ta'ala Ne Ata Farmaaya Hai)

Hazrat Ibne Abbaas Radiallaahu Anhuma Kehte Hai'n Ke Mai'n Ek Raat Apni Khaala Ke Paas Raha Jinka Naam Hazrat Maimoona Binte Haaris Radiallaahu Anha Hai, Jo Nabi e Kareem ﷺ Ki Zauja e Mohtarma Hai'n, Aur Uss Raat Nabi e Kareem ﷺ Unke Paas Tashreef Farma The, Nabi e Kareem ﷺ Ne Isha Ki Namaaz Padhi, Phir Aap Apne Ghar Aa Gaye (Ya'ni Hazrat Maimoona Radiallaahu Anha Ke Paas), Phir (Ghar Tashreef La Kar) Aapne 4 Rak'at Namaaz Padhi, Phir Aap So Gaye, Phir (Raat Me'n Uthe Aur) Aap Khade Ho Gaye, Phir Aapne Farmaaya Chhota Ladka So Gaya? (Ya'ni Ibne Abbaas Uss Waqt Na Baalig The) Ya Koi Aur Kalma Iske Mushaaba Farmaaya, Phir Aap (Namaaz Keliye) Khade Ho Gaye So Mai'n Aapki Baaye'n Jaanib Khada Ho Gaya, Pas Aapne Mujhe Daaye'n Jaanib Kar Diya, Aapne 5 Rak'at Namaaz Padhi, Phir 2 Rak'at Namaaz Padhi, Phir Aap So Gaye Hatta Ke Mai'n Ne Aapke Kharraate Lene Ki Aawaaz Suni, Phir Aap Namaaz Keliye (Subah Me'n) Baahar Tashreef Laaye.

Hazrat Abu Hurairah Radiallaahu Anhu Kehte Hai'n Ke Log Kehte Hai'n Ke Abu Hurairah Bahot Ahaadees Bayaan Karte Hai'n Aur (Iske Jawaab Me'n Hazrat Abu Hurairah Radiallaahu Anhu Kehte Hai'n Ke) Agar Kitaabullaah Me'n Yeh 2 Aayate'n Na Hotee'n To Mai'n Koi Hadees Bayaan Na Karta, Phir Unho'n Ne Un Dono'n Aayato'n Ki Tilaawat Farmaayi, Tarjuma 1 - Beshak Jo Log Hamaari Naazil Ki Huwi Daleelo'n Aur Hidaayat Ko Uske Ba'ad Chhupaate Hai'n Jabke Ham Ne Unko Logo'n Keliye Kitaab Me'n Bayaan Kar Diya Hai, Un Logo'n Par Allaah La'nat Karta Hai Aur La'nat Karne Waale La'nat Karte Hai'n, Tarjuma 2 - Siwa Un Logo'n Ke Jinho'n Ne Tauba Ki Aur Islaah Karli, Aur (Unka) Bayaan Kar Diya To Yeh Woh Log Hai'n Jinki Mai'n Tauba Qabool Karta Hoo'n Aur Mai'n Bahot Tauba Qabool Karne Waala, Behad Rahem Farmaane Waala Hoo'n, (Aage Hazrat Abu Hurairah Radiallaahu Anhu Bayaan Karte Hai'n Ke) Beshak Muhaajireen Me'n Se Hamaare Bhaayi Baazaaro'n Me'n Sawda Karne Me'n Masroof Rehte The Aur Beshak Abu Hurairah Bhare Huwe Pet Ke Saath Rasoolullaah ﷺ Ke Saath Laazim Rehta Tha, Aur Un Mawaaqe Par Haazir Hota Tha Jab Woh (Muhaajireen) Haazir Nahee'n Hote The Aur Un Ahaadees Ko Yaad Rakhta Tha Jinko Woh (Muhaajireen) Yaad Nahee'n Rakhte The.

Hazrat Abu Hurairah Radiallaahu Anhu Bayaan Karte Hai'n Ke Mai'n Ne Rasoolullaah ﷺ Se Arz Kiya, Ya Rasoolallaah ﷺ! Mai'n Aapse Bakasrat Ahaadees Sunta Hoo'n, (Lekin Mai'n) Un (Ahaadees) Ko Bhool Jaata Hoo'n (Ya'ni Hazrat Abu Hurairah Radiallaahu Anhu Ne Apne Bhoolne Ki Beemaari Ka Ilaaj Dariyaaft Kiya To) Nabi e Kareem ﷺ Ne Irshaad Farmaaya, Tum Apni Chaadar Phailaao (Hazrat Abu Hurairah Radiallaahu Anhu Kehte Hai'n) Pas Mai'n Ne Apni Chaadar Phaila Di, (Tab) Nabi e Kareem ﷺ Ne Apne Dono'n Haatho'n Se Chullu Banaaya (Aur Usko Meri Chaadar Me'n Daal Diya) Phir Nabi e Kareem ﷺ Ne Irshaad Farmaaya, Iss Chaadar Ko Apne Jism Ke Saath Chimta Lo (Ya'ni Jism Se Lagaalo (Hazrat Abu Hurairah Radiallaahu Anhu Kehte Hai'n) To Mai'n Ne Uss Chaadar Ko Apne Jism Se Chimta Liya, (Phir Uski Barkat Yeh Huwi Ke) Phir Uske Ba'ad Mai'n Koi Cheez Nahee'n Bhoola, Imaam Bukhaari Aage Riwaayat Karte Hai'n Ke Hame'n Ibraaheem Bin Munzir Ne Hadees Bayaan Ki, Unho'n Ne Kaha, Hame'n Ibne Abi Fudaik Ne Yehi Hadees Bayaan Ki, Ya Kaha, Ke Nabi e Kareem ﷺ Ne Apne Haath Se Usme'n Chullu Banaaya. (Mere Bhaaiyo'n Iss Hadees Se Ma'loom Huwa Ke Nabi e Kareem ﷺ Har Dard Ke Darmaa'n Hain Aapne Yeh Nahee'n Farmaaya Bhoolne Ki Beemaari Hai To Kisi Doctor Ya Tabeeb Ke Paas Jaao Balke Aapne Uska Bhi Ilaaj Kar Diya)

Hazrat Abu Hurairah Radiallaahu Anhu Farmaate Hai'n Ke Mai'n Ne Rasoolullaah ﷺ Se (Ilm) Ke 2 Bartan Yaad Rakhe Hai'n, (Ya'ni Hazrat Abu Hurairah Radiallaahu Anhu Ko Rasoolullaah ﷺ Se 2 Tarah Ke Ilm Mile Hai'n, Phir Farmaate Hai'n Ke) Ek Bartan Ko To Mai'n Ne Phaila Diya, (Ya'ni Ek Tarah Ke Ilm Ko To Mai'n Ne Aa'm Kar Diya, Phir Farmaate Hai'n Lekin) Doosre Ko Agar Mai'n Phailaata To Mera Yeh Hulqoom Kaat Diya Jaata, (Ya'ni Agar Doosra Jo Mujhe Nabi e Kareem ﷺ Se Mila Agar Usko Aa'm Kar Deta To Mujhe Qatl Kar Diya Jaata), Aage Imaam Bukhaari Ne Kaha Al-Bal'oom Woh Naali Hai Jisse Ta'aam Guzarta Hai. (Mere Bhaaiyo'n Yaad Rakho Hazrat Abu Hurairah Radiallahu Anhu Ne Nabi e Kareem ﷺ Se 2 Tarah Ke Ilm Haasil Kiye The Ek Woh Ilm Jisme'n Sunan Aur Ahkaam Shar'iya Ke Mutaa'lliq Ahaadees Thee'n Jisko Unho'n Ne Aa'm Bhi Kiya, Aur Doosri Qism Woh Ilm Haasil Kiya Jisme'n Mustaqbil Ya'ni Aane Waale Waqto'n Me'n Kya Kya Fitne Waaq'e Ho'nge Uska Ilm Bhi Unko Nabi e Kareem ﷺ Se Mila Tha, Magar Iss Doosri Qism Ko Unho'n Ne Aa'm Nahee'n Kiya, Ek Baat Aur Yaad Rakho Agar Yeh A'eteraaz Kiya Jaaye Ke Hazrat Abu Hurairah Radiallahu Anhu Ne Kaise Nabi e Kareem ﷺ Ki Ahaadees Ko Chhupaaya To Jawaab Yeh Hai Ke Jin Ahaadees Ko Hazrat Abu Hurairah Radiallahu Anhu Ne Chhupaaya Tha Uska Ta'alluq Sunan Aur Ahkaam e Shar'iya Se Nahee'n Tha Aur Jitni Ahaadees Unke Paas Sunan Aur Ahkaam e Shari'ya Ke Mutaa'lliq Thee'n Unho'n Ne Sabko Aa'm Kiya Tabhi Unho'n Ne Khud Farmaaya Tha Ke Agar Qur'aan Ki 2 Aayat Na Hoti To Mai'n Kabhi Itni Hadees Bayaan Na Karta (Dekhe'n Hadees No.118) Aur Jin Ahaadees Ko Chhupaaya Tha Usme'n Munaafiqeen Ka Naam Maujood Tha Fitna Phailaane Waale Ka Naam Maujood Tha Agar Usko Aa'm Karte Qatl Wa Gaarat Shur'u Ho Jaati.

Hazrat Jareer Radiallaahu Anhu Riwaayat Karte Hai'n Ke Nabi e Kareem ﷺ Ne Hajjatul Wada Me'n Farmaaya Ke Logo'n Ko Khaamosh Karo, Phir Nabi e Kareem ﷺ Ne Irshaad Farmaaya, Mere Ba'ad Tum Kaafir Na Ho Jaana Ke Ek Doosre Ki Gardane'n Maaro. (Mere Bhaa'iyo'n Yaad Rakho Iss Hadees Me'n Jo Yeh Farmaaya Gaya Ke Tum Mere Ba'ad Kaafir Na Ho Jaana Matlab Yeh Tha Ke, Nabi e Kareem ﷺ Ki Zaahiri Zindagi Me'n To Koi Kaafir Nahee'n Ho'nge (Ya'ni Kuffaar Ke Mushaaba Ama'l Nahee'n Kare'nge) Iss Sabab Aapne Apni Wafaat Ke Ba'ad Isse Man'a Farmaaya Ya'ni Jab Mai'n Duniya Se Chala Jaau'n To Tum Mere Ba'ad Bhi Imaan Aur Taqwa Par Barqaraar Rehna Aur Aapas Me'n Ja'ng Na Karna Aur Ek Doosre Ke Amwaal Mat Lootna Ya'ni Mere Ba'ad Bhi Tumhaare Af'aal Kuffaar Ke Mushaaba Nahee'n Hona Chaahiye Aur Na To Kuffaar Ki Tarah Ek Doosre Ki Gardane'n Maarna)

Hazrat Sa'eed Bin Jubair Bayaan Karte Hai'n Ke Mai'n Ne Hazrat Ibne Abbaas Radiallaahu Anhuma Se Kaha Ke Beshak Nof Bakaali Yeh Gumaan Karta Hai Ke (Qur'aan Me'n Hazrat Khizr (Alaihissalaam) Ke Saath) Jis Moosa Ka Zikr Hai Woh Bani Israa'eel Ke Moosa Alaihissalaam Nahee'n Hai'n Woh Koi Aur Moosa Hai'n, (Yeh Baat Sun Kar Hazrat) Ibne Abbaas Radiallaahu Anhuma Ne Farmaaya, Woh Allaah Ka Dushman Jhoot Bolta Hai, (Phir Hazrat Ibne Abbaas Radiallaahu Anhuma Ne Farmaaya Ke) Hame'n Hazrat Ubayi Bin Ka'ab Radiallaahu Anhu Ne Nabi e Kareem ﷺ Se Yeh Hadees Riwaayat Ki Hai Ke, Hazrat Moosa Alaihissalaam Bani Israa'eel Me'n Khutba De Rahe The, (Tab) Unse Sawaal Kiya Gaya Ke Logo'n Me'n Sabse Bada Aa'lim Kaun Hai? Hazrat Moosa Alaihissalaam Ne Farmaaya, Mai'n Sabse Bada Aa'lim Hoo'n, (To) Allaah Paak Ne Unpar Itaab Farmaaya, Kyu'nke Hazrat Moosa Alaihissalaam Ne Ilm Ko Allaah Paak Ki Taraf Nahee'n Lautaaya, Tab Allaah Paak Ne Hazrat Moosa Alaihissalaam Ki Taraf Yeh Wahi Ki Ke, Beshak Mere Bando'n Me'n Se Ek Bandah Majma'ul Behrain Me'n Hai, Woh Aapse Bada Aa'lim Hai, (Tab) Hazrat Moosa Alaihissalaam Ne Arz Ki, Aye Mere Rab! Mai'n Uss Bande Se Kaise Miloo'nga? (Tab) Hazrat Moosa Alaihissalaam Se Kaha Gaya Ke Aap Ek Tokri Me'n (Bhuni Huwi) Machhli Rakh Le'n, (Aur Uss Machhli Ko Saath Lekar Chalte Raho Raaste Me'n) Jis Jagah Uss Machhli Ko Gum Paaye'nge Usi Jagah Par Khizr (Alaihissalaam) Ho'nge, (Phir) Hazrat Moosa Alaihissalaam Rawaana Huwe Aur Hazrat Moosa Alaihissalaam Ke Saath Unke Shaagird Yusha Bin Noon Bhi Rawaana Huwe, Aur Unho'n Ne Ek Tokri Me'n (Bhuni Huwi) Machhli Rakh Li, Hatta Ke (Chalte Chalte) Jab Woh Dono'n Ek Chattaan Ke Paas Paho'nche, To Un Dono'n Ne Uss Chattaan Par Apne Sar Rakhe Aur So Gaye, Pas Woh Machhli Tokri Se Nikli, Aur Uss Machhli Ne Samandar Me'n Surang Ki Misl Apna Raasta Bana Liya, (Sureh Kahef, Aayat No.61) Aur Hazrat Moosa Alaihissalaam Aur Unke Shaagird Keliye Yeh Badi Ajeeb Baat Thi, (Ke Unko Ma'loom Hi Nahee'n Huwa Ke Machhli Gum Ho Gayi), Phir Woh Dono'n Baqiya Raat Aur Din Tak Chalte Rahe, Jab Subah Huwi To Hazrat Moosa Alaihissalaam Ne Apne Shaagird Se Kaha, Hamaara Naashta Laao, Hame'n Iss Safar Se Thakaawat Huwi Hai, (Sureh Kahef, Aayat No. 62) Aur Moosa Alaihissalaam Ko Thakaawat Uss Waqt Mehsoos Huwi Thi Jab Unho'n Ne Uss Jagah Se Tajaawuz Kiya Tha, Jis Jagah Unhe'n Jaane Ka Hukm Diya Gaya Tha, Phir Unke Shaagird Ne Unse Kaha, Kya Aapne Nahee'n Dekha Jab Ham Chattaan Se Tek Lagaakar Aaraam Kar Rahe The Wahaa'n Mai'n Machhli Bhool Gaya Tha, (Sureh Kahef, Aayat No.63) Hazrat Moosa Alaihissalaam Ne Kaha, Ham Usi (Jagah) Ko Talaash Kar Rahe The, Pas Woh Apne Qadmo'n Ke Nishaan Talaash Karte Huwe Laute, (Sureh Kahef, Aayat No.64) Jab Woh Uss Chattaan Tak Paho'nche To Wahaa'n Ek Shakhs Chaadar Odhe Huwe Tha, Ya Kaha Ke, Usne Chaadar Se Apne Aap Ko Chhupaaye Rakha Tha, Hazrat Moosa Alaihissalaam Ne Unko Salaam Kiya, Pas Hazrat Khizr (Alaihissalaam) Ne Kaha, Tumhaari Zameen Me'n Salaamati Kahaa'n Hai? Pas Moosa Alaihissalaam Ne Kaha, Mai'n Moosa Hoo'n, Hazrat Khizr Alaihissalaam Ne Kaha, Kya Bani Israa'eel Ke Moosa? Hazrat Moosa Alaihissalaam Ne Kaha, Ji Haa'n Bani Israa'eel Ka Moosa, (Phir Kaha Hazrat Moosa Alaihissalaam Ne Hazrat Khizr Alaihissalaam Se Ke) Kya Mai'n Ispar Aapki Pairwi Karu'n Ke Aap Mujhe Woh Sikha De'n Jo Nek Ilm Aapko Sikhaaya Gaya Hai, Khizr Alaihissalaam Ne Kaha, Aap Mere Saath Hargiz Sabr Nahee'n Kar Sake'nge, (Sureh Kahef, Aayat No.66/67) (Phir Hazrat Khizr Alaihissalaam Ne Hazrat Moosa Alaihissalaam Se Kaha) Aye Moosa! Mere Paas Allaah Paak Ke Ilm Me'n Se Woh Ilm Hai, Jiski Allaah Paak Ne Mujhe Ta'leem Di Hai, Jiska Aapko Ilm Nahee'n Hai, Aur Aapke Paas Allaah Paak Ka Woh Ilm Hai, Jiski Allaah Paak Ne Aapko Ta'leem Di Hai, Jiska Mujhe Ilm Nahee'n Hai, (Tab Hazrat Moosa Alaihissalaam Ne Kaha) Insha Allaah Aap Mujhe Sabr Karne Waala Paaye'nge, Aur Mai'n Kisi Baat Me'n Aapki Na Farmaani Nahee'n Karu'nga, (Sureh Kahef, Aayat No.69) Phir Woh Dono'n (Ya'ni Hazrat Moosa Alaihissalaam Wa Hazrat Khizr Alaihissalaam) Rawaana Huwe, Aur Chalte Chalte Saahile Samandar Par Paho'nche (Ya'ni Samandar Ke Kinaare Paho'nche), Wahaa'n Saahile Samandar Par (Ya'ni Samandar Ke Kinaare Par) Koi Kashti Nahee'n Thi, (Kuchh Der Ba'ad) Phir Un Dono'n Ke Paas Se Ek Kashti Guzri, Unho'n Ne Unse (Ya'ni Kashti Waale Se) Baat Ki Ke Woh Un Dono'n Ko Sawaar Kar Le'n, (Ya'ni Kashti Waale Se Kaha Ke Ham Dono'n Ko Sawaar Karlo), Unho'n Ne (Ya'ni Kashti Waalo'n Ne) Hazrat Khizr Alaihissalaam Ko Pehchaan Liya, Pas Unho'n Ne Bagair Kisi Mu'aaweza Ke Un Dono'n Ko Sawaar Kar Liya, Phir Ek Chidiya Aakar Kashti Ke Kinaare Baith Gayi, Usne Samandar Me'n 1 Cho'nch Ya 2 Ch'onche'n Maari, Phir (Uss Manzar Ko Dekh Kar) Hazrat Khizr Alaihissalaam Ne Hazrat Moosa Alaihissalaam Se Kaha, Aye Moosa! Mera Ilm Aur Aapka Ilm Allaah Paak Ke Ilm Ke Muqaable Me'n Aisa Hai Jaise Samandar Me'n Iss Chidiya Ki Ek Cho'nch Hai, Phir Hazrat Khizr Alaihissalaam Ne Kashti Ki Takhtiyo'n Me'n Ek Takhte Ka Iraadah Kiya Aur Usko Ukhaad Diya, (Iss Manzar Ko Dekh Kar) Hazrat Moosa Alaihissalaam Ne Kaha, In Logo'n Ne Bagair Kisi Mu'aaweza Ke Ham Logo'n Ko Apni Kashti Me'n Sawaar Kiya, Aur Aapne Iska Takhta Ukhaad Diya, Taake Isme'n Baithne Waalo'n Ko Garq Kar De'n, (Tab) Hazrat Khizr Alaihissalaam Ne Kaha, Kya Mai'n Ne Nahee'n Kaha Tha Ke Aap Mere Saath Hargiz Sabr Nahee'n Kar Sake'nge, Hazrat Moosa Alaihissalaam Ne Kaha, Aap Meri Bhool Par Meri Girift Na Keejiye, (Sureh Kahef, Aayat No.72/73) To Pehli Baar Hazrat Moosa Alaihissalaam Se Bhool Ho Gayi, Phir Woh Dono'n (Ya'ni Hazrat Moosa Alaihissalaam Wa Hazrat Khizr Alaihissalaam Aage Ke Safar Me'n) Rawaana Ho Gaye, (Phir Raaste Me'n Ek Jagah Paho'nche) Wahaa'n Ek Ladka Ladko'n Ke Saath Khel Raha Tha, Hazrat Khizr Alaihissalaam Ne Uss Ladke Ka Sar Upar Ki Taraf Se Pakda Aur Apne Haath Se Uska Sar Dhad (Jism) Se Alag Kar Diya, (Yeh Manzar Dekh Kar) Hazrat Moosa Alaihissalaam Ne Kaha, (Yeh) Kya Aapne Ek Be Qasoor Jaan Ko Bagair Kisi Jaan Ke Ewaz Qatl Kar Daala, (Sureh Kahef, Aayat No.74), (Phir) Khizr Alaihissalaam Ne Kaha, Kya Mai'n Ne Aapse Pehle Hi Nahee'n Kaha Tha Ke Aap Mere Saath Hargiz Sabr Nahee'n Kar Sake'nge, (Sureh Kahef, Aayat No.75), Imaam Bukhaari Farmaate Hai'n Ibne Uyayna Ne Kaha, Isme'n Zyaadah Taakeed Hai, (Phir Hazrat Moosa Alaihissalaam Wa Khizr Alaihissalaam Aage Safar Keliye) Rawaana Huwe, (Safar Karte Aage Chalte Gaye) Yahaa'n Tak Ke Ek Dehaat Waalo'n Ke Paas Paho'nche To Dehaat Waalo'n Se Khaana Maa'nga, Dehaat Waalo'n Ne) Hazrat Moosa Alaihissalaam Wa Khizr Alaihissalaam) Ko Mehmaan Banaane Se Inkaar Kar Diya, (Ya'ni Khaana Dene Se Inkaar Kar Diya), Phir Wahaa'n (Hazrat Moosa Alaihissalaam Wa Khizr Alaihissalaam Ne) Ek Deewaar Dekhi Jo Gira Chaahti Thi, (Ya'ni Jo Girne Waali Thi), Unho'n Ne Uski Marammat Kar Di, (Ya'ni Uss Deewaar Ko Theek Kardi), (Sureh Kahef, Aayat No.77), Hazrat Khizr Ne Apne Haath Se Uss Deewaar Ki Marammat Ki, Tab Hazrat Moosa Ne Hazrat Khizr Se Kaha, Agar Aap Chaahte To Ispar Koi Mu'aaweza Le Lete, (Tab) Hazrat Khizr Ne Kaha Bas ! Yeh Mere Aur Aapke Darmiyaan Judaayi Hai, (Sureh Kahef, Aayat No.77/78) (Poori Baat Sunaane Ke Ba'ad) Nabi e Kareem ﷺ Ne Irshaad Farmaaya, Allaah Paak Hazrat Moosa Alaihissalaam Par Rahem Farmaaye, Ham Chaahte The Agar Woh Sabr Karte Hatta Ke Un Dono'n Ke Mazeed Waaqe'aat Ham Par Bayaan Kiye Jaate. (Mere Bhaaiyo'n Yaad Rakho Iss Hadees Me'n Jo Hai Ke Allah Ta'ala Ne Hazrat Moosa Alaihissalaam Par Itaab Kiya Yahaa'n Itaab Ka Matlab Hai, Shafqat Ya Mohabbat Se Kisi Ke Na Munaasib Fe'l (Kaam) Wa Qaul Par Mohabbat Se Tokna)

Hazrat Abu Moosa Ash'ari Radiallaahu Anhu Bayaan Karte Hai'n Ke Ek Shakhs Ne Nabi e Kareem ﷺ Ki Baargaah Me'n Haazir Hokar Arz Kiya Ke, Ya Rasoolallaah ﷺ! Allaah Paak Ki Raah Me'n Qitaal Karne Ki Kya Ta'reef Hai? Kyu'nke Ham Me'n Se Ek Shakhs Gazab Me'n Qitaal Karta Hai Aur Ek Shakhs Hamiyat (Zabaan Ya Qabeele Ke Ta'assub) Me'n Qitaal Karta Hai, (Tab) Nabi e Kareem ﷺ Ne Apna Sar Mubaarak Uthaaya Aur Nabi e Kareem ﷺ Ne Jis Waqt Sar Mubaarak Uthaaya Tha Uss Waqt Woh Saa'il Khada Huwa Tha, (Phir) Nabi e Kareem ﷺ Ne Irshaad Farmaaya, Jisne Isliye Qitaal Kiya Ke Allaah Ka Deen Sar Buland Ho, Woh Allaah Paak Ki Raah Me'n Qitaal Hai. (Iss Hadees Se Ma'loom Huwa Ke Nek Aa'maal Ka Sawaab Bhi Nek Niyat Ke Saath Mauqoof Hai, Agar Kisi Ne Nek Amal To Kiya Magar Niyat Nek Na Thi Dikhaawa Tha To Uska Sawaab Nahee'n Milega Balke Ulta Azaab Hoga, Allah Hum Sabko Nek Amal Ke Saath Nek Niyat Ki Bhi Taufeeq Ata Farmaaye Aameen)

Hazrat Abdullaah Bin Umar Radiallaahu Anhuma Kehte Hai'n Ke Mai'n Ne Rasoolullaah ﷺ Ko Jumrah Ke Paas Dekha, (Ya'ni Haaji Jahaa'n Shaitaan Ko Ka'nkariyaa'n Maarte Hai'n Wahaa'n Dekha) Aap ﷺ Se (Wahaa'n) Sawaal Kiya Ja Raha Tha, Ek Shakhs Ne Kaha, Ya Rasoolallaah ﷺ! Mai'n Ne Ka'nkariyaa'n Maarne Se Pehle Nahar (Qurbaani Ka Jaanwar Zibah) Kar Liya, Nabi e Kareem ﷺ Ne Irshaad Farmaaya, Ab Ka'nkariyaa'n Maarlo Koi Harj Nahee'n, Doosre Shakhs Ne Kaha, Ya Rasoolallaah ﷺ! Mai'n Ne Nahar (Qurbaani Ka Jaanwar Zibah Karne) Se Pehle Sar Mund Liya, Nabi e Kareem ﷺ Ne Irshaad Farmaaya, Ab Nahar Karlo Koi Harj Nahee'n, (Hazrat Ibne Abbaas Radiallaahu Anhuma Farmaate Hai'n Ke) Nabi e Kareem ﷺ Se Jis Cheez Ke Bhi Muqaddam Ya Mo'akhkhar Karne Ke Mutaa'lliq Sawaal Kiya Gaya To Aapne Farmaaya Ab Karlo Koi Harj Nahee'n.

Hazrat Abdullaah Bin Mas'ood Radiallaahu Anhu Bayaan Karte Hai'n Ke Mai'n Nabi e Kareem ﷺ Ke Saath Madeena Ke Khandaraat Me'n Ja Raha Tha Aur Aap Jis Laathi Par Tek Lagaate The Woh Aapke Saath Thi, Aap Yahood Ke Ek Giroh Ke Paas Se Guzre, Unho'n Ne Ek Doosre Se Kaha, Inse Rooh Ke Muta'alliq Sawaal Karo, Unme'n Se Ba'az Ne Kaha Sawaal Na Karo, Yeh Koi Aisa Jawaab Na De'n Jisko Tum Na Pasand Karo, Doosro'n Ne Kaha Ham Inse Zaroor Sawaal Kare'nge, Phir Unme'n Se Ek Shakhs Ne Khade Hokar Kaha, Ya Abal Qaasim! Rooh Ki Kya Haqeeqat Hai? Pas Aap ﷺ Khaamosh Rahe, Mai'n Ne (Dil Me'n) Kaha Ke, Aap Ki Taraf Wahi Ki Ja Rahi Hai, Pas Mai'n Khada Ho Gaya, Jab Aapse Nuzool e Wahi Ki Kaifiyat Door Ho Gayi To Aapne Padha! (Qur'aan Ki Yeh Aayat Jiska Tarjuma Hai) Aur Yeh Log Aapse Rooh Ke Muta'alliq Sawaal Karte Hai'n (To Aye Mehboob) Aap Farmaa'iye Ke Rooh Mere Rab Ke Amar Se Hai Aur Tumko Jo Bhi Ilm Diya Gaya Hai Woh Thoda Hai, (Sureh Bani Israa'eel, Aayat No.85), Imaam Bukhaari Kehte Hai'n Aa'mash Ne Kaha Hamaari Qir'at Me'n Isi Tarah Hai.

Aswad Kehte Hai'n Ke Mujhse Hazrat Ibne Zubair Radiallaahu Anhuma Ne Kaha Ke Hazrat Aa'yesha Radiallaahu Anha Tumko Bahot Raaz Ki Baat Bataati Thee'n, To Ka'ba Ke Baare Me'n Unho'n Ne Tumko Kya Bataaya Hai? (Unho'n Ne Kaha Ke) Hazrat Aa'yesha Siddeeqa Radiallaahu Anha Ne Yeh Bataaya Ke Mujhse Nabi e Kareem ﷺ Ne Yeh Farmaaya Ke Aye Aa'yesha! Agar Tumhaari Qaum Daur e Jaahiliyat Ke Qareeb Na Hoti, Hazrat Ibne Zubair Ne Kaha (Ya'ni) Daur e Kufr Ke Qareeb Na Hoti To Mai'n Ka'ba Ko Munhadim Karke Az Sare Naw Ta'meer Karta Aur Uske 2 Darwaaze Bana Deta, Ek Darwaaze Se Log Ka'ba Me'n Daakhil Hote Aur Doosre Darwaaze Se Bahaar Nikalte, Phir Hazrat Ibne Zubair Ne Ka'ba Ko Usi Tarah Bana Diya. (Mere Bhaaiyo'n Yaad Rakho Nabi e Kareem ﷺ Ne Apni Khwaahish Ke Baawajood Ka'ba Ki Az Sare Nau Ta'meer Nahee'n Ki Aur Hateem e Ka'ba Ko Ka'ba Me'n Daakhil Nahee'n Kiya Aur Ka'ba Shareef Ke Darwaaze Nahee'n Banaaye, Yahaa'n Se Mas'la Ma'loom Huwa Ke Jab Koi Kaam Karna Durust Ho Lekin Uss Durust Kaam Ko Karne Se Zyaadah Nuqsaan Hone Ka Andesha Ho To Woh Durust Kaam Ko Bhi Tark Kar Dena Chaahiye Aur Logo'n Ko Mutanaffir Karne Se Ahteraaz Karna Chaahiye, Doosri Baat Yeh Yaad Rakhe'n Ke Hazrat Ibne Zubair Radiallahu Anhuma Ne Ka'ba Shareef Ki Az Sare Nau Uss Hisaab Se Ta'meer Karwaayi Jo Khwaahish Nabi e Kareem ﷺ Ne Ki Thi, Lekin Phir Hujjaaj Bin Yusuf Ne Apne Daur Me'n Hazrat Ibne Zubair Radiallahu Anhuma Waali Ta'meer e Ka'ba Ko Munhadim Karke Quresh Ki Ta'meer Ke Mutaabiq Bana Diya, (Maakhooz Az Ne'matul Baari Fi Sharhul Bukhaari Allaama Gulaam Rasool Sa'eedi Sahab Qibla Rehmatulla Alaih)

Aur Hazrat Ali Radiallaahu Anhu Ne Farmaaya, Logo'n Se Aisi Ahaadees Bayaan Karo Jinko Woh Samajh Le'n, (Phir Wajah Bayaan Ki Ke) Kya Tum Yeh Pasand Karte Ho Ke Allaah Aur Uske Rasool Ki Takzeeb Ki Jaaye? (Ya'ni Hazrat Ali Radiallaahu Anhu Ki Muraad Yeh Hai Ke Logo'n Se Unki Aqlo'n Ke Mutaabiq Kalaam Karo Kyu'nke Aqal Se Zyaadah Baate'n Ho'ngi To Inkaar Kar De'nge), Imaam Bukhaari Riwaayat Karte Hai'n Ke Hame'n Ubaidullaah Bin Moosa Ne Hadees Bayaan Ki, Woh Ma'roof Bin Kharrabooz Se, Woh Hazrat Abu Tufail Radiallaahu Anhu Se Riwaayat Karte Hai'n, Hazrat Ali Radiallaahu Anhu Se Yehi Waali Asar Ke (Hazrat Ali Radiallaahu Anhu Ne Farmaaya, Logo'n Se Aisi Ahaadees Bayaan Karo Jinko Woh Samajh Le'n Kya Tum Yeh Pasand Karte Ho Ke Allaah Aur Uske Rasool Ki Takzeeb Ki Jaaye)

Hazrat Anas Bin Maalik Radiallaahu Anhu Ne Hadees Bayaan Ki Ke Nabi e Kareem ﷺ (Sawaari Ke) Paalaan Par Baithe Huwe The Aur Hazrat Ma'aaz Radiallaahu Anhu Aap ﷺ Ke Peechhe Baithe Huwe The, Nabi e Kareem ﷺ Ne Irshaad Farmaaya, Aye Ma'aaz Bin Jabal ! Hazrat Ma'aaz Bin Jabal Radiallaahu Anhu Ne Arz Ki, Mai'n Haazir Hoo'n Ya Rasoolallaah ﷺ Aapki Itaa'at Keliye Maujood Hoo'n, Yeh Mukaalma 3 Baar Huwa, (Ya'ni Nabi e Kareem ﷺ Ne 3 Baar Irshaad Farmaaya, Aye Ma'aaz Bin Jabal) Aur Aapki Itaa'at Keliye Maujood Hoo'n Yeh Mukaalma 3 Baar Huwa, (Ya'ni Jawaab Me'n Hazrat Ma'aaz Bin Jabal Radiallaahu Anhu Ne Bhi Teeno'n Baar Arz Ki Ya Rasoolallaah ﷺ Mai'n Haazir Hoo'n Aapki Itaa'at Keliye Maujood Hoo'n) (Phir Nabi e Kareem ﷺ Ne) Irshaad Farmaaya Ke Jo Shakhs Bhi Sidq e Dil (Sachche Dil) Se Yeh Gawaahi Deta Hai Ke Allaah Paak Ke Siwa Koi Ibaadat Ka Mustahiq Nahee'n Hai Aur Muhammad ﷺ Allaah Paak Ke Rasool Hai'n, (To) Usko (Ya'ni Gawaahi Dene Waale Ko Allaah Paak) Dozakh Par Haraam Kar Dega, (Yeh Khush Khabri Sun Kar) Hazrat Ma'aaz Radiallaahu Anhu Ne Arz Kiya, Ya Rasoolallaah ﷺ! Kya Mai'n Logo'n Ko Iski Khabar Na De Doo'n? Taake Log Khush Ho Jaaye'n, (Tab) Nabi e Kareem ﷺ Ne Irshaad Farmaaya, Phir Woh Ispar Takiya Kar Le'nge, (Ya'ni Nabi e Kareem ﷺ Ne Yeh Khush Khabri Dene Se Mana Farmaaya Kyu'nke Imkaan Tha Ke Log Ispar Bharosa Karke Nek Amal Ko Tark Kare'nge) Aur Hazrat Ma'aaz Radiallaahu Anhu Ne Apni Maut Ke Waqt Gunaah Se Bachne Keliye Iski Khabar Dedi.

Hazrat Anas Radiallaahu Anhu Farmaate Hai'n Ke Mujh Se Yeh Zikr Kiya Gaya Ke Nabi e Kareem ﷺ Ne Hazrat Ma'aaz Radiallaahu Anhu Se Farmaaya Ke Jo Shakhs Allaah Se Iss Haal Me'n Mila Ke Usne Allaah Ke Saath Bilkul Shirk Na Kiya Ho (To) Woh Jannat Me'n Daakhil Hoga, (Yeh Khush Khabri Sun Kar) Hazrat Ma'aaz Radiallaahu Anhu (Ne Nabi e Kareem ﷺ Se) Arz Kiya Ke, Kya Mai'n Iski Logo'n Ko Bashaarat Na De Doo'n? Nabi e Kareem ﷺ Ne Irshaad Farmaaya Nahee'n, (Kyu'nke) Mujhe Khatrah Hai Ke Log Phir Isi Par Ae'temaad Kar Le'nge.

Hazrat Umme Salma Radiallaahu Anha Farmaati Hai'n Ke Hazrat Umme Sulaim Radiallaahu Anha Nabi e Kareem ﷺ Ke Paas Aayee'n Aur Kehne Lagee'n Ke, Ya Rasoolallaah ﷺ! (Jab) Allaah Paak Haq Bayaan Karne Se Haya Nahee'n Karta (To Mai'n Kyu'n Haq Sawaal Karne Se Baaz Rahoo'n, To Mera Sawaal Yeh Hai Ke) Kya Aurat Par Bhi Gusl (Waajib) Hota Hai Jab Aurat Ko Ahtelaam Ho Jaaye? Nabi e Kareem ﷺ Ne Irshaad Farmaaya, (Haa'n Aurat Par Bhi Gusl Waajib Hota Hai) Jab Woh (Aurat Apna) Paani Dekh Le, (Jawaab Sun Kar) Hazrat Umme Salma Radiallaahu Anha Ne Apna Muh Dhaa'np Liya Aur Kaha, Ya Rasoolallaah ﷺ (Kya) Aurat Ko Bhi Ahtelaam Hota Hai? Nabi e Kareem ﷺ Ne Irshaad Farmaaya Haa'n! Tumhaare Haath Khaak Aalood Hoo'n! Pas Uska Bachcha Kis Cheez Se Uske Mushaaba Hota Hai? (Ya'ni Aurat Ki Mani Hi Ki Wajah Se To Kabhi Bachcha Maa'n Ki Shakl Ikhtiyaar Karta Hai)

Hazrat Abdullaah Bin Umar Radiallaahu Anhuma Riwaayat Karte Hai'n Ke Nabi e Kareem ﷺ Ne Irshaad Farmaaya, Darakhto'n Me'n Se Ek Darakht Hai Jiske Patte Nahee'n Girte Aur Woh Darakht Muslim Ki Misl Hai, Mujhe Bataao Woh Kaunsa Darakht Hai ? Pas (Sawaal Sunte Hi Sab) Logo'n Ke Zahen Ja'ngal Ke Darakhto'n Me'n Chale Gaye Aur Mere Zahen Me'n Yeh Aaya Ke Woh Khajoor Ka Darakht Hai Phir Mujhe (Bataane Se) Haya Aayi, (Tab) Sahaaba e Kiraam Ne Arz Kiya, Ya Rasoolallaah ﷺ! Hame'n (Aap) Hi Bataaye'n Woh Kaunsa Darakht Hai? Tab Rasoolullaah ﷺ Ne Irshaad Farmaaya, Woh Khajoor Ka Darakht Hai, Hazrat Abdullaah Bin Umar Radiallahu Anhuma Ne Kaha Ke Mai'n Ne Apne Waalid Ko Bataaya Jo Mere Zahen Me'n Aaya Tha, Unho'n Ne Kaha Agar Tum Uss Waqt Bata Dete To Mere Liye Yeh Isse Zyaadah Mehboob Tha Ke Mujhe Itna Aur Itna Mil Jaata.

Hazrat Maula Ali Radiallaahu Anhu Bayaan Karte Hai'n Ke Mai'n Aisa Shakhs Tha Jisko Mazi Bahot Aati Thi, (To) Mai'n Ne Hazrat Miqdaad Radiallaahu Anhu Ko Hukm Diya Ke Nabi e Kareem ﷺ Se (Iss Mazi Ke Muta'alliq) Sawaal Kare'n, (Tab) Unho'n Ne (Nabi e Kareem ﷺ Se) Sawaal Kiya To Nabi e Kareem ﷺ Ne Irshaad Farmaaya, Isme'n (Ya'ni Mazi Nikalne Me'n Gusl Waajib Nahee'n Hai Balke) Wazu Karna Hai.

Naafe Ne Hadees Bayaan Ki Jo Ke Hazrat Abdullaah Bin Umar Bin Khattaab Radiallaahu Anhuma Ke Aazaad Kardah Gulaam Hai'n, Woh Riwaayat Karte Hai'n, Hazrat Abdullaah Bin Umar Bin Khattaab Radiallaahu Anhuma Se Ke Ek Shakhs Masjid Me'n Khada Hokar Kehne Laga, Ya Rasoolallaah ﷺ! Aap Hame'n Kis Jagah Se Ahraam Baa'ndhne Ka Hukm Dete Hai'n? Pas Rasoolullaah ﷺ Ne Irshaad Farmaaya, Ahle Madeena Zul Hulaifa Se Ahraam Baa'ndhe'n Aur Ahle Shaam Juhfa Se Ahraam Baa'ndhe'n Aur Ahle Najd Qarn Se Ahraam Baa'ndhe'n Aur Hazrat Umar Radiallaahu Anhu Ne Kaha Ke Logo'n Ka Yeh Gumaan Hai Ke Rasoolullaah ﷺ Ne Farmaaya Hai Ke Ahle Yaman Yalamlam Se Ahraam Baa'ndhe'n Aur Hazrat Ibne Umar Radiallaahu Anhuma Yeh Kehte Hai'n Ke Mai'n Ne Rasoolullah ﷺ Se Isko Nahee'n Samjha. (Yaad Rakhe'n Iss Hadees Me'n Jo Ahle Najd Aaya Hai To Najd Ka Ma'ni Hai Zameen Ka Jo Hissa Zameen Ke Upar Ho Usko Najd Isliye Kehte Hai'n Ke Yeh Pathhreli Zameen Hai Aur Yahaa'n Jaana Bahot Mushkilo'n Ka Baa'is Hai, Najd Hijaaz Aur Shaam Ke Darmiyaan Ek Jagah Hai (Arab Ka Wasta Ilaaqa, Iska Markazi Shaher Riyaad Hai, Iski Hudood Badalti Rehti Hai, Ab Iske Mashriq Me'n Behrain Hai, Magrib Me'n Hijaaz Hai Aur Shumaal Me'n Iraaq Hai Aur Junoob Me'n Sehra Hai (Mo'jamul Buldaan Urdu Safha 339, Bahawaala Ne'matul Baari Fi Sharhul Bukhaari Jild 1, Kitaabul Ilm, Safha No.493 Az Allaama Gulaam Rasool Sa'eedi Rehmatullah Alaih)

Hazrat Ibne Umar Radiallaahu Anhuma Nabi e Kareem ﷺ Se Riwaayat Karte Hai'n Ke Ek Shakhs Ne Aap ﷺ Se Sawaal Kiya Ke Jo Shakhs Ahraam Baa'ndhe Huwe Ho Woh Kya Pehne? Nabi e Kareem ﷺ Ne Irshaad Farmaaya, Woh Qamees Na Pehne Aur Imaama Na Pehne Aur Shalwaar Na Pehne Aur Na Topi Pehne Aur Na Aisa Kapda Pehne Jisko Za'fraan Ya Wars Se Ra'nga Huwa Ho, Pas Agar Usko Joote Na Mile'n To Woh Moze Pahen Le Aur Unko Kaat Le Hatta Ke Woh Takhno'n Ke Neeche Ho Jaaye'n (Wars Se Muraad Khushbudaar Ghaas Hai).