Beshak Tumhaare Sunaaye Nahee'n Sunte Murde Aur Na Tumhaare Sunaaye Behre Pukaar Sune'n Jab Phire'n Peeth Dekar. Tafseer - Allama Ali Bin Mohammad Khaazin Rehmatullah Alaih Iss Aayat Ki Tafseer Me'n Farmaate Hai "Ya'ni Jin Logo'n Ke Dil Murdah Hai Aap Unhe'n Nahee'n Suna Sakte Aur Woh Log Kuffaar Hai". (Tafseer e Khaazin) Abul Barkaat Abdullah Bin Ahmed Nasafi Rehmatullah Alaih Farmaate Hai "Iss Aayat Me'n Kuffaar Ko Zindah Hone Aur Hawaas Durust Hone Ke Baawajood Murdo'n Ke Saath Tashbeeh Di Gayi Hai". ( Tafseer e Madarik) Hazrat Mulla Ali Qaari Rehmatullah Alaih Farmaate Hai "Murdo'n Se Muraad Kuffaar Hai'n Aur (Yahaa'n) Mutlaq Sunne Ki Nafi Nahee'n Balke Ma'ni Yeh Hai Ke Unka Sunna Naf'a Bakhsh Nahee'n Hota". (Mirqaatul Mafaateeh, Kitaabul Jihaad, Jild No.1, Tehtul Hadees 3967) Murdo'n Ke Sunne Ke Saboot Me'n In Hadeeso'n Ka Mutaale'aa Kiya Ja Sakta Hai. Hazrat Anas Bin Maalik Radiallahu Anhu Se Riwaayat Hai Ke Rasoolallah ﷺ Ne Irshaad Farmaaya "Jab Bande Ko Uski Qabr Me'n Rakh Diya Jaata Hai Aur Log Dafan Karke Palat'te Hai To Beshak Woh Yaqeenan Tumhaare Jooto'n Ki Aawaaz Sunta Hai. (Bukhari, Kitaabul Janaa'iz, 1/450, Hadees No.1338) Hazrat Umar Faarooque Radiallahu Anhu Farmaate Hai "Rasoolallah ﷺ Hume'n Kuffaar e Badar Ki Qatl Gaahe'n Dikhaate The Ke Yahaa'n Fulaa'n Kaafir Qatl Hoga Aur Yahaa'n Fulaa'n, Jahaa'n Jahaa'n Rasoolallah ﷺ Ne Bataaya Tha Wahi Wahi Unki Laashe'n Giri. Phir Huzoor ﷺ Ke Hukm Se Unki Laashe'n Ek Ku'nwe'n Me'n Bhar Di Gayi. Huzoor ﷺ Wahaa'n Tashreef Legaye Aur Un Kuffaar Ko Unka Aur Unke Baap Ka Naam Lekar Pukaara Aur Farmaaya : Jo Sachcha Wa'dah Khuda Aur Rasool Ne Tumhe'n Diya Tha Woh Tumne Bhi Paaliya? Kyu'nke Jo Haq Wa'dah Allah Ta'ala Ne Mujhe Diya Tha, Mai'n Ne To Use Paaliya. Hazrat Umar Radiallahu Anhu Ne Arz Ki : Ya Rasoolallah ﷺ Aap In Jismo'n Se Kyu'nkar Kalaam Karte Hai'n Jinme'n Roohe'n Nahee'n. Irshaad Farmaaya : Jo Mai'n Keh Raha Hoo'n Use Tum Inse Kuchh Zyaadah Nahee'n Sunte Lekin Inhe'n Yeh Taaqat Nahee'n Ke Mujhe Laut Kar Jawaab De. (Muslim, Kitaabul Jannat, Safha No.1536, Hadees No. 76 (2873)) Khulaasa Yeh Nikla Ke Marne Ke Ba'ad Bhi Qabr Waale Sunte Hai.