Ibne Majah Shareef

حضرت عبداللہ بن مسعود رضی اللہ عنہ کہتے ہیں کہ رسول اللہ ﷺ نے فرمایا : آگاہ رہو ! میں ہر خلیل (جگری دوست) کی دلی دوستی سے بری ہوں، اور اگر میں کسی کو خلیل (جگری دوست) بناتا تو ابوبکر کو بناتا، بیشک تمہارا یہ ساتھی اللہ کا خلیل (مخلص دوست ہے)۔ وکیع کہتے ہیں : آپ ﷺ نے ساتھی سے اپنے آپ کو مراد لیا ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ أَبِي بَكْرٍ الصِّدِّيقِ رَضِيَ اللَّهُ عَنْهُ،صحابہ کرام رضی اللہ عنہم کے فضائل و مناقب، حضرت ابوبکر صدیق رضی اللہ عنہ کے مناقب و فضائل،جلد١،ص٧٠،حديث نمبر ٩٣)

حضرت ابو ہریرہ رضی اللہ عنہ روایت کرتے ہیں نبی کریم ﷺ نے ارشاد فرمایا ہے: کسی کے مال نے مجھے اتنا نفع نہیں دیا جتنا ابو بکر رضی اللہ عنہ کے مال نے مجھے نفع دیا ہے ۔ راوی بیان کرتے ہیں : حضرت ابوبکر رو پڑے انہوں نے عرض کی: میں اور میرا مال آپ ﷺ کا ہے۔ (یا رسول اللہ ﷺ ) (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ أَبِي بَكْرٍ الصِّدِّيقِ رَضِيَ اللَّهُ عَنْهُ،صحابہ کرام رضی اللہ عنہم کے فضائل و مناقب، حضرت ابوبکر صدیق رضی اللہ عنہ کے مناقب و فضائل،جلد١،ص٧٠،حديث نمبر ٩٤)

حضرت علی رضی اللہ عنہ بیان کرتے ہیں نبی کریم ﷺ نے یہ فرمایا تھا ابوبکر اور عمر رضی اللہ عنہما انبیا اور مسلمین کے علاوہ اہل جنت کے پہلے والے اور بعد والے تمام عمر رسیدہ لوگوں کے سردار ہیں ۔ اے علی ! جب تک یہ دونوں زندہ ہیں، تم ان دونوں کو یہ بات نہ بتانا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ أَبِي بَكْرٍ الصِّدِّيقِ رَضِيَ اللَّهُ عَنْهُ،صحابہ کرام رضی اللہ عنہم کے فضائل و مناقب، حضرت ابوبکر صدیق رضی اللہ عنہ کے مناقب و فضائل،جلد١،ص٧١،حديث نمبر ٩٥)

حضرت ابو سعید خدری رضی اللہ عنہ روایت کرتے ہیں: نبی کریم ﷺ نے ارشاد فرمایا: بلند درجات کے مالک لوگوں کو ( جنت میں) نچلے درجے والے لوگ اس طرح دیکھیں گئے، جس طرح تم آسمان کے افق میں طلوع ہونے والے ستارے کو دیکھتے ہو ابوبکر اور عمر بھی ان ( بلند درجات والوں میں شامل ہوں گے ) اور یہ دونوں کتنے اچھے ہیں۔ اس حدیث سے شیخین (حضرت ابوبکر و عمر رضی اللہ عنہا) کے درجات کی بلندی کا علم ہوتا ہے. (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ أَبِي بَكْرٍ الصِّدِّيقِ رَضِيَ اللَّهُ عَنْهُ،صحابہ کرام رضی اللہ عنہم کے فضائل و مناقب، حضرت ابوبکر صدیق رضی اللہ عنہ کے مناقب و فضائل،جلد١،ص٧٢،حديث نمبر ٩٦)

حضرت حذیفہ بن یمان رضی اللہ عنہ بیان کرتے ہیں: ہم نبی کریم ﷺ کے پاس موجود تھے۔ آپ ﷺ نے فرمایا مجھے نہیں معلوم میں تم لوگوں کے درمیان اور کتنا عرصہ رہوں گا ؟ میرے بعد ان دو لوگوں کی پیروی کرنا نبی کریم ﷺ نے حضرت ابو بکر اور حضرت عمر رضی اللہ تعالی عنہما کی طرف اشارہ کر کے یہ بات فرمائی۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ أَبِي بَكْرٍ الصِّدِّيقِ رَضِيَ اللَّهُ عَنْهُ،صحابہ کرام رضی اللہ عنہم کے فضائل و مناقب، حضرت ابوبکر صدیق رضی اللہ عنہ کے مناقب و فضائل،جلد١،ص٧٣،حديث نمبر ٩٧)

حضرت ابن عباس رضی اللہ تعالی عنہ بیان کرتے ہیں، حضرت عمر رضی اللہ عنہ (کی میت ) کو تخت پر رکھا گیا لوگوں نے انہیں گھیر لیا وہ ان کا جنازہ اٹھائے جانے سے پہلے ان کے لئے دعا کر رہے تھے۔ میں بھی ان میں موجود تھا میرا ذہن اس وقت متوجہ ہوا جب کسی شخص نے میرے کندھے کو پکڑا۔ وہ حضرت علی بن ابو طالب رضی اللہ عنہ تھے۔ انہوں نے حضرت عمر رضی اللہ عنہ کے لئے دعائے رحمت کی اور بولے: آپ نے اپنے بعد کوئی ایسا شخص نہیں چھوڑا جس کے بارے میں مجھے یہ پسند ہو کہ میں اس کے عمل کی طرح کا عمل لے کر اللہ تعالیٰ کی بارگاہ میں حاضر ہوں ۔ اللہ تعالی کی قسم مجھے یہ امید ہے اللہ تعالی آپ کو آپ کے دونوں ساتھیوں کے ہمراہ رکھے گا کیونکہ مجھے یاد ہے میں نے بکثرت نبی کریم ﷺ کو یہ ارشاد فرماتے ہوئے سنا ہے ۔ آپ ﷺ نے ارشاد فرمایا: میں ابو بکر اور عمر گئے، میں ابوبکر اور عمر اندر آئے میں ابوبکر اور عمر باہر گئے۔تو میں یہی سمجھتا ہوں کہ اللہ تعالی آپ کو آپ کے دونوں ساتھیوں کے ہمراہ رکھے گا. (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ أَبِي بَكْرٍ الصِّدِّيقِ رَضِيَ اللَّهُ عَنْهُ،صحابہ کرام رضی اللہ عنہم کے فضائل و مناقب، حضرت ابوبکر صدیق رضی اللہ عنہ کے مناقب و فضائل،جلد١،ص٧٤،حديث نمبر ٩٨)

حضرت ابن عمر رضی اللہ عنہ بیان کرتے ہیں: نبی کریم ﷺ تشریف لائے تو آپ کے ایک جانب حضرت ابوبکر رضی اللہ عنہ اور دوسری جانب حضرت عمر رضی اللہ عنہ تھے۔ آپﷺ نے فرمایا: ہمیں ( قیامت کے دن ) اسی طرح مبعوث کیا جائے گا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ أَبِي بَكْرٍ الصِّدِّيقِ رَضِيَ اللَّهُ عَنْهُ،صحابہ کرام رضی اللہ عنہم کے فضائل و مناقب، حضرت ابوبکر صدیق رضی اللہ عنہ کے مناقب و فضائل،جلد١،ص٧٥،حديث نمبر ٩٩)

حضرت ابو جحیفہ رضی اللہ عنہ روایت کرتے ہیں، نبی کریم ﷺ نے ارشاد فرمایا ہے : ابوبکر رضی اللہ عنہ اور عمر رضی اللہ عنہ جنت کے (دنیا میں) پہلے آنے والے یا بعد میں آنے والے تمام عمر رسیدہ افراد کے سردار ہیں البتہ انبیاء اور مرسلین کا حکم مختلف ہے. (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ أَبِي بَكْرٍ الصِّدِّيقِ رَضِيَ اللَّهُ عَنْهُ،صحابہ کرام رضی اللہ عنہم کے فضائل و مناقب، حضرت ابوبکر صدیق رضی اللہ عنہ کے مناقب و فضائل،جلد١،ص٧٥،حديث نمبر ١٠٠)

حضرت انس بن مالک رضی اللہ عنہ بیان کرتے ہیں عرض کی گئی یارسول اللہﷺ آپ کے نزدیک سب سے زیادہ محبوب کون ہے نبی کریم نے فرمایا عائشہ عرض کی گئی مردوں میں سے کون ہیں؟ آپ نے فرمایا: اس کا والد۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ أَبِي بَكْرٍ الصِّدِّيقِ رَضِيَ اللَّهُ عَنْهُ،صحابہ کرام رضی اللہ عنہم کے فضائل و مناقب، حضرت ابوبکر صدیق رضی اللہ عنہ کے مناقب و فضائل،جلد١،ص٧٥،حديث نمبر ١٠١)

عبد اللہ بن شقیق بیان کرتے ہیں: میں نے حضرت عائشہ رضی اللہ عنہا سے دریافت کیا سب صحابہ کرام رضی اللہ عنہم میں آپﷺ کو سب سے زیادہ محبوب کون تھا؟ حضرت عائشہ رضی اللہ عنہا نے جواب دیا: حضرت ابوبکر رضی اللہ عنہ میں نے دریافت کیا: پھر اس کے بعد کون تھا؟ انہوں نے جواب دیا: حضرت عمر رضی اللہ عنہ ہے میں نے دریافت کیا پھر اس کے بعد کون تھا؟ انہوں نے جواب دیا: حضرت ابو عبیدہ بن جراح رضی اللہ عنہ۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُمَرَ رَضِيَ اللَّهُ عَنْهُ،باب:عمر بن خطاب رضی اللہ عنہ کے مناقب و فضائل،جلد١،ص٧٦،حديث نمبر ١٠٢)

حضرت عبد اللہ بن عباس رضی اللہ عنہما بیان کرتے ہیں جب حضرت عمر رضی اللہ عنہ نے اسلام قبول کیا تو حضرت جبرائیل علیہ السلام نازل ہوئے اور انہوں نے عرض کی اے حضرت محمدﷺ آسمان کے رہنے والے حضرت عمر رضی اللہ عنہ کے اسلام قبول کرنے پر بہت خوش ہیں‌۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُمَرَ رَضِيَ اللَّهُ عَنْهُ،باب:عمر بن خطاب رضی اللہ عنہ کے مناقب و فضائل،جلد١،ص٧٦،حديث نمبر ١٠٣)

حضرت ابی بن کعب رضی اللہ عنہ روایت کرتے ہیں نبی کریم ﷺ نے ارشاد فرمایا ہے حق (یعنی اللہ تعالی) سب سے پہلے عمر رضی اللہ عنہ سے مصافحہ کرے گا اور سب سے پہلے عمر کو سلام کہے گا اور سب سے پہلے عمر رضی اللہ عنہ کا ہاتھ پکڑ کر جنت میں داخل کرے گا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُمَرَ رَضِيَ اللَّهُ عَنْهُ،باب:عمر بن خطاب رضی اللہ عنہ کے مناقب و فضائل،جلد١،ص٧٧،حديث نمبر ١٠٤)

سیده عائشہ صدیقہ رضی اللہ عنہا بیان کرتی ہیں نبی کریم ﷺ نے ارشاد فرمایا: اے اللہ! بطور خاص عمر بن خطاب کے ذریعے اسلام کو عزت عطا کر۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُمَرَ رَضِيَ اللَّهُ عَنْهُ،باب:عمر بن خطاب رضی اللہ عنہ کے مناقب و فضائل،جلد١،ص٧٧،حديث نمبر ١٠٥)

عبد اللہ بن سلمہ کہتے ہیں میں نے حضرت علی رضی اللہ عنہ کو یہ فرماتے ہوئے سنا ہے۔ اللہ کے رسولﷺ کے بعد لوگوں میں سب سے بہتر ابو بکر رضی اللہ عنہ ہیں اور ابوبکر رضی اللہ عنہ ان کے بعد لوگوں میں سب سے بہتر حضرت عمر رضی اللہ عنہ ہیں۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُمَرَ رَضِيَ اللَّهُ عَنْهُ،باب:عمر بن خطاب رضی اللہ عنہ کے مناقب و فضائل،جلد١،ص٧٨،حديث نمبر ١٠٦)

حضرت ابوہریرہ رضی اللہ عنہ بیان کرتے ہیں: ایک دن ہم نبی کریمﷺ کے پاس موجود تھے۔ نبی کریم ﷺ نے فرمایا: میں سویا ہوا تھا میں نے خود کو جنت میں دیکھا۔ وہاں ایک عورت محل کے ایک کنارے میں وضو کر رہی تھی۔ میں نے دریافت کیا یہ کسکا محل ہے ؟ فرشتوں نے بتایا یہ حضرت عمر رضی اللہ عنہ کا ہے تو مجھے تمہارا غصہ یاد آگیا۔ میں وہیں سے واپس آگیا۔ حضرت ابو ہریرہ رضی اللہ عنہ بیان کرتے ہیں حضرت عمر رضی اللہ عنہ رو پڑے، وہ بھی حاضرین میں موجود تھے۔ انہوں نے عرض کی: یارسول اللہﷺ کیا میں آپ پر غصہ کروں گا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُمَرَ رَضِيَ اللَّهُ عَنْهُ،باب:عمر بن خطاب رضی اللہ عنہ کے مناقب و فضائل،جلد١،ص٧٨،حديث نمبر ١٠٧)

حضرت ابوذر غفاری رضی اللہ عنہ بیان کرتے ہیں۔ میں نے نبی کریم ﷺ کو یہ بات ارشاد فرماتے ہوئے سنا ہے اللہ تعالی نے حق کو عمر کی زبان پر رکھ دیا ہے وہ اس کے مطابق بات کرتا ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُمَرَ رَضِيَ اللَّهُ عَنْهُ،باب:عمر بن خطاب رضی اللہ عنہ کے مناقب و فضائل،جلد١،ص٧٩،حديث نمبر ١٠٨)

حضرت ابوہریرہ رضی اللہ عنہ نبی کریم ﷺ کا یہ فرمان نقل کرتے ہیں۔ ہر نبی کا جنت میں ایک رفیق ہوگا اور وہاں میرا رفیق عثمان بن عفان ہوگا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُثْمَانَ رَضِيَ اللَّهُ عَنْهُ،باب:عثمان رضی اللہ عنہ کے مناقب و فضائل،جلد١،ص٧٩،حديث نمبر ١٠٩)

حضرت ابوہریرہ رضی اللہ عنہ بیان کرتے ہیں۔ نبی کریمﷺ مسجد کے دروازے کے قریب حضرت عثمان رضی اللہ عنہ سے ملے آپﷺ نے ارشاد فرمایا اے عثمان جبرائیل علیہ السلام مجھے یہ بتا رہے ہیں اللہ تعالٰی نے تمہاری شادی ام کلثوم رضی اللہ عنہا کے ساتھ طے کر دی ہے اور اس کا مہر وہی ہوگا جو رقیہ کا مہر تھا اس شرط پر(کہ تم نے ام کلثوم کے ساتھ بھی وہی سلوک کرنا ہے جو رقیہ ) کے ساتھ کیا تھا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُثْمَانَ رَضِيَ اللَّهُ عَنْهُ،باب:عثمان رضی اللہ عنہ کے مناقب و فضائل،جلد١،ص٨٠،حديث نمبر ١١٠)

حضرت کعب بن عجره رضی اللہ عنہ بیان کرتے ہیں ایک مرتبہ نبی کریمﷺ نے فتنے کا ذکر کیا اور یہ بتایا کہ یہ عنقرب رونما ہوگا اسی دوران ایک صاحب وہاں سے گزرے انہوں نے اپنے سر پر کچھ لیا ہوا تھا۔ نبی کریمﷺ نے فرمایا:یہ اس دن حق پر ہوگا۔، کعب رضی اللہ عنہ کہتے ہیں: میں تیزی سے اٹھا، اور عثمان رضی اللہ عنہ کے دونوں کندھے پکڑ لیے، پھر میں نے رسول اللہ صلی اللہ علیہ وسلم کی جانب رخ کر کے کہا: کیا یہی ہیں؟ آپ صلی اللہ علیہ وسلم نے فرمایا: ”ہاں یہی ہیں (جو ہدایت پر ہوں گے)“۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُثْمَانَ رَضِيَ اللَّهُ عَنْهُ،باب:عثمان رضی اللہ عنہ کے مناقب و فضائل،جلد١،ص٨١،حديث نمبر ١١١)

حضرت سیدہ عائشہ صدیقہ رضی اللہ عنہما بیان کرتی ہیں نبی کریم ﷺ نے ارشاد فرمایا ہے اے عثمان ہوسکتا ہے کہ اللہ تعالی تمہیں قمیص پہنائے اور لوگ اسے اتارنے کی کوشش کریں تو تم اسے نہ اتارنا نبی کریمﷺ نے یہ بات تین مرتبہ ارشاد فرمائی نعمان نامی راوی کہتے ہیں۔ میں نے سیدہ عائشہ رضی اللہ عنہما سے دریافت کیا آپ نے لوگوں کو اس کے بارے میں کیوں نہیں بتایا ؟ انہوں نے جواب دیا میں یہ بھول گئی تھی۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُثْمَانَ رَضِيَ اللَّهُ عَنْهُ،باب:عثمان رضی اللہ عنہ کے مناقب و فضائل،جلد١،ص٨١،حديث نمبر ١١٢)

سیدہ عائشہ صدیقہ رضی اللہ تعالی عنہما بیان کرتی ہے اپنی بیماری کے دوران نبی کریم ﷺ نے ارشاد فرمایا میری یہ خواہش ہے میرے پاس میرا کوئی ساتھی ہو، ہم نے عرض کی یا رسول اللہ ﷺ! کیا ہم حضرت ابوبکر رضی اللہ عنہ کو آپﷺ کے پاس بلوالیں تو نبی کریم ﷺ خاموش رہے ہم نے عرض کی حضرت عمر رضی اللہ عنہ کو آپﷺ کے پاس نہ بلوالیں، تو نبی کریمﷺ خاموش رہے ہم نے عرض کی کیا حضرت عثمان رضی اللہ عنہ کو آپﷺ کے لئے نہ بلوالیں ، نبی کریمﷺ نے فرمایا جی ہاں پھر حضرت عثمان رضی اللہ عنہ کے چہرے کا رنگ تبدیل ہوگیا۔ قیس نامی راوی یہ بیان کرتے ہیں ابو سہلہ نامی راوی نے یہ بات مجھے بتائی ہے حضرت عثمان غنی رضی اللہ عنہ کے غلام نے یہ بتایا تھا جس دن حضرت عثمان غنی کے گھر کا محاصرہ کیا گیا تھا اس دن انہوں نے یہ فرمایا تھا۔ بے شک اللہ کے رسول ﷺ نے مجھ سے ایک عہد لیا تھا جو میں اسے پورا کروں گا۔ علی نامی راوی نے اپنی روایت میں یہ الفاظ نقل کیے ہیں میں اس پر صبر کروں گا قیس نامی راوی یہ الفاظ نقل کیے ہیں لوگ یہ سمجھتے ہیں وہ احد اسی دن کے بارے میں تھا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عُثْمَانَ رَضِيَ اللَّهُ عَنْهُ،باب:عثمان رضی اللہ عنہ کے مناقب و فضائل،جلد١،ص٨٢،حديث نمبر ١١٣)

حضرت علی رضی اللہ عنہ بیان کرتے ہیں: نبی کریم ﷺ نے مجھ سے عہد لیا تھا کہ صرف مومن ہی مجھ سے محبت رکھے گا اور صرف منافق ہی مجھ سے بغض رکھے گا _ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عَلِيِّ بْنِ أَبِي طَالِبٍ رَضِيَ اللَّهُ عَنْهُ ،حضرت علی بن ابی طالب رضی اللہ عنہ کے مناقب و فضائل،جلد١،ص٨٣،حديث نمبر ١١٤)

مصعب بن سعد اپنے والد (حضرت سعد بن ابی وقاص رضی اللہ عنہ) کا یہ بیان نقل کرتے ہیں: نبی کریم ﷺ نے حضرت علی رضی اللہ عنہ سے فرمایا: کیا تم اس بات سے راضی نہیں ہو کہ تمہاری میرے ساتھ وہی نسبت ہو جو حضرت ہارون علیہ السلام کی حضرت موسیٰ علیہ السلام کے ساتھ تھی_ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عَلِيِّ بْنِ أَبِي طَالِبٍ رَضِيَ اللَّهُ عَنْهُ ،حضرت علی بن ابی طالب رضی اللہ عنہ کے مناقب و فضائل،جلد١،ص٨٣،حديث نمبر ١١٥)

حضرت براء بن عازب رضی اللہ عنہ بیان کرتے ہیں: نبی کریم ﷺ نے جو حج کیا تھا ہم اس میں نبی کریم ﷺ کے ساتھ آئے نبی کریم ﷺ نے راستے میں ایک جگہ پر پڑاؤ کیا پھر نبی کریم ﷺ نے لوگوں کو اکٹھا کرنے کا حکم دیا پھر آپ ﷺ نے حضرت علی رضی اللہ عنہ کا ہاتھ پکڑا اور ارشاد فرمایا: کیا میں تمام اہل ایمان کے نزدیک ان کی جان سے زیادہ قریب نہیں ہوں لوگوں نے عرض کی ” جی ہاں “ نبی کریم ﷺ نے دریافت کیا _ کیا میں ہر مومن کے نزدیک اس کی اپنی جان سے زیادہ قریب نہیں ہوں “ _ لوگوں نے عرض کی: جی ہاں ، تو نبی کریم ﷺ نے ارشاد فرمایا: ” جس شخص کا میں محبوب ہوں یہ بھی اس کا محبوب ہے اے اللہ جو اس سے محبت کرتا ہے تو اس سے محبت رکھ اور جو اس سے دشمنی رکھتا تو اس سے دشمنی رکھ“ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عَلِيِّ بْنِ أَبِي طَالِبٍ رَضِيَ اللَّهُ عَنْهُ ،حضرت علی بن ابی طالب رضی اللہ عنہ کے مناقب و فضائل،جلد١،ص٨٤،حديث نمبر ١١٦)

عبدالرحمن بن ابولیلی بیان کرتے ہیں۔ (میرے والد ) حضرت ابو لیلیٰ حضرت علی رضی اللہ عنہ کے ساتھ رات کے وقت دیر تک گفتگو کرتے رہتے تھے حضرت علی رضی اللہ عنہ سردی کے موسم میں گرمیوں والے کپڑے پہنتے تھے اور گرمی کے موسم میں سردیوں والے کپڑے پہنتے تھے ہم نے اپنے والد سے کہا: اگر آپ ان سے اس بارے میں دریافت کریں تو مناسب ہوگا ان کے دریافت کرنے پر حضرت علی رضی اللہ عنہ نے بتایا غزوہ خیبر کے دن نبی کریمﷺ نے مجھے بلوایا مجھے اس وقت آشوب چشم کی شکایت تھی میں نے عرض کی یارسول اللہﷺ مجھے آشوب چشم کی شکایت ہے تو نبی کریمﷺ نے اپنا لعاب دہن میری آنکھوں میں ڈالا پھر آپﷺ نے دعا کی "اے اللہ اس سے گرمی اور سردی کو پرے کر دے ۔ حضرت علی رضی اللہ عنہ بیان کرتے ہیں اس کے بعد مجھے بھی گری یا سردی محسوس نہیں ہوئی(اس دن ) نبی کریم ﷺ نے ارشاد فرمایا تھا: میں ایسے شخص کو بھیجوں گا جو اللہ اور اس کے رسولﷺ سے محبت رکھتا ہے اور اللہ اور اس کا رسولﷺ اس سے محبت رکھتے ہیں وہ فرار اختیار نہیں کرے گا ۔ لوگ مکمل طور پر نبی کریمﷺ کی طرف متوجہ ہوئے تو نبی کریمﷺ نے حضرت علی رضی اللہ عنہ کو بلوابا اور انہیں (لڑنے کا جھنڈا) عطا کیا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عَلِيِّ بْنِ أَبِي طَالِبٍ رَضِيَ اللَّهُ عَنْهُ ،حضرت علی بن ابی طالب رضی اللہ عنہ کے مناقب و فضائل،جلد١،ص٨٥،حديث نمبر ١١٧)

حضرت عبد اللہ بن عمر رضی اللہ عنہما روایت کرتے ہیں نبی کریمﷺ نے ارشاد فرمایا ہے حسن اور حسین جنت کے نوجوانوں کے سردار ہیں اور ان کے ماں باپ ان دونوں سے بہتر ہیں۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عَلِيِّ بْنِ أَبِي طَالِبٍ رَضِيَ اللَّهُ عَنْهُ ،حضرت علی بن ابی طالب رضی اللہ عنہ کے مناقب و فضائل،جلد١،ص٨٦،حديث نمبر ١١٨)

حضرت حبشی بن جناده رضی اللہ عنہ بیان کرتے ہیں: میں نے نبی کریمﷺ کو یہ ارشاد فرماتے ہوئے سنا ہے، علی مجھ سے ہے اور میں اس سے ہوں اور میری طرف سے صرف علی ( میرے ذمے والے کام ) ادا کرے گا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عَلِيِّ بْنِ أَبِي طَالِبٍ رَضِيَ اللَّهُ عَنْهُ ،حضرت علی بن ابی طالب رضی اللہ عنہ کے مناقب و فضائل،جلد١،ص٨٦،حديث نمبر ١١٩)

عباد بن عبد اللہ بیان کرتے ہیں : حضرت علی رضی اللہ عنہ نے ارشاد فرمایا میں اللہ کا بندہ ہوں اور اس کے رسول ﷺ کا بھائی ہوں اور میں صدیق اکبر ہوں یہ بات میرے بعد صرف وہی شخص کہے گا جو جھوٹا ہوگا میں نے دیگر لوگوں سے سات سال پہلے نماز پڑھنا شروع کی تھی۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عَلِيِّ بْنِ أَبِي طَالِبٍ رَضِيَ اللَّهُ عَنْهُ ،حضرت علی بن ابی طالب رضی اللہ عنہ کے مناقب و فضائل،جلد١،ص٨٧،حديث نمبر ١٢٠)

حضرت سعد بن ابی وقاص رضی اللہ عنہ بیان کرتے ہیں: حضرت معاویہ رضی اللہ عنہ ایک مرتبہ حج کرنے کے لیے آئے حضرت سعد رضی اللہ عنہ ان سے ملنے کے لیے گئے لوگوں نے حضرت علی رضی اللہ عنہ کا ذکر کردیا تو حضرت معاویہ رضی اللہ عنہ ان پر یک تنقید کی اس پر حضرت سعد کو غصہ آگیا اور وہ بولے تم ان صاحب کے بارے میں یہ باتیں کہ رہے ہو جبکہ میں نے نبی کریمﷺ کو یہ ارشاد فرماتے ہوئے سنا ہے جس کا میں محبوب ہوں علی بھی اس کا محبوب ہے ۔ میں نے نبی کریمﷺ کو یہ ارشاد فرماتے ہوئے بھی سنا ہے آپﷺ نے حضرت علی رضی اللہ عنہ سے فرمایا تھا تم میرے لیے وہی حیثیت رکھتے ہو جو حضرت ہارون کو موسی علیہ السلام کے ساتھ نسبت تھی۔ البتہ میرے بعد کوئی نبی نہیں ہوگا۔ اور میں نے نبی کریمﷺ کہ یہ ارشاد فرماتے ہوئے سنا ہے آج میں جھنڈا اس شخص کو دوں گا جو اللہ اور اس کے رسول سے محبت رکھتا ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عَلِيِّ بْنِ أَبِي طَالِبٍ رَضِيَ اللَّهُ عَنْهُ ،حضرت علی بن ابی طالب رضی اللہ عنہ کے مناقب و فضائل،جلد١،ص٨٨،حديث نمبر ١٢١)

حضرت جابر رضی اللہ عنہ بیان کرتے ہیں نبی کریم ﷺ نے ارشاد فرمایا یہ جنگ قریظہ کے موقع کی بات ہے، دشمن کی خبر کون مجھ تک لائے گا ؟ حضرت زبیر رضی اللہ تعالی عنہ نے عرض کی میں، آپ ﷺ نے پھر فرمایا: دشمن کی خبر کون مجھ تک پہنچائے گا؟ حضرت زبیر رضی اللہ عنہ نے عرض کی میں، نبی کریم ﷺ نے فرمایا: ہر نبی کا حواری ہوتا ہے اور میر احواری زبیر ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ الزبیر رَضِيَ اللَّهُ عَنْهُ ،حضرت زبیر رضی اللہ عنہ کے مناقب و فضائل،جلد١،ص٨٩،حديث نمبر ١٢٢)

حضرت زبیر رضی اللہ عنہ بیان کرتے ہیں: غزوۂ احد کے دن نبی کریم ﷺ نے میرے لئے اپنے ماں باپ کو اکٹھا کیا تھا (یعنی یہ فرمایا تھا میرے ماں باپ تم پر قربان ہوں) (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ الزبیر رَضِيَ اللَّهُ عَنْهُ ،حضرت زبیر رضی اللہ عنہ کے مناقب و فضائل،جلد١،ص٨٩،حديث نمبر ١٢٣)

ہشام بن عروہ اپنے والد کا یہ بیان نقل کرتے ہیں سیدہ عائشہ رضی اللہ عنہا نے مجھ سے فرمایا: اے عروہ تمہارے دادا اور نانا ان لوگوں میں سے ہیں جن کے بارے میں یہ ارشاد باری تعالی ہے۔(ترجمہ) یہ وہ لوگ ہیں جنہیں زخم لاحق ہوئے اور اس کے بعد بھی انہوں نے اللہ اور اس کے رسول ﷺ کے بلانے پر لبیک کہا، سیدہ عائشہ رضی اللہ عنہا کی مراد حضرت ابوبکر رضی اللہ تعالی عنہ اور حضرت زبیر رضی اللہ تعالی عنہ تھے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ الزبیر رَضِيَ اللَّهُ عَنْهُ ،حضرت زبیر رضی اللہ عنہ کے مناقب و فضائل،جلد١،ص٩٠،حديث نمبر ١٢٤)

حضرت جابر رضی اللہ عنہ بیان کرتے ہیں۔ حضرت حضرت طلحہ رضی اللہ تعالی عنہ نبی کریم ﷺ کے پاس سے گزرے تو آپ ﷺ نے ارشاد فرمایا یہ ایک شہید ہے جوز مین پر چل رہا ہے( یعنی یہ آگے جا کر شہید ہوگا) (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ طلحۃ بن عبیداللہ رَضِيَ اللَّهُ عَنْهُ ،حضرت طلحہ بن عبید اللہ رضی اللہ عنہ کے مناقب و فضائل،جلد١،ص٩٠،حديث نمبر ١٢٥)

حضرت معاویہ بن ابو سفیان رضی اللہ تعالی عنہ بیان کرتے ہیں نبی کریم ﷺ نے حضرت طلحہ رضی اللہ عنہ کی طرف دیکھا اور یہ ارشارفرمایا یہ ان لوگوں میں سے ایک ہے جنہوں نے اپنے کئے ہو عہد کو پورا کیا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ طلحۃ بن عبیداللہ رَضِيَ اللَّهُ عَنْهُ ،حضرت طلحہ بن عبید اللہ رضی اللہ عنہ کے مناقب و فضائل،جلد١،ص٩١،حديث نمبر ١٢٦)

موسیٰ بن طلحہ بیان کرتے ہیں ہم لوگ حضرت معاویہ رضی اللہ عنہ کے پاس بیٹھے ہوئے تھے۔ انہوں نے ارشاد فرمایا: میں گواہی دے کر یہ بات کہتا ہوں کہ میں نے نبی کریم ﷺ کو یہ ارشاد فرماتے ہوئے سنا ہے طلحہ رضی اللہ تعالی عنہ ان لوگوں میں سے ایک ہے جنہوں نے اپنی نذر کو پورا کیا ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ طلحۃ بن عبیداللہ رَضِيَ اللَّهُ عَنْهُ ،حضرت طلحہ بن عبید اللہ رضی اللہ عنہ کے مناقب و فضائل،جلد١،ص٩٢،حديث نمبر ١٢٧)

قیس بیان کرتے ہیں۔ میں نے حضرت طلحہ رضی اللہ عنہ کے شل ہاتھ کو دیکھا ہے جس کے ذریعے انہوں نے غزوۂ احد کے موقع پر نبی کریم ﷺ کا بچاو کیا تھا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ طلحۃ بن عبیداللہ رَضِيَ اللَّهُ عَنْهُ ،حضرت طلحہ بن عبید اللہ رضی اللہ عنہ کے مناقب و فضائل،جلد١،ص٩٢،حديث نمبر ١٢٨)

حضرت علی رضی اللہ تعالی عنہ بیان کرتے ہیں میں نے نبی کریم ﷺ کو کبھی نہیں دیکھا کہ آپ ﷺ نے حضرت سعد بن مالک رضی اللہ تعالی عنہ کے علاوہ کسی اور کے لیے اپنے ماں باپ کو جمع کیا ہو (یعنی کسی اور کے بارے میں یہ فرمایا ہو ( میرے ماں باپ تم پر قربان ہوں) نبی کریم ﷺ نے غزوۂ احد کے دن حضرت سعد رضی اللہ تعالی عنہ سے یہ فرمایا تھا اے سعد رضی اللہ عنہ تیراندازی کرو میرے ماں باپ تم پر قربان ہوں۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ سعد بن ابی وقاص رَضِيَ اللَّهُ عَنْهُ ،حضرت سعد بن ابی وقاص رضی اللہ عنہ کے مناقب و فضائل،جلد١،ص٩٢،حديث نمبر ١٢٩)

سعید بن مسیب کہتے ہیں میں نے حضرت سعد رضی اللہ عنہ کو یہ بیان کرتے ہوئے سنا ہے، غزوۂ احد کے دن نبی کریم ﷺ نے میرے لئے اپنے ماں باپ کو اکٹھا کیا تھا (یعنی یہ فرمایا تھا: میرے ماں باپ تم پر قربان ہوں) آپ ﷺ نے فرمایا تھا: اے سعد رضی اللہ عنہ تم تیراندازی کر میرے ماں باپ تم پر قربان ہوں۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ سعد بن ابی وقاص رَضِيَ اللَّهُ عَنْهُ ،حضرت سعد بن ابی وقاص رضی اللہ عنہ کے مناقب و فضائل،جلد١،ص٩٣،حديث نمبر ١٣٠)

قیس بیان کرتے ہیں میں نے حضرت سعد رضی اللہ عنہ کو یہ بیان کرتے ہوئے سنا ہے۔ میں پہلا عرب شخص ہوں جس نے اللہ کی راہ میں تیراندازی کی تھی۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ سعد بن ابی وقاص رَضِيَ اللَّهُ عَنْهُ ،حضرت سعد بن ابی وقاص رضی اللہ عنہ کے مناقب و فضائل،جلد١،ص٩٣،حديث نمبر ١٣١)

سعید بن مسیب بیان کرتے ہیں میں نے حضرت سعد بن ابی وقاص رضی اللہ عنہ۔ کو یہ بیان کرتے ہوئے سنا ہے جس دن میں نے اسلام قبول کیا اس دن کسی نے نہیں قبول کیا تھا میں سات دن اسی حالت میں رہا اور میں اسلام قبول کرنے والا تیسرا شخص تھا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ سعد بن ابی وقاص رَضِيَ اللَّهُ عَنْهُ ،حضرت سعد بن ابی وقاص رضی اللہ عنہ کے مناقب و فضائل،جلد١،ص٩٤،حديث نمبر ١٣٢)

حضرت زید بن عمرو بن نفیل رضی اللہ عنہ بیان کرتے ہیں۔ نبی کریم ﷺ دس آدمیوں میں سے دسوے تھے پھر آپ ﷺ نے ارشاد فرمایا: ”ابوبکر جنت میں ہیں، عمر جنت میں ہیں، عثمان جنت میں ہیں، علی جنت میں ہیں، طلحہ جنت میں ہیں، زبیر جنت میں ہیں، سعد جنت میں ہیں، عبدالرحمٰن جنت میں ہیں“، حضرت سعید بن زید رضی اللہ تعالی عنہ سے دریافت کیا گیا نواں آدمی کون ہے؟ تو انہوں نے جواب دیا ؛میں۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ فَضَائِلِ الْعَشَرَةِ رَضِيَ اللَّهُ عَنْهُمْ،عشرہ مبشرہ رضی اللہ عنہم کے فضائل و مناقب،جلد١،ص٩٤،حديث نمبر ١٣٣)

حضرت سعید بن زید رضی اللہ عنہ بیان کرتے ہیں۔ میں نبی کریم ﷺ کے بارے میں گواہی دے کر یہ بات بیان کرتا ہوں کہ میں نے آپ ﷺ کو یہ بات ارشاد فرماتے ہوئے سناہے ؛حرا؛ اپنی جگہ پر رہو تم پر ایک نبی، ایک صدیق اور ایک شہید موجود ہے۔ پھر نبی کریمﷺ نے ان کی گنتی کروائی۔ ابوبکر، عمر، عثمان، علی، طلحہ، زبیر ، سعد، عبدالرحمن بن عوف اور سعید بن زید ( جنتی ہیں ) (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ فَضَائِلِ الْعَشَرَةِ رَضِيَ اللَّهُ عَنْهُمْ،عشرہ مبشرہ رضی اللہ عنہم کے فضائل و مناقب،جلد١،ص٩٥،حديث نمبر ١٣٤)

حضرت حذیفہ رضی اللہ عنہ بیان کرتے ہیں اہل نجران نبی کریم ﷺ کی خدمت میں حاضر ہوئے اور عرض کی: آپ ﷺ ہمارے ساتھ ایک امین شخص کو بھیج دیں نبی کریم ﷺ نے فرمایا میں تمہارے ساتھ ایک ایسے امین شخص کو بھیجوں گا جو واقعی امین ہوگا لوگوں نے سراٹھا کر دیکھنا شروع کیا تو نبی کریم ﷺ نے حضرت ابو عبیدہ بن جراح رضی اللہ عنہ کو بھیجا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ أَبِي عُبَيْدَةَ بْنِ الْجَرَّاحِ رَضِيَ اللَّهُ عَنْهُ، ابوعبیدہ بن جراح رضی اللہ عنہ کے مناقب و فضائل،جلد١،ص٩٥،حديث نمبر ١٣٥)

حضرت عبداللہ رضی اللہ عنہ بیان کرتے ہیں نبی کریم ﷺ نے حضرت ابو عبیدہ بن جراح رضی اللہ عنہ کے بارے میں فرمایا تھا۔ یہ اس امت کا امین ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ أَبِي عُبَيْدَةَ بْنِ الْجَرَّاحِ رَضِيَ اللَّهُ عَنْهُ، ابوعبیدہ بن جراح رضی اللہ عنہ کے مناقب و فضائل،جلد١،ص٩٦،حديث نمبر ١٣٦)

حضرت علی رضی اللہ عنہ بیان کرتےہیں نبی کریم ﷺ نے ارشاد فرمایا ہے اگر میں نے مشورہ لیے بغیر کسی کو خلیفہ (امیر) مقرر کرنا ہوتا تو ابن ام عبد (یعنی حضرت عبداللہ بن مسود رضی اللہ عنہ ) کو خلیفہ (امیر) مقرر کردیتا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عَبْدِ اللَّهِ بْنِ مَسْعُودٍ رَضِيَ اللَّهُ عَنْهُ، عبداللہ بن مسعود رضی اللہ عنہ کے مناقب و فضائل،جلد١،ص٩٧،حديث نمبر ١٣٧)

حضرت عبداللہ بن مسعود رضی اللہ عنہ بیان کرتے ہیں : حضرت ابوبکر رضی اللہ عنہ اور حضرت عمر رضی اللہ عنہ نے انہیں یہ خوشخبری دی تھی کہ نبی کریم ﷺ نے یہ بات ارشاد فرمائی ہے، جو شخص یہ بات پسند کرتا ہو کہ وہ قرآن کو بالکل اسی طریقے سے پڑھے جس طرح وہ نازل ہوا ہے تو اسے ابن ام عبد (یعنی حضرت عبداللہ بن مسعودی کی قرأت کے مطابق ) تلاوت کرنا چاہیے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عَبْدِ اللَّهِ بْنِ مَسْعُودٍ رَضِيَ اللَّهُ عَنْهُ،عبداللہ بن مسعود رضی اللہ عنہ کے مناقب و فضائل۔،جلد١،ص٩٧،حديث نمبر ١٣٨)

حضرت عبداللہ رضی اللہ عنہ بیان کرتے ہیں۔ نبی کریم ﷺ نے مجھ سے یہ فرمایا تمہارے لیے میری طرف سے یہ اجازت ہے کہ تم پردہ اٹھا کر) اندر آسکتے ہو) اور میری راز کی بات سن سکتے ہو لیکن یہ اجازت اس وقت تک ہے جب تک میں تمہیں منع نہیں کردیتا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،باب فی عبد اللہ بن مسعود رضی اللہ عنہ، حضرت عبد اللہ بن مسعود رضی اللہ عنہ کے مناقب و فضائل،جلد١،ص٩٤،حديث نمبر ١٣٩)

حضرت عباس بن عبد المطلب رضی اللہ عنہ بیان کرتے ہیں ایک مرتبہ ہم قریش سے تعلق رکھنے والے کچھ لوگوں کے پاس آئے وہ پہلے بات چیت کر رہے تھے( ہمیں دیکھ کر ) انہوں نے اپنی بات چیت منقطع کر دی ہم نے اس بات کا تذکرہ نبی کریم ﷺ سے کیا تو آپ ﷺ نے ارشاد فرمایا لوگوں کو کیا ہو گیا ہے وہ آپس میں بات چیت کر رہے ہوتے ہیں پھر جب وہ میرے اہل بیت میں سے کسی شخص کو دیکھتے ہیں توبات چیت کو منقطع کر دیتے ہیں اللہ کی قسم کسی بھی شخص کے دل میں ایمان اس وقت تک داخل نہیں ہوگا جب تک وہ اہل بیت کے ساتھ اللہ تعالی کی رضا کے لیے اور ان کے ساتھ میری رشتے داری کی وجہ سے ان سے محبت نہیں کرے گا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ الْعَبَّاسِ بْنِ عَبْدِ الْمُطَّلِبِ رَضِيَ اللَّهُ عَنْهُ، عباس بن عبدالمطلب رضی اللہ عنہ کے مناقب و فضائل،جلد١،ص٩٩،حديث نمبر ١٤٠)

حضرت عبداللہ بن عمر رضی اللہ عنہ روایت کرتے ہیں نبی کریم ﷺ نے ارشاد فرمایا ہے بے شک اللہ تعالٰی نے مجھے اپنا خلیل بنایا ہے جس طرح اس نے حضرت ابراہیم علیہ السلام کو اپنا خلیل بنایا تھا تو قیامت کے دن جنت میں میرے اور حضرت ابراہیم علیہ السلام کے ٹھہرنے کی جگہ آمنے سامنے ہوگی اور حضرت عباس رضی اللہ عنہ ہمارے درمیان میں ہوں گے جس طرح دو دوستوں کے درمیان ایک مومن ہوتا ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ الْعَبَّاسِ بْنِ عَبْدِ الْمُطَّلِبِ رَضِيَ اللَّهُ عَنْهُ، عباس بن عبدالمطلب رضی اللہ عنہ کے مناقب و فضائل،جلد١،ص٩٩،حديث نمبر ١٤١)

حضرت ابو ہریرہ رضی اللہ عنہ نبی کریم ﷺ کے بارے میں یہ بات نقل کرتے ہیں: آپ ﷺ نے حضرت امام حسین رضی اللہ عنہ کے بارے میں یہ فرمایا تھا۔ اے اللہ! میں اس سے محبت رکھتا ہوں تو بھی اس سے محبت رکھ اور جو اس سے محبت رکھتا ہو اس سے بھی محبت رکھ۔ حضرت ابو ہریرہ رضی اللہ عنہ بیان کرتے ہیں نبی کریم ﷺ نے انہیں اپنے سینے کے ساتھ لپٹا لیا تھا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ الْحَسَنِ وَالْحُسَيْنِ ابْنَيْ عَلِيِّ بْنِ أَبِي طَالِبٍ رَضِيَ اللَّهُ عَنْهُمْ،علی رضی اللہ عنہ کے بیٹوں حسن و حسین رضی اللہ عنہما کے مناقب و فضائل،جلد١،ص١٠٠،حديث نمبر ١٤٢)

حضرت ابو ہریرہ رضی اللہ عنہ روایت کرتے ہیں نبی کریم ﷺ نے ارشاد فرمایا ہے جو شخص حسن (رضی اللہ عنہ) اور حسین(رضی اللہ عنہ) سے محبت رکھتا ہے وہ مجھ سے محبت رکھتا ہے اور جو شخص انہیں ناپسند کرتا ہے وہ مجھے ناپسند کرتا ہے، (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ الْحَسَنِ وَالْحُسَيْنِ ابْنَيْ عَلِيِّ بْنِ أَبِي طَالِبٍ رَضِيَ اللَّهُ عَنْهُمْ،علی رضی اللہ عنہ کے بیٹوں حسن و حسین رضی اللہ عنہما کے مناقب و فضائل،جلد١،ص١٠١،حديث نمبر ١٤٣)

حضرت یعلی بن مره رضی اللہ عنہ بیان کرتے ہیں ایک مرتبہ وہ لوگ نبی کریم ﷺ کے ساتھ ایک کھانے میں شریک ہوئے جس کی دعوت نبی کریم ﷺ کودی گئی تھی وہاں حضرت حسین رضی اللہ عنہ گلی میں کھیل رہے تھے راوی کہتے ہیں نبی کریم ﷺ لوگوں سے آگے بڑھے اور اپنے دونوں ہاتھ پھیلا دیئے (تا کہ حضرت حسین رضی اللہ عنہ کو پکڑیں) تو وہ ادھر سے ادھر بھاگنے لگے۔ نبی کریم ﷺ انہیں ہنسا رہے تھے یہاں تک کہ نبی کریم ﷺ نے انہیں پکڑ لیا پھر نبی کریم ﷺ نے اپنا ایک دست مبارک ان کی ٹھوڑی کے بیچ رکھا اور دوسر دست مبارک ان کے سر کے او پر رکھا اوران کا بوسہ لیا اور ارشاد فرمایا حسین مجھ سے ہے اور میں حسین سے ہوں اللہ تعالی اس شخص سے محبت رکھے جو حسین سے محبت رکھتا ہے حسین واقعی ہی نواسہ ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ الْحَسَنِ وَالْحُسَيْنِ ابْنَيْ عَلِيِّ بْنِ أَبِي طَالِبٍ رَضِيَ اللَّهُ عَنْهُمْ،علی رضی اللہ عنہ کے بیٹوں حسن و حسین رضی اللہ عنہما کے مناقب و فضائل،جلد١،ص١٠١،حديث نمبر ١٤٤)

صبیح جو حضرت سیده ام سلمہ رضی اللہ عنہا کے آزاد کردہ غلام ہیں حضرت زید بن ارقم کے حوالے سے یہ بات نقل کرتے ہیں نبی کریم ﷺ نے حضرت علی رضی اللہ تعالی عنہ، حضرت سیدہ فاطمہ رضی اللہ تعالی عنہا، حضرت حسن اور حضرت حسین رضی اللہ تعالی عنہما سے یہ ارشاد فرمایا: میں اس کے ساتھ صلح کروں گا جن کے ساتھ تم صلح کروگے اور میں اس شخص کے ساتھ جنگ کروں گا جس کے ساتھ تم جنگ کرو گے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ الْحَسَنِ وَالْحُسَيْنِ ابْنَيْ عَلِيِّ بْنِ أَبِي طَالِبٍ رَضِيَ اللَّهُ عَنْهُمْ،علی رضی اللہ عنہ کے بیٹوں حسن و حسین رضی اللہ عنہما کے مناقب و فضائل،جلد١،ص١٠٢،حديث نمبر ١٤٥)

حضرت علی‌ رضی اللہ عنہ بیان کرتے ہیں ایک مرتبہ میں نبی کریم ﷺ کے پاس بیٹا ہوا تھا۔ عمار بن یاسر نے نبی کریم ﷺ کے ہاں اندر آنے کی اجازت مانگی تو نبی کریم ﷺ نے ارشاد فرمایا: اسے اندر آنے کے لئے کہو پاک شخصیت اور پاک خصلت والے شخص کو خوش آمدید۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عمار بن یاسر، عمار بن یاسر رضی اللہ عنہ کے مناقب و فضائل،جلد١،ص١٠٣،حديث نمبر ١٤٦)

حضرت ہانی بن ہانی رضی اللہ عنہ بیان کرتے ہیں حضرت عمار رضی اللہ عنہ حضرت علی رضی اللہ عنہ کے پاس آئے تو حضرت علی رضی اللہ عنہ نے فرمایا اس شخص کو خوش آمدید جو پاک اور پاکیزہ ہیں(حضرت علی نے بتایا) میں نے نبی کریم ﷺ کو یہ ارشاد فرماتے ہوئے سنا ہے: عمار کی ہڈیوں میں ایمان بھرا ہوا ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عمار بن یاسر، عمار بن یاسر رضی اللہ عنہ کے مناقب و فضائل،جلد١،ص١٠٣،حديث نمبر ١٤٧)

سیده عائشہ صدیقہ رضی اللہ عنہا بیان کرتی ہیں نبی کریم ﷺ نے ارشاد فرمایا عمار کو جب بھی دو معاملات کے بارے میں اختیار دیا گیا تو اس نے اس کو اختیار کیا جو زیادہ بہتر ہو۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ عمار بن یاسر، عمار بن یاسر رضی اللہ عنہ کے مناقب و فضائل،جلد١،ص١٠٤،حديث نمبر ١٤٨)

ابن بریدہ اپنے والد کا یہ بیان نقل کرتے ہیں نبی کریم ﷺ نے ارشاد فرمایا اللہ تعالیٰ نے مجھے چارلوگوں کے ساتھ محبت کرنے کی حکم دیا ہے اور اس نے مجھے یہ بتایا ہے وہ بھی ان سے محبت کرتا ہے۔ عرض کی گئی یارسول اللہ ﷺ ان کے نام ہمیں بتائیے۔ آپ ﷺ نے ارشاد فرمایا علی رضی اللہ عنہ ان میں سے ایک ہے۔ آپ نے یہ بات تین مرتبہ دہرائی (اور پھر یہ نام لیے ) ابوذر مقداد اور سلمان ۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ سَلْمَانَ وَأَبِي ذَرٍّ وَالْمِقْدَادِ، سلمان، ابوذر اور مقداد رضی اللہ عنہم کے مناقب و فضائل،جلد١،ص١٠٤،حديث نمبر ١٤٩)

حضرت عبداللہ بن مسعود رضی اللہ عنہ بیان کرتے ہیں سب سے پہلے سات افراد نے اپنے اسلام کو ظاہر کیا نبی کریم ﷺ ،حضرت ابوبکر رضی اللہ عنہ ، حضرت عمار رضی اللہ عنہ ،ان کی والدہ سیدہ سمیہ رضی اللہ عنہا، حضرت صہیب رضی اللہ عنہ ، حضرت بلال رضی اللہ عنہ اور حضرت مقداد رضی اللہ عنہ جہاں تک نبی کریم ﷺ کا تعلق ہے تو اللہ تعالی نے ان کے چچا جناب ابو طالب کی وجہ سے انہیں محفوظ رکھا جہاں تک حضرت ابوکر رضی اللہ عنہ کا تعلق ہے تو اللہ تعالیٰ نے ان کی قوم کی وجہ سے انہیں محفوظ رکھا جہاں تک باقی افراد کا تعلق ہے تو انہیں مشرکین نے پکڑ لیاوہ انہیں لوہے کی زرہیں پہنا دیتے تھے اور انہیں تپتی دھوپ میں چھوڑ دیتے تھے۔ان میں سے ہر ایک نے کسی نہ کسی حوالے سے وہ کام کیا جو وہ لوگ چاہتے تھے سوائے حضرت بلال رضی اللہ عنہ کے کیونکہ انہوں نے اللہ تعالیٰ کی محبت میں اپنے آپ کو بے حیثیت کردیا تھا اور اپنی قوم کے افراد کے لیے بھی بے حیثیت ہو گئے تھے وہ مشرکین انہیں پکڑ کر انہیں اپنے بچوں کے سپرد کر دیتے تھے اور وہ بچے انہیں مکہ کی گھاٹیوں میں گھماتے تھے اور حضرت بلال رضی اللہ عنہ احد ,احد کہتے تھے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ:بَابُ: فَضَائِلِ بِلاَلٍ،حضرت بلال رضی اللہ عنہ کے مناقب و فضائل،جلد١،ص١٠٥،حديث نمبر ١٥٠)

حضرت انس رضی اللہ تعالیٰ عنہ بیان کرتےہیں: نبی پاک صلی اللہ علیہ وسلم نے ارشاد فرمایا ہے: اللہ پاک کی راہ میں مجھے جتنی اذیت دی گئی ہے اتنی کسی کو اذیت نہیں دی گئی ۔اللہ پاک کی راہ میں مجھے جتنا خوفزدہ کیا گیاہے اتنا اور کسی کو کیا گیااور مجھ پر تیس دن ایسے بھی گزرے ہیں کہ جب میرے اور بلال کے لیے اتنا بھی کھانا نہیں تھا کہ اسے کوئی روح کھا سکے ماسوائے اس چیز کے جو بلال کی بغل میں آجاتی۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ:بَابُ: فَضَائِلِ بِلاَلٍ،حضرت بلال رضی اللہ عنہ کے مناقب و فضائل،جلد١،ص١٠٦،حديث نمبر ١٥١)

سالم بیان کرتے ہیں ایک شاعر نے بلال بن عبداللہ رضی اللہ تعالیٰ عنہ کی تعریف کرتے ہوئے یہ شعر کہا " بلال بن عبداللہ رضی اللہ تعالیٰ عنہ بلال نامی سب لوگوں میں سے بہتر ہیں تو حضرت عبد اللہ بن عمر رضی اللہ تعالیٰ عنہ نے فرمایا : تم نے جھوٹ کہا ہے ایسا نہیں ہے بلکہ اللہ کے رسول صلی اللہ علیہ وسلم کے بلال رضی اللہ تعالیٰ عنہ بلال نامی لوگوں میں سے سب بہتر تھے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ:بَابُ: فَضَائِلِ بِلاَلٍ،حضرت بلال رضی اللہ عنہ کے مناقب و فضائل،جلد١،ص١٠٥،حديث نمبر ١٥٢)

ابو لیلی کندی بیان کرتے ہیں حضرت خباب رضی اللہ تعالیٰ عنہ حضرت عمر رضی اللہ تعالیٰ عنہ کی خدمت میں حاضر ہوے تو انہوں نے فرمایا آپ قریب ہو جائیں کیونکہ اس محفل میں میرے قریب ہونے کے) آپ سے زیاده حقدار صرف عمار رضی اللہ تعالیٰ عنہ ہیں پھر حضرت خباب رضی اللہ تعالیٰ عنہ نے اپنی پشت پر موجود وہ نشان دکھائےجو مشرکین انہیں تکلیف دیا کرتے تھے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم:بَابُ فَضَائِلِ خَبَّاب. حضرت خباب رضی اللہ عنہ کے مناقب و فضائل۔،جلد١،ص١٠٦،حديث نمبر ١٥٣)

حضرت انس بن مالک رضی اللہ تعالیٰ عنہ بیان کرتے ہیں نبی کریم صلی اللہ علیہ وسلم نے ارشاد فرمایا ہے میری امت میں میری امت کے لیے سب سے زیاده رحم کرنے والا ابوبکر ہے اور میری امت میں سب سے سخت عمر، بے حیاء کے اعتبار سے سب سے زیادہ سچا عثمان ہے اور سب بہترین فیصلہ کرنے والا على ہے ۔۔ اللہ کی کتاب کی سب سے اچھی قراءت کرنے والا ابي بن كعب ہے۔۔ حلال اور حرام کا سب سے زیادہ علم رکھنے والا معاذ بن جبل ہے ۔۔ وراثت سے متعلق سب سے زیادہ علم رکھنے والا زير بن ثابت ہے اور ہر امت کا ایک امین ہوتا ہے اس امت کا امین ابو عبيده بن جراح ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم:بَابُ فَضَائِلِ خَبَّاب. حضرت خباب رضی اللہ عنہ کے مناقب و فضائل۔،جلد١،ص١٠٧،حديث نمبر ١٥٤)

ایک اور سند سے حدیث نمبر ١٥٤ کے مثل مروی ہے ۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم:بَابُ فَضَائِلِ خَبَّاب. حضرت خباب رضی اللہ عنہ کے مناقب و فضائل۔،جلد١،ص١٠٨،حديث نمبر ١٥٥)

حضرت عبد اللہ بن عمر رضی اللہ عنہ بیان کرتے ہیں۔ میں نے نبی کریمﷺ کو ارشاد فرماتے ہوئے سنا ہے ابوذر سے زیادہ سچے کسی شخص پر آسان نے سایہ نہیں کیا اور زمین نے اسے اٹھایا نہیں ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ فضل ابی ذر،حضرت ابوذر غفاری رضی اللہ عنہ کے مناقب و فضائل،جلد١،ص١٠٨،حديث نمبر ١٥٦)

حضرت براء بن عازب رضی تعالیٰ عنہ بیان کرتے ہیں : نبی کریم صلی اللہ علیہ وسلم کی خدمت میں ریشم کا ایک کپڑا بیش کیا گیالوگ اسے ہاتھوں میں لے کر اس کی خوبصورتی اور نرمی پر حیرا نگی کا اظہار کرنے لگے ۔۔ نبی کریم صلی اللہ علیہ وسلم نے فرمایا : کیا تم اس پر حیرا نگی کا اظہار کررہے ہو ؟ تو لوگوں نے غرض کی یارسول اللہ جی ہاں ۔ نبی كريم صلى اللہ علیہ وسلم نے فرمایا جس کے دست قدرت میں میری جان ہے جنت میں سعد کے رومال اس سے زیادہ بہتر ہے۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ سَعْدِ بْنِ مُعَاذٍ،حضرت سعد بن معاذ رضی اللہ عنہ کے مناقب و فضائل،جلد١،ص١٠٨،حديث نمبر ١٥٧)

حضرت جابر رضی اللہ تعالیٰ عنہ بیان کرتے ہیں میں نے نبی کریم صلی اللہ علیہ وسلم کو یہ فرماتے ہوئے سنا ہے سعد بن معاذ کے مر نے پر عرش جھوم اٹھا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ سَعْدِ بْنِ مُعَاذٍ،حضرت سعد بن معاذ رضی اللہ عنہ کے مناقب و فضائل،جلد١،ص١٠٩،حديث نمبر ١٥٨)

حضرت جرير بیان کرتے ہیں جب سے میں نے اسلام قبول کیا ہے نبی کریم صلی اللہ علیہ وسلم نے مجھ سے حجاب نہیں کیا اور آپ ہمیشہ مجھے دیکھ کر مسکرا دیتے تھے میں نے آپ کی خدمت میں عرض کی عرض کی میں گھڑے پر سیدھی طرح نہیں بیٹھ سکتا تھا ۔۔ آپ نے اپنا دست مبارک میرے سینے پر مارا اور دعا کی اے اللہ اسے ثابت رکھ اور اسے ہادی اور مہدی بنا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ:فَضْلِ جَرِيرِ بْنِ عَبْدِ اللَّهِ الْبَجَلِيِّ::جریر بن عبداللہ بجلی رضی اللہ عنہ کے مناقب و فضائل،جلد١،ص١١٠،حديث نمبر ١٥٩)

حضرت رافع بن خدیج رضی اللہ عنہ کہتے ہیں حضرت جبرائیل علیہ السلام یا کوئی اور فرشتہ نبی کریم صلی اللہ علیہ وسلم کی خدمت میں حاضر ہوا اور اس نے عرض کی آپ لوگ اپنے درمیان ان لوگوں کو کیا سمجھتے ہیں جو غزه بدر میں شریک ہوچکے ہوں ؟ لوگوں نے جواب دیا ہم انہیں اپنے میں سے سب سے بہتر سمجھتے تو اس فرشتے نے کہاکہ ہمارے نزدیک وہ ایسے ہی ہیں ہم انہیں فرشتوں سے بہتر سمجھتے ہیں۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ:فَضْلِ أَهْلِ بَدْرٍ،اہل بدر کے مناقب و فضائل،جلد١،ص١١٠،حديث نمبر ١٦٠)

حضرت ابو ہریرہ رضی اللہ تعالیٰ عنہ بیان کرتے ہیں نبی کریم صلی اللہ علیہ وسلم نے ارشاد فرمایا ہے میرے اصحاب کو برانہ کہو اس ذات کی قسم جس کے دست قدرت میں میری جان ہے تم میں سے اگر کوئی ایک شخص احد پہاڑ جتنا سونا خرچ کرے تو یہ ان میں سے کسی ایک کے ایک مدبلکہ نصف مد کے برابر نہیں ہو سکتا۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،فضائل الصحابۃ،صحابہ کرام رضی اللہ عنہم کے فضائل و مناقب ،جلد١،ص١١١،حديث نمبر ١٦١)

حضرت عبدا اللہ بن عمر رضی اللہ تعالیٰ عنہ فرماتے ہیں : حضرت محمد صلى اللہ علیہ وسلم کے اصحاب کو برا نہ کہوکہ ان کا ایک گھڑی کے لیے کھڑے ہونا تم میں سے کسی ایک کی زندگی بھر کے اعمال سے زیادہ بہتر ہے ۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،فضائل الصحابۃ،صحابہ کرام رضی اللہ عنہم کے فضائل و مناقب ،جلد١،ص١١٢،حديث نمبر ١٦٢)

حضرت براء بن عازب رضی اللہ تعالیٰ عنہ بیان کرتے ہیں نبی کریم صلی اللہ علیہ وسلم نے یہ بات ارشاد فرمائی ہے جو شخص انصار سے محبت رکھے اللہ پاک اس سے محبت رکھے۔ (سنن ابن ماجہ،باب فی فضائل اصحاب رسول اللہ صلی اللہ علیہ وسلم :بَابُ: فَضَائِلِ الأَنْصَارِ، انصار رضی اللہ عنہم کے فضائل و مناقب،جلد١،ص١١٢،حديث نمبر ١٦٣)

عبد المهيمن بن عباس اپنے والد کے حوالے سے اپنے دادا حضرت سهل بن سعد ساعدی رضی اللہ تعالیٰ عنہ کا یہ بیان نقل کرتے ہیں نبی کریم صلی اللہ علیہ وسلم نے ارشاد فرمایا ہے انصار لباس کا اندرونی حصّہ ہیں اور دوسرے بیرونی حصہ ہیں اگر لوگ ایک وادی یا گھاٹی میں جائیں اور انصار دوسری وادی میں جائیں تو میں انصار کی وادی میں چلوں گا اگر ہجرت نہ ہوتی تو میں انصار کا ایک فرد ہوتا۔ (سنن ابن ماجہ،باب فی فضائل اصحاب رسول اللہ صلی اللہ علیہ وسلم :بَابُ: فَضَائِلِ الأَنْصَارِ، انصار رضی اللہ عنہم کے فضائل و مناقب،جلد١،ص١١٣،حديث نمبر ١٦٤)

كثير بن عبد اللہ اپنے والد کے حوالے سے اپنے دادا کے حوالے سے نبی کریم صلی اللہ علیہ وسلم کا یہ فرمان نقل کرتے ہیں اللہ پاک انصار پر، انصار کے بچوں پر، انصار کے بچوں کے بچوں پر رحم کرے۔ (سنن ابن ماجہ،باب فی فضائل اصحاب رسول اللہ صلی اللہ علیہ وسلم :بَابُ: فَضَائِلِ الأَنْصَارِ، انصار رضی اللہ عنہم کے فضائل و مناقب،جلد١،ص١١٤،حديث نمبر ١٦٥)

عکرمہ حضرت ابن عباس کا یہ بیان نقل کرتے ہیں : ایک مرتبہ نبی کریم صلی اللہ علیہ وسلم نے مجھے اپنے سینےسے لگایا اور دعا کی:اے اللہ اسے حکمت اور قرآن کی تفسیر کا علم عطا کر۔ (سنن ابن ماجہ،باب فی فضائل اصحاب رسول اللہ۔صلی اللہ علیہ وسلم،بَابُ: فَضْلِ ابْنِ عَبَّاسٍ،حضرت عبداللہ بن عباس رضی اللہ عنہما کے مناقب و فضائل۔،جلد١،ص١١٤،حديث نمبر ١٦٦)