Tum Farmaao Mai'n Apni Jaan Ke Bhale Bure Ka Zaati Ikhtiyaar Nahee'n Rakhta Magar Jo Allah Chaahe Har Giroh Ka Ek Wa'dah Hai Jab Unka Wa'dah Aayega To Ek Ghadi Na Peechhe Hate'n Na Aage Badhe'n. Tafseer :- Iss Aayat Me'n Allah Ta'ala Ka Rasoolullah ﷺ Ko Yeh Kahelwaana Ke Rasoolullah ﷺ Apni Jaan Ke Bhale Bure Ka Zaati Taur Par Ikhtiyaar Nahee'n Rakhte Yeh Rasoolullah ﷺ Ke Ataayi Ikhtiyaar Ka Inkaar Nahee'n Hai, Iss Aayat Se Yeh Aqeedah Nikaalna Ke Rasoolullah ﷺ Be Ikhtiyaar Hai'n Gumraahiyat Waala Aqeedah Hai, Rasoolullah ﷺ Ke Maalik Wa Mukhtaar Hone Par Bahot Saari Daleele'n Qur'aan Wa Hadees Se Maujood Hai'n. 1 - Sureh Tauba Aayat No.74 Tarjuma - Aur Unhe'n Kya Bura Laga Yehi Na Ke Allah Wa Rasool Ne Unhe'n Apne Fazl Se Gani Kardiya. 2 - Sureh Tauba Aayat No.59 Tarjuma - Aur Kya Achcha Hota Agar Woh Iss Par Raazi Hote Jo Allah Wa Rasool Ne Unko Diya Aur Kehte Hume'n Allah Kaafi Hai Ab Deta Hai Allah Hume'n Apne Fazl Se Aur Allah Ka Rasool Hume'n Allah Hi Ki Taraf Ragbat Hai. 3 - Sureh Nisa, Aayat No. 65 Tarjuma - To Aye Mehboob Tumhaare Rab Ki Qasam Woh Musalmaan Na Ho'nge Jab Tak Apne Aapas Ke Jhagde Me'n Tumhe'n Haakim Na Banaaye Phir Jo Kuchh Tum Hukm Farma Do Apne Dilo'n Me'n Usse Rukaawat Na Paaye'n Aur Jee Se Maan Le'n. 4 - Sureh Tauba, Aayat No.29 Tarjuma - Lado Unse Jo Imaan Nahee'n Laate Allah Par Aur Qayaamat Par Aur Haraam Nahee'n Maante Uss Cheez Ko Jisko Haraam Kiya Allah Aur Uske Rasool Ne Aur Sachche Deen Ke Taab'e Nahee'n Hote Ya'ni Woh Jo Kitaab Diye Gaye Jab Tak Apne Haath Se Juzya Na De Zaleel Hokar. 5 - Sahih Bukhaari, Hadees No.1468 Tarjuma - Ibne Jameel Ko Yehi Naagawaar Huwa Ke Woh Faqeer Tha Allah Aur Uske Rasool Ne Usko Gani Kardiya. 6 - Sunane Abu Daawood, Hadees No.2943 Tarjuma - Jise Humne Kisi Kaam Par Muqarrar Farmaaya Puss Humne Use Rizq Diya. 7 - Sahih Bukhaari, Hadees No.1349 Tarjuma - Rasoolullah ﷺ Ne Farmaaya Ke Allah Ta'ala Ne Makka Ko Haraam Kiya Hai, Na Mujhse Pehle Kisi Keliye (Yahaa'n Qatl Wa Khoon) Halaal Tha Aur Na Mere Ba'ad Hoga Aur Mere Liye Bhi Thodi Der Keliye (Fateh Makka Ke Din) Halaal Huwa Tha, Puss Na Uski Ghaas Ukhaadi Jaaye Na Uske Darakht Qalam (Kaate) Kiye Jaaye Na Yahaa'n Ke Jaanwaro'n Ko Bhagaaya Jaaye Aur Siwa Uss Shakhs Ke Jo A'elaan Karna Chaahta Ho (Ke Yeh Giri Huwi Cheez Kiski Hai) Kisi Keliye Wahaan Se Koi Giri Huwi Cheez Uthaani Jaa'iz Nahee'n Hai, "Iss Par Hazrat Abbaas Ne Kaha Lekin Isse Izkir (Ghaas) Ka Istesna (Alag) Kar Dijiye Ke Yeh Humaare Sunaaro Ke Aur Humaari Qabro'n Me'n Kaam Aati Hai, Rasoolullah ﷺ Ne Farmaaya Ke Magar Izkir (Ghaas) Ki Ijaazat Hai" Hazrat Abu Huraira Ki Rasoolullah ﷺ Se Riwaayat Me'n Hai "Humaari Qabro'n Aur Gharo'n Keliye 8 - Sahih Bukhaari, Hadees No.5557 Tarjuma - Hazrat Abu Barda Ne Namaaz e Eid Se Pehle Qurbaani Ke Jaanwar Ko Zibaah Karliya Tha To Rasoolullah ﷺ Ne Farmaaya Ke Iske Badle Me'n Doosri Qurbaani Karlo Unho'n Ne Arz Kiya Ke Mere Paas 1 Saal Se Kam Umr Ke Bachche Ke Siwa Aur Koi Jaanwar Nahee'n, Sh'oba Ne Bayaan Kiya Ke Mera Khayaal Hai Ke Hazrat Abu Barda Ne Yeh Bhi Kaha Tha Ke Woh 1 Saal Ki Bakri Se Bhi Umda Hai, Rasoolullah ﷺ Ne Farmaaya Ke Phir Isi Ki Uske Badle Me'n Qurbaani Kardo Lekin Tumhaare Ba'ad Yeh Kisi Keliye Kaafi Nahee'n Hogi. 9 - Sunan e Abu Daawood, Hadees No. 3607 Tarjuma - Rasoolullah ﷺ Ne Ek Aa'raabi Se Ek Ghoda Khareeda, Aap Use Apne Saath Le Aaye Taake Ghode Ki Qeemat Ada Karde, Rasoolullah ﷺ Jaldi Jaldi Chalne Lage, Dehaati Ne Taakheer Kardi, Puss Kuchh Log Dehaati Ke Paas Aana Shur'u Huwe Aur Ghode Ka Mol Bhaaw Karne Lage Aur Woh Log Yeh Na Samajh Sake Ke Rasoolullah ﷺ Ne Ise Khareed Liya Hai, Chunaanche Dehaati Ne Rasoolullah ﷺ Ko Pukaara Aur Kaha : Agar Aap Ise Khareedte Hai'n To Khareed Lijiye Warna Mai'n Ne Ise Bech Diya, Dehaati Ki Aawaaz Sunkar Rasoolullah ﷺ Khade Hogaye Aur Farmaaya : Kya Mai'n Tujhse Iss Ghode Ko Khareed Nahee'n Chuka? Dehaati Ne Kaha : Nahee'n, Qasam Allah Ki Mai'ne Ise Aapse Farokht Nahee'n Kiya Hai, Phir Rasoolullah ﷺ Ne Farmaaya : Kyu'n Nahee'n? Mai'n Tumse Isko Khareed Chuka Hoo'n, Phir Dehaati Yeh Kehne Laga Ke Gawaah Pesh Kijiye, To Hazrate Khuzaima Bin Saabit Bol Pade Ke Mai'n Gawaahi Deta Hoo'n Ke Tum Ise Rasoolullah ﷺ Ko Farokht Kar Chuke Ho, Rasoolullah ﷺ Hazrat Khuzaima Ki Taraf Mutawajjeh Huwe Aur Farmaaya Tum Kaise Gawaahi De Rahe Ho? Hazrat Khuzaima Ne Farmaaya, Aapki Tasdeeq Ki Wajah Se, Allah Ke Rasool ﷺ ! To Rasoolullah ﷺ Ne Hazrate Khuzaima Ki Gawaahi Ko 2 Aadmiyo'n (Shakhs) Ki Gawaahi Ke Baraabar Qaraar De Diya. 10 - Sahih Bukhaari, Hadees No.1936 Tarjuma - Hum Rasoolullah ﷺ Ki Khidmat Me'n The Ke Ek Shakhs Ne Haazir Ho Kar Kaha Ke Ya Rasoolallah ﷺ ! Mai'n To Tabaah Hogaya, Rasoolullah ﷺ Ne Dariyaaft Farmaaya Kya Baat Huwi? Usne Kaha Ke Mai'n Ne Roza Ki Haalat Me'n Apni Biwi Se Jima (Humbistary) Karliya Hai, Iss Par Rasoolullah ﷺ Ne Dariyaaft Farmaaya Kya Tumhaare Paas Koi Gulaam Hai Jise Tum Aazaad Kar Sako? Usne Kaha Nahee'n, Phir Rasoolullah ﷺ Ne Dariyaaft Farmaaya Kya Pe Dar Pe (Musalsal) 2 Maheene Ke Roze Rakh Sakte Ho? Usne Arz Ki Nahee'n, Phir Rasoolullah ﷺ Ne Poocha Kya Tumko 60 Miskeeno'n Ko Khaana Khilaane Ki Taaqat Hai? Usne Iska Jawaab Bhi Inkaar Me'n Diya, Raawi Ne Bayaan Kiya Ke Phir Rasoolullah ﷺ Thodi Der Keliye Thaher Gaye, Hum Bhi Apni Isi Haalat Me'n Baithe Huwe The Ke Rasoolullah ﷺ Ki Khidmat Me'n Ek Bada Sa Thaila (Arq Naami) Pesh Kiya Gaya Jisme'n Khajoore'n Thi, Arq Thaile Ko Kehte Hai'n (Jise Khajoor Ki Chhaal Se Banaate Hai) Rasoolullah ﷺ Ne Dariyaaft Farmaaya Ke Saa'il (Sawaali) Kahaa'n Hai? Usne Kaha Ke Mai'n Haazir Hoo'n, Rasoolullah ﷺ Ne Farmaaya Ke Ise Lelo Aur Sadqa Kardo, Uss Shakhs Ne Kaha Ke Ya Rasoolallah ﷺ ! Kya Mai'n Apne Se Zyaadah Mohtaaj Par Sadqa Kardu, Bakhuda In Dono'n Pathreele Maidaano'n Ke Darmiyaan Koi Bhi Gharaana Mere Ghar Se Zyaadah Mohtaaj Nahee'n Hai, Ispar Rasoolullah ﷺ Iss Tarah Ha'ns Pade Ke Aapke Aage Ke Daa'nt Dekhe Jaasake, Phir Rasoolullah ﷺ Ne Irshaad Farmaaya Ke Achcha Ja Aur Apne Ghar Waalo'n Ko Hi Khila De. 11 - Jaam'e Tirmizi, Kitaabul Manaaqib, Hadees No.3748 Tarjuma - Rasoolullah ﷺ Ne Hazrat Maula Ali Keliye Haalat e Janaabat (Na Paaki) Me'n Masjid Me'n Daakhil Hona Halaal Farma Diya.(Jabke Humaare Liye Na Paaki Ki Haalat Me'n Masjid Me'n Daakhil Hona Man'a Hai). 12- Sahih Bukhaari, Kitaabul A'etesaam Bil Kitaab Wass Sunnah, AlJuz 22 Safha No.329 Hadees No.6802 & Sahih Muslim, Kitaabul Jihaad Wassair, AlJuz 9, Safha No.218 Hadees No.3311) Tarjuma - Jab Rasoolullah ﷺ Apne Sahaba Ke Hamraah Madeena Ke Yahood Ke Pass Tashreef Legaye To Unko Daawate Islaam Dete Huwe Farmaaya ! Aye Yahoodiyo'n Ke Giroh Islaam Laao Salaamat Rahoge Jaan Lo Ke Tehqeeq Zameen Ke Maalik Allah Aur Uske Rasool Hai Aur Beshak Mai'n Tumko Iss Zameen Se Jila Watan Karta Hoo'n Jo Shakhs Tumse Apne Maal Se Koi Paaye To Woh Usko Bech Daale. 13 - Sahih Bukhaari, Kitaabul Janaa'iz, AlJuz 5, Safha No.124, Hadees No.1258 Tarjuma - Rasoolullah ﷺ Ne Farmaaya Ke Beshak Mai'n Zameen Ke Khazaano'n Ki Chaabiyaa'n (Keys) Diya Gaya Hoo'n. 14 - Sahih Bukhaari, Kitaabul Jihaad Wassair, AlJuz 10, Safha No.175 Hadees No.2755 Tarjuma - Rasoolullah ﷺ Ka Farmaan Hai Ke Mujhe Zameen Ke Tamaam Khazaano'n Ki Kunjiyaa'n Di Gayi Hai Phir Mere Haatho'n Me'n Rakhi Gayi Hai. 15 - Tafseer e Saawi, Safha 178 Tarjuma - Jiss Shakhs Ne Gumaan Kiya Ke Nabi ﷺ Doosre Logo'n Ki Tarah Kisi Cheez Ke Bilkul Maalik Nahee'n Hai Aur Na Aapke Saath Zaahiri Aur Baatini Naf'a Hai To Woh Kaafir Hai Duniya Wa Aakherat Me'n Khasaare Waala Hai.