Ibne Majah Shareef

حضرت علی بن ابو طالب رضی اللہ تعالیٰ عنہ کے بارے میں یہ بات منقول ہے انہوں نے خوارج کا تذکرہ کرتے ہوئے یہ بات بیان کی ان میں ایک ایسا شخص ہو گا جس کا ایک ہاتھ (یعنی ایک بازو ) چھوٹا ہوگا ۔۔ یہاں راوی کو شک ہے کہ لفظ ''مخرج'' مودون، مثدون ''(ان میں سے کوئی ایک لفط استعمال ہوا‌ ہے ' تاہم ان سب کامفہوم ایک ہی ہے) پھر حضرت علی رضی اللہ تعالیٰ عنہ نے فرمایا اگر تم خودپسندی کا شکار نہ ہوجاؤ تو میں تمہیں یہ بات بتاؤں کہ اللہ تعالیٰ نے حضرت محمد صلی اللہ علیہ وسلم کی زبانی ان لوگوں کے ساتھ جنگ کرنے والوں کے ساتھ کیا وعدہ کیا ہے راوی کہتے ہیں: میں نے حضرت علی رضی اللہ تعالیٰ عنہ سے دریافت کیا : کیاآپ خود حضرت محمد صلی اللہ علیہ وسلم کی زبانی یہ بات سنی ہے ؟ تو انہوں نے تین مرتبہ یہ فرمایا جی ہاں ! رب کعبہ کی قسم ! (سنن ابن ماجہ،بَابٌ في ذِكْرِ الْخَوَارِجِ،خوارج کا بیان،جلد١،ص١١٥،حديث نمبر ١٦٧)

حضرت عبداللہ بن مسعود رضی اللہ تعالیٰ عنہ بیان کرتے ہیں نبی کریم صلی اللہ علیہ وسلم نے ارشاد فرمایا ہے آخری زمانے میں کچھ ایسے لوگ آئیں گے جن کی عمریں کم ہوگی اور عقل نہیں ہو گی وہ سب سے بہترین(یعنی نبی کریم صلی اللہ علیہ وسلم کے) اقوال بیان کریں گے ' لیکن وہ اسلام سے یوں باہر نکل جائیں گے جیسے تیر شکار (کے پار) ہوجاتاہے تو جس شخص کاان سے سامنا ہو وہ ان سے جنگ کرے گا'اسے اللہ پاک کی بارگاہ میں ان کے ساتھ لڑنے کا ثواب ملےگا۔ (سنن ابن ماجہ،بَابٌ في ذِكْرِ الْخَوَارِجِ،خوارج کا بیان،جلد١،ص١١٦،حديث نمبر ١٦٨)

ابو سلمہ نامی راوی بیان کرتےہیں : میں نے حضرت ابو سعید خدری رضی اللہ تعالیٰ عنہ سے دریافت کیا :کیا آپ نے نبی کریم صلی اللہ علیہ وسلم کو خارجیوں کے بارے میں کچھ ارشاد فرماتے ہوے سنا ہے ؟ تو حضرت ابو سعید خدری رضی اللہ تعالیٰ عنہ نے بتایا : میں نے نبی کریم صلی اللہ علیہ وسلم کو سنا ہے آپ صلی اللہ علیہ وسلم نے ایک قوم کا تذکرہ کیا تھا جو اتنے عبادت گزار ہوں گے کہ تم لوگ اپنی نمازوں کو ان کی نمازوں کے مقابلے میں اور ان کے روزوں کے مقابلے میں اپنے روزوں کوہیچ سمجھو گے وہ لوگ دین سے اس طرح نکل جائیں گے جس طرح تیر نشانے سے پار ہو جاتا ہے آدمی اس تیر کو پکڑتا ہے کے پھل کو دیکھتا ہے تو اسے وہاں کچھ نظر نہیں آتا اس کےپر لپٹے ہوئے پٹھے دیکھتا ہے تو وہاں بھی کوئی چیز نظر نہیں آتی بغیر پر والے تیر کو دیکھتا ہے تو وہاں بھی کچھ نظر نہیں آتا ۔۔پھر وہ اس کے پروں کو دیکھتا ہے تو اسے شک گزرتا ہے کہ کیا اس نے کچھ دیکھا ہے یا نہیں۔ (سنن ابن ماجہ،بَابٌ في ذِكْرِ الْخَوَارِجِ،خوارج کا بیان،جلد١،ص١١٧،حديث نمبر ١٦٩)

حضرت ابو ذر غفاری رضی اللہ تعالیٰ عنہ بیان کرتے ہیں : نبی کریم صلی اللہ علیہ وسلم نےیہ بات ارشاد فرمائی ہے : میرے بعد میری امت میں (راوی کو شک ہے شاید یہ الفاظ ہیں ) عنقریب میرے بعد میری امت میں کچھ ایسے لوگ ہوں گے جو قرآن کی تلاوت کریں گے لیکن وہ ان کے حلق سے نیچے نہیں اترے گا وہ دین سے یوں نکل جائیں گے جس طرح تیر نشانے سے پار ہو جاتا ہے اور پھر دوبارہ دین میں واپس نہیں آئیں گے وہ ساری مخلوق کے بدترین لوگ ہوں گے ۔۔عبداللہ بن صامت نامی راوی بیان کرتےہیں: میں نے اس روایت کا تذکرہ حضرت رفع بن عمر رضی اللہ تعالیٰ عنہ سے کیا جو حضرت حکم بن عمرو غفاری رضی اللہ تعالیٰ عنہ کے بھائی ہیں' تو انہوں نے بتایا : نبی کریم صلی اللہ علیہ وسلم کو یہ بات ارشاد فرماتے ہوئے سنا ہے۔ (سنن ابن ماجہ،بَابٌ في ذِكْرِ الْخَوَارِجِ،خوارج کا بیان،جلد١،ص١١٨،حديث نمبر ١٧٠)

حضرت عبداللہ بن عباس رضی اللہ تعالیٰ عنہ روایت کرتے ہیں نبی کریم صلی اللہ علیہ وسلم نے ارشاد فرمایا ہے: میری امت کے کچھ لوگ قرآن ضرور پڑھیں گے لیکن وہ اسلام سے یوں نکل جائیں گے جس طرح تیر نشانے سے پار ہو جاتا ہے ۔۔ (سنن ابن ماجہ،بَابٌ في ذِكْرِ الْخَوَارِجِ،خوارج کا بیان،جلد١،ص١١٨،حديث نمبر ١٧١)

حضرت جابر بن عبداللہ رضی اللہ تعالیٰ عنہ بیان کرتے ہیں نبی کریم صلی اللہ علیہ وسلم نے جعرانہ کے مقام پر موجود تھے اور آپ سونے کے ٹکڑے اور مال غنیمت تقسیم کر رہے تھےجو حضرت بلال رضی اللہ تعالیٰ عنہ کی جھولی میں موجود تھے ایک شخص بولا:اے حضرت محمد صلی اللہ علیہ وسلم عدل سے کام لیجیے کیونکہ آپ صلی اللہ علیہ وسلم عدل سے کام نہیں لے رہے 'نبی کریم صلی اللہ علیہ وسلم نے ارشاد فرمایا :تمہارا ستیاناس ہو میں عدل سے کام نہیں لوں گا تو میرے بعد کون عدل سے کام لے گا؟حضرت عمر رضی اللہ تعالیٰ عنہ نے عرض کی : یارسول اللہ صلی اللہ علیہ وسلم مجھے اجازت دیں کہ میں اس منافق کا گردن اڑادوں نبی کریم صلی اللہ علیہ وسلم نے ارشاد فرمایا: اس کے کچھ ایسے ساتھی بھی ہوں گے جو قرآن کی تلاوت کریں گے لیکن وہ ان کے حلق سے نیچے نہیں جائے گا وہ دین سے یوں نکل جائیں گے جیسے تیر نشانے سے پار ہو جاتا ہے۔ (سنن ابن ماجہ،بَابٌ في ذِكْرِ الْخَوَارِجِ،خوارج کا بیان،جلد١،ص١١٩،حديث نمبر ١٧٢)

حضرت عبداللہ بن ابواوفی رضی اللہ تعالیٰ عنہ روایت کرتے ہیں 'نبی کریم صلی اللہ علیہ وسلم نے ارشاد فرمایا ہے ``خوارج جہنم کے کتے ہیں ۔ (سنن ابن ماجہ،بَابٌ في ذِكْرِ الْخَوَارِجِ،خوارج کا بیان،جلد١،ص١١٩،حديث نمبر ١٧٣)

حضرت عبداللہ بن عمر رضی اللہ تعالیٰ عنہ ''نبی کریم صلی اللہ علیہ وسلم کا یہ فرمان نقل کرتے ہیں : کچھ لوگ ایسے پیدا ہوں گے جو قرآن کی تلاوت کریں گے لیکن وہ ان کے حلق سے نیچے نہیں جائے گا جب بھی ان کا کوئی ایک گروہ ظاہر ہوگا 'تو اسے ختم کر دیا جائے گا ۔۔حضرت عبداللہ بن عمر رضی اللہ تعالیٰ عنہ بیان کرتے ہیں میں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: جب بھی ان کا گروہ ظاہر ہوگا ' اسے ختم کر دیا جائے گا ۔۔ میں نے بیس مرتبہ سے زیادہ یہ بات آپ صلی اللہ علیہ وسلم سے سنی یہاں تک کہ انہی آخری حصہ میں دجال ظاہر ہوگا ۔۔ (سنن ابن ماجہ،بَابٌ في ذِكْرِ الْخَوَارِجِ،خوارج کا بیان،جلد١،ص١٢٠،حديث نمبر ١٧٤)

حضرت انس بن مالک رضی اللہ تعالیٰ عنہ روایت کرتے ہیں نبی کریم صلی اللہ علیہ وسلم نے ارشاد فرمایا ہے "آخری زمانے میں (راوی کو شک ہے شاید یہ الفاظ ہیں)اس امت میں ایک قوم آئے گی جو قرآن پڑھیں گے لیکن وہ ان کے حلق سے نیچے نہیں جائے گا (یہاں ایک لفط کے بارے میں راوی کو شک ہے)ان کا مخصوص علامتی نشان سر منڈا ہوگا جب تم انہیں دیکھو (راوی کو شک ہے شاید یہ الفاظ ہیں)جب تمہارا ان سے سامنا ہو تو تم انہیں قتل کردو ۔۔ (سنن ابن ماجہ،بَابٌ في ذِكْرِ الْخَوَارِجِ،خوارج کا بیان،جلد١،ص١٢١،حديث نمبر ١٧٥)

ابو غالب بیان کرتےہیں : ایک مرتبہ حضرت ابو امامہ رضی اللہ تعالیٰ عنہ نے فرمایا: یہ خوارج آسمان کے نیچے سب سے بدترین مقتول ہیں اور سب سے بہترین مقتول وہ ہیں جو ان کے ہاتھوں شہید ہوئے یہ پہلے مسلمان تھے پھر کافر ہو گئے۔ابوغالب بیان کرتےہیں : میں نے حضرت ابو امامہ رضی اللہ تعالیٰ عنہ سے دریافت کیا : آپ خود یہ بات کہتے ہیں؟تو انہوں نے فرمایا : میں نے نبی کریم صلی اللہ علیہ وسلم کی زبانی یہ بات سنی ہے ۔ (سنن ابن ماجہ،بَابٌ في ذِكْرِ الْخَوَارِجِ،خوارج کا بیان،جلد١،ص١٢١،حديث نمبر ١٧٦)

حضرت جریر بن عبداللہ رضی اللہ تعالیٰ عنہ بیان کرتے ہیں:ہم لوگ نبی کریم صلی اللہ علیہ وسلم کے پاس بیٹھے ہوئے تھے آپ صلی اللہ علیہ وسلم نے چودھویں رات میں چاند کی طرف دیکھا اور ارشاد فرمایا:بے شک تم لوگ عنقریب اپنے پروردگار کی اس طرح زیارت کروگے جس طرح تم اس چاند کو دیکھ رہے ہو تمہیں اسے دیکھنے میں کوئی رکاوٹ نہیں آئے گی اگر تم سے ہو سکے تو تم سورج طلوع ہونے سے پہلے والی نماز اور سورج غروب ہونے سے پہلے والی نماز کے حوالے سے مغلوب نہ ہو جانا ۔۔پھر آپ صلی اللہ علیہ وسلم نے یہ آیت تلاوت کی، (ترجمہ)سورج کے نکلنے سے پہلے اور سورج کے غروب ہونے سے پہلے تم اپنے پروردگار کی حمد اور پاکی بیان کرو۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٢،حديث نمبر ١٧٧)

حضرت ابو ہریرہ رضی اللہ تعالیٰ عنہ روایت کرتےہیں نبی کریم صلی اللہ علیہ وسلم نے ارشاد فرمایا ہے ''تم لوگ چودھویں رات میں چاند کو دیکھنے میں کسی مشکل کا شکار ہو تے ہو ؟لوگوں نے عرض کی : جی نہیں نبی کریم صلی اللہ علیہ وسلم نے فرمایا:اسی طرح تم لوگ قیامت کے دن اپنے پروردگار کو دیکھنے میں کسی مشکل کا شکار نہیں ہوگے۔۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٣،حديث نمبر ١٧٨)

حضرت ابو سعید خدری رضی اللہ تعالیٰ عنہ بیان کرتے ہیں ہم نے عرض کی یارسول اللہ صلی اللہ علیہ وسلم! کیا ہم اپنے پروردگار کا دیدار کریں گے ؟نبی کریم صلی اللہ علیہ وسلم نے فرمایا :عین دوپہر کے وقت جب بادل نہ ہوں'توکیا سورج کو دیکھنے میں تمہیں مشکل محسوس ہوتی ہے ؟ہم نے عرض کی: جی نہیں ' تو نبی کریم صلی اللہ علیہ وسلم نے فرمایا : جب بادل نہ ہوں ' تو چودھویں رات میں چاند کو دیکھنے میں تمہیں کوئی مشکل ہوتی ہے ؟انہوں نے عرض کی : جی نہیں ' تو نبی کریم صلی اللہ علیہ وسلم نے ارشاد فرمایا : تم اپنے پروردگار کو دیکھنے میں اسی طرح کوئی مشکل محسوس نہیں کروگے جس طرح تمہیں ان دونوں کو دیکھنے میں کوئی مشکل نہیں ہوتی ہے۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٤،حديث نمبر ١٧٩)

حضرت ابورزین رضی اللہ تعالیٰ عنہ بیان کرتے ہیں میں نے عرض کی: یارسول اللہ صلی اللہ علیہ وسلم ہم سے ہر ایک اللہ پاک کا دیدار کرے گا ؟ اللہ کی مخصوص نشانی کیا ہوگی ؟ نبی کریم صلی اللہ علیہ وسلم نے ارشاد فرمایا اے ابورزین رضی اللہ تعالیٰ عنہ کیا تم سےہر ایک شخص خالی چاند کو نہیں دیکھا (یعنی اس وقت جب بادل نہ ہوں) راوی کہتے ہیں: میں نے عرض کی : جی ہاں ' نبی کریم صلی اللہ علیہ وسلم نے ارشاد فرمایا : اللہ پاک تو بڑا ہے اور یہ اس کی مخلوق میں اس کی صرف ایک نشانی ہے ۔۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٤،حديث نمبر ١٨٠)

حضرت ابورزین رضی اللہ تعالیٰ عنہ بیان کرتے ہیں نبی کریم صلی اللہ علیہ وسلم نے ارشاد فرمایا :ہمارا پروردگار اپنے بندوں کے (اپنی ذات سے مایوس ہونے اور اپنے علاوہ دوسرے کے قریب ہونے پر ہنس دیتاہے) راوی بیان کرتےہیں میں نے عرض کی یارسول اللہ صلی اللہ علیہ وسلم! کیا پروردگار بھی ہنستا ہے نبی کریم صلی اللہ علیہ وسلم نے جواب دیا جی ہاں ' تومیں نے عرض کی : ہم ایسے پروردگار سے بھلائی حاصل کرنے میں محروم نہیں رہیں گے جو ہنس بھی دیتا ہے (یعنی وہ صرف غصے والا ہی نہیں ہے)۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٥،حديث نمبر ١٨١)

حضرت ابو زرین رضی اللہ تعالیٰ عنہ بیان کرتے ہیں میں نے دریافت کیا:اے اللہ کے رسول صلی اللہ علیہ وسلم ! مخلوق کو پیدا کرنے سے پہلے ہمارا پروردگار کہاں تھا ؟تو آپ صلی اللہ علیہ وسلم نے ارشاد فرمایا ایک بادل میں تھا جس کے نیچے بھی خلاء تھی ، اس کے اوپر بھی خلاء تھی اور اس نے اپنے عرش کو پانی پر پیدا کیا۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٦،حديث نمبر ١٨٢)

صفوان بیان کرتے ہیں، ہم حضرت ابن عمر رضی اللہ تعالی عنہما کے ساتھ بیت اللہ کا طواف کر رہے تھے۔ ایک شخص سامنے آیا اور بولا : آپ نے سرگوشی کے بارے میں نبی کریم ﷺ کو کیا ارشادفرماتے ہوئے سنا ہے، انہوں نے کہا: میں نے اللہ کے رسول کو یہ ارشاد فرماتے ہوئے سنا ہے: اللہ تعالی مومن کو اپنے قریب کرے گا اسے اپنی خاص رحمت میں ڈھانپ کر چھپالے گا اور دریافت کرے گا، کیا تم فلاں گناہ کو پہچانتے ہو؟ وہ عرض کرے گا: جی ہاں ! اے میرے پروردگار ! جب وہ اپنے تمام گناہوں کا اعتراف کرے گا اور ذہن میں یہ سوچے گا کہ اب وہ ہلاکت کا شکار ہو گیا ہے)۔ اللہ تعالی فرمائے گا: میں نے دنیا میں ان پر پردہ رکھا تھا اور آج میں ان سب کو بخش دیتا ہوں تو اس شخص کو اس کی نیکیوں کی کتاب دے دی جائے گی۔ جہاں تک کافر اور منافق کا معاملہ ہے تو ان سے ساری مخلوق کے سامنے حساب لے گا۔ خالد نامی راوی بیان کرتے ہیں لفظ " اشہاد میں کچھ انقطاع پایا جاتا ہے۔ ارشاد باری تعالی ہے) یہ وہ لوگ ہیں جنہوں نے اپنے پروردگار یعنی اللہ تعالیٰ کی طرف جھوٹی بات منسوب کی خبردار ظالموں پر اللہ کی لعنت ہے۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٧،حديث نمبر ١٨٣)

حضرت جابر بن عبداللہ رضی اللہ عنہما روایت کرتے ہیں نبی کریم ﷺ نے ارشاد فرمایا ہے : اہل جنت اپنی نعمتوں میں ہوں گے اسی طرح ان کے سامنے ایک نور ظاہر ہوگا وہ لوگ اپنے سر اٹھائیں گے تو ان کا پروردگار ان کے اوپر سے ان کی طرف تجلی ظاہر کر رہا ہوگا وہ فرمائے گا اے اہل جنت تم پر سلام ہو ۔( نبی کریم ﷺ یا راوی کہتے ہیں ) اللہ تعالٰی کے اس فرمان سے یہ مراد ہے جو قرآن میں مذکور ہے سَلٰمٌ قَوْلًا مِّنْ رَّبٍّ رَّحِیْمٍ مہربان رب کی طرف سے فرمایا ہوا سلام ہوگا۔ نبی کریم ﷺ فرماتے ہیں: اللہ تعالی انہیں دیکھے گا اور وہ لوگ اس کی طرف دیکھیں گے اس وقت وہ اپنی جنت میں سے کسی چیز کی طرف بھی توجہ نہیں کریں گے جب تک وہ اس کی طرف دیکھتے رہیں گے۔ یہاں تک کہ وہ ان سے پردہ کرلے گا البتہ اس کا نور اور اس کی برکت ان لوگوں پر ان کے گھروں میں باقی رہے گی۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٧،حديث نمبر ١٨٤)

حضرت عدی بن حاتم رضی اللہ عنہ بیان کرتے ہیں: نبی کریم ﷺ نے ارشاد فرمایا ہے: قیامت کے دن اللہ تعالی تم میں سے ہر ایک شخص کے ساتھ براہ راست کلام کرے گا۔ اللہ تعالیٰ اور اس بندے کے درمیان کوئی ترجمان نہیں ہوگا ۔ پھر وہ بندہ دیکھے گا اسے اپنے آگے، دائیں بائیں کوئی چیز نظر نہیں آئے گی پھر وہ اپنے سامنے آگ کو پائے گا اور تم میں سے جو شخص اس سے بچ سکتا ہو وہ اس سے بچے خواہ کھجور کے ایک ٹکڑے کے ذریعے بچے۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٨،حديث نمبر ١٨٥)

ابوبکر بن عبداللہ اپنے والد (حضرت ابو موسیٰ اشعری رضی اللہ عنہ) کا یہ بیان نقل کرتے ہیں: دو جنتیں ایسی ہیں جن کے برتن چاندی کے ہیں اور ان میں موجود ہر چیز چاندی کی ہے اور دو جنتیں ایسی ہیں جن کے برتن سونے کے ہیں اور ان میں موجود ہر چیز سونے کی ہے۔ لوگوں اور ان کے پروردگار کی زیارت کرنے کے درمیان صرف کبریائی کی چادر ہوگی جو اللہ تعالیٰ کی ذات پر جنت عدن میں ہوگی۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٩،حديث نمبر ١٨٦)

حضرت صہیب رضی اللہ عنہ بیان کرتے ہیں، نبی کریم ﷺ نے یہ آیت تلاوت کی ۔(ترجمہ) جن لوگوں نے اچھائی کی ان کے لیے اچھائی ہے اور مزید ( انعام بھی ہے ) ۔ نبی کریم ﷺ نے ارشاد فرمایا۔ جب اہل جنت جنت میں داخل ہو جائیں گے اور اہل جہنم جہنم میں داخل ہو جائیں گئے تو ایک اعلان کرنے والا یہ اعلان کرے گا اے اہل جنت اللہ تعالٰی کا تمہارے ساتھ ایک وعدہ ہے تو وہ یہ چاہتا ہے کہ اب اسے بھی پورا کر دے تو وہ لوگ عرض کریں گے وہ کیا ہے؟ کیا اللہ تعالی نے ہماری نیکیوں کے پلڑے کو بھاری نہیں کیا ؟ کیا اس نے ہمارے چہروں کو روشن نہیں کر دیا ؟ کیا اس نے ہمیں جنت میں داخل نہیں کر دیا ؟ اور ہمیں جہنم سے نجات عطا نہیں کی؟ نبی کریم ﷺ فرماتے ہیں: اس وقت اللہ تعالی حجاب اٹھائے گا اور اہل جنت اس کا دیدار کریں گے نبی کریم ﷺ فرماتے ہیں : اللہ کی قسم ! اہل جنت کو اللہ تعالی نے کوئی ایسی چیز عطا نہیں کی ہوگی جو ان کے نزدیک اس کا دیدار کرنے سے زیادہ پسندیدہ ہو اور ان کی آنکھوں کی زیادہ ٹھنڈک کا باعث ہو ۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٩،حديث نمبر ١٨٧)

سیدہ عائشہ صدیقہ رضی اللہ عنہا فرماتی ہیں ۔ ہر طرح کی حمد اس اللہ تعالی کے لیے ہے جس کی سماعت تمام آوازوں کو گھیرے ہوئے ہے ۔ ایک جھگڑا کرنے والی عورت نبی کریم ﷺ کی خدمت میں حاضر ہوئی میں اس وقت گھر کے ایک کنارے میں موجود تھی وہ عورت اپنے شوہر کی شکایت کر رہی تھی میں یہ نہیں سن سکی کہ وہ کیا کہہ رہی ہے تو اللہ تعالی نے یہ آیت نازل کی ۔ (ترجمہ) اللہ تعالیٰ نے اس عورت کی بات کو سن لیا ہے جو اپنے شوہر کے بارے میں تمہارے ساتھ بحث کر رہی ہے۔“ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٩،حديث نمبر ١٨٨)

حضرت ابو ہریرہ رضی اللہ عنہ بیان کرتے ہیں: نبی کریم ﷺ نے یہ بات ارشاد فرمائی ہے: اللہ تعالیٰ نے مخلوق کو پیدا کرنے سے پہلے اپنے دست قدرت کے ذریعے اپنے لیے یہ بات تحریر کر دی ہے ۔ " میری رحمت میرے غضب پر سبقت لے گئی ہے ۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٣٠،حديث نمبر ١٨٩)

حضرت جابر بن عبداللہ رضی اللہ عنہما بیان کرتے ہیں نبی کریم ﷺ کی ملاقات مجھ سے ہوئی۔ آپ ﷺ نے مجھ سے دریافت کیا : اے جابر کیا وجہ ہے؟ میں تمہیں شکستہ حال دیکھ رہا ہوں ۔ میں نے عرض کی: یارسول اللہ ﷺ میرے والد شہید ہو گئے ہیں اور وہ مال، بچے اور قرض چھوڑ گئے ہیں تو نبی کریم ﷺ نے ارشاد فرمایا: کیا میں تمہیں اس چیز کی خوشخبری نہ دوں جس کے ہمراہ تمہارے والد کے ساتھ اللہ تعالیٰ نے ملاقات کی تو میں نے عرض کی: یا رسول اللہ ﷺ جی ہاں۔ نبی کریم ﷺ نے ارشاد فرمایا: اللہ تعالی نے ہر شخص کے ساتھ حجاب کے پیچھے سے کلام کیا لیکن تمہارے والد کو زندہ کرنے کے بعد ان کے ساتھ حجاب کے بغیر گفتگو کی اور اس نے یہ فرمایا: اے میرے بندے! میرے سامنے آرزو کر! میں تمہیں عطا کروں گا تو انہوں نے عرض کی: اے میرے پروردگار ! تو مجھے زندہ کر دے تا کہ مجھے دوبارہ تیری راہ میں قتل کیا جائے تو پروردگار نے ارشاد فرمایا:اس بارے میں ہمارا فیصلہ پہلے ہو چکا ہے کہ لوگ ( دنیا میں ) واپس نہیں جائیں گے۔ تو تمہارے والد نے ) عرض کی :اے اللہ ! میرے پیچھے والوں تک یہ بات پہنچا دے۔ راوی بیان کرتے ہیں: (اس بارے میں ) یہ آیت نازل ہوئی : (ترجمہ) جن لوگو کو اللہ کی راہ میں قتل کیا گیا ہے تم انہیں مردہ ہرگز گمان نہ کرو بلکہ وہ اپنے پروردگار کی بارگاہ میں زندہ ہیں اور انہیں رزق دیا جاتا ہے۔“ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٣٠،حديث نمبر ١٩٠)

حضرت ابو ہریرہ رضی اللہ عنہ بیان کرتے ہیں : نبی کریم ﷺ نے یہ بات ارشاد فرمائی ہے: بے شک اللہ تعالی ایسے دو آدمیوں پر مسکرا دیتا ہے جن میں سے ایک دوسرے کو قتل کر دیتا ہے لیکن وہ دونوں جنت میں داخل ہوں گے ان میں سے ایک شخص اللہ کی راہ میں جہاد کر رہا ہوتا ہے اور شہید ہو جاتا ہے پھر اللہ تعالی اسے قتل کرنے والے کو توبہ کی توفیق دیتا ہے وہ اسلام قبول کر لیتا ہے اور وہ اللہ کی راہ میں جہاد میں حصہ لیتے ہوئے وہ بھی شہید ہو جاتا ہے ( تو وہ دونوں جنت میں داخل ہوں گے )۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١١٣١،حديث نمبر ١٩١)

حضرت ابو ہریرہ رضی اللہ عنہ بیان کرتے ہیں: نبی کریم ﷺ نے یہ بات ارشاد فرمائی ہے: قیامت کے دن اللہ تعالٰی زمین کو اپنے قبضے میں لے گا اور آسمان کو اپنے دائیں دست مبارک میں لپیٹ لے گا اور پھر ارشاد فرمائے گا۔ میں بادشاہ ہوں زمین کے بادشاہ کہاں ہیں؟“ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١١٣٢،حديث نمبر ١٩٢)

حضرت عباس بن عبد المطلب رضی اللہ عنہ بیان کرتے ہیں : میں کچھ لوگوں کے ساتھ بطحا میں موجود تھا ان لوگوں میں نبی کریم ﷺ بھی تھے وہاں سے بادل کا ایک ٹکڑا گزرا نبی کریم ﷺ نے اس کی طرف دیکھا اور ارشاد فرمایا: تم لوگ اسے کیا کہتے ہو ؟ لوگوں نے بتایا : سحاب"نبی کریم ﷺ نے فرمایا " مزن بھی کہتے ہو؟ لوگوں نے عرض کی : مزن بھی کہتے ہیں:۔ نبی کریم ﷺ نے فرمایا عنان بھی کہتے ہو؟ تو یہاں ابو بکر نامی راوی نے یہ الفاظ نقل کیے ہیں لوگوں نے عرض کی : عنان بھی کہتے ہیں۔ نبی کریم ﷺ نے دریافت کیا : تم لوگ کیا سمجھتے ہو کہ تمہارے اور آسمان کے درمیان کتنا فاصلہ ہے؟ لوگوں نے عرض کی ہمیں نہیں معلوم تو نبی کریم ﷺ نے ارشاد فرمایا: تمہارے اور اس کے درمیان ۔ راوی کو شک ہے ) ایک یا دو یا تین اور ستر ( یعنی اکہتر ، بہتر یا تہتر) سال کی مسافت کا فاصلہ ہے پھر اس کے اوپر جو آسمان ہے اس کا بھی اتنا فاصلہ ہے یہاں تک کہ نبی کریم ﷺ نے سات آسمان گنوائے۔ پھر ساتویں آسمان کے اوپر ایک سمندر ہے، جس کے اوپر والے حصے اور نیچے والے حصے کے درمیان اتناہی فاصلہ ہے جتنا ایک آسمان سے دوسرے آسمان کے درمیان ہے۔ پھر اس کے اوپر آٹھ فرشتے ہیں: جن کے گھٹنوں اور پاؤں کے درمیان اتنا فاصلہ ہے جتنا ایک آسمان سے دوسرے آسمان تک کا ہے پھر ان کی پشت کے اوپر عرش ہے جس کے اوپر والے حصے اور نیچے والے حصے کے درمیان اتنا فاصلہ ہے جتنا ایک آسمان سے دوسرے آسمان تک کا ہے پھر اللہ تعالی کی ذات ان سب سے بھی اوپر ہے۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٣٣،حديث نمبر ١٩٣)

حضرت ابوہریرہ رضی اللہ عنہ بیان کرتے ہیں، نبی کریم ﷺ نے یہ بات ارشاد فرمائی ہے: جب اللہ تعالی آسمان میں کسی فیصلے کو ظاہر کرتا ہے تو فرشتے اس کے فرمان کے سامنے خود کو جھکاتے ہوئے اپنے پر یوں مارتے ہیں: جیسے کسی پتھر پر کوئی زنجیر ماری جاتی ہے۔ پھر جب ان کے دلوں سے گھبراہٹ کم ہوتی ہے تو وہ دریافت کرتے ہیں، تمہارے پروردگار نے کیا فرمایا ہے؟ تو وہ جواب دیتے ہیں: حق فرمایا ہے اور وہ بلند و برتر اور سب سے بڑا ہے ( نبی کریم ﷺ فرماتے ہیں:) تو چوری چھپے سننے والے لوگ ( یعنی شیاطین ) جو ایک دوسرے کے اوپر ہوتے ہیں: وہ اسے سنتے ہیں، وہ ان میں سے کوئی ایک کلمہ سن لیتے ہیں، اور اس میں سے اپنے نیچے والے تک وہ نقل کر دیتے ہیں، تو بعض اوقات ان میں سے کسی ایک تک شہاب ثاقب پہنچ جاتا ہے۔ اس سے پہلے وہ اپنے سے نیچے والے تک اس بات کو پہنچاتا ہے کہ وہ کا ہن یا جادو گر تک اسے منتقل کر دے۔ تو بعض اوقات اسے شہاب ثاقب نہیں لگتا ہے تو وہ اس جادو گر یا کا ہن تک وہ بات پہنچا دیتا ہے اور اس کے ساتھ ایک سو جھوٹی باتیں بھی ملا دیتا ہے۔ تو اس میں سے سچی بات وہ ہوتی ہے جو اس نے آسمان میں سے سنی ہوئی ہوتی ہے۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٢٤،حديث نمبر ١٩٤)

حضرت ابو موسی اشعری رضی اللہ عنہ بیان کرتے ہیں ایک مرتبہ نبی کریم ﷺ ہمارے درمیان کھڑے ہوئے ، آپ صلی اللہ علیہ وسلم نے پانچ باتیں بیان کیں۔ آپ صلی اللہ علیہ وسلم نے ارشاد فرمایا بے شک اللہ تعالی سوتا نہیں ہے اور اس کی شان کے یہ لائق بھی نہیں ہے کہ وہ سو جائے وہ ترازو کے پلڑے کو نیچے اور اوپر کرتا رہتا ہے رات کا عمل دن کے عمل سے پہلے ہی اس کی بارگاہ میں پہنچ جاتا ہے اور دن کا عمل رات کے عمل سے پہلے ہی پہنچ جاتا ہے اس کا حجاب نور ہے اگر وہ اسے ہٹا دے تو اس کی ذات کے انوار ہر اس چیز کو وہاں تک جلا دیں جہاں تک نظر کام کرتی ہے۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٣٥،حديث نمبر ١٩٥)

حضرت ابو موسی اشعری رضی اللہ عنہ بیان کرتے ہیں ایک مرتبہ نبی کریم صلی اللہ علیہ وسلم نے ارشاد فرمایا بے شک اللہ تعالی سوتا نہیں ہے اور اس کی شان کے یہ لائق بھی نہیں ہے کہ وہ سو جائے وہ ترازو کے پلڑے کو نیچے اور اوپر کرتا رہتا ہے رات کا عمل دن کے عمل سے پہلے ہی اس کی بارگاہ میں پہنچ جاتا ہے اور دن کا عمل رات کے عمل سے پہلے ہی پہنچ جاتا ہے اس کا حجاب نور ہے اگر وہ اسے ہٹا دے تو اس کی ذات کے انوار ہر اس چیز کو وہاں تک جلا دیں جہاں تک نظر کام کرتی ہے پھر ابو عبیدہ نامی راوی نے یہ آیت تلاوت کی:(ترجمہ) "برکت والی ہے وہ ذات جو آگ میں اور اس کے آس پاس میں (اپنی تجلی کو ظاہر) کر رہی ہے، اور اللہ کی ذات ہر عیب سے پاک ہے، وہ تمام جہانوں کا پروردگار ہے۔" (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٣٥،حديث نمبر ١٩٦)

حضرت ابوہریرہ رضی اللہ تعالی عنہ بیان کرتے ہیں نبی کریم صلی اللہ علیہ وسلم نے یہ بات ارشاد فرمائی ہے رحمان کا دایاں ہاتھ خزانے سے بھرا ہوا ہے وہ ہمیشہ اسے خرچ کرتا رہتا ہے۔ دن اور رات کے یعنی مسلسل خرچ کرنے سے کسی بھی وقت اس میں کوئی کمی نہیں آتی اور اس کے دوسرے ہاتھ میں میزان ہیں جسے وہ جھکاتا اور بلند کرتا ہے نبی کریم صلی اللہ علیہ وسلم نے ارشاد فرمایا کیا تم نے اس بات پہ غور کیا ہے؟ اس نے جب سے زمین آسمان کو پیدا کیا۔ اس وقت سے خرچ کر رہا ہے، اور پھر بھی اس کے دست عنایت میں کوئی کمی نہیں آئی۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٣٦،حديث نمبر ١٩٧)

حضرت عبداللہ بن عمر رضی اللہ تعالی عنہما بیان کرتے ہیں میں نے نبی کریم ﷺ کو ممبر پر یہ ارشاد فرماتے ہوئے سنا کہ جبار یعنی اللہ تعالی آسمانوں اور زمینوں کو اپنے دست قدرت میں رکھے گا پھر وہ اپنے ہاتھ کو بلند کرے گا پھر وہ اسے بند کرے گا اور کھولے گا پھر فرمائے گا میں زبردست ہوں دنیا میں خود کو زبردست سمجھنے والے لوگ کہاں ہیں؟ تکبر کرنے والے لوگ کہاں ہیں؟ راوی بیان کرتے ہیں نبی کریم صلی اللہ تعالی علیہ وسلم دائیں طرف اور بائیں طرف جھک رہے تھے یہاں تک کہ میں نے ممبر کو دیکھا جو آپ صلی اللہ علیہ وسلم کے نیچے حرکت کر رہا تھا میں یہ سوچنے لگا کہ کہیں یہ نبی کریم صلی اللہ علیہ وسلم سمیت گر نہ جائے۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٣٦،حديث نمبر ١٩٨)

حضرت نواس بن سمعان کلابی رضی اللہ عنہ بیان کرتے ہیں میں نے نبی کریم صلی اللہ علیہ وسلم کو ارشاد فرماتے ہوئے سنا ہے ہر ایک دل رحمان کی انگلیوں میں سے دو انگلیوں کے درمیان ہیں اگر وہ چاہے تو اسے برقرار رکھے چاہے تو اسے ٹیڑھا کر دے۔ نبی کریم صلی اللہ علیہ وسلم یہ بھی ارشاد فرمایا کرتے تھے۔ اے دلوں کو ثابت رکھنے والے تو ہمارے دلوں کو دین پر ثابت رکھنا۔ نبی کریم صلی اللہ علیہ وسلم یہ بھی ارشاد فرمایا ہے پلڑا رحمن کے دست قدرت میں ہے وہ کچھ لوگوں کو بلند کرتا ہے اور کچھ دوسروں کو قیامت کے لیے پست کر دیتا ہے۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٣٧،حديث نمبر ١٩٩)

حضرت ابو سعید خدری رضی اللہ تعالی عنہ روایت کرتے ہیں نبی کریم ﷺ نے ارشاد فرمایا ہے اللہ تعالی تین لوگوں پر مسکرا دیتا ہے۔ وہ شخص جو نماز کے صف میں ہو،وہ شخص جو نصف رات کے وقت نفل نماز ادا کرے اور وہ شخص جو جنگ میں حصہ لے، راوی بیان کرتے ہیں میرا خیال ہے حدیث میں یہ الفاظ لشکر کے پیچھے جنگ میں حصہ لے،،۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٣٨،حديث نمبر ٢٠٠)

حضرت جابر بن عبد اللہ رضي الله عنهما بیان کرتے ہیں نبی کریم ﷺ حج کے موقع پر لوگوں کے پاس تشریف لے جایا کرتے تھے اور یہ فرماتے تھے کیا کوئی شخص مجھے اپنی قوم کے پاس لے کے جائے گا کیونکہ قریش نے تو مجھے اس بات سے روک دیا ہے کہ میں اپنے پروردگار کے کلام کی تبلیغ کروں۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١١٣٨،حديث نمبر ٢٠١)

سیده ام درداء رضی اللہ تعالی عنہا حضرت ابو درداء رضی اللہ تعالی عنہ کے حوالے سے اللہ تعالٰی کے اس فرمان کے بارے میں نبی کریم ﷺ کا فرمان نقل کرتی ہیں ارشاد باری تعالی ہے : ” اس کی ہر دن نئی شان ہے ۔ (الرحمن ) نبی کریم ﷺ نے ارشاد فرمایا ہے: اس کی شان یہ ہے وہ گناہ کو بخش دیتا ہے تنگی کو کشادہ کر دیتا ہے کسی ایک قوم کو بلندی عطا کرتا ہے دوسروں کو پستی نصیب کرتا ہے۔ (سنن ابن ماجہ،ابواب السنۃ:بَابُ: فِيمَا أَنْكَرَتِ الْجَهْمِيَّةُ : جہمیہ کا انکار صفات باری تعالیٰ،جلد١،ص١٣٩،حديث نمبر ٢٠٢)

حضرت جریر بن عبدالله بیان کرتے ہیں : نبی کریم ﷺ نے یہ بات ارشاد فرمائی ہے: جو شخص کسی اچھے طریقے کا آغاز کرے اور اس پر عمل کیا جائے تو اس شخص کو بھی اس کا اجر ملے گا اور جو لوگ اس پر عمل کریں گے ان کی مانند بھی اسے اجر ملے گا ان لوگوں کے اجر میں کوئی کمی نہیں ہوگی۔ جو شخص کسی برے طریقے کا آغاز کرے اور اس پر عمل کرے اس شخص پر اس کا وبال ہوگا اور اس کے بعد جو لوگ اس پر عمل کریں گے اس کا وبال بھی اس کے ذمے ہوگا اور ان لوگوں کے بوجھ (گناہ) میں کوئی کمی نہیں ہوگی۔ (سنن ابن ماجہ،ابواب السنۃ:بَابُ: مَنْ سَنَّ سُنَّةً حَسَنَةً أَوْ سَيِّئَةً (دین میں) اچھے یا برے طریقہ کے موجد کا انجام:،جلد١،ص١٤٠،حديث نمبر ٢٠٣)

حضرت ابو ہریرہ رضی اللہ عنہ بیان کرتے ہیں: ایک شخص نبی کریم ﷺکی خدمت میں حاضر ہوا ( جو ضرورت مند نظر آرہا تھا) نبی کریم ﷺ نے اسے صدقہ کرنے کی ترغیب دی تو ایک صاحب بولے: میرے پاس اتنا ، اتنا مال ہے( انہوں نے اتنا مال صدقہ کر دیا) راوی کہتے ہیں: اس محفل میں جتنے بھی لوگ موجود تھے ان میں سے ہر ایک نے اس کو صدقہ دیا خواہ وہ کم ہو یا زیادہ اور نبی کریم ﷺ نے ارشاد فرمایا ہو جو شخص اچھائی کا طریقہ شروع کرتا ہے اور اس طریقے کی پیروی کی جاتی ہے تو اس شخص کو اس کا مکمل اجر ملتا ہے اور ان لوگوں جتنا بھی اجر ملتا ہے جنہوں نے ان کی پیروی کی ہو اور ان لوگوں کے اجر میں کوئی کمی نہیں ہوتی ۔ اور جو شخص کسی برے طریقے کا آغاز کرتا ہے جس کی پیروی کی جاتی ہے تو اس کا مکمل وبال اس شخص پر ہوتا ہے اور ان لوگوں کا بوجھ بھی اس شخص پر ہوگا جو اس طریقے کی پیروی کرتے ہیں: اور ان لوگوں کے بوجھ میں کوئی کمی نہیں ہوگی۔ (سنن ابن ماجہ،ابواب السنۃ:بَابُ: مَنْ سَنَّ سُنَّةً حَسَنَةً أَوْ سَيِّئَةً (دین میں) اچھے یا برے طریقہ کے موجد کا انجام:،جلد١،ص١٤٠،حديث نمبر ٢٠٤)

حضرت انس بن مالک رضی اللہ نبی کریم ﷺکا یہ فرمان نقل کرتے ہیں: جو بھی دعوت دینے والا گمراہی کی طرف دعوت دیتا ہے اور پھر اس کی پیروی کی جاتی ہے تو اس شخص کو اس کی پیروی کرنے والوں کے گناہوں کی مانند گناہ ہوگا اور ان لوگوں کے گناہ میں کوئی کمی نہیں ہوگی اور جو بھی ہدایت دینے والا ہدایت کی طرف دعوت دیتا ہے جس کی پیروی کی جائے تو جو لوگ بھی اس کی پیروی کریں گے ان کی مانند اس شخص کو بھی اجر ملے گا اور ان لوگوں کے اجر میں کوئی کمی نہیں ہو گی۔ (سنن ابن ماجہ،ابواب السنۃ:بَابُ: مَنْ سَنَّ سُنَّةً حَسَنَةً أَوْ سَيِّئَةً (دین میں) اچھے یا برے طریقہ کے موجد کا انجام:،جلد١،ص١٤١،حديث نمبر ٢٠٥)

حضرت ابوہریرہ رضی اللہ عنہ نبی کریم ﷺ کا یہ فرمان نقل کرتے ہیں: جو شخص ہدایت کی طرف دعوت دے تو اسے اتناہی اجر ملے گا جتنا اس کی پیروی کرنے والوں کا اجر ہوگا اور ان لوگوں کے اجر میں کوئی کمی نہیں ہوگی اور جو شخص گمراہی کی طرف دعوت دے تو اسے اتناہی گناہ ہوگا جتنا اس کی پیروی کرنے والوں کا گناہ ہوگا اور ان لوگوں کے گناہ میں کوئی کمی نہیں ہوگی۔ (سنن ابن ماجہ،ابواب السنۃ:بَابُ: مَنْ سَنَّ سُنَّةً حَسَنَةً أَوْ سَيِّئَةً (دین میں) اچھے یا برے طریقہ کے موجد کا انجام:،جلد١،ص١٤٢،حديث نمبر ٢٠٦)

حضرت ابو جحیفہ رضی اللہ عنہ روایت کرتے ہیں: نبی کریم ﷺ نے یہ بات ارشاد فرمائی ہے: جو شخص کسی اچھے طریقے کا آغاز کرے اور اس کے بعد اس پر عمل کیا جائے تو اس شخص کو اس کا اجر ملے گا اور ان لوگوں کی مانند بھی اجر ملے گاحالانکہ ان لوگوں کے اجر میں کوئی کمی نہیں ہوگی۔ اور جو شخص کسی برے طریقے کا آغاز کرے جس پر اس کے بعد عمل کیا جائے تو اس شخص کو اس کا گناہ ہوگا اور دوسرے لوگوں کی مانند بھی اس پر گناہ ہوگا اور ان دوسرے لوگوں کے گناہ میں کوئی کمی نہیں ہوگی۔ (سنن ابن ماجہ،ابواب السنۃ:بَابُ: مَنْ سَنَّ سُنَّةً حَسَنَةً أَوْ سَيِّئَةً (دین میں) اچھے یا برے طریقہ کے موجد کا انجام:،جلد١،ص١٤٢،حديث نمبر ٢٠٧)

حضرت ابو ہریرہ رضی اللہ عنہ روایت کرتے ہیں : نبی کریم ﷺ نے یہ بات ارشاد فرمائی ہے: جو بھی دعوت دینے والا جس چیز کی طرف بھی دعوت دے گا قیامت کے دن اسے اس دعوت کے ساتھ کھڑا کیا جائے گا، جس کی طرف اس نے دعوت دی تھی اگر چہ ایک آدمی نے صرف ایک آدمی کو دعوت دی تھی۔ (سنن ابن ماجہ،ابواب السنۃ:بَابُ: مَنْ سَنَّ سُنَّةً حَسَنَةً أَوْ سَيِّئَةً (دین میں) اچھے یا برے طریقہ کے موجد کا انجام:،جلد١،ص١٤٣،حديث نمبر ٢٠٨)

کثیر بن عبد اللہ اپنے والد کے حوالے سے اپنے دادا کا یہ بیان نقل کرتے ہیں : نبی کریم ﷺ نے ارشاد فرمایا: جو شخص میری سنت کو اس وقت زندہ کرے جب وہ ختم ہو چکی ہو تو اس شخص کو اس سنت پر عمل کرنے والوں کے اجر جتنا اجر ملے گا حالانکہ ان لوگوں کے اجر میں کوئی کمی نہیں ہوگی اور جو شخص کسی بدعت کا آغاز کرے تو اس شخص کو ان تمام لوگوں جتنا گناہ ہوگا، جو اس پر عمل کریں گے اور ان لوگوں کے گناہ میں کوئی کمی نہیں ہوگی۔ (سنن ابن ماجہ،ابواب السنۃ:بَابُ: مَنْ أَحْيَا سُنَّةً قَدْ أُمِيتَتْ:مردہ سنت کو زندہ کرنے والے کا ثواب:،جلد١،ص١٤٣،حديث نمبر ٢٠٩)

کثیر بن عبد اللہ اپنے والد کے حوالے سے اپنے دادا کا یہ بیان نقل کرتے ہیں : میں نے نبی کریم ﷺ کو یہ ارشاد فرماتے ہوئے سنا ہے جو شخص میری کسی ایسی سنت کو زندہ کرے جو میرے بعد نا پید ہو چکی ہو تو اسے اتنا اجر ملے گا جو ان لوگوں کے اجر کی مانند ہوگا جنہوں نے اس سنت پر عمل کیا ہوگا اور ان لوگوں کے اجر میں کوئی کمی نہیں ہوگی ۔ اور جو شخص کسی ایسی بدعت کا آغاز کرے جس سے اللہ اور اس کا رسول ﷺ راضی نہ ہوں تو جو لوگ بھی اس بدعت پر عمل کریں گے ان کے گناہ کی ماننداس شخص کو گناہ ہوگا اور ان دوسرے لوگوں کے گناہوں میں کوئی کمی نہیں ہوگی ۔ (سنن ابن ماجہ،ابواب السنۃ:بَابُ: مَنْ أَحْيَا سُنَّةً قَدْ أُمِيتَتْ:مردہ سنت کو زندہ کرنے والے کا ثواب:،جلد١،ص١٤٥،حديث نمبر ٢١٠)

حضرت عثمان غنی رضی اللہ عنہ روایت کرتے ہیں نبی کریم ﷺ نے یہ بات ارشاد فرمائی ہے: یہاں شعبہ نامی راوی نے یہ الفاظ نقل کیے ہیں: تم میں سب سے بہتر جبکہ سفیان نامی راوی نے یہ الفاظ نقل کیے ہیں: تم میں سب سے افضل وہ شخص ہے جو قرآن کا علم حاصل کرے اور اس کی تعلیم دے۔ (سنن ابن ماجہ،ابواب السنۃ:بَابُ:بَابُ: فَضْلِ مَنْ تَعَلَّمَ الْقُرْآنَ وَعَلَّمَهُ: قرآن سیکھنے اور سکھانے والوں کے فضائل و مناقب:،جلد١،ص١٤٤،حديث نمبر ٢١١)

حضرت عثمان غنی رضی اللہ تعالی عنہ روایت کرتے ہیں : نبی کریم ﷺ نے یہ بات ارشاد فرمائی ہے تم میں افضل وہ شخص ہے جو قرآن کا علم حاصل کرے اور اس کی تعلیم دے۔ (سنن ابن ماجہ،ابواب السنۃ:بَابُ:بَابُ: فَضْلِ مَنْ تَعَلَّمَ الْقُرْآنَ وَعَلَّمَهُ: قرآن سیکھنے اور سکھانے والوں کے فضائل و مناقب:،جلد١،ص١٤٤،حديث نمبر ٢١٢)

حضرت مصعب بن سعد رضی اللہ عنہ اپنے والد کا یہ بیان نقل کرتے ہیں نبی کریم ﷺ نے ارشاد فرمایا ہے: ” تم میں سب سے بہتر وہ لوگ ہیں جو قرآن کا علم حاصل کریں اور اس کی تعلیم دیں۔ ( راوی کہتے ہیں: میرے استاد نے یا اس حدیث نے) میرا ہاتھ پکڑا اور مجھے اس جگہ بٹھا دیا جہاں میں ( قرآن ) پڑھاتا ہوں ۔ (سنن ابن ماجہ،ابواب السنۃ:بَابُ:بَابُ: فَضْلِ مَنْ تَعَلَّمَ الْقُرْآنَ وَعَلَّمَهُ: قرآن سیکھنے اور سکھانے والوں کے فضائل و مناقب:،جلد١،ص١٤٥،حديث نمبر ٢١٣)

حضرت انس بن مالک رضی اللہ عنہ ، حضرت ابو موسیٰ اشعری رضی اللہ عنہ کے حوالے سے نبی کریم ﷺ کا یہ فرمان نقل کرتے ہیں : جو مومن قرآن پڑھتا ہے اس کی مثال ناشپاتی کی طرح ہے جس کی خوشبو بھی اچھی ہوتی ہے اور اس کا ذائقہ بھی اچھا ہوتا ہے اور جو مومن قرآن نہیں پڑھتا اس کی مثال کھجور کی طرح ہے جس کا ذائقہ تو اچھا ہوتا ہے لیکن اس کی خوشبو نہیں ہوتی اور جو منافق شخص قرآن پڑھتا ہے اس کی مثال ریحانہ کی طرح ہے جس کی خوشبو اچھی ہوتی ہے لیکن ذائقہ کڑوا ہوتا ہے اور جو شخص منافق ہو اور قرآن بھی نہ پڑھتا ہو اس کی مثال حنظلہ ( نامی بوٹی) کی طرح ہے جس کا ذائقہ بھی کڑوا ہوتا ہے اور اس کی خوشبو بھی نہیں ہوتی۔ (سنن ابن ماجہ،ابواب السنۃ:بَابُ:بَابُ: فَضْلِ مَنْ تَعَلَّمَ الْقُرْآنَ وَعَلَّمَهُ: قرآن سیکھنے اور سکھانے والوں کے فضائل و مناقب:،جلد١،ص١٤٥،حديث نمبر ٢١٤)

حضرت انس بن مالک رضی اللہ عنہ یہ روایت کرتے ہیں نبی کریم ﷺ نے ارشاد فرمایا ہے : " لوگوں میں سے کچھ لوگ اللہ تعالیٰ کے خاص بندے ہیں لوگوں نے عرض کی: یا رسول اللہ ﷺ وہ کون لوگ ہیں نبی کریم ﷺ نے ارشاد فرمایا: وہ قرآن کے عالم ہیں جو اللہ والے ہیں اور اس کے خاص بندے ہیں۔ (سنن ابن ماجہ،ابواب السنۃ:بَابُ:بَابُ: فَضْلِ مَنْ تَعَلَّمَ الْقُرْآنَ وَعَلَّمَهُ: قرآن سیکھنے اور سکھانے والوں کے فضائل و مناقب:،جلد١،ص١٤٦،حديث نمبر ٢١٦)

حضرت علی بن ابی طالب رضی اللہ عنہ بیان کرتے ہیں: نبی کریم ﷺ نے ارشاد فرمایا ہے: جو شخص قرآن پاک پڑھے اسے یاد کرے، تو اللہ تعالی اس شخص کو جنت میں داخل کرے گا اور اسے اس کے گھر والوں میں سے دس ایسے افراد کے بارے میں شفاعت کا منصب دے گا کہ جن کے لئے جہنم واجب ہو چکی ہوگی۔ (سنن ابن ماجہ،ابواب السنۃ:بَابُ:بَابُ: فَضْلِ مَنْ تَعَلَّمَ الْقُرْآنَ وَعَلَّمَهُ: قرآن سیکھنے اور سکھانے والوں کے فضائل و مناقب:،جلد١،ص١٤٦،حديث نمبر ٢١٦)

حضرت ابو ہریرہ رضی اللہ عنہ بیان کرتے ہیں : نبی کریم ﷺ نے ارشاد فرمایا ہے : تم قرآن پاک کو سیکھو اور اس کو پڑھا کرو کیونکہ جو شخص قرآن پاک کا علم حاصل کرنے کے بعد اس کی قرآت بھی کرے اور قیام کی حالت میں اسے پڑھے بھی اس کی مثال اس تھیلی کی طرح ہے جو مشک سے بھری ہوئی ہو اور اس کی خوشبو ہر جگہ پھیلتی ہو اور جو شخص قرآن پاک کا علم حاصل کر کے سو جائے اور قرآن پاک اس کے ذہن میں ہو تو اس کی مثال اس مشک کی تھیلی کی طرح ہے، جس کے منہ کو باندھ دیا گیا ہو۔ (سنن ابن ماجہ،ابواب السنۃ:بَابُ:بَابُ: فَضْلِ مَنْ تَعَلَّمَ الْقُرْآنَ وَعَلَّمَهُ: قرآن سیکھنے اور سکھانے والوں کے فضائل و مناقب:،جلد١،ص١٤٧،حديث نمبر ٢١٧)

نافع بن عبد الحارث بیان کرتے ہیں: ان کی ملاقات "عسفان" کے مقام پر حضرت عمر بن خطاب رضی اللہ عنہ سے ہوئی حضرت عمر رضی اللہ عنہ نے نافع کو مکہ کا گورنر مقرر کیا ہوا تھا۔ حضرت عمر رضی اللہ نے دریافت کیا: تم نے اہل مکہ کے لیے کسے اپنا نائب بنایا ہے تو نافع نے جواب دیا: میں نے ابن ابزی کو ان لوگوں پر اپنا نائب بنایا ہے۔ حضرت عمر نے دریافت کیا: ابن ابزی کون ہے؟ تو نافع نے بتایا: وہ ہمارے آزاد کردہ غلاموں میں سے ایک شخص ہے۔ حضرت عمر بولے تم نے ان لوگوں پر ایک غلام کو اپنا نائب بنا دیا ہے؟ نافع نے بتایا: وہ اللہ کی کتاب کا قاری ہے۔ علم وارثت کا عالم ہے اور فیصلہ دے سکتا ہے تو حضرت عمر رضی اللہ عنہ نے بتایا: تمہارے نبی صلی اللہ علیہ وسلم نے یہ بات ارشاد فرمائی ہے: بے شک اللہ تعالی اس کتاب کے ذریعے کچھ لوگوں کو بلند درجہ نصیب کرے گا اور کچھ دوسرے لوگوں کو پست کر دے گا۔ (سنن ابن ماجہ،ابواب السنۃ:بَابُ:بَابُ: فَضْلِ مَنْ تَعَلَّمَ الْقُرْآنَ وَعَلَّمَهُ: قرآن سیکھنے اور سکھانے والوں کے فضائل و مناقب:،جلد١،ص١٤٨،حديث نمبر ٢١٨)

حضرت ابوذرغفاری رضی اللہ عنہ بیان کرتے ہیں : نبی کریم ﷺ نے مجھ سے فرمایا: اے ابوذر تمہارا صبح کے وقت جا کر اللہ کی کتاب کی کسی آیت کو سیکھ لینا تمہارے لیے اس سے زیادہ بہتر ہے تم ایک سو رکعات نماز ادا کرو اور تمہارا صبح کے وقت جا کر علم کے ایک باب کو سیکھ لینا، خواہ تم اس پر عمل کرو یا اس پر عمل نہ کرو تمہارے لیے اس سے زیادہ بہتر ہے کہ تم ایک ہزار رکعات ادا کرو۔ (سنن ابن ماجہ،ابواب السنۃ:بَابُ:بَابُ: فَضْلِ مَنْ تَعَلَّمَ الْقُرْآنَ وَعَلَّمَهُ: قرآن سیکھنے اور سکھانے والوں کے فضائل و مناقب:،جلد١،ص١٤٨،حديث نمبر ٢١٩)

حضرت ابو ہریرہ رضی اللہ عنہ روایت کرتے ہیں نبی کریم ﷺ نے ارشاد فرمایا ہے: اللہ تعالیٰ جس شخص کے بارےمیں بھلائی کا ارادہ کر لے اسے دین کی سمجھ بوجھ عطا کر دیتا ہے۔ (سنن ابن ماجہ،ابواب السنۃ:بَابُ: فَضْلِ الْعُلَمَاءِ وَالْحَثِّ عَلَى طَلَبِ الْعِلْمِ:علماء کے فضائل و مناقب اور طلب علم کی ترغیب:،جلد١،ص١٤٩،حديث نمبر ٢٢٠)

حضرت معاویہ بن ابو سفیان رضی اللہ عنہ نبی کریم ﷺ کا یہ فرمان نقل کرتے ہیں: بھلائی عادت ہے اور شر لجاجت ہے اور اللہ تعالیٰ جس شخص کے بارے میں بھلائی کا ارادہ کر لے اسے دین کی سمجھ بوجھ عطا کر دیتا ہے۔ (سنن ابن ماجہ،ابواب السنۃ:بَابُ: فَضْلِ الْعُلَمَاءِ وَالْحَثِّ عَلَى طَلَبِ الْعِلْمِ:علماء کے فضائل و مناقب اور طلب علم کی ترغیب:،جلد١،ص١٤٩،حديث نمبر ٢٢١)

حضرت عبد اللہ بن عباس رضی اللہ تعالی عنہما روایت کرتے ہیں، نبی کریم ﷺ نے یہ بات ارشاد فرمائی ہے: ایک فقیہ شیطان کے لیے ایک ہزار عبادت گزاروں سے زیادہ سخت ہوتا ہے۔ (سنن ابن ماجہ،ابواب السنۃ:بَابُ: فَضْلِ الْعُلَمَاءِ وَالْحَثِّ عَلَى طَلَبِ الْعِلْمِ:علماء کے فضائل و مناقب اور طلب علم کی ترغیب:،جلد١،ص١٥٠،حديث نمبر ٢٢٢)

کثیر بن قیس بیان کرتے ہیں: میں حضرت ابو درداء رضی اللہ عنہ کے پاس دمشق کی مسجد میں بیٹھا ہوا تھا ایک شخص ان کے پاس آیا اور بولا اے حضرت ابو درداء رضی اللہ عنہ میں مدینہ منورہ سے نبی کریم ﷺ کے شہر سے آپ کی خدمت میں حاضر ہوا ہوں مجھے یہ پتہ چلا ہے کہ آپ وہ حدیث نبی کریم ﷺ کے حوالے سے بیان کرتے ہیں: حضرت ابودرداء رضی اللہ عنہ نے دریافت کیا: کیا تم یہاں کوئی تجارت کرنے کے لیے آئے ہو؟ اس نے جواب دیا: جی نہیں۔ حضرت ابو درداء رضی اللہ عنہ نے دریافت کیا: تم اس کے علاوہ کسی اور مقصد کے لیے آئے ہو؟ اس نے جواب دیا: جی نہیں تو حضرت ابو درداء رضی اللہ عنہ نے بتایا: میں نے نبی کریم ﷺ کو یہ بات ارشاد فرماتے ہوئے سنا ہے جو شخص علم کے حصول کے لیے کسی راستے پر چلتا ہے۔ اللہ تعالی اس کے لیے جنت کے راستے کو آسان کر دیتا ہے اور فرشتے طالب علم سے راضی ہو کر اپنے پر اس کے لیے بچھا دیتے ہیں آسمان اور زمین میں موجود ہر چیز یہاں تک کہ پانی میں موجود مچھلیاں بھی اس کے لیے دعائے مغفرت کرتی ہیں اور عالم شخص کو عبادت گزار شخص پر وہی فضیلت حاصل ہے جو چاند کو تمام ستاروں پر حاصل ہے بے شک علماء انبیاء کے وارث ہیں بے شک انبیاء وراثت میں درہم یا دینا نہیں چھوڑتے ہیں: وہ لوگ علم چھوڑتے ہیں:۔ تو جو شخص اسے حاصل کر لیتا ہے وہ بڑے حصے کو حاصل کر لیتا ہے۔ (سنن ابن ماجہ،ابواب السنۃ:بَابُ: فَضْلِ الْعُلَمَاءِ وَالْحَثِّ عَلَى طَلَبِ الْعِلْمِ:علماء کے فضائل و مناقب اور طلب علم کی ترغیب:،جلد١،ص١٥٠،حديث نمبر ٢٢٣)

حضرت انس بن مالک رضی اللہ عنہ روایت کرتے ہیں نبی کریم ﷺ نے ارشاد فرمایا ہے: علم حاصل کرنا ہر مسلمان پر فرض ہے اور نا اہل کے سامنے علم پیش کرنے والا شخص اس طرح ہے جیسے کوئی خنزیر کے گلے میں جواہرات، موتیوں اور سونے کا ہار پہنا دے۔ (سنن ابن ماجہ،ابواب السنۃ:بَابُ: فَضْلِ الْعُلَمَاءِ وَالْحَثِّ عَلَى طَلَبِ الْعِلْمِ:علماء کے فضائل و مناقب اور طلب علم کی ترغیب:،جلد١،ص١٥١،حديث نمبر ٢٢٤)

حضرت ابو ہریرہ رضی اللہ عنہ روایت کرتے ہیں: نبی کریم ﷺ نے یہ بات ارشاد فرمائی ہے: جو شخص کسی مسلمان سے کسی دنیاوی تکلیف کو دور کرے گا اللہ تعالی اس شخص سے قیامت کے دن کی کسی تکلیف کو دور کر دے گا۔ جو شخص کسی مسلمان کی پردہ پوشی کرے گا اللہ تعالی دنیا و آخرت میں اس کی پردہ پوشی کرے گا۔ جو شخص کسی تنگدست کو آسانی فراہم کرے گا اللہ تعالیٰ دنیا و آخرت میں اسے آسانی فراہم کرے گا۔ اللہ تعالی اس وقت تک بندے کی مدد کرتا ہے جب تک وہ اپنے بھائی کی مدد کرتا ہے اور جو شخص کسی راستے پر علم کے حصول کے لیے چلتا ہے تو اللہ تعالیٰ اس وجہ سے اس شخص کے لیے جنت کے راستے کو آسان کر دیتا ہے۔ اور جب بھی کچھ لوگ اللہ کے کسی گھر میں اکٹھے ہو کر اس کی کتاب کی تلاوت کرتے ہیں: آپس میں ایک دوسرے کو اس کا درس دیتے ہیں: تو فرشتے انہیں گھیر لیتے ہیں: اور ان پر سکینت نازل ہوتی ہے۔رحمت انہیں ڈھانپ لیتی ہے اور اللہ تعالی اپنے پاس موجود لوگوں کے سامنے ان کا تذکرہ کرتا ہے اور جس شخص کا عمل اسے پیچھے کر دے اس کا نسب اسے آگے نہیں کر سکتا۔ (سنن ابن ماجہ،ابواب السنۃ:بَابُ: فَضْلِ الْعُلَمَاءِ وَالْحَثِّ عَلَى طَلَبِ الْعِلْمِ:علماء کے فضائل و مناقب اور طلب علم کی ترغیب:،جلد١،ص١٥٢،حديث نمبر ٢٢٥)

زربن جیش بیان کرتے ہیں: میں حضرت صفوان بن عسال مرادی رضی اللہ تعالی عنہ کی خدمت میں حاضر ہوا انہوں نے دریافت کیا : تم کیوں آئے ہو میں نے عرض کی: میں علم کے حصول کے لیے آیا ہوں تو حضرت صفوان رضی اللہ تعالی عنہ نے بتایا: میں نے نبی کریم ﷺ کو یہ ارشاد فرماتے ہوئے سنا ہے: ”جو بھی شخص علم کے حصول کے لیے اپنے گھر سے نکلتا ہے تو فرشتے اپنے پر اس کے لیے بچھا دیتے ہیں اس کے اس طرز عمل سے راضی ہوتے ہوئے ( وہ ایسا کرتے ہیں) (سنن ابن ماجہ،ابواب السنۃ:بَابُ: فَضْلِ الْعُلَمَاءِ وَالْحَثِّ عَلَى طَلَبِ الْعِلْمِ:علماء کے فضائل و مناقب اور طلب علم کی ترغیب:،جلد١،ص١٥٣،حديث نمبر ٢٢٦)

حضرت ابو ہریرہ رضی اللہ عنہ بیان کرتے ہیں: میں نے نبی کریم ﷺ کو یہ ارشاد فرماتے ہوئے سنا ہے: ” جو شخص میری اس مسجد میں آتا ہے اور وہ صرف بھلائی کا علم حاصل کرنے کے لیے یا اس کی تعلیم دینے کے لیے یہاں آتا ہے تو وہ اللہ کی راہ میں جہاد کرنے والے کی مانند ہے اور جو شخص اس کے علاوہ کسی اور مقصد کے لیے یہاں آتا ہے تو اس کی مثال اس طرح ہے جیسے کوئی شخص کسی دوسرے کے سامان پر نظر رکھ کر بیٹھا ہو۔ (سنن ابن ماجہ،ابواب السنۃ:بَابُ: فَضْلِ الْعُلَمَاءِ وَالْحَثِّ عَلَى طَلَبِ الْعِلْمِ:علماء کے فضائل و مناقب اور طلب علم کی ترغیب:،جلد١،ص١٥٤،حديث نمبر ٢٢٧)

حضرت ابوامامہ رضی اللہ عنہ روایت کرتے ہیں کہ نبی کریم ﷺ نے ارشاد فرمایا ہے علم کے قبض ہو جانے سے پہلے تم پر علم حاصل کرنا لازم ہے اور اس کے قبض ہو جانے سے مراد یہ ہے کہ اسے اٹھا لیا جائے۔ نبی کریم ﷺ نے اپنی دو انگلیوں یعنی درمیانی انگلی اور انگوٹھے کے ساتھ والی انگلی کو اس طرح ملا یا اور ارشادفرمایا: عالم اور متکلم اجر میں شریک ہوتے ہیں ان کے علاوہ باقی سب لوگوں میں کوئی بھلائی نہیں ہے۔ (سنن ابن ماجہ،ابواب السنۃ:بَابُ: فَضْلِ الْعُلَمَاءِ وَالْحَثِّ عَلَى طَلَبِ الْعِلْمِ:علماء کے فضائل و مناقب اور طلب علم کی ترغیب:،جلد١،ص١٥٥،حديث نمبر ٢٢٨)

حضرت عبد اللہ بن عمرو رضی اللہ عنہ بیان کرتے ہیں: ایک دن نبی کریم ﷺ اپنے کسی حجرہ مبارک سے باہر تشریف لائے اور مسجد میں داخل ہوئے وہاں دو حلقے موجود تھے ان میں سے ایک حلقے کے افراد قرآن کی تلاوت کر رہے تھے اور اللہ تعالٰی سے دعا مانگ رہے تھے جبکہ دوسرے حلقے کے لوگ علم حاصل کر رہے تھے اور تعلیم دے رہے تھے تو نبی کریم ﷺ نے ارشاد فرمایا ان میں سے ہر ایک بھلائی پر گامزن ہے یہ لوگ قرآن کی تلاوت کر رہے ہیں اور اللہ تعالی سے دعا مانگ رہے ہیں اگر اللہ تعالی انہیں چاہے تو وہ چیز انہیں عطا کر دے اور اگر چاہے تو عطا نہ کرے اور یہ لوگ علم حاصل کر رہے ہیں اور تعلیم دے رہے ہیں تو مجھے بھی تعلیم دینے والا بنا کر مبعوث کیا گیا ہے۔ ( راوی کہتے ہیں) پھر نبی کریم ﷺ ان کے ساتھ تشریف فرما ہو گئے۔ (سنن ابن ماجہ،ابواب السنۃ:بَابُ: فَضْلِ الْعُلَمَاءِ وَالْحَثِّ عَلَى طَلَبِ الْعِلْمِ:علماء کے فضائل و مناقب اور طلب علم کی ترغیب:،جلد١،ص١١٥٥،حديث نمبر ٢٢٩)

حضرت زید بن ثابت رضی اللہ عنہ روایت کرتے ہیں نبی کریم ﷺ نے ارشاد فرمایا ہے: اللہ تعالی اس شخص کو خوش رکھے جو ہماری کوئی بات سن کر اس کی تبلیغ کر دے تو فقہ کا علم حاصل کرنے والے کچھ لوگ فقیہہ نہیں بھی ہوتے ہیں اور بعض اوقات فقہ کا علم رکھنے والا کوئی شخص اس تک وہ چیز منتقل کرتا ہے جو اس سے بڑا فقیہ ہوتا ہے علی بن محمد نامی راوی نے اپنی روایت میں یہ الفاظ مزید نقل کئے ہیں: تین چیزیں ایسی ہیں جس کے بارے میں مسلمان کا دل خیانت کا مرتکب نہیں ہوتا، عمل کا خالص اللہ تعالی کے لیے ہونا، مسلمان حکمرانوں کے لیے خیر خواہی اور مسلمانوں کی جماعت کے ساتھ رہنا۔ (سنن ابن ماجہ،ابواب السنۃ:بَابُ: مَنْ بَلَّغَ عِلْمًا:علم دین کے مبلغ کے مناقب و فضائل:،جلد١،ص١٥٦،حديث نمبر ٢٣٠)

محمد بن جبیر رضی اللہ عنہ اپنے والد کا یہ بیان نقل کرتے ہیں نبی کریم ﷺ منی(Meena) میں ؛خفیف؛ کے مقام پر کھڑے ہوئے آپ ﷺ نے ارشادفرمایا: اللہ تعالی اس شخص کو خوش رکھے جو ہماری بات سن کر اس کی تبلیغ کر دیتا ہے بعض اوقات فقہ (دینی احکام) کو حاصل کرنے والا شخص خود فقیہ نہیں ہوتا اور بعض اوقات فقہ کا علم حاصل کرنے والا اس شخص تکچیز منتقل کر دیتا ہے جو اس سے بڑا فقیہ ہوتا ہے"۔ اس سند سے بھی حضرت جبیر بن مطعم رضی اللہ عنہ سے اسی کے ہم معنی حدیث مرفوعاً مروی ہے۔ (سنن ابن ماجہ،ابواب السنۃ:بَابُ: مَنْ بَلَّغَ عِلْمًا:علم دین کے مبلغ کے مناقب و فضائل:،جلد١،ص١٥٧،حديث نمبر ٢٣١)

عبد الرحمن بن عبد اللہ اپنے والد کے حوالے سے نبی کریم ﷺ کا یہ فرمان نقل کرتے ہیں اللہ تعالی اس شخص کو خوش رکھے جو ہم سے کوئی بات سن کر اس کی تبلیغ کر دے کیونکہ جس شخص تک وہ چیز منتقل کی گئی ہوتی ہے وہ براہ راست سننے والے کے مقابلے میں بعض اوقات زیادہ اچھے طریقے سے اسے یاد رکھتا ہے۔ (سنن ابن ماجہ،ابواب السنۃ:بَابُ: مَنْ بَلَّغَ عِلْمًا:علم دین کے مبلغ کے مناقب و فضائل:،جلد١،ص١٥٧،حديث نمبر ٢٣٢)

محمد بن سیرین نے عبد الرحمن ابوبکرہ کے حوالے سے ان کے والد سے ایک اور شخص کے حوالے سے جو میرے نزدیک عبد الرحمن سے زیادہ فضیلت رکھتے ہیں کے حوالے سے حضرت ابو بکرہ رضی اللہ عنہ سے یہ روایت نقل کی ہے۔ قربانی کے دن نبی کریم ﷺ نے خطبہ دیتے ہوئے ارشاد فرمایا: " موجود لوگ غیر موجود افراد تک تبلیغ کر دیں کیونکہ بعض اوقات جس اگلے شخص تک وہ چیز پہنچائی گئی ہوتی ہے وہ براہ راست سننے والے کے مقابلے میں اس کو زیادہ بہتر طور پر یاد رکھتا ہے۔ (سنن ابن ماجہ،ابواب السنۃ:بَابُ: مَنْ بَلَّغَ عِلْمًا:علم دین کے مبلغ کے مناقب و فضائل:،جلد١،ص١٥٨،حديث نمبر ٢٣٣)

حضرت معاویہ قشیری رضی اللہ عنہ روایت کرتے ہیں نبی کریم ﷺ نے ارشاد فرمایا ہے: "خبردار: موجود شخص غیر موجود افراد تک تبلیغ کر دے۔ (سنن ابن ماجہ،ابواب السنۃ:بَابُ: مَنْ بَلَّغَ عِلْمًا:علم دین کے مبلغ کے مناقب و فضائل:،جلد١،ص١٥٨،حديث نمبر ٢٣٤)

حضرت عبد اللہ بن عمر رضی اللہ عنہما نبی کریم ﷺ کا یہ فرمان نقل کرتے ہیں تم میں سے موجود لوگ غیر موجود لوگوں تک تبلیغ کردیں۔ (سنن ابن ماجہ،ابواب السنۃ:بَابُ: مَنْ بَلَّغَ عِلْمًا:علم دین کے مبلغ کے مناقب و فضائل:،جلد١،ص١٥٩،حديث نمبر ٢٣٥)

حضرت انس بن مالک رضی اللہ عنہ روایت کرتے ہیں نبی کریم ﷺ نے ارشاد فرمایا ہے: اللہ تعالی اس شخص کو خوش رکھے جو ہماری بات سن کر اسے محفوظ کر لے پھر اسے ہمارے حوالے سے آگے بیان کر دے کیونکہ بعض اوقات براہ راست سیکھنے والا در حقیقت سیکھنے والا نہیں ہوتا اور بعض اوقات سیکھنے والا شخص اس شخص تک منتقل کر دیتا ہے جو اس سے زیادہ سمجھ بوجھ رکھتا ہے۔ (سنن ابن ماجہ،ابواب السنۃ:بَابُ: مَنْ بَلَّغَ عِلْمًا:علم دین کے مبلغ کے مناقب و فضائل:،جلد١،ص١٥٩،حديث نمبر ٢٣٦)

حضرت انس بن مالک رضی اللہ عنہ روایت کرتے ہیں، نبی کریم ﷺ نے ارشاد فرمایا ہے: ”لوگوں میں سے کچھ لوگ بھلائی کے لیے چابی ہوتے ہیں اور برائی کے لیے تالہ ہوتے ہیں اور لوگوں میں سے کچھ لوگ برائی کے لیےچابی ہوتے ہیں اور بھلائی کے لیے تالہ ہوتے ہیں تو اس شخص کے لیے مبارکباد ہے جس کے ہاتھوں میں اللہ تعالٰی بھلائی کی چابیاں رکھ دیتا ہے اور اس شخص کے لیے بربادی ہے جس کے ہاتھوں میں اللہ تعالی برائی کی چابیاں رکھ دیتا ہے۔ (سنن ابن ماجہ،ابواب السنۃ:بَابُ: بَابُ: مَنْ كَانَ مِفْتَاحًا لِلْخَيْرِ:خیر کی کنجی والی شخصیت کا بیان۔:،جلد١،ص١٦٠،حديث نمبر ٢٣٧)

حضرت سہل بن سعد نبی کریم ﷺ کایہ فرمان نقل کرتے ہیں یہ بھلائی خزانوں کی طرح ہوتی ہے اور ان خزانوں کی کچھ چابیاں ہوتی ہیں تو اس بندے کے لیے مبارکباد ہے جسے اللہ تعالیٰ بھلائی کے لیے چابی بنادے اور برائی کے لیے رکاوٹ بنا دے اور اس شخص کے لیے بربادی ہے جسے اللہ تعالی برائی کے لیے چابی بنادے اور بھلائی کے لیے رکاوٹ بنادے۔ (سنن ابن ماجہ،ابواب السنۃ:بَابُ: بَابُ: مَنْ كَانَ مِفْتَاحًا لِلْخَيْرِ:خیر کی کنجی والی شخصیت کا بیان۔:،جلد١،ص١٦٠،حديث نمبر ٢٣٨)

حضرت ابو درداء رضی اللہ عنہ بیان کرتے ہیں میں نے نبی کریم ﷺ کو یہ ارشاد فرماتے ہوئے سنا ہے: ” عالم شخص کے لیے آسمانوں اور زمین میں موجود ہر چیز دعائے مغفرت کرتی ہے یہاں تک کہ سمندر میں موجود مچھلیاں بھی (اس کے لیے دعائے مغفرت کرتی ہیں ۔ (سنن ابن ماجہ،ابواب السنۃ:بَابُ: ثَوْابِ مُعَلِّمِ النَّاسِ الْخَيْرَ:لوگوں کو خیر و بھلائی سکھانے والے کا ثواب ۔:،جلد١،ص١٦١،حديث نمبر ٢٣٩)

سہل بن معاذ اپنے والد کے حوالے سے نبی کریم ﷺ کا فرمان نقل کرتے ہیں جو شخص علم کی تعلیم دیتا ہے تو اسے اس شخص کی مانند بھی اجر ملے گا جو اس علم پر عمل کرے گا اور عمل کرنے والے کے اجر میں کوئی کمی نہیں ہوگی۔ (سنن ابن ماجہ،ابواب السنۃ:بَابُ: ثَوْابِ مُعَلِّمِ النَّاسِ الْخَيْرَ:لوگوں کو خیر و بھلائی سکھانے والے کا ثواب ۔:،جلد١،ص١٦٢،حديث نمبر ٢٤٠)

عبداللہ بن ابوقتادہ اپنے والد کے حوالے سے نبی کریم ﷺ کا یہ فرمان نقل کرتے ہیں: " آدمی اپنے بعد جو چیز چھوڑ کر جاتا ہے ان میں تین چیزیں بہتر ہیں، ایک وہ نیک اولاد جو اس کے لیے دعا کرے دوسرا وہ صدقہ جو جاریہ ہو جس کا اجر اس شخص تک پہنچتا رہے اور ایک وہ علم جس پر اس کے بعد عمل کیا جائے۔ یہی روایت ایک اور سند کے ساتھ منقول ہے۔ (سنن ابن ماجہ،ابواب السنۃ:بَابُ: ثَوْابِ مُعَلِّمِ النَّاسِ الْخَيْرَ:لوگوں کو خیر و بھلائی سکھانے والے کا ثواب ۔:،جلد١،ص١٦٣،حديث نمبر ٢٤١)

حضرت ابو ہریره رضی اللہ عنہ روایت کرتے ہیں نبی کریم ﷺ نے ارشاد فرمایا ہے: مومن کے مرنے کے بعد اس کے اعمال اور اس کی نیکیوں میں سے جو چیز اس تک پہنچتی ہے ان میں ایک وہ علم ہے جس کی اس نے تعلیم دی ہو جسے اس نے پھیلایا ہو ایک وہ نیک صالح اولاد ہے جسے وہ چھوڑ کر گیا ہو اور ایک وہ قرآن مجید ہے جو اس کی وراثت میں منتقل ہوا ہو یا وہ مسجد ہے جسے اس نے بنایا ہویاوہ مسافروں کے لیے سرائے ہو جسے اس نے بنایا ہو یاوہ نہر ہے جسے اس نے جاری کیا ہو یا وہ صدقہ ہے جسے اس نے اپنی صحت اور زندگی کے دوران اپنے مال میں سے نکالا تھا، اس کا اجر و ثواب اس کے مرنے کے بعد بھی اس شخص تک پہنچتا رہتا ہے۔ (سنن ابن ماجہ،ابواب السنۃ:بَابُ: ثَوْابِ مُعَلِّمِ النَّاسِ الْخَيْرَ:لوگوں کو خیر و بھلائی سکھانے والے کا ثواب ۔:،جلد١،ص١٦٣،حديث نمبر ٢٤٢)

حضرت ابوہریر رضی اللہ عنہ نبی کریم ﷺ کا یہ فرمان نقل کرتے ہیں: ” سب سے افضل صدقہ یہ ہے مسلمان شخص علم کی تعلیم حاصل کرے اور پھر اپنے کسی مسلمان بھائی کو اس کی تعلیم دے۔ (سنن ابن ماجہ،ابواب السنۃ:بَابُ: ثَوْابِ مُعَلِّمِ النَّاسِ الْخَيْرَ:لوگوں کو خیر و بھلائی سکھانے والے کا ثواب ۔:،جلد١،ص١٦٤،حديث نمبر ٢٤٣)

شعیب بن عبد اللہ اپنے والد کا یہ بیان نقل کرتے ہیں، نبی کریم ﷺ کو کبھی بھی تکیے کے ساتھ ٹیک لگا کرکھاتے ہوئے نہیں دیکھا گیا اور نہ ہی ایسی حال میں دیکھا گیا کہ آپ ﷺ کے پیچھے دو آدمی چل رہے ہوں۔ یہی روایت بعض دیگر اسناد کے ہمراہ بھی منقول ہے۔ (سنن ابن ماجہ،ابواب السنۃ:بَابُ: مَنْ كَرِهَ أَنْ يُوطَأَ عَقِبَاهُ: اس کا ذکر جس کو یہ ناپسند ہو کہ لوگ اس کے پیچھے پیچھے چلے :،جلد١،ص١٦٤،حديث نمبر ٢٤٤)

حضرت ابوامامہ رضی اللہ عنہ بیان کرتے ہیں: ایک مرتبہ شدید گرمی کے وقت نبی کریم ﷺ بقیع غرقد کے پاس سے گزرے تو کچھ لوگ آپ صلی اللہ علیہ وسلم کے پیچھے چلنے لگے جب نبی کریم ﷺ نے ان کے جوتوں کی آواز سنی اور آپ ﷺ کو یہ اچھا محسوس ہوا تو نبی کریم ﷺ تشریف فرما ہو گئے یہاں تک کہ وہ لوگ آپ ﷺ سے آگے گزر گئے نبی کریم ﷺ نے ایسا اس لیے کیا تھا تا کہ آپ صلی اللہ تعالی علیہ وسلم کے ذہن میں تکبر سے متعلق کوئی خیال نہ آئے۔ (سنن ابن ماجہ،ابواب السنۃ:بَابُ: مَنْ كَرِهَ أَنْ يُوطَأَ عَقِبَاهُ: اس کا ذکر جس کو یہ ناپسند ہو کہ لوگ اس کے پیچھے پیچھے چلے :،جلد١،ص١٦٥،حديث نمبر ٢٤٥)

حضرت جابر بن عبد الله رضی اللہ تعالی عنہما بیان کرتے ہیں: نبی کریم ﷺ جب چلتے تھے تو آپ ﷺ کے اصحاب آپ ﷺ کے آگے چلتے تھے اور وہ نبی کریم ﷺ کے پیچھے والے حصے کو فرشتوں کے لیے چھوڑ دیتے تھے۔ (سنن ابن ماجہ،ابواب السنۃ:بَابُ: مَنْ كَرِهَ أَنْ يُوطَأَ عَقِبَاهُ: اس کا ذکر جس کو یہ ناپسند ہو کہ لوگ اس کے پیچھے پیچھے چلے :،جلد١،ص١٦٥،حديث نمبر ٢٤٦)

حضرت ابو سعید خدری رضی اللہ عنہ نبی کریم ﷺ کا یہ فرمان نقل کرتے ہیں: مشرق کی سمت سے لوگ تمہارے پاس آئیں گے وہ علم حاصل کرنا چاہتے ہوں گے جب وہ تمہارے پاس آئیں تو تم ان کے بارے میں بھلائ کی تلقین کو قبول کرو۔ راوی بیان کرتے ہیں: جب حضرت ابوسعید خدری رضی اللہ عنہ ہمیں دیکھتے تھے تو فرمایا کرتے تھے ان لوگوں کو خوش آمدید! جن کے بارے میں نبی کریم ﷺ نے ہدایت کی تھی۔ (سنن ابن ماجہ،ابواب السنۃ:بَابُ: الْوَصَاةِ بِطَلَبَةِ الْعِلْمِ: طالبان علم کی وصیت۔،جلد١،ص١٦٦،حديث نمبر ٢٤٧)

اسماعیل رحمتہ اللہ تعالی علیہ نامی راوی بیان کرتے ہیں : ہم حسن نامی راوی کی خدمت میں ان کی عیادت کرنے کے لیے حاضر ہوئے ہم نے گھر بھر دیا وہ اس وقت لیٹے ہوئے تھے انہوں نے اپنے پاؤں سمیٹ لئے پھر انہوں نے یہ بات بیان کی ایک مرتبہ ہم حضرت ابو ہریرہ‌ رضی اللہ عنہ کی عیادت کرنے کے لیے ان کے ہاں گئے تھے تو ہم نے گھر بھر دیا تھا وہ اس وقت لیٹے ہوئے تھے تو انہوں نے اپنے پاؤں سمیٹ لیے پھر انہوں نے بتایا ایک مرتبہ ہم نبی کریم ﷺ کی خدمت میں حاضر ہوئے تو ہم نے گھر کو بھر دیا نبی کریم ﷺ اس وقت پہلو کے بل لیٹے ہوئے تھے جب آپ ﷺ ہمیں ملاحظہ فرمایا تو آپ ﷺ نے اپنے پاؤں سمیٹ لیے پھر آپ ﷺ نے ارشاد فرمایا: عنقریب میرے بعد تمہارے پاس کچھ ایسے لوگ آئیں گے جو علم طلب کرنے والے ہوں گے تو تم انہیں خوش آمدید کہنا انہیں سلام کہنا اور انہں تعلیم دینا ۔ راوی کہتے ہیں اللہ کی قسم ہم نے ایسے لوگوں کو پایا جنہوں نے نہ کبھی ہمیں مرحبا کہا اور نہ کبھی سلام کیا اور نہ ہی ہمیں تعلیم دی بلکہ الٹا جب ہم ان کے پاس جاتے تو وہ ہمارے ساتھ زیادتی کیا کرتے۔ (سنن ابن ماجہ،ابواب السنۃ:بَابُ: الْوَصَاةِ بِطَلَبَةِ الْعِلْمِ: طالبان علم کی وصیت۔،جلد١،ص١٦٧،حديث نمبر ٢٤٨)

ہارون عبدی بیان کرتے ہیں: جب ہم حضرت ابو سعید خدری رضی اللہ عنہ کی خدمت میں حاضر ہوتے تھے تو وہ یہ فرماتے تھے۔ ان لوگوں کو خوش آمدید جن کے بارے میں نبی کریم صلی اللہ تعالی علیہ والہ وسلم نے وصیت کی تھی نبی کریم ﷺ نے ہمیں فرمایا تھا لوگ تمہارے پیرو کار ہوں گے، عنقریب وہ دین علم کے حصول کے لیے دنیا کے دور دراز علاقوں سے تمہارے پاس آئیں گے جب وہ تمہارے پاس آئیں تو تم ان کے بارے میں بھلائی کی وصیت کو قبول کرو۔ (سنن ابن ماجہ،ابواب السنۃ:بَابُ: الْوَصَاةِ بِطَلَبَةِ الْعِلْمِ: طالبان علم کی وصیت۔،جلد١،ص١٦٧،حديث نمبر ٢٤٩)

حضرت ابوہریرہ رضی اللہ عنہ بیان کرتے ہیں: نبی کریم ﷺ یہ دعا مانگا کرتے تھے۔ "اے اللہ میں ایسے علم سے تیری پناہ مانگتا ہوں جو نفع نہ دے ایسی دعا سے جو سنی نہ جائے اور ایسے دل سے جو ڈرے نہیں اور ایسے نفس سے جو سیر نہ ہو ان سب سے تیری پناہ مانگتا ہوں )۔ (سنن ابن ماجہ،ابواب السنۃ:بَابُ: الاِنْتِفَاعِ بِالْعِلْمِ وَالْعَمَلِ بِهِ: علم سے نفع اٹھانے اور اس پر عمل کرنے کا بیان۔،جلد١،ص١٦٩،حديث نمبر ٢٥٠)

حضرت ابوہریرہ‌ رضی اللہ عنہ بیان کرتے ہیں : نبی کریم ﷺ یہ دعامانگا کرتے تھے: اے اللہ تو نے مجھے جو علم دیا ہے اُس کے ذریعہ مجھے نفع عطاء کر اور مجھے اُس چیز کا علم عطاء کر جو مجھے نفع دے اور میرے علم میں اضافہ کر ہر حال میں ہر طرح کی حمد اللہ تعالی کے لیے مخصوص ہے۔ (سنن ابن ماجہ،ابواب السنۃ:بَابُ: الاِنْتِفَاعِ بِالْعِلْمِ وَالْعَمَلِ بِهِ: علم سے نفع اٹھانے اور اس پر عمل کرنے کا بیان۔،جلد١،ص١٦٩،حديث نمبر ٢٥١)

حضرت ابو ہریرہ رضی اللہ عنہ روایت کرتے ہیں نبی کریم ﷺ نے ارشاد فرمایا ہے جو کوئی شخص ایسا علم حاصل کرے جس کے ذریعے اللہ تعالی کی رضا حاصل کی جاتی ہے اور وہ شخص صرف دنیاوی فائدے کے حصول کے لیے اسے حاصل کرے تو ایسا شخص قیامت کے دن اس کی بو بھی نہیں پائے گا۔ ( راوی کہتے ہیں : اس سے مراد جنت کی بو ہے ) ابو الحسن کہتے ہیں یہی روایت ایک اور سند کے ہمراہ منقول ہے۔ (سنن ابن ماجہ،ابواب السنۃ:بَابُ: الاِنْتِفَاعِ بِالْعِلْمِ وَالْعَمَلِ بِهِ: علم سے نفع اٹھانے اور اس پر عمل کرنے کا بیان۔،جلد١،ص١٧٠،حديث نمبر ٢٥٢)

حضرت عبدالله بن عمر رضی اللہ عنہ نبی کریم ﷺ کا یہ فرمان نقل کرتے ہیں : ” جو شخص علم اس لیے حاصل کرتا ہے تا کہ اس کے ذریعے بے وقوفوں کے ساتھ بحث کرے یا علماء کے سامنے فخر کا اظہار کرے یا لوگوں کو اپنی طرف مائل کرے تو وہ شخص جہنم میں جائے گا۔ (سنن ابن ماجہ،ابواب السنۃ:بَابُ: الاِنْتِفَاعِ بِالْعِلْمِ وَالْعَمَلِ بِهِ: علم سے نفع اٹھانے اور اس پر عمل کرنے کا بیان۔،جلد١،ص١٧٠،حديث نمبر ٢٥٣)

حضرت جابر بن عبداللہ نبی کریم ﷺ کایہ فرمان نقل کرتے ہیں: علم اس لیے حاصل نہ کروتا کہ تم اس کے ذریعے علماء کے سامنے فخر و مباہات کا اظہار کرو یا اس کے ذریعے تم بے وقوفوں کے ساتھ بحث و مباحثہ کرو یا اس کے ذریعے محافل میں اپنے آپ کو نمایاں کرو جو شخص ایسا کرے گا تو پھر (اس کا ٹھکانہ) آگ ہوگی، آگ ہوگی۔ (سنن ابن ماجہ،ابواب السنۃ:بَابُ: الاِنْتِفَاعِ بِالْعِلْمِ وَالْعَمَلِ بِهِ: علم سے نفع اٹھانے اور اس پر عمل کرنے کا بیان۔،جلد١،ص١٧٠،حديث نمبر ٢٥٤)

حضرت عبداللہ بن عباس رضی اللہ عنہما نبی کریم ﷺ کا یہ فرمان نقل کرتے ہیں: " عنقریب میری امت کے کچھ افراد دین کا علم حاصل کریں گے وہ قرآن کی تعلیم حاصل کریں گے اور یہ کہیں گے ہم امراء کے پاس جائیں گے اور ان سے دنیاوی فوائد حاصل کریں گے البتہ ہم اپنے دین کی وجہ سے ان سے الگ تھلگ رہیں گے (یعنی ان کے گناہوں میں ان کا ساتھ نہیں دیں گے حالانکہ ایسا نہیں ہوسکتا، جس طرح کانٹے دار درخت سے صرف کانٹے ہی چنے جا سکتے ہیں اس طرح ان (امیر لوگوں) کے قرب سے صرف ( گناہ ہی ہوگا " محمد بن صباح نامی راوی بیان کرتے ہیں : اس سے مراد یہ ہے ان لوگوں کو گناہ ہی حاصل ہو گا۔ (سنن ابن ماجہ،ابواب السنۃ:بَابُ: الاِنْتِفَاعِ بِالْعِلْمِ وَالْعَمَلِ بِهِ: علم سے نفع اٹھانے اور اس پر عمل کرنے کا بیان۔،جلد١،ص١٧١،حديث نمبر ٢٥٥)

حضرت ابو ہریرہ رضی اللہ عنہ بیان کرتے ہیں: نبی کریم ﷺ نے ارشاد فرمایا ہے: ” جبّ حزن" سے اللہ تعالی کی پناہ مانگو لوگوں نے عرض کی: یا رسول اللہ ! جب حزن" کیا چیز ہے نبی کریم ﷺ نے ارشاد فرمایا یہ جہنم میں ایک وادی ہے جس سے جہنم بھی روزانہ چار سومرتبہ پناہ مانگتی ہے۔ عرض کی گئی: اے اللہ تعالی کے رسول ! اس میں داخل کون ہوگا ؟ نبی کریم ﷺ نے ارشاد فرمایا: یہ دکھاوے کے طور پر قرآن مجید پڑھنے والے لوگوں کے لیے تیار کی گئی ہے۔ اور اللہ تعالی کے نزدیک سب سے نا پسندیدہ عالم وہ ہیں جو امراء کے ہاں آتے جاتے ہوں۔ محاربی کہتے ہیں: اس سے مراد ظالم حکمران ہیں ۔ یہی روایت بعض دیگر اسناد کے ہمراہ بھی منقول ہے۔ (سنن ابن ماجہ،ابواب السنۃ:بَابُ: الاِنْتِفَاعِ بِالْعِلْمِ وَالْعَمَلِ بِهِ: علم سے نفع اٹھانے اور اس پر عمل کرنے کا بیان۔،جلد١،ص١٧٢،حديث نمبر ٢٥٦)

حضرت عبد اللہ بن مسعود رضی اللہ عنہ فرماتے ہیں اگر اہل علم علم کی حفاظت کریں اور اسے اس کے اہل لوگوں تک منتقل کریں تو اس کے ذریعے وہ اپنے زمانے کے لوگوں کے سردار بن جائیں گے لیکن انہوں نے اس علم کو اہل دنیا کے لیے خرچ کیا تا کہ اس کے ذریعے ان لوگوں سے دنیا حاصل کریں تو یہ اہل علم ان امیر لوگوں کے ہاں ذلیل و رسواء ہو گئے میں نے تمہارے نبی ﷺ کو یہ ارشاد فرماتے ہوئے سنا ہے: جس شخص کی تمام تر توجہ کا مرکز اس کی آخرت ہو تو اللہ تعالی اس کی دنیاوی پریشانیوں کے حوالے سے اس کے لیے کافی ہو جاتا ہے اور جو شخص دنیا کے مختلف امور کے بارے میں پریشان رہتا ہے تو اللہ تعالی کو اسکی کوئی پرواہ نہیں ہوگی کہ وہ کون سی وادی میں ہلاکت کا شکار ہوتا ہے؟ ابوالحسن کہتے ہیں یہی روایت ایک اور سند کے ہمراہ بھی منقول ہے۔ (سنن ابن ماجہ،ابواب السنۃ:بَابُ: الاِنْتِفَاعِ بِالْعِلْمِ وَالْعَمَلِ بِهِ: علم سے نفع اٹھانے اور اس پر عمل کرنے کا بیان۔،جلد١،ص١٧٣،حديث نمبر ٢٥٧)

حضرت عبد اللہ بن عمر رضی اللہ عنہما نبی کریم ﷺ کا یہ فرمان نقل کرتے ہیں : جو شخص اللہ تعالی کی بجائے کسی اور کے لیے علم حاصل کرے یا اس کے ذریعے اللہ تعالی کی بجائے کسی اور کی رضا مندی) کا ارادہ کرے تو وہ جہنم میں اپنے مخصوص ٹھکانے تک پہنچنے کے لیے تیار رہے۔ (سنن ابن ماجہ،ابواب السنۃ:بَابُ: الاِنْتِفَاعِ بِالْعِلْمِ وَالْعَمَلِ بِهِ: علم سے نفع اٹھانے اور اس پر عمل کرنے کا بیان۔،جلد١،ص١٧٤،حديث نمبر ٢٥٨)

حضرت حذیفہ رضی اللہ عنہ نبی کریم صلی اللہ علیہ وسلم کا یہ بیان نقل کرتے ہیں، میں نے نبی کریم ﷺ کو یہ ارشادفرماتے ہوئے سنا ہے: علم اس لیے حاصل نہ کرو تا کہ تم اس کے ذریعے علماء کے سامنے فخر ومباہات کا اظہار کرو یا اس کے ذریعے بے وقوفوں سے بحث و مباحثہ کرو یا اس کے ذریعے لوگوں کی توجہ اپنی طرف مبذول کر لو تو جو شخص ایسا کرے گا وہ جہنم میں جائے گا۔ (سنن ابن ماجہ،ابواب السنۃ:بَابُ: الاِنْتِفَاعِ بِالْعِلْمِ وَالْعَمَلِ بِهِ: علم سے نفع اٹھانے اور اس پر عمل کرنے کا بیان۔،جلد١،ص١٧٤،حديث نمبر ٢٥٩)

حضرت ابو ہریرہ رضی اللہ عنہ روایت کرتے ہیں نبی کریم ﷺ نے ارشاد فرمایا ہے: " جو شخص علم اس لیے حاصل کرتا ہے تاکہ اس کے ذریعے علماء کے سامنے فخر و مباہات کا اظہار کرے یا بے وقوفوں کے ساتھ بحث و مباحثہ کرے لوگوں کی توجہ اپنی طرف مبذول کرے تو اللہ تعالی اسے جہنم میں داخل کرے گا۔ (سنن ابن ماجہ،ابواب السنۃ:بَابُ: الاِنْتِفَاعِ بِالْعِلْمِ وَالْعَمَلِ بِهِ: علم سے نفع اٹھانے اور اس پر عمل کرنے کا بیان۔،جلد١،ص١٧٥،حديث نمبر ٢٦٠)

حضرت ابوہریرہ رضی اللہ عنہ نبی کریم ﷺ کا یہ فرمان نقل کرتے ہیں: جو شخص کسی علمی چیز کو یاد کرنے کے بعد پھر اسے چھپائے تو جب اسے قیامت کے دن لایا جائے گا تو اسے آگ کی لگام ڈالی گئی ہوگی۔ یہی روایت ایک اور سند کے ہمراہ بھی منقول ہے۔ (سنن ابن ماجہ،ابواب السنۃ:بَابُ: مَنْ سُئِلَ عَنْ عِلْمٍ فَكَتَمَهُ: علم چھپانے پر وارد وعید کا بیان:،جلد١،ص١٧٥،حديث نمبر ٢٦١)

حضرت ابو ہریرہ رضی اللہ عنہ فرماتے ہیں اللہ کی قسم اگر اللہ کی کتاب میں دو آیات موجود نہ ہوتیں تو میں کبھی بھی ان کے یعنی نبی کریم ﷺ کے حوالے سے کوئی حدیث بیان نہ کرتا ۔ اگر اللہ تعالی کا یہ فرمان نہ ہوتا ۔ بے شک وہ لوگ جو اس چیز کو چھپاتے ہیں، جو اللہ تعالیٰ نے کتاب میں سے نازل کی ہے ۔ یہ اگلی دو آیات تک ہے۔ (سنن ابن ماجہ،ابواب السنۃ:بَابُ: مَنْ سُئِلَ عَنْ عِلْمٍ فَكَتَمَهُ: علم چھپانے پر وارد وعید کا بیان:،جلد١،ص١٧٦،حديث نمبر ٢٦٢)

حضرت جابر رضی اللہ عنہ نبی کریم ﷺ کا یہ فرمان نقل کرتے ہیں: ” جب اس امت کے آخری زمانے کے لوگ پہلے والوں پر لعنت کرنا شروع کریں گے اس وقت جوشخص کوئی ایک بات چھپائے گا تو اس چیز کو چھپائے گا جسے اللہ تعالی نے نازل کیا ہے۔ (سنن ابن ماجہ،ابواب السنۃ:بَابُ: مَنْ سُئِلَ عَنْ عِلْمٍ فَكَتَمَهُ: علم چھپانے پر وارد وعید کا بیان:،جلد١،ص١٧٦،حديث نمبر ٢٦٣)

حضرت انس بن مالک رضی اللہ عنہ بیان کرتے ہیں: میں نے نبی کریم ﷺ کو یہ ارشاد فرماتے ہوئے سنا ہے : جس شخص سے کسی علمی بات کے بارے میں دریافت کیا جائے اور وہ اسے چھپا دے تو قیامت کے دن اسے آگ سے بنی ہوئی لگام ڈالی جائے گی۔ (سنن ابن ماجہ،ابواب السنۃ:بَابُ: مَنْ سُئِلَ عَنْ عِلْمٍ فَكَتَمَهُ: علم چھپانے پر وارد وعید کا بیان:،جلد١،ص١٧٧،حديث نمبر ٢٦٤)

حضرت ابو سعید خدری رضی اللہ عنہ روایت کرتے ہیں نبی کریم ﷺ نے ارشاد فرمایا ہے: ” جو شخص کوئی ایسی علمی بات چھپائے جس کے ذریعے اللہ تعالی لوگوں کے معاملے میں انہیں دینی اعتبار سے کوئی نفع دے سکتا ہو تو اللہ تعالی قیامت کے دن اس شخص کو آگ سے بنی ہوئی لگام ڈالے گا۔ (سنن ابن ماجہ،ابواب السنۃ:بَابُ: مَنْ سُئِلَ عَنْ عِلْمٍ فَكَتَمَهُ: علم چھپانے پر وارد وعید کا بیان:،جلد١،ص١٧٧،حديث نمبر ٢٦٥)

حضرت ابوہریرہ رضی اللہ عنہ روایت کرتے ہیں نبی کریم ﷺ نے ارشاد فرمایا ہے ، جس شخص سے کسی علمی چیز کے بارے میں دریافت کیا جائے جسے وہ جانتا ہو پھر اسے چھپالے تو قیامت کے دن اسے آگ سے بنی ہوئی لگام ڈالی جائے گی۔ (سنن ابن ماجہ،ابواب السنۃ:بَابُ: مَنْ سُئِلَ عَنْ عِلْمٍ فَكَتَمَهُ: علم چھپانے پر وارد وعید کا بیان:،جلد١،ص١٧٨،حديث نمبر ٢٦٦)